როგორ შეიძლება სხვა რაღაცებზე ვილაპარაკოთ, მაშინ, როდესაც ვხედავთ „ქართული ოცნება“ როგორ აბეტონებს საქართველოს მომავალს, როგორ ანადგურებს ჩვენს პერსპექტივას ევროკავშირში, – ამის შესახებ,,ერთიანობა“ – „ნაციონალური მოძრაობის“ ერთ-ერთმა ლიდერმა თამარ კორძაიამ ხაშურში, მოქალაქეებთან შეხვედრისას განაცხადა.

„როგორ შეიძლება ჩვენ ახლა სხვა რაღაცებზე ვილაპარაკოთ, სხვა თემები გვქონდეს მაშინ, როდესაც ვხედავთ „ქართული ოცნება“ როგორ აბეტონებს საქართველოს მომავალს, როგორ ანადგურებს ჩვენს პერსპექტივას ევროკავშირში. დღეს ჩვენ აქ, ხაშურში ჩვენს მოქალაქეებს რომ ვხვდებოდით და ველაპარაკებოდით, წარმოუდგენელი შრომა აქვთ, მთელი ცხოვრება ვმუშაობთ და ეს შრომა უნდა იყოს დანახული და დაფასებული“ , – განაცხადა თამარ კორძაიამ.

„ნაციონალური მოძრაობა“ საქართველოში რუსეთის შემოსვლას და ოკუპაციას ამართლებს, როგორც ტალიავინის დასკვნაზე ხელმოწერით, ისე ევროპის საბჭოს საპარლამენტო ასამბლეის რეზოლუციაზე ხელმოწერით, – ამის შესახებ საპარლამენტო უმრავლესობის წევრმა, გია ვოლსკიმ ჟურნალისტებთან საუბრისას განაცხადა.

როგორც ვოლსკიმ „ქართული ოცნების“ პოლიტსაბჭოს განცხადებაზე საუბრისას აღნიშნა, რომ არა დღევანდელი მმართველი გუნდის ხელისუფლებაში მოსვლა, „არავინ უწყის როგორ სამართლებრივ მდგომარეობაში იქნებოდა საქართველო“.

„პოლიტსაბჭოს განცხადება, უნდა აღინიშნოს, რომ არის ფაქტების კონსტატირება. ზუსტად ამ საკითხებთან და ფაქტებთან დაკავშირებით, რაზედაც ტალიავინმა ისაუბრა, „ნაცმოძრაობას“ ხელი აქვს მოწერილი. პრაქტიკულად, საქართველოში რუსეთის შემოსვლას და ოკუპაციას, ამართლებს, როგორც ტალიავინის დასკვნაზე ხელმოწერით, ისე ევროპის საბჭოს საპარლამენტო ასამბლეის რეზოლუციაზე ხელმოწერით. ეს რეალობა დადგა და მის უკან რა პროცესები იდგა, რა თქმა უნდა, გამოსაძიებელია. დამატებით, მოსაპოვებელია მასალები ამ თემაზე.

რომ არა „ქართული ოცნების“ მოსვლა ხელისუფლებაში, რომ არა სტრასბურგში და ჰააგაში ჩვენ მიერ მოგებული საქმეები, პრაქტიკულად, რა სამართლებრივ მდგომარეობაში აღმოჩნდებოდა საქართველო, არავინ უწყის. რამ განაპირობა ეს პროცესი? ასეთი ნაბიჯების გადადგმა, რომელსაც არაფერი სხვა არ ჰქვია, თუ არა მოღალატეობრივი ნაბიჯები.

ინტერვიუს შინაარსი არის ერთი, რომ ამ თემასთან დაკავშირებით, რასაც ჰქვია რუსეთის შემოყვანა საქართველოში, სააკაშვილს მიუძღვის ბრალი. ეს არის მთავარი აქცენტი და რაც გამაოგნებელია, სააკაშვილი თავადვე აწერს ამას ხელს.

გარდა ამისა, ეჭვებს იწვევს ის, თუ რა აუცილებელი იყო ტალიავინთან ინტერვიუს აღება ამ ხნის შემდგომ. რის დადასტურება სურდათ, რაც აშკარაა, რომ არ გამოუვიდათ. კიდევ უფრო გამოაშკარავდა ის შესაძლო დანაშაულები, თუ სამართლებრივად ვისაუბრებთ, რომელიც სააკაშვილმა ხალხის და ქვეყნის წინააღმდეგ ჩაიდინა.

რატომ გააკეთა სააკაშვილმა ისე, რომ რუსეთის მიერ საქართველოს ტერიტორიის ოკუპაცია შესაძლებელი გახდა? ხომ მიდიოდა მოლაპარაკება? რატომ გადაწყვიტა, რომ არჩევნების გზით ევლო და არაკონსტიტუციური არჩევნები ჩაატარა. პუტინს რომ გადაწყვეტილი ჰქონდა [საქართველოს ტერიტორიაზე შემოსვლა], ამით საშუალება კი არ უნდა მისცე, რომ აღასრულოს“, – განაცხადა ვოლსკიმ.

ამ განცხადებას ორმხრივი დანიშნულება აქვს: ერთი მხრივ, ის ესხმის წინა ხელისუფლებას და ფაქტობრივად, საქართველოში რუსეთის აგრესიას ამართლებს და დამნაშავედ ქართული მხარე გამოჰყავს; და მეორე მხრივ, ეს ანალოგი ვრცელდება უკრაინასთან დაკავშირებით. ეს არის „ქართული ოცნების” ანტიდასავლური პოლიტიკის გაგრძელება,- ამის შესახებ ოპოზიციონერმა დეპუტატმა, რომან გოცირიძემ „ქართული ოცნების” პოლიტიკური საბჭოს განცხადებასთან დაკავშირებით განაცხადა.

მისი თქმით, განცხადება ადასტურებს იმას, რომ „ქართული ოცნება” ღალატის გზას დაადგა”.

„ქართული ოცნების” დღევანდელი განცხადება კიდევ ერთხელ ადასტურებს იმ მოღალატეობრივ ფაქტს, რომ “ქართული ოცნება” რუსეთის მხარეს დგას. ირიბი მინიშნებაა, რომ ომი არ იქნებოდა, უკრაინას პროვოცირება რომ არ მოეხდინა. ამ განცხადებას ორმხრივი დანიშნულება აქვს: ერთი მხრივ, ის ესხმის წინა ხელისუფლებას და ფაქტობრივად, საქართველოში რუსეთის აგრესიას ამართლებს და დამნაშავედ ქართული მხარე გამოჰყავს; და მეორე მხრივ, ეს ანალოგი ვრცელდება უკრაინასთან დაკავშირებით. ეს არის “ქართული ოცნების” ანტიდასავლური პოლიტიკის გაგრძელება. კიდევ ერთხელ მიუთითებს იმ ფაქტს, რომ “ქართული ოცნება” დაადგა ღალატის გზას. აი, ამ უმძიმეს გეოპოლიტიკურ ვითარებაში, ის არის რუსეთის მოკავშირე და ის ამ არჩევნებში უნდა დამარცხდეს თუ გვინდა, ქვეყანა დაადგეს ევროპული განვითარების გზას.

„ქართული ოცნება” 12 წელია იმეორებს იმას, რომ დამნაშავე არის ქართული მხარე. ამართლებდა რა, რუსეთის აგრესიას საქართველოში და მას განიხილავდა, როგორც საქართველოს ხელისუფლების ე.წ პროვოკაციულ ნაბიჯებზე რეაგირებას. რუსეთის უკრაინაში შეჭრის შემდგომ, ეს თემა კიდევ უფრო გაამწვავა და არავითარი მნიშვნელობა არ აქვს ინტერვიუ გამოქვეყნდებოდა თუ არა. დამახინჯებულ ინტერპრეტაციას ეწევა ამ ინტერვიუსი”, – განაცხადა გოცირიძემ.

ცნობისთვის, „ქართული ოცნების” პოლიტიკურმა საბჭომ გაავრცელა განცხადება, რომელშიც აღნიშნულია, რომ “არსებობს ყოფილი ხელისუფლება, რომელსაც აღიარებული აქვს 2008 წლის ომის დაწყება, ანუ საკუთარი ქვეყნისა და ხალხის წინაშე ღალატის ჩადენა და კვლავაც ხელისუფლებაში დაბრუნების სურვილი ამოძრავებს, ასეთ პირობებში, კრებსითი „ნაციონალური მოძრაობის“ მიერ ჩადენილი დანაშაულის სამართლებრივი შეუფასებლობა დანაშაულის ტოლფასია”.

როგორც განცხადებაშია აღნიშნული, “რადიო თავისუფლებამ” გამოაქვეყნა ინტერვიუ ჰაიდი ტალიავინთან, რომლის დასკვნა 2008 წლის ომზე, “ნაციონალური მოძრაობისთვის” განაჩენის ტოლფასია.

განცხადებაში ნათქვამია, რომ „რადიო თავისუფლებას“ სურდა, „ტალიავინისგან მიეღო განსხვავებული პოზიცია, რაც წლების წინ დაწერილ უმძიმეს დასკვნას შეამსუბუქებდა, თუმცა, ეს მცდელობა წარუმატებელი გამოდგა“.

„რუსეთის პოზიციისგან განსხვავებით, სააკაშვილის ხელისუფლების ქმედებებს არავითარი ახსნა არა აქვს. ტალიავინის დასკვნის თანახმად, საქართველოს მაშინდელმა ხელისუფლებამ 7 აგვისტოს განახორციელა მასირებული შეიარაღებული თავდასხმა ცხინვალზე. ამით, მან რუსეთის ფედერაციას შეუქმნა საქართველოში შემოჭრის სამართლებრივი საფუძველი, რითაც რუსეთმა ისარგებლა კიდეც და საპასუხო სამხედრო ოპერაციის წარმოება დაიწყო, რასაც საქართველოს ტერიტორიების ოკუპაცია მოჰყვა. სააკაშვილის რეჟიმის მიერ ამგვარი მტკიცებულებებისა და დასკვნების შემცველ დოკუმენტზე დათანხმება სრული სიცხადით ადასტურებს, რომ ამ ადამიანებმა ჯერ შესაბამისი მტკიცებულებების შექმნით და შემდეგ დასკვნის დადასტურებით, ჩაიდინეს უმძიმესი ღალატი საკუთარი ქვეყნისა და ხალხის წინაშე”, – ნათქვამია განცხადებაში.

პარტია „გახარია საქართველოსთვის“ თავმჯდომარის მოადგილე, ნათია მეზვრიშვილი „ქართულ ოცნებას“ მოუწოდებს, ე.წ. ქოლ-ცენტრების საქმეზე საპარლამენტო საგამოძიებო კომისია შექმნან.

როგორც ნათია მეზვრიშვილმა ბრიფინგზე განაცხადა, თუ „ქართული ოცნება“ გამოძიებაზე უარს იტყვის, კიდევ ერთხელ დაადასტურებს იმას, რომ ხელისუფლება „შავ ფულზე“, კორუფციასა და ძალადობაზე დგას.

მეზვრიშვილი ასევე მოუწოდებს ოპოზიციას, საგამოძიებო კომისიის შექმნას მხარი დაუჭიროს.

„ოცნებას“ მოვუწოდებთ, ახლა მაინც შექმნან საპარლამენტო საგამოძიებო კომისია „ქოლ-ცენტრების საქმეზე“. თუ ამ დანაშაულებრივი ფულით თქვენვე არ სარგებლობთ, თქვენივე ინტერესი უნდა იყოს ამ დანაშაულის სრულყოფილი გამოძიება და არჩევნებამდე სიმართლის დადგენა, რათა საფრთხე არ შეექმნას არჩევნების თავისუფლებას და სამართლიანობას.

ჰელსინკის კომისიამ დაადგინა ის, რასაც „ოცნება“ მალავს და რასაც დღემდე ხელს აფარებს პარლამენტი, სპეციალური საგამოძიებო სამსახური და პროკურატურა.

ჯერ კიდევ 2023 წლის 24 აპრილს დავაყენეთ ინიციატივა ქოლ-ცენტრებზე საგამოძიებო კომისიის შექმნაზე, რაზეც ხელისუფლებამ უარი თქვა. სიმართლის დადგენით შეშინებულმა „ოცნებამ“ პარლამენტში საბოტაჟი მოაწყო, რომ კომისიის შექმნისთვის ხმა არ მიეცა.

დღემდე პროკურატურაში შავი ფულის გამოყენებასთან და პოლიტიკურ კორუფციასთან დაკავშირებით ჩვენს მიერ შეტანილ არც ერთ განცხადებაზე გამოძიებაც არ დაწყებულა.

პენსიონერების ფულის მოპარვის პარალელურად, 2024 წლის აპრილიდან „ოცნებამ“ „ქოლ-ცენტრების“ გამოყენება აქციების მონაწილე ხალხის წინააღმდეგ დაიწყო.

ზუსტად ორი თვე გავიდა, რაც სპეციალური საგამოძიებო სამსახურისგან „ქოლ-ცენტრების“ მეშვეობით აქციის მონაწილეების მიმართ განხორციელებული მუქარის გამოძიება მოვითხოვეთ და დღემდე შედეგი არ არის.

ჰელსინკის კომისიამ დღეს კიდევ ერთხელ დაადასტურა ის, რაც საზოგადოებას ცოტა ხნის წინ ვაცნობეთ – „ოცნება“ მის მიერ შავი ფულით მოსყიდულ ზონდერ-ჯგუფებს წინასწარ გაურიგდა, განსხვავებული აზრის მქონე ხალხზე ფსიქოლოგიურ და ფიზიკურ ძალადობას „მწვანე აუნთო“ და ამნისტიით ხელშეუხებლობას დაჰპირდა.

„ოცნების“ უარიც გამოძიებაზე, კიდევ ერთხელ დაადასტურებს იმას, რასაც ვამბობდით, რომ „ოცნება“ შავ ფულზე, კორუფციაზე და ძალადობაზე დგას. 26 ოქტომბერს ერთად უნდა დავამარცხოთ კორუფცია, შავი ფული და ძალადობა პოლიტიკაში.

მოვუწოდებთ ოპოზიციას, საგამოძიებო კომისიის შექმნას მხარი დაუჭიროს“,- განაცხადა მეზვრიშვილმა.

მივესალმები სენატორ ჯინ შაჰინის და მაიკ ტერნერის ვიზიტს საქართველოში – ეს ვიზიტი არის ნაწილი, ძალიან მნიშვნელოვანი ორპარტიული პოლიტიკის, რომლის ამოცანაა არჩევნების გაყალბებისთვის ხელის შეშლა,- ამის შესახებ საქართველოს მესამე პრეზიდენტი, მიხეილ სააკაშვილი სოციალურ ქსელში წერს.

ამასთან, განმარტავს, რომ მაიკ ტერნერმა მიხეილ სააკაშვილის გათავისუფლების მოთხოვნის სახელმწიფო დეპარტამენტს წერილი ოფიციალურად გაუგზავნა.

„მივესალმები სენატორ ჯინ შაჰინის და ამერიკის წარმომადგენლობათა პალატის, სადაზვერვო კომიტეტის თავმჯდომარის მაიკ ტერნერის ვიზიტს საქართველოში.

ეს ვიზიტი არის ნაწილი, ძალიან მნიშვნელოვანი ორპარტიული პოლიტიკის, რომლის ამოცანაა არჩევნების გაყალბებისთვის ხელის შეშლა და გაყალბების შემთხვევაში ამ არჩევნების შედეგების დაკანონების არ დაშვება.

ივანიშვილმა იყიდა ქონება რუსეთში, რაც ნიშნავს რომ ამზადებს დიდ უბედურებას საქართველოში, რომლის შემდეგ გაქცევა მხოლოდ რუსეთში შეეძლება.

ასევე მიხარია რომ სენატორი შაჰინი ხშირად საუბრობს ჩემზე, ხოლო მაიკ ტერნერმა ცოტახნის წინ ჩემი გათავისუფლების მოთხოვნის წერილი გაუგზავნა ოფიციალურად სახელმწიფო დეპარტამენტს. მადლობელი ვარ იმისთვისაც რომ ჩემი ინფორმაციით, სხვადასხვა შეხვედრებზე ამჯერადაც ჩემი უკანონო და უსამართლო პოლიტპატიმრობის საკითხი არაერთხელ წამოიჭრა”,- წერს სააკაშვილი.