საქართველოს პარლამენტის 2024 წლის 26 ოქტომბერს საზღვარგარეთ მყოფ ამომრჩევლებს 60 საარჩევნო უბანი მოემსახურება.

მიუხედავად იმისა, რომ ზოგიერთი ჩართული მხარე აქტიურად ცდილობდა  საზღვარგარეთ საარჩევნო უბნების გახსნის საკითხის სამართლებრივიდან პოლიტიკურ ჭრილში გადაყვანას და საზოგადოების შეცდომაში შეყვანას,  ცენტრალურმა საარჩევნო კომისიამ კანონის შესაბამისად საგარეო საქმეთა სამინისტროდან მიღებული ოფიციალური მონაცემების საფუძველზე, პარლამენტის არჩევნებისათვის საარჩევნო უბნები 42 ქვეყანაში შექმნა.

აღსანიშნავია, რომ 26 ოქტომბრის პარლამენტის არჩევნებისთვის საზღვარგარეთ იხსნება იმაზე მეტი უბანი, ვიდრე იყო 2020 წლის საპარლამენტო არჩევნებზე. მათ შორის საარჩევნო უბნები იხსნება ისეთ ქვეყნებშიც, სადაც არ იყო წინა საპარლამენტო არჩევნებზე, ან ზოგადად არცერთ წინა არჩევნებზე. ეს ქვეყნებია: არაბთა გაერთიანებული საამიროები, ფინეთის რესპუბლიკა, კორეის რესპუბლიკა, იაპონია, ავსტრალიის თანამეგობრობა.

აქვე მინდა საზოგადოებას შევახსენო, რომ კანონმდებლობის თანახმად, საზღვარგარეთ საარჩევნო უბანი იქმნება საკონსულო აღრიცხვაზე მყოფი არანაკლებ 50 და არაუმეტეს 3 000 ამომრჩევლისთვის. სხვა რეგულაციებს საქართველოს საარჩევნო კანონმდებლობა საზღვარგარეთ მყოფი საქართველოს მოქალაქეების არჩევნებში მონაწილეობასთან დაკავშირებით არ ითვალისწინებს.  მათ შორის არც საზღვარგარეთ მყოფი საქართველოს მოქალაქეების მიერ საარჩევნო ადმინისტრაციაში გამოგზავნილი წერილის საფუძველზე საარჩევნო უბნის გახსნას. აქედან გამომდინარე საარჩევნო ადმინისტრაციისთვის კატეგორიულად მიუღებელია დაინტერესებული პირების მხრიდან აღნიშნული თემით მანიპულირება და საზოგადოებაში არასწორი აღქმების ჩამოყალიბების მცდელობა.

საარჩევნო ადმინისტრაციისთვის საზღვარგარეთ მყოფი საქართველოს მოქალაქეების არჩევნებში მონაწილეობა და თანაბარი სერვისების მიწოდება ერთ-ერთ პრიორიტეტს წარმოადგენს. ჩვენთვის მნიშვნელოვანია საზღვარგარეთ მყოფი საქართველოს მოქალაქეების სწორი ინფორმირება. სწორედ ამიტომ, კიდევ ერთხელ გვინდა შევახსენოთ მათ ის საკანონმდებლო რეგულაციები, რომელიც საზღვარგარეთ  არჩევნებში მონაწილეობას შეეხება.

არჩევნებში მონაწილეობის მისაღებად საზღვარგარეთ მყოფი საქართველოს მოქალაქე უნდა იმყოფებოდეს საქართველოს საკონსულო აღრიცხვაზე ან უნდა იყოს რეგისტრირებული საზღვარგარეთ საქართველოს მოქმედი კანონმდებლობის შესაბამისად. იმ შემთხვევაში, თუ საზღვარგარეთ მყოფი საქართველოს მოქალაქე არ იმყოფება საკონსულო აღრიცხვაზე და არ აქვს რეგისტრაცია საზღვარგარეთ, მას აქვს შესაძლებლობა საზღვარგარეთ საარჩევნო უბნების შექმნის დღიდან 7 ოქტომბრის ჩათვლით, საარჩევნო მიზნებისთვის გაიაროს რეგისტრაცია საქართველოს დიპლომატიურ წარმომადგენლობაში, ან საკონსულო დაწესებულებაში, ან შესაბამის სახელმწიფოში შექმნილ საუბნო საარჩევნო კომისიაში.

ხაზგასმით გვინდა აღვნიშნოთ, რომ მხოლოდ ზემოთ აღნიშნული პროცედურის გავლის შემდეგ ექნებათ შესაძლებლობა საზღვარგარეთ მყოფ საქართველოს მოქალაქეებს მიიღონ მონაწილეობა 2024 წლის 26 ოქტომბერს საქართველოს პარლამენტის არჩევნებში.

დეტალური ინფორმაცია საზღვარგარეთ გახსნილი საარჩევნო უბნების და მათი მისამართების შესახებ განთავსებულია ცესკოს ვებგვერდზე.

მოვუწოდებთ ამომრჩევლებს, დროულად გაიარონ შესაბამისი პროცედურები. არჩევნებში ჩართულ მხარეებს კი კიდევ ერთხელ მოვუწოდებთ, პოლიტიკური ინტერესებიდან გამომდინარე ნუ შეიყვანენ ამომრჩევლებს შეცდომაში და ხელი შეუწყონ ჯანსაღ საარჩევნო გარემოს. არჩევნები საერთო საქმეა და საარჩევნო პროცესის კანონის შესაბამისად წარმართვა საარჩევნო ადმინისტრაციასთან ერთად, ყველა ჩართული მხარის ვალია.

წინასაარჩევნო კამპანიას საზოგადოებას პირდაპირ უცხოელი აქტორები უტარებენ და არა პოლიტიკური ოპოზიცია – განაცხადა პარტია „ხალხის ძალის“ აღმასრულებელმა მდივანმა გურამ მაჭარაშვილმა.

„რეალურად ჩვენ გვიწევს მთლიანად სახელმწიფოს და ქართველ ხალხს ოპონირება უცხოურ ძალებთან და ეს ძალები აუცილებლად დამარცხდებიან.

მათი მხარდაჭერა და შავი ფულით დაფინანსება, გიგაურები იქნებიან, ლომჯარიები იქებიან თუ გვარამიები ნიშნავს იმას, რომ ისინი მხარს უჭერენ ლგბტ პროპაგანდას და არატრადიციულ ცხოვრებას“, – აღნიშნა მაჭარაშვილმა.

„ქოცმა“ თუ გააყალბა და დაიწერა რაიმე ციფრი ხმების დაუთვლელად, რასაც ვფიქრობ, გააკეთებს, ვინ ხართ მზად ბრძოლისთვის, რომ დავიცვათ ჩვენი ხმა, დავაბრუნოთ ქვეყანა ევროპის რელსებზე, – ამის შესახებ უკრაინაში მებრძოლი ნადიმ ხმალაძე სოციალურ ქსელში წერს.

ნადიმ ხმალაძე აღნიშნულ პოსტზე გამოხმაურებისკენ მოუწოდებს იმ ადამიანებს, რომლებიც, მისივე განმარტებით, მზად არიან ბრძოლისთვის.

„1000 პროცენტით დარწმუნებული ვარ 26 ოქტომბერს ჩვენს გამარჯვებაში. თუ გააყალბა ქოცმა და დაიწერა რაიმე ციფრი ხმების დაუთვლელად, რასაც ვფიქრობ, რომ გააკეთებს, ვინ ხართ მზად ბრძოლისთვის, რომ დავიცვათ ჩვენი ხმა და დავაბრუნოთ ქვეყანა ევროპის რელსებზე, ვაჩვენოთ ქართული წარმოშობის რუსებს ჩვენი ძალა, ქართული ღირსება და თავმოყვარეობა. დავიბრუნოთ საქართველო, რომელიც ვფიქრობ, წაგვართვა რამდენიმე ქვეყნის და სამშობლოს მოღალატემ, ფულის მონა და ხალხის ხარჯზე გამდიდრებულმა წინა საუკუნეებში ჩარჩენილმა ფეოდალის მსგავსმა არსებებმა.

დაალაიქეთ და დააკომენტარეთ იმ ხალხმა, ვინც ამისთვის ხართ მზად. წინასწარ მადლობა ყველას“, – წერს ნადიმ ხმალაძე.

https://www.facebook.com/N.D.khmala/posts/8272375669465164?ref=embed_post

გასკდა გულზე, სალომე ზურაბიშვილი, ეს რა ბანერი დაუმზადებია „ქართულ ოცნებას“, ეს რა უბედურებას გვთავაზობს აირჩიეთ ომი თუ მშვიდობაო?! სალომე ბოროტი ან ბოღმიანი (ვფიქრობ, ჩვენ ისტორიაში ასეთი სახელით უნდა შევიდეს!) ძალიან გაბრაზებულია, მშვიდობაც და სამების საკათედრო ტაძარიც ხომ „კგბ” ნარატივიაო, ასე როგორ შეიძლება, ეს ხომ არა ევროპულია, ეს ხომ სამარცხვინოაო…, – ასე ეხმიანება „ერთიანი ნეიტრალური საქართველოს“ წევრი ლევან ნიკოლეიშვილი სალომე ზურაბიშვილის ფეისბუქ-პოსტს „ქართული ოცნების“ ბანერებთან დაკავშირებით.

ნიკოლეიშვილი პრეზიდენტს მიმართავს და აღნიშნავს, რომ მის მზაკვრულ გეგმას აღსრულება არ უწერია და საპრეზიდენტო ვადის ამოწურვის შემდეგ მინიმუმ საქართველოდან გაძევება ემუქრება.

„გასკდა გულზე, სალომე ზურაბიშვილი, ეს რა ბანერი დაუმზადებია „ქართულ ოცნებას“, ეს რა უბედურებას გვთავაზობს აირჩიეთ ომი თუ მშვიდობაო?! სალომე ბოროტი ან ბოღმიანი (ვფიქრობ, ჩვენ ისტორიაში ასეთი სახელით უნდა შევიდეს!) ძალიან გაბრაზებულია, მშვიდობაც და სამების საკათედრო ტაძარიც ხომ „კგბ“ ნარატივიაო, ასე როგორ შეიძლება, ეს ხომ არა ევროპულია, ეს ხომ სამარცხვინოაო…

Excusez-moi Madame, თქვენ როგორც „მართმადიანი“ და როგორც ამ ქვეყნის არა შვილი ირჩევთ ომს, მაგრამ არ გამოვა, ასევე არ გამოვა და აღსრულება არ უწერია თქვენს არც ერთ მზაკვრულ გეგმას, თქვენ საპრეზიდენტო ვადის ამოწურვის შემდეგ კი მინიმუმ აქედან გაძევება გემუქრებათ, ილოცეთ, თუ რაიმე სახის ლოცვა იცით, რომ თქვენი აგენტურული საქმიანობა საქართველოში მხოლოდ ამით დასრულდეს“, – წერს ლევან ნიკოლეიშვილი.

ჩვენი გუნდი იმ ადამიანებისგან შედგება, ვისაც დიდი წვლილი მიუძღვის ხელისუფლების პოლიტიკის გატარებაში, ახალ სახეებს ვხედავთ, რაც ძალიან მნიშვნელოვანია პოლიტიკური პარტიისთვის, რომ გუნდს ახალი ენერგია შესძინოს, – ამის შესახებ „ქართული ოცნების“ წევრმა, მაკა ბოჭორიშვილმა საქართველოს პირველ არხს განუცხადა.

მისი თქმით, „ქართული ოცნების“ დღის წესრიგი მიმართულია ქვეყნის მშვიდობიანი განვითარებისკენ.

„დღის წესრიგი მიმართულია ადამიანის უფლებების კიდევ უფრო მეტი დაცვისკენ, სოციალური გარანტიებისკენ გაუმჯობესებისკენ და საქართველოს ევროკავშირში გაწევრიანების წინაპირობების შექმნისკენ. ეს ის დღის წესრიგია, რაც „ქართულ ოცნებას“ აქვს, ეს ის ხალხია, ვინც ამ დღის წესრიგს განახორციელებს“, – განაცხადა ბოჭორიშვილმა.

დიდი მნიშვნელობა არ აქვს, პარტიები ვის დაიმატებენ ან მოიკლებენ, რადგან არანაირ იდეოლოგიურ ღირებულებას არ იმატებენ, რაღაც სახეების ერთობაა, – ამის შესახებ „გირჩის“ წევრმა, ჰერმან საბომ განაცხადა.

გუშინ გახდა ცნობილი, რომ „ლელოს“ საქართველოს ყოფილი პრეზიდენტი, გიორგი მარგველაშვილი შეუერთდა, გარდა ამისა, პარტია „გახარია საქართველოსთვის“ სიის ერთ-ერთი წევრი ზვიად ძიძიგურია.

როგორც ჰერმან საბო აცხადებს, პარტიები ადამიანებს იმის მიხედვით იმატებენ, რამდენად ცნობს მათ ხალხი, და არა იმით, ეთანხმება თუ არა გიორგი მარგველაშვილი იდეოლოგიურად „ლელოს“ ან ზვიად ძიძიგური  – ყოფილ პრემიერ-მინისტრს, გიორგი გახარიას.

„არანაირ იდეოლოგიურ ღირებულებას არ ამატებენ, უბრალოდ რაღაც სახეების ერთობაა. უმეტესობა, ვისაც იმატებენ, არის შერჩეული ერთადერთი კრიტერიუმით – რამდენად ცნობენ ადამიანები. და არა იმით, მარგველაშვილი იდეოლოგიურად ეთანხმება თუ არა „ლელოს“ ან ძიძიგური ყოფილ პრემიერს. არც ახალი სახეები არიან დიდად, თუმცა არა, სიმართლე უნდა ითქვას, ერთადერთ ახალ სახედ თუ ვინმე შეიძლება მოინათლოს, ალბათ ბატონი მარგველაშვილია. ის იმდენად უღიმღამო პრეზიდენტი იყო, რომ დიდად არავის ახსოვს, რომ პოლიტიკაში იყო ჩართული. არ მგონია, ძიძიგურის და მარგველაშვილის წინ წამოწევა და დამატება, რაიმე ელექტორალურ ღირებულებას ატარებდეს. ეს ხალხი თვითონ უნდა წარმოადგენდნენ რამეს პოლიტიკურად და თავისი ელექტორატი უნდა ჰყავდეთ, რომ ვინმეს რამე ხმები დაუმატონ. ვინმე ბებოს შეიძლება ნანახი ჰყავდეს ტელევიზორში და სიაში რომ დაინახავს, იტყვის, ნაცნობი ხალხია, მაგრამ ამის გამო ხმა როგორ უნდა მოიმატო, არ მესმის. ხმა შეიძლება, მოიმატო იმის ჩვენებით, თუ რა გინდა, როგორი უკეთესი საქართველო წარმოგიდგენია, რას შეცვლი, რით ხარ უკეთესი“, – განაცხადა ჰერმან საბომ.

ქვეყნის შიგნიდან პარტნიორებს ეხვეწებიან, იქნებ რაიმე დამაკნინებელი მოქმედებები იყოს, მათ შორის ლაპარაკი იყო პრემიერის გამოსვლის და შეხვედრების ჩახსნაზე, თუმცა ერთადერთი ის მოახერხეს, რომ ბაიდენის ადმინისტრაციამ კობახიძისთვის მიწვევა გააუქმა, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძეს კითხვა დაუსვეს აშშ-ის პრეზიდენტის, ჯო ბაიდენის მიღებაზე საქართველოს პრემიერ-მინისტრ ირაკლი კობახიძისთვის მიწვევის გაუქმებასთან დაკავშირებით.

„ბაიდენის გადაწყვეტილებას რაც შეეხება, წინასწარვე გვქონდა ინფორმაცია და, რა თქმა უნდა, ამას არ ვასაჯაროებდით. ახლა თავისუფლად შემიძლია გითხრათ, რომ არა მხოლოდ ამაზე მიმდინარეობდა მუშაობა, არამედ, ქვეყნის შიგნიდან, პირდაპირი გაგებით, ეხვეწებიან, იქნებ დამაკნინებელი მოქმედებები იყოს პარტნიორების მხრიდან. მათ შორის, საუბარი იყო და ინფორმაცია არსებობდა იმის შესახებ, რომ შეშვება-არშეშვების საკითხზეც რაღაც დაბრკოლება მაინც ყოფილიყო, რათა შემდეგ ჟურნალისტებს აქ რაღაც ეთქვათ. მათ შორის ლაპარაკი იყო გამოსვლის ჩახსნაზეც და იმ შეხვედრების, რაც შედგა. ვერცერთი მოხერხდა და მოახერხეს ერთადერთი – ბაიდენის ადმინისტრაციამ ჯერ გაუგზავნა მოწვევა და შემდეგ გააუქმა. ან რას იწვევდნენ, ვინ ეხვეწებოდათ, ან შემდეგ რაღას აუქმებდნენ? დაპატიჟება-არდაპატიჟებისთვის რომ მაშველი რგოლი გადმოუგდონ ოპოზიციას, რათა შემდეგ ამით ისპეკულირონ და თქვან, აი, იზოლაციაში მყოფი საქართველო, პრემიერი, რაღაც უნიჭო თეატრალური წარმოდგენები დადგან?

არც მოწვევა უკვირს ვინმეს, არც არმოწვევა. სხვათა შორის, ზუსტად ვიცით, გაგრძელდება ეს, რაც უფრო მოახლოვდება არჩევნები. დასანქცირებისა არ იყოს, რა შეიცვალა პირველ და მეორე დასანქცირებებს შორის? ახალი აქციები იყო და რომელიმე პოლიციელმა ვინმეს რამე დაუშავა? პოლიციელმა თუ რამე დააშავა, მერე გაიგეს? შესაბამისად, მხოლოდ და მხოლოდ ის შეიცვალა, რომ მოახლოვდა არჩევნები. გარანტირებულად შემიძლია გითხრათ, რომ „ფორმულას“, „მთავარს“, „ტვ პირველს“ მზა პროდუქტი გექნებათ პიარისათვის, რათა ნეგატიური კამპანია აწარმოონ. ეს იქნება მხოლოდ და მხოლოდ ქვეყნის გარეთ, ქვეყნის შიგნით რესურსი არა აქვთ, სოფლებშიც კი ვერ შედიან, ამომრჩეველს ვერ ელაპარაკებიან“, – განაცხადა მამუკა მდინარაძემ.