ამერიკის შეერთებული შტატების სახელმწიფო დეპარტამენტი საქართველოს მთავრობას მოუწოდებს, დემოკრატიისა და ევროატლანტიკური ინტეგრაციის გზას დაუბრუნდეს. აღნიშნულის შესახებ ამერიკის შეერთებული შტატების სახელმწიფო დეპარტამენტის სპიკერმა მეთიუ მილერმა “ამერიკის ხმის” ქართული რედაქციის კითხვაზე, წერილობით პასუხში ისაუბრა.

მილერი ამბობს, რომ საქართველოს მთავრობის ქმედებები ეწინააღმდეგება ქართველი ხალხის მისწრაფებებს.

“როგორც უკვე თვეების განმავლობაში ვაცხადებთ, საქართველოს მთავრობის ქმედებები ეწინააღმდეგება ქართველი ხალხის მისწრაფებებს და საქართველოს მთავრობის მიერ დიდი ხნის წინ გაცხადებულ მიზანს, ევროინტეგრაციის შესახებ და შეუთავსებელია იმ დემოკრატიულ ღირებულებებთან, რომელიც საფუძვლად უდევს ევროკავშირსა და ნატოში წევრობას. მოვუწოდებთ საქართველოს მთავრობას, პატივი სცეს ადამიანის უფლებებსა და ფუნდამენტურ თავისუფლებებს, შეწყვიტოს კრიტიკოსების დემონიზაცია და განსხვავებული აზრის სივრცის შეზღუდვა და დაუბრუნდეს დემოკრატიისა და ევროატლანტიკური ინტეგრაციის გზას“, – აცხადებს მილერი.

გარდა ამისა, მეთიუ მილერი პასუხობს შეკითხვას რუსეთის საგარეო საქმეთა დაზვერვის განცხადებაზე, რომ ამერიკა საქართველოში “ფერად რევოლუციას” ამზადებს და ბრალდებას “კატეგორიულად მცდარს” უწოდებს.

“უფრო მშვიდობიანი, აყვავებული და დემოკრატიული საქართველოს ასაშენებლად, საქართველოს ხალხთან ერთად მუშაობის საამაყო ისტორია გვაქვს. ბრალდებები კატეგორიულად მცდარია. კრემლმა მოაწყო 2008 წლის შეჭრა და დღეს საქართველოს სუვერენული ტერიტორიის 20 პროცენტი ოკუპირებულია. [კრემლი] აგრძელებს სასტიკ აგრესიულ ომს უკრაინის წინააღმდეგ. ჩვენ მხარს ვუჭერთ საქართველოს, რუსეთის აგრესიის წინააღმდეგ“, – აცხადებს მეთიუ მილერი.

მას შემდეგ, რაც საკონსტიტუციო უმრავლესობას მოვიპოვებთ მომავალ პარლამენტში, დაიწყება ლეგიტიმური განხილვები, ახლა უბრალოდ პოზიციების მოსინჯვა ხდება – გარწმუნებთ, გადაწყვეტილება, მიღებული იქნება მაღალი ჩართულობით, როგორც კათოლიკოს- პატრიარქის, წმინდა სინოდის, მღვდელმთავრების და მღვდელმსახურების, ისე ჩვენი მრევლის მხრიდან,- ამის შესახებ “ქართული ოცნების” დეპუტატმა ბექა ოდიშარიამ ჟურნალისტებს მართლმადიდებლობის სახელმწიფო რელიგიად გამოცხადების შესახებ ხელისუფლების წინადადებაზე კომენტირებისას განუცხადა.

როგორც ოდიშარიამ განმარტა, აღნიშნული შეთავაზება არჩევნებს არ უკავშირდება და კონსულტაციები ახლა იმიტომ დაიწყო, რომ საზოგადოებამ გაიგოს, “რას აპირებს მმართველი გუნდი”.

“ჩვენ გვაქვს ისეთი დამოკიდებულება როგორიც მრევლის წარმომადგენლებს ეკადრება – არც არჩევნებია აქ შუაში და არც ახლანდელი პოლიტიკური კონტექსტი. ეკლესიაზე, მეუფეებზე, პატრიარქზე თავდასხმა არჩევნების გარეშეც ამ ვერაგი, კოლექტიური “ნაციონალური მოძრაობის” მიერ ძალიან ოსტატურად ხორციელდება. ის არასდროს ჩერდება, არ წყდება. ამაში ისინი იღებენ უზარმაზარ დაფინანსებას, რათა მოახდინონ ეკლესიის ნეიტრალიზაცია და ქრისტიანული ფასეულობების დევალვაცია. აი, ამის წინააღმდეგ გვსურს შეიქმნას დამატებით დაცვითი მექანიზმები და ისინი აისახოს კონსტიტუციაში. საკონსტიტუციო ცვლილებებს საკონსტიტუციო უმრავლესობა სჭირდება. შესაბამისად, მინიმუმ ოქტომბრამდე “ქართულ ოცნებას” ეს ლეგიტიმაცია ვერ ექნება. ხოლო მას შემდეგ, რაც საკონსტიტუციო უმრავლესობას მოვიპოვებთ მომავალ პარლამენტში, დაიწყება ლეგიტიმური განხილვები, კონსულტაციები. ახლა უბრალოდ მოსამზადებელი სამუშაოებია, პოზიციების მოსინჯვა ხდება. სწორედ იმიტომ, რომ არაფრის დაჩქარებული წესით მიღებას არ ვაპირებთ, ამიტომ დაიწყო ასეთი მაღალი რანგის კონსულტაციები ახლა. ხოლო გადაწყვეტილება, გარწმუნებთ, მიღებული იქნება მაღალი ჩართულობით – როგორც კათოლიკოს- პატრიარქის, წმინდა სინოდის, მღვდელმთავრების და მღვდელმსახურების, ისე ჩვენი მრევლის, რომელიც ღირსია და იმსახურებს გაიგოს, რას აპირებ მმართველი გუნდი. გაიგოს ეს მანამდე და ჰქონდეს დრო და საშუალება, რომ განსაჯოს და იმსჯელოს ამის შესახებ იქამდე, ვიდრე ის იქნება კონსტიტუციაში შეტანილი”, – განაცხადა ოდიშარიამ.

რაც შეეხება საკითხზე მეუფე ნიკოლოზის განცხადებას, რომ ხელისუფლების აღნიშნული შეთავაზება წინასაარჩევნო წინადადებაა, ოდიშარია ასახელებს მეუფის ორ განცხადებას და ამბობს, რომ მან პოზიცია შეიცვალა და თუ პირველ ჯერზე კეთილგანწყობილი იყო, მეორე შემთხვევაში საკუთარი “გულწრფელი განცხადება ამოაყირავა”. “მიუხედავად პატივისცემისა, იძულებული ვარ, გულწრფელი შეფასება მივცე მეუფის ამ კომენტარს. დღისით, როგორც ჩანს, ის იყო საკუთარ აზრზე, როდესაც გააკეთა განცხადება, რომ აქ არაფერი დამაკნინებელი არაა მხარეებისთვის – როგორც ეკლესიისთვის, ისე ხელისუფლებისთვის. მიესალმებოდა ასეთ შეთავაზებას და აპირებდა კიდევ კონსულტაციებში ჩართვას. კეთილგანწყობილი იყო ასეთი შეთავაზების მიმართ. რა მოხდა მერე, რამ შეიტანა ცვლილება ისეთი, რომ მან პრაქტიკულად ამოაყირავა თავდაპირველად გულწრფელი განცხადება და განაცხადა ის, რაც ყველასთვის გასაოცარია?! არ მგონია, რომ ჩემი რომელიმე კოლეგა “ქართული ოცნებიდან” მიდრეკილი იყოს იმისკენ, რომ წინასაარჩევნოდ იყენებდეს ამ მოცემულობას. ჩვენთვის დედა ეკლესია იყო, არის და იქნება მართლმადიდებლური რწმენის მთავარი დამცავი და გამავრცელებელი საქართველოში. შესაბამისად, მისდამი დამოკიდებულება ისეთი ტიპის, როგორიც გარკვეულწილად დამახინჯებული ფორმით წარმოადგინა მეუფემ საკუთარ განცხადებაში, არ არსებობს და ვერც იარსებებს ვერასდროს. რელიგიას, მართლმადიდებლურ ეკლესიას მომხმარებლურად ეპყრობოდა და ეპყრობა კოლექტიური “ნაცმოძრაობა”, ისევე როგორც მომხმარებლურად ეპყრობიან ქართულ დიასპორას. როდესაც სჭირდებათ, მაშინ ახსენდებათ და ახდენენ თემის აქტუალიზებას. ასე იყო ყოველთვის დედა ეკლესიასთან დაკავშირებითაც – სჭირდებათ და აქებენ და ადიდებენ; არ სჭირდებათ და პრორუს და მოსკოვის მონებად მოიხსენიებენ და წმინდა სინოდის წევრების წვერით თრევას ლამობენ. ეს არის კოლექტიური “ნაცმოძრაობის” ხელწერა. არამც და არამც, რელიგიის და დედა ეკლესიის მიმართ მომხმარებლური დამოკიდებულება არ ყოფილა და არც იქნება არასდროს “ქართული ოცნების” ხელწერა და მოქმედების სტილი”, – განაცხადა ბექა ოდიშარიამ.

კომპეტენტური ადამიანების ჯგუფია, რომელიც სწორ პოზიციას იცავს და ამასთან დაკავშირებით არავის კითხვა არ უნდა ჰქონდეს, მითუმეტეს, ვერ ვატყობთ, რომ მოსარჩელე მხარეს განხილვებში მაინცდამაინც უპირატესობა ჰქონდეს, – ამის შესახებ პარლამენტის პირველი ვიცე-სპიკერმა გია ვოლსკიმ ჟურნალისტებს განუცხადა, რითაც უპასუხა კითხვას, რატომ არ მონაწილეობენ საკონსტიტუციო სასამართლოში “უცხოური გავლენის გამჭვირვალობის შესახებ” კანონის განხილვაში მმართველი გუნდის დეპუტატები.

მისი თქმით, თუ საჭიროდ ჩაითვლება, დეპუტატები სხდომას დაესწრებიან.

“ვფიქრობ, როდესაც ასეთი სუსტი პოზიცია გაქვს, საკონსტიტუციო სასამართლო იქნება თუ ზოგადად, სხვა მიზეზი უნდა ეძებო, რომელიმე ადამიანი თუ დეპუტატი რატომ არ ესწრება. ვინც მონაწილეობს, საკმაოდ მაღალი კომპეტენციისაა და თუ საჭიროდ ჩათვლიან, დეპუტატიც დაესწრება. მაგრამ კომპეტენტური ადამიანების ჯგუფია, რომელიც სწორ პოზიციას იცავს და ამასთან დაკავშირებით არავის კითხვა არ უნდა ჰქონდეს. მითუმეტეს, ვერ ვატყობთ, რომ მოსარჩელე მხარეს განხილვებში მაინცდამაინც უპირატესობა ჰქონდეს. მე-11 მუხლი არის საკონსტიტუციო ფორმულირება, რომელიც თითქოსდა დარღვეული იყო იმის გამო, რომ “რუსულ კანონს” ვიღებთ. აბსურდია საუბარი იმაზე, რომ თანასწორობის რაღაც პრინციპი ირღვევა. ზოგადად აბსურდია შეტანილი სარჩელი იმასთან დაკავშირებით, თითქოს გამჭვირვალობის მოთხოვნა ჩვენს საგარეო კურსს ცვლის. მე ვფიქრობ და ბევრი ფიქრობს ასე, რომ ეს არის საკონსტიტუციო სასამართლოს პოლიტიკურ ველზე შემოთრევის გააფთრებული მცდელობა. მითუმეტეს, თუ მოვუსმენთ განცხადებებს, რომელსაც მოსარჩელე მხარის წარმომადგენლები აკეთებენ. ესენი პოლიტიკური განცხადებებია. აი, სააკაშვილს რომ სჩვევია – იმის მაგივრად, რომ თავის დანაშაულთან დაკავშირებით გასცეს პასუხები, პოლიტიკურ განცხადებებს აკეთებს. იგივე თემაა დღეს რასაც საკონსტიტუციოში თვალყურს ვადევნებთ. მე-11 მუხლის მოხსნა, როგორც ერთ-ერთი სარჩელისა, ამის მაუწყებელია, რომ აბსურდია ამტკიცო, რომ გამჭვირვალობა არის ანტიდასავლური პრინციპის მქონე კანონი”, – განაცხადა გია ვოლსკიმ.