სლოვაკეთის პრემიერ-მინისტრი, რობერტ ფიცო აშშ-სა და რუსეთის ლიდერებს, დონალდ ტრამპსა და ვლადიმერ პუტინს შორის დაგეგმილი სამიტს ეხმაურა და აცხადებს, რომ უკრაინა არის ბალახი სპილოებს შორის დავაში.

„გახსოვთ ძველი აფრიკული ჭეშმარიტება, რომლის გამეორებაც მიყვარს? არ აქვს მნიშვნელობა სპილოები ჩხუბობენ თუ სექსით კავდებიან, ბალახი ყოველთვის ზარალდება. როგორც არ უნდა დასრულდეს სპილოების საუბარი 15 აგვისტოს, ბალახი – ამ შემთხვევაში, უკრაინა – დაზარალდება“, – აღნიშნა ფიცომ.

სლოვაკეთის პრემიერის აღნიშნულ კომენტარს უკრაინის საგარეო საქმეთა სამინისტრო გამოეხმაურა და აღნიშნა, რომ რობერტ ფიცომ ჯერ კიდევ ვერ გაიგო რუსეთის დანაშაულებრივი შეჭრის ნამდვილი მიზეზები, ასევე ის საფრთხე, რომელსაც აგრესორ სახელმწიფოსთან ლაქუცი ქმნის.

„სამწუხაროა, რომ ევროკავშირის წევრი სახელმწიფოს მთავრობის მეთაური თავს უფლებას აძლევს გამოიყენოს ღიად შეურაცხმყოფელი რიტორიკა უკრაინისა და უკრაინელი ხალხის მიმართ, რომლებიც ყოველდღიურად გმირულად ებრძვიან რუსულ აგრესიას და მთელი ევროპის უსაფრთხოების ინტერესებიდან გამომდინარე აკავებენ მას საკუთარ მიწაზე“, – აღნიშნულია უკრაინის საგარეო საქმეთა სამინისტროს განცხადებაში.

უწყებაში აცხადებენ, რომ რობერტ ფიცოს განცხადებები ეწინააღმდეგება კეთილმეზობლობის, სოლიდარობისა და ურთიერთპატივისცემის სულისკვეთებას, რომელსაც სლოვაკი ხალხი უკრაინის მიმართ მთელი ამ ხნის განმავლობაში ავლენდა.

„გაფრთხილებთ, არ გამოიყენოთ არამეგობრული ფოლკლორული ალეგორიები და არ სცადოთ მსგავსი განცხადებებით საკუთარი პარტიის პოლიტიკური რეიტინგის გაზრდა. ეს არის უაზრობა, რომელიც შეურაცხყოფს დაღუპულთა ხსოვნას, მილიონობით უკრაინული ოჯახის ტანჯვას და თავისუფლებისთვის მებრძოლთა თავგანწირვას“, – აღნიშნულია უკრაინის საგარეო საქმეთა სამინისტროს განცხადებაში.

შეგახსენებთ, აშშ-ის პრეზიდენტის, დონალდ ტრამპის ინფორმაციით, მასსა და რუსეთის პრეზიდენტ ვლადიმერ პუტინს შორის შეხვედრა 15 აგვისტოს, ალასკაზე გაიმართება.

საფრანგეთის, გერმანიის, დიდი ბრიტანეთისა და უკრაინის პირველმა პირებმა სატელეფონო საუბარი გამართეს და კიევს მხარდაჭერა აღუთქვეს. ცნობას სოციალურ ქსელში ემანუელ მაკრონი ავრცელებს და აღნიშნავს, რომ უკრაინის მომავალი უკრაინელების გარეშე ვერ გადაწყდება.

„ჩვენ კვლავ მტკიცედ გვაქვს გადაწყვეტილი, მხარი დავუჭიროთ უკრაინას, ვიმუშაოთ ერთად და გავაგრძელოთ „მსურველთა კოალიციის“ ფარგლებში მუშაობა. უკრაინის მომავალი ვერ გადაწყდება უკრაინელების გარეშე, რომლებიც უკვე 3 წელზე მეტია, იბრძვიან თავიანთი თავისუფლებისა და უსაფრთხოებისთვის. ევროპელებიც აუცილებლად იქნებიან გადაწყვეტილების ნაწილი, რადგან მათ უსაფრთხოებაც საფრთხის ქვეშაა“, – დაწერა მაკრონმა სოციალურ ქსელში.

უკრაინის პრეზიდენტის, ვოლოდიმირ ზელენსკის განცხადებით, უკრაინის წინააღმდეგ ომის დასასრული სამართლიანი უნდა იყოს და ევროპელი ხალხების უსაფრთხოების ინტერესებს უნდა შეესაბამებოდეს.

„ომის დასასრული სამართლიანი უნდა იყოს და მადლობელი ვარ ყველასი, ვინც ახლა უკრაინასთანაა, ჩვენს ხალხთანაა უკრაინაში მშვიდობის გამო, რადგან ეს იცავს ჩვენი ევროპელი ხალხების სასიცოცხლო და უსაფრთხო ინტერესებს“, – წერს ზელენსკი სოციალურ ქსელში.

მისი თქმით, უკრაინა აფასებს და სრულად უჭერს მხარს საფრანგეთის პრეზიდენტის ემანუელ მაკრონის, იტალიის პრემიერ-მინისტრის ჯორჯია მელონის, გერმანიის კანცლერის ფრიდრიხ მერცის, პოლონეთის პრემიერ-მინისტრის დონალდ ტუსკის, გაერთიანებული სამეფოს პრემიერ-მინისტრის კირ სტარმერის და ევროკომისიის პრეზიდენტის ურსულა ფონ დერ ლაიენის ერთობლივ განცხადებას უკრაინაში მშვიდობის დამყარების შესახებ.

შეგახსენებთ, ევროპელმა ლიდერებმა აშშ-სა და რუსეთის პრეზიდენტების, დონალდ ტრამპისა და ვლადიმერ პუტინის დაგეგმილ მოლაპარაკებებამდე ერთობლივი განცხადება გაავრცელეს, რომელშიც ხაზგასმულია, რომ მნიშვნელოვანი მოლაპარაკებები შეიძლება განხორციელდეს მხოლოდ ცეცხლის შეწყვეტის ან საომარი მოქმედებების შემცირების კონტექსტში და რომ დიპლომატიურმა გადაწყვეტამ უნდა დაიცვას უკრაინისა და ევროპის უსაფრთხოების მნიშვნელოვანი ინტერესები.

რუსეთის საჰაერო თავდაცვის ძალებმა ქვეყნის რეგიონებში ღამით 121 უკრაინული დრონი ჩამოაგდეს, – ინფორმაციას რუსული მედია ქვეყნის თავდაცვის სამინისტროზე დაყრდნობით ავრცელებს.

მათივე ინფორმაციით, დრონები ჩამოაგდეს კრასნოდარის მხარეში, ბრიანსკის, ბელგოროდის, ვორონეჟის, სარატოვის, კალუგის, ტულის, როსტოვის, რიაზანის, სმოლენსკის, ორიოლის, ტვერის ოლქებში, აზოვის ზღვის თავზე და ოკუპირებულ ყირიმში.

სარატოვის ოლქის გუბერნატორის, რომან ბუსარგინის განცხადებით, დრონი საცხოვრებელი კორპუსის ეზოში დაეცა, რის შედეგადაც ერთი ადამიანი დაიღუპა და რამდენიმე დაშავდა.

თელ-ავივში ათასობით ადამიანი ქუჩაში გავიდა და „ჰამასის“ მიერ დატყვევებული მძევლების გათავისუფლება კიდევ ერთხელ მოითხოვა.

Reuters-ის ინფორმაციით, აქციის მონაწილეები ეწინააღმდეგებიან პრემიერ-მინისტრ ბენიამინ ნეთანიაჰუს ღაზაში ომის ესკალაციის გეგმას. ისინი საბრძოლო მოქმედებების დაუყოვნებლივ შეწყვეტას ითხოვენ, რათა მძევლები სახლებში დაბრუნდნენ.

მანამდე ნეთანიაჰუს ადმინისტრაციაში განაცხადეს, რომ მინისტრთა მცირე ჯგუფმა ღაზა სითის დაკავება გადაწყვიტა, რაც სამხედრო ოპერაციების გაფართოებას ნიშნავს. ბევრი მიიჩნევს, რომ ეს გადაწყვეტილება ტყვეობაში დარჩენილ მძევლებს დამატებით საფრთხეს შეუქმნის.

საზოგადოებრივი აზრის გამოკითხვები აჩვენებს, რომ ისრაელელების უმეტესობა მძევლების გათავისუფლების სანაცვლოდ ომის დაუყოვნებლივ შეჩერების მომხრეა. ღაზაში ამ დროისთვის 50 მძევალი რჩება, ისრაელის მთავრობაში სჯერათ, რომ 20 მათგანი ცოცხალია.