26 ოქტომბრის არჩევნების დისკრედიტაციასთან ერთად ინტენსიური ხასიათი აქვს საარჩევნო ადმინისტრაციის თანამშრომლებზე ზეწოლას, – განაცხადა ცენტრალური საარჩევნო კომისიის პრეს-სპიკერმა ნათია იოსელიანმა ბრიფინგზე.

„დაინტერესებული მხარეები იმეორებენ 2020 წლის პარლამენტის არჩევნების დროს გამოყენებულ ტაქტიკას საარჩევნო ადმინისტრაციის თანამშრომლებზე ზეწოლისთვის.

ზეწოლის ქვეშ არიან ყველა დონის საარჩევნო კომისიების, მათ შორის საზღვარგარეთის საარჩევნო უბნის წევრები. ზოგიერთი მათგანის პირად ტელეფონებზე შედის შეურაცხმყოფელი ზარები და მუქარის შემცველი შეტყობინებები. შეურაცხყოფას, ზეწოლას, ბულინგს და სიძულვილის ენის გამოყენებას ინტენსიური ხასიათი აქვს სოციალურ ქსელშიც.

ზეწოლა ხორციელდება როგორც ინდივიდუალურად კონკრეტულ პერსონებზე, ისე უწყების ოფიციალურ გვერდებზე სოციალურ ქსელში.

თქვენ ახლა ეკრანზე ხედავთ ჩემი სიტყვების დამადასტურებელ სქრინებს, რომელიც ძალიან მცირე ნაწილია შეურაცხმყოფელი შეტყობინების და კომენტარების.

ჩვენ არაერთხელ განვაცხადეთ, რომ ყოველთვის დავიცავთ ჩვენი კოლეგების კანონიერ უფლებებს და ამჯერადაც ვადასტურებთ, რომ საარჩევნო ადმინისტრაცია რჩება თავისი სიტყვების ერთგული და აფრთხილებს ყველას, ნებისმიერი განხორციელებული ზარი, თუ შეტყობინება, რომელიც იქნება კანონთან წინააღმდეგობაში გადაიგზავნება შესაბამის ორგანოებში შემდგომი რეაგირებისთვის“, – განაცხადა იოსელიანმა.

ოპოზიცია, ისევე როგორც მთელი საარჩევნო კამპანიის განმავლობაში, დღესაც ბულინგითა და შეურაცხყოფითაა დაკავებული, – ამის შესახებ თბილისის მერმა, კახა კალაძემ ემიგრანტების იმ კატეგორიის მიმართ დაწყებულ ბულინგთან დაკავშირებით დასმულ შეკითხვაზე განაცხადა, რომელმაც მმართველ პოლიტიკურ გუნდს დაუჭირა მხარი.

მისივე თქმით, ოპოზიციის წარმომადგენლებმა მარცხი ყველას და ყველაფერს დააბრალეს, საკუთარი თავის გარდა.

„ჩვეულებრივი ფაშისტები არიან. ჩვენ ამ არჩევნებით დავამარცხეთ ფაშიზმი თავიანთი გარე მფარველებით. გვახსოვს, რითი იყვნენ დაკავებული მთელი არჩევნების განმავლობაში და დღესაც იმავეს აგრძელებენ – ბულინგი, შეურაცხყოფის მიყენება, მუქარები. ვერ შეიცვლებიან ეს ადამიანები. ყველგან, სპორტიდან დაწყებული ბიზნესით დამთავრებული, თუ რაიმე სფერო არსებობს ქვეყანაში, მივიდნენ, ყველას შეურაცხყოფა მიაყენეს. შენ თუ განსხვავებული მოსაზრება გქონდა, მაშინვე შეურაცხყოფაზე გადადიოდნენ. თავისიანებსაც კი, ახალგაზრდებს, GZ-ის აგინებდნენ, თქვენ წაგვაგებინეთ არჩევნებიო. რა შუაში არიან ახალგაზრდები, ხომ?! ეს დამოკიდებულებაა – თავიანთი თავის გარდა, ყველა დამნაშავეა, რომ მარცხი განიცადეს და აღმოჩნდნენ იქ, სადაც მათი ბუნებრივი მდგომარეობა და ადგილია“, – განაცხადა კახა კალაძემ.

ეს არჩევნები წარიმართა უპრეცედენტო გარე ჩარევის ფონზე, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

პრემიერის შეფასებით, ამ გარე ჩარევის მიზანი იყო რადიკალური ოპოზიციის, კოლექტიური „ნაცმოძრაობის“ გამარჯვება.

„ახლა კონკრეტულ ძალებს სჭირდებათ გადაწყობა ახალ რეალობაზე და ეს გადაწყობა აუცილებლად მოხდება. საზოგადოებას მინდა ვუთხრა, რომ ამ არჩევნების და მეორე არჩევნების შემდეგ, უკრაინაში ომის დასრულების შემდეგ, რაც ვფიქრობ, მოხდება ძალიან მალე, მომავალ წელს, შეიძლება იანვარ-თებერვალშიც, შეიძლება ოდნავ უფრო გვიან, მაგრამ, როგორც კი დასრულდება უკრაინაში ომი, მაშინვე გადაიტვირთება ურთიერთობები საქართველოსა და ევროკავშირს, საქართველოსა და ამერიკის შეერთებულ შტატებს შორის. ამის შემდეგ უკვე სრულად აღდგება სამართლიანობა ურთიერთობებში. უკრაინაში ომის დაწყებამდე ასეთი პრობლემები, გაუგებრობები არ არსებობდა. უკრაინაში ომის დაწყებასთან ერთად გაჩნდა ეს გაუგებრობები. როგორც კი ომი დასრულდება, მაშინვე გაუგებრობები გაქრება და შესაბამისად, აღდგება სამართლიანობა და ჯანსაღი ურთიერთობები. სანქციებს რაც შეეხება, ეს ერთ-ერთი ფაქტორია. ევროპარლამენტმა კიდევ ერთხელ მოუწოდა საქართველოს, შეუერთდეს სანქციებს, დააწესოს სანქციები რუსეთის ფედერაციის მიმართ, რაც ნიშნავს ქვეყნის ეკონომიკის განადგურებას. ჩვენ რომ ეს გაგვეკეთებინა, დღეს აქ ჰიდროელექტროსადგურს კი არ გავხსნიდით, გვექნებოდა საერთოდ სხვა ვითარება, რა ჰიდროელექტროსადგურებიც მუშაობდა, ისიც გაჩერდებოდა, მარტო პირველივე წელიწადს მინიმუმ 10%-იანი ვარდნა გვექნებოდა. ამას ითხოვს ევროპარლამენტი აბსოლუტურად ღიად. თავად უნდა გამოიტანოთ დასკვნები ამასთან დაკავშირებით. როგორც კი უკრაინაში ომი დასრულდება, მაშინვე გაქრება ასეთი უსამართლო, გაუგებარი მოთხოვნები, მოთხოვნა, რომ გავანადგუროთ საკუთარი ხელით საკუთარი ეკონომიკა და მაშინვე ჯანსაღ რელსებზე გადაერთვება ურთიერთობები, როგორც ევროკავშირთან, ასევე ამერიკის შეერთებულ შტატებთან“, – აღნიშნა პრემიერ-მინისტრმა.

თბილისის მერის, კახა კალაძის განცხადებით, ამერიკის შეერთებული შტატების პრეზიდენტი ჯო ბაიდენი ვერ იქნება საქართველოში ჩატარებული არჩევნების შემფასებელი, რადგან ამას საერთაშორისო ორგანიზაცია ეუთო/ოდირი აკეთებს. ამის შესახებ კახა კალაძემ აშშ-ის პრეზიდენტის, ჯო ბაიდენის იმ განცხადების შეფასებისას აღნიშნა, რომლითაც ბაიდენმა საქართველოს მთავრობას მოუწოდა, გამჭვირვალედ გამოიძიოს ყველა საარჩევნო დარღვევა.

„ჯო ბაიდენი ვერ იქნება არჩევნების შემფასებელი, ვერც იმის, ხელისუფლება ლეგიტიმურია თუ არა. ამას აფასებს ეუთო/ოდირი. ჩვენ მოვისმინეთ ამ ორგანიზაციის შუალედური დასკვნა, რომელიც იყო საოცრება. ასეთი დასკვნა მე არ მახსოვს არჩევნებზე და არჩევნების დასრულების შემდეგ. პირდაპირ თქვეს, რომ არჩევნები იყო კონკურენტული, მრავალპარტიული და ხალხს ჰქონდა შესაძლებლობა, გაეკეთებინა არჩევანი.

რაც შეეხება იმ განცხადებებს, ზუსტად მაგიტომ დაიწყო გამოძიება, რომ ყველაფერს გაეცეს შესაბამისი პასუხი, რათა კითხვის ნიშანი არ დარჩეს ვინმეს. ამასთან დაკავშირებით წინა დღეებში მეც ვისაუბრე და პრემიერმაც გააკეთა განცხადება. ვისაც სურვილი აქვს, გინდ ქვეყნის შიგნით და გინდ გარეთ, ყველას ვაძლევთ შესაძლებლობას, რომ გადათვალონ, დათვალონ ყველაფერი. წინა, 2020 წლის არჩევნებზეც ასეთი დამოკიდებულება გვქონდა, იმიტომ, რომ დარწმუნებულები ვართ ჩვენს სიმართლეში, დარწმუნებულები ვართ იმაში, რომ არჩევნები ჩატარდა უმაღლეს დონეზე. ახლაც, რამდენი უბანიც უნდათ, გახსნან, გადათვალონ და ნახონ“, – განაცხადა კახა კალაძემ.

კახა კალაძის თქმით, საქართველო დამოუკიდებელი სახელმწიფოა, სადაც გამოძიებისთვის შესაბამისი ინსტიტუციები არსებობს.

„ქვეყნის გარეთ როგორ უნდა დაიწყოს გამოძიება? დამოუკიდებელი სახელმწიფო ვართ, ვცხოვრობთ ჩვენი კონსტიტუციით და კანონებით. საერთაშორისო გამოძიება დაიწყოს, რას ნიშნავს? რაიმე დანაშაული გვაქვს ჩადენილი საერთაშორისო დონეზე? კითხვები რომ ჩნდება, ქვეყანაში არსებობს შესაბამისი ინსტიტუციები. ცენტრალურმა საარჩევნო კომისიამ პროკურატურას მიმართა, იმიტომ, რომ ბოლო დღეების განმავლობაში ვისმენთ აბსურდულ, ცრუ განცხადებებს, რომელთაც არანაირი ფაქტები არ უმაგრებს ზურგს, არანაირი საფუძველი არ აქვს. ქვეყანას რეპუტაციულად ზიანი რომ არ მიადგეს, ამიტომ არის მნიშვნელოვანი, ჩატარდეს გამოძიება და ყველა კითხვას გავცეთ შესაბამისი პასუხი“, – განაცხადა კახა კალაძემ.

„ჩვენ, კიდევ ერთხელ ვგმობთ ქართველი ხალხისთვის ხელისუფლების შეცვლის სცენარის გარედან თავსმოხვევის მორიგ მცდელობას და მოვუწოდებთ ყველა იმ დასავლურ პოლიტიკურ ძალას, რომელიც დღეს კოლექტიური ოპოზიციისა, თუ მათი არასამთავრობოების უკან დგას, პატივის სცეს საქართველოს მოქალაქეების არჩევანს, ქართულ სახელმწიფო ინსტიტუტებს და კანონმდებლობას“- ამის შესახებ ვკითხულობთ „საზოგადოება ქართულის“ განცხადებაში.

როგორც განცხადებაში წერია, „არჩევნები შედგა! ქართველმა ხალხმა არჩევანი უკვე გააკეთა და კეთილი ინებოს ყველამ და შეეგუოს იმ უდავო ფაქტს, რომ საქართველოს მართავს ქართველი ხალხი“.

განცხადებაში ასევე ხაზგასმულია საერთაშორისო სადამკვირვებლო მისიების შეფასებები, რომლებმაც აღიარეს არჩევნები და ლეგიტიმაციაზე ეჭვი არ გამოუთქვამთ.

„მისასალმებელია, რომ წამყვანმა საერთაშორისო სადამკვირვებლო მისიებმა უკვე აღიარეს არჩევნები, ლეგიტიმაციაზე ეჭვი არ გამოუთქვამთ დასავლეთის წამყვან სუბიექტებსაც და ვიმედოვნებთ, ოპოზიცია და მათ უკან მდგომი დასავლეთის ნეოლიბერალური რადიკალებიც შეეგუებიან ქართველი ხალხის ისტორიულ არჩევანს ომსა და მშვიდობას, კეთილდღეობასა და ნგრევას, ღირსებასა და უღირსობას შორის.
კიდევ ერთხელ შევახსენებთ ყველას, ქვეყნის შიგნით თუ გარეთ, მოქალაქეების თავისუფალი ნებისთვის პატივისცემის ტრადიცია და არა ხელოვნური პოლიტიკური კრიზისის გარედან თავსმოხვევა, არის ის ერთ-ერთი მთავარი ფაქტორი, რის გამოც საქართველო ევროატლანტიკური სივრცისკენ მიისწრაფვის. ორმაგი სტანდარტები და ამომრჩევლისთვის ხელების გადაგრეხის მცდელობა კი, საქართველოს მოქალაქეებში დიდ იმედგაცრუებას გამოიწვევს, რაც არც საქართველოსთვის იქნება კარგი და არც დასავლეთისთვის – განსაკუთრებით, მათი გეოპოლიტიკური ინტერესების გათვალისწინებით“-აღნიშნულია განცხადებაში.

ოპოზიცია, ისევე, როგორც მთელი საარჩევნო კამპანიის განმავლობაში, დღესაც ბულინგითა და შეურაცხყოფითაა დაკავებული, – ამის შესახებ თბილისის მერმა, კახა კალაძემ ემიგრანტების იმ კატეგორიის მიმართ დაწყებულ ბულინგთან დაკავშირებით დასმულ შეკითხვაზე განაცხადა, რომელმაც მმართველ პოლიტიკურ გუნდს დაუჭირა მხარი.

მისივე თქმით, ოპოზიციის წარმომადგენლებმა მარცხი ყველას და ყველაფერს დააბრალეს, საკუთარი თავის გარდა.

„ჩვეულებრივი ფაშისტები არიან. ჩვენ ამ არჩევნებით დავამარცხეთ ფაშიზმი თავიანთი გარე მფარველებით. გვახსოვს, რით იყვნენ დაკავებული მთელი არჩევნების განმავლობაში და დღესაც იმავეს აგრძელებენ – ბულინგი, შეურაცხყოფის მიყენება, მუქარები. ვერ შეიცვლებიან ეს ადამიანები. ყველგან, სპორტიდან დაწყებული ბიზნესით დამთავრებული, თუ რაიმე სფერო არსებობს ქვეყანაში, მივიდნენ, ყველას შეურაცხყოფა მიაყენეს. შენ თუ განსხვავებული მოსაზრება გქონდა, მაშინვე შეურაცხყოფაზე გადადიოდნენ. თავისიანებსაც კი, ახალგაზრდებს, GZ-ის აგინებდნენ, თქვენ წაგვაგებინეთ არჩევნებიო. რა შუაში არიან ახალგაზრდები, ხომ?! ეს დამოკიდებულებაა – თავიანთი თავის გარდა, ყველა დამნაშავეა, რომ მარცხი განიცადეს და აღმოჩნდნენ იქ, სადაც მათი ბუნებრივი მდგომარეობა და ადგილია“, – განაცხადა კახა კალაძემ.

ქუჩის რესურსი ოპოზიციას აღარ აქვს, ჩაფუშულია ეგ ამბავი, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ,

„მხოლოდ იმიტომ, რომ საქართველომ უკრაინაში არ გააგზავნა მებრძოლები, არ დააწესა სანქციები, არ ჩაერთო ომში და არ ჩამოაქცია თავისი ეკონომიკა, ისე მოატყუეს და შეუფუთეს ეს ამბავი, ამის გამო იდგნენ რუსთაველის გამზირზე, მერე „გამჭვირვალობის კანონი“ რუსულ კანონად შეასაღეს, ამის გამოც იდგნენ.. ახლა გვარამიას და სააკაშვილის გამო უწევთ დადგომა, ამიტომ ქუჩის რესურსი არ არსებობს.

900 ათასით რომ წააგო პირველ ადგილზე გასულ მმართველ პარტიასთან, ქუჩაო იძახის. ერთი და ორი ხმით რომ აგებს პარტია ან კანდიდატი, ის აღიარებს ხოლმე. 890 ათასი ხმით რომ წააგებ და ამბობ, ქუჩა არის ერთადერთი გამოსავალიო, ნორმალური არ ხარ… რაღაზე ვლაპარაკობთ?!“, – აღნიშნა მამუკა მდინარაძემ.

„კოალიცია ცვლილებისთვის“ ერთ-ერთი ლიდერი, ნიკა გვარამია სოციალურ ქსელში წერს, რომ ქუჩა არის ერთადერთი ადგილი, სადაც სახელმწიფოს ბედი წყდება იმ ვითარებაში, როცა ყველა სხვა დემოკრატიული ინსტიტუტი მიტაცებულია.

საქართველოში საპარლამენტო არჩევნები 26 ოქტომბერს ჩატარდა. ცესკოს პირველადი მონაცემებით, ხმათა უმრავლესობა, 53,931 პროცენტი „ქართულმა ოცნებამ“ მიიღო, მეორე ადგილზე კი 11.035% პროცენტით გავიდა კოალიცია ცვლილებისთვის გვარამია მელია გირჩი დროა. საარჩევნო ბარიერი ასევე გადალახეს პოლიტიკურმა სუბიექტებმა „ერთიანობა-ნაციონალური მოძრაობამ“, „ძლიერი საქართველო-ლელო, ხალხისთვის, თავისუფლებისთვის!“, „გახარია საქართველოსთვის“.

მსოფლიო გველაპარაკება გამჭვირვალობის კანონზე, რომ ვერაფერს გვეუბნება არჩევნებზე და ეს კანონი აწუხებს თურმე ყველას. ესე იგი რაღაც ძალიან მნიშვნელოვანია, – განაცხადა „ქართული ოცნების“ აღმასრულებელმა მდივანმა მამუკა მდინარაძემ საქართველოში საპარლამენტო არჩევნების შემდეგ გაკეთებული კრიტიკული განცხადებების შეფასებისას.

მან აღნიშნა, რომ არჩევნებთან დაკავშირებით გაკეთებულ კრიტიკულ განცხადებებში გამჭვირვალობის კანონის გაუქმებაზეა საუბარი.

„მეოთხე დღეა, ჩვენ ვისმენთ განცხადებებს არჩევნებთან დაკავშირებით და ყველა განცხადებაში, თუკი ვინმეს ამ არჩევნების კრიტიკა მოუნდა, ლაპარაკობს [გამჭვირვალობის] კანონზე, ამ კანონსა და არჩევნებს შორის კორელაციაზე – ვერა. ახლა მიხვდით, რა მაგარი კანონი მიგვიღია? მთელი მსოფლიო გველაპარაკება კანონზე, რომ ვერაფერს გვეუბნება არჩევნებზე და ეს კანონი აწუხებს თურმე ყველას.

ეს კანონი მართლაც რუსული რომ იყოს და ერთი ერთში გადაწერილი რომ იყოს არა ამერიკულიდან, არამედ რუსულიდან, თქვენ რასაც ატყუებთ საზოგადოებას, მისი რუსულობა რომ არავის აწუხებს, ხომ ხვდებით? ესე იგი რაღაც ძალიან მნიშვნელოვანია. არჩევნებზე ლაპარაკობენ და კანონი გააუქმეთო. არაფერ შუაში რომ არ არის, აი, ამ კანონზე ლაპარაკობენ”, – მიმართა მან ერთ-ერთი ოპოზიციური ტელეკომპანიის ჟურნალისტს.

უკვე რამდენიმე ფაქტი გვაქვს, როდესაც ჩვენი მომხრე ამომრჩეველი მივიდა საარჩევნო უბანზე და არ აღმოჩნდა სიაში – როგორც აღმოჩნდა, რაღაც გაურკვეველი ნომრებით ისინი დარეგისტრირებულები არიან დამკვირვებლებად რომელიღაც რეგიონში საარჩევნო უბნებზე, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ პარტიის ოფისში გამართულ ბრიფინგზე განაცხადა.

მისი თქმით, „ქართული ოცნება“ რამდენიმე დღეში წარმოადგენს მტკიცებულებებს იმასთან დაკავშირებით, თუ ვინ და როგორ მოიპარა ხმები.

„ვთქვათ, მე მივედი კონკრეტული პარტიის მხარდაჭერად თბილისში ჩემს საარჩევნო უბანზე და აღმოვჩნდი წყალტუბოში დამკვირვებლად გაფორმებული და ამ გაფორმების ავტორები არიან სხვადასხვა პარტიები აგენტურული პარტიებიდან. თუ ხმების მოპარვაზე ვლაპარაკობთ, ამასაც ბოლომდე ჩავყვებით და ბოლომდე დავადგენთ, ვინ დაარეგისტრირა ეს ხალხი, ჩვენი მომხრეები ოპოზიციური პარტიების დამკვირვებლებად. ხმების მოპარვა რომ გაინტერესებდათ რეალური, ამ ხმების მოპარვის რეალურ ფაქტებს დაგიდებთ ძალიან მალე, უკვე არსებობს და რამდენიმე დღეში, ხვალ, ზეგ მაქსიმუმ, კონკრეტული ფაქტები გექნებათ ვისი ხმები როგორ მოიპარეთ“.- განაცხადა მდინარაძემ.

„საქსტატის“ მონაცემები შეესაბამება იქ მცხოვრები, ადგილზე მყოფი ადამიანების რაოდენობას. მასში არ შედის არც ემიგრანტი, არც სხვა ქალაქსა თუ სოფელში მცხოვრები ადამიანი და ამასთან დაკავშირებით მანიპულაცია არის უმძიმესი შეურაცხყოფა ქართული საზოგადოების, – განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ.

„მინდა გამოვეხმაურო რამდენიმე არგუმენტს, რომლითაც ქართულ საზოგადოებას აყენებენ უმძიმეს შეურაცხყოფას. მაგალითად, აქვეყნებენ რამდენიმე დასახლების მონაცემს და ამბობენ – როგორ ხდება ასე, რომ „საქსტატის“ მონაცემებით უფრო ნაკლები ადამიანი ცხოვრობს, ვიდრე არჩევნებში იღებდნენ მონაწილეობას. რას იტყუებიან და რა უბინძურეს მანიპულაციასთან გვაქვს საქმე. მაგალითად, აღწერის მიზნით, ცაგერში მცხოვრებ ოჯახში მივიდა „საქსტატის“ წარმომადგენელი, დააფიქსირა, რომ ამ ოჯახში ცხოვრობს ორი ადამიანი, თუმცა ამ ოჯახში ჩაწერილია 10 ადამიანი. შემდეგ ჩავიდნენ დანარჩენი ოჯახის წევრები და მისცეს ხმა. შემდეგ გამოდის ნებისმიერი მდაბიო მანიპულატორი და ამბობს – როგორ კაცო, ორი ადამიანი ცხოვრობს და როგორ მისცა შვიდმა ხმაო. „საქსტატის“ მონაცემები შეესაბამება იქ მცხოვრები, ადგილზე მყოფი ადამიანების რაოდენობას. მასში არ შედის არც ემიგრანტი, არც სხვა ქალაქსა თუ სოფელში მცხოვრები ადამიანი და ამასთან დაკავშირებით მანიპულაცია არის უმძიმესი შეურაცხყოფა ქართული საზოგადოების“, – აღნიშნა მამუკა მდინარაძემ.

ვფიქრობ, საპროტესტო აქციები გაგრძელდება, – ამის შესახებ კოალიცია „ძლიერი საქართველოს“ ერთ-ერთმა ლიდერმა, სალომე სამადაშვილმა ოპოზიციის სამოქმედო გეგმასთან დაკავშირებით დასმული კითხვის საპასუხოდ განაცხადა.

როგორც მან განმარტა, საპროტესტო აქციები მანამდე გაგრძელდება, ვიდრე საქართველო „რუსული რეჟიმისგან არ გათავისუფლდება“.

„აქციები გაგრძელდება მანამ, სანამ საქართველოს არ გავათავისუფლებთ ამ რუსული რეჟიმისგან, მაგრამ ახლა ჩვენთვის მთავარი ამოცანა არის გამოძიება”, – განაცხადა სამადაშვილმა.

ამასთან, მან აღნიშნა, რომ ოპოზიციური პოლიტიკური პარტიები სამოქმედო გეგმასთან დაკავშირებით კონსულტაციებს აგრძელებენ.

„ყოველდღე ინტენსიური შეხვედრები გვაქვს იმიტომ, რომ პირველ რიგში, ჩვენ უნდა უზრუნველვყოთ გამოძიება. რეალურად, ივანიშვილმა საქართველოში არჩევნებს აზრი დაუკარგა. ეს სისტემა გამოძიებული თუ არ იქნება და არ შეიცვლება, არასდროს ამ ქვეყანაში არანაირ არჩევნებს აზრი არ ექნება. უბრალოდ, ნომინალურად ჩავატარებთ არჩევნებს. ის პერსპექტივა, რაც საქართველოს ემუქრება, არის ძალიან ცუდი იმიტომ, რომ თუ გასული 3-4 წლის მანძილზე 250 ათასმა ადამიანმა დატოვა ეს ქვეყანა, ეს პროცესი გაგრძელდება და საქართველო ქართველებისგან დაცარიელდება. ჩვენ ეს არ უნდა დავუშვათ! ამიტომ, ახლა ვმუშაობთ სწორედ იმაზე, რომ პირველ რიგში, გამჟღავნდეს დანაშაული, რომელიც ჩაიდინეს”, – განაცხადა სამადაშვილმა.