საოლქო საარჩევნო კომისიების დაკომპლექტების საკითხი კიდევ ერთხელ გახდა უსაფუძვლო ბრალდებების და საარჩევნო ადმინისტრაციის დისკრედიტაციის საფუძველი. მიუხედავად იმისა,  რომ ცენტრალურმა საარჩევნო კომისიამ საოლქო საარჩევნო კომისიების დროებითი წევრები კანონმდებლობის სრული დაცვით, სამართლიანად და გამჭვირვალედ აირჩია, კეთდება მანიპულაციური განცხადებები, 

თითქოს ახალარჩეული წევრები პოლიტიკურად მიკერძოებულები არიან და ისინი არ იქნებიან საკუთარი საქმიანობის პროცესში ობიექტურები.

ხაზგასმით გვინდა აღვნიშნოთ, რომ საოლქო საარჩევნო კომისიების დროებითი წევრები პროფესიული ნიშნით არიან არჩეული და მათი არჩევის პროცესი იყო უპრეცედენტოდ ღია და გამჭვირვალე. მათ შორის, საარჩევნო ადმინისტრაციის მიერ უზრუნველყოფილი იყო კონკურსანტებთან გასაუბრება ლაივ რეჟიმში და ყველა დაინტერესებულ პირს შეეძლო თვალყური ედევნებინა ამ პროცესისთვის.

სახეზეა რეალობა, როცა დაინტერესებული მხარეების მიერ წინასწარ ხდება ასარჩევი, ან ახალარჩეული წევრების სტიგმატიზაცია, მხოლოდ იმიტომ რომ ზოგიერთი მათგანი საჯარო სამსახურში მუშაობს, რაც ძალიან ცუდი პრაქტიკაა და ცალსახად აზიანებს საარჩევნო გარემოს. კანონმდებლობა საჯარო მოხელეს არ უკრძალავს საოლქო საარჩევნო კომისიის დროებით წევრობას, ამ ადამიანების შეფასება კი მხოლოდ მათ მიერ განხორციელებული საქმიანობით უნდა მოხდეს. დაინტერესებული მხარეების მხრიდან წინსწრებით ამ ადამიანების და მათი საქმიანობის დისკრედიტაცია კი შესაძლოა იყოს იმის ერთ-ერთი მიზეზი, რომ კონკურსში მონაწილეობის მსურველთა რაოდენობა არც თუ ისე მაღალია.

საარჩევნო ადმინისტრაცია დაიცავს ყველა საარჩევნო მოხელეს, მაგრამ თუკი იქნება პოლიტიკური ნეიტრალიტეტის და მიუკერძოებლობის დარღვევის შემთხვევა, რა თქმა უნდა, ექნება მყისიერი, მკაცრი სამართლებრივი რეაგირება. აქვე გვინდა შევახსენოთ დაინტერესებულ მხარეებს, რომ პოლიტიკური ნეიტრალიტეტი და მიუკერძოებლობა ერთნაირად მოეთხოვება საარჩევნო კომისიების ნებისმიერ წევრს ყველა დონეზე, მათ შორის პარტიების მიერ დანიშნულს. სწორედ ამიტომ, საარჩევნო ადმინისტრაციამ 26 ოქტომბრის არჩევნებისთვის, საკუთარ საქმიანობაში მიუკერძოებლობის სტანდარტის ასამაღლებლად, ადმინისტრაციის მოხელეთა ეთიკის კოდექსში ცვლილებები შეიტანა და კიდევ უფრო გაამკაცრა ის სტანდარტები, რომლის დაცვაც ყველა დონის საარჩევნო კომისიის წევრს პოლიტიკური ნეიტრალიტეტის დაცვის მიზნით ევალება.

აქვე უნდა აღინიშნოს, რომ კონკურსში 263 კანდიდატი მონაწილეობდა და მათგან 219, სახელობითი კენჭისყრით, ძირითადად 10-11 ხმით აირჩიეს. რაც ადასტურებს, რომ არჩეულ წევრებს ჰქონდათ ცესკოში პარტიების მიერ დანიშნული წევრების მხარდაჭერა.

აქვე წარმოგიდგენთ დეტალურ ინფორმაციას საოლქო საარჩევნო კომისიების არჩეული წევრების გამოცდილების შესახებ. ბოლო 5 საერთო არჩევნების ანალიზი აჩვენებს, რომ 26 ოქტომბრის არჩევნებისთვის ცესკოს მიერ არჩეული საოლქო საარჩევნო კომისიების დროებითი წევრებიდან:

• საუბნო საარჩევნო კომისიაში ხელმძღვანელ პირად მუშაობის გამოცდილება აქვს 211 კომისიის წევრს – 96 %.

• საუბნო საარჩევნო კომისიის წევრად მუშაობის გამოცდილება 74 კომისიის წევრს – 34 %.

• საოლქო საარჩევნო კომისიის წევრად მუშაობის გამოცდილება აქვს 176 კომისიის წევრს – 80 %.

• სადამკვირვებლო ორგანიზაციის დამკვირვებლად ყოფნის გამოცდილება აქვს  106 წევრს – 48 %

• საგანმანათლებლო პროექტებში მონაწილეობა მიღებული აქვს 2020 წელს 116 კომისიის წევრს – 53 %, 2023 და 2024 წლებში 29 წევრს 13%

მოცემული სტატისტიკა აჩვენებს, რომ საოლქო საარჩევნო კომისიების დროებით წევრებად არჩეული არიან დიდი გამოცდილების მქონე პირები, რომლებიც აკმაყოფილებენ იმ მოთხოვნებს, რაც კანონით არის განსაზღვრული და შეზღუდვებს ადგენს საოლქო საარჩევნო კომისიების დროებითი წევრებისთვის. აღნიშნული კიდევ ერთხელ ადასტურებს, რომ პროცესთან დაკავშირებით გამოთქმული შეფასებები არის მანიპულაციური, უსაფუძვლო და ემსახურება პროცესის დისკრედიტაციას.

ასევე შეგახსენებთ, რომ ცხადდება კონკურსი საუბნო საარჩევნო კომისიების წევრების შესარჩევად და როგორც ჩანს, დაინტერესებული მხარეები კვლავ ცდილობენ ამ პროცესის დისკრედიტაციასაც. გვინდა კიდევ ერთხელ ხაზგასმით განვაცხადოთ რომ საარჩევნო ადმინისტრაცია თავის საქმიანობას კანონმდებლობის სრული დაცვითა და საერთაშორისო სტანდარტების დაცვით ახორციელებს და მოვუწოდებთ ჩართულ მხარეებს, მანიპულაციური განცხადებებით ნუ დააზიანებენ საარჩევნო გარემოს.

რახან სიტყვამ მოიტანა, ჩემსასაც ვიტყვი. როგორც აღმოჩნდა, პარლამენტის შენობაზე საღებავით გაკეთებული წარწერა “სირცხვილიას” მორიგი, “ევროპული ღირებულებებით” გამსჭვალული აქტი ყოფილა, – ამის შესახებ საქართველოს პარლამენტის თავმჯდომარე შალვა პაპუაშვილი წერს.

როგორც შალვა პაპუაშვილი აღნიშნავს, ევროპაში, ამ ფაქტს ვანდალიზმი ჰქვია, „ამ ვანდალიზმის მიზეზი კი ის წაყრუებაა, რომელიც “სირცხვილიას” ძალადობაზე და ტერორზე მისი ევროპელი და ამერიკელი დონორებისგან უკვე წლებია გრძელდება“.

„სირცხვილიას“ გარშემო ატეხილ ვირტუალურ ჩაქოლვას და მის შედეგს ჰყავს მხოლოდ ერთი დამნაშავე – უპასუხისმგებლო დონორი.

და რახან სიტყვამ მოიტანა, ჩემსასაც ვიტყვი. როგორც აღმოჩნდა, პარლამენტის შენობაზე საღებავით გაკეთებული წარწერა “სირცხვილიას” მორიგი, “ევროპული ღირებულებებით” გამსჭვალული აქტი ყოფილა.

ეს “საგმირო” საქმე, რომლითაც ევროკავშირიდან დაფინანსებულმა “სირცხვილიას” აქტივისტმა, ფაქტობრივად, იქვე, რუსთაველზე, სასტიკად დაამარცხა რუსული ოკუპაცია, მალევე აიტაცა ასევე ევროკავშირიდან დაფინანსებულმა ონლაინმედიამ და აი, უკვე მერამდენედ, ერთად იზეიმეს ეს ისტორიული გამარჯვება ვირტუალური საქართველოს უკიდეგანო სივრცეში.

რა თქმა უნდა, არავინ უთხრა ქართველ ხალხს, რომ ახლა, ევროკავშირის ფულით დაფინანსებული ადამიანის ვანდალიზმი, ქართველი ხალხის ფულით უნდა გაწმენდილიყო ქართველი ხალხის პარლამენტის შენობიდან, ვინაიდან, როგორც ცნობილია, ენჯეოების მიერ გაფუჭებული საქმის გამოსწორების თანხები დონორებს ბიუჯეტში გათვალისწინებული არ აქვთ.

ევროპაში, რომელიც ზოგს მხოლოდ თავისთვის უნდა, ამას ვანდალიზმი ჰქვია. ამ ვანდალიზმის მიზეზი კი ის წაყრუებაა, რომელიც, “სირცხვილიას” ძალადობაზე და ტერორზე, მისი ევროპელი და ამერიკელი დონორებისგან უკვე წლებია გრძელდება.

წარმოვიდგინოთ ერთი წამით, რომ საქართველოს ხელისუფლებას საქართველოს ბიუჯეტიდან დაეფინანსებინა ბრიუსელში რეგისტრირებული ენჯეო:

– რომელიც აწარმოებდა კამპანიას, რომ თუ საქმე მოითხოვს მოლოტოვის კოქტეილიც შეგიძლია ესროლო ბელგიელ პოლიციელს და ცოცხლად დაწვა;

– ბრიუსელში ჩავიდოდნენ და ამ 21-ე საუკუნის აუტოდაფეს კამპანიაში მონაწილეობას მიიღებდნენ საქართველოს პარლამენტის წევრები;

– ამ ორგანიზაციის წევრებს მოეპოვებინათ და გაესაჯაროებინათ ევროპარლამენტარების და კომისიონერების პირადი მობილური ნომრები და თავად სისტემატურად დაერეკათ მათთვის და მათი ოჯახის წევრებისთვის და ეტერორებინათ;

– ამ ორგანიზაციის წევრები პერიოდულად მოგვეწვია და პარლამენტსა და მთავრობაში ოფიციალური შეხვედრები გაგვემართა;

– დეზინფორმაციის გავრცელებაზე, სოცმედიაში არაავთენტური ქცევის კოორდინირებაზე, სიძულვილი ენაზე და სხვა “წვრილმანზე” აღარაფერს ვამბობ.

როგორ ფიქრობთ, ევროკავშირი საქართველოს ხელისუფლებას ამაზე პასუხს მოსთხოვდა?

“სირცხვილიას” შემთხვევაში ეს ყველაფერი უკვე წლებია ხდება. ხდება ევროკავშირის ბიუჯეტიდან დაფინანსებით და ევროპელი პოლიტიკოსების და ბიუროკრატების ჩართულობით. თუმცა, არც ევროპელ პოლიტიკოსებს და არც ბიუროკრატებს არ უნდათ ამაზე პასუხისმგებლობის აღება.

ამიტომ, არც ამ წაყრუებით წახალისებულ ვანდალიზმზე იგრძნობს ვინმე პასუხისმგებლობას.

არადა, წესით, კეთილსინდისიერი დონორი მოვიდოდა და თავისი ხელით გაწმენდდა პარლამენტის კედელს. თუმცა, ამას ევროპელობა სჭირდება. ისეთი, როგორიც ქართველები ვართ”, – წერს პარლამენტის თავმჯდომარე.

პარლამენტის იურიდიულ საკითხთა კომიტეტი, 2 სექტემბრის სხდომაზე, „ამნისტიის შესახებ“ პროექტს განიხილავს.

საკომიტეტო განხილვა მეორე მოსმენით, მუხლობრივად გაიმართება. პროექტი იმავე კვირას განსახილველად სესიაზე გავა.

პროექტის მიხედვით, ამნისტია 2024 წლის 1-ელ ივლისამდე ჩადენილ რიგ დანაშაულებზე გავრცელდება. მასში გათვალისწინებულია ამნისტიის შემდეგი ფორმები: – პასუხისმგებლობისგან დაუყოვნებლივ გათავისუფლება; სასჯელის 1/2-ით, 1/4 -ით და 1/6-ით შემცირება და ასევე, პრობაციონერებისთვის პირობითი მსჯავრის ერთი წლით შემცირება.

“სისხლის სამართლის კოდექსის” 66 მუხლით გათვალისწინებულ დანაშაულებში მსჯავრდებული პირები სასჯელისგან სრულად გათავისუფლდებიან ან სასჯელი 1/2-ით ან 1/4-ით შეუმცირდებათ. გარდა ამისა, სასჯელის 1/6-ით შემცირება “სისხლის სამართლის კოდექსის“ 225 მუხლს შეეხება.

ამნისტია არ შეეხება: – მკვლელობისთვის ნასამართლებ პირებს, ნარკორეალიზატორებს, სქესობრივ დანაშაულებს, ყაჩაღობას, ტერორიზმს, კორუფციულ და სამოხელეო დანაშაულს, ქურდულ სამყაროს, კონვენციურ დანაშაულებს, ტრეფიკინგს და სხვა მძიმე და განსაკუთრებით მძიმე კატეგორიის დანაშაულებს.

„ქართული ოცნების“ ინფორმაციით, ამნისტია 4 839 პატიმარს ეხება, დაუყოვნებლივი გათავისუფლების საკითხი კი, 1 000 პატიმარს შეეხება. დაახლოებით 7 000 პირს პირობითი მსჯავრი ერთი წლით შეუმცირდება.

მმართველი უმრავლესობა “ამნისტიის შესახებ“ პროექტის მეორე-მესამე მოსმენით განხილვას და მიღებას საშემოდგომო სესიის ფარგლებში გეგმავს.

თუ ბიძინა ივანიშვილის და „ქართული ოცნების” დაპირება წინასაარჩევნო ტრიუკი არაა, მაშინ გააჟღერონ რას სთავაზობენ ეკლესიას და რა კონსულტაციები დამთავრდა წარმატებით, – ამის შესახებ „ძლიერი საქართველოს“ ლიდერი, მამუკა ხაზარაძე სოციალურ ქსელში წერს.

მისი თქმით, ისინი ემხრობიან კონსტიტუციის დონეზე საქართველოს მართლმადიდებელი ეკლესიის როლის მკაფიოდ დაფიქსირებას ქართული სახელმწიფოს ცხოვრებაში და მიაჩნიათ, რომ ამაზე მთელი პოლიტიკური სპექტრი უნდა თანხმდებოდეს.

„12 წელია “ქართული ოცნება” და ბიძინა ტყუილში აცხოვრებს ჩვენს მოქალაქეებს. 100 ქარხნის აშენებით, თითო სოფელში 5 მილიონის დარიგებით, უფასო ფულით, ტარიფების განახევრებითა და კიდევ უამრავი ცრუ დაპირებით მოახერხეს ხელისუფლების შენარჩუნება და ახლა ეკლესიის თემით უნდათ მანიპულირება.

აქვე ვიტყვი, საქართველო მართლმადიდებელი ეკლესიის გარეშე არ არსებობს და არც იარსებებს!

დღეს სახელმწიფოსა და ეკლესიას შორის ურთიერთობა კონსტიტუციური შეთანხმებით – კონკორდატის საშუალებით რეგულირდება. ამ მოლაპარაკებასა და დოკუმენტის შექმნაში მეც აქტიური მონაწილეობა მაქვს მიღებული, რითაც ვამაყობ. ეს არის ყველაზე მაღალი რანგის სტატუსი, კონსტიტუციის შემდეგ.

თუ ბიძინა ივანიშვილის და “ქართული ოცნების” დაპირება წინასაარჩევნო ტრიუკი არაა, მაშინ გააჟღერონ რას სთავაზობენ ეკლესიას და რა კონსულტაციები დამთავრდა წარმატებით. თუ ეს ასეა, ჩვენ ახლავე დავუჭერთ მხარს, თუ, რა თქმა უნდა, ასეთი შეთავაზება ეკლესიისთვის მისაღები იქნება.

ჩვენ ვემხრობით კონსტიტუციის დონეზე საქართველოს მართლმადიდებელი ეკლესიის როლის მკაფიოდ დაფიქსირებას ქართული სახელმწიფოს ცხოვრებაში და მიგვაჩნია, რომ ამაზე მთელი პოლიტიკური სპექტრი უნდა თანხმდებოდეს. ამიტომ, საკონსტიტუციო ცვლილებაზე კენჭისყრა გაიმართოს საპარლამენტო არჩევნებამდე. ეს ეკლესიას დაიცავს “ქართული ოცნების” მიერ წინასაარჩევნო პროპაგანდაში ჩათრევის მცდელობისგან და საკონსტიტუციო დონეზე კიდევ ერთხელ გაამყარებს მის სტატუსს.

არ დაგვავიწყდეს, ეს ის ბიძინა და “ოცნებაა” რომლის სუს-ი უსმენს, იწერს და მერე ეკლესიის შანტაჟისთვის “კრებსებს” ასაჯაროებს“, – წერს მამუკა ხაზარაძე.