ეუთო-ს დემოკრატიული ინსტიტუტებისა და ადამიანის უფლებათა ოფისი აცხადებს, რომ 4 ოქტომბერს, არჩევნებამდე ერთ თვეზე ნაკლები დროით ადრე, საქართველოს ხელისუფლების მიერ ადგილობრივი თვითმმართველობის არჩევნებზე დაკვირვების მიზნით ორგანიზაციის მიწვევა სანდო და შინაარსიანი დაკვირვებისთვის არასაკმარის დროს ტოვებს, – ამის შესახებ ნათქვამია ეუთო/ოდირის განცხადებაში.

„არჩევნებზე გამჭვირვალე და სანდო დაკვირვება მოითხოვს საფუძვლიან მომზადებას და საარჩევნო პროცესის ძირითად ეტაპებზე წვდომის შესაძლებლობას, ჩვენი ყოვლისმომცველი მეთოდოლოგიის შესაბამისად. სამწუხაროდ, საქართველოს ხელისუფლების გადაწყვეტილება, რომ ასეთ გვიან ეტაპზე მოგვიწვიონ, ხელს უშლის შინაარსიან დაკვირვებას და ODIHR-ს არ ექნება არჩევნებზე სადამკვირვებლო მისიის განთავსების შესაძლებლობა. მიუხედავად ამისა, ჩვენ ვიმედოვნებთ, რომ გავაგრძელებთ ჩვენს ხანგრძლივ თანამშრომლობას საქართველოს ინსტიტუტებთან და სამოქალაქო საზოგადოებასთან დემოკრატიისა და ადამიანის უფლებების გასაძლიერებლად“, – განაცხადა ოდირ-ის დირექტორმა, მარია თელალიანმა.

ორგანიზაციის განცხადების თანახმად, საქართველოს ხელისუფლებასთან კონტაქტებში ოდირ-მა არაერთხელ გაუსვა ხაზი დროული მოწვევის მნიშვნელობას, რათა უზრუნველყოფილი იყოს არჩევნების სანდო და ყოვლისმომცველი დაკვირვება.  მათივე ცნობით, წარსულში, ოდირ-მა საქართველოდან დროულად მიიღო მოწვევები 2006, 2010, 2014, 2017 და 2021 წლების ადგილობრივი არჩევნების დასაკვირვებლად, რამაც ორგანიზაციას საშუალება მისცა, არჩევნებისთვის ეფექტურად მომზადებულიყო.

„როგორც ეუთო-ს მონაწილე სახელმწიფომ, საქართველომ აიღო ვალდებულება, ჩაატაროს დემოკრატიული არჩევნები საერთაშორისო სტანდარტების შესაბამისად. მიუხედავად იმისა, რომ ოდირი არ აკეთებს კომენტარს იმ არჩევნებზე, რომელსაც არ აკვირდება, ოფისი გააგრძელებს საქართველოში მიმდინარე მოვლენების მონიტორინგს მისი მანდატით გათვალისწინებულ ყველა სფეროში, მათ შორის დემოკრატიულ მმართველობაში, ფუნდამენტური თავისუფლებებისა და კანონის უზენაესობის დაცვაში“, – ნათქვამია განცხადებაში.

საქართველოს პრემიერ-მინისტრმა, ირაკლი კობახიძემ  ხელისუფლების მიერ 4 ოქტომბრის არჩევნებზე ეუთო/ოდირ-ის მოწვევის წერილით მიმართვის შესახებ განცხადება 6 სექტემბერს გააკეთა.

შტაბში დილიდან თათბირი ჩატარდა, რომ არ ავყვეთ არანაირ პროვოკაციას, ვინაიდან ეს მხოლოდ მათ წისქვილზე ასხამს წყალს. მინდა ყველას ვთხოვო, რომ თავშეკავებულები ვიყოთ, – განუცხადა თბილისის საარჩევნო შტაბის ხელმძღვანელმა ლევან მაჭავარიანმა ჟურნალისტებს.

ჟურნალისტებმა მას ოპოზიციის დღევანდელ დაანონსებულ აქციასთან დაკავშირებით დაუსვეს კითხვა.

„ჩვენ მივყვებით ჩვენს დღის წესრიგს. ახლა ვიმყოფებით თბილისის საარჩევნო შტაბში და მიდის ოცდაოთხსაათიანი მუშაობა. ჩვენი გაცხადებული მიზანია, რომ აუცილებლად პირველ ტურში უნდა დავასრულოთ ეს არჩევნები და ასეც მოხდება. „ქართული ოცნება“ უზრუნველყოფს, რომ წინასაარჩევნო გარემო იყოს მშვიდი, თუმცა ვატყობთ, რომ ხელოვნური აჟიოტაჟის და დაძაბულობის შექმნა სურთ ოპოზიციის აქტივისტებს, გარედან დაფინანსებულ „ტიტუშკებს“ და ამან უკვე სისტემური ხასიათი მიიღო. გუშინ ვნახეთ როგორ მოვიდნენ მაშინ, როდესაც წინასაარჩევნო სამუშაოები მიმდინარეობდა და ხელს გვიშლიდნენ. ყვიროდნენ, ნივთებს ესროდნენ შენობას, ეს არის წინასაარჩევნო გარემოში უხეში ჩარევა.

მისასალმებელია შსს-ის ის განცხადება, რომ გამოძიება სწორედ ამ მუხლითაც არის დაწყებული, ვინაიდან არჩევნები მშვიდ გარემოში უნდა ჩატარდეს. ეს არ შედის რადიკალური ოპოზიციის გეგმებში, რადგან წინასწარ იციან, თუ როგორი მარცხისთვის არიან განწირულები და სურთ, რომ ფიზიკურად ვერ მივიდეს სიტუაცია არჩევნების დღემდე, ვინაიდან ლუსტრირება მოხდება მათი რეიტინგის და ყველა დაინახავს რამხელა სხვაობით გაანადგურებს „ქართული ოცნება“ მათ. მეათე საიუბილეო გამარჯვებას ვიზეიმებთ უზარმაზარი სხვაობით. არა მხოლოდ მე, ჩემი თანაგუნდელებიც სიმშვიდისკენ მოვუწოდებთ ჩვენს მხარდამჭერებს, პარტიის წარმომადგენლებს, თუმცა ძალიან რთულია ისეთი შეურაცხყოფის ატანა, როგორიც გუშინ ვიხილეთ. შტაბში დილიდან თათბირი ჩატარდა, რომ არ ავყვეთ არანაირ პროვოკაციას, ვინაიდან ეს მხოლოდ მათ წისქვილზე ასხამს წყალს. მინდა ყველას ვთხოვო, რომ თავშეკავებულები ვიყოთ“, – აღნიშნა მაჭავარიანმა.

ჩვენს საზოგადოებას არ უნდა ახასიათებდეს პიროვნული დაპირისპირების ეს ფორმა და დონე, რომელიც ამ „ოლეთა“ სექტას სჩვევია – ქალებს თავიანთი ფუნქცია აქვთ, განსაკუთრებით პატარა გოგონებმა ისეთი გინება უნდა შესთავაზონ პროცესს, რომლებიც წინა პლანზე მდგომ ბიჭებს წაახალისებს, – ამის შესახებ პარლამენტის პირველმა ვიცე-სპიკერმა, გია ვოლსკიმ ჟურნალისტებთან განაცხადა, რითაც „ქართული ოცნების” საარჩევნო შტაბთან განვითარებულ მოვლენებს გამოეხმაურა.

მისი თქმით, სამწუხაროა, რომ მსგავს პროცესებში „გაუცნობიერებელი ახალგაზრდები მონაწილეობენ“.

„სამწუხაროა, მაგრამ ფაქტია და ამ ფაქტის საწინააღმდეგოდ შესაძლებელია ძალების გაერთიანება – მათ შორის, გამოვიდნენ ევროპული ქვეყნის ელჩები და თქვან, რომ არ მიესალმებიან, რომელი მხარეც გინდა ის გააკრიტიკონ, მაგრამ სამართლიანები უნდა იყვნენ. სამართლიანობას თუ მივყვებით, ვფიქრობ, ეს შემოტევა დაგეგმილი, იდეა უცვლელია და ბევრი ახალგაზრდა, რომელიც ამაში მონაწილეობს, შეცდომაშია შეყვანილი. არის ჯგუფი, რომელიც ამას გეგმავს, ახორციელებს და იმ მიზნის მიღწევა სურს, რაზეც არაერთხელ გვითქვამს. სამწუხაროა, რომ ამაში ეს გაუცნობიერებელი ახალგაზრდებიც მონაწილეობენ – გოგოები თუ ბიჭები. თუმცა გოგოების მონაწილეობა საგანგებოდ მნიშვნელოვანია, ვინაიდან მათი მხრიდან დედის გინება განსაკუთრებული სტრატეგიული ამოცანაა და სცენარის ნაწილია, რომ საქართველოში ეს მდგომარეობაა – პატარა გოგონებიც იგინებიან ასე მწარედ და მძიმედ. კიდევ არის ელემენტები, რომელიც ამ „ოლეთა“ სექტას ახასიათებს.

არც მე და არც კახას [კალაძეს] არ დაგვინახავს ქალები, რომლებიც მოკრივის ფუნქციას ასრულებენ. ქალებს თავიანთი ფუნქცია აქვთ. ქალებმა, განსაკუთრებით პატარა გოგოებმა ისეთი გინება უნდა შესთავაზონ პროცესს, რომლებიც წინა პლანზე მდგომ ბიჭებს წაახალისებს – ეს ყველაფერი გეგმა და სცენარია”, – განაცხადა გია ვოლსკიმ.

ამავე თემაზე საუბრისას ვოლსკიმ აღნიშნა, რომ თუ ვინმე მოძალადეა – არის “ოლეთა ჯგუფი და სექტა.”

„მოძალადეებს ეძახით ადამიანებს, ვინც დგას და თავს ესხმიან. რაც არ უნდა ვიდეო მაჩვენოთ, არ არის დამარწმუნებელი. ასე რომ მიუვარდებით ადამიანს, გინებას დაუწყებ, ეტყვი რომ რუსი ხარ, მოღალატე ხარ, „კაგებეს” აგენტი ხარ და იმან პასუხი გაგცა, თქვენთვის ეს არის [ძალადობა]. ეგ სიმღერა მგონი თქვენ და მაგათ ყველას ერთად გეკუთვნით, თავისი შინაარსიც და 10-ჯერ მეტიც. როცა ადამიანის წყობიდან გამოყვანას, სროლას, გინებას სპეციალურად აორგანიზებ, იქიდან პასუხი იქნება. თქვენი მიზანია ისიც რომ მეკითხებით და გინდათ, რომ წყობილებიდან გამომიყვანოთ, მაგრამ ვერ მიაღწევთ. თუ ვინმე მოძალადეა – ხართ თქვენ, თქვენი გუნდი, „ოლეთა“ ჯგუფი და სექტა, ტერორისტული აქციების მომწყობი – ფიზიკური იქნება ეს თუ მორალურ-ფსიქოლოგიური, დიდი განსხვავება არ აქვს. არც ფიზიკურისგან იკავებთ თავს, პირიქით ახალგაზრდებს მოუწოდებთ, რომ სისხლი დაღვარონ, ტერორისტები ხართ შინაარსით და აზრით, ეს არის ტერორიზმი – თქვენ ადამიანებზე ფსიქოლოგიურ ტერორს ახორციელებთ იმ მიზნის მისაღწევად, რაც გაგაჩნიათ“, – განაცხადა ვოლსკიმ.

შეგახსენებთ, მელიქიშვილის გამზირზე, კახა კალაძის საარჩევნო შტაბთან ხმაური და დაპირისპირება იყო. აქციის მონაწილეების განცხადებით, მათ „ქართული ოცნების“ ახალგაზრდული ფრთის წარმომადგენლები ფიზიკურად გაუსწორდნენ. ფიზიკური დაპირისპირებისას აქციის 10-ზე მეტი მონაწილე დაშავდა, მათ შორის არიან მედიის წარმომადგენლები.

თუ პარლამენტში შემოსვლას არ აპირებდნენ, რა აზრი ჰქონდა ასეთი დოკუმენტის წარმოდგენას – თუმცა გადაჭრით და 100%-ით ამას ვერ ვიტყვით, დაველოდოთ 15 ოქტომბერს სესიის განახლებას, სადაც გაცხადდება რას აპირებენ ეს პირები, – ამის შესახებ პარლამენტის საპროცედურო საკითხთა კომიტეტის თავმჯდომარემ, დავით მათიკაშვილმა განაცხადა, რითაც გამოეხმაურა გავრცელებულ ინფორმაციას, რომ პარტია „გახარია საქართველოსთვის“ 8 წევრმა ბოიკოტი შეწყვიტა და პარლამენტში შედის.

მისი თქმით, პარლამენტმა პარტია „გახარია საქართველოსთვის“ რვა პირისგან წერილი მიიღო, სადაც საუბარია იმაზე, რომ პარლამენტის წევრობასთან შეუთავსებელ საქმიანობას წყვეტენ.

„საგაზაფხულო სესია იმით დასრულდა, რომ ე.წ გახარიების პარტიის 12 წევრს უფლებამოსილება შეუწყდა იმის გათვალისწინებით, რომ აცდენდნენ სხდომებს და უპასუხისმგებლოდ იქცეოდნენ. ამ პარტიის მომდევნო 12 წევრის უფლებამოსილების საკითხი ლოგიკურად დგება დღის წესრიგში, რადგან სია არ ჩაუხსნიათ ცესკოში. ცესკომ მოგვმართა შემდგომი 12 წევრისთვის უფლებამოსილების ცნობის თაობაზე, რაც დაკმაყოფილდა ჯერ კომიტეტზე და შემდეგ სესიამ ცნო უფლებამოსილება. ამ ეტაპზე ჩვენ ამ 12 პირისგან რვა პირის წერილი მივიღეთ, სადაც საუბარია იმაზე, რომ პარლამენტის წევრობასთან შეუთავსებელ საქმიანობას წყვეტენ. ანუ, სავსებით ლოგიკური დასკვნაა, რომ ისინი პარლამენტში ფიზიკურად შემოსვლისთვის ემზადებიან. ასევე ცოტა ხნის წინ მათმა ლიდერმა გახარიამ შეცდომა უწოდა პოლიტიკურ ბოიკოტში ყოფნას და პარლამენტში შემოსვლას, ამიტომ სავსებით ლოგიკური დასკვნაა, რომ ეს დოკუმენტბრუნვა იმისთვის არის, რომ მათ ფიზიკურად დაიკავონ პარლამენტის წევრის ადგილი და გამოიყენონ საპარლამენტო რესურსი. წინააღმდეგ შემთხვევაში ამ წერილობით მომართვას არანაირი აზრი არ აქვს. თუ პარლამენტში შემოსვლას არ აპირებდნენ, რა აზრი ჰქონდა ასეთი დოკუმენტის წარმოდგენას – ლოგიკურად ასეა. თუმცა გადაჭრით და 100%-ით ამას ვერ ვიტყვით, დაველოდოთ სესიის განახლებას, 15 ოქტომბერს, სადაც გაცხადდება რას აპირებენ ეს პირები. ამ პარტიისგან არც ტყუილი გვიკვირს, არც ნათქვამის გადათქმა და არც ღალატი და გაქცევა”, – განმარტა მათიკაშვილმა.

ცნობისთვის, „იმედის“ ინფორმაციით, პარტიამ „გახარია – საქართველოსთვის“ ბოიკოტი შეწყვიტა და პარლამენტში შედის. როგორც „იმედი“ აღნიშნავს, გახარიას პარტიის მანდატ შეჩერებული დეპუტატების რვა ადგილმონაცვლე პარლამენტის თავმჯდომარეს წერილით მიმართავს, სადაც აღნიშნულია, რომ მათ შეწყვიტეს პარლამენტის წევრის სტატუსთან შეუთავსებელი საქმიანობა. იმედის ცნობით, ისინი შალვა პაპუაშვილს თხოვნით მიმართავენ, რომ „იმოქმედოს კანონმდებლობით განსაზღვრული წესით“.

პარტია „გახარია საქართველოსთვის“ ინფორმაციით კი, მათი პარტია პოლიტიკურ ბოიკოტში რჩება და საპარლამენტო მანდატების გამოყენებასთან დაკავშირებით მათი პოზიცია არ შეცვლილა. როგორც განცხადებაშია აღნიშნული, პარლამენტისთვის მიმართვა პროცედურული საკითხია, რომელიც 6 თვის წინაც გაიარეს.