საჯარო სამსახურის ბიურო საჯარო სამართლის იურიდიული პირის სახით აღარ იარსებებს. აღნიშნული გადაწყვეტილება საქართველოს მთავრობამ მართვის რაციონალიზაციისა და ხარჯების ოპტიმიზაციის მიზნით მიიღო.

აღსანიშნავია, რომ „საჯარო სამსახურის შესახებ” კანონში განხორციელებული ცვლილებების შედეგად,  სსიპ საჯარო სამსახურის ბიუროს არაერთი ფუნქცია გამოაკლდა. მათ შორის თანამდებობის პირთა დეკლარაციებისა და საჯარო სამსახურში ეთიკისა და კეთილსინდისიერების კონტროლის ფუნქციები, რომლებიც ანტიკორუფციული ბიუროს რეგულირების სფეროში გადავიდა.

ამ ეტაპზე საჯარო სამსახურის ბიუროს ფუნქციები არსებითად შემოიფარგლება საჯარო ადმინისტრირების რეფორმაზე მუშაობით, რაც მთავრობის ადმინისტრაციის შესაბამის დეპარტამენტთან მჭიდრო კოორდინაციით ხორციელდება  და საჯარო სამსახურში არსებულ ვაკანსიებზე კონკურსების შესახებ ინფორმაციის გამოქვეყნებით, რაც მეტწილად ტექნიკურ ფუნქციას წარმოადგენს. 

შესაბამისად, იმის გათვალისწინებით, რომ საჯარო სამსახურის ბიურო თავდაპირველი ფუნქციების ერთ მესამედს უკვე აღარ ფლობს, სსიპ-ის ფორმით მისი არსებობა მიზანშეუწონელია.

აქედან გამომდინარე, მთავრობის გადაწყვეტილებით, 2025 წლის 1-ლი აპრილიდან საჯარო სამსახურის ბიურო სსიპ-ის ფორმით აღარ იფუნქციონირებს და მის უფლებამოსილებაში დარჩენილ ფუნქციებს მთავრობის ადმინისტრაციის შესაბამისი დეპარტამენტები განახორციელებენ.

არა თუ მხოლოდ დასტურდება, არამედ შეიძლება ითქვას გადაჭარბებულადაც კი გვესმის განცხადებები. ჩვენ ყოველთვის ვამბობდით, რომ წითელ ხაზებს არც კი ვუახლოვდებით. ჩვენ იმდენი გვქონდა და გვაქვს სალაპარაკო თავისი დახურული შეხვედრების დეტალებით, რომ ამან შეიძლება ახალი სკანდალები გამოიწვიოს, საბედნიეროდ ჩვენ გავძვერით ამის გარეშეც და არ დაგვჭირდა ეს ყველაფერი, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ, ჟურნალისტის კითხვაზე საპასუხოდ, რომელმაც თქვა, რომ NED-თან დაკავშირებითაც არის კორუფციაზე კონკრეტული შენიშვნები, კრიტიკა და გვახსოვს განცხადებები „ქართული ოცნების“ მხრიდან, ხშირად იყო საუბარი ამ მიმართულებით, დასტურდება თუ არა ის, რაზეც „ქართული ოცნება“ საუბროდა.

„დღეს უკვე აშშ-დან გვესმის განცხადებები იმის შესახებ, თუ როგორი კორუფცია და მავნებლობა მოდიოდა ამერიკელი ხალხის ფინანსებიდან, რაც საერთოდ არ იყო ამერიკელი ხალხის ნება ისვე როგორც დღეს ბევრი ევროპელი ბიუროკრატი საუბრობს ისეთ თემებზე, რომელიც არ შეიძლება იყოს ევროპელი ხალხის ინტერესი. არ შეიძლება იყოს გერმანელი ხალხის ინტერესი ის, რასაც ლაპარაკობს რომელიმე გერმანელი, დღეს ხელისუფლებაში მყოფი ბიუროკრატი, რომ ფსევდო ლიბერალურ მიმდინარეობებს მკაცრად იცავენ.

არ შეიძლება იყოს რომელიმე ფრანგი ან სხვა ძლიერი ევროპული ქვეყნის მოქალაქის ინტერესი იმ ფსევდო ლიბერალური მარაზმატიკული ინტერესების დაცვა, რასაც ამ ქვეყნის ზოგიერთი ბიუროკრატისგან და ბრიუსელში დაბანაკებული ბიუროკრატისგან ვისმენთ. ჩვენ არ უნდა გავაიგივოთ ევროპა და ევროპული ბიუროკრატია. კარგად უნდა გვესმოდეს ყველას, რომ ევროპელი ბიუროკრატები რეალურად თავისი საქმიანობით ევროპის და ევროპულობის, ევროპული ღირებულებების საწინააღმდეგოდ იბრძვიან და აქვე არის ბრძოლა საქართველოს და ქართველი ხალხის ინტერესების საწინააღმდეგოდ, რომელიც არის წარსულის პატივისმცემელი თავისი ტრადიციებით, თავისი იდენტობის და ამის გათვალისწინებით აპირებს, რომ მომავალი ააშენოს.

თუკი ჩვენ ჩვენს წარსულს პატივს ვცემთ და ქართულ იდენტობას პატივს ვცემთ, ეს არ ნიშნავს, რომ ჩვენ არ ვზრუნავთ მომავალზე, პირიქით. ერი, რომელიც დაივიწყებს თავის წარსულს, განწირულია სიკვდილისთვის. ერი რომელიც თავის იდენტობას, ტრადიციებს და კულტურას სცემს პატივს, ამისი შენარჩუნებით მოახერხებს მხოლოდ თავისი ღირსეული მომავლის უზრუნველყოფას, კეთილდღეობას და ღირსეული ევროპელობის და ევროპულობის უზრუნველყოფას, სხვანაირად ნებისმიერი ერი განწირულია სიკვდილისთვის, ჩვენ სიკვდილს არ ვაპირებთ. ჩვენ ვაპირებთ ამ ქვეყნის გადარჩენა და კიდევ უფრო წინ სვლას, ოღონდ არა ბრიუსელის ზოგიერთი ბიუროკრატის ჭკუაზე, როგორც ამას ისინი ცდილობენ „დიფ სტეტის“ გავლენების წყალობით“, – აღნიშნა მამუკა მდინარაძემ.

მმართველმა გუნდმა ევროსაბჭოს საპარლამენტო დელეგაციიდან წევრები გაიწვია. ამასთან, საპარლამენტო დელეგაციაში „ქართული ოცნებისა“ და „ხალხის ძალის“ წევრებმა მათი უფლებამოსილების შეწყვეტის თაობაზე ასამბლეის პრეზიდენტს ინდივიდუალურად მიმართეს.

პარლამენტის ბიურომ ევროსაბჭოს საპარლამენტო ასამბლეიდან წევრების გაწვევის საკითხს მხარი დაუჭირა.

როგორც ბიუროს სხდომაზე პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ განაცხადა, „წევრების გამოწვევის მიუხედავად, დელეგაცია არ უქმდება, დელეგაცია რჩება“.

ევროსაბჭოს საპარლამენტო დელეგაციაში კვოტები „ქართულ ოცნებასა“ და ოპოზიციის სახელით „ხალხის ძალას“ ეკავა. დელეგაციის წევრები იყვნენ: თეა წულუკიანი, გივი მიქანაძე, მარიამ ლაშხი, ეკა სეფაშვილი, ასევე სათადარიგო კვოტით: – ლევან მაჭავარიანი, რატი იონათამიშვილი და ზვიად შალამბერიძე.

„ველით, რომ ევროსაბჭოს საპარლამენტო ასამბლეა თავის პირვანდელ ღირებულებებს დაუბრუნდება, რომელიც დემოკრატიისა და სუვერენიტეტის პატივისცემაზეა დამყარებული“, – განაცხადა პარლამენტის თავმჯდომარემ შალვა პაპუაშვილმა ბიუროს სხდომაზე.

ის, რაც ხდება ქუჩაში, თუ ვინმეს სჯერა, რომ აშშ-ის საელჩოსგან დამოუკიდებლად ხდება, მან არაფერი იცის იმის შესახებ, რაც ხდება ქუჩაში, – ამის შესახებ საპარლამენტო უმრავლესობის ლიდერმა, მამუკა მდინარაძემ ჟურნალისტებს განუცხადა.

მისივე თქმით, სამწუხაროა, რომ აშშ-ის ახლად არჩეული ხელისუფლების განცხადებები განსხვავდება საქართველოში ამერიკის საელჩოს მოქმედებებისგან.

„ის, რაც ხდება ქუჩაში, თუ ვინმეს სჯერა, რომ აშშ-ის საელჩოსგან დამოუკიდებლად ხდება, მან არაფერი იცის იმის შესახებ, რაც ხდება ქუჩაში.

თუ ამ ქვეყანაში, ერთი ადამიანი არის, რომელიც ფიქრობს, რომ ქუჩის აქციები, ის პიარკამპანიები, მავნებლობები, რაც წარმოებს აგენტურული ოპოზიციის მიერ, ამ აგენტურის პატრონების, ან საქართველოში აშშ-ის საელჩოსგან აბსოლუტურად დამოუკიდებლად და დისტანცირებით ხდება, მას წარმოდგენა არ აქვს იმაზე, თუ რა ხდება დღეს საქართველოში. არც გლობალურად და არც ვიწრო თემებთან მიმართებით. სამწუხაროა, რომ აშშ-ის ახლად არჩეული ხელისუფლების განცხადებები, ნარატივები ერთია და მისი ქვედა რგოლების, მათ შორის საქართველოში ამერიკის საელჩოს მოქმედება აბსოლუტურად აცდენილია იმ განცხადებებს, რასაც ვისმენთ. იმედია, ეს ძალიან მალე გასწორდება.

ბუნებრივია, შტატები არ არის პატარა ქვეყანა და პატარა ბიუროკრატია არ არის შტატებში, რომ ასე მარტივად შეიძლებოდეს „დიფ სთეითისა“ და მისი გავლენების დამარცხება, სხვა დაბალ რგოლებშიც, დარწმუნებული ვარ, ეს პრობლემები იქნება. მაგრამ ჩვენ ჩვენი გვაწუხებს, ვიდრე სხვა დანარჩენი. უნდა მივეჩვიოთ ამას, რომ ჩვენმა უნდა შეგვაწუხოს უწინარესად, არა უკრაინამ, არა მოლდოვამ… ჯერ ჩვენმა და მერე კი ბატონო, ვიმეგობროთ ვისთანაც გინდათ, მაგრამ საქართველოში შტატების საელჩო კვლავ განაგრძობს პატრონობას, რასაც გუშინდელი აქციის ორგანიზება ჰქვია. იმედია, ნელ-ნელა ეს მიდგომა, ქვედა რგოლების თვითნებობა, „დიფ სთეითისა“ და არა ამერიკელი ხალხის მსახურება მალე დამთავრდება. სუბიექტურადაც ეს გვაწყობს. სანამ ქვედა რგოლი ზედა რგოლის საწინააღმდეგოდ მოქმედებს, მანამდე ეს ჯანჯღარი და გარკვეული ტურბულენტობა [წინა კვირებთან მიმართებით ცოტა ნაკლები] მაინც გაგრძელდება, რაც აზიანებს საქართველოს ეკონომიკას, ლარის კურსს, მოქალაქეების უფლებებს და ა.შ. ეს რამდენადაც აღმოიფხვრება, იმდენად კიდევ უფრო თავისუფალი იქნება საქართველოს მოქალაქე, ხელისუფლება, ქართველი ხალხი თავის მოქმედებებში და მით მეტად გაიუმჯობესებს კეთილდღეობის ხარისხს“, – განაცხადა მამუკა მდინარაძემ.

საპარლამენტო უმრავლესობის ლიდერი მამუკა მდინარაძე განმარტავს, რა საკანონმდებლო ცვლილებებს გეგმავს „ქართული ოცნება“, რათა, მისი თქმით, „ხელისუფლებას ქვეყნის ეფექტურად მართვისთვის შესატყვისი ბერკეტები“ ჰქონდეს.

როგორც მდინარაძემ საპარლამენტო უმრავლესობის სხდომის შემდეგ პრესკონფერენციაზე განაცხადა, მკაცრდება მთელი რიგი რეგულაციები როგორც ადმინისტრაციულ სამართალდარღვევათა, ისე სისხლის სამართლის კოდექსში.

მისი თქმით, ერთ-ერთი სიახლეა ის, რომ სისხლის სამართლის წესით დასჯადი გახდება პოლიტიკური თანამდებობის პირზე, სახელმწიფო მოსამსახურეზე, საჯარო მოსამსახურეზე თავდასხმა ან ძალადობის მუქარა.

„საკანონმდებლო ცვლილებებს ვიწყებთ, რომ ქვეყნის არაეფექტიანი მართვისკენ მიმართული კანონები შეცვალოს ისეთი ნორმებით, რომ ხალხის მიერ არჩეულ ხელისუფლებას ჰქონდეს ქვეყნის მართვისთვის შესატყვისი ბერკეტები და საშუალებები. დღეს წარმოგიდგეთ ამ მიდგომის რეალიზების პირველ ნაწილს, რომელიც უკვე დაინიცირებულია საქართველოს პარლამენტში და პირობას ვაძლევთ საზოგადოებას, რომ ეს პროცესი გაგრძელდება იქამდე, ვიდრე სრულად არ შეიცვლება თავსმოხვეული ნორმები სახელმწიფოს გამართული ფუნქციონირების და დამოუკიდებლობისთვის აუცილებელი ნორმების მიღებით.

მკაცრდება მთელი რიგი რეგულაციები პირველ რიგში, ადმინისტრაციულ სამართალდარღვევათა კოდექსში, მათ შორის, მაგალითად, მესაკუთრის წინასწარი თანხმობის გარეშე იკრძალება დახურულ სივრცეში, შენობებში, აქციების ჩატარება; წვრილმანი ხულიგნობისთვის, ვანდალიზმისთვის, სამართალდამცავი ორგანოს წარმომადგენლის მოთხოვნის დაუმორჩილებლობის და მათი შეურაცხყოფისთვის, სასამართლოს შესასვლელების ბლოკირებისთვის და სხვა მსგავსი ადმინისტრაციული კანონდარღვევისთვის ჯარიმები იზრდება და ასევე, იზრდება ადმინისტრაციული პატიმრობის ვადა 60 დღემდე. ადმინისტრაციულ სამართალდარღვევად განისაზღვრება სახელმწიფო პოლიტიკური პირის, საჯარო მოსამსახურის სიტყვიერი შეურაცხყოფა მის საქმიანობასთან დაკავშირებით, რისთვისაც ასევე მკაცრი სანქციები განისაზღვრება.

სისხლის სამართლის კოდექსშიც გვექნება მთელი რიგი ცვლილებები, რომლებიც განპირობებულია ფსევდო ლიბერალების ფაშისტური ქმედებების პრევენციის მიზნით, რასაც მრავლად ვხედავთ ბოლო პერიოდის განმავლობაში. კერძოდ ძალადობრივი ქმედებებისკენ საჯაროდ მოწოდება აქამდე ისჯებოდა მხოლოდ ჯარიმით და საზოგადოებისთვის სასარგებლო შრომით, არსებული ცვლილებით ამ ქმედებისთვის განისაზღვრება პატიმრობა 3 წლამდე ვადით. იზრდება სისხლის სამართლებრივი პატიმრობის ვადა პოლიციელების მიმართ წინააღმდეგობის, მუქარის და ძალადობისთვის, ეს გადავა მძიმე დანაშაულების კატეგორიაში, 5 წლიდან 6 წლამდე. ასევე, მკაცრდება სანქცია პოლიციელზე, ხელისუფლების წარმომადგენლებზე და მათი ოჯახის წევრებზე თავდასხმისთვის, ჯგუფურობის, არაერთგზისობის, საშიში საშუალებით განხორციელების შემთხვევაში. ანუ, ეს კონკრეტული გარემოებები გადავა დამამძიმებელ გარემოებებში და ამაზე შედარებით მკაცრი სანქცია იქნება, როგორც დამამძიმებელ გარემოებებზე. სასჯელი იზრდება პოლიციელის ჯანმრთელობის ხელყოფის ფაქტზეც. სისხლის სამართლის წესით დაისჯება და ეს ახალი ნორმა იქნება, პოლიტიკური თანამდებობის პირზე სახელმწიფო მოსამსახურეზე, საჯარო მოსამსახურეზე თავდასხმის ან ძალადობის მუქარის ჩამდენი პირიც. ასევე, არაერთი ადმინისტრაციული სახდელი გვექნება მათ შორის გამკაცრების მიმართულებით“, – განაცხადა მდინარაძემ.

ვიწყებთ საკანონმდებლო ცვლილებებს, რომ ქვეყნის არაეფექტური მართვისკენ მიმართული კანონები შეიცვალოს ისეთი ნორმებით, რომ ხალხის მიერ არჩეულ ხელისუფლებას ჰქონდეს ქვეყნის მართვისთვის შესატყვისი ბერკეტები და საშუალებები, – ამის შესახებ „ქართული ოცნების“ ოფისში გამართულ ბრიფინგზე, საპარლამენტო უმრავლესობის ლიდერმა მამუკა მდინარაძემ განაცხადა.

მისი განმარტებით, გარე ძალების გავლენებით მიღებული საკანონმდებლო ცვლილებები მიმართული იყო სახელმწიფოს და მისი ინსტიტუტების ნგრევის და დასუსტებისკენ.

„სახელმწიფომ ყველაფერი უნდა გააკეთოს იმისთვის, რომ ქვეყნის და ხალხის ინტერესების საბოტაჟი, მოგონილი არგუმენტებით ნაკლებად შეძლოს „დიფ სთეითის“ აგენტურამ. უკიდურესად მნიშვნელოვანია, რომ ხელისუფლებამ ხალხის მსახურება მოახერხოს ხელოვნური დაბრკოლებების გარეშე. ამაში ვგულისხმობ გარე ძალების გავლენებით მიღებულ საკანონმდებლო ცვლილებებს, რაც მიმართული იყო სახელმწიფოს და მისი ინსტიტუტების ნგრევის და დასუსტებისკენ.

ვიწყებთ საკანონმდებლო ცვლილებებს, რომ ქვეყნის არაეფექტური მართვისკენ მიმართული კანონები შეიცვალოს ისეთი ნორმებით, რომ ხალხის მიერ არჩეულ ხელისუფლებას ჰქონდეს ქვეყნის მართვისთვის შესატყვისი ბერკეტები და საშუალებები.

დღეს წარმოგიდგენთ ამ მიდგომის პირველ ნაწილს, რომელიც უკვე დაინიცირებულია პარლამენტში და პირობას ვაძლევთ საზოგადოებას, ეს პროცესი გაგრძელდება იქამდე, ვიდრე სრულად არ შეიცვლება თავს მოხვეული ნორმები, სახელმწიფოს გამართულად ფუნქციონირების და გამართულად აუცილებელი ნორმების მიღებით.

მკაცრდება მთელი რიგი რეგულაციები“, – განაცხადა მამუკა მდინარაძემ.

რამდენიმე მიმართულებით იმუშავებს ეს კომისია. რა თქმა უნდა ჩვენ არ გვაქვს მოლოდინი, რომ საპარლამენტო ოპოზიცია ჩაერთვებოდა კომისიის მუშაობაში, ვგულისხმობ კომისიის წევრობას, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილემ, საპარლამენტო უმრავლესობის წევრმა ვლადიმერ ბოჟაძემ საპარლამენტო საგამოძიებო კომისიის შექმნაზე საუბრისას.

„რა თქმა უნდა ოპოზიციას ამ პროცესებში ჩართვა მოუწევს, ეს იქნება ძველი თუ ახალი „ნაციონალური მოძრაობა“, ლელოში გადაბარგებული „ნაციონალური მოძრაობის“ წევრები, ის ადამიანები, ვინც დღეს გახარიას პარტიაში არიან. ამ 12 წლის განმავლობაში არ მომხდარა „ნაციონალური მოძრაობის“, როგორც პოლიტიკური რეჟიმის სამართლებრივი შეფასება. კომისიის მუშაობა დამატებით ინფორმაციას, დამატებით ფაქტებს, დამატებით მტკიცებულებებს შექმნის საიმისოდ, რომ ერთის მხრივ პროკურატურაში გაგრძელდეს გამოძიება ბევრი მიმართულებით და მეორე მხრივ არსებობდეს სამართლებრივი საფუძველი აიკრძალოს „ნაციონალური მოძრაობა“, – აღნიშნა ვლადიმერ ბოჟაძემ.