საქართველოში ევროკავშირის ელჩი პაველ ჰერჩინსკი იმედოვნებს, რომ 26 ოქტომბერს არჩევნები იქნება თავისუფალი, კონკურენტული და უმაღლესი საერთაშორისო სტანდარტებით ჩატარდება.

მისივე თქმით, დაელოდებიან ეუთო/ოდირის შეფასებას, იქნება თუ არა არჩევნები თავისუფალი და სამართლიანი.

„გულწრფელად იმედი გვაქვს, რომ მომავალი არჩევნები იქნება თავისუფალი, სამართლიანი, კონკურენტული, ინკლუზიური, გამჭვირვალე და ჩატარდება უმაღლესი საერთაშორისო და ევროპული სტანდარტების შესაბამისად. იმ შემთხვევაში, თუ არ ჩატარდება საუკეთესო საერთაშორისო სტანდარტების შესაბამისად, რაც იქნება საერთაშორისო და ადგილობრივი დამკვირვებლების აზრი, ჩვენ დაველოდებით ეუთო/ოდირის შეფასებას. შემდეგ, რა თქმა უნდა, მზად ვიქნებით, ვუპასუხოთ ნებისმიერ მოვლენას, მათ შორის საარჩევნო ძალადობის ყველაზე ცუდ სცენარს და არჩევნების გაყალბების შესაძლებლობას. ეს ჩვენ გამოვცადეთ ბელარუსის შემთხვევაში და გულწრფელად იმედი მაქვს, რომ არასდროს გამოვცდით საქართველოს შემთხვევაში.

26 ოქტომბერს ქართველებს ექნებათ შესაძლებლობა, გამოხატონ თავიანთი აზრი. გულწრფელად იმედი მაქვს, რომ აქტივობა იქნება მაღალი, ხალხი წავა არჩევნებზე და მისცემს ხმას. დიახ, ვფიქრობ, რომ ეს იქნება ისტორიული არჩევნები, რომელიც გადაწყვეტს საქართველოს მომავალს. საქართველოს მთავრობამ მოიწვია საერთაშორისო გრძელვადიანი სადამკვირვებლო მისია. ეს მისია უკვე ჩამოვიდა. მისია შედგება ეუთო-ს ყველა წევრი ქვეყნისგან, მათ შორის ევროკავშირის 27 წევრი ქვეყნიდან ჩამოსული დამკვირვებლებისგან. ეს არის საერთაშორისო სტანდარტის დამდგენი, როდესაც საქმე ეხება საარჩევნო დაკვირვებას. დაველოდებით ეუთო/ოდირის საარჩევნო მისიის შეფასებას და ისინი გვეტყვიან, რას უნდა ველოდოთ: იქნება თუ არა არჩევნები თავისუფალი და სამართლიანი. ჩვენ გულწრფელად იმედი გვაქვს, რომ ასეც იქნება“, – განაცხადა ჰერჩინსკიმ.

საარჩევნო კამპანიის დროს ბევრს საუბრობენ პოლიტიკურ პარტიებზე და პოლიტიკოს კანდიდატებზე, მაგრამ არჩევნებში ყველაზე მნიშვნელოვანი არის ამომრჩეველი, რომელსაც უფლება აქვს იცოდეს, თუ რას წარმოადგენენ ის პარტიები, რომლებსაც აძლევენ ხმას, – ამის შესახებ საქართველოში აშშ-ის ელჩმა, რობინ დანიგანმა განაცხადა.

„ჩვენ აქ ვართ იმისთვის, რომ ავამოქმედოთ ე.წ საარჩევნო კომპასი 24. მინდა ვთქვა, ცოტა რამ, თუ როგორ იმოქმედებს ეს ხელსაწყო. საარჩევნო კამპანიის სეზონის დროს ძალიან ბევრს საუბრობენ პოლიტიკურ პარტიებზე და პოლიტიკოს კანდიდატებზე, მაგრამ არჩევნებში ყველაზე მნიშვნელოვანი არის ამომრჩეველი. ქართველ ხალხს აქვს უფლება, იცოდეს, რას წარმოადგენენ ის პარტიები, რომლებსაც აძლევენ ხმას“, – განაცხადა ელჩმა.

რობინ დანიგანი იმედოვნებს, რომ „ამომრჩევლები კარგად დააკვირდებიან, ვის მისცემენ ხმას“.

„ეს არის მიზეზი იმისა, რომ ჩვენ ვთანამშრომლობთ გერმანიასთან და ევროკავშირთან ამ პროექტზე, რათა უზრუნველვყოთ, რომ ქართველი ამომრჩევლები გავიდნენ, ხმა მისცენ, იცოდნენ, რომ მათი ხმა საიდუმლოა; იციან, რომ არჩევნები სამართლიანია და პარტიები, რომლებსაც აძლევენ ხმას, წარმოადგენენ იმას, რაც მათ, ქართველ ამომრჩეველს სურს. იმედი მაქვს, ქართველები კარგად დააკვირდებიან, ვის მისცემენ ხმას და დარწმუნდებიან, რომ ხმის მიცემით, თანამდებობაზე იქნებიან ის ადამიანები, რომლებიც გამოხატავენ ქართველი ხალხის ნებას“, – განაცხადა რობინ დანიგანმა.

მოვუწოდებ ყველა ქართველს, წავიდეს არჩევნებზე და მისცეს ხმა, მომავალი არჩევნები აბსოლუტურად გადამწყვეტი იქნება თქვენი ქვეყნის მომავლის განსაზღვრაში, – ამის შესახებ ევროკავშირის ელჩმა, პაველ ჰერჩინსკიმ „საარჩევნო კომპასი საქართველო 2024“ პრეზენტაციის შემდეგ ჟურნალისტებთან განაცხადა.

მისი თქმით, ქართველი ამომრჩევლის გადასაწყვეტია, რომელ პარტიას დაუჭერს მხარს.

„დღეს ჩვენ ვმონაწილეობთ ე.წ. საარჩევნო კომპასის ამოქმედებაში. ეს არის მიუკერძოებელი ვებინსტრუმენტი, რომელიც შექმნილია რამდენიმე ქართული სამოქალაქო ორგანიზაციის მიერ საერთაშორისო პარტნიორების მხარდაჭერით, რათა დაეხმაროს ქართველ ამომრჩევლებს, გააკეთონ ინფორმირებული არჩევანი, თუ რომელ პარტიას დაუჭერენ მხარს მომავალ არჩევნებში. ძალიან მიხარია, რომ ევროკავშირის სახით ჩვენ მხარს ვუჭერდით ამ პროექტს. ეს არის მიუკერძოებელი ვებინსტრუმენტი, რომელიც დაგეხმარებათ, უკეთ გაიგოთ, რას წარმოადგენს თითოეული პარტია. კიდევ ერთხელ მოვუწოდებ ყველა ქართველს, წავიდეს არჩევნებზე და მისცეს ხმა. მომავალი არჩევნები აბსოლუტურად გადამწყვეტი იქნება თქვენი ქვეყნის მომავლის განსაზღვრაში. ეს თქვენი, ქართველი ამომრჩევლების გადასაწყვეტია, რომელ პარტიას დაუჭერთ მხარს, მაგრამ ჩემი საქმეა, გითხრათ, გთხოვთ, წადით არჩევნებზე და მისცეთ ხმა. თქვენი ხმა ნამდვილად, ნამდვილად მნიშვნელოვანია. მოქმედება აბსოლუტურად აუცილებელია. გულწრფელად იმედი მაქვს, რომ 26 ოქტომბრის არჩევნებზე აქტივობა ისტორიული იქნება და თქვენ ერთობლივად გადაწყვეტთ თქვენი ქვეყნის მომავალს“, – აღნიშნა ჰერჩინსკიმ.

ამასთან, ევროკავშირის ელჩის განცხადებით, ევროკავშირი არ არის საარჩევნო პროცესის ნაწილი.

„ჩვენ არ ვიყრით კენჭს არჩევისთვის ან ხელახალი არჩევისთვის. ესენი არიან ქართული პოლიტიკური პარტიები, რომლებიც ერთმანეთს ეჯიბრებიან. მათ მოუწევთ, გადაწყვეტა, არჩევნების შედეგების საფუძველზე, რა მთავრობა ჩამოყალიბდება. ჩემი მხრიდან, როგორც ევროკავშირის წარმომადგენელის საქართველოში, ნება მომეცით კიდევ ერთხელ მოვუწოდო ყველა ქართველს წავიდნენ არჩევნებზე და მისცეს ხმა. ეს თქვენი კონსტიტუციური უფლებაა, მაგრამ ეს ასევე თქვენი სამოქალაქო მოვალეობაა. გთხოვთ, წადით და მეცით ხმა. თქვენი ხმა ნამდვილად მნიშვნელოვანია. თქვენ გადაწყვეტთ, როგორი ქვეყანა იქნება საქართველო მომავალში. საქართველოს მომავალი თქვენს ხელშია“, – განაცხადა ჰერჩინსკიმ.

მისივე თქმით, არჩევნების შემდეგ ევროკავშირი იმუშავებს საქართველოს ახლად არჩეულ მთავრობასთან, რათა ხელახლა დაიწყოს საქართველოს გაწევრიანების პროცესი.

„27-მა ევროპელმა ლიდერმა ივნისში, რამდენიმე თვის წინ, გადაწყვიტა, შეეჩერებინა საქართველოს ევროკავშირში გაწევრიანების პროცესი, საპასუხოდ რამდენიმე რთულ და პრობლემურ მოვლენაზე, რაც აქ მოხდა. გულწრფელად იმედი მაქვს, რომ არჩევნების შემდეგ, ვინც არ უნდა გაიმარჯვოს, ჩვენ ძალიან სწრაფად ვიმუშავებთ ერთად საქართველოს ახლად არჩეულ მთავრობასთან, რათა ხელახლა დავიწყოთ საქართველოს გაწევრიანების პროცესი. სამწუხაროდ, ბოლო რამდენიმე თვის განმავლობაში ბევრი დრო დაიკარგა. გაწევრიანების პროცესი შეჩერდა. ეს ხდება მაშინ, როდესაც უკრაინა და მოლდოვა სწრაფად მიდიან წინ ევროკავშირში ინტეგრაციის გზაზე. ჩვენ ნამდვილად გვჭირდება, დავეწიოთ მათ. ყველაფერი დამოკიდებულია 26 ოქტომბრის ხმის მიცემაზე. ასე რომ, კიდევ ერთხელ მოვუწოდებ ყველა ქართველ მოქალაქეს, ვისაც აქვს ხმის მიცემის უფლება, გამოიყენოს თავისი უფლება და წავიდეს ხმის მისაცემად. როგორც ევროკავშირმა, ჩვენ ნათლად გამოვხატეთ, რომ მზად ვართ, ვიმუშაოთ საქართველოს ნებისმიერ მთავრობასთან, რომელიც აირჩევა 26 ოქტომბრის არჩევნების შემდეგ. ჩვენი მხრიდან, ნათლად და მკაფიოდ გამოვხატეთ, ჩვენი კარი ღიაა საქართველოსთვის. ჩვენ გელოდებით. ნუ დავკარგავთ კიდევ ერთ წუთს. მოდით, დავუბრუნოთ საქართველო ევროკავრის გზას“, – განაცხადა ჰერჩინსკიმ.

რამდენიმე კვირაა ოკუპირებულ ცხინვალის რეგიონში, სოფელ ღრომში ნავთობის საბადოს განვითარების მიზნით, გეოლოგიური-საძიებო სამუშაოები დაიწყო. როგორც რუსული  მედია “სპუტნიკი” წერს, ცხინვალის რეგიონის საოკუპაციო რეჟიმის ე.წ პრეზიდენტმა ალან გაგლოევმა ამასთან დაკავშირებით განაცხადა, რომ “ეს ნაბიჯები რესპუბლიკის ეკონომიკის ახალ სექტორს შექმნის”.

“სპუტნიკის” ინფორმაციით, ნავთობის საძიებო სამუშაოების ამ მიზნით რეგიონში 200 მილიონ რუბლზე მეტი ღირებულების სპეციალური აღჭურვილობა შემიტანეს, მათ შორის თანამედროვე საბურღი მოწყობილობა. პროექტის ინვესტორი ალბერტ ჯუსოევია, სამუშაოებს “ირნეფტეგაზი” აწარმოებს. კომპანიაში 50 მდე პირია დასაქმებული. სპეციალისტები დასავლეთ ციმბირიდან ჩაიყვანეს.

2024 წლის აპრილში რუს ინვესტორებსა და საოკუპაციო რეჟიმის მთავრობას შორის ორ საინვესტიციო ხელშეკრულებას მოეწერა ხელი. შეთანხმებები ეხებოდა ოკუპირებულ დაბა კვაისაში სასტუმროს მშენებლობას და ნავთობის საბადოების კვლევას.

საქართველოში ამერიკის შეერთებული შტატების საელჩო სოციალურ ქსელში მორიგ „ქარდს“ აქვეყნებს.

აშშ-ს საელჩო ამჟამად წერს: „დემოკრატები ოპოზიციას არ კრძალავენ“.

„დემოკრატები ოპოზიციას არ კრძალავენ“,- ნათქვამია საელჩოს განცხადებაში.

ცნობისთვის, უკვე რამდენიმე დღეა საქართველოში ამერიკის შეერთებული შტატების საელჩო სოციალურ ქსელში პოსტებითა და “ქარდებით” ქვეყნის ხელისუფლების მიერ გატარებულ პოლიტიკასა და ქართველი მაღალჩინოსნების მიერ გაჟღერებულ მთავარ გზავნილებს ეხმაურება. გზავნილებს შორის, რომლის საპასუხოდაც აშშ-ის საელჩომ პოსტები უკვე გაავრცელა, საქართველოში მეორე ფრონტის გახსნისა და “ქართული ოცნების” დამფუძნებლის ბიძინა ივანიშვილის “კრედიტ სუისთან” ურთიერთობის საკითხები იყო. ასევე, ამერიკის შეერთებული შტატების საელჩომ, 3 ოქტომბერსაც გამოაქვეყნა ქარდი, წარწერით: „იზოლაციაში ქვეყანა ვერ ვითარდება. საქართველოს დასავლეთისგან იზოლაცია მისი ხალხის ინტერესებს ეწინააღმდეგება“.

ზურაბიშვილის ვიზიტი და მის მიერ გამართული საარჩევნო აგიტაცია გერმანიაში, სადაც 2017 წლიდან უცხოელ პოლიტიკოსებს ქვეყანაში მიმდინარე საარჩევნო კამპანიის წარმოება ეკრძალებათ – გერმანიის ელჩი „ქრონიკასთან“ კანონდარღვევის რეაგირებაზე არაფერს ამბობს და აცხადებს, რომ გერმანიის პრეზიდენტთან შეხვედრის გარდა, სხვა შეხვედრების დეტალები მისთვის უცნობია.

ვიზიტისას ზურაბიშვილმა განაცხადა, რომ გერმანიის პრეზიდენტი მიესალმა ქართულ ქარტიას, თუმცა ელჩს ეს ინფორმაცია არ დაუდასტურებია და ვერც გერმანიის პრეზიდენტის, ვალტერ შტაინმაიერის მსგავსი პოზიცია გაიხსენა.

„როგორც მახსოვს, პრეზიდენტმა განაცხადა, რომ მიესალმება საქართველოს პრეზიდენტის მუშაობას ევროკავშირში გაწევრიანების კუთხით და რომ ევროკავშირის მიესალმება საქართველოს ევროინტეგრაციას, თუ საქართველო შეასრულებს მოთხოვნებს. მაგრამ, რაც არ უნდა სამწუხარო იყოს, დღეს საქართველო შორდება ევროკავშირს. ჩვენ ინფორმირებულები ვიყავით, რომ მას გერმანიის პრეზიდენტთან სურდა შეხვედრა. ჩვენ არ ვიცით საქართველოს პრეზიდენტის სხვა შეხვედრების დეტალების შესახებ, მაგრამ, ჩვენ მივესალმებით პრეზიდენტის გერმანიაში ვიზიტს და ვფიქრობთ, რომ ჩვენი პერსპექტივიდან ყველაფერი კარგადაა“, – განაცხადა ელჩმა.