„მაკკეინის ინსტიტუტის“ ანგარიში არის ფაქტობრივად გაიდლაინი ოპოზიციისთვის, არის გაწერილი ყველა შესაძლო სცენარი როგორ უნდა იმოქმედონ და ძალიან კარგი დირექტივაა მათთვის, როგორ უნდა განახორციელონ სახელმწიფო გადატრიალების სცენარები, – განაცხადა პარლამენტის თავმჯდომარის მოადგილემ ნინო წილოსანმა.

„ქართველი ხალხი არის თვითკმარი და ძალიან კარგად ათვიცნობიერებს საკუთარი ქვეყნის საჭიროებებსაც და მიღწევებსაც. ამიტომ ნებისმიერი სხვა ადამიანს, სხვა ქვეყნის პოლიტიკოსს თუ გავლენიან პირს შეუძლია ეს გავლენები საკუთარი ქვეყნის პოლიტიკისთვის შემოინახოს.

მოვუწოდებ თუნდაც ოდიოზურ დასავლელ პოლიტიკოსებს, გავლენიან ადამიანებს, რომ ნუ გაბედავენ და ნუ დაიწყებენ თავიანთ გამოსვლებს ქართველი ხალხის სახელით საუბრით. ქართველი ხალხის სახელით ვისაც შეუძლია საუბარი, ეს არის არჩეული, ლეგიტიმური ხელისუფლება. ჩვენ ქართველი ხალხის სახელით ვისაუბრებთ კიდეც და განვახორციელებთ იმ პოლიტიკას, რომელიც დავპირდით, ვიდგებით ამ ხალხის სამსახურში“, – აღნიშნა ნინო წილოსანმა.

ევროკავშირის უმაღლესი წარმომადგენელი ჯოზეფ ბორელი საქართველოში არჩევნების შემდეგ განვითარებულ მოვლენებთან დაკავშირებით განცხადებას ავრცელებს.

როგორც ბორელის განცხადებაშია ნათქვამი, საქართველოს ცენტრალურმა საარჩევნო კომისიამ და შესაბამისმა ორგანოებმა უნდა გამოიძიონ დამვირვებლების მიერ აღრიცხული დარღვევები, ზეწოლა და ამომრჩევლების დაშინება, რაც გავლენას ახდენს პროცესისადმი საზოგადოების ნდობაზე.

„საქართველოში 26 ოქტომბრის საპარლამენტო არჩევნების შემდეგ განვითარებული მოვლენები ძალიან შემაშფოთებელია, საერთაშორისო დამკვირვებლებმა განაცხადეს დარღვევების შესახებ, როგორც საარჩევნო კამპანიის დროს, ასევე არჩევნების დღეს. მათ ასევე არ გამოაცხადეს არჩევნები, როგორც თავისუფალი და სამართლიანი. ვითხოვ გამჭვირვალე გამოძიებას. საქართველოს ცენტრალურმა საარჩევნო კომისიამ და შესაბამისმა ორგანოებმა უნდა გამოიძიონ დამკვირვებლების მიერ აღრიცხული დარღვევები, ზეწოლა და ამომრჩევლების დაშინება, რაც გავლენას ახდენს პროცესისადმი საზოგადოების ნდობაზე. ეს დარღვევები უნდა აღმოიფხვრას სწრაფად, გამჭვირვალედ და დამოუკიდებლად“, – აცხადებს, ბორელი.

ჯოზეფ ბორელის განცხადებით, საქართველო არის ევროკავშირის კანდიდატი ქვეყანა და მან უნდა აჩვენოს თავისი ერთგულება ევროპული ღირებულებებისადმი, დაწყებული საარჩევნო პროცესის სრული გამჭვირვალობით.

„არჩევნების სამართლიანობა და კანონის უზენაესობის დაცვა არის დემოკრატიის ქვაკუთხედი და ევროკავშირში გაწევრიანების გზის განუყოფელი ნაწილი და საფუძველი. მე ვთხოვე პოლიტიკისა და უსაფრთხოების კომიტეტი შეიკრიბოს დღეს საქართველოში არსებული რთულ ვითარების განსახილველად. მე ასევე შევიტანე ეს საკითხი ნოემბრის საგარეო საქმეთა საბჭოს დღის წესრიგში. ქართველი ხალხი თვეების განმავლობაში აჩვენებს დემოკრატიული ღირებულებებისადმი და მათი ქვეყნის ევროკავშირის გზაზე სვლისადმი ერთგულებას. ისინი იმსახურებენ სიცხადეს საარჩევნო პროცესთან დაკავშირებით, რათა დარწმუნდნენ მომავალი მთავრობის ლეგიტიმურობაში. მნიშვნელოვანია, რომ საპროტესტო აქციები და მათზე მთავრობის რეაქცია მშვიდობიანი დარჩეს. ქვეყანაში დემოკრატიული უკუსვლა უნდა შეიცვალოს და უზრუნველყოფილი იყოს ხელსაყრელი გარემო მედიისთვის, სამოქალაქო საზოგადოებისა და ოპოზიციისთვის, რომლებიც ქმნიან პლურალისტურ, დემოკრატიულ საზოგადოებას“, ნათქვამია ბორელის განცხადებაში“, – აცხადებს ბორელი.

„გახარია საქართველოსთვის“ ლიდერი გიორგი გახარია აცხადებს, რომ ქვეყნის მოქალაქეებმა უნდა მოითხოვონ, რომ ამომრჩეველთა სრული ბაზა ნეიტრალურ, ობიექტურ პლატფორმას გადაეცეს.

როგორც გიორგი გახარია განმარტავს, საქართველოს იმ მოქალაქეებს, რომლებმაც 26 ოქტომბრის არჩევნებში მიიღეს მონაწილეობა, აღნიშნულ ბაზაში უნდა შეეძლოთ, გადაამოწმონ შემდეგი სახის ინფორმაცია: მონაწილეობა მიიღო თუ არა არჩევნებში; რომელ უბანზე მიიღო მონაწილეობა; რომელ საათზე მიიღო მონაწილეობა.

გიორგი გახარიას თქმით, მონაცემის გადამოწმება შესაძლებელს გახდის, „არჩევნების შესაძლო, გაყალბების დადგენას“.

პარლამენტის ვიცე-სპიკერის, ნინო წილოსანის შეფასებით, ოპოზიციის მხრიდან მანდატებზე უარის თქმა თავიანთი ამომრჩევლის ღალატი იქნება.

წილოსანის განმარტებით, „ქართული ოცნებისთვის“ კი ოპოზიციის მხრიდან მანდატებზე უარი იქნება იმ დაპირების შესრულება, რომელიც კოლექტიური „ნაცმოძრაობის“ პოლიტიკიდან ჩამოშორებას გულისხმობს.

ნინო წილოსანი ამბობს, რომ ახლა ოპოზიცია ცდილობს მუხტის შენარჩუნებას, რომელიც სახელმწიფო გადატრიალების ორგანიზებისთვის სჭირდებათ, თუმცა ოპოზიციის ამომრჩევლის დიდი ნაწილიც ფიქრობს, რომ არჩევნები სამართლიანად წააგეს.

„ოპოზიცია უშანსოა, თავადაც ვერ აკეთებენ ანალიზს, რატომ მივიდნენ ამ შედეგამდე, რატომ იკლებს მათი ამომრჩევლის რაოდენობა და რატომ იზრდება „ქართული ოცნების“. მანდატებზე უარის თქმა ამომრჩევლის ღალატი იქნება. ჩვენთვის კი იმ დაპირების შესრულება გამოდის, რომელიც კოლექტიური „ნაცმოძრაობის“ პოლიტიკიდან ჩამოშორებას და გასამართლებას გულისხმობს. ვინც იტყვის უარს მანდატებზე, რომელიც ამომრჩეველმა გადასცა, ისინი მიწის პირისგან თავადვე აღიგვებიან. ახლა ოპოზიცია ცდილობს მუხტის შენარჩუნებას, რომელიც მათ სახელმწიფო გადატრიალების ორგანიზებისთვის სჭირდებათ. ჩვენ ვიხილეთ გუშინდელი აქცია, რომელიც მრავალრიცხოვანი არ იყო – უკვე საკუთარი ამომრჩევლის მობილიზებასაც ვეღარ ახდენენ გამომდინარე იქედან, რომ ამ ამომრჩევლის დიდი ნაწილიც მიიჩნევს, რომ არჩევნები სამართლიანად წააგეს. პოლიტიკაში თუ სპორტულ შეჯიბრში წაგებულმა წაგება უნდა აღიაროს. დეზინფორმაციაა, რომ მანდატებზე უარის თქმით და სიების ჩახსნით პარლამენტს უფლებამოსილება არ ექნება, თითქოს სალომე ზურაბიშვილს, სიმბოლურ პრეზიდენტს აქვს რაიმე უფლება და შეიძლება პარლამენტის პირველი სხდომა ვერ ჩაინიშნოს. ეს დეზინფორმაცია, ერთი მხრივ, ჟურნალისტებისა და ვაიპოლიტიკოსების არაკომპეტენტურობის ბრალია, ხოლო მეორე მხრივ, იმ მავნებელი პოლიტიკოსების დამსახურებაც არის, ვინც ძალიან კარგად იციან, რომ ამ ყველაფრისგან ხეირს ვერ ნახავენ, მაგრამ ამას მაინც არ ამბობენ“, – განაცხადა ნინო წილოსანმა.

გვინდა, საზოგადოებას მივაწოდოთ ინფორმაცია იმ დეზინფორმაციის შესახებ, რომელიც ინტენსიურად ვრცელდება მედიასა და სოციალურ ქსელებში, მანიპულაციური და დაუსაბუთებელი ინფორმაციის გავრცელება კამპანიური ხასიათისაა და ამომრჩევლის შეცდომაში შეყვანას ისახავს მიზნად, – ამის შესახებ ცესკო-ს პრესსპიკერმა, ნათია იოსელიანმა განაცხადა.

როგორც ცესკო-ში აცხადებენ, საარჩევნო ადმინისტრაციისთვის მნიშვნელოვანია, რომ პროცესის შესახებ საზოგადოებას ჰქონდეს ზუსტი ინფორმაცია.

„სწორედ ამიტომ გვინდა, გაგიზიაროთ სიმართლე რამდენიმე ყველაზე გავრცელებულ მანიპულაციურ ინფორმაციასთან დაკავშირებით. მას შემდეგ, რაც დადასტურდა, რომ სტატისტიკის ეროვნული სამსახურისა და ამომრჩეველთა სიების მონაცემების ერთმანეთთან შედარებით ხდებოდა კამპანიური ხასიათის მანიპულაცია, ინტენსიურად დაიწყო ახალი დეზინფორმაციების გავრცელება. მანიპულაციური კამპანიის გაგრძელებაა ზოგიერთი პოლიტიკურად დაინტერესებული პირის მხრიდან გავრცელებული ინფორმაცია, ხმის დათვლის მანქანებიდან სხვადასხვა დროს ამობეჭდილი ამონაწერების შესახებ, რომელიც განსხვავებულ მონაცემებს შეიცავს. სინამდვილეში, ხელვაჩაურის მე-16 უბანზე იყო განთავსებული სამი ხმის მთვლელი აპარატი, პირველ ეტაპზე ამობეჭდა მხოლოდ ორი აპარატის შედეგის ამსახველი ქვითარი, შემდეგ კი დაიბეჭდა სამივე ხმის მთვლელი აპარატის ანგარიში. სამივე აპარატის კონსოლიდირებული ქვითრის მონაცემები ზუსტად ემთხვევა ბიულეტენების ხელით გადათვლის შედეგად შედგენილი შემაჯამებელი ოქმის მონაცემებს და ორივეგან 1 404 ბიულეტენია დაფიქსირებული. ფაქტს ადასტურებენ საუბნო საარჩევნო კომისიის თანამშრომლები.

კიდევ ერთი მანიპულაცია უკავშირდება საგარეჯოს ერთ-ერთ უბანზე გაუქმებული პირადობით ხმის მიცემის საკითხს. იქმნება აღქმა, რომ მსგავს ფაქტებს ჰქონდა მასობრივი ხასიათი, რაც არ შეესაბამება სინამდვილეს. კონკრეტულად აღნიშნულ შემთხვევასთან დაკავშირებით დაწერილია საჩივარიც, რომელიც შესაბამისი პროცედურის მიხედვით იქნება განხილული. თუმცა ამ საკითხთან დაკავშირებით მნიშვნელოვანია აღინიშნოს, რომ პირს, რომელმაც ხმა მისცა გაუქმებული პირადობით, ჰქონდა მოქმედი პასპორტი და სწორედ ამიტომ იყო ის შეყვანილი ამომრჩეველთა ერთიან სიაში. მანიპულაციური ინფორმაციები ვრცელდება საარჩევნო ბიულეტენებთან დაკავშირებითაც. მაგალითისთვის, ერთ-ერთი ადგილობრივი სადამკვირვებლო ორგანიზაცია ავრცელებს ბიულეტენის ფოტოს, სადაც ერთ-ერთი სუბიექტი არის გადახაზული და არცერთი წრე არაა გაფერადებული. მიუხედავად იმისა, რომ ასეთი ბიულეტენები ერთმნიშვნელოვნად ითვლება ბათილად, ორგანიზაცია ირწმუნება, რომ ბიულეტენი ჩაითვალა ნამდვილად, რაც არ შეესაბამება სინამდვილეს. აღნიშნული მარტივად დასტურდება აპარატების მიერ ამობეჭდილი ჩეკის და შემაჯამებელი ოქმის შედარებით.

დღეს დილიდან სხვადასხვა პოლიტიკური სუბიექტების წარმომადგენლები მოუწოდებენ საარჩევნო ადმინისტრაციას, შექმნას არჩევნებში მონაწილე ამომრჩეველთა ბაზა იმისთვის, რომ ამომრჩეველს მიეცეს შესაძლებლობა, გადაამოწმოს საკუთარი თავი არჩევნებზე მომსვლელთა ამომრჩეველთა სიაში. პოლიტიკოსებისთვის კარგად არის ცნობილი, რომ აღნიშნული ქმედება კანონით არის შეზღუდული და ასეთი ბაზის შექმნა შეიცავს პერსონალური მონაცემების გამჟღავნების რისკებს, რაც ეწინააღმდეგება არჩევნების ერთ-ერთ აღიარებულ ფუნდამენტურ პრინციპს და კარგ საერთაშორისო პრაქტიკას. აქვე, მნიშვნელოვანია აღინიშნოს, რომ ამ საკითხზე არ დაწერილა საჩივარი. აღნიშნულიდან გამომდინარე, ნათელია, რომ პარტიების წარმომადგენლები, პოლიტიკური დღის წესრიგიდან გამომდინარე, არარეალურ მოთხოვნებს აყენებენ იმისთვის, რომ შექმნან აღქმა, თითქოს საარჩევნო ადმინისტრაცია ინფორმაციას მალავს.

დაბოლოს, გვინდა, გამოვეხმაუროთ საქართველოს პრეზიდენტის მიერ გაკეთებულ დისკრედიტაციულ განცხადებას. სალომე ზურაბიშვილი უაპელაციოდ აცხადებს, რომ საარჩევნო ტექნოლოგიები იყო გამოყენებული არჩევნების გასაყალბებლად. მივმართავთ ყველა ჩართულ მხარეს, ყურადღებით გაეცნონ ამერიკული კომპანია „PRO V&V“-ს დასკვნას ელექტრონულ ტექნოლოგიებთან დაკავშირებით, მასში პრობლემების აღმოჩენის შემთხვევაში კი მიმართონ სამართლებრივ ზომებს. ჩვენ გავაგრძელებთ საზოგადოებისთვის სწორი ინფორმაციის მიწოდებას და რეაგირების გარეშე არ დავტოვებთ არც ერთ დეზინფორმაციას“, – აცხადებენ ცესკო-ში.

ყველა დარღვევას სათანადო შეფასება აქვს მიცემული, ყველა საჩივარი განხილული იქნება და ამ განხილვებზე საერთაშორისო ზედამხედველობა იქნება, თუმცა ცესკო და სხვა სტრუქტურები საკმაოდ კომპეტენტურია, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკიმ კომენტარი გააკეთა აშშ-ის სახელმწიფო დეპარტამენტის სპიკერის, მეთიუ მილერის განცხადებაზე, რომელმაც თქვა: „საქართველოში არჩევნების შედეგებზე საბოლოო შეფასება ჯერ არ გვაქვს, გვსურს, ვიხილოთ გამოძიება, კონსულტაციებს გავდივართ ევროპელ პარტნიორებთან, რომელმა ორგანომ შეიძლება გამოიძიოს“.

„ჩვენ დამოუკიდებელი სახელმწიფო ვართ და ყველანაირი გამოძიების ჩატარების დამოუკიდებელი რესურსი გაგვაჩნია. ყველა დარღვევას სათანადო შეფასება აქვს მიცემული, ყველა საჩივარი განხილული იქნება და ამ განხილვებზე საერთაშორისო ზედამხედველობა იქნება, თუმცა ცესკო და სხვა სტრუქტურები საკმაოდ კომპეტენტურია. არ არსებობს არავითარი წინაპირობა, რომ ცესკო-ს ან სასამართლოს ობიექტურობაში რაიმე ეჭვი შევიტანოთ. ვნახავთ შედეგებს, რომლის საფუძველზეც ყველა მიხვდება, რომ დარღვევის ის ჩამონათვალი, რომელიც დღეს კონკრეტულ სუბიექტებს აწუხებთ, გამოძიებული იქნება და ეს მაღალკვალიფიციურად შეფასდება“, – განაცხადა გია ვოლსკიმ.

ლოგიკური მოთხოვნაა, რომ არჩევნები ვიღაც მესამე მხარემ ჩაატაროს, თუ ეს არჩევნები შედგა. ეს რაც შეხება თვითონ განაცხადის ლოგიკურობას, აი, რამდენად რეალისტურია, ეს სხვა საკითხია, – ასე გამოეხმაურა პოლიტოლოგი გია ხუხაშვილი ოპოზიციური პარტიების მოთხოვნას, რომ საქართველოში ხელახალი არჩევნები ჩატარდეს, რომლის გამართვაზეც პასუხისმგებელი საერთაშორისო საარჩევნო ადმინისტრაცია იქნება.

ხუხაშვილის განმარტებით, თუ საერთაშორისო საზოგადოებამ არჩევნების შედეგები გააკრიტიკა, მაგრამ მისი შედეგები ცნო, ამ შემთხვევაში, ოპოზიციური ძალების ეს პოლიტიკური განაცხადი მხოლოდ პოლიტიკურ განაცხადად დარჩება.

„ეს პოლიტიკური განაცხადია, რადგან საზოგადოებაში ასეთი განცდაა – არამხოლოდ პოლიტიკურ პარტიებში, არამედ, მთლიანად სამოქალაქო საზოგადოებაში, ამომრჩევლის ძალიან დიდ ნაწილში, რომ არჩევნებზე ადგილი ჰქონდა სისტემურ დარღვევებს. ეს იმას ნიშნავს, რომ საფუძვლიანი ეჭვი არსებობს, ყველა უბანზე, საარჩევნო ადმინისტრაციების მონაწილეობით დანაშაულის ჩადენა ხდებოდა. საარჩევნო დარღვევა სისხლის სამართლის დანაშაულია. თუ დოკუმენტურად დადასტურდა, რომ დარღვევები სისტემურ ხასიათს ატარებდა, მოცემულობა, რომ იგივე საარჩევნო ადმინისტრაციამ ხელახალი არჩევნები ჩაატაროს, აბსურდი იქნება, რადგან სისხლის სამართლის დანაშაულის ჩადენაში ბრალდებული ძალიან ბევრი ადამიანი აღმოჩნდება. ლოგიკური მოთხოვნაა, რომ არჩევნები ვიღაც, მესამე მხარემ ჩაატაროს, თუ ეს არჩევნები შედგა. ეს რაც შეხება თვითონ განაცხადის ლოგიკურობას, აი, რამდენად რეალისტურია, ეს სხვა საკითხია. ახლა პოლიტიკური პროცესი მიდის, სადაც აქტიური ფაზა არ დასრულებულა, ჯერ საბოლოო მოსაზრებები არ გამოუთქვამს, დასკვნები არ გაუკეთებია დასავლეთს – მხარეს, რომელმაც ამ არჩევნებს ლეგიტიმაცია უნდა მიანიჭოს ან არჩევნები უნდა ცნოს ან არ უნდა ცნოს. თუ საერთაშორისო საზოგადოებამ არჩევნების შედეგები გააკრიტიკა, მაგრამ მისი შედეგები ცნო, ამ შემთხვევაში, ეს პოლიტიკური განაცხადი მხოლოდ პოლიტიკურ განაცხადად დარჩება. თუ საერთაშორისო საზოგადოებამ არჩევნების შედეგები არ ცნო, დაადასტურა, რომ არჩევნებზე დარღვევები სისტემური იყო, რამაც მნიშვნელოვნად შეცვალა არჩევნების შედეგები, ამ შემთხვევაში, ამ პოლიტიკურ განაცხადს გარკვეული პერსპექტივა აქვს, რა ფორმით, ეს სხვა საკითხია. საერთაშორისო ადმინისტრაცია ჩაატარებს, თუ სხვა ტექნიკურ მექანიზმზე შეთანხმდებიან, ეს სხვა საკითხია. თუ ხელისუფლება მას შემდეგ, რაც ეს არჩევნები არ იქნება ცნობილი, მაინც შეეცდება ფაქტობრივად ძალაუფლების უზურპაციას, რაც იმას ნიშნავს, რომ კრიზისი ახალ ეტაპზე გადავა, როდესაც ხალხი, როგორც ძალაუფლების წყარო, შეეცდება სახელმწიფო გადატრიალება აღკვეთოს, რომელსაც ამ შემთხვევაში ჩვენს ქვეყანაში ხელისუფლება აწყობს, რადგან კონსტიტუციის მიღმა გადის. რთული პოლიტიკური პროცესია, წინასწარ რამის თქმა არ შემიძლია, თუ როგორ განვითარდება მოვლენები, ძალიან ბევრი მოთამაშე, ძალიან ბევრი პარამეტრია ამ ყველაფერში“, – განაცხადა ხუხაშვილმა.

ის, ასევე, გამოეხმაურა აშშ-ის სახელმწიფო დეპარტამენტის პრესსპიკერის, მეთიუ მილერის განცხადებას, რომლის მიხედვითაც, საქართველოში ჩატარებულ არჩევნებთან დაკავშირებით მათ გამოძიების ჩატარება სურთ და ევროპელ პარტნიორებთან კონსულტაციებს აწარმოებენ, თუ რომელი ორგანო გააკეთებს აღნიშნულს. ხუხაშვილის თქმით, თუკი, დასავლეთმა მოვლენების ასეთი განვითარება მოითხოვა და ხელისუფლება პოლიტიკურ ნებას არ გამოთქვამს, ქვეყანა რუსეთის იმპერიაში დაბრუნდება.

„ეს ძალიან მნიშვნელოვანი ელემენტია, რადგან დღეს, როგორც ჩანს, დარღვევების მნიშვნელოვანი ნაწილი ახალი ტექნოლოგიის სპეციფიკურ სისუსტეებს უკავშირდებოდა. ეს არ იყო ქსელური სისტემა, ავტონომიური სისტემები იყო, ეჭვი არ მეპარება, რომ მანქანა საკუთრივ სწორად ითვლიდა, მაგრამ სხვა საკითხია, რას ითვლიდა. როგორც სადამკვირვებლო მისიები ამბობენ, ძალიან ბევრი ვიდეომასალა არსებობს, ერთ-ერთმა ორგანიზაციამ თქვა, 400-ზე მეტი მტკიცებულება გვაქვსო, ეს უკვე სისტემურ დანაშაულზე მეტყველებს. როცა ასეთი საფუძვლიანი ეჭვი ჩნდება, გამოძიება უნდა ჩატარდეს. აპარატები უნდა გაიხსნას, სიები უნდა ამოვიდეს, რა არის იქ დაფიქსირებული, ხმები ვინ მისცა, რაღაც ალგორითმებით შეიძლება გადამოწმება, ეს ადამიანები არჩევნებზე რეალურად იყვნენ თუ – არა. შემდეგ უნდა შეფასდეს მასშტაბი, თუ გამოჩნდა, რომ ამას მასობრივი ხასიათი ჰქონდა, ბუნებრივია, არჩევნების შედეგები უნდა გაუქმდეს და ხელახალი არჩევნები დაინიშნოს. მე ასე მგონია, რომ ხელისუფლებას ამის პოლიტიკური ნება არ ექნება. თუ დასავლეთმა ასეთი განვითარება მოითხოვა და ხელისუფლება თუ პოლიტიკურ ნებას არ გამოთქვამს, უნდა ვიცოდეთ, რომ რუსეთის იმპერიაში ვბრუნდებით. ეს ნიშნავს, რომ პარტნიორობაზე ხელისუფლება საბოლოოდ უარს ამბობს. ილუზიას ხომ ქმნიდა, გადატვირთვას დავიწყებთო, თუ ამ მოთხოვნაზე უარყოფითი პასუხი იქნება ჩვენი ხელისუფლებისგან, ეს იმას ნიშნავს, რომ ჩვენი ქვეყანა ავტომატურად ხდება რუსეთის ლუკმა, მერე ყველა მოქალაქემ უნდა აიღოს საკუთარ თავზე პასუხისმგებლობა, უნდა რუსეთში ცხოვრება, თუ – არა.

თუ დასავლეთი მოგვცემს რეკომენდაციას, რომ საერთაშორისო აუდიტი ჩატარდეს და თუ ამაზე ხელისუფლებამ უარი თქვა, ეს დაახლოებით, იგივეა, მკვლელობაში ბრალდებული დუმილის უფლებით რომ სარგებლობს, რაც ფაქტობრივად ირიბი დადასტურებაა, რომ ის მკვლელია. მარტივი ლოგიკაა, თუ არაფერი არ აქვთ დასამალი, თუ ყველაფერი კარგად იყო, უარი რატომ უნდა თქვან“, – განაცხადა ხუხაშვილმა.

უნგრეთი ევროკავშირის საბჭოს თავმჯდომარე ქვეყანაა და კიდევ ერთხელ დადასტურდა ბატონი ორბანის მხრიდან, რომ უნგრეთი იქნება ერთ-ერთი ქვეყანა ევროკავშირის შიგნით, რომელიც დაეხმარება საქართველოს ევროინტეგრაციის მიმართულებით,-ამის შესახებ საქართველოს საგარეო საქმეთა მინისტრმა ილია დარჩიაშვილმა საქართველოში უნგრეთის პრემიერ-მინისტრ ვიქტორ ორბანის ვიზიტის შეფასებისას განაცხადა.

ილია დარჩიაშვილის თქმით,  უნგრეთი საქართველოს ახლო სტრატეგიული პარტნიორია, ორ ქვეყანას ძალიან დინამიური ორმხრივი ურთიერთობები აქვს და ბევრი მიმართულებით თანამშრომლობენ.

როგორც საგარეო საქმეთა მინისტრმა აღნიშნა, ვიქტორ ორბანს თან ახლდნენ საგარეო საქმეთა, ეკონომიკისა და ფინანსთა მინისტრები და შეხვედრებზე  სხვადასხვა მიმართულებით თანამშრომლობის პერსპექტივები განიხილეს.

„დასრულდა უნგრეთის პრემიერ-მინისტრის ვიზიტი საქართველოში. ვიზიტს ბევრი მიმართულებით განსაკუთრებული მნიშვნელობა ჰქონდა: ერთი, რომ უნგრეთი ჩვენი ძალიან ახლო სტრატეგიული პარტნიორია, ჩვენ გვაქვს ძალიან დინამიური ორმხრივი ურთიერთობები, ვთანამშრომლობთ ბევრი მიმართულებით და სწორედ პრემიერ-მინისტრის დელეგაციის შემადგენლობაც მეტყველებდა იმაზე. მას თან ახლდა საგარეო მინისტრი, ეკონომიკის და ფინანსთა მინისტრები, შესაბამისად, ჩვენ განვიხილეთ სხვადასხვა მიმართულებით ჩვენი თანამშრომლობის მომავალი პერსპექტივები. ჩვენი საერთო სურვილია, რომ ეს ორმხრივი ურთიერთობები კიდევ უფრო დინამიური, კიდევ უფრო შედეგიანი იყოს და ამ მიმართულებით ჩვენ, რა თქმა უნდა, გავაგრძელებთ ურთიერთობებს.

რაც შეეხება მეორე განზომილებას- უნგრეთი არის ევროკავშირის საბჭოს თავმჯდომარე ქვეყანა და ჩვენთვისაც ამას განსაკუთრებული მნიშვნელობა აქვს, სწორედ ამ კონტექსტში უნგრეთთან თანამშრომლობას. უნგრეთი ყოველთვის იყო ჩვენი ძალიან ძლიერი მხარდამჭერი, როდესაც საქმე ეხებოდა ჩვენს ევროპულ ინტეგრაციას, შესაბამისად, მომავალშიც უნგრეთის მხარდაჭერა ყოველთვის გვექნება, რადგან არაერთელ განვაცხადეთ, რომ ჩვენი მთავრობის და მომავალშიც ჩვენი მთავარი, ძლიერი ძალისხმევა გაწეული იქნება იმისთვის, რომ საქართველომ გააგრძელოს ევროპული ინტეგრაცია და ჩვენ ამ მიმართულებით ძალიან აქტიურად ვიმუშავებთ.  რა თქმა უნდა, კიდევ ერთხელ დადასტურდა ბატონი ორბანის მხრიდან, რომ უნგრეთი იქნება ერთ-ერთი ქვეყანა ევროკავშირის შიგნით, რომელიც დაეხმარება საქართველოს ამ მიმართულებით”,- განაცხადა საქართველოს საგარეო საქმეთა მინისტრმა.

ილია დარჩიაშვილმა უნგრელ კოლეგასთან შეხვედრის დეტალებზეც ისაუბრა და აღნიშნა, რომ პიტერ სიიარტო საქართველოს მისამართით ძლიერი მხარდამჭერი გზავნილებით ყოველთვის გამოირჩევა და შეხვედრაზე კიდევ ერთხელ მიიღო  სიიარტოსგან პირობა, რომ უნგრეთი კვლავ გააგრძელებს საქართველოს მხარდაჭერას.

„ჩვენ ინსტიტუციურ თანამშრომლობაზეც შევთანხმდით, გამოცდილების გაზიარებაზე და ვფიქრობ რომ ძალიან შედეგიანი თანამშრომლობა გვექნება. მე ასევე მქონდა საგარეო საქმეთა მინისტრთან ორმხრივი შეხვედრა. ჩვენ ხშირად გვაქვს შესაძლებლობა ვისაუბროთ ჩვენს თანამშრომლობაზე. საგარეო საქმეთა მინისტრი ყოველთვის გამოირჩევა ძალიან ძლიერი მხარდამჭერი გზავნილებით საქართველოს მისამართით და კიდევ ერთხელ მივიღე მისგან პირობა, რომ უნგრეთი კვლავ გააგრძელებს ჩვენს მხარდაჭერას, რადგან ჩვენთვის ევროპული ინტეგრაცია არის მნიშვნელოვანი და ამ მხრივ რაც უფრო მეტი მეგობარი გვეყოლება, მით უკეთესია, შესაბამისად, ვფიქრობ რომ ჩვენ ძალიან საინტერესო შედეგები გვექნება მომავალში”,- განაცხადა ილია დარჩიაშვილმა ჟურნალისტებთან საუბრისას.

ვნახეთ, სად დგანან საქართველოს პატრიოტები და ვის უჭერენ მხარს, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

პაპუაშვილს კითხვა დაუსვეს, რა კატეგორიის ამომრჩეველი ჰყავს „ქართულ ოცნებას“.

„უპირველეს ყოვლისა, ესენი არიან საქართველოს პატრიოტები. ეს გამოჩნდა 54-პროცენტიანი მხარდაჭერით, რომელიც „ქართულმა ოცნებამ“ მიიღო. იმ კამპანიის ფონზე, რომელიც ჩატარდა, ვნახეთ, სად დგანან საქართველოს პატრიოტები და ვის უჭერენ მხარს“, – განაცხადა შალვა პაპუაშვილმა.

ამასთან, პაპუაშვილის თქმით, არჩევნების შემდეგ საქართველოს მოსახლეობის უმრავლესობის მიმართ ზიზღის კამპანია მიმდინარეობს.

„პრობლემა იმაში კი არ არის, რომ ჩვენ გვყავს ოპოზიცია, არასამთავრობო ორგანიზაციებში თუ მათ მხარდამჭერებში ადამიანები არიან ზიზღით გამსჭვალული. ამას სოციალურ ქსელში ხედავთ. ახლა ხომ არ დაიწყო ეს? საარჩევნო კამპანია როცა დავიწყეთ და კანდიდატები დასახელდნენ, სია, მაშინ ვნახეთ ზიზღის კამპანია, ზიზღი ადამიანებზე, მათ შორის ფაშისტური განცხადებები. ახლა უკვე არჩევნების შემდეგ ვხედავთ ზიზღის კამპანიას საქართველოს მოსახლეობის უმრავლესობის მიმართ.

ევროკავშირისგან დაფინანსებული ერთ-ერთი მედია ავრცელებდა იმ ზიზღის კამპანიის ფოტოებს, რომლითაც „ქართული ოცნების“ მხარდამჭერებს, ფაქტობრივად, მტრად აცხადებდნენ. თბილისში კამპანია ჰქონდათ ბანერების გადმოფენის, რაღაც ნაჭრების. მაშინ მოვუწოდე კიდეც ევროკავშირის წარმომადგენლებს, ჰქონოდათ ამაზე რეაქცია, როდესაც ევროკავშირის ბიუჯეტიდან დაფინანსებული ორგანიზაცია ფაშისტურ კამპანიაში არის ჩართული, რაც ნიშნავს, რომ მოსახლეობის უმეტესობას აცხადებს მტრად, თავდასხმის, ზეწოლისა და მტრობის სამიზნედ.

ამაზე რეაქცია არ აქვს არავის, წაუყრუა ყველა დონორმა, თვალი დახუჭა. პირიქით, აქებენ, აქეზებენ, რომ თქვენ ხართ ნამდვილი საქართველო და მხარს გიჭერთო. ხედავთ ხომ ზოგიერთი უცხოელის განცხადებას? ზუსტად ეს აქეზებს საქართველოში ზიზღს, პოლარიზაციას. პოლარიზაცია, რადიკალიზმი და ზიზღი წაქეზებულია გარედან. ყველაზე სამწუხარო ის არის, რომ ადამიანები, რომლებიც ამ ზიზღის ბაბლში არიან მოქცეული და თავის უკმაყოფილებას ასე გადმოაფრქვევენ, ვერც კი ხვდებიან, რომ უბრალოდ ინსტრუმენტალიზებული არიან, ხშირ შემთხვევაში, ქვეყნის გარეთ მყოფი ჯგუფების მხრიდან“, – განაცხადა შალვა პაპუაშვილმა.