„საქსტატის“ მონაცემები შეესაბამება იქ მცხოვრები, ადგილზე მყოფი ადამიანების რაოდენობას. მასში არ შედის არც ემიგრანტი, არც სხვა ქალაქსა თუ სოფელში მცხოვრები ადამიანი და ამასთან დაკავშირებით მანიპულაცია არის უმძიმესი შეურაცხყოფა ქართული საზოგადოების, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ.

„მინდა გამოვეხმაურო რამდენიმე არგუმენტს, რომლითაც ქართულ საზოგადოებას აყენებენ უმძიმეს შეურაცხყოფას. მაგალითად, აქვეყნებენ რამდენიმე დასახლების მონაცემს და ამბობენ – როგორ ხდება ასე, რომ „საქსტატის“ მონაცემებით უფრო ნაკლები ადამიანი ცხოვრობს, ვიდრე არჩევნებში იღებდნენ მონაწილეობას. რას იტყუებიან და რა უბინძურეს მანიპულაციასთან გვაქვს საქმე. მაგალითად, აღწერის მიზნით, ცაგერში მცხოვრებ ოჯახში მივიდა „საქსტატის“ წარმომადგენელი, დააფიქსირა, რომ ამ ოჯახში ცხოვრობს ორი ადამიანი, თუმცა ამ ოჯახში ჩაწერილია 10 ადამიანი. შემდეგ ჩავიდნენ დანარჩენი ოჯახის წევრები და მისცეს ხმა. შემდეგ გამოდის ნებისმიერი მდაბიო მანიპულატორი და ამბობს – როგორ კაცო, ორი ადამიანი ცხოვრობს და როგორ მისცა შვიდმა ხმაო. „საქსტატის“ მონაცემები შეესაბამება იქ მცხოვრები, ადგილზე მყოფი ადამიანების რაოდენობას. მასში არ შედის არც ემიგრანტი, არც სხვა ქალაქსა თუ სოფელში მცხოვრები ადამიანი და ამასთან დაკავშირებით მანიპულაცია არის უმძიმესი შეურაცხყოფა ქართული საზოგადოების“, – აღნიშნა მამუკა მდინარაძემ.

ვფიქრობ, საპროტესტო აქციები გაგრძელდება, – ამის შესახებ კოალიცია „ძლიერი საქართველოს“ ერთ-ერთმა ლიდერმა, სალომე სამადაშვილმა ოპოზიციის სამოქმედო გეგმასთან დაკავშირებით დასმული კითხვის საპასუხოდ განაცხადა.

როგორც მან განმარტა, საპროტესტო აქციები მანამდე გაგრძელდება, ვიდრე საქართველო „რუსული რეჟიმისგან არ გათავისუფლდება“.

„აქციები გაგრძელდება მანამ, სანამ საქართველოს არ გავათავისუფლებთ ამ რუსული რეჟიმისგან, მაგრამ ახლა ჩვენთვის მთავარი ამოცანა არის გამოძიება”, – განაცხადა სამადაშვილმა.

ამასთან, მან აღნიშნა, რომ ოპოზიციური პოლიტიკური პარტიები სამოქმედო გეგმასთან დაკავშირებით კონსულტაციებს აგრძელებენ.

„ყოველდღე ინტენსიური შეხვედრები გვაქვს იმიტომ, რომ პირველ რიგში, ჩვენ უნდა უზრუნველვყოთ გამოძიება. რეალურად, ივანიშვილმა საქართველოში არჩევნებს აზრი დაუკარგა. ეს სისტემა გამოძიებული თუ არ იქნება და არ შეიცვლება, არასდროს ამ ქვეყანაში არანაირ არჩევნებს აზრი არ ექნება. უბრალოდ, ნომინალურად ჩავატარებთ არჩევნებს. ის პერსპექტივა, რაც საქართველოს ემუქრება, არის ძალიან ცუდი იმიტომ, რომ თუ გასული 3-4 წლის მანძილზე 250 ათასმა ადამიანმა დატოვა ეს ქვეყანა, ეს პროცესი გაგრძელდება და საქართველო ქართველებისგან დაცარიელდება. ჩვენ ეს არ უნდა დავუშვათ! ამიტომ, ახლა ვმუშაობთ სწორედ იმაზე, რომ პირველ რიგში, გამჟღავნდეს დანაშაული, რომელიც ჩაიდინეს”, – განაცხადა სამადაშვილმა.

საქართველოს პრეზიდენტი სალომე ზურაბიშვილი, 2024 წლის საპარლამენტო არჩევნების შესაძლო გაყალბებასთან დაკავშირებით გაკეთებულ განცხადებასთან დაკავშირებით, პროკურატურაშია დაბარებულია.

ამის შესახებ მთავარი პროკურატურის მიერ გავრცელებულ განცხადებაშია ნათქვამი.

„საქართველოს პროკურატურამ ცენტრალური საარჩევნო კომისიის 2024 წლის 30 ოქტომბრის მომართვის საფუძველზე, გამოძიება დაიწყო საპარლამენტო არჩევნების სავარაუდო გაყალბების ფაქტზე, საქართველოს სისხლის სამართლის კოდექსის 164³-ე მუხლით გათვალისწინებული დანაშაულის ნიშნებით.

ცესკო-ს განცხადებისა და საჯარო სივრცეში მასმედიის მეშვეობით გავრცელებული ინფორმაციის თანახმად, საქართველოს პრეზიდენტი, სალომე ზურაბიშვილი უნდა ფლობდეს მტკიცებულებებს 2024 წლის საპარლამენტო არჩევნების შესაძლო გაყალბებასთან დაკავშირებით, რის გამოც, კანონით დადგენილი წესით, საქართველოს პრეზიდენტი, მიმდინარე წლის 31 ოქტომბერს, გამოკითხვის მიზნით დაბარებულია საგამოძიებო უწყებაში. საქართველოს პროკურატურა ჩაატარებს ყველა საჭირო საგამოძიებო და საპროცესო მოქმედებას, როგორც ცესკო-ს მომართვაში მითითებული, ამავდროულად, საქართველოს პრეზიდენტის, ცალკეული პოლიტიკური პარტიებისა და სადამკვირვებლო მისიების წარმომადგენლების მიერ გაჟღერებული ფაქტების შესწავლის მიზნით. მათ შორის, გამოძიების ფარგლებში გამოიკითხება ყველა ის პირი, რომელიც შესაძლებელია, ფლობდეს ინფორმაციას სავარაუდო, დანაშაულებრივ ფაქტთან დაკავშირებით.

აქვე, საზოგადოებას ვაცნობებთ, რომ წინასაარჩევნო პერიოდსა და არჩევნების დღეს გამოვლენილი ცალკეული სამართალდარღვევების შესწავლის მიზნით, სამართალდამცავი უწყებები აქტიურად აწარმოებენ გამოძიებას არაერთ სისხლის სამართლის საქმეზე. გამოძიების შედეგების შესახებ პროკურატურა პერიოდულად მოახდენს საზოგადოების ინფორმირებას“, – ნათქვამია განცხადებაში.

საზოგადოება შეცდომაში შეჰყავთ და ეუბნებიან, რომ თბილისი წააგო „ქართულმა ოცნებამ“. წარმოუდგენელია როგორ ტყუილებს კადრულობთ. სხვა პარტიებთან შედარებით „ქართულმა ოცნებამ“ დიდი უპირატესობით გაიმარჯვა, – ამის შესახებ დედაქალაქის მერმა, კახა კალაძემ თბილისის მთავრობის სხდომაზე განაცხადა.

მისივე თქმით, 270 128 თბილისელმა გამოუცხადა ნდობა „ქართულ ოცნებას“.

„როგორც თბილისის მერმა, მინდა განსაკუთრებული მადლობა გადაგიხადოთ თქვენ, თბილისელებს იმ ნდობისა და მხარდაჭერისთვის, რაც საპარლამენტო არჩევნებზე დაფიქსირდა. თბილისის ყველა რაიონში, აბსოლუტურად ყველა უბანში „ქართულმა ოცნებამ“ სხვა პარტიებთან შედარებით, დიდი უპირატესობით გაიმარჯვა.

აქაც საზოგადოება შეცდომაში შეჰყავთ და ეუბნებიან, რომ თბილისი წააგო „ქართულმა ოცნებამ“. წარმოუდგენელია როგორ ტყუილებს კადრულობთ და როგორი მცდელობა გაქვთ, რომ საზოგადოება მოატყუოთ. თუმცა გეუბნებით, რომ სხვა პარტიებთან შედარებით „ქართულმა ოცნებამ“ დიდი უპირატესობით გაიმარჯვა. 270 128 თბილისელმა გამოუცხადა ნდობა „ქართულ ოცნებას“. კიდევ ერთხელ გიხდით მადლობას და გპირდებით, რომ გავუფრთხილდებით თქვენს ნდობას, კიდევ უფრო მეტი ენერგიით, ძალისხმევით გავაგრძელებთ ამ ქალაქისა და ქვეყნის შენებას. ვერავინ და ვერაფერი, ვერანაირი ბოროტი ძალა და რადიკალიზმი ვერ შეაჩერებს ამ ქვეყნის განვითარებას, ამ ქალაქის განვითარებას, წინსვლას და აღმშენებლობას“,- განაცხადა კახა კალაძემ.

როგორ უნდა განდოთ თქვენ ხალხმა ქვეყანა, ზამთარში შეიძლება კაცმა თოვლის გუნდა არ განდოთ, რა ქვეყნის მართვაზეა საუბარი?! – ამის შესახებ დედაქალაქის მერმა, კახა კალაძემ თბილისის მთავრობის სხდომაზე განაცხადა.

მისივე თქმით, ოპოზიციამ მარცხი საკუთარი თავის გარდა, ყველას და ყველაფერს დააბრალა.

„თქვენ ყველასა და ყველაფერს დააბრალეთ არჩევნებში მარცხი, წაგება საკუთარი თავების გარდა. არავინ გამოსულა და არ გითქვამთ, რომ თქვენ პრობლემები გქონდათ და ამის გამო განიცადეთ მარცხი. ყველას და ყველაფერს დააბრალეთ… ამომრჩეველს აგინებთ… თქვენს საკუთარ ამომრჩეველს აყენებთ შეურაცხყოფას. GEN –Z-იმ წაგვაგებინა არჩევნებიო და ახალგაზრდებს აგინებდით. წარმოუდგენელია ეს თქვენი დამოკიდებულება და იმიტომ ხართ იმ მდგომარეობაში, სადაც დღეს იმყოფებით. საქართველოში ბოროტება, სიყალბე, სიბინძურე, რასაც თქვენ კადრულობთ, ყოველთვის განწირული იქნება მარცხისთვის და მას არანაირი მომავალი არ აქვს. ჩვენი მშვიდობისმოყვარე, თავისუფალი, სამართლიანი ხალხი არ დაუშვებს იმას, რომ ქვეყნის მართვა მიანდოს ყველანაირ სიბინძურეზე წამსვლელ ადამიანებს.

რა ქვეყნის მართვაზეა… როგორ უნდა განდოთ თქვენ ხალხმა ქვეყანა, ზამთარში შეიძლება კაცმა თოვლის გუნდა არ განდოთ, რა ქვეყნის მართვაზეა საუბარი?!

ეს ყველაფერი გამოწვეულია იმ ბოროტებით და იმ სიბინძურით, რასაც თქვენ კადრულობდით მთელი ამ კამპანიის და თქვენი მოღვაწეობის პერიოდში – ხელისუფლებაში ყოფნის დროსაც და ოპოზიციაში ყოფნის დროსაც“, – განაცხადა კახა კალაძემ.

დღეს ევროკომისია გაფართოების შესახებ ანგარიშს გამოაქვეყნებს, – ამის შესახებ ინფორმაციას ევროკომისიის პრესსპიკერი, სტეფან დე კეერსმაიკერი ავრცელებს.

ევროკომისიის პრესსპიკერის ცნობით, გაფართოების ანგარიში გაფართოების პროცესში ჩართული 10 ქვეყნის, მათ შორის საქართველოს შესახებ შეფასებებს მოიცავს.

ანგარიშს ოფიციალურად ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში, ჯოზეფ ბორელი წარადგენს.

საქართველოს პრემიერ-მინისტრმა ირაკლი კობახიძემ თურქეთის პრეზიდენტ რეჯეფ თაიფ ერდოღანს თურქეთის რესპუბლიკის გამოცხადების 101-ე წლისთავი მიულოცა.

როგორც მთავრობის მეთაური მისალოც წერილში აღნიშნავს, ბოლო წლებში საქართველოსა და თურქეთს შორის ორმხრივი ურთიერთობები დინამიურად ვითარდება, რაც ხელს უწყობს რეგიონში ახალი შესაძლებლობების შექმნას და სტრატეგიული მნიშვნელობის პროექტების რეალიზებას.

`ბატონო პრეზიდენტო, გულითადად გილოცავთ თურქეთის რესპუბლიკის გამოცხადების 101-ე წლისთავს და გისურვებთ თქვენ და მოძმე თურქ ხალხს მშვიდობას და კეთილდღეობას. მსურს, კმაყოფილებით აღვნიშნო, რომ ბოლო წლებში საქართველოსა და თურქეთს შორის ორმხრივი ურთიერთობები დინამიურად ვითარდება, რაც ხელს უწყობს რეგიონში ახალი შესაძლებლობების შექმნას და სტრატეგიული მნიშვნელობის პროექტების რეალიზებას. მადლიერი ვარ თურქეთის ურყევი მხარდაჭერისთვის საქართველოს ტერიტორიული მთლიანობისა და სუვერენიტეტის, ასევე, ევროატლანტიკურ სივრცეში გაწევრიანების მისწრაფების მიმართ. ვსარგებლობ შემთხვევით და ვადასტურებ საქართველოს მთავრობის მხრიდან მზაობას საქართველოსა და თურქეთს შორის არსებული სამაგალითო სტრატეგიული პარტნიორობის უფრო მეტად გაღრმავებასთან დაკავშირებით. ვფიქრობ, ჩვენი ქვეყნების ძალისხმევა მნიშვნელოვანია რეგიონში მშვიდობისა და სტაბილურობის უზრუნველსაყოფად. ჩვენი ორმხრივი და მრავალმხრივი ინიციატივები ქმნიან მნიშვნელოვან საფუძველს რეგიონის მდგრადი ეკონომიკური ზრდისა და სტაბილურობისთვის”, – აღნიშნულია პრემიერ-მინისტრის მისალოც წერილში.

ინფორმაციას საქართველოს მთავრობა ავრცელებს.

სოციალურ ქსელებში კვლავ გრძელდება ვირუსულად იმგვარი ვიდეოების გავრცელება, რომელმაც შესაძლოა, გამოიწვიოს არასწორი აღქმები, – ამის შესახებ ცესკო-ს პრესსპიკერმა, ნათია იოსელიანმა ბრიფინგზე განაცხადა.

ცესკო მოუწოდებს დაინტერესებულ პირებს, გადამოწმების გარეშე არ გაავრცელონ ინფორმაცია მთვლელი აპარატებიდან მიღებულ ამონაწერებსა თუ შემაჯამებელ ოქმებთან დაკავშირებით.

„ჩვენ დღეს საზოგადოებას უკვე გავაცანით ინფორმაცია ხელვაჩაურის მე-16 უბნის აპარატის წინასწარი შედეგების ამონაწერის კონსოლიდაციასთან დაკავშირებით. მსგავსი შემთხვევა 2 263 ტექნოლოგიური საარჩევნო უბნიდან მხოლოდ შვიდ შემთხვევაშია. შეგახსენებთ, რომ ხსენებულ შვიდ შემთხვევაში, საუბნო საარჩევნო კომისიის მიერ ორი ან სამი მთვლელი აპარატის ნაცვლად, განხორციელდა ერთით ნაკლები მთვლელი აპარატის ინფორმაციის კონსოლიდაცია (დაჯამება) და გამოიგზავნა ცესკო-ს სერვერზე, რაც დაუყოვნებლივ აიტვირთა. ამასთანავე, ყველა ტექნოლოგიურ საარჩევნო უბანზე განხორციელდა ხელით გადათვლა და შესაბამისი ოქმების განთავსება, რაც წარმოადგენს იურიდიული ძალის მქონე დოკუმენტს და ნებისმიერ დაინტერესებულ პირს აქვს შესაძლებლობა მისი გაცნობის. საკითხის იდენტიფიცირებისთანავე, შესაბამისმა კომისიებმა მყისიერად განახორციელეს ყველა მთვლელი აპარატის კონსოლიდაცია და პროცედურების დაცვით ამონაწერის გადმოგზავნა ცესკო-ში. გვინდა, ხაზგასმით აღვნიშნოთ, რომ, უმაღლესი გამჭვირვალობის სტანდარტების დაცვით, ცესკო არ ახორციელებს ვებგვერდიდან მის წაშლას და ჩანაცვლებას. ყველა ინფორმაცია რჩება ხელმისაწვდომი სრულყოფილი ინფორმაციის მისაღებად.

რაც შეეხება ანგარიშების სრულად კონსოლიდირებული საბოლოო ვერსიების დამატებით ატვირთვას, ხაზგასასმელია, რომ, ჩვენი პარტნიორი ვენდორი ორგანიზაციის „სმარტმატიკის“ შესაბამისი დადასტურების გარეშე, მხოლოდ ცესკო ვერავითარ მონაცემს ან ინფორმაციას ვერ შეცვლის. შესაბამისად, წინასწარი შედეგების ანგარიშებთან და ოქმებთან დაკავშირებით ყველა პროცედურა განხორციელება შესაძლებელია მხოლოდ ორმაგი დადასტურებით, რის გამოც სრული კონსოლიდირებული ვერსიების განთავსდა ვენდორის მხრიდან შესაბამისი დადასტურების შემდგომ. ამასთანავე, შეგახსენებთ, რომ დღეს 73 საარჩევნო ოლქში განხორციელდა წილისყრით გამოვლენილი 367 უბნის შედეგების გადათვლა. ასევე, ხვალ განხორციელდება კანონით გათვალისწინებული სხვა საარჩევნო უბნების გადათვლები. ამის შედეგად, ცხადია, შესაძლოა, მცირედით შეიცვალოს მონაცემები, რაც მიიღება საოლქო საარჩევნო კომისიების განკარგულებით, აიტვირთება ზემოთ ნახსენები პროცედურის შესაბამისად და თავისთავად ინფორმაციაც განახლდება ცვლილებების შესაბამისად, ასეთის არსებობის შემთხვევაში. მივმართავთ დაინტერესებულ პირებს, მთვლელი აპარატებიდან მიღებულ ამონაწერებთან თუ შემაჯამებელ ოქმებთან დაკავშირებით ინფორმაციას გადამოწმების გარეშე ნუ გაავრცელებენ, კითხვების შემთხვევაში მათ შეუძლიათ, დაგვიკავშირდნენ და მიიღონ კვალიფიციური და კანონისმიერი განმარტებები“, – განაცხადა ნათია იოსელიანმა.