აშშ-ის პრეზიდენტობის კანდიდატი „რესპუბლიკური პარტიიდან“, დონალდ ტრამპი აცხადებს, რომ თუ თეთრ სახლში დაბრუნდება, ჩინეთი ვერ გაბედავს მის პროვოცირებას, რადგან პრეზიდენტმა სი ძინპინმა იცის, რომ ის “გიჟია”.

ტრამპის მტკიცებით, არ მოუწევს სამხედრო ძალის გამოყენება ტაივანის ბლოკადის თავიდან ასაცილებლად.

„პრეზიდენტი სი პატივს მცემს და მან იცის, რომ გიჟი ვარ”,- აღნიშნა ტრამპმა.

აშშ-ის ყოფილმა პრეზიდენტმა რუსეთის პრეზიდენტ ვლადიმერ პუტინზეც ისაუბრა და განაცხადა, რომ მასთან მეგობრული ურთიერთობა ჰქონდა, თუმცა დაემუქრა, რომ თუ უკრაინაში შეიჭრებოდა, მოსკოვის ცენტრს დაარტყამდა.

„ვუთხარი: მოსკოვის შუაგულში დაგარტყამ. ჩვენ მეგობრები ვართ, არ მინდა ამის გაკეთება, მაგრამ არჩევანი არ მაქვს, არანაირი“, – აღნიშნა ტრამპმა.

ლიბანიდან ჩრდილოეთ ისრაელის მიმართულებით დაახლოებით 30 რაკეტა გაუშვეს.- ინფორმაციას ისრაელის თავდაცვის ძალები ავრცელებს.

ისრაელის არმიის ცნობით, რაკეტების ნაწილი შეაჩერეს, ზოგიერთი კი სხვადასხვა ტერიტორიაზე დაეცა და ხანძარი გამოიწვია.

თავდასხმაზე პასუხისმგებლობა „ჰეზბოლამ“ აიღო. დაჯგუფების ინფორმაციით, მათი სამიზნე ქალაქ საფედის აღმოსავლეთით, ისრაელის სამხედრო ბაზა იყო.

რუსეთის კურსკის ოლქში უკრაინის თავდაცვის ძალები ფრონტის კონტროლს აგრძელებენ,- ამის შესახებ უკრაინის შეიარაღებული ძალების მთავარსარდალმა, გენერალმა ალექსანდრ სირსკიმ განაცხადა.

მისი თქმით, კურსკის ოლქში უკრაინელი ჯარისკაცები მამაცურად და ეფექტურად ასრულებენ საბრძოლო მისიებს.

„მტრის ყველა მცდელობის მიუხედავად, აიღონ ინიციატივა, სიტუაცია ჩვენს კონტროლქვეშ რჩება“, – აღნიშნა სირსკიმ.

მისი თქმით, უშუალოდ განახორციელა სამუშაოები ბრიგადის სამეთაურო პუნქტებში და მოუსმინა ბრიგადის მეთაურებს და მათ წინადადებებს შემდგომ ქმედებებთან დაკავშირებით და დახმარება გაუწია პრობლემური საკითხების გადაჭრაში.

„სიტუაციის შეფასების გათვალისწინებით, მივიღე არაერთი გადაწყვეტილება, რომელიც მიმართულია მტრის მოქმედებების აღკვეთისა და მისთვის მაქსიმალური დანაკარგების მიყენებაზე“, – აღნიშნა სირსკიმ.

ისრაელის თავდაცვის ძალების ცნობით, ლიბანის დედაქალაქ ბეირუთში, „ჰეზბოლას“ სამეთაურო ცენტრსა და იარაღის მიწისქვეშა ობიექტს დაარტყეს.

„დღეს, დილით ისრაელის საჰაერო ძალებმა დაზვერვის მონაცემებზე დაფუძნებული დარტყმა განახორციელა „ჰეზბოლას“ დაზვერვის შტაბის სამეთაურო ცენტრსა და ბეირუთში იარაღის მიწისქვეშა სახელოსნოზე“, – აცხადებენ ისრაელის თავდაცვის ძალებში.

ისრაელის არმიის ინფორმაციით, მოიერიშე თვითმფრინავებმა „ჰეზბოლას“ სამხრეთ ფრონტის სარდლობის მაღალჩინოსანი, ალჰაჯ აბას სალამა და დაჯგუფების კიდევ ორი წევრი გაანადგურეს.

ღაზას სექტორის ხელისუფლების ინფორმაციით, ისრაელის მიერ ქალაქ ბეიტ ლაჰიაზე განხორციელებულ საჰაერო იერიშს სულ მცირე 73 ადამიანი ემსხვერპლა, მათ შორის ქალები და ბავშვები.

მათივე ინფორმაციით, ათობით ადამიანი დაშავდა, ბევრი კი ისევ ნანგრევების ქვეშ რჩება.

ისრაელის თავდაცვის ძალებში აცხადებენ, მსხვერპლის შესახებ ინფორმაციას ამოწმებს. მათი მტკიცებით, „ჰამასის“ ხელისუფლების მიერ გამოქვეყნებული მაჩვენებლები გადაჭარბებულია და არ ემთხვევა ისრაელის არმიის მიერ გავრცელებულ ინფორმაციას.

„ჰამასის“ ხელისუფლების ინფორმაციით, ომის დაწყების შემდეგ ღაზაში 42 519 ადამიანი დაიღუპა და ათობით ათასი დაშავდა.

შეგახსენებთ, ისრაელი-ჰამასის ომი მას შემდეგ დაიწყო, რაც 2023 წლის 7 ოქტომბერს „ჰამასი“ თავს დაესხა ისრაელს, რის შედეგადაც დაიღუპა დაახლოებით 1 200 ადამიანი და 251 მძევლად აიყვანეს. ისრაელმა პირობა დადო, რომ „ჰამასს“ გაანადგურებს. რამდენიმე დღის წინ ღაზაში „ჰამასის“ ლიდერის, იაჰია სინვარის მკვლელობამ კონფლიქტის დასრულების გარკვეული იმედი გააჩინა, მაგრამ ჯგუფის ლიდერის მოადგილემ განაცხადა, რომ „ჰამასი“ მხოლოდ გაძლიერდება და მძევლებს არ გაათავისუფლებენ მანამ, სანამ ისრაელი ღაზას არ დატოვებს.

მოლდოვაში საპრეზიდენტო არჩევნები და ევროკავშირში გაწევრიანების საკითხზე საკონსტიტუციო ცვლილებასთან დაკავშირებით რეფერენდუმი მიმდინარეობს.

მედიის ინფორმაციით, დაახლოებით 2 000 საარჩევნო უბანი ადგილობრივი დროით 7:00 საათზე გაიხსნა.

ამომრჩევლები, გარდა იმისა, რომ ქვეყნის პრეზიდენტს ირჩევენ, პასუხობენ რეფერენდუმის შეკითხვას, მხარს უჭერენ თუ არა კონსტიტიციურ ცვლილებას მოლდოვას ევროკავშირში გაწევრიანების მიზნით.

კანდიდატი, რომელიც მიიღებს ხმათა აბსოლუტურ უმრავლესობას, ქვეყნის ახალი პრეზიდენტი გახდება.

იმ შემთხვევაში კი, თუ ასეთ მხარდაჭერას ვერავინ მიიღებს, მაშინ ორ კვირაში საპრეზიდენტო არჩევნების მეორე ტური გაიმართება.

მოლდოვას პრეზიდენტობისთვის 11 კანდიდატი იბრძვის, მათ შორის ამჟამინდელი პრეზიდენტი, პროევროპელი მაია სანდუ, რომელიც მეორე ვადისთვის იბრძვის და მისი მთავარი ოპონენტი, რომელსაც მხარს უჭერს ყველაზე დიდი პრორუსული ოპოზიციური სოციალისტების პარტია, მოლდოვის ყოფილი გენერალური პროკურორი ალექსანდრე სტოიანოგლო.

ოქტომბრის დასაწყისში, დამოუკიდებელ სოციოლოგიური კვლევის პორტალ Votum.md-ზე ჩატარებულმა გამოკითხვამ აჩვენა, რომ არჩევნებში ლიდერობენ მაია სანდუ, ხმების 45 პროცენტით და ალექსანდრუ სტოიანოგლო, ხმების 25 პროცენტით.

მესამე ადგილს კი „ჩვენი პარტიის“ ლიდერი, რენატო უსათი იკავებს, რომელსაც მხარი დაუჭირა გამოკითხულთა 9%-მა. საერთო ჯამში, კვლევაში, რომელიც 4 დღის განმავლობაში ტარდებოდა, თითქმის ათი ათასი ადამიანი მონაწილეობდა, მაგრამ ის სასწრაფოდ შეწყდა ბოტების მიერ ოპოზიციის ერთ-ერთი კანდიდატისთვის ხმების გაზრდის მცდელობის გამო.