Home Blog Page 68

ქვეყანა, რომელსაც ნატო და დასავლეთი რუსეთის გამო კარგავს – რას წერს Newsweek-ი საქართველოზე

ამერიკული ჟურნალის „ნიუსვიქის” (Newsweek) ელექტრონულ ვერსიაში (ვებ-გვერდზე) გამოქვეყნებულია სტატია სათაურით „ქვეყანა, რომელსაც ნატო და დასავლეთი რუსეთის გამო კარგავს“ (ავტორი – მეთიუ ტოსტევინი).

გთავაზობთ პუბლიკაციას შემოკლებით:

საქართველოში თითქმის ყველა შენობაზე – სამთავრობო კომპლექსებიდან პოლიციის ადგილობრივ განყოფილებებამდე – ევროკავშირის ოქროსფერვარკვლავიანი ლურჯი ბაირაღები ფრიალებენ, რომლებიც ისეთივე სიმრავლით გამოირჩევიან, როგორც წმინდა გიორგის ჯვრიანი ეროვნული დროშები.

მაგრამ, დასავლური სიმბოლიკის სიუხვისა და მოსახლეობის უმრავლესობის პროდასავლური (ევროატლანტიკური) განწყობის მიუხედავად, საქართველოს მთავრობის ურთიერთობა აშშ-სტანა და სხვა დასავლურ ქვეყნებთან სწრაფად უარესდება. ამ ფონზე იზრდება რუსეთის პრეზიდენტის ვლადიმერ პუტინის პოპულარობა. დასავლეთის ქვეყნები აცხადებენ, რომ რუსეთის მიერ უკრაინის წინააღმდეგ დაწყებულმა ომმა ევროატლანტიკური სოლიდარობა განამტკიცა, რაც ნატოში ფინეთისა და შვედეთის მიღებით გამოიხატა, თუმცა ოდესღაც ჩრდილოატლანტიკური ალიანსის ზღურბლთან მდგარი საქართველო, რომელიც წუთი-წუთზე ნატოს წევრი უნდა გამხდარიყო, როგორც ჩანს, ახლა უკუმიმართულებით მოძრაობს.

საქართველო თავისი 3,7-მილიონიანი მოსახლეობით აშშ-ის იმავე სახელწოდების მქონე შტატზე მხოლოდ ერთი მესამედით არის დიდი. უკრაინისა და ახლო აღმოსავლეთის კონფლიქტების ეპოქაში თბილისის პრობლემები ვაშინგტონის პრიორიტეტებში არ შედის, მაგრამ რეგიონს სტრატეგიული მნიშვნელობა აქვს: საქართველო ესაზღვრება რუსეთს, თურქეთს, მასთან ახლოს მდებარეობს ირანი. საქართველოს ტერიტორიაზე გადის ნავთობ- და გაზსადენების სატრანზიტო მარშრუტი. ქვეყნები, რომლებიც დღეს მათ წინაშე გაჩენილი შესაძლებლობების გამოყენებაზე ფიქრობენ, ინტერესით უყურებენ საქართველოს: შეძლებს თუ არა დასავლეთი მის შენარჩუნებას თავის გავლენის ქვეშ?

საქართველოს მთავრობის პროდასავლელი მოწინააღმდეგეები სიტუაციას რუსეთის მიერ წარმოებულ ჰიბრიდულ ომად წარმოაჩენენ – თბილისის გაკონტროლების მიზნით – შიშობენ, რომ ოქტომბერში დაგეგმილი საპარლამენტო არჩევნები შეიძლება ბოლო შანსი აღმოჩნდეს მთავრობის პრორუსული კურსის შესაკავებლად. 

„ჩვენ უკვე ვიყავით საბჭოთა კავშირის შემადგენელი ნაწილი და ვიცით, თუ რას ნიშნავს დამოუკიდებლობის დაკარგვა“, – აცხადებს ოპოზიციონერი გიორგი ვაშაძე, – „ჩვენ ამ საპარლამენტო არჩევნებს საქართველოს გეოპოლიტიკურ არჩევნადაც ვთვლით“.

არც საქართველოს საგარეო საქმეთა სამინისტრო და არც პრემიერ-მინისტრის გიორგი კობახიძის ოფისი „ნიუსვიქისათვის“ კომენტარს არ აკეთებენ. ჩუმად არის რუსეთის საგარეო საქმეთა სამინისტროც.

დასავლეთის ქვეყნები აპროტესტებენ საქართველოს მმართველი პარტიის „ქართული ოცნების“ მიერ გატარებულ კურსს, რომელიც, მათი აზრით, ავტორიტარული და ანტიდემოკრატიულია. ამას წინათ, ქვეყნის საშინაო საქმეებში უცხოური ჩარევების აღსაკვეთად, პარლამენტმა მიიღო რუსული კანონის მსგავსი სამართლებრივი აქტი „უცხოური აგენტების“ („უცხოური გავლენის გამჭვირვალობის“) შესახებ, რომელიც დამოუკიდებელი მასმედიისა და არასამთავრობო ორგანოზაციების დასავლური დაფინანსების წინააღმდეგ არის მიმართული.

შეიძლება ითქვას, რომ  დასავლურ ინსტიტუტებთან ურთიერთობის ასაწყობად ათწლეულობით გაწეული შრომა წარუმატებელი გამოდგა: საქართველო, დიდი მცდელობის მიუხედავად, ჯერ კიდევ ნატოსა და ევროკავშირის მიღმა რჩება. არადა, კრემლის პირისპირ მდგარი თბილისი იმედოვნებდა, რომ დასავლეთისგან ეკონომიკურ მხარდაჭერას და უსაფრთხოების დაცვის გარანტიებს მიიღებდა

ამასობაში კი რუსეთ-უკრაინის ომმა გააძლიერა ეჭვი, რომ მსგავს საგანგებო სიტუაციებში საქართველოს დასავლეთის იმედი არ უნდა ჰქონდეს. ეს ეჭვი ქართველების ცნობიერებაში ჯერ კიდევ მაშინ ჩაისახა, როცა 2008 წელს, რუსეთის აგრესიის დროს, საქართველომ დახმარება ვერ მიიღო. დღეს რუსეთს საქართველოს ტერიტორიის ერთი მეხუთედი ოკუპირებული აქვს.

„დასავლეთი სტრატეგიულ მეტოქეობას აგებს, – აღნიშნავს „ქართული პოლიტიკის ინსტიტუტის“ დირექტორი კორნელი კაკაჩია, – რეგიონში თავიანთი ინტერესები აქვთ ჩინეთს, თურქეთს, ირანს და რუსეთს. საკითხი მხოლოდ საქართველოს კი არ ეხება, არამედ მთლიანად სამხრეთ კავკასიას“. პოლიტოლოგის აზრით, ჰიპოთეტური ომის შედეგები, თავისი მნიშვნელობით, კავკასიის ჩარჩოებს სცილდებიან.

„საქართველოს დაკარგვა აშშ-ის, ნატოსა და დასავლეთისათვის ძალზე სერიოზული მარცხი იქნება, თავისი გეოპოლიტიკური შედეგებით – როგორც სტრატეგიული, ისე სიმბოლური მნიშვნელობით“, – თვლის ლაურა ლინდერმანი, აშშ-ის ატლანტიური საბჭოს ევრაზიული ცენტრის უფროსი მეცნიერ-თანამშრომელი.

„საქართველო ევრაზიის შიდა რეგიონებისა და ევროპის დამაკავშირებელ ქვეყანას წარმოადგენს. ეს გარემოება ზრდის მის მნიშვნელობას დასავლეთისათვის, განსაკუთრებით კი ევროპისათვის, რომელიც ცდილობს ენერგეტიკული უზრუნველყოფის დივერსიფიცირება განახორციელოს, განსაკუთრებით კასპიის ენერგორესურსების მიღების მიზნით. საქართველოს დაკარგვა ვლადიმერ პუტინის გამარჯვება და ნატოსა და დასავლეთის დიდი სირცხვილი იქნება“, – ხაზს უსვამს ლაურა ლინდერმანი.

უკანასკნელ თვეებში საქართველოს მმართველი პარტიის „ქართული ოცნების“ დამოკიდებულება დასავლეთის ქვეყნებთან მკვეთრად გაუარესდა, თუმცა თეორიულად საქართველოს კვლავს სურს ნატოსა და ევროკავშირის წევრი გახდეს. ივლისში ბრიუსელმა შეაჩერა საქართველოს ევროკავშირში წევრად მიღების პროცესი, რომლის მიზეზი ზემოთ ნახსენები „უცხოური აგენტების შესახებ“ კანონის მიღება გახდა. ბრიუსელმა ასევე დაამუხრუჭა 32 მილიონდოლარიანი სამხედრო დახმარების გაწევაც. „და ეს მხოლოდ დასაწყისია“, – განაცხადა მაშინ პაველ ჰერჩინსკიმ, ევროკავშირის ელჩმა საქართველოში.

თავის მხრივ, უკმაყოფილების ნიშნად, პენტაგონმაც გადადო ყოველწლიური საზაფხულო სამხედრო წრთვნები (კოდური სახელწოდებით Noble Partner), რომელიც აშშ-ის დახმარებით საქართველოს ტერიტორიაზე ტარდებოდა ხოლმე. ამერიკამ ასევე გამოაცხადა იმ ქართველი პოლიტიკოსებისათვის ვიზების გაცემა, რომლებიც პასუხისმგებლები არიან დემოკრატიის დარღვევაში.

„ჩვენ ისე ახლოს ვიყავით დასავლეთთან ინტეგრაციასთან, როგორც არასდროს. ეს იყო ინტეგრაციის რეალური გზა, პირველი მცდელობა ჩვენს ისტორიაში“, – სინანულით ამბობს ოპოზიციონერი პოლიტიკოსი ალექსანდრე კრევო-ასათიანი, – ახლა კი ყველა პროცესი გაყინულია. დადგა დიპლომატიური კრიზისი ევროკავშირთან და აშშ-სთან ურთიერთობაში“.

პრიორიტეტების ცვლა შესამჩნევია თბილისში არსებული ნატოსა და ევროკავშირის ოფიციალური საინფორმაციო ცენტრების საქმიანობაზეც: შენობის შესასვლელში არსებული კიბე ყვავილების გამყიდველმა დაიკავა. პირველ სართულზე მდებარე ოთახი, სადაც რამდენიმე ქვეყნის დროშა ჰკიდია, ცარიელია – სამუშაო დღის მიუხედავად. დაცვის მუშაკის თქმით, დაწესებულება არ მუშაობს, თუმცა, როგორც ცენტრის წარმომადგენლებმა „ნიუსვიქს“ უთხრეს, ისინი აქტიურად მონაწილეობენ იმ ღონისძიებებში, რომლებიც მიმართულია საქართველოს ევროატლანტიკური ინტეგრაციისაკენ“. ასეა თუ ისე, ეჭვი მაინც არსებობს.

იმის გამო, რომ დასავლეთმა საქართველოს კრიტიკა დაიწყო, თავის მხრივ, მმართველმა პარტიამაც დასავლეთის მიმართ მიდგომები გაამკაცრა.

როგორც გასულ კვირას „ქართულმა ოცნებამ“ განაცხადა, ოქტომბრის საპარლამენტო არჩევნებში გამარჯვების შემთხვევაში პარტია სარჩელს შეიტანს სასამართლოში ოპოზიციური ნაციონალური მოძრაობის’ აკრძალვის მიზნით. „ქართული ოცნების“ ლიდერები თვლიან, რომ ოპოზიცია საზღვარგარეთიდან იმართება „ომის გლობალური პარტიის“ მიერ, რომლის მიზანს საქართველოს რუსეთ-უკრაინის ომში ჩართვა და მოსკოვის წინააღმდეგ „მეორე ფრონტის“ გახსნა წარმოადგენს. დასავლეთი ასევე მხარს უჭერს საქართველოში „ფსევდოლიბერალური“ იდეოლოგიის გავრცელებას, რაც, მაგალითად, „ლგბტ+“-საზოგადოების დაცვაში გამოიხატება.  მმართველმა პარტიამ ამომრჩევლებისადმი მიმართვის დროს „ფსევდოლიბერალიზმის“ წინააღმდეგ მიმართული ბრძოლის ერთ-ერთ ინსტრუმენტად გამოიყენა პარიზის ოლიმპიადის გახსნის გახმაურებული  ცერემონია, რითაც განმარტა, თუ რატომ არის აუცილებელი ქართული საზოგადოებისათვის ოჯახური ფასეულობებისა და არასრულწლოვანების შესახებ კიდევ ერთი ახალი კანონის მიღება.

„2024 წლის საპარლამენტო არჩევნები ერთგვარ რეფერენდუმსაც წარმოადგენს, რომელზეც ქართველმა ხალხმა უნდა გადაწყვიტოს – ირჩევს მშვიდობას თუ ომს, მორალურ დეგრადაციას თუ ტრადიციულ ფასეულობებს, მონურ დამოკიდებულებას საგარეო ძალების მიმართ თუ დამოუკიდებელ და სუვერენულ სახელმწიფოს“, – აცხადებენ პარტიაში. „ქართული ოცნების“ ლიდერები დარწმუნბულნი არიან, რომ აშშ-სთან და ევროკავშირთან ურთიერთობის აღდგენას მხოლოდ არცჩვნებში გამარჯვება უზრუნველყოფს.

თავის მხრივ, „ქართული ოცნების“ ოპონენტების მტკიცებით, ისინი დარწმუნებულნი არიან, რომ თუ არჩევნები პატიოსნად ჩატარდება, მასში ოპოზიცია გაიმარჯვებს. ამის არგუმენტად მოაქვთ საზოგადოებრივი აზრის გამოკითხვის შედეგები, რომელიც გასული წლის ბოლოს ჩატარდა აშშ-ის ეროვნულ-დემოკრატიული ინსტიტუტის მიერ: მონაცემების მიხედვით, მოსახლეობის თითქმის 80% მხარს უჭერს ევროკავშირში საქართველოს წევრობას. მართალია, მოსახლეობის დიდ ნაწილს არ მოსწონს ევროპის ლიბერალური პოლიტიკა, მაგრამ მათ იზიდავს გადაადგილების თავისუფალი რეჟიმი, ვაჭრობა, სამუშაო ადგილები, რასაც, მათი აზრით, საქართველოს ევროკავშირში გაწევრება მოუტანს. (…)

ოპოზიცია ძველებურად საკმაოდ დაშლილია, რაც მმართველი პარტიისათვის მომგებიან სიტუაციას ნიშნავს. ექსპერტები მიუთითებენ „ქართული ოცნების“ კიდევ ერთ კოზირზე – ქვეყნის ყველაზე მდიდარი ადამიანის ბიძინა ივანიშვილის ფინანსურ რესურსებზე. დედაქალაქს ზემოდან მილიარდერის კუთვნილი მინა-ფოლადისაგან აგებული სასახლე გადმოჰყურებს, რომელიც ოპოზიციამ ჯეიმს ბონდზე გადაღებული ფილმების ნეგატიური გმირების „ბუდედ“ შერაცხა.

„ძნელია არჩევნების მოგება იმ დროს, როცა 300 ათას სახელმწიფო მოსამსახურეს მთავრობა აკონტროლებს, როცა ხელისუფლება მათ ადმინისტრაციული რესურსის სახით იყენებს“, – ამბობს კორნელი კაკაჩია, – ისიც ანგარიშგასაწევი გარემოებაა, რომ საქართველოს საწარმოების მფლობელთა (ბიზნესმენთა) 80% მხარს მმართველ პარტიას უჭერს“.

ოპოზიციის წარმომადგენლები მიესალმებიან დასავლეთის მიერ „ქართული ოცნების“ წინააღმდეგ მიღებულ ზომებს, მაგრამ ეჭვი შეაქვთ მათ ეფექტურობაში. „ჩვენ იმ დონემდე მივედით, რომ რუსეთმა და „ქართულმა ოცნებამ“ საზოგადოებაში ღრმად ჩანერგა აზრი – დასავლეთისადმი წინააღმდეგობის გაწევა მმართველი პარტიის მამაცურ მოქმედებას ნიშნავს.“, – ამბობს ალექსანდრე კრევო-ასათიანი, – ისეთი შეგრძნებაა, რომ უკვე გვიანია რაიმე დაუპირისპირო ხელისუფლების პოლიტიკას“.

მართალია, მმართველ პარტიას ოპოზიცია „პრორუსულ ძალად“ ნათლავს, მაგრამ სინამდვილეში სიტუაცია მარტივად არ არის – საქართველოს საკმაოდ წინააღმდეგობრივი ისტორია აქვს.

ანტირუსული და ანტიდასავლური გრაფიტები თბილისის შენობების კედლებზე მოწმობენ იმას, რომ ქართველებში მოსკოვისადმი მტრობა საკმაოდ ძლიერია. რუსეთის იმპერიამ საქართველო 1801 წელს მიიერთა, ხოლო როცა 1917 წლის რევოლუციის შემდეგ ქვეყანამ დამოუკიდებლობა აღიდგინა, სამი წლის შემდეგ მას თავს რუსეთის წითელი არმია დაესხა და საქართველო ფაქტიურად ისევ რუსეთის (საბჭოთა კავშირის) შემადგენლობაში აღმოჩნდა. ქვეყანა კვლავ სუვერენული 1991 წელს გახდა, საბჭოური იმპერიის დაშლის შემდეგ.

აღსანიშნავია ის გარემოებაც, რომ საბჭოთა ლიდერის იოსებ სტალინის მშობლიურ ქალაქში გორში არსებული სახლ-მუზეუმი ძველებურად რცება სალოცავ ადგილად მათთვის, ვინც საბჭოთა საქართველოს არსებობის პერიოდს სიყვარულით იხსენებს. მართალია, მუზეუმში არის მცირე გამოფენაც, რომელიც საქართველოზე რუსეთის არმიის თავდასხმასაც ეძღვნება.

„ყოფილი საბჭოთა სივრცის სახელმწიფოებში ყველგან არიან ისეთი ადამიანები, რომლებსაც ნოსტალგია აქვთ საბჭოთა პერიოდზე, ისინი მცირერიცხოვანნი არიან, მაგრამ მაინც“, – ამბობს მუზეუმის გიდი კერძო საუბარში.

რუსეთის მიერ 2008 წლის აგვისტოში საქართველოს წინააღმდეგ განხორციელებული სამხედრო ოპერაცია დაიწყო ნატოს ბუქარესტის სამიტიდან რამდენიმე თვის შემდეგ, როცა ალიანსის დეკლარაციაში ჩაიწერა ფრაზა – „საქართველო და უკრაინა ოდესმე ნატოს წევრები გახდებიან“. ხუთდღიანი ბრძოლების შემდეგ რუსეთის არმიამ ქვეყნის სეპარატისტულ რეგიონში – „სამხრეთ ოსეთში“ – გაკონტროლების მიზნით შესულ ქართული ჯარის ნაწილებს უკან დაახევინა  და „სამხრეთ ოსეთისა“ და საქართველოს კიდევ ერთი სეპარატისტული რეგიონის – აფხაზეთის დამოუკიდებლობა აღიარა. ეს ყველაფერი იმის მანიშნებელი გახდა, რაც მოგვიანებით უკრაინაში განხორციელდება რუსეთის მიერ.

მიუხედავად იმისა, რომ „ქართული ოცნება“ ბევრ ლაპარაკობს „მშვიდობიანი გზით ტერიტორიული მთლიანობის აღდგენაზე“, რუსეთის მხრიდან არავითარი ნიშნები არ ჩანს, რომ კრემლი ოკუპირებულ ანკლავებზე – „სამხრეტ ოსეთზე’ და აფხაზეთზე – კონტროლს შეასუსტებს უფრო მეგობრული ქართული მთავრობისათვის.

საქართველოს მხოლოდ რუსეთზე არ ამყარებს იმედს – დასავლეთთან უტანხმოების გაღრმავების კვალობაზე თბილისი კავშირებს აფართოებს პეკინთანაც.

ჩინეთის სახალხო რესპუბლიკის ინიციატივის – „ერთი გზა – ერთი სარტყელის“ ჩარჩოებში ჩინური კომპანიები საქართველოში აქტიურად აშენებენ ინფრასტრუქტურულ ობიექტებს. ამერიკელი ინვესტორების უარის შემდეგ სწორედ ჩინელები დათანხმდნენ შავი ზღვის ნაპირზე ანაკლიის ღრმაწყლიანი ნავსადგურის მშენებლობას. აშკარად შეინიშნება საქართველოსა და ჩინეთის მთავრობების ერთმანეთთან დაახლოებას. ჩინეთის საგარეო საქმეტა სამინისტროს ამასწინანდელ მოხსენებაში საქართველო წარმოდგენილია ისეთ ქვეყნად, რომლის საქმეებშიც აშშ არის ჩარეული.

„საქართველო სამაგალითო ქვეყანა ხდება რუსეთის პერიფერიის ქვეყნებისათვის, რომლებიც გარკვეულწილად იკავებენ როგორც პროდასავლურ, ასევე პრორუსულ და პროჩინურ პოზიციას“, – ამბობს დონალდ ჯენსენი, ვაშინგტონში მდებარე მშვიდობის ინსტიტუტის  უფროსი მეცნიერ-თანამშრომელი რუსეთისა და ევროპის საკითხებში, – „საქართველო შეიძლება ნაცრისგერ ზონაში აღმოჩნდეს: არ დაექვემდებაროს რუსეთს, გაატაროს მრავალვექტორული პოლიტიკა და ერთდროულად რამდენიმე მიმართულებით იმოქმედოს. შესაძლოა, რუსეთის სხვა პოსტსაბჭოელი მეზობლები სწორედ ასეთ კურსს გაატარებენ“.

წყარო

საკონსტიტუციო სასამართლო „უცხოური გავლენის გამჭვირვალობის შესახებ“ კანონის შეჩერებასა და გაუქმებასთან დაკავშირებული სარჩელის განხილვას იწყებს

საკონსტიტუციო სასამართლო დღეს, „უცხოური გავლენის გამჭვირვალობის შესახებ“ კანონის შეჩერებასა და გაუქმებასთან დაკავშირებული სარჩელის განხილვას იწყებს.

სარჩელის განხილვა 11:00 საათზე დაიწყება.

საქმეს საქართველოს საკონსტიტუციო სასამართლოს პლენუმი განიხილავს.

„საქართველოს საკონსტიტუციო სასამართლოში გაიმართება განმწესრიგებელი სხდომა საქმეზე „საქართველოს პრეზიდენტი, ა(ა)იპ „ინფორმაციის თავისუფლების განვითარების ინსტიტუტი“, ა(ა)იპ „უფლებები საქართველო“, ა(ა)იპ „სამოქალაქო საზოგადოების ფონდი“ და სხვები (სულ 122 მოსარჩელე), საქართველოს პარლამენტის წევრები: თამარ კორძაია, ანა ნაცვლიშვილი, ლევან ბეჟაშვილი და სხვები (სულ 38 დეპუტატი), შპს „საინფორმაციო ცენტრების ქსელი“ და ა(ა)იპ „სტუდია მონიტორი“ საქართველოს პარლამენტის წინააღმდეგ“ (კონსტიტუციური სარჩელები №1828, №1829, №1834, №1837).

წარმოდგენილი კონსტიტუციური სარჩელებით სადავოდ არის გამხდარი „უცხოური გავლენის გამჭვირვალობის შესახებ“ საქართველოს კანონი, რომელიც ადგენს სუბიექტის უცხოური ძალის ინტერესების გამტარებელ ორგანიზაციად რეგისტრაციის წესსა და აწესრიგებს უცხოური ძალის ინტერესების გამტარებელი ორგანიზაციის საქმიანობის გამჭვირვალობასთან დაკავშირებულ სხვა საკითხებს.

მოსარჩელეთა არგუმენტაციით, სადავოდ გამხდარი კანონი, მასში გამოყენებული ტერმინოლოგიითა თუ სხვადასხვა რეპრესიული მექანიზმის გათვალისწინებით, იწვევს სამოქალაქო ორგანიზაციებისა და მედიასაშუალებების სტიგმატიზაციას, მათი საქმიანობისთვის ხელშეშლას, დასახული მიზნების მიღწევის შეუძლებლობას და, საბოლოო ჯამში, მათი ფუნქციონირების შეფერხებას ან სულაც შეწყვეტას.

მოსარჩელე მხარის განმარტებით, სადავო ნორმები ლეგიტიმური მიზნისა და უცხოური გავლენის იდენტიფიცირების რელევანტური კრიტერიუმების არარსებობის პირობებში, აზიანებს სუბიექტთა სოციალურ იდენტობას და თვითნებურად ზღუდავს საქართველოს კონსტიტუციით დაცულ პიროვნების თავისუფალი განვითარების უფლებას. აღნიშნულის პარალელურად, კანონით გათვალისწინებულ სუბიექტთა საჯარო რეესტრში რეგისტრაცია, ანგარიშვალდებულების ფორმა, მონიტორინგის წესი და პასუხისმგებლობის ზომები არღვევს საქართველოს კონსტიტუციით დაცულ გაერთიანებისა და გამოხატვის თავისუფლებებს. მოსარჩელე მხარე აგრეთვე მიუთითებს, რომ სადავო კანონით განსაზღვრული პერსონალური მონაცემების დამუშავების წესი ეწინააღმდეგება პირადი ცხოვრებისა და პირადი კომუნიკაციის უფლების ფორმალურ და მატერიალურ მოთხოვნებს, ხოლო სადავო ნორმებით გათვალისწინებული ვალდებულებების კანონის ამოქმედებამდე პერიოდში წარმოშობილ და დასრულებულ სამართლებრივ ურთიერთობებზე გავრცელება არღვევს საქართველოს კონსტიტუციით დაცულ კანონის უკუძალის აკრძალვის პრინციპს. მოსარჩელეთა ნაწილი აგრეთვე მიიჩნევს, რომ სადავო ნორმები იწვევს მათ დისკრიმინაციას, ვინაიდან აყენებს უთანასწორო მდგომარეობაში ადმინისტრაციული ორგანოების მიერ დაფუძნებულ არასამეწარმეო (არაკომერციულ) იურიდიულ პირებთან მიმართებით, რომლებიც ფინანსდებიან სახელმწიფო ბიუჯეტიდან.

გარდა ამისა, მოსარჩელე მხარე მიიჩნევს, რომ „უცხოური გავლენის გამჭვირვალობის შესახებ“ საქართველოს კანონის მიღება ეწინააღმდეგება საქართველოს კონსტიტუციის ძირითად პრინციპებს და აბრკოლებს საქართველოს ევროპის კავშირში გაწევრიანების პროცესს, რითაც იგი არღვევს საქართველოს კონსტიტუციის 78-ე მუხლით განსაზღვრულ ვალდებულებას.

კონსტიტუციური სარჩელების ავტორები აგრეთვე შუამდგომლობენ, საკონსტიტუციო სასამართლოს მიერ, საბოლოო გადაწყვეტილების მიღებამდე, სადავოდ გამხდარი ნორმების მოქმედების შეჩერების თაობაზე.

საქმეს განიხილავს საქართველოს საკონსტიტუციო სასამართლოს პლენუმი.

დავის საგანი:

№1828 კონსტიტუციურ სარჩელში დავის საგანს წარმოადგენს: „უცხოური გავლენის გამჭვირვალობის შესახებ“ საქართველოს კანონის: (ა) მე-2 მუხლის პირველი პუნქტის კონსტიტუციურობა საქართველოს კონსტიტუციის მე-12 მუხლთან მიმართებით; (ბ) მე-4 მუხლის მე-4 პუნქტის მე-2, მე-3 და მე-4 წინადადებების, მე-6 მუხლის, მე-8 მუხლის პირველი, მე-2, მე-3, მე-4 და მე-5 პუნქტების, მე-9 მუხლის მე-4, მე-5 და მე-6 პუნქტების კონსტიტუციურობა საქართველოს კონსტიტუციის მე-15 მუხლთან მიმართებით; (გ) მე-2 მუხლის პირველი პუნქტის „ბ“, „გ“ და „დ“ ქვეპუნქტების, მე-4 მუხლის პირველი პუნქტის პირველი წინადადების, მე-2, მე-3 და მე-4 პუნქტების, მე-6 მუხლის პირველი პუნქტისა და მე-10 მუხლის მე-2 პუნქტის კონსტიტუციურობა საქართველოს კონსტიტუციის მე-17 მუხლის პირველ, მე-2 და მე-3 პუნქტებთან მიმართებით; (დ) მე-2 მუხლის პირველი და მე-4 პუნქტების, მე-4 მუხლის პირველი, მე-2, მე-3 და მე-4 პუნქტების, მე-5 მუხლის, მე-6 მუხლის პირველი და მე-2 პუნქტების, მე-7 მუხლის პირველი პუნქტის მე-3 და მე-4 წინადადებების, მე-8 მუხლის პირველი, მე-2, მე-3, მე-4 და მე-5 პუნქტების, მე-9 მუხლის პირველი, მე-2, მე-3 და მე-4 პუნქტების, მე-10 მუხლის მე-2 პუნქტისა და მე-11 მუხლის მე-2 პუნქტის კონსტიტუციურობა საქართველოს კონსტიტუციის 22-ე მუხლთან მიმართებით; (ე) მე-4 მუხლის პირველი პუნქტის პირველი წინადადების კონსტიტუციურობა საქართველოს კონსტიტუციის 31-ე მუხლის მე-9 პუნქტის მე-2 წინადადებასთან მიმართებით; (ვ) „უცხოური გავლენის გამჭვირვალობის შესახებ“ საქართველოს კანონის კონსტიტუციურობა საქართველოს კონსტიტუციის 78-ე მუხლთან მიმართებით.

№1829 კონსტიტუციურ სარჩელში დავის საგანს წარმოადგენს: „უცხოური გავლენის გამჭვირვალობის შესახებ“ საქართველოს კანონის მე-2 მუხლის დასახელებისა და ამავე მუხლის პირველი პუნქტის, მე-4 მუხლის დასახელებისა და ამავე მუხლის პირველი, მე-2, მე-3, მე-4 და მე-6 პუნქტების, მე-5 მუხლის, მე-6 მუხლის პირველი და მე-2 პუნქტების, მე-7 მუხლის პირველი პუნქტის, მე-8 მუხლის პირველი, მე-2, მე-3 და მე-5 პუნქტების, მე-9 მუხლის პირველი, მე-2, მე-3 და მე-4 პუნქტების და მე-10 მუხლის მე-2 პუნქტის კონსტიტუციურობა საქართველოს კონსტიტუციის მე-17 მუხლის პირველ, მე-2, მე-3 და მე-5 პუნქტებთან და 22-ე მუხლის პირველ პუნქტთან მიმართებით.

№1834 კონსტიტუციურ სარჩელში დავის საგანს წარმოადგენს: (ა) „უცხოური გავლენის გამჭვირვალობის შესახებ“ საქართველოს კანონის მე-2 მუხლის პირველი პუნქტის „ა“, „გ“, „დ“ ქვეპუნქტებისა და მე-4 პუნქტის, მე-4 მუხლის პირველი, მე-2, მე-3 და მე-4 პუნქტების, მე-5 მუხლის, მე-6 მუხლის პირველი და მე-2 პუნქტების, მე-7 მუხლის პირველი პუნქტის მე-3 და მე-4 წინადადებების, მე-8 მუხლის პირველი, მე-2, მე-3 და მე-5 პუნქტების, მე-9 მუხლის პირველი, მე-2, მე-3 და მე-4 პუნქტებისა და მე-10 მუხლის მე-2 პუნქტის კონსტიტუციურობა საქართველოს კონსტიტუციის 22-ე მუხლის პირველ პუნქტთან მიმართებით; (ბ) „უცხოური გავლენის გამჭვირვალობის შესახებ“ საქართველოს კანონის კონსტიტუციურობა საქართველოს კონსტიტუციის 78-ე მუხლთან მიმართებით.

№1837 კონსტიტუციურ სარჩელში დავის საგანს წარმოადგენს: „უცხოური გავლენის გამჭვირვალობის შესახებ“ საქართველოს კანონის მე-2 მუხლის დასახელებისა და ამავე მუხლის პირველი პუნქტის „ა“, „დ“ ქვეპუნქტების, მე-4 მუხლის დასახელებისა და ამავე მუხლის პირველი, მე-2, მე-3, მე-4 და მე-6 პუნქტების, მე-5 მუხლის, მე-6 მუხლის პირველი და მე-2 პუნქტების, მე-7 მუხლის პირველი პუნქტის, მე-8 მუხლის პირველი, მე-2, მე-3 და მე-5 პუნქტების, მე-9 მუხლის პირველი, მე-2, მე-3 და მე-4 პუნქტების და მე-10 მუხლის მე-2 პუნქტის კონსტიტუციურობა საქართველოს კონსტიტუციის მე-11 მუხლის პირველ პუნქტთან, მე-17 მუხლის პირველ, მე-2, მე-3 და მე-5 პუნქტებთან და 22-ე მუხლის პირველ პუნქტთან მიმართებით“, – ნათქვამია ინფორმაციაში.

29 აგვისტოს ასტროლოგიური პროგნოზი

ვერძი

რთული დღეა, მაგრამ დარწმუნებული ხართ, რომ ყველა დაბრკოლებას გადალახავთ და იმ საკითხების მოგვარებას შეძლებთ, რომლებიც ბოლო დროს მოსვენებას არ გაძლევთ. დღევანდელი შეხვედრა დიდხანს გემახსოვრებათ, ხოლო ადამიანი, რომელსაც ამ დღეს გაიცნობთ, მნიშვნელოვან როლს შეასრულებს თქვენს ცხოვრებაში.

კურო

უარყოფითი ტენდენციების მიუხედავად, ოპტიმისტურად ხართ განწყობილი და პოზიციებს არ თმობთ. ასეთი განწყობა მიზნის მიღწევაში დაგეხმარებათ, რომელიც მნიშვნელოვანია თქვენთვის და თქვენი საყვარელი ადამიანებისთვის.
ეცადეთ ფული მომჭირნედ და გონივრულად ხარჯოთ, რომ ფინანსური პრობლემები არ შეგექმნათ. ამ დღეს ავანტიურებსა და საეჭვო ღონისძიებებში მონაწილეობა კატეგორიულად აკრძალულია.

ტყუპები

ეცადეთ, მოთმინება გამოიჩინოთ და კონფლიქტების პროვოცირება არ მოახდინოთ. ამ დღის შედეგი იმაზეა დამოკიდებული, გსურთ თუ არა კომპრომისებზე წასვლა. გახსოვდეთ, რომ საკუთარი საიდუმლო ან პირადი ინფორმაცია სხვებს არ უნდა გაუზიაროთ, თორემ ვიღაცამ შეიძლება თქვენ წინააღმდეგ გამოიყენოს. საღამოს ძველი ნაცნობის ნახვა სასიამოვნო ემოციებს მოგიტანთ.
თქვენი დახვეწილი იუმორი ადამიანებს მაგნიტივით იზიდავს.

კირჩხიბი

მნიშვნელოვანი გადაწყვეტილების მიღებისთვის არახელსაყრელი დღეა. ამ დღეს წვრილმანებს ყურადღებას აქცევთ, მაგრამ შეიძლება რაღაც მნიშვნელოვანი გამოგრჩეთ. აუცილებელი არაა, რომ საკუთარი იდეებისა და აღმოჩენების შესახებ ყველას უამბოთ – შეიძლება ვიღაცამ თქვენი იდეა მიითვისოს.
ფრთხილად იყავით – შეიძლება თქვენი სიტყვები თქვენ წინააღმდეგ გამოიყენონ.

ლომი

გირჩევთ წარსულში დატოვოთ შიშები, რომლებიც წინსვლაში ხელს გიშლით. შეიძლება მცირე სირთულეები წარმოიქმნას, მაგრამ მათთან გამკლავებას ადვილად შეძლებთ. საშუალება გექნებათ, რომ ძველი კონფლიქტები მოაგვაროთ და გაწყვეტილი ურთიერთობა აღადგინოთ. გარშემომყოფების დახმარებით უკმაყოფილო დარჩებით, ამიტომ ეცადეთ, მხოლოდ საკუთარ თავს დაეყრდნოთ.

ქალწული

ყველა თვალსაზრისით ხელსაყრელი დღეა. მოსალოდნელია იღბლიანი დამთხვევა და სასიამოვნო სიურპრიზები. მეგობრების დახმარებით ისეთ შედეგს მიაღწევთ, როგორზეც ვერასოდეს იოცნებებდით.
შესაძლოა, გარკვეული გეგმების განხორციელებაში გავლენიანი ადამიანები დაგეხმარონ. იფიქრეთ იმაზე, საპასუხოდ რა შეგიძლიათ გააკეთოთ. მებრძოლი ბუნება უამრავი პრობლემის გადაჭრაში დაგეხმარებათ.

სასწორი

ხელსაყრელი დღეა მნიშვნელოვან ამოცანებზე მუშაობისთვის, რასაც აქამდე ვერ ბედავდით. ვარსკვლავების ხელსაყრელი განლაგების წყალობით, ამ დღეს სასურველი შედეგის მიღება გაცილებით ადვილია, ამიტომ შეგიძლიათ ექსპერიმენტებს მიმართოთ. ამ ნიშნის ზოგიერთ წარმომადგენელს სასწრაფო მივლინება ელის. მივლინება წარმატებით დასრულდება და გარემოს შეცვლა სარგებელს მოგიტანთ.

მორიელი

ეს დღე ფიქრისთვის უფრო ხელსაყრელია, ვიდრე მოქმედებისთვის. სწორედ ამიტომ სანამ ახალი იდეის განხორციელებას დაიწყებთ, მოსალოდნელ შედეგებზე უნდა დაფიქრდეთ. საღამოს შეიძლება ძველი ნაცნობი ნახოთ და წარსულის გახსენების გარდა, სამომავლო გეგმებიც განიხილოთ.

მშვილდოსანი

ეს დღე სასიამოვნო სიურპრიზით გაგახარებთ. საერთო ენას სრულიად უცნობ ადამიანებთანაც კი ადვილად პოულობთ და შეგიძლიათ ერთობლივ ქმედებებზე შეთანხმდეთ მათთანაც კი, ვინც არავის ეხმარება და არავისთან თანამშრომლობს. სასარგებლოა იდეების, გეგმებისა და სიახლეების განხილვა და აზრების გაცვლა-გამოცვლა. შანსი გექნებათ, რომ მნიშვნელოვანი ინფორმაცია და გონივრული რჩევა მიიღოთ, რომელიც ცხოვრებას გაგიადვილებთ.

თხის რქა

არც ისე იოლი დღეა, მაგრამ მთავარია, სიტუაცია სწორად შეაფასოთ და ილუზიებს არ აჰყვეთ. ეცადეთ, გვერდით გყავდეთ ადამიანი, რომელიც საგნებს რეალურად ხედავს და მზადაა, თავისი აზრი გაგიზიაროთ. ფინანსებთან დაკავშირებით გადაწყვეტილებების მიღება არ უნდა იჩქაროთ. ფრთხილად იყავით, თუ ვინმე მოგებიან გარიგებას დაჟინებით გთავაზობთ ან რაღაც ავანტიურაში თქვენს ჩართვას ცდილობს. ერთი შეხედვით მაცდური წინადადებაა, მაგრამ ძალიან საშიში, ამიტომ უარის თქმა ჯობს.

მერწყული

ხელსაყრელი დღეა სწავლისა და გონებრივი მუშაობისთვის.
ამ დღეს ადამიანებთან ურთიერთობა გიჭირთ. გეჩვენებათ, რომ მთელი სამყარო დაგიპირისპირდათ და თქვენს განადგურებას ცდილობს, მაგრამ ეს უსაფუძვლო ეჭვებია. ეცადეთ საქმე კონფლიქტამდე არ მიიყვანოთ და რაც შეიძლება სწრაფად მშვიდობა დაამყაროთ.

თევზები

ეცადეთ მთელი დღის განმავლობაში კარგი განწყობა შეინარჩუნოთ – მიუხედავად იმისა, რომ ამის გაკეთება რთულია. საკითხი, რომლებიც ბოლო დროს გაწუხებთ, შესაძლოა მოულოდნელად თქვენთვის სასარგებლოდ მოგვარდეს. საღამოს შესაძლებლობა გექნებათ, რომ რთული და დამღლელი საქმეები სამომავლოდ გადადოთ და სასიამოვნო საქმეებით დაკავდეთ.

„ყველამ ვიცით, როგორი რთული წელი გველოდება…“- გიორგი მამარდაშვილი სპეციალურ მიმართვას ავრცელებს

ქართული ფეხბურთის ისტორიაში ერთ-ერთი უდიდესი ტრანსფერი – გიორგი მამარდაშვილი “ლივერპულს” შეუერთდა.

ცოტა ხნის წინ, მამარდაშვილმა სოციალურ ქსელში მიმართვა გაავრცელა:

„მოგესალმებით
ვალენსიაზე და ამ კლუბზე საუბარს მადლიერების გამოხატვის გარეშე ვერ დავიწყებ. მინდა მადლობა გითხრათ, სამი წლის განმავლობაში უწყვეტი მხარდაჭერისთვის და სიყვარულისთვის, რომელსაც კლუბში მოსვლის პირველი დღიდან, ყველა ეტაპზე ვგრძნობ.
სიტყვები არ არის საკმარისი, გამოვხატო მადლიერება იმ ყველაფრისთვის რაც ვალენსიამ, ამ დიდმა საფეხბურთო ოჯახმა მომცა. ვალენსიამ შეცვალა ჩემი ცხოვრება და შექმნა ჩემი კარიერა.
სწორედ ამიტომ, გადავწყვიტე დავრჩე კიდევ ერთი წელი ვალენსიაში და დავეხმარო გუნდს თავისი მიზნის მიღწევაში.
ყველამ ვიცით, როგორი რთული წელი გველოდება და როგორი გარდამტეხია ეს პერიოდი თავად კლუბისთვისაც.
ამიტომ, როგორც არასდროს ისე უნდა დავდგეთ ერთად და ვიბრძოლოთ ბოლომდე!“,-წერია გავრცელებულ წერილში.

,,რადიკალებს არ სურდათ ქართულ საზოგადოებას სცოდნოდა, რომ ისინი გარე დაფინანსებით ცდილობენ ქართული პოლიტიკის ფორმირებას”- დიმიტრი ხუნდაძე

რადიკალები უძლურები აღმოჩნდნენ გამჭვირვალობის კანონის წინააღმდეგ, როცა შეეცადნენ მისთვის რუსულის დარქმევასა და კანონპროექტის განხილვის შეჩერებას, – ამის შესახებ მედიასთან „ხალხის ძალის“ გენერალურმა მდივანმა, დეპუტატმა დიმიტრი ხუნდაძემ განაცხადა.

მისი თქმით, რადიკალებს არ სურდათ ქართულ საზოგადოებას სცოდნოდა, რომ ისინი გარე დაფინანსებით ცდილობენ ქართული პოლიტიკის ფორმირებას, “ამიტომ ებრძოდნენ და ებრძვიან გამჭვირვალობის კანონს”.

„რადიკალები შემდეგ უკვე ითხოვდნენ, რომ არჩევნების მერე განხილულიყო ეს კანონი, რითაც ცდილობდნენ გარე დაფინანსების ინტერესები გაეტარებინათ.

ისინი სწორედ იმაზე დაფუძნებულები არიან, რაც იკრძალება და სწორედ ეს არ სურდათ სცოდნოდა ქართულ საზოგადოებას, რომ გარე დაფინანსებით ცდილობენ ქართული პოლიტიკის ფორმირებას. ამიტომ ებრძოდნენ და ებრძვიან გამჭვირვალობის კანონს“, – განაცხადა დიმიტრი ხუნდაძემ.

,,მსგავსი გადაწყვეტილება იქნება „ეკლესიის ანტიქრისტესათვის გადაცემა“- მიხეილ სააკაშვილი

ივანიშვილმა მოინდომა ერთადერთი, მის სრულ კონტროლს მიღმა დარჩენილი ინსტიტუტის განადგურება – მას შეეძლება დანიშნოს და გაათავისუფლოს პატრიარქი, ეპისკოპოსები, სუს-ის კონტროლის ქვეშ შეიყვანოს წმინდათა წმინდა – ზიარება, – ამის შესახებ საქართველოს მესამე პრეზიდენტი, მიხეილ სააკაშვილი სოციალურ ქსელში წერს, რითაც ეხმაურება გავრცელებულ ინფორმაციას საქართველოში მართლმადიდებლობის სახელმწიფო რელიგიად გამოცხადების შესახებ ხელისუფლების გეგმაზე.

როგორც სააკაშვილიაღნიშნავს, მსგავსი გადაწყვეტილება იქნება „ეკლესიის ანტიქრისტესათვის გადაცემა“.

მისივე თქმით, ამ ნაბიჯით ბიძინა ივანიშვილი ცდილობს გადაფაროს არჩევნების პროცესში „ქართული ოცნების“ ჩამორჩენა.

„ივანიშვილმა მოინდომა ერთადერთი, მის სრულ კონტროლს მიღმა დარჩენილი ინსტიტუტის განადგურება. საქმე ეხება საქართველოს მართლმადიდებელ ეკლესიას.

მან განიზრახა საქართველოში მართლმადიდებლობის სახელმწიფო რელიგიად გამოცხადება. ეს კი ნიშნავს, რომ მას შეეძლება დანიშნოს და გაათავისუფლოს პატრიარქი, ეპისკოპოსები, სუს-ის კონტროლის ქვეშ შეიყვანოს წმინდათა წმინდა – ზიარება.

მიუხედავად იმისა, რომ დღემდეც უსმენდნენ და უთვალთვალებდნენ პატრიარქსაც და მთელს სამღვდელოებას, ასეთი რამ ფორმალურად პუტინის რუსეთშიც არ გაუკეთებიათ. თუმცა, ნათელია, რომ ეს მზაკვრული გეგმა, სწორედ რუსეთიდან არის გამოგზავნილი.

თუ, მაგალითად, ზიარებისას ცნობილი გახდა, რომ თქვენ არ ეთანხმებით ივანიშვილს, თქვენ შეიძლება განგკვეთონ.

გავიფიქრე, რომ ეს იყო უკანასკნელი წვეთი, რომელსაც მთელი ერის წინააღმდეგობა უნდა გამოეწვია და მე ამის დიდი იმედი მქონდა, რადგან ვფიქრობ, რომ არა მარტო სამოქალაქო საზოგადოებაში, ეკლესიაშიც არიან მოუსყიდველი, პატრიოტი ადამიანები, რომლებიც არ დათმობენ პრინციპებს და არ გაათელინებენ ეკლესიას დიქტატორს.

მე, რომელმაც კარგად ვიცი, როგორ ეჯავრება ივანიშვილს ეკლესია, ვხვდები, რომ ეს არის დედა ეკლესიის ანტიქრისტესათვის გადაცემა. ეს არის მის ჩანაფიქრებში ყველაზე მზაკვრული იდეა.

ეს ნიშნავს ეკლესიის რეიდერულ მიტაცებას. წინასწარი ინფორმაციის მიხედვით, რომელიც მე მესმის, საპატრიარქო მტკიცედ არის ეკლესიის დამოუკიდებლობის დაცვის პოზიციაზე. პატრიარქს, რომელმაც კარგად იცის, რა იყო საბჭოთა დიქტატურა, შეუძლებელია იქ დაბრუნება უნდოდეს.

ამას ვამბობ მე, მორწმუნე ქრისტიანი, რომელმაც შემოვიტანე ხუთჯვრიანი დროშა, აღვადგინე ბაგრატის ტაძარი, ისევე, როგორც არაერთი ეკლესია-მონასტერი. მნიშვნელოვნად გავზარდე ეკლესიის დაფინანსება და ავტორიტეტი, რისთვისაც არაერთხელ კრიტიკაც მიმიღია, მაგრამ არასოდეს მინანია. იუსტიციის მინისტრობისას, ჩემი ინიციატივით, ხელი მოვაწერეთ კონკორდატს პატრიარქთან ერთად.

თავისი ნაბიჯით ივანიშვილი ცდილობს გადაფაროს არჩევნების პროცესში მისი პარტიის ჩამორჩენა ოპოზიციასთან შედარებით.

მისი აზრით, ალბათ შეიქმნება ეკლესიის საქმეთა სამინისტრო და სურს დანიშნოს “თავისი კაცი”, რომელიც გააკონტროლებს ეკლესიას. რუსეთის იმპერიაში ასეთ თანამდებობას ეწოდებოდა ობერ-პროკურორი, აქ ალბათ იქნება ,,ჭორვილელი ზედამხედველი“.

ასეთ სიტუაციაში რა საჭიროა კონსტიტუციური უმრავლესობა და 60%-ზე საუბარი – ბარემ პლებისციტი ჩაატაროს და გამოჩნდება, თუ რამდენია ამ უგუნური და მავნებლური გადაწყვეტილების მომხრე ქვეყანაში.

ამ კრიტიკულ მომენტში განსაკუთრებით მნიშვნელოვანია ერთიანობა და სიმტკიცე! ეს არის გამარჯვების გზა. დროა გამოვფხიზლდეთ!“, – წერს სააკაშვილი თავის წერილში.

,,ხელისუფლებასა და ეკლესიას შორის დღევანდელი ურთიერთობა ურთიერთპატივისცემაზეა დაფუძნებული”- პროტოპრესვიტერი, გიორგი ზვიადაძე

პროტოპრესვიტერ გიორგი ზვიადაძის განცხადებით, სიმართლეს არ შეესაბამება, თითქოს საქართველოს ხელისუფლება საქართველოს მართლმადიდებელ ეკლესიას თავს ახვევს სხვა სამართლებრივ მოდელს.

მისი თქმით, ხელისუფლებასა და ეკლესიას შორის დღევანდელი ურთიერთობა ურთიერთპატივისცემაზეა დაფუძნებული.

გიორგი ზვიადაძის განმარტებით, სახელმწიფოს მხრიდან არაოფიციალურ დონეზე გაჟღერებული შეთავაზება სახელმწიფო ეკლესიის სტატუსთან დაკავშირებით მიზნად ისახავს, ხელისუფლების მხრიდან უფრო დიდი დახმარება ჰქონდეს ეკლესიას.

„მიუღებელია, როდესაც ამ საკითხს ზოგიერთი საინფორმაციო საშუალება, ზოგიერთი ტელევიზია განიხილავს ისეთ კონტექსტში, თითქოს საქართველოს მართლმადიდებელ ეკლესიას საქართველოს ხელისუფლება თავს ახვევდეს სხვა სამართლებრივ მოდელს. ეს სიმართლეს არ შეესაბამება. საქართველოს ხელისუფლებას აქვს ძალიან დიდი პატივისცემა საქართველოს ეკლესიის და სრულიად საქართველოს კათოლიკოს პატრიარქის მიმართ, უდიდეს დახმარებას უწევს ჩვენი ხელისუფლება საქართველოს ეკლესიას, განსაკუთრებით განათლების სფეროში. ურთიერთობა, რაც დღეს არსებობს ხელისუფლებასა და ეკლესიას შორის, არის ურთიერთპატივისცემაზე დაფუძნებული. ამ ხელისუფლების პირობებში არასოდეს ყოფილა მცდელობა, ეკლესიას რაიმე აზრი და საკუთარი შეხედულება თავს მოახვიოს. ამდენად, რაიმე ოფიციალურ დონეზე არ ყოფილა მცდელობა, საქართველოს ეკლესიამ შეცვალოს სახელმწიფოსა და ეკლესიას შორის დღეს არსებული სამართლებრივი მოდელი, რაც არის კონსტიტუციური შეთანხმება. ეს შეთანხმება როცა გაფორმდა, წინ უძღოდა ეკლესიასა და სახელმწიფოს შორის მსოფლიოში არსებული სამართლებრივი მოდელების შესწავლა. საქართველოს ეკლესიისა და პირადად სრულიად საქართველოს კათოლიკოს პატრიარქის პოზიცია იყო ერთმნიშვნელოვნად მართებული და სწორი, რომ კონსტიტუციური შეთანხმების შემთხვევაში საქართველოს მართლმადიდებლური ეკლესია არის სრულად დამოუკიდებელი სახელმწიფოსგან, ამავე დროს, თანამშრომლობს სახელმწიფოსთან, რა თქმა უნდა, განათლების სფეროში, სოციალურ სფეროში. ეს არის თანასწორუფლებიანობის პრინციპზე აგებული შეთამხმება, რაც გაფორმდა ეკლესიასა და სახელმწიფოს შორის. სახელმწიფოს მხრიდან როცა არაოფიციალურად ჟღერდება, რომ საქართველოს მართლმადიდებელი ეკლესიის ავტორიტეტის ამაღლებისა და მისი საქმიანობისთვის, მისი უფრო ფართო მასშტაბის საქმიანობისთვის სახელმწიფო ეკლესიის სტატუსი ხომ არ იქნებოდა უკეთესი, ეს შემოთავაზება, ისიც არაოფიციალურ დონეზე კონსულტაციების სახით, მიზნად ისახავს, ხელისუფლების მხრიდან კიდევ უფრო ფართო და დიდი დახმარება ჰქონდეს ეკლესიას, რომ ეკლესიას ხელი შეეწყოს უფრო მეტი მოღვაწეობისთვის, მისი სტატუსი იყოს უფრო მაღალი და რაღაც ისე მოხდეს, რომ ეკლესიის ავტორიტეტი კიდევ უფრო გაიზარდოს, კიდევ უფრო დიდი როლი ითამაშოს ქართველი ერის ცხოვრებაში“, – აღნიშნა გიორგი ზვიადაძემ.

გიორგი ზვიადაძის თქმით, სახელმწიფო ეკლესიის სტატუსთან დაკავშირებით შემოთავაზება ნაკარნახევია მხოლოდ ეკლესიიის დახმარების და მისი ავტორიტეტის განმტკიცების სურვილით, მაგრამ ეკლესიის მხრიდან არის სამართლებრივი მიდგომა ამ საკითხთან დაკავშირებით.

„სამართლებრივი მიდგომა ეფუძნება იმას, რომ კონსტიტუციური შეთანხმების შემთხვევაში სრულად დაცულია ეკლესიის დამოუკიდებლობა სახელმწიფოსგან და სახელმწიფოს არავითარი ბერკეტი არ აქვს, ჩაერიოს ეკლესიის ცხოვრებაში. ასევე, სრული დამოუკიდებლობა აქვს სახელმწიფოს საქართველოს ეკლესიისგან, ამავე დროს უზრუნველყოფილია ეფექტური თანამშრომლობა სახელმწიფოსა და ეკლესიას შორის იმ სფეროში, რასაც ითვალისწინებს საეკლესიო სამართალი.

ამდენად, ეს წმინდა წყლის სამეცნიერო საკითხია, საეკლესიო კანონიკური საკითხია. ამ მოდელებს შორის საქართველოს მართლმადიდებელმა ეკლესიამ სავსებით სამართლიანად აირჩია სწორედ ის სამართლებრივი მოდელი, რაც მას საშუალებას აძლევს, სრულად დამოუკიდებელი იყოს სახელმწიფოსგან, ამავე დროს, თანამშრომლობდეს სახელმწიფოსთან ქართველი ერის საუკეთესო ინტერესებიდან გამომდინარე. სახელმწიფო ეკლესიად გამოცხადების შემთხვევაში, რა თქმა უნდა, ეს დაქვემდებარების პრინციპს მოითხოვს და გარკვეულ რისკებს შეიცავს, ამის გამოცდილება არსებობს. სახელმწიფო რელიგიად, სახელმწიფო ეკლესიად გამოცხადების შემთხვევაში, ეს თავისთავად გულისხმობს გარკვეულ დაქვემდებარებას სახელმწიფოსადმი და, ბუნებრივია, ეკლესია ამის წინააღმდეგია, მაგრამ კიდევ ერთხელ ხაზგასმით, მინდა, აღვნიშნო, ჩვენი დღევანდელი ხელისუფლება ამას არანაირად არ ახვევს თავს ეკლესიას. ეს შემოთავაზება იყო არაოფიციალურ დონეზე და, ბუნებრივია, ეკლესია უმჯობესად მიიჩნევს იმ სამართლებრივი სტატუსის შენარჩუნებას და სამართლებრივი მოდელის ძალაში დატოვებას, რაც გულისხმობს კონსტიტუციურ შეთანხმებას“, – განუცხადა გიორგი ზვიადაძემ საქართველოს პირველ არხს.

„ტელეგრამის“ შემქმნელი პაველ დუროვი პარიზში წინასწარი პატიმრობიდან გაათავისუფლეს – მედია

„ტელეგრამის” შემქმნელი პაველ დუროვი პარიზში წინასწარი პატიმრობიდან გაათავისუფლეს, მაგრამ შეიძლება ბრალდებები წარუდგინონ, – ამის შესახებ ინფორმაციას ფრანგული ტელეარხი BFMTV-ი ავრცელებს.

როგორც აღინიშნება, მოსამართლემ დუროვის წინასწარი პატიმრობიდან გათავისუფლების შესახებ მიიღო გადაწყვეტილება. ტელეარხის ცნობით, ეს ნაბიჯი შესაძლოა იმას ნიშნავდეს, რომ დუროვს დაკითხავენ, რის შემდეგაც მას შეიძლება ბრალდებები წარუდგინონ.

ცნობისთვის, “ტელეგრამის” შემქმნელი და საფრანგეთის მოქალაქე პაველ დუროვი პარიზში 24 აგვისტოს დააკავეს. საფრანგეთის პრეზიდენტმა ემანუელ მაკრონმა განაცხადა, რომ დუროვის დაკავებას პოლიტიკური მიზეზები არ გააჩნია.

ამასთან, Politico-ს ცნობით, საფრანგეთის ხელისუფლების ორგანოებმა პაველ დუროვისა და „ტელეგრამის“ თანადამფუძნებლის, მისი ძმის, ნიკოლაის დაკავების ორდერები მარტში გამოსცეს.

დოკუმენტში მითითებულია, რომ „ტელეგრამთან“ დაკავშირებით საფრანგეთის მიერ საიდუმლოდ ჩატარებული გამოძიება იმაზე უფრო ვრცელია და იმაზე უფრო ადრე დაიწყო, ვიდრე აქამდე ცნობილი იყო.

საქმე ბავშვებზე სექსუალური ძალადობის შემთხვევების გამოძიების შესახებ საფრანგეთის პოლიციასთან თანამშრომლობაზე „ტელეგრამის“ მიერ უარის თქმას ეხება.

 ,,სიტყვის თავისუფლების გარეშე ფუნქციონირებადი დემოკრატია არ შეიძლება იყოს”- კონგრესმენი კილი

„რესპუბლიკელმა“ კონგრესმენმა, კევინ კილმა განაცხადა, რომ წარმომადგენელთა პალატის იურიდიულ საკითხთა კომიტეტმა იცის ბაიდენის ადმინისტრაციის იმ ოფიციალური პირების ვინაობა, რომლებიც ზეწოლას ახდენდნენ Facebook-სა და მშობელ კომპანია Meta-ზე, რათა COVID-19 პანდემიის დროს ამერიკელებისთვის ცენზურა დაეწესებინათ.

კომპანია Meta-ს დამფუძნებელმა და აღმასრულებელმა დირექტორმა, მარკ ცუკერბერგმა ორშაბათს აშშ-ის კონგრესის წარმომადგენელთა პალატის იურიდიულ საკითხთა კომიტეტის თავმჯდომარეს, ჯიმ ჯორდანს წერილი მისწერა, რომელშიც ნათქვამია, რომ პრეზიდენტ ჯო ბაიდენის ადმინისტრაცია COVID-19 თემის გამო მასზე და მის გუნდზე ზეწოლას ახდენდა.

საქმე ეხება 2021 წლის მოვლენებს. როგორც ცუკერბერგი წერს, მას პრეზიდენტ ბაიდენის ადმინისტრაციის მაღალჩინოსნები დაუკავშირდნენ და COVID-19-თან დაკავშირებული კონტენტის, იუმორისა და სატირის ჟანრის ინფორმაციის ჩათვლით, ცენზურას სთხოვეს.

„ვფიქრობ, კიდევ ბევრი რამეა გამოსავლენი. საბოლოოდ, მე ვფიქრობ, რომ ამ საქმეს [აშშ-ის] ადმინისტრაციის ყველაზე მაღალ დონემდე მივყავართ. ეს იყო ცენზურის რეჟიმი, რომელიც მომდინარეობდა ბაიდენისა და ჰარისის ადმინისტრაციისგან. და ამისთვის პოლიტიკური პასუხისმგებლობა უნდა დადგეს“, – აღნიშნა კონგრესმენმა.

„იმ ადმინისტრაციისთვის, რომელსაც უყვარს საუბარი დემოკრატიის საფრთხეებზე, ზუსტად ეს [ქმედება] არის დემოკრატიის მთავარი საფრთხე. სიტყვის თავისუფლების გარეშე ფუნქციონირებადი დემოკრატია არ შეიძლება იყოს. შეუძლებელია გქონდეს ფუნქციონირებადი დემოკრატია, რომელშიც არსებული რეჟიმი თავის ძალაუფლებას იყენებს განსხვავებული აზრის ჩასახშობად და პოლიტიკური ოპონენტების გასაჩუმებლად. ეს არის ზუსტად ის, რაც გააკეთა ამ [ბაიდენის] ადმინისტრაციამ“, – დასძინა მან.

დამთავრდება არჩევნები და ყველაფერი კარგად იქნება, ქართველები გადავწყვეტთ საქართველოს ბედს და არა უცხოელები – ეპისკოპოსი იაკობი

მარიამობის დღესასწაულთან დაკავშირებით, ბოდბეში მრევლს ქადაგებით ეპისკოპოსმა იაკობმა მიმართა. მან ქვეყანაში მიმდინარე პროცესებსა და მოახლოებულ არჩევნებზე ისაუბრა.

“ჩვენთან რომ არჩევნებია, კი ვხედავთ, როგორი დამოკიდებულებაა, როგორი დაძაბულია საზოგადოება. დამთავრდება არჩევნები და ყველაფერი, ღვთის შეწევნით, კარგად იქნება, ქართველები გადავწყვეტთ საქართველოს ბედს და არა უცხოელები. ამერიკასა და ევროკავშირშიც არიან ჯგუფები, რომელსაც მიზანი აქვთ, რომ თავიანთი ქვეყნის შიგნით თვითონ მართავდნენ და ყოველ სიკეთესთან თვითონ ჰქონდეთ ხლი და საქართველოში და ნებისმიერ ქვეყანაში სჭირდებათ ისეთი ხელისუფლებები, რომლებიც ძალიან იაფი დაუჯდებათ.

ძალიან იაფი უჯდებათ საქართველოს გადაბირება ახლა, არიან პოლიტიკოსები, ძალიან ცოტა უხდიან იმათ, არიან ასევე ზოგიერთი არასამთავრობო, იმათაც უხდიან ფულს და რა დაუჯდებათ, რომ რევოლუცია მოახდინონ? უცხოეთი, იმის მაგივრად რომ გვეხმარებოდეს, რომ ერთმანეთში შუღლი კი არ გავაღვივოთ, არამედ შევამციროთ, პირიქით, უმატებს და უმატებს. მოდის არჩევნები და ახალგაზრდებს ვთხოვ, არ გამოგიყენონ, ბრმა იარაღი ნუ იქნებით სხვების ხელში. უნდა გავერთიანდეთ და ქართველები გავიმარჯვებთ ამ არჩევნებში, ვინც არ უნდა ჩაერიოს, გეუბნებით, შეგრცხვებათ მერე,” – აცხადებს მიტროპოლიტი იაკობი (იაკობიშვილი). 

,,ოპოზიციური პარტიების აკრძალვა ერთგვარი „რუსული კანონია”- პეტრე ცისკარიშვილი 

ოპოზიციური პარტიების აკრძალვა ერთგვარი „რუსული კანონია”, ამიტომ, ბუნებრივია, ჩვენი კოლეგებისა და მოკავშირეების დამოკიდებულება, – შესაბამისი განცხადებით, „ერთიანობა – ნაციონალური მოძრაობის“ გენერალური მდივანი, პეტრე ცისკარიშვილი ოპოზიციური პარტიების აკრძალვასთან დაკავშირებით „პოლიტიკოს“ სტატიას ეხმაურება.

ცისკარიშვილის თქმით, 26 ოქტომბერს საზოგადოებამ უნდა გადაწყვიტოს რა უნდა: „იზოლაცია და სიღატაკე თუ კეთილდღეობა ევროპაში“.

„ოცნების“ განცხადება ოპოზიციური პარტიების აკრძალვასთან დაკავშირებით, არის ერთგვარი რუსული კანონი და, აქედან გამომდინარე, სრულიად ბუნებრივია ჩვენი კოლეგებისა და მოკავშირეების დამოკიდებულება და ეს დამოკიდებულება ეხმაურება იმ არჩევანსაც, რა არჩევანის წინაშეც ჩვენი ამომრჩევლები დგანან 26 ოქტომბერს. რას ვირჩევთ ჩვენ, რა გვინდა: იზოლაციაში სიღატაკე თუ კეთილდღეობა ევროპაში. ეს არის არჩევანი, რომელიც საზოგადოებამ 26 ოქტომბერს უნდა გააკეთოს.

მეტსაც გეტყვით: თუ პიტერ სტანოს [Politico-ს ევროკავშირის საგარეო ქმედებათა სამსახურის პრესსპიკერი] განცხადების კვალდაკვალ, იმ შემთხვევაში, თუ ქართულმა საზოგადოებამ გადაწყვიტა, რომ “ოცნების” ხელისუფლებამ ძალაუფლება შეინარჩუნოს, ის, რასაც მივაღწიეთ დღემდე: კანდიდატის სტატუსი, თავისუფალი ვაჭრობა და რაც მთავარია, უვიზო მიმოსვლა ევროპის ქვეყნებში, საქართველო ამ ნაწილშიც უკან დაიხევს და ესეც არ იქნება – ეს იქნება ის სამწუხარო რეალობა, რაც აუცილებლად დადგება, თუ “ოცნების” ხელისუფლება დარჩება ქვეყნის სათავეში”, – განაცხადა პეტრე ცისკარიშვილმა.

 ,,ოპოზიციური პარტიების აკრძალვა ერთგვარი „რუსული კანონია” – პეტრე ცისკარიშვილი

ოპოზიციური პარტიების აკრძალვა ერთგვარი „რუსული კანონია”, ამიტომ, ბუნებრივია, ჩვენი კოლეგებისა და მოკავშირეების დამოკიდებულება, – შესაბამისი განცხადებით, „ერთიანობა – ნაციონალური მოძრაობის“ გენერალური მდივანი, პეტრე ცისკარიშვილი ოპოზიციური პარტიების აკრძალვასთან დაკავშირებით „პოლიტიკოს“ სტატიას ეხმაურება.

ცისკარიშვილის თქმით, 26 ოქტომბერს საზოგადოებამ უნდა გადაწყვიტოს რა უნდა: „იზოლაცია და სიღატაკე თუ კეთილდღეობა ევროპაში“.

„ოცნების“ განცხადება ოპოზიციური პარტიების აკრძალვასთან დაკავშირებით, არის ერთგვარი რუსული კანონი და, აქედან გამომდინარე, სრულიად ბუნებრივია ჩვენი კოლეგებისა და მოკავშირეების დამოკიდებულება და ეს დამოკიდებულება ეხმაურება იმ არჩევანსაც, რა არჩევანის წინაშეც ჩვენი ამომრჩევლები დგანან 26 ოქტომბერს. რას ვირჩევთ ჩვენ, რა გვინდა: იზოლაციაში სიღატაკე თუ კეთილდღეობა ევროპაში. ეს არის არჩევანი, რომელიც საზოგადოებამ 26 ოქტომბერს უნდა გააკეთოს.

მეტსაც გეტყვით: თუ პიტერ სტანოს [Politico-ს ევროკავშირის საგარეო ქმედებათა სამსახურის პრესსპიკერი] განცხადების კვალდაკვალ, იმ შემთხვევაში, თუ ქართულმა საზოგადოებამ გადაწყვიტა, რომ “ოცნების” ხელისუფლებამ ძალაუფლება შეინარჩუნოს, ის, რასაც მივაღწიეთ დღემდე: კანდიდატის სტატუსი, თავისუფალი ვაჭრობა და რაც მთავარია, უვიზო მიმოსვლა ევროპის ქვეყნებში, საქართველო ამ ნაწილშიც უკან დაიხევს და ესეც არ იქნება – ეს იქნება ის სამწუხარო რეალობა, რაც აუცილებლად დადგება, თუ “ოცნების” ხელისუფლება დარჩება ქვეყნის სათავეში”, – განაცხადა პეტრე ცისკარიშვილმა.