მოთმინების ამოუწურავი ლიმიტი არ მაქვს. თქვენ ვალდებულება გაქვთ, რომ იქ იჯდეთ, სადაც ზიხართ და ჩემს კითხვებს უპასუხოთ, – ასე მიმართა პარლამენტის დროებითი საგამოძიებო კომისიის სხდომაზე, კომისიის თავმჯდომარემ თეა წულუკიანმა „გახარია საქართველოსთვის“ თავმჯდომარეს, ყოფილ შს მინისტრს გიორგი გახარიას, როცა ის ე.წ. ჩორჩანას საქმესთან დაკავშირებით საუბრობდა.

მან თეა წულუკიანს სთხოვა, რომ მისთვის საკითხზე საუბრის დასრულება ეცლია და არ გაეწყვეტინებინა.

„ჩემთვის მორალურად, ადამიანურად, აბსოლუტურად გაუგებარია და მიუღებელია, როდესაც სახელმწიფო, რომელსაც მიაჩნია, რომ ეროვნულ ინტერესებს იცავს, სოფლის მოსახლეობას იყენებს, იმისთვის, რომ ჩვენებები მოაგროვოს პროკურატურის პოლიტიკური დევნისთვის. მაშინ, როდესაც თქვენივე მთავრობის შინაგან საქმეთა მინისტრი და სუს-ის ყოფილი ხელმძღვანელი ჩვეულებრივ ცრუმოწმედ და დამსმენად აქციეთ. საქართველოს მაშინ ამ ტყეზე ეფექტური კონტროლი არ ჰქონდა და ამ ტყეზე ეფექტურ კონტროლს ახორციელებდა საოკუპაციო ძალები. ამას ადასტურებს არა ჩემი სიტყვები, ამას ადასტურებს სუს-ის 2019 წლის წლიური ანგარიში, EUMM -ის 2019 წლის პრესსრელიზი. ასევე, ჟენევის მოლაპარაკებების 49-ე რაუნდის შედეგობრივი განცხადება, რომელიც საქართველოს წარმომადგენლებმა გააკეთეს.

საქართველოს მოქალაქეებს უნდა ესმოდეთ, რომ ამ ტერიტორიაზე ეფექტური კონტორლი საქართველოს არ ჰქონდა და ამას ახოციელებდა საოკუპაციო ძალები. შესაბამისად, 2019 წლის დასაწყისიდან ყველა შესაბამისი ორგანო, მათ შორის EUMM -იც, სუს-იც, მათ შორის გდდ-ის შესაბამისი დანაყოფებიც, რომლებიც ამ ტერიტორიაზე დრო და დრო იყვნენ, იმიტომ, რომ მუდმივი პატრულირების რესურსი არ არსებობდა და შეუძლებელი იყო. შედეგად, იქ აღმოჩნდა ეს ნიშნები, რომ საოკუპაციოდ, ბორდერიზაციის განსახორციელებლად ეს ტერიტორია მზადდებოდა. აქედან მომდინარეობდა ეს რისკები, როცა იქ შესულ ადამიანებს აკავებდნენ, ზოგს უშვებდნენ“,- განაცხადა გიორგი გახარიამ.

მას კომისიის წევრებმა სიტყვა რამდენჯერმე გააწყვეტინეს იმ მიზეზით, რომ ყოფილი შს მინისტრისთვის კითხვები უნდა დაესვათ.

„ჩაიწერეთ და ბოლოში მკითხეთ!“- მიმართა გახარიამ წულუკიანს, რასაც წულუკიანმა უპასუხა, რომ თავად გადაწყვეტდა, რას ჩაიწერდა და რას არა.

„მე რას ჩავიწერ და გადმოვიწერ ჩემი საქმეა. მომისმინეთ, კითხვას ვსვამ, აქ მე მოთმინების ამოუწურავი ლიმიტი არ მაქვს. თქვენ ვალდებულება გაქვთ, რომ იქ ისხდეთ, სადაც ზიხართ და ჩემს კითხვებს უპასუხოთ, ჩემგან განსხვავებით. „სისხლის სამართლის კოდექსში“ წერია ეს ვალდებულება. ვალდებულება რომ არ გქონდეთ, ჩართვაზე ვედრებას არ გამოაგზავნიდით“, – მიმართა წულუკიანმა გახარიას.

წულუკიანის ამ რეპლიკას გახარიამ უპასუხა, რომ „მოთმინების ლიმიტი არც მას აქვს“.

„მოთმინების ლიმიტი არც მე არ მაქვს, გთხოვეთ, რომ დამასრულებინეთ. არ მაქვს [აქ ჯდომის] ვალდებულება. ნუ ღელავთ თან, დამშვიდდით!“- განაცხადა გახარიამ. მის ამ განცხადებას კი კომისიის წევრი თენგიზ შარმანაშვილი გამოეხმაურა და აღნიშნა, რომ დასასამშვიდებელი თავად გახარიაა.

„დასამშვიდებელი ვინაა და გაქცეული ჩვენი ქვეყნის ფარგლებს გარეთ, კარგად ჩანს“,- მიმართა შარმანაშვილმა გახარიას.

თავის მხრივ კი გახარიამ უპასუხა, რომ „ძალიან კი გინდათ, რომ გავიქცე, მაგრამ ვერ მოესწრებით!“

აქვე, ამ განცხადებას მცირე რეპლიკით უპასუხა წულუკიანმაც.

„მიიღებთ, ალბათ, იქ გარანტიებს და ჩამოხვალთ მერე“,- აღნიშნა წულუკიანმა.

მას მერე, რაც დღეს ალბათ უკვე შეიტყვეთ, რომ თქვენ, ქალბატონებს, ვინც არიან თქვენი წევრები და ცნობილია საზოგადოებისთვის წინა მოწვევის პარლამენტიდან, ამ 12 ადამიანში ახალი წევრებიც იყვნენ, თქვენ დღემდე თვლით, რომ ეს სწორია, როგორც თქვენ ექცევით თქვენივე ამომრჩეველს და საკუთარ საპარლამენტო მანდატს? – ამ კითხვით მიმართა პარლამენტის დროებითი საგამოძიებო კომისიის თავმჯდომარემ, თეა წულუკიანმა, პარტია “გახარია -საქართველოსთვის” ლიდერს, გიორგი გახარიას, რომელიც ქვეყნის ფარგლებს გარეთ იმყოფება და სხდომაზე ერთვება.

წულუკიანის განცხადებით, თუ გახარია პარლამენტს არ აღიარებს, მაშინ, გაუგებარია, რატომ ითხოვდა ის საგამოძიებო კომისიის სხდომაზე ჩართვის შესაძლებლობას.

“თუ ეს სწორია, რა არის ამის მიზეზი, არ აღიარებთ პარლამენტს? მაშინ, რატომ გვევედრებოდით ჩამრთეთო? ან აღიარებთ ამ პარლამენტს, ან არ აღიარებთ. მე პირადად ვერ გავიგე და მაინტერესებს. ჩემი პოზიცია უკვე ვთქვი, რომ პარლამენტში ოპოზიცია საჭიროა. ან ასეთი პოზიცია უნდა გქონდეთ, ან – ისეთი. ორი წევრი [გახარიას პარტიიდან] აქ უნდა იჯდეს. დღემდე თვლით რომ ეს სწორია, როგორც მოექეცით საკუთარ მანდატებს და ამომრჩეველს?” – განაცხადა თეა წულუკიანმა.

კომისიის თავმჯდომარის ამ შეკითხვას გახარიამ ასე უპასუხა: “ჩვენ როგორ მოვექეცით საკუთარ ამომრჩეველს, ამას გადაწყვეტს ჩვენი ამომრჩეველი, როდესაც შემდგომი არჩევნები იქნება.”

პარტიაში „გახარია საქართველოსთვის“ ადასტურებენ, რომ პარტიულ სიაში გადაადგილებაა, თუმცა მათი თქმით, ეს თვითმმართველობის არჩევნებისთვის სამუშაო პროცესის შემადგენელი ნაწილია.

გავრცელებული ინფორმაცია, თითქოს, „გახარია საქართველოსთვის“ გუნდში დაპირისპირებაა, სიცრუეა, – აცხადებენ პარტიაში.

„ჩვენ პირველივე დღიდან ვამბობთ, რომ ვემზადებით თვითმმართველობის არჩევნებისთვის. შესაბამისად, პარტიულ სიაში გადაადგილებაც დაკავშირებულია თვითმმართველობის არჩევნებთან, ნაწილი თბილისში, ნაწილი ქუთაისში და სხვა ქალაქებში იქნებიან პარტიის მაჟორიტარი კანდიდატები”, – აცხადებენ პარტიაში.

ცნობისთვის, პარტია „გახარია საქართველოსთვის“ დეპუტატებს პარლამენტის წევრის უფლებამოსილება შეუწყდათ. სხდომების არასაპატიო მიზეზით გაცდენისსაფუძვლით მანდატი შეუწყდა: – გიორგი გახარიას, თეონა აქუბარდიას, ანა ბუჩუკურს, ლევან გოგიჩაიშვილს, ზაზა თავაძეს, ბექა ლილუაშვილს, ნათია მეზვრიშვილს, ბერდია სიჭინავას, კახა ქემოკლიძეს, როინ ქოჩორაშვილს, დიმიტრი ცქიტიშვილს და ზვიად ძიძიგურს. გიორგი გახარიას პოლიტიკურ გაერთიანებას სხვა ოპოზიციური პარტიებისგან განსხვავებით საარჩევნო სია არ ჩაუხსნია. ეს კი იმას ნიშნავს, რომ პარლამენტის დღის წესრიგში საარჩევნო სიით მომდევნო 12 წევრის უფლებამოსილებას ცნობის საკითხი დადგება.

ამჟამად XI მოწვევის პარლამენტი, რომლის შემადგენლობაც 150 წევრიანი უნდა იყოს, 89 დეპუტატით არის წარმოდგენილი. XI მოწვევის პარლამენტში მანდატი ჯამში პარლამენტის 61 წევრს შეუწყდა.

თუ თაღლითის, მიმთვისებლის, გამფლანგველის ოჯახის წევრები ან მეგობრები გადაწყვეტენ, რომ საკუთარ სახლებში აცხოვრონ, ეს ცალკე დანაშაული იქნება – პირები, რომლებიც თავისუფლების აღკვეთის შემდეგ გამოსულ პირს სარგებლობაში უძრავ ქონებას ან საავტომობილო საშუალებას გადასცემენ, ეს ცალკე დანაშაული იქნება, გადაცემული ქონება ჩამორთმევას დაექვემდებარება და დაზარალებულის დასაკმაყოფილებლად მიექცევა, – ამის შესახებ პარლამენტის იურიდიულ საკითხთა კომიტეტის თავმჯდომარემ არჩილ გორდულაძემ განაცხადა, რომელმაც ქონებრივი ზიანის ანაზღაურებასთან დაკავშირებით მომზადებული საკანონმდებლო პაკეტი მეორე მოსმენით ჯერ კომიტეტში წარადგინა, შემდეგ კი სესიაზე გაიტანა.

აღნიშნული საკანონმდებლო პაკეტი გადამუშავდა. გორდულაძის ინფორმაციით, ფინანსური და ეკონომიკური დანაშაულის ჩადენის შედეგად დაზარალებულებისათვის ზიანის ანაზღაურების მიზნით სისხლის სამართლის კანონმდებლობაში ცალკე დანაშაულად მსჯავრდებულთან უკანონო გარიგება განისაზღვრა.

“მოგახსენებთ, რა იგულისხმება ამაში: – მსჯავრდებულებს, რომელთაც დაზარალებულებს ზიანი მიაყენეს და დაზარალებულისთვის კომპენსაციის გადახდის ვალდებულება შესრულებული არა აქვთ, არ ჰქონდეს შესაძლებლობა, რომ ერთი თვის განმავლობაში საშუალო მომხმარებლის საარსებო მინიმუმის ორმაგ ოდენობაზე მეტი სარგებელი მიიღონ. ეს ყველაფერი გათვალისწინებულია იმისთვის, რომ მოხდეს პრევენცია და ადამიანები დაზარალებულისთვის ზიანის ანაზღაურების ვალდებულებას არ გაექცნენ. მათ ექნებათ შესაძლებლობა, რომ შესაბამისი თანხა მხოლოდ და მხოლოდ უნაღდო ანგარიშსწორების გზით მიიღონ, მაგრამ მხოლოდ ეროვნული ბანკის მმართველობას დაქვემდებარებულ იურიდიულ პირებში. თანხის ჩარიცხვა მათ საკუთრებაში არსებულ ანგარიშებზე უნდა მოხდეს, რათა ჰქონდეთ შრომის საშუალება და შესაბამისი ანაზღაურების მიღების საშუალება.

კონკრეტული დანაშაულების ჩადენის შემთხვევაში, პირებს შესაძლებლობა ექნებათ მემკვიდრეობით უძრავი ქონება მიიღონ. მიიღონ ავტომობილები, მაგრამ როგორც კი მათ სახელზე ქონება აღმოჩნდება და თუ ვალდებულება შესრულებული არ ექნებათ, უძრავი ქონების დაყადაღება მოხდება, ხოლო თანხების ჩარიცხვის შემთხვევაში ჩარიცხული თანხებიც დაყადაღება, რაც დაზარალებულის ასანაზღაურებლად მიექცევა.

თუ ასეთი პირები სხვა სარგებელს – ერთი თვის განმავლობაში საარსებო მინიმუმზე ორმაგ ოდენობაზე მეტს თუ მიიღებენ, ეს ცალკე დანაშაულად ჩაითვლება. რის პრევენციას მოახდენს ეს? – სამწუხაროდ, გარკვეული ადამიანები დანაშაულის ჩადენის შემთხვევაში ქონებას სხვის სახელზე მიაქცევენ ხოლმე, სასჯელს მოიხდიან და ცხოვრებას გადამალული ქონებით აგრძელებენ ისე, თითქოს არც არაფერი მომხდარა. თუ დამნაშავე დანაშაულის ჩადენის შემდეგ ქონებას უსასყიდლოდ ან საბაზრო ღირებულებაზე ნაკლებ ფასად სხვა პირებს გადასცემს, ეს ქონებაც ჩამორთმევას დაექვემდებარება და დაზარალებულთა ზიანის ასანაზღაურებლად მიექცევა“, – განაცხადა არჩილ გორდულაძემ.

გორდულაძემ აღნიშნა ისიც, რომ ამ მიმართულებით საკანონმდებლო ცვლილებები კიდევ უფრო მეტად დაიხვეწება, მაგრამ „არა მისი შემსუბუქების, არამედ ეფექტურობის მიზნით, რათა დაზარალებულის სწრაფი მექანიზმით დაკმაყოფილება მოხდეს“.

კავკასიელ ხალხთა კონფედერაცია  და  მისი თავმჯდომარე,  – ზაალ კასრელიშვილი, საქართველოს მოსახლეობას მიმართავენ, რასაც, „ჯორჯიან თაიმსი“ უცვლელად გთავაზობთ:

„მაქვს პატივი, მოგმართოთ და გისურვოთ მშვიდობა და კეთილდღეობა ქვეყანაში და პირად ცხობრებაში.

საარჩევნო მართონი იწყება და უკვე მერამდენედ, 1992 წლის სამხედრო გადატრიალების შემდეგ, ერთი და იგივე ტექსტები, ერთი და იგივე თემები გვესმის დაპირისპირებული მხარეებიდან, უყურებთ ერთი და იგივე სახეებსა და პარტიებს, რომელთა დაპირებებეს აღსრულება არ უწერია, რადგან მათი უმარავლესობის მიზანი ხელისუფლებაში მოსვლაა ანუ კომფორტში და პრივილეგირებულ მდგომარეობაში დარჩენაა. დიახ დარჩენა, არ მოგესმათ ისინი იყვნენ, არიან და უნდათ რომ დარჩნენ. შეიძლება რამდენიმე სახელი და გვარი შეიცვალოს მათივე ახლობლებით და შინაურებით.

ცივილიზებულ გარეგნობას ამოფარებული თანამედროვე ფეოდალები (კლანები) ნებისმიერი ფორმით ცდილობენ დაიცვან თავისი ქონება და ინტერსები.

საქართველოს მოსახლეობა 32 წელია იმ მანკიერ წრეშია სადაც არ არის ჯანმრთელი კონკურენცია და სერიოზული არჩევანის საშუალება, ადამიანები ვერ ახერხებენ შესაძლებლობების რეალიზაციას რადგან თავის გადარჩენისთვის იბრძვიან. ამიტომ მათ უჭირს ეკონომიკურედ და ორმოში არიან ფსოქოლოგიურად.

ახალი ცხოვრება წარსულის ანალიზით და სინანულით იწყება. ესეა მედიცინაშიც, ჯერ სწორი დიაგნოზი უნდა დასვა, მერე დაავადების გამომწვევი მიზეზები გაანალიზო და მერე მთელი ორგანიზმის გამოსაჯანმთელებელი კომპლექსური მკურნალობა დაიწყო და არა მარტო რომელიმე ორგანოს ლოკალური მკურნალობა.

საქართველოს ტერიტორიები ოკუპირებულია, მოსახლეობა გაჭირვებული და უსამართლობით შეწუხებული და დაჩაგრული რაც იმას ნიშნავს, რომ სახელმწიფო არის დასუსტებული. ეს არის დიაგნოზი ანუ შედეგი, რომელიც დადგა სხვადასხვა მიზეზების გამო, რომელთა შეგნებულმა დაფარვამ ამ სავალალო მდგომარეობამდე მიგვიყვანა.

1991 წლის 31 მარტს საყოვლთაო არვევნებით და რეფერენდუმით, საერთაშორისო სამართლის ყველა ნორმის დაცვით საქართველომ მოიპოვა დამოუკიდებლობა იმ გეოგრაფიულ საზღვრენში რომელშიც ის იმყოფებოდა საბჭოთა კავშირის შემადგენლობაში. ეს იყო პირველი პოლიტიკური ნაბიჯი, რომელსაც უნდა მოჰყოლოდა ეკონომიკური რეფორმები სრულფასოვანი სახელმწიფოს ანუ თვითკმარი ქვეყნის მშენებლობის გზაზე სადაც მოსახლეობის მოთხოვნილებების მინიმუმ 70%-ს აკმაყოფილებს სახელმწიფო. ამ პროცესს შემდეგ ავტომატურად მოსდევს სურვილი და მოთხოვნა ინტეგრაციაზე საერთაშორისო ორგანიზაციებში.

სამწუხაროდ, საქართველოს მოსახლეობის აბსოლუტურმა უმრავლესობამ არ იცოდა რომ , საბჭოთა კავშირის დაშლის შემდეგ ბალტიის პირეთის რესპუბლოკების გარდა პოსტსაბჭოური ქვეყნები რუსეთის გავლენის სფეროდ მოიაზრებოდა საერთაშორისო საზოგადოების მიერ, ამიტომ                    რუსეთმა არ დაუშვა დამოუკიდებელი საქართველოს განვითარების და წარმატების  პერსპექტივა და თავისი ქართველი აგენტების ხელით, (როგორც 1921 წელს) დაიწყო საპროტესტო აქციები, რომელსაც დემოკრატიის უკმარისობის ფონი შეუქმნა შემოქმედებითმა ინტელიგენციამ და საქართველოში და საერთაშორისო საზოგადოებაში შეიქმნა აზრი შეიარაღებული დაპირისპირების გარდაუალ აუცილებლობაზე. ამას მოჰყვა სამხედრო გადატრიალება რუსეთის რეგულარული არმიის დახმარებით (ისნის მოტომსროლელი დივიზიიდან და დიდუბის სამრედრო ნაწილებიდან) და საქართველოში უკვე მეორედ რუსეთის, ქართველმა შეიარაღებულმა აგენტებმა რუსეთის არმიის ნაწილენთან ერთად დაამხო კანონიერი ხელისუფლება.          

პირველად მან ეს გააკეთა 1921 წელს.

მოკლედ: სამხედრო გადატრიალება იყო პირველი დანაშაული საქართველოს სახელმწიფოსა და მოსახლეობის წინაშე ასევე საბედისწრო შეცდომა საქართველოს ისტორიისა და ჩვენი მომავლი წინაშე. მეორე დანაშაული და შეცდომა ქვეყნისა და ხალხის წინაშე ჩაიდინეს როცა გადატრიალების შემდეგ დაიწყეს განსცვავებული პოლიტიკური შეხედულებების მქონე ადამიანების დახვრეტები ქალაქის ქუჩებში, რაიონებში, სოფლების გადაწვა და სამაგალითო სადამსჯელო ოპერაციები რეგიონებში.

ციხეებში გამოკეტეს ეროვნული ცნობიერების მქონე ლიდერები და მოკლეს კანონიერი პრეზიდენტი. ეროვნული ცნობიერების პატრიოტი ადამიანებისათვის ჩაიკეტა საარსებო სივრცე და პერპექტივა პოლიტიკაში, მედიაში და ბიზნესშიც კი. მესამე დანაშაული ჩადენილი ჩვენი ქვეყნისა ჩვენი ხალხის წინაშე იყო მათი ანაბრებიდან, წლების მანძილზე შრომითა და წვალებით დაგროვილი თანხების წართმევა და მიტაცება, რითიც მოსახლეობა შეგნებულად გააღატაკეს. მეოთხე დანაშაული იყო როვა გაძარცვულ ქვეყანაში და გაღატაკებულ ხალხში ჩაატარეს ე.წ. პრივატიზაცია რის შემდეგ ყველა ის სიკეთე რაც დამსახურებულად ეკუთვნოდა ხალხს დაუმსახურებლად ჩაიგდეს ხელში რევანშისტმა კომუნისტებმა, კომკავშირელებმა, კგბ-ემ, წითელმა დირექტორებმა და კრიმინალებმა.

ამ პროცესის შედეგ  შეიქმნა დაპირისპირებული კარტელები და ყოფილმა ,,თანამოაზრეებმა” დაიწყეს ერთმანეთის მორალური და ფიზიკური განადგურება. ამ ტიპის შიდა დაპირისპირების და არეულობის ფონზე მეხუთე დანაშაული ქვეყნისა და ერის წინაშე იყო აფხაზეთის ტერიტორიაზე აგორებულ პროვოკაციულ ომში ჩათრევა თუ შეგნებული ჩაყოლა, მაშინ როცა ფრონტის ზურგი, სამეგრელო რამდენიმეჯერ იყო დარბეული, გაძარცვული და მტრულად განწყობილი. მეექვსე შეცდომა იყო ქართული წინააღმეგობის მოძრაობის ჩახშობა რუსეთის საზთვაო ფლოტის (ბალტინის ფლოტის). მეშვეობით, რომელიც ოფიციალურად შემოიყვანა მაშინდელმა ე.წ. მთავრობამ თავის გადასარჩენად, რადგან მოსახლეობის დიდი უმრავლესობა მათ მხარს არ უჭერდა. 

აფხაზეთის დაკარგვის შედეგ საქართველოს დანარჩენ ტერიტორიაზე, მეომრები, რევანშისტები, სპეც-სამსახურები, კომკავშირელები და კრიმინალები კონკრეტული ინტერესების გარშემო დაჯგუფდნენ, კარტელები გამსხვილდნენ და კლანურ-კორპორაციული მართველობა დაიწყეს. ,,ზედმეტი” ხალხი თავისი წრეებიდანაც მოიშორეს, და მფარველობის სანაცვლოდ წილი დატოვეს მთავრობის წარმომადგენლებისთვის, რითაც მოკლეს ჯანმრთელი კონკურეცია ანუ ქვეყნის ნორმალური განვითარების პერსპექრივა. შემდეგ თავისი წესებით ჩატარებული არჩევნებით ხელისუფლება ოფიციალურად ჩაიგდეს ხელში მთაბრობაც თვითონ გახდნენ და დანარჩენი საქართველო სიღატაკისათვის გაწირეს. ამას მოჰყვა შემდეგი მეშვიდე დანაშაული ცხინვალის და კოდორის დაკარგვა. (ამ თემაზე ვისაუბრებთ 2004-2012 წლების პერიოდის განხილვის დროს).

არც მანამდე და არც მერე კლანურ- კორპორაციული მართველობა არავის შეუცვლია უფრო თანამედროვე მეთოდებით, ქვეყნისა და ხალხის სასარგებლოდ.   არსებული სისტემა ფორმით თავის ინტერესებს მოარგეს, შიანაარსით კი იგივე დატოვეს.      

ხალხო, შეგახსენებთ რომ, ზემოთ ჩამოთვლილი დანაშაულებები ხდებოდა მაშინ, როცა ჩენი ქვეყანა დამოუკიდებლობის გზაზე პირველ ნაბიჯებს დგავდა და ახლად ფეხადგმული ბავშვივით განსაკუთრებული ყურადღება და პატრონობა ჭირდებოდა .

საარჩევნო მარათონი ნელ-ნელა კდევ უფრო უფრო მეტი შოუებით იქნება წარმოდგენილი მედია სივრცეში. არჩევნები ჩვენი კონკრეტული შანსია უკეთესი პერსპექტივისაკენ შევცვალოთ ჩვენი ცხოვრება ამიტომ სანამ ვინმეს ხმას მივცემთ რაიმე დაპირებების გამო, ჯერ ვიკითხოთ ვის რა უკეთებია ქვეყნისა და ხალხის სასარგებლოდ წარულში ან თავის სპეციალობაში რა დონის პროფესიონალია. არ დაგვავიწყდეს რომ, იმდენჯერ მოგვატყუებენ რამდენჯერაც თავს მოვიტყუებთ და თუ მოგბეზრდათ დამამცირებელი სიღარიბე, ყოველი თეთრის ეკონომია ,,შავი” დღისათვის გადადებული და ამავე დროს ერთი და იგივე ხალხის, მათი შვილების და პარტიების სიხარბე და უმადურება კარგად დავფიქრდეთ ჩვენი თუ უცხო ქვეყნების სასარგებლოდ ვაკეთებთ არჩევანს.    

უიმედო მოლოდინს რომელიც არ მთავრდება სხვანაირად უბედურება ჰქვია და ამ განსაცდელს ერთად უნდა დავაღწიოთ თავი ღირსეულად. გარე პატრონების ნებას არ უნდა ავყვეთ მათი ინტერესების გასატარებლად, ჩვენი ეროვნული ინტერესები უნდა დავიცვათ ერთმანეთს დავეხმაროთ და ერთად გამოვიდეთ ამ რთული მდგომარეობიდან რათა წარსულის შეცდომები აღარ გავიმეოროთ და კიდევ უფრო მეტი პრობლემები არ შეუქმნათ მომავალ თაობებს. 

მეტი კონკრეტიკისათვის დავამატებ, რომ სამართლიანობის აღსადგენად 1992-2025 წლების პერიოდი უნდა გაიყოს სამ პერიოდად, ეს მიმართვა პირველი პერიოდია და მოიცავს 1992-2003 წლების პერიოდს. ამის შემდეგ უნდა გამოვიძიოთ 2004-2012 წლების მმართველობა და შემდეგ 2012 დან ვიდრე დღემდე პერიოდის მოვლენები.

გამოუალი მდგომარეობა არ არსებოს და ჩვენ წინასაარჩევნო კომპანიის დროს პერიოდულად გაგიზიარებთ ჩვენს ხედვას ჩვენი ქვეყნის განვითარების და ჩვენი ხალხის კეთილდღეობისაკენ მიმავალ გზაზე როგორც საქართველოში ისე მთელ რეგიონში”, – ნათქვამია მიმართვაში.

ცესკო პარტიებს მუნიციპალიტეტის ორგანოთა არჩევნებში მონაწილეობის უფლების და რიგითი ნომრის მისაღებ პროცედურებს კიდევ ერთხელ შეახსენებს. ცენტრალური საარჩევნო კომისია შესაბამის განცხადებას ავრცელებს.

„მუნიციპალიტეტის წარმომადგენლობითი ორგანოს – საკრებულოს და თვითმმართველი ქალაქის/თვითმმართველი თემის მერის მორიგი არჩევნები ტარდება 2025 წლის 4 ოქტომბერს – ოქტომბრის პირველ შაბათს.

ცენტრალური საარჩევნო კომისია (ცესკო) პოლიტიკურ პარტიებს, რომლებიც დაინტერესებული არიან მუნიციპალიტეტის ორგანოთა არჩევნებში მონაწილეობით, მოუწოდებს, დროულად განახორციელონ აღნიშნული უფლების მოსაპოვებლად საჭირო პროცედურები.

შეგახსენებთ, რომ საქართველოს ორგანული კანონის „საქართველოს საარჩევნო კოდექსი“ 142-ე მუხლის პირველი პუნქტის შესაბამისად, არჩევნებში მონაწილეობის უფლების მისაღებად, პარტიის ხელმძღვანელმა პირმა (პირებმა), განცხადებით უნდა მიმართოს ცენტრალური საარჩევნო კომისიის თავმჯდომარეს:

• საკრებულოს არჩევნების დანიშვნის შემდეგ, არჩევნების დღემდე არაუგვიანეს 57-ე დღისა, თუ რეგისტრირებული იყო ბოლო საპარლამენტო არჩევნებისას ან არჩევნების დანიშვნის დღისთვის ჰყავს წარმომადგენელი საქართველოს პარლამენტში;
• ხოლო თუ ვერ აკმაყოფილებს ზემოაღნიშნულ ვერცერთ პირობას მუნიციპალიტეტის ორგანოთა არჩევნების წლის 1 იანვრიდან 14 ივლისის ჩათვლით. პარტიას განცხადების წარდგენისთანავე გადაეცემა მხარდამჭერთა სიის ნიმუში. პარტია ვალდებულია პარტიის მხარდამჭერთა სიის ნიმუშის მიღებიდან 60 დღის ვადაში, მაგრამ არაუგვიანეს 1 აგვისტოსი, ცესკოს წარუდგინოს მუნიციპალიტეტის წარმომადგენლობითი ორგანოს – საკრებულოს არჩევნებში პარტიის მონაწილეობის მხარდამჭერი არანაკლებ 25 000 ამომრჩევლის სია. მხარდამჭერთა სიას ცესკოს სათანადო სამსახური ამოწმებს საარჩევნო კოდექსის 38-ე მუხლით დადგენილი წესით და დადგენილ ვადაში. განცხადებას უნდა დაერთოს საქართველოს იუსტიციის სამინისტროს მმართველობის სფეროში მოქმედი საჯარო სამართლის იურიდიული პირის − საჯარო რეესტრის ეროვნული სააგენტოს მიერ, ცესკოსთვის განცხადების წარდგენამდე, ბოლო 10 დღის ვადაში გაცემული ამონაწერი მოქალაქეთა პოლიტიკური გაერთიანებების (პარტიების) რეესტრიდან, პარტიის ხელმძღვანელობის/ წარმომადგენლობის უფლებამოსილების მქონე პირის (პირების) მითითებით.

ამასთან შეგახსენებთ რომ, საქართველოს საარჩევნო კოდექსის 38[1] მუხლის შესაბამისად, რიგითი ნომრის მოთხოვნის მიზნით, უფლებამოსილი პოლიტიკური გაერთიანების წარმომადგენელმა ცესკოში უნდა წარმოადგინოს განცხადება არაუგვიანეს მიმდინარე წლის 17 ივლისისა.

თუ პოლიტიკური გაერთიანება არ გამოიყენებს აღნიშნულ უფლებას და არ მომართავს ცესკოს განცხადებით რიგითი ნომრის მოთხოვნის შესახებ, მას რიგითი ნომერი მიენიჭება წილისყრით, არჩევნების დღემდე არაუგვიანეს 55 დღისა.

დამატებითი ინფორმაციის საჭიროებისა ან კითხვების არსებობის შემთხვევაში დაგვიკავშირდით: 2 51 00 51″, – ნათქვამია ცესკოს მიერ გავრცელებულ  განცხადებაში.