რაც უფრო მოახლოვდება არჩევნების თარიღი, ასეთი სიურპრიზი ბევრი იქნება, – ასე ეხმაურება თბილისის მერი კახა კალაძე ჟურნალისტებთან საუბრისას აშშ-ის პრეზიდენტის ჯო ბაიდენის მიღებაზე საქართველოს პრემიერ-მინისტრის მოწვევის გაუქმებას.

როგორც კალაძემ დღეს ჟურნალისტებს განუცხადა, ამ ყველაფრის მიზეზი არის ის, რომ ხელისუფლებამ თავისი ქვეყნის ეროვნული ინტერესები დაიცვა.

„რაც უფრო მოახლოვდება არჩევნების თარიღი, ასეთი სიურპრიზები ბევრი იქნება. ბევრი არასწორი განცხადება იქნება, როდესაც თეთრზე შავს გვეუბნებიან, ბევრი იქნება თვალებში ნაცრის შეყრის მცდელობა. ასე რომ, მოულოდნელი არაფერია. უბრალოდ გასაკვირია ჯერ მოწვევა, შემდეგ კი გაუქმება. ეს, რა თქმა უნდა, იმ კამპანიის ნაწილია, რომელსაც ვხედავთ ბოლო წლების და თვეების განმავლობაში. ამას აქვს ერთი მარტივი ახსნა – საქართველომ დაიცვა საკუთარი ქვეყნის, ხალხის და ეროვნული ინტერესები და ეს პოლიტიკა და დამოკიდებულება გაგრძელდება მომავალშიც. ჩვენ ვერ შეგვაშინებს ვერანაირი მუქარა, იმიტომ რომ ვაკეთებთ სწორ და რაც ყველაზე მთავარი და მნიშვნელოვანია, ქართულ საქმეს“, – განაცხადა კახა კალაძემ.

ამასთან, ჟურნალისტის კითხვას იმასთან დაკავშირებით, რომ საქართველოს ხელისუფლების ბოლოდროინდელი ქმედებების და განცხადებების ფონზე, არის თუ არა ბუნებრივი აშშ-ის პრეზიდენტის ეს გადაწყვეტილება, მერი პასუხობს:

„კიდევ ერთხელ ვიმეორებ, ჩვენ ასეთ სიურპრიზებს უნდა ველოდოთ, რაც უფრო მოუახლოვდება არჩევნების თარიღი. დღეს ოპოზიცია არ არსებობს ქვეყანაში, არჩევნებს ატარებენ უცხოური ძალები, ყოველ შემთხვევაში, ამის მცდელობა აქვთ. პირდაპირ საელჩოებში იგეგმება სხვადასხვა კამპანიები, თუ რა როგორ უნდა გაკეთდეს. დააკვირდით ოპოზიციურ რადიკალურ სპექტრს, ხალხს კი არ ესაუბრებიან, ისინი საარჩევნო კამპანიას ატარებენ საელჩოებში, უცხოელებისთვის. ამ ქვეყნის მომავალს და ბედს წყვეტს ქართველი ხალხი. ჩაბარდა წარსულს ის დრო, როდესაც გარედან მოდიოდა მითითებები, თუ როგორ უნდა ემოქმედა ხელისუფლებას. საქართველოს ხელისუფლება მოქმედებს ქართველი ხალხის მითითებებით. ყოველთვის დავიცავთ ჩვენს ინტერესს. საქართველოში მეორე ფრონტი არ და ვერ იქნება, ისევ და ისევ ქვეყნის ინტერესების გათვალისწინებით და ქვეყანა არ შეუერთდება სანქციებს“, – აღნიშნა კახა კალაძემ.

მისივე თქმით, მიღებაზე მოწვევა ჯერ გამოიგზავნა, შემდეგ კი მიიღეს გაუქმების გადაწყვეტილება, რათა „რადიკალურ ოპოზიციას, რომელიც სიკვდილ-სიცოცხლის ზღვარზეა და სულ ღაფავს, როგორმე ამ ქმედებებით დაეხმარონ“.

„ერთ რამეს გეტყვით, სულ რომ ბაიდენი ჩამოვიდეს საქართველოში და პირდაპირ ჩაერთოს საარჩევნო კამპანიაში, ამ რადიკალურ ოპოზიციას არაფერი ეშველება,“ – განაცხადა კახა კალაძემ.

მართალია, პროცესები გარედან იმართება, არის პირდაპირი განცხადებები, მაგრამ ქართველი ხალხი შესაბამის გადაწყვეტილებას მიიღებს, – განაცხადა დედაქალაქის მერმა, კახა კალაძემ მედიასთან.

კითხვაზე, იმართება თუ არა საქართველოში პროცესები გარედან, კახა კალაძის თქმით, საარჩევნო კამპანიები და რომელი პარტია ვისთან უნდა გაერთიანდეს, ეს კონკრეტულ საელჩოებში იგეგმება.

„არის პირდაპირ ფაქტები, განცხადებები, ქმედებები. კონკრეტულ საელჩოებში იგეგმება საარჩევნო კამპანიები, რომელი პარტია ვისთან უნდა გაერთიანდეს, როგორ უნდა დაიშალონ და ა.შ. ყველაფერი ცხადია. რაც არ უნდა მოხდეს, ამის მიუხედავად, ქართველი ხალხი შესაბამის გადაწყვეტილებას მიიღებს. ჩვენ დავამთავრებთ ამ ქვეყანაში აგენტურას და იმ მოღალატეების ბოგინს, რომლებიც ქვეყანას და მის ევროპულ მომავალს აზიანებენ. ქვეყანაში გვექნება მშვიდობა, მოხდება ქვეყნის ეკონომიკური განვითარება და იმ კონკრეტულ შედეგებს, რომელიც ჩვენ ევროინტეგრაციის გზაზე მივიღეთ, საქართველოს ხელისუფლება დაამთავრებს ევროკავშირში გაწევრიანებით“, – განაცხადა თბილისის მერმა.

რაც შეეხება დასავლეთის მხრიდან გადადგმულ ნაბიჯებს, კახა კალაძის თქმით, ეს ხდება იმის გამო, რომ მოწოდებების მიუხედავად, საქართველო ომში არ ჩაერთო.

„ყველაფერი ხდება ორი მიზეზის გამო – საქართველოს ხელისუფლება ატარებს და იცავს ამ ქვეყნის ინტერესებს. სხვა დანარჩენი კი არის აბსურდი. ის, რომ ჩვენ არ დავიწყეთ ომი და დღეს, რომ სისხლში გათხვრილები არ ვართ, ომსა და უბედურებაში არ ვართ და ქვეყანა თავზე არ გვენგრევა, ამის გამო ხდება ეს ყველაფერი. სხვა ქვეყნის ლიდერებს წითელ ხალიჩაზე ხვდებიან, ხელს ართმევენ. მე მტერს არ ვუსურვებ ისეთ შეხვედრებს, ისეთ წითელ ხალიჩებზე სიარულს და ისეთ ხელის ჩამორთმევას. მტერს არ ვუსურვებ იმას, რაც უკრაინელი ხალხის თავს ხდება. ჩვენმა ხელისუფლებამ მოახერხა და ქვეყანას აარიდა ის უბედურება, რაც დღეს უკრაინაში ხდება. დღეს, ჩვენი ახალგაზრდები ევროპაში სასწავლებლად მიდიან და ამის ნაცვლად მოუწევდათ ომში წასვლა, რადგან პირდაპირ მოწოდებები იყო, რომ საქართველო ომში ჩართულიყო“, – აღნიშნა კახა კალაძემ.

ხელისუფლების პასუხისმგებლობაა, ვიდგეთ იქ, სადაც ქართველ ხალხს, ეროვნულ ინტერესებს სჭირდება, – ასე უპასუხა თბილისის მერმა, კახა კალაძემ ჟურნალისტის კითხვას საქართველო-ამერიკის ურთიერთობაში „ქართული ოცნების“ პასუხისმგებლობის თაობაზე.

კალაძის განმარტებით, არჩევნების შემდეგ გაეცემა პასუხი კითხვებს, თუ ვისი დავალებით მოქმედებდა 2008 წელს წინა ხელისუფლება და ვისი დავალებით დაითმო ტერიტორიები.

„ხელისუფლების პასუხისმგებლობაა, ვიდგეთ იქ, სადაც ქართველ ხალხს, ეროვნულ ინტერესებს სჭირდება. ქვეყანაში ვიღაცის ინტერესების გატარებით კი არ ვიმოქმედოთ, არამედ საკუთარი ინტერესები დავიცვათ და არ გავხვიოთ ცეცხლის ალში ქვეყანა. არ გახსოვთ პირდაპირ მოწოდებები, მეორე ფრონტი რომ უნდა გახსნილიყო ქვეყანაში. ჩვენ არ გვჭირდება მეორე ფრონტი. ომგამოვლილი ქვეყანა ვართ, დავკარგეთ ტერიტორიები იმ მოღალატეობრივი ქმედებებით, რაც „ნაციონალურმა მოძრაობამ“ 2008 წელს, გარედან დავალების შესრულებით გააკეთა. ყველაფერს გაეცემა პასუხი არჩევნების შემდეგ, ვისი დავალებით მოქმედებდა „ნაციონალური მოძრაობა“, ვისი დავალებით მოხდა ტერიტორიების დათმობა“, – განაცხადა კახა კალაძემ.

თბილისის მერის თქმით, მოწოდებებისა და ზეწოლის მიუხედავად, ხელისუფლება მომავალშიც დაიცავს ქვეყნის ინტერესებს.

„მოწოდებები, მოთხოვნები, შანტაჟები გაგრძელდა, ჩვენ კი ვიცავთ ჩვენი ქვეყნის ინტერესებს, არავის მივცემთ იმის შესაძლებლობას, ვინც არ უნდა იყოს, თავისი ინტერესებისთვის გამოიყენოს ისეთი პატარა არ უნდა იყოს, თავისი ინტერესებისთვის გამოიყენოს ისეთი პატარა ქვეყანა, როგორიც საქართველოა. ჩვენ გვაქვს დიდი ისტორია, კულტურა, ვამაყობთ ჩვენი წარსულით და ყოველთვის დავიცავთ ჩვენს ეროვნულ ინტერესს“, – აღნიშნა კახა კალაძემ.

როგორ შეიძლება, ადეიშვილი იქ იმყოფებოდეს, სადაც დღეს იმყოფება?! ჩვეულებრივი კრიმინალია და თავი იყო იმ ბოროტების, რომელიც სააკაშვილის ხელისუფლების სახით გვყავდა, – ასე აფასებს დედაქალაქის მერი კახა კალაძე ყოფილი გენერალური პროკურორის, ზურაბ ადეიშვილის ვიზიტს გაერო-ში.

„ზუსტად ის ადამიანები, რომლებიც დღეს ჩვენ გვეუბნებიან, რომ საქართველომ უკან გადადგა ნაბიჯები, არიან ისევ ისინი, ვინც ისეთ კრიმინალებს, როგორებიც არიან ადეიშვილი, სააკაშვილი, მერაბიშვილი და რადიკალური ოპოზიციის წარმომადგენლები, თავის გვარამიათი, მელიათი, უწოდებენ დემოკრატიის შუქურას. ახალგაზრდებს რომ ქუჩაში ხოცავდნენ, ბიზნესს ატერორებდნენ, ადამიანებს საკუთარ ქონებას ართმევდნენ და სახელმწიფოზე აფორმებინებდნენ, შეზღუდული იყო გამოხატვისა და სიტყვის თავისუფლება, არ არსებობდა მედია პლურალიზმი, ამაზე გვეუბნებოდნენ, რომ თითქოს დემოკრატიის შუქურა იყო. მე ხომ არ ვცდები, ხომ ასე გვეუბნებოდნენ?“, – განაცხადა კალაძემ.

კახა კალაძის თქმით, საზოგადოება ყველაფერს კარგად ხედავს.

„ხალხი ყველაფერს ვხედავთ, ვაფასებთ რეალურად, ანალიზის გაკეთების შესაძლებლობა გვაქვს, კარგად ვიცით, ვინ არის ამ ქვეყნის მტერი და ამ ქვეყნის მოყვარე, საქართველოს ხელისუფლება ატარებს ქართველი ხალხის ინტერესს,  ეროვნულ ინტერესს, ვიცავთ საკუთარ ინტერესს და ხალხს და ასე გაგრძელდება მომავალშიც. ვიცით, რაც ხდება და როგორც ხდება. მაქსიმალურად ცდილობენ, რომ თავის აგენტურას ხელი დააფარონ. რაც არ უნდა კრიმინალები იყვნენ, გვეუბნებიან, რომ დემოკრატიის შუქურები არიან. როგორ შეიძლება, ადეიშვილი იქ იმყოფებოდეს, სადაც დღეს იმყოფება?! ჩვეულებრივი კრიმინალია და თავი იყო იმ ბოროტების, რომელიც სააკაშვილის ხელისუფლების სახით გვყავდა. წარმოუდგენელია ეს დამოკიდებულება და ქართველი ხალხი ამ ყველაფერზე 26 ოქტომბერს გასცემს შესაბამის პასუხს“, – განაცხადა კახა კალაძემ.

საქართველოს იუსტიციის ყოფილი მინისტრი ზურაბ ადეიშვილი, რომელიც საქართველოში რამდენიმე საქმეზე ბრალდებული, რამდენიმეზე კი მსჯავრდებული და ძებნილია, გაერო-ს შტაბბინაში იმყოფება.

როდესაც ძებნილ კრიმინალს გაერო-ში მიიწვევ, როგორც ჩანს, გაინტერესებს ამ ადამიანის დამოკიდებულება კონკრეტული საკითხებისადმი,ძებნილი კრიმინალის, ზურაბ ადეიშვილის მიწვევით დასტურდება მიმწვევი მხარის დამოკიდებულება ქართველი ხალხის მიმართ, – ამის შესახებ პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა.

ოხანაშვილის თქმით, ადეიშვილის მსგავსი კრიმინალის აზრების მოსმენა გაერო-ში თუ ვინმეს აინტერესებს, ეს ქართველი ხალხის მიმართ მათ დამოკიდებულებაზე მეტყველებს.

„ეს მიუთითებს მათ დამოკიდებულებაზე კანონის უზენაესობის და მართლმსაჯულების ინტერესების დაცვის მიმართ. სამწუხაროა. არ შეიძლება, შეურაცხყოფა მიაყენო ქართველ ხალხს, რომელმაც განიცადა იმ რეპრესიული რეჟიმის დამოკიდებულება, რომელსაც წარმოადგენდა, მათ შორის ზურაბ ადეიშვილი. ეს ჩვენს მიმართ დამოკიდებულებაზე კიდევ ერთხელ მეტყველებს“, – განაცხადა ოხანაშვილმა.

საქართველოს საგარეო საქმეთა სამინისტროში აცხადებენ, რომ აშშ-ში საქართველოს ელჩს, დავით ზალკალიანს თანამდებობა არ დაუტოვებია.

როგორც უწყებაში აღნიშნეს, გავრცელებული ინფორმაცია, თითქოს დავით ზალკალიანმა ელჩის თანამდებობა დატოვა, სიმართლეს არ შეესაბამება.

„მედიაში გავრცელებული ინფორმაცია ამერიკის შეერთებულ შტატებში საქართველოს საგანგებო და სრულუფლებიანი ელჩის დავით ზალკალიანის მიერ თანამდებობის დატოვების შესახებ არ შეესაბამება სიმართლეს“, – აცხადებენ საგარეო უწყებაში.

სადმე გაგონილა, რომ გინდოდეს სტუმრის მიღება, დაპატიჟო და მერე კარები დაუხურო? ეს რომელ პარტნიორულ ურთიერთობაში ჯდება? – შესაძლებელია, აშშ-ს დღევანდელ პრეზიდენტს არც ამ შეხვედრის დანიშვნა სცოდნოდა და არც გაუქმება. როგორც ჩანს, აქაც უცხოური ძალები მოქმედებენ, – ამის შესახებ „ხალხის ძალის“ დეპუტატმა, გურამ მაჭარაშვილმა განაცხადა, რითაც ამერიკის შეერთებული შტატების პრეზიდენტის, ჯო ბაიდენის მიღებაზე საქართველოს პრემიერ-მინისტრ ირაკლი კობახიძის მიწვევის გაუქმებას გამოეხმაურა.

მისი თქმით, ამერიკულმა მხარემ შეხვედრის გაუქმებით შეურაცხყოფა არა ირაკლი კობახიძეს, არამედ საქართველოს და ქართველ ხალხს მიაყენა.

„იმით, რომ ამერიკის დღევანდელმა ადმინისტრაციამ ჯერ დანიშნა და მერე თვითონ გააუქმა შეხვედრა, შეურაცხყოფა ირაკლი კობახიძეს კი არ მიაყენა, შეურაცხყოფა მიაყენა ქართველ ხალხს და საქართველოს. ეს რის საპასუხოდ არის იცით? როცა ქართველმა ხალხმა, მათ შორის, ქართველმა ჯარისკაცებმა თავის სიცოცხლის და ჯანმრთელობის ფასად, ამერიკელ ჯარისკაცებთან ერთად დაიცვეს მშვიდობა ერაყში, ავღანეთში თუ სხვა სახელმწიფოში. ეს არის ჩვენი მხრიდან გადადგმული ნაბიჯი და ამერიკელების ე.წ. დაცინვითი ჯერ, როგორც ჩანს, გამოგონილი შეხვედრა და მერე გაუქმება. ესეც იმის მომასწავებელია, როცა ჩვენ გვეუბნებიან, აბა, სად ებრძვიან ქართულ ტრადიციებს? აბა, ვინ გეუბნებათ, რომ ან ომი დაიწყეო ან ტრადიციები გააუქმე? ა, ბატონო, იხილეთ ადმინისტრაციის გადაწყვეტილება. სადმე გაგონილა, რომ გინდოდეს სტუმრის მიღება, დაპატიჟო და მერე კარები დაუხურო? ეს რომელ პარტნიორულ ურთიერთობაში ჯდება? ეს არის ზუსტად იმის მტკიცებულება და როგორც ჩანს, ამაში გვეხმარებიან ჩვენი „უცხოელი მეგობრები“, ანუ უცხოური ძალები იმის მტკიცებაში, რასაც ჩვენ ვამბობთ, რომ უცხოური ძალა ჰყავს დღეს სამწუხაროდ, ოპოზიციაში არა მხოლოდ ქართულ ხელისუფლებას, არამედ ქართულ სახელმწიფოს. ა, ბატონი, პირდაპირ ამბობენ, რომ დღეს ოპოზიცია არაფრის მაქნისია საქართველოში და ჩვენ ვაკეთებთ მათ მაგივრად შეურაცხმყოფელ განცხადებებს საქართველოს და ქართველი ხალხის ტრადიციების და ეკლესიის წინააღმდეგ. შესაძლებელია, ამერიკის შეერთებული შტატების დღევანდელ პრეზიდენტს არც ამ შეხვედრის დანიშვნა სცოდნოდა და არც გაუქმება. როგორც ჩანს, აქაც უცხოური ძალები მოქმედებენ და შეიძლება უთხრეს, რომ იცოდე დანიშნული იყო შეხვედრა და ახლა ასეა საჭირო და გავაუქმეთო. ეს სამწუხარო მოცემულობა არსებობს და მე დარწმუნებული ვარ, ამერიკელ ხალხს ნამდვილად უნდა პარტნიორული ურთიერთობა და თავად მიიღებს ამ გადაწყვეტილებას,“ – განაცხადა მაჭარაშვილმა.

ცნობისთვის, შეერთებული შტატების პრეზიდენტი ჯო ბაიდენი, 25 სექტემბერს, ნიუ-იორკში მსოფლიო ლიდერებს და გაეროს მაღალჩინოსნებს ტრადიციულ მიღებაზე უმასპინძლებს. „ამერიკის ხმის” ინფორმაციით, პრეზიდენტის მიღებაზე მიწვეულთა სიაში, თავდაპირველად იყო ირაკლი კობახიძე, რომელიც გაეროს გენერალურ ასამბლეაზე საქართველოს დელეგაციას ხელმძღვანელობს, თუმცა ბაიდენის ადმინისტრაციამ მიწვევა გააუქმა. მიწვევის გაუქმების შესახებ ინფორმაციას „ამერიკის ხმას“ ადმინისტრაციის

მაღალი რანგის ოფიციალური პირი და კიდევ ერთი წყარო კონგრესიდან უდასტურებს. გარდა ამისა, პრემიერ-მინისტრის მიწვევის გაუქმებასთან ერთად, ადმინისტრაციამ ასევე უარი თქვა საქართველოს დელეგაციასთან ყველა შეხვედრაზე და პრემიერ-მინისტრ კობახიძესთან შეხვედრაზე, ასევე უარი თქვა ჯეიკ სალივანმა, თეთრი სახლის ეროვნული უსაფრთხოების მრჩეველმა.

სალომე ზურაბიშვილს 1 000 მსჯავრდებული ელოდება – ისინი გუშინ და გუშინწინ უკვე თავის ოჯახებში უნდა ყოფილიყვნენ, მაგრამ არ არიან იმიტომ, რომ სალომე ზურაბიშვილს მოქალაქეებზე ფიქრი ეზარება და დიდი პოლიტიკითაა დაკავებული, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისივე მტკიცებით, სალომე ზურაბიშვილს „პრეზიდენტის ინსტიტუტი მისი უკანა ეზო ჰქონია“.

„1 000 მსჯავრდებული, რომელიც ერთი კვირაა სასჯელაღსრულების დაწესებულებაში ატარებს, არის იქ იმიტომ, რომ სალომე ზურაბიშვილი თაღლითი ხაზარაძის და გახარიას საკითხებითაა დაკავებული. მას მსჯავრდებულებისთვის არ სცალია, ეს მდგომარეობა გვაქვს. ფაქტობრივად, პროფანაციად აქცია სალომე ზურაბიშვილმა პრეზიდენტის ინსტიტუტი, აბსოლუტურად, მისთვის აღარანაირი წესი არ არის, პრეზიდენტის ინსტიტუტი მისი უკანა ეზო ჰქონია, როგორც თანამდებობა.

ხედავთ, რომ კონსტიტუციას პატივს არ სცემს, კონსტიტუციას ყოველ ფეხის ნაბიჯზე არღვევს. მათ შორის, ამ რაღაც წინასაარჩევნო პერიპეტიებით დაკავებულია, რომელიც მისი საქმე არ არის და ამ დროს კონსტიტუციასაც არღვევს. მაშინ, როდესაც ადამიანები სასჯელაღსრულების დაწესებულებაში არიან და მას 1 000 ადამიანი ელოდება. ისინი გუშინ და გუშინწინ უკვე თავის ოჯახებში უნდა ყოფილიყვნენ, მაგრამ ისინი თავის ოჯახებში არ არიან იმიტომ, რომ სალომე ზურაბიშვილს მოქალაქეებზე ფიქრი ეზარება და დაკავებულია მაღალი მატერიის საკითხებით, დიდი პოლიტიკითაა დაკავებული“, – განაცხადა საქართველოს პარლამენტის თავმჯდომარემ.