ზვიად გამსახურდიას მიმართვა 1991 წლის 9 აპრილს მთავრობის სასახლის წინ, მიტინგზე დამოუკიდებლობის გამოცხადებასთან დაკავშირებით:

“ძვირფასო ძმანო და დანო!

დე, იყოს ეს დღე დასაწყისი ქართველი ერის კონსოლიდაციისა, ერთ მუშტად შეკვრისა — შინაური და გარეშე მტის წინააღმდეგ. დღევანდელი დღე ცრემლნარევი სიხარულის დღეა. მართალია ჩვენ ცრემლი არ შეგვშრობია თვალზე — 9 აპრილს წამებულთა გლოვა, სამაჩაბლოში წამებულთა გლოვა დღესაც გრძელდება, მაგრამ უფალმა მოგვივლინა ეს დღე ვითარცა დღე ცრემლნარევი სიხარულისა. ასეთი იყო საქართველოს ისტორია, ძვირფასო მეგობრებო. ეს იყო ცრემლნარევი სიხარული, ეს იყო ეკლიანი გზით სვლა ჭეშმარიტებისაკენ, საღვთო სიყვარულისაკენ. საქართველოს გზა ეკლიანი გზაა ქრისტესი, ჯვარცმისა, დაფვლისა და გარდაუვალი აღდგომისა. ამ დღეს დიდი დაფიქრება გვმართებს, დიდი ურთიერთ სიყვარული, დიდი პატიება, ურთიერთ მიტევება – რამეთუ არ არს კაცი, რომელიც ცხოვნდეს და არა სცოდოს. ამავე დროს, მეგობრებო, ჩვენ უნდა ვიყოთ რეალისტები. მართალია ჩვენ იურიდიულად აღვადგინეთ საქართველოს დამოუკიდებლობა, მაგრამ საქართველოს საბოლოო განთავისუფლებამდე ჯერ შორსაა. გავხედოთ იმ მძიმე გზას რომელიც გველოდება და მოითხოვს ჩვენგან დიდ დარაზმულობას, შრომას, ურთიერთსიყვარულს, ურთიერთგატანას ამ მძიმე გზაზე, ამ ძნელბედობის ჟამს. ჩვენმა ეროვნულ-განმათავისუფლებელმა მოძრაობამ გამოიღო თავისი ნაყოფი. იგი დაგვირგვინდა საქართველოს დამოუკიდებლობის აღდგენით. ჩვენმა ეროვნულ-განმათავისუფლებელმა მოძრაობამ გააერთიანა არა მხოლოდ ქართველი ერი, არამედ საქართველოს არაქართველი მოსახლეობა! ამიერიდან ისინი ჩვენი ძმები არაიან, ისინი ჩვენთან არიან, ჩვენთან ერთად იბრძვიან საქართველოს დამოუკიდებლობისათვის და საქართველოს რესპუბლიკა მიიღებს მტკიცე საკანონმდებლო საფუძვლებს ყველა ეროვნების წარმომადგენლობათა შორის ჭეშმარიტი ძმობისა და მეგობრობის შესახებ, მათი უფლებრივი გარანტიების შესახებ საქართველოში.

პირველ რიგში, მეგობრებო როგორც გამოვაცხადეთ სესიაზე – საქართველო მტკიცე კონსტიტუციურ გარანტიებს მისცემს აფხაზ ხალხს, რომელთან ჩვენი ისტორიული ძმობა საუკუნეთა სიღრმეში იღებს სათავეს. აფხაზთა და ქართველთა სამეფო ერთიანი სახელმწიფო კვლავ აღდგება, ქართველთა და აფხაზთა მეგობრობა დაეფუძნება აფხაზეთის უდიდესი შვილების გიორგი შარვაშიძის, არზაყან ემხვარის და სხვათა მამულიშვილურ, პატრიოტულ გზას და გააერთიანებს ჩვენს მოძმე ერებს. საქართველოში მცხოვრები ყველა ეროვნების წარმომადგენელი, რომელიც იარაღით ხელში არ იბრძოლებს ჩვენს წინააღმდეგ მიიღებს საქართველოს მოქალაქეობას!

აი, ასეთია მეგობრებო ჩვენი გადაწყვეტილება. დღეიდან საქართველო, მეგობრებო, მიმართავს მსოფლიოს ცივილიზებულ ქვეყნებს რათა დაიმკვიდროს ღირსეული ადგილი მსოფლიოს თავისუფალ ერთა თანამეგობრობაში.

ძვირფასო ძმებო და დებო! დღევანდელი დღე მოიტანა 9 აპრილს დანთხეულმა სისხლმა. შემთხვევითი როდია, რომ დღევანდელ დღეს გამოცხადდა საქართველოს დამოუკიდებლობა. ისინი წინასწარმეტყველნი იყვნენ – მათ წინასწარმეტყველურად დასთხიეს სისხლი აქ, ამ ადგილას, რამე თუ უწყოდნენ რომ სწორედ აქ გამოცხადდებოდა დამოუკიდებლობა და სწორედ 9 აპრილს!

წუთიერი დუმილით პატივი ვცეთ დაღუპულთა ხსოვნას!”

9 აპრილის ტრაგედიიდან 36 წელი გავიდა.

1989 წლის 9 აპრილს საბჭოთა არმიის ნაწილებმა დილის 4 საათზე მთავრობის სახლის წინ შეკრებილი მშვიდობიან მომიტინგეები, რომლებიც საბჭოთა კავშირიდან გამოსვლასა და საქართველოს დამოუკიდებლობას ითხოვდნენ, საბჭოთა არმიის სამხედრო შენაერთებმა  არნახული სისასტიკით დაარბიეს.დაარბიეს.

დარბევის შედეგად 21 ადამიანი დაიღუპა, ხოლო ასობით მოქალაქე დაუდგენელი შემადგენლობის გაზით მოიწამლა.

მათ შორის 14 ქალი იყო, ერთი მათგანი – ორსული. ბარბაროსულად მოკლულთა შორის კი ყველაზე ახალგაზრდა 16 წლის გოგონა გახლდათ.

1989 წლის 9 აპრილის ტრაგედიამ დასაბამი მისცა საქართველოს თავისუფლებასა და სახელმწიფოებრივი დამოუკიდებლობის აღდგენის პროცესს.

1989 წლის 9 აპრილიდან ზუსტად ორი წლისთავზე,  1991 წლის 9 აპრილს, საქართველოს რესპუბლიკის უზენაესმა საბჭომ ზვიად გამსახურდიას მეთაურობით,  9 აპრილის ტრაგედიის მსხვერპლთა ნათელი ხსოვნისადმი პატივის მიგების ნიშნად, საქართველოს დამოუკიდებლობის აღდგენის აქტი მიიღო.  ის ერთადერთი უმნიშვნელოვანესი სამართლებრივი დოკუმენტი, რომლის საფუძველზეც მოხდა საქართველოს სუვერენიტეტის საერთაშორისო ცნობა.

საქართველოს უზენაესი საბჭოს თავმჯდომარემ, ზვიად გამსახურდიამ, 1991 წლის 31 მარტს ჩატარებული საყოველთაო რეფერენდუმის შედეგებზე დაყრდნობით, საქართველოს დამოუკიდებლობის აღდგენა გამოაცხადა.

ამდენად, 9 აპრილი საქართველოსა და ქართველი ხალხისათვის ერთდროულად არის ცრემლისა და სიხარულის დღე, ჩვენი ისტორიის უმნიშვნელოვანესი ფურცელი. 9 აპრილი საქართველოს უახლეს ისტორიაში ჩაეწერა ტრაგედიის და, ამავდროულად, საქართველოს დამოუკიდებლობის აღდგენის დღედ.

35 წლის წინ დაღუპული გმირები არიან: აზა ადამია – 22 წლის; ნათია ბაშალეიშვილი – 16 წლის; ეკა ბეჟანიშვილი – 15 წლის; ნატო გიორგაძე – 23 წლის; თამუნა დოლიძე – 28 წლის; თინა ენუქიძე – 70 წლის; ნინო თოიძე – 22 წლის; ზაირა კიკვიძე – 61 წლის; მანანა ლოლაძე – 34 წლის; თამარ მამულაშვილი – 50 წლის; ვენერა მეტრეველი – 45 წლის; მამუკა ნოზაძე – 21 წლის; ნანა სამარგულიანი – 41 წლის; შალვა ქვასროლიაშვილი – 35 წლის; მარინა ჭყონია-სამარგულიანი – 31 წლის; ელისო ჭიპაშვილი – 25 წლის; თამარ ჭოველიძე – 16 წლის; ნოდარ ჯანგირაშვილი – 40 წლის; მზია ჯინჭარაძე – 43 წლის; მანანა მელქაძე – 26 წლის და გია ქარსელაძე – 25 წლის.

ეროვნული ერთიანობის დღის წინა საღამოს, საფრანგეთი პატივს მიაგებს იმ ქართველი ქალებისა და კაცების ხსოვნას, რომლებიც საბჭოთა არმიამ თავისუფლებისა და დამოუკიდებლობისთვის ბრძოლის გამო, 1989 წლის 9 აპრილს იმსხვერპლა, – ამის შესახებ საქართველოში საფრანგეთის საელჩოს ფეისბუქგვერდზე გავრცელებულ განცხადებაშია ნათქვამი.

„საფრანგეთი აგრძელებს ქართველი ხალხის გვერდით დგომას დამოუკიდებლობის, დემოკრატიისა და ევროპისკენ მის სწრაფვაში“, – აღნიშნულია საფრანგეთის საელჩოს განცხადებაში.

ოპერის მომღერალი და ოპოზიციონერი პოლიტიკოსი, პაატა ბურჭულაძე ხვალ აქციას გამართავს, რომელიც 9 აპრილის ტრაგედიას უკავშირდება. ის აპირებს აქციის მონაწილეებს ჯერ სიტყვით მიმართოს, იგალობოს და დემონსტრანტებს საერთო ფიცი დაადებინოს. დაანონსდა ახალი პოლიტიკური მოძრაობის დაფუძნებაც.

პაატა ბურჭულაძემ დღეს განაცხადა, რომ აქციას საპატრიარქოს კურთხევა აქვს, თუმცა პოლიტიკაში წასულ ბანს ეკლესიამ წერილობით უპასუხა. საპატრიარქოს განცხადებაში წერია, რომ პაატა ბურჭულაძემ კათალიკოს-პატრიარქისგან ნამდვილად ითხოვა კურთხევა და ქაშვეთის ეკლესიიდან ზარების რეკვით გამოხმაურება, თუმცა საპატრიარქო აცხადებს, რომ ეკლესია არ არის და არც შეიძლება იყოს რომელიმე პოლიტიკური ძალისადმი მიკერძოებული და ამ პროცესში მონაწილეობას არ მიიღებს.

ბურჭულაძის ინიციატივებს გამოეხმაურა მმართველი გუნდიც. პარლამენტის ფრაქცია “ქართული ოცნების” თავმჯდომარის მოადგილის, ლევან მაჭავარიანის შეფასებით, მსგავს ინიციატივებს ბურჭულაძის მხრიდან “არანაირი აზრი არ აქვს,” რადგან, მისი თქმით, ბურჭულაძეს პოლიტიკური რეიტინგი ძალიან დაბალია.

“ბურჭულაძის “პოლიტიკური კარიერა” ვიხილეთ, რომელიც, რა თქმა უნდა, კრახით დასრულდა. ახლა რატომ აქვს მას მოლოდინი, რომ მეორე სუნთქვა გაეხსნება, არ ვიცი, ეს მისი ილუზიაა. იმავენაირი ილუზია, როგორ ილუზიაშიც, სამწუხაროდ, დღემდე იმყოფება ქალბატონი ზურაბიშვილი. პაატა ბურჭულაძის რეიტინგი, რომ ერთსაც არ უტოლდება, ეს მასაც კარგად უნდა მოეხსენებოდეს, შესაბამისად, არანაირი აზრი არ აქვს რას დააანონსებს ბატონი ბურჭულაძე.

აქციებთან დაკავშირებითაც ვხედავთ, რომ ეს აქციები უკვე ძალიან დიდი ხანია მილევად რეჟიმშია. მე ყველას შეურაცხყოფას ვერ მივაყენებ, თუმცა შემიძლია თამამად ვთქვა, რომ მინიმუმ 90 პროცენტი იქიდან არის დაფინანსებული პარტიული აქტივი ან კონკრეტული “ენჯეო” ორგანიზაციების თანამშრომლები,” – აცხადებს პარლამენტის ფრაქცია “ქართული ოცნების” თავმჯდომარის მოადგილე, ლევან მაჭავარიანი

დონალდ ტრამპმა მსოფლიოს ტოტალური სავაჭრო ომი გამოუცხადა. მსოფლიო გაოცებულია სანქციების მასშტაბით. საფონდო ინდექსები მთელ მსოფლიოში ვარდება. ტრამპის სიაში მსოფლიოს თითქმის ყველა ქვეყანა მოხვდა. თუმცა, აშშ-ს ვაჭრობის მდივანმა ჰოვარდ ლუტნიკმა განმარტა, რომ მარტო ცალკეულ ქვეყნებზე ტარიფების დაწესებას აზრი არ ექნებოდა. ეს შესაძლებელს გახდიდა სატარიფო შეზღუდვების გვერდის ავლას იმ ქვეყნებისთვის, რომლებსაც ექნებოდათ დაბალი ტარიფები შეერთებულ შტატებთან ვაჭრობაზე.

ტრამპმა განაცხადა, რომ ვერ ხედავს თავისი გეგმიდან გადახრის მიზეზს: ნავთობის ფასები ეცემა, საპროცენტო განაკვეთები კლებულობს, არ არის ინფლაცია და ტარიფების წყალობით მილიარდობით დოლარი შემოდის აშშ-ს ბიუჯეტში.

მოვლენების განვითარების სამი შესაძლო სცენარი არსებობს:

პირველი სცენარი. ტარიფების გაუქმება. ტრამპი არბილებს პოლიტიკას და დებს გარიგებებს სხვა ქვეყნების ლიდერებთან, ამცირებს ტარიფებს გლობალური ეკონომიკური რეცესიის თავიდან ასაცილებლად.

ამ სცენარს მხარს უჭერს საინვესტიციო ბანკის J.P.Morgan Chase-ის ხელმძღვანელის ჯეიმი დეიმონის განცხადება, რომელშიც ის ხაზს უსვამს გლობალური ეკონომიკური რეცესიის რისკებს, ამერიკული ბიზნესის ზარალს და შიდა ბაზარზე ფასების ზრდას. სხვა მსხვილი საინვესტიციო ბანკი Goldman Sachs-ი აფასებს რეცესიის რისკს 45%-ით. ტრამპი ასევე იმყოფება ზეწოლის ქვეშ აშშ-ს რიგითი მოქალაქეების მხრიდან. ქვეყნის მრავალ ქალაქში ათასობით ადამიანი დონალდ ტრამპის პოლიტიკის წინააღმდეგ დემონსტრაციებს მართავენ. თუ ტრამპი დათმობს ზეწოლას, ეს ნიშნავს დაბრუნებას საერთაშორისო ვაჭრობის ძველ სისტემაში, გარკვეული კორექტირებით.

მეორე სცენარი. გლობალური ეკონომიკური რეცესია. ტრამპი ინარჩუნებს მტკიცე პოზიციას ტოტალურ სავაჭრო ომში. გლობალური ეკონომიკა რეცესიაში შედის. ნავთობის ფასები ეცემა. მთავარი დარტყმა დიდი სამხრეთის ქვეყნებზე მოდის. აზიის საფონდო ბირჟები უკვე აჩვენებენ ინდექსის კლების ისეთ დონეებს, რაც არ ყოფილა 1997 წლის შემდეგ.

ჩინეთისა და სამხრეთ-აღმოსავლეთ აზიის ქვეყნების ეკონომიკა ორიენტირებულია ექსპორტზე აშშ-სა და ევროპაში. ეს ქვეყნები ვერ ანაზღაურებენ ამერიკული ბაზრის დანაკარგს. აზიის ქვეყნებში მოსალოდნელია წარმოების მკვეთრი ვარდნა, უმუშევრობის ზრდა და სოციალური არასტაბილურობა.

რუსეთი, რომელიც ეკონომიკურად არის დამოკიდებული ჩინეთზე და ნავთობის ფასებზე, ასევე დაზარალდება. რუსული  ნავთობი Urals უკვე დაეცა 52 დოლარამდე ბარელზე და აგრძელებს ვარდნას.

აშშ-სთვის ტოტალური სავაჭრო ომი გამოიწვევს სამომხმარებლო საქონელზე ფასების ზრდას. ამერიკულ საფონდო ბირჟებზე აქციების დაცემამ უკვე გამოიწვია დაახლოებით 11 ტრილიონი დოლარის ზარალი.

ამავდროულად, ამერიკული წარმოება იმპორტის ჩანაცვლებით მოგებაში იქნება. მცირე ბიზნესი მიიღებს იმპულსს განვითარებისთვის იაფი იმპორტისაგან გამონთავისუფლებულ ბაზარზე.

ტოტალურმა სავაჭრო ომმა შეიძლება გამოიწვიოს მსოფლიოში დაძაბულობის ზრდა, ახალი გეოპოლიტიკური კონფლიქტები და ომები. ტაივანის გამო აშშ-სა და ჩინეთს შორის სამხედრო კონფლიქტი შესაძლოა. ჩინეთმა მიიღო დონალდ ტრამპის გამოწვევა, დააწესა 34%-იანი საპასუხო ტარიფები  ამერიკულ საქონელზე და მზად არის აწარმოოს სავაჭრო ომი, სანამ არ მოიგებს მას.

მესამე სცენარი. “ცივი ომი 2”. თუ ეს სცენარი განხორციელდება, დონალდ ტრამპი აშშ-ს მოკავშირეებთან დათმობებზე წავა. ტოტალური სავაჭრო ომი მსოფლიოს გაყოფს ქვეყნების ორ კონფლიქტურ ბლოკად – აშშ-ს და ჩინეთის მოკავშირეებად. ჩამოყალიბდება მსოფლიოში გავლენის სფეროების დაყოფის ბიპოლარული მოდელი.

ილონ მასკის წინადადება „ნულოვანი ტარიფების“ შესახებ ევროკავშირსა და შეერთებულ შტატებს შორის მხარს უჭერს ამ სცენარს. ეს სცენარი ნიშნავს “ცივი ომის 2-ის” დაწყებას აშშ-სა და ჩინეთს შორის გლობალური ლიდერებისთვის. სავაჭრო ომებს მოჰყვება ომები, კონფლიქტები და სახელმწიფო გადატრიალებები მსოფლიოს სხვადასხვა რეგიონში, როგორც ეს პირველი ცივი ომის დროს იყო.

ავთანდილ წულაძე, პოლიტოლოგი

ვიცე-პრემიერმა, შინაგან საქმეთა მინისტრმა ვახტანგ გომელაურმა, პირველ მოადგილე შალვა ბედოიძესთან ერთად, აჭარის პოლიციის დეპარტამენტის თანამშრომლებს ახალი დირექტორი პოლიციის პოლკოვნიკი გიორგი ბუხრაშვილი წარუდგინა. ინფორმაციას შსს ავრცელებს.

გიორგი ბუხრაშვილს ამ დრომდე სამცხე-ჯავახეთის პოლიციის დეპარტამენტის დირექტორის თანამდებობა ეკავა. მას შინაგან საქმეთა სამინისტროში ხელმძღვანელ პოზიციებზე მუშაობის მრავალწლიანი გამოცდილება აქვს.

გიორგი ბუხრაშვილმა აჭარის პოლიციის დეპარტამენტის დირექტორის პოზიციაზე გრიგოლ ბესელია შეცვალა. ვახტანგ გომელაურმა გრიგოლ ბესელიას გაწეული საქმიანობისთვის მადლობა გადაუხადა და პოლიციის დეპარტამენტის ახლადდანიშნულ დირექტორს გიორგი ბუხრაშვილს წარმატებული საქმიანობა უსურვა.

შინაგან საქმეთა მინისტრმა სამუშაო თათბირზე დეპარტამენტის თანამშრომლებისგან რეგიონში დანაშაულთან ბრძოლის, პრევენციული ღონისძიებების და არსებული გამოწვევების შესახებ დეტალური ინფორმაცია მოისმინა.

შეხვედრაზე, ასევე, აღინიშნა, რომ შინაგან საქმეთა სამინისტროსთვის ერთ-ერთ მთავარ პრიორიტეტად რჩება პოლიციელთა სამუშაო პირობების გაუმჯობესება.

შინაგან საქმეთა მინისტრმა დეპარტამენტის თანამშრომლებს რეგიონში მართლწესრიგის დაცვისთვის მადლობა გადაუხადა და საპოლიციო საქმიანობის კიდევ უფრო ეფექტიანად განხორციელების მიზნით შესაბამისი დავალებები მისცა.

2003-2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე ნიკოლოზ ჯანჯალაშვილს მოსმენისას „ხალხის ძალის“ აღმასრულებელმა მდივანმა გურამ მაჭარაშვილმა რიტორიკული კითხვა დასვა.

გურამ მაჭარაშვილმა ხაზი გაუსვა იმას, რომ ასობით უდანაშაულო ადამიანის წამების მიუხედავად „ნაცმოძრაობას“ დღემდე ევროპულ პარტიას უწოდებენ ზოგიერთი ქვეყნის ელჩები.

„ალბათ ყველას გახსოვთ 2024 წლის საპარლამენტო არჩევნების წინ ზოგიერთი ქვეყნის და მათ შორის, ევროკავშირის ელჩმაც, წინასაარჩევნო კამპანია რომ წამოიწყეს, რა დროსაც ჩავიდნენ რეგიონებში და ხალხს მოუწოდებდნენ, რომ ევროპული პარტიებისთვის და პირველ რიგში – „ნაცმოძრაობისთვის“ მხარი დაეჭირათ. რიტორიკულ კითხვას ვსვამ: რა საშინელებაც აქ მოყევით, რაც მანამდე თქვენმა წინამორბედებმა მოგვიყვეს, ამის მერე „ნაცმოძრაობა“ არის ევროპული პარტია, რომლის რეჟიმის დროსაც ხალხს ასე აწამებდნენ?

კომისიაზე ვუსმენთ, რომ „ნაცმოძრაობის“ რეჟიმის დროს აბსოლუტურად უდანაშაულო ასობით ადამიანიდან, რომლებიც ციხეში მოხვდნენ, ზოგმა ელენთა დაკარგა, ზოგი ჭკუიდან გადავიდა, ზოგი კი საერთოდ ცოცხალი ვერ გამოვიდა ციხიდან და ამის შემოქმედი „ნაცმოძრაობა“ იყო და არის ევროპული პარტია? თუ ამ კომისიასაც ცირკს უწოდებენ ზოგიერთი ქვეყნის ელჩები, „ლელოს“ ლიდერების მსგავსად?“ – აღნიშნა გურამ მაჭარაშვილმა.

პარტია „ხალხის ძალის“ აღმასრულებელმა მდივანმა გურამ მაჭარაშვილმა 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე, ბესიკ ბერიტაშვილის მოსმენისას საზოგადოებას მიმართა.

„მინდა საზოგადოებას, მათ შორის, ჩვენს უცხოელ პარტნიორებს კიდევ ერთხელ შევახსენოთ, რას ნიშნავს სახელმწიფო გადატრიალების ბრალდება, აბსურდული მეთოდებით იმისთვის, რომ პოლიტიკური მოწინააღმდეგე გაანეიტრალო,“- განაცხადა დეპუტატმა და აღნიშნა, რომ ბესიკ ბერიტაშვილი და მასთან ერთად რამდენიმე დაზარალებული „ნაციონალური მოძრაობის” რეჟიმმა სახელმწიფო გადატრიალების ბრალდებით მხოლოდ იმიტომ დააკავა, რომ მაშინდელ ხელისუფლებას ოპონირებას უწევდნენ.

გურამ მაჭარაშვილმა აღნიშნა, რომ ამ ისტორიების მოსმენის ფონზე, უფრო ცხადი ხდება, რომ საქართველოში მიმდინარე პროცესები, სახელმწიფო გადატრიალების მცდელობები უცხოეთიდან არის ინსპირირებული.

„თქვენ, თქვენი ბიძაშვილი და კიდევ რამდენიმე ადამიანი დააპატიმრეს. ეს ყველა ადამიანი იყო პოლიტიკურად ნაციონალური მოძრაობის მოწინააღმდეგე. ამას ხაზს ვუსვამ იმიტომ, რომ საზოგადოებას, მათ შორის, ჩვენს უცხოელ პარტნიორებს კიდევ ერთხელ შევახსენოთ, რას ნიშნავს სახელმწიფო გადატრიალების ბრალდება, აბსურდული მეთოდებით იმისთვის, რომ პოლიტიკური მოწინააღმდეგე გაანეიტრალო. დღეს კი სულ სხვა რეალობაა – მართლა სახელმწიფო გადატრიალების მცდელობებია და ამის შეფუთვა უნდათ ისე, თითქოს ოპონენტები არიან. თქვენ, რამდენიმე ადამიანი, პოლიტიკურ ოპოზიციაში იყავით და ამ დროს, ხდება ის საშინელებები, რასაც აქ ვისმენთ ყველა ერთად. ეს ფაქტი, მეტყველებს იმაზე, რომ დღეს რაც ხდება საქართველოში, თავიდან ბოლომდე ინსპირირებულია უცხოეთიდან, რომელიც მხარს უჭერს იმ რეჟიმს, რომლის მსხვერპლებიც მოხვედით და ჰყვებით, რომ ყოველგვარი არგუმენტაციის გარეშე იყავით დაპატიმრებული მხოლოდ იმიტომ, რომ ოპონენტები იყავით ხელისუფლების,“- განაცხადა გურამ მაჭარაშვილმა.

რეზოლუცია, რომელსაც ხუთშაბათს ევროსაბჭოს საპარლამენტო ასამბლეა მიიღებს, დიდი ალბათობით, კვლავ დააყენებს ორ ფუნდამენტურ პირობას, ესენია: ახალი სამართლიანი საპარლამენტო არჩევნები და ყველა პოლიტპატიმრის გათავისუფლება. ამ ორი პირობის შესრულების გარეშე ვერ დაბრუნდება ივანიშვილის წარმომადგენლობა ევროსაბჭოს საპარლამენტო ასამბლეაში, – ამის შესახებ „ერთიანობა ნაციონალური მოძრაობის” თავმჯდომარემ, თინა ბოკუჩავამ განაცხადა.

მისი თქმით, ევროსაბჭოს მონიტორინგის კომიტეტი დღეს განიხილავს იმ რეზოლუციის სამუშაო ვერსიას, რომელსაც ევროსაბჭოს საპარლამენტო ასამბლეა საგანგებო დებატებზე 10 აპრილს მიიღებს.

„დღეს ევროსაბჭოს მონიტორინგის კომიტეტი განიხილავს იმ რეზოლუციის სამუშაო ვერსიას, რომელსაც ევროსაბჭოს საპარლამენტო ასამბლეა საგანგებო დებატებზე მიიღებს ხუთშაბათს. მონიტორინგის კომიტეტი წამყვანი კომიტეტია, რომელსაც გუშინ ვესწრებოდით დემოკრატიული პოლიტიკური ძალების სახელით. დიდი ალბათობით, ეს რეზოლუცია, რომელსაც ხუთშაბათს მიიღებს უკვე ევროსაბჭოს საპარლამენტო ასამბლეა, კვლავ დააყენებს იმ ორ ფუნდამენტურ პირობას, რომელიც ვიხილეთ იანვრის რეზოლუციაში, ესენია: ახალი სამართლიანი საპარლამენტო არჩევნები და ყველა პოლიტპატიმრის გათავისუფლება. ამ ორი პირობაის შესრულების გარეშე ვერ დაბრუნდება ივანიშვილის წარმომადგენლობა ევროსაბჭოს საპარლამენტო ასამბლეაში, წულუკიანის იანვრის მცდელობის მიუხედავად, რომ ეს პირობები არ ყოფილიყო დაყენებული და რომ სწორედ ახალი არჩევნები და პოლიტპატიმრების გათავისუფლება არის ერთადერთი გზა საქართველოსთვის, რომ გამოვიდეს დღევანდელი პოლიტიკური კრიზისიდან, რომელშიც ივანიშვილის რეჟიმმა ჩვენი ქვეყანა შეიყვანა“, – განაცხადა თინა ბოკუჩავამ.