ის კანონები, რომელიც საფუძვლად არის მოტანილი ვიზალიბერალიზაციის გაუქმების და შეჩერების წერილში, ემსახურება მხოლოდ და მხოლოდ საქართველოს ინტერესს, – აცხადებს პარლამენტის ვიცე-სპიკერი ნინო წილოსანი. მისი თქმით, შესაბამისად, ევროკომისიის წერილი ვერ იქნება აღქმული, როგორც სამართლიანი და ობიექტური მოთხოვნა.

„ამ მუქარის და შანტაჟის ავტორებისთვის კომფორტულია თუ ხელისუფლებაში იქნება „ნაციონალური მოძრაობა“, რომელიც ერთი მოთხოვნის შესაბამისად, ისევე როგორც 2008 წელს საქართველოს ჩართავდა ომში. ის კანონები, რომელიც საფუძვლად არის მოტანილი ვიზალიბერალიზაციის გაუქმების და შეჩერების წერილში, ემსახურება მხოლოდ და მხოლოდ საქართველოს ინტერესს და ამ შემთხვევაში, ეს რა თქმა უნდა ვერ იქნება აღქმული როგორც ობიექტური და სამართლიანი მოთხოვნა“, – აცხადებს წილოსანი.

ევროკომისიამ საქართველოს საგარეო საქმეთა მინისტრს, მაკა ბოჭორიშვილს წერილი გამოუგზავნა, სადაც იმ რვა რეკომენდაციის ჩამონათვალია, რომელიც ქვეყანამ უნდა შეასრულოს, რათა უვიზო რეჟიმს საფრთხე არ დაემუქროს. მათ შორის ევროკავშირი ითხოვს გაუქმდეს „ოჯახური ღირებულებებისა და არასრულწლოვანთა დაცვის შესახებ“ კანონი, უზრუნველყოფილი იყოს LGBTIQ თემის უფლებების სრული დაცვა.

რამდენიმე დღეა, პროპაგანდისტული მედია „არკვევს“, გვთხოვს თუ არა ბრიუსელი კაცების ძალად დათხოვებას და ყოველ წელს ასი ნარჩევი გოგო-ბიჭის მიგვრას. ამ ვითომდა „გამორკვევის“ მიზანი, სინამდვილეში, მათი პროპაგანდით ნაკვები აუდიტორიისთვის ემოციური შოკის დღიური რაციონის მიცემაა, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

პაპუაშვილის თქმით, „სერიოზული საკითხის არამოტივირებულ ღლიცინში გადატანა ხომ ნაცადი პროპაგანდისტული ხერხია, რათა მთავარი საკითხი ყურადღების მიღმა დარჩეს“.

„მთავარი კი ისაა, რომ ბრიუსელმა, რატომღაც (?), რეფერენდუმად გამოცხადებულ საპარლამენტო არჩევნებში ქართველი ხალხის მიერ ხმამიცემული და საქართველოს მართლმადიდებელ ეკლესიასთან ერთად, ყველა ტრადიციული რელიგიის მიერ მხარდაჭერილი კანონის სრული გაუქმება მოითხოვა. იმ კანონისა, რომელზეც, სრული ამ სიტყვის მნიშვნელობით, ერიც და ბერიც შეთანხმებულია და რომელსაც, უვიზო მიმოსვლასთან, წესით, არანაირი კავშირი არ აქვს.

ბრიუსელის მაამებელი პროპაგანდის კვალი ჩანს მედიის ქცევაშიც, რომლებიც არაფრის ძალით არ მიმართავენ ამ საკითხში „გარკვევის“ ყველაზე სწრაფ გზას, ევროკავშირის ელჩისთვის მარტივი კითხვების დასმას. დარწმუნებული ვარ, ევროკავშირის ელჩი, როგორც სხვა დროს, არ დაზარდებათ და პასუხს გასცემს მათ კითხვებს: უნდა გაუქმდეს თუ არა, ერთნაირსქესიანთა ქორწინების და ქორწინების ალტერნატიული სამართლებრივი კავშირის აკრძალვა? უნდა გაუქმდეს თუ არა სქესის სამართლებრივად შეცვლის აკრძალვა? უნდა გაუქმდეს თუ არა ოფიციალურ დოკუმენტებში ბიოლოგიურისგან განსხვავებული სქესის მითითების აკრძალვა? უნდა გაუქმდეს თუ არა ბაღებში, სკოლებში ლგბტ პროპაგანდის აკრძალვა?“, – წერს პაპუაშვილი.

აშშ-ის იუსტიციის დეპარტამენტის უცხოელ აგენტთა რეესტრის ვებ-გვერდზე გამოქვეყნებული დოკუმენტებიდან ირკვევა, რომ ერთიანმა ნაციონალურმა მოძრაობამ ამერიკული ლობისტური კომპანია – “ნელსონ მალინსი” (Nelson Mullins Riley & Scarborough, LLP) – დაიქირავა. ლობისტურ კომპანიასთან ხელშეკრულებას ნაციონალური მოძრაობის მხრიდან ხელს პეტრე ცისკარიშვილი აწერს.

11 ივლისით დათარიღებული ხელშეკრულებით ირკვევა, რომ ლობისტურ კომპანიას ნაციონალურმა მოძრაობამ 360,000 აშშ დოლარი გადაუხადა, რომელიც ლობისტების 6 თვის საქმიანობის ღირებულებას შეადგენს. აღსანიშნავია, რომ ნაცმოძრაობა ხელშეკრულებაში ოფიციალურად მითითებულია, როგორც ერთიანობა ნაციონალური მოძრაობა, და არა ერთიანი ნაციონალური მოძრაობა.

განსაკუთრებით აღსანიშნავია, რომ “ნელსონ მალინსის” სათავო ოფისი სამხრეთ კაროლინის შტატში, ქალაქ კოლუმბიაში მდებარეობს.

წლების განმავლობაში, ლობისტური კომპანია აქტიურად აფინანსებს ორივე პარტიის კონგრესისა და საპრეზიდენტო კანდიდატების პოლიტიკურ კამპანიებს(Donations to PAC), მათ შორისაა ჩვენთვის კარგად ნაცნობი სამხრეთ კაროლინელი კონგრესმენი ჯო უილსონი. ღია წყაროებზე დაყრდნობით ირკვევა, რომ უილსონის კამპანიისთვის ლობისტურ კომპანიას ჯამში 87,500 აშშ დოლარი აქვს შეწირული (ბოლო 20 წლის განმავლობაში). 2024 წლის კონგრესის არჩევნებისთვის კი „ნელსონ მალინსმა“ პოლიტიკურ კამპანიას 10,000 აშშ დოლარი შესწირა. კომპანიის მიერ დაფინანსებულ კანდიდატებს შორისაა სამხრეთ კაროლინელი სენატორი ლინდსი გრემიც, რომლის 2024 წლის კამპანიასაც „ნელსონ მალინსმა“ ჯამში 35,000 აშშ დოლარი შესწირა.

აღსანიშნავია, რომ პოლიტიკური შემოწირულობები ხორციელდება არამხოლოდ აღნიშნული კომპანიის სახელით, არამედ მასში დასაქმებული პირების სახელითაც, რაც ბადებს საფუძვლიან ეჭვს, რომ ლობისტებისთვის ნაციონალური მოძრაობის გადახადილი თანხა კონგრესმენ ჯო უილსონის კამპანიას მოხმარდება, რის სანაცვლოდაც კონგრესმენი განაგრძობს დეზინფორმაციულ კამპანიას საქართველოს შესახებ და ხელს შეუწყობს მეგობარი აქტის მიღების პროცესს.

ხელშეკრულებაში აღნიშნულია, რომ ლობისტური კომპანია იქნება ნაციონალური მოძრაობის დიპლომატიური წარმომადგენელი ამერიკის შეერთებულ შტატების სამთავრობო უწყებებთან და ასევე დაეხმარება პოლიტიკურ პარტიას უზრუნველყოს თავისუფალი და სამართლიანი არჩევნების ჩატარება საქართველოში. საინტერესოა, რომ ნაციონალური მოძრაობა საერთოდ არ გეგმავს ადგილობრივ არჩევნებში მონაწილეობის მიღებას, მაგრამ აქტიურად აპირებს აშშ-ში თავისუფალი და სამართლიანი არჩევნებისთვის ლობირებას.

ჩვენ არ ვიცით, ზუსტად რა მისამართიდან მოდიოდა ამერიკული გზავნილი, – ამის შესახებ პრემიერ-მინისტრმა ირაკლი კობახიძემ “რუსთავი 2″-ის ეთერში განაცხადა, როდესაც უპასუხა ქართულ-ამერიკულ ურთიერთობებთან დაკავშირებულ კითხვას, კერძოდ, საელჩოს განცხადებაზე, რომლის თანახმად “ბიძინა ივანიშვილმა უარი თქვა ელჩ დანიგანთან შეხვედრაზე, სადაც მას ტრამპის ადმინისტრაციის გზავნილი უნდა მოესმინა. სახელმწიფო მდივან რუბიოს თხოვნით, 22 მაისს, ელჩმა დანიგანმა ბიძინა ივანიშვილთან შეხვედრა ითხოვა, რათა შეეტყობინებინა ადმინისტრაციის გზავნილი”.

კობახიძის თქმით, არის ეჭვი, რომ გზავნილი მოდიოდა სწორედ იმ დანაყოფიდან სახელმწიფო დეპარტამენტში, რომელიც მოქმედებს კვლავაც “დიფ სთეითის” გავლენით.

“რაც შეეხება ამერიკულ გზავნილს, ჩვენ არ ვიცით, ზუსტად, რა მისამართიდან მოდიოდა ეს გზავნილი, გამომდინარე ქალბატონი დანიგანის უშუალო კავშირებიდან, გვაქვს ეჭვი, რომ ეს გზავნილი მოდიოდა სწორედ იმ დანაყოფიდან, სახელმწიფო დეპარტამენტში, რომელიც მოქმედებს კვლავაც “დიფ სთეითის” გავლენით. ამას ამყარეს რა – ჩვენი პასუხი, ბიძინა ივანიშვილის პასუხი იყო საჯარო, მან განაცხადა, შემდეგი რამ: ბიძინა ივანიშვილი არის შანტაჟის ქვეშ, პირდაპირი ფინანსური ინსტრუმენტები გამოიყენება. არა მარტო ფინანსური, სანქციები, მანამდე იყო დე ფაქტო სანქციები, ფინანსების გაჩერება. ბატონი ბიძინა ივანიშვილი დღეს მოქმედებს შანტაჟის ქვეშ. რაც შეეხება ხელისუფლების ლიდერებს, პრემიერ-მინისტრს და სხვებს, ჩვენს შემთხვევაში ანალოგიური ტიპის შანტაჟი არ მოქმედებს. ჩვენ არ ვართ არც ფორმალური არც არაფორმალური სანქციების ქვეშ. ამიტომ ჩვენთვის გაუგებარი უნდა იყოს ბუნებრივია, რატომ თქვეს, ელჩმა და შესაბამისმა პირებმა უარი მაგალითად, პრემიერ-მინისტრისთვის ამ გზავნილის გადმოცემასა და გაზიარებაზე. რა თქმა უნდა ეს გზავნილი ყველა შემთხვევაში მიაღწევდა ბიძინა ივანიშვილამდე ხომ? ამის პრობლემა არ იყო”, – განაცხადა კობახიძემ.

შეგახსენებთ, 28 მაისს აშშ-ის საელჩომ განცხადება გაავრცელა:

“ბიძინა ივანიშვილმა უარი თქვა ელჩ დანიგანთან შეხვედრაზე, სადაც მას ტრამპის ადმინისტრაციის გზავნილი უნდა მოესმინა. სახელმწიფო მდივან რუბიოს თხოვნით, 22 მაისს, ელჩმა დანიგანმა ბიძინა ივანიშვილთან შეხვედრა ითხოვა, რათა შეეტყობინებინა ადმინისტრაციის გზავნილი და კიდევ ერთხელ გადაეცა კონკრეტული ნაბიჯების შესახებ, რომელთა გადადგმაც საქართველოს მთავრობას შეუძლია იმის საჩვენებლად, რომ სერიოზულად არის განწყობილი შეერთებულ შტატებთან ურთიერთობის გადატვირთვის მიმართ. იმედი გვაქვს, საქართველოს მთავრობას გულწრფელად სურს ამერიკასთან და ამერიკელ ხალხთან 33-წლიან პარტნიორობასა და მეგობრობას დაუბრუნდეს“,- წერია განცხადებაში.

მეორე ფრონტის ინტერესი არსად გამქრალა, უფრო მეტიც, დღეს ძალიან აშკარად გამოიკვეთა ომის გახანგრძლივების ინტერსი, ამაზე საუბრობენ ევროპელი პოლიტიკოსების უმრავლესობა. არავის უნდა უკვირდეს, რომ საქართველოზე ზეწოლა გრძელდება, – განაცხადა საქართველოს პრემიერ-მინისტრმა, ირაკლი კობახიძემ „ღამის კურიერში“.

პრემიერის თქმით, „დიფ სთეითის“ ინტერესი არის, რომ ომი რაც შეიძლება დიდხანს გახანგრძლივდეს, ომის გახანგრძლივებისთვის ერთ-ერთი კარგი საშუალება კი საქართველოში მეორე ფრონტის გახსნაა.

„ტრამპის გარდა არავინ ცდილობს ომის დასრულებას. პირიქით, თქვენ თუ დააკვირდებით ევროპელი პოლიტიკოსების რიტორიკას, უმრავლესობას ვგულისხმობ, მთლიანად არის მომართული ეს რიტორიკა ომის გახანგრძლივებისკენ. პირდაპირ ომის რიტორიკა წარმოებს ევროპელი პოლიტიკოსების მეშვეობით. ეს ძალიან მკვეთრად ჩანს. „დიფ სთეითის“ ინტერესი არის, რომ ომი რაც შეიძლება დიდხანს გახანგრძლივდეს. ომის გახანგრძლივებისთვის ერთ-ერთი კარგი საშუალებაა საქართველოში მეორე ფრონტის გახსნა. ეს შესაძლო თეორიული და პრაქტიკული სცენარი განადგურებას უქადის ჩვენს ქვეყანას, მაგრამ „დიფ სთეითისთვის იქნება ძალიან მომგებიანი პირველ რიგში იმის გამო, რომ ეს მოახდენს რუსეთის ფედერაციის დამატებით დისკრედიტირებას და ეს არის მნიშვნელოვანი იმისთვის, რომ პროპაგანდამ არ დაკარგოს თავისი ძალა და მეორე – სამხედრო თვალსაზრისითაც. მიუხედავად იმისა, რომ ჩვენ პატარა ქვეყანა ვართ და დიდი ხნით წინააღმდეგობის გაწევა გაგვიჭირდება, რუსეთს მეორე ფრონტი შეუქმნის პრობლემებს. გავიხსენოთ კურსკის სპეცოპერაცია, რაც ჩატარდა უკრაინელების მიერ. აქ საუბარია კურსკის ოპერაციაზე, ოღონდ ცოტა უფრო დიდი მასშტაბით. ეს რა თქმა უნდა, პრობლემა იქნება რუსეთისთვის და ამას ესწრაფვიან „დიფ სთეითის“ წარმომადგენლები და მათი აგენტურა. აქედან გამომდინარე, მეორე ფრონტის ინტერესი არსად გამქრალა, უფრო მეტიც, დღეს ძალიან აშკარად გამოიკვეთა ომის გახანგრძლივების ინტერსი, ამაზე საუბრობენ ევროპელი პოლიტიკოსების უმრავლესობა. არავის უნდა უკვირდეს, რომ საქართველოზე ზეწოლა გრძელდება. ვიდრე არ გაქრება ომის ინტერესი, მანამდე ეს ზეწოლა აუცილებლად იქნება“, – განაცხადა პრემიერმა.

პარტია „ხალხის ძალის“ საგარეო ურთიერთობათა მდივანი ეკა სეფაშვილი ევრობიუროკრატების მიერ ვიზალიბერალიზაციის შანტაჟის იარაღად გამოყენებას მედიასთან ეხმიანება.

დეპუტატის განმარტებით, ევრობიუროკრატების მიერ საქართველოს მიმართ გაჟღერებული ბრალდებები, თითქოს ქვეყანამ ევროკავშირის გზას გადაუხვია, უარგუმენტოა და ამას საერთაშორისო ორგანიზაციებიც ადასტურებენ.

„როდესაც ევრობიუროკრატების ცარიელ და ლიტონ სიტყვებს არ მოჰყვება რეალური მტკიცებულებები და ქმედებები და მათი ამ განცხადებების საპირისპირო კეთდება საქართველოში, რა თქმა უნდა, ეს იარლიყები უკვე ცვდება“, – განაცხადა ეკა სეფაშვილმა.

მან აღნიშნა, რომ ევრობიუროკრატების მხრიდან ვიზალიბერალიზაციით შანტაჟისა და მოსახლეობაზე ზეწოლის შეჩერების მოლოდინი არ აქვს, თუმცა აქვს მოლოდინი, რომ ევროპაში საღი აზრი გაიმარჯვებს და საქართველოსთვის ვიზალიბერალიზაციის შეჩერება არ მოხდება.

„საგარეო ურთიერთობების მხრივაც დაახლოებით მსგავსი სიტუაციაა. ევრობიუროკრატების მხრიდან ჩვენს მიმართ გაჟღერებულია ბრალდებები პრორუსულობის შესახებ, თითქოს საქართველომ გადაუხვია ევროპულ კურსს ა.შ. როდესაც ევრობიუროკრატების ამ ცარიელ და ლიტონ სიტყვებს არ მოჰყვება რეალური მტკიცებულებები და ქმედებები და მათი ამ
განცხადებების საპირისპირო კეთდება საქართველოში, მაგალითად ხორციელდება ასოცირების ხელშეკრულება, სხვადასხვა უწყებები მუშაობენ, ქვეყნის პოლიტიკური კურსი აბსოლუტურად პროდასავლური და ცივილიზებული ღირებულებებისკენ არის მიმართული და ამას ადასტურებს სხვადასხვა რეიტინგიც, რა თქმა უნდა, ეს იარლიყები უკვე ცვდება.

რაც შეეხება ევროკავშირში უვიზო მიმოსვლის თემას, ეს არის მათი ერთ-ერთი იარაღი, რომელიც მიმართულია მოსახლეობის შანტაჟისკენ. მე არ მაქვს მოლოდინი, რომ ისინი [ევრობიუროკრატები] ამ იარაღს გადააგდებენ, შეწყდება შანტაჟი და არ იქნება ზეწოლა მოსახლეობაზე. თუმცა, დარწმუნებული ვარ, რომ ევროპაში კვლავ გაიმარჯვებს საღი და გონივრული აზრი და საქართველოს ვიზალიბერალიზაცია არ შეუჩერდება. ეს რომ მოხდეს, საქართველომ უნდა დაარღვიოს ის ტექნიკური მოთხოვნები, რაც ვიზალიბერალიზაციით არის გათვალისწინებული. ეს არის ოთხი დიდი ბლოკი – დოკუმენტების უსაფრთხოება, ადამიანების უფლებების დაცვა, საზღვრის ინტეგრირებული მართვა და საზოგადოებრივი წესრიგი და უსაფრთხოება. ყველა ამ ოთხი მიმართულებით საქართველოში არის პროგრესი და ამას ადასტურებს სხვადასხვა წამყვანი საერთაშორისო ორგანიზაცია“, – განაცხადა ეკა სეფაშვილმა.

ღაზაში ომი ახლავე უნდა დასრულდეს, – ამის შესახებ ერთობლივ განცხადებას 25 ქვეყნის საგარეო საქმეთა მინისტრი ავრცელებს.

„ღაზაში მშვიდობიანი მოსახლეობის ტანჯვამ ახალ დონეს მიაღწია. ისრაელის მთავრობის დახმარების მიწოდების მოდელი საშიშია, არასტაბილურობას აღვივებს და ღაზაში მოსახლეობას ადამიანურ ღირსებას ართმევს. საშინელებაა ის, რომ დახმარების მიღებისას 800-ზე მეტი პალესტინელი დაიღუპა. ისრაელმა საერთაშორისო ჰუმანიტარული სამართლის შესაბამისად ნაკისრი ვალდებულებები უნდა შეასრულოს“, – აღნიშნულია განცხადებაში.

საგარეო საქმეთა მინისტრები „ჰამასის“ მიერ დაკავებული მძევლების გათავისუფლებისა და ღაზაში ცეცხლის შეწყვეტის მიღწევის მოწოდებით გამოდიან.

„2023 წლის 7 ოქტომბერს „ჰამასის“ მიერ ტყვედ აყვანილი მძევლები საშინლად იტანჯებიან. ჩვენი მოწოდება მათი უპირობო და დაუყოვნებლივი გათავისუფლებაა. მოვუწოდებთ მხარეებსა და საერთაშორისო საზოგადოებას, რომ დაუყოვნებლივი, უპირობო და მუდმივი ცეცხლის შეწყვეტის გზით ამ საშინელი კონფლიქტის დასასრულებლად ერთად იმუშაონ“, – ნათქვამია განცხადებაში.

ერთობლივ განცხადებას ხელს ავსტრალიის, ავსტრიის, ბელგიის, კანადის, დანიის, ესტონეთის, ფინეთის, საფრანგეთის, ისლანდიის, ირლანდიის, იტალიის, იაპონიის, ლატვიის, ლიეტუვის, ლუქსემბურგის, ნიდერლანდების, ახალი ზელანდიის, ნორვეგიის, პოლონეთის, პორტუგალიის, სლოვენიის, ესპანეთის, შვედეთის, შვეიცარიისა და დიდი ბრიტანეთის საგარეო საქმეთა მინისტრები აწერენ.