ჩვენ ვახდენთ დეკლარირებას, რამდენად თავმოყვარე სახელმწიფო შევქმენით და რამდენად კიდევ უფრო თავმოყვარე, სუვერენული, დამოუკიდებლობა განმტკიცებული სახელმწიფო გვინდა შევქმნათ, იმისთვის რომ არ გავატაროთ არცერთი უსამართლო აქტი, – განაცხადა საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა მამუკა მდინარაძემ „მეგობარ აქტზე“ პასუხის შესახებ საუბრისას, რომელიც პარლამენტმა მოამზადა.

„აბსოლუტური უმეცრებაა იმის თქმა, რომ საქართველოს დღეს სჭირდება ჩინური გავლენებისგან გათავისუფლება. სისულელეა. ის რომ ათასი ისეთი რამ წერია, რაც ფაქტობრივ უზუსტობებს შეიცავს დოკუმენტი, რომელსაც კონგრესმა მხარი დაუჭირა.

გასაგებია ისიც, რომ შეიძლება [„მეგობარი აქტს“] შემდგომი განვითარება არ მოჰყვეს, არ დაუჭირონ საბოლოოდ მხარი ან დაუჭირონ და შემდეგ პრეზიდენტმა ტრამპმა ხელი არ მოაწეროს. ყველაფერი შეიძლება. შეიძლება მოაწეროს კიდევაც, რაც ნაკლებად სავარაუდოა – პრაქტიკულად გამორიცხულია, ჩემი აზრით, მაგრამ დაუშვებელი არაფერია. მაგრამ ეს ხომ ინდიკაცია იქნება იმისა, რეალურად რა შედეგებს მიაღწია „დიფ სთეითტან“ ბრძოლაში ახალმა ადმინისტრაციამ. ოლიგარქიულ, არაფორმალურ გავლენებთან ბრძოლაში რა შედეგებს მიაღწია. ისევ ის ძალები მართავენ ამერიკის შეერთებულ შტატებს, მათ შორის გავლენები აქვთ ევროპაში და სხვადასხვა ქვეყნებზე თუ მართლაც მოახერხა პრეზიდენტმა ტრამპმა სადავეების ხელში აღება? შეიძლება ეს არ იყოს გადამწყვეტი მსოფლიოსთვის, მაგრამ ჩვენთვის ხომ ერთ-ერთი მთავარი ინდიკატორია? და არა მხოლოდ ჩვენთვის – სხვა ქვეყნების მოქალაქეებმა ხომ უნდა დაინახონ, რომ საქართველოსთან დაკავშირებით იყო უსამართლო დამოკიდებულება და ეს უსამართლო დამოკიდებულება თურმე გაგრძელდა – ამას ცუდ შემთხვევაში ვსაუბრობ.

აქედან გამომდინარე, ჩვენ თითოეულ დეტალზე რეაგირება უნდა გვქონდეს. ჯერ ამას ვცდილობთ, რა თქმა უნდა „სცენის მიღმა“, არასაჯაროდ. მაგრამ როდესაც ამას შედეგი არ აქვს, ჩვენ თვითონვე უნდა შევაიარაღოთ ქართველი ხალხი სიმართლით, რომელიც შემდეგ უზრუნველყოფს სწორ არჩევანს და სწორ დამოკიდებულებას რეალობის მიმართ და არა იმ ფეიკების მიმართ, რომლებსაც აგენტები ავრცელებენ“, – განაცხადა მდინარაძემ.

ჩვენ ძალიან გვაინტერესებს, რატომ ხდება ისე, რომ ჩვენი და აშშ-ის დღევანდელი ადმინისტრაციის პათოსი, განწყობა, დამოკიდებულება ერთი-ერთში ემთხვევა ერთმანეთს და ამის მიუხედავად, აშშ-ის ახლად არჩეული პრეზიდენტისა და ადმინისტრაციისგან ერთი სიტყვაც არ თქმულა საქართველოზე, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებს განუცხადა.

როგორც „ქართული ოცნების“ აღმასრულებელმა მდივანმა აღნიშნა, ამას თავისი მიზეზები აქვს და ეს უნდა განმარტონ იმ ქვეყნის ხელმძღვანელებმა, რომლებსაც ჯერ კიდევ ძალაში აქვთ დატოვებული ბაიდენის ადმინისტრაციის დანაშაულებრივი დამოკიდებულების შედეგად მიღებული გადაწყვეტილებები საქართველოს და მისი არჩეული ხელისუფლების წარმომადგენლების მიმართ.

„პირველ რიგში, ძალიან კარგია, მათ შორის საამაყოც კი შეიძლება, იყოს ის ამბავი, რომ ასეთი გაბედული ტონით საუბარი დღეს ჩვენს ქვეყანას შეუძლია. მეორე – ჩვენ ძალიან გვაინტერესებს, რატომ ხდება ისე, რომ ჩვენი და აშშ-ის დღევანდელი ადმინისტრაციის პათოსი, განწყობა, დამოკიდებულება, განსაკუთრებით მათ მიერ გახმოვანებული მესიჯები და გაცილებით ადრე ჩვენ მიერ გახმოვანებული, ერთი-ერთში ემთხვევა ერთმანეთს და ამის მიუხედავად, აშშ-ის ახლად არჩეული პრეზიდენტისა და ადმინისტრაციისგან ერთი სიტყვაც არ თქმულა საქართველოზე. ამას თავისი მიზეზები აქვს. ამას ჩვენ ვერ განვმარტავთ, ეს უნდა განმარტოს იმ ქვეყანამ, იმ ქვეყნის ხელმძღვანელებმა, ლიდერებმა, რომლებსაც ჯერ კიდევ ძალაში აქვთ დატოვებული ბაიდენის დანაშაულებრივი გადაწყვეტილებები, მისი ადმინისტრაციის დანაშაულებრივი დამოკიდებულების შედეგად მიღებული გადაწყვეტილებები საქართველოს და მისი არჩეული ხელისუფლების წარმომადგენლების მიმართ. ვიდრე ეს არ იქნება განმარტებული, ეს გადაწყვეტილებები არ იქნება შეცვლილი. მანამდე მთელ მსოფლიოში, არა მხოლოდ საქართველოში, ვისაც კი ეს ხმა მისწვდება და იქნება შეკითხვა, რატომ ხდება, რომ პოზიციათა აბსოლუტური თანხვედრის მიუხედავად, მეტიც, საქართველო ასეთ პოზიციებს, რომლებსაც დღეს აშშ ახმოვანებს, თვეებით და წლებით ადრეც კი ახმოვანებდა, ამის მიუხედავად, ერთი მხარდამჭერი განცხადებაც კი არ გახმოვანებულა“, – განაცხადა მამუკა მდინარაძემ.

პრემიერ-მინისტრმა, ირაკლი კობახიძემ, აშშ-ის პრეზიდენტს, დონალდ ტრამპსა და ვიცე-პრეზიდენტს, ჯეი დი ვენსს ღია წერილით მიმართა.

ცხადია, „ქართული ოცნების“ წრეში დიდი ნერვიულობაა და ეს წერილიც ამისი გამომჟღავნებაა, არ ვიცი, ოდესმე წაიკითხავს თუ არა აშშ-ის პრეზიდენტი, ალბათ, დღეს ნაკლებად სცალია, – ამის შესახებ საქართველოს ყოფილმა პრეზიდენტმა, სალომე ზურაბიშვილმა ბრიფინგზე განაცხადა.

მისივე თქმით, დონალდ ტრამპისა და ჯეი დი ვენსისადმი ირაკლი კობახიძის გაგზავნილ ღია წერილში ხელისუფლების სრული სასოწარკვეთილება ჩანს.

„მოვუწოდებ საზოგადოებას, წაიკითხოს ე.წ. პრემიერის წერილი აშშ-ის პრეზიდენტთან გაგზავნილი. ეს არის, პირველ რიგში, სამარცხვინო, რადგან აქ დაცული არ არის არცერთი, არც პროტოკოლური, არც მეგობრული ურთიერთობების არანაირი ნიშანი არ გააჩნია ამ წერილს. არ ვიცი, ვინ დაუწერა, არ ვიცი, რა განწყობით დაიწერა ეს წერილი, მაგრამ აქ ჩანს სრული სასოწარკვეთილება ხელისუფლებისა, რომ ბიძინა ივანიშვილმა ვერც ვერაფერი დაალაგა, ვერც ვერაფერს დაალაგებს, ვერც „მეგობარი აქტის“ შედეგებს ვერ დაალაგებს. ცხადია, რომ „ქართული ოცნების“ წრეში ძალიან დიდი ნერვიულობაა და ეს წერილი ამისი გამომჟღავნებაა. ძალიან მაინტერესებს, ოდესმე წაიკითხავს თუ არა აშშ-ის პრეზიდენტი, ალბათ, დღეს ნაკლებად სცალია, თუმცა ვინც წაიკითხავს, ძალიან სამწუხარო არის. სამწუხარო იმიტომ, რომ ეს იქნება ძალიან გამაოგნებელი, იმ ქვეყნიდან წამოსული წერილი, რომელსაც 30 წელზე მეტია, ამერიკა ყველა კუთხით და ფორმით ეხმარება.

ამერიკა, რომელმაც ჩვენ პრაქტიკულად ჯარი მოგვცა, ყოველ შემთხვევაში, მოამზადა, რომ ჰქონოდა დღევანდელი თანამედროვე სტანდარტები; ამერიკა, რომელიც მოგვეხმარა, რათა ქართული ეკონომიკა იყოს თავის ადგილას. 30 წელი ჩვენ ვიყავით ამერიკული დახმარების ერთ-ერთი პირველი ბენეფიციარი მსოფლიოში მოქალაქის მიხედვით. ეს არის ჩვენი პასუხი, ეს არის ქართული ტრადიციული მადლიერება. ჩვენი ტრადიციები სად იკარგება არ ვიცი, მაგრამ ეს არის მაჩვენებელი ხელისუფლების მორალურად და პოლიტიკურად ჩამოშლის. ეს არის ის, რაც ჩვენ დღეს უნდა დავინახოთ“, – განაცხადა ზურაბიშვილმა.

ცნობისთვის, პრემიერ-მინისტრმა, ირაკლი კობახიძემ, აშშ-ის პრეზიდენტს, დონალდ ტრამპსა და ვიცე-პრეზიდენტს, ჯეი დი ვენსს ღია წერილით მიმართა.

იმედია, საბოლოო ჯამში, ევროპა კრიზისიდან გამარჯვებული, უფრო ძლიერი გამოვა და საქართველო გახდება ნაწილი სწორედ იმ ევროპის, რომელიც დემოკრატიულ საფუძვლებს დაუბრუნდება, პატივს სცემს განსხვავებულ აზრს და არ გაიბუტება პატარა ბავშვივით, იმ ევროპის, რომლისთვისაც რთული მდგომარეობიდან გამოსავალი შეიძლება იყოს დიალოგი და არა კარის მიჯახუნება, – ამის შესახებ ევროინტეგრაციის საპარლამენტო კომიტეტის თავმჯდომარემ, ლევან მახაშვილმა პარლამენტის სესიაზე განაცხადა.

მახაშვილის თქმით, ბუდაპეშტში გამართული შეხვედრებიდან გამომდინარე შეიძლება ითქვას, რომ ევროკავშირში ჩანს კონტურები, რომ დამოკიდებულება შეიცვლება, მათ შორის საქართველოსთან მიმართებაში.

მახაშვილის განცხადებით, დღეს ევროპის მთავარი გამოწვევაა, რომ ეკონომიკურად, სამხედრო და პოლიტიკური გავლენების თვალსაზრისით საკმაოდ რთულ მდგომარეობაშია.

„ჩვენ გასული ორი დღის განმავლობაში საკმაოდ მნიშვნელოვანი შეხვედრები გვქონდა ბუდაპეშტში, ევროკავშირის წევრი ქვეყნების და კანდიდატი სახელმწიფოების პარლამენტების თავმჯდომარეების სამიტის ფარგლებში. მთავარი თემა საუბრების იყო ევროპის მომავალი. მინდა, გაგიზიაროთ ჩვენი დაკვირვებები აღნიშნული კონფერენციიდან. დღეს ევროპის მთავარი გამოწვევა არის, რომ ის ეკონომიკურად, სამხედრო და პოლიტიკური გავლენების თვალსაზრისით საკმაოდ რთულ მდგომარეობაშია, განსაკუთრებით მსოფლიოს სხვა ძალებთან შედარებით. მსოფლიოში ყველაზე დიდი ომი სწორედ მის ტერიტორიაზე მიმდინარეობს და გამოსავალიც ჯერჯერობით არ ჩანს. მთავარი ღირებულებითი კავშირი ევროკავშირის წევრი ქვეყნების აშკარად დასუსტებულია, რაც მას კიდევ უფრო მოწყვლად მდგომარეობაში აყენებს და ჩვენ ეს ნათლად დავინახეთ, მათ შორის ამ კონფერენციის მიმდინარეობისას. მსოფლიოს სხვადასხვა წერტილში მიმდინარე ცვლილებებს ევროკავშირი ან თავად მართავდა, ან შორიდან ადევნებდა თვალს. ახლა კი თავად ევროკავშირი მოიცვა ცვლილებებმა. კერძოდ, წევრ  ქვეყნებში გეომეტრიული პროგრესიით იზრდება ძალები, რომლებიც ანგრევენ ათწლეულების განმავლობაში მოქმედ პოლიტიკურ ისტებლიშმენტს. აქამდე კონსერვატიულ იდეოლოგიას უარყოფდნენ და პოლიტიკური სცენიდან რიყავდნენ. ახლა კი ამ ადამიანების რაოდენობამ და გავლენამ ისეთ მასშტაბს მიაღწია, რომ ევროპაში ახლადაღორძინებული კონსერვატიზმის იგნორირება და კრიტიკის მიუღებლობა აღარ იძლევა შედეგებს. როგორც ევროკავშირის წევრი ქვეყნის ერთ-ერთი პარლამენტის თავმჯდომარემ აღნიშნა, დემოკრატიისთვის ბრძოლის სახელით მათი ხმების ჩახშობის მცდელობა გადაიზარდა დემოკრატიისთვის ძირის გამოთხრასა და დაზიანებაში“, – განაცხადა მახაშვილმა.

ლევან მახაშვილი აცხადებს, რომ საქართველოში, დიდი ხანია, რადიკალური ოპოზიცია და მათი უცხოელი მფარველები ცდილობენ, უგულებელყონ, ჩაახშონ და შეურაცხყოფა მიაყენონ ეროვნულ, ხალხის ხმას.

„მათ ეს არ გამოუვიდათ და არც გამოუვათ. დღეს რომ ამ დარბაზის ნაწილი ცარიელია, ამის ძალიან კარგი დამადასტურებელი ფაქტია. საქართველოში მათ წააგეს ეს ბრძოლა საკუთარ ხალხთან და საკუთარ ქვეყანასთან. იმედია, საბოლოო ჯამში, ევროპა ამ კრიზისიდან უფრო გამარჯვებული, ძლიერი გამოვა და საქართველო გახდება ნაწილი სწორედ იმ ევროპის, რომელიც დემოკრატიულ საფუძვლებს დაუბრუნდება, იმ ევროპის, რომელიც  პატივს სცემს განსხვავებულ აზრს და არ გაიბუტება პატარა ბავშვივით, იმ ევროპის, რომლისთვისაც რთული მდგომარეობიდან გამოსავალი შეიძლება იყოს დიალოგი და არა კარის მიჯახუნება. ჩვენი ორმხრივი შეხვედრებიდანაც მკაფიოდ გამოჩნდა, რომ ევროკავშირში ნელ-ნელა ამის კონტურები იკვეთება. დარწმუნებულები ვართ, რომ საღი აზრი აქაც გაიმარჯვებს, მათ შორის საქართველოსთან მიმართებაში“, – აღნიშნა მახაშვილმა.