“ნათენაძის ღვინის მარნის“ მფლობელი და “ვარძიის ტერასების“ ერთ-ერთი დამფუძნებელი, გიორგი ნათენაძე სოციალურ ქსელში ტერასების მდგომარეობის ამსახველ ვიდეოებს აქვეყნებს და წერს, რომ 2021 წლიდან ის ოფიციალურად უმიზეზოდ გადააყენეს დირექტორობიდან პარტნიორებმა და შედეგიც სახეზეა.

მანვე აღნიშნა, რომ ტერასების დღევანდელი მდგომარეობა მას აღარ ეხება, არამედ იმ ხალხს, ვინც აპირებს მთავრობაში მოსვლას და კეთილი სურვილების ასრულებას ისე, როგორც ამ ისტორიული მემკვიდრეობის სახე გამოიყურება ახლა.

“ყოველ წელს ვითმენ რაიმე დავწერო თუ არ დავწერო ტერასებზე, რომელზეც ერთ დროს ყოველდღე სიყვარულით, სიხარულით და ხალისით გიყვებოდით ხიზაბავრის დარიჯების აღმშენებლობის, აღდგენის და მესხური ვაზის გაშენების ამბებს.

ხშირად ბევრი ნაცნობი თუ უცნობი მირეკავს და მწერს ტერასების ასეთ მდგომარეობაში არსებობის შესახებ და მიჭირს პასუხის გაცემაც და ახსნაც. მე იქ ყველაფერი დავკარგე, აქვე გეტყვით რომ 2021 წლიდან მე ოფიციალურად უმიზეზოდ გადამაყენეს დირექტორობიდან პარტნიორებმა და შედეგიც სახეზეა. ასე რომ ტერასების დღევანდელი მდგომარეობა მე აღარ მომკითხოთ.
მოჰკითხეთ იმ ხალხს, ვინც აპირებს მთავრობაში მოსვლას და კეთილი სურვილების ასრულებას ისე, როგორც ამ ისტორიული მემკვიდრეობის სახე გამოიყურება ახლა.

გული მწყდება და მეწვის იმ ნაშრომის განადგურებას რომ ვუყურებ რაშიც ძალიან ბევრი წლები, ძალიან დიდი შრომა და მთელი გული ჩავდე.

აღარ ვლაპარაკობ იმ ხალხზე და დარაჯებზე ვინც იქ მუშაობს რა არაადამიანურ პირობებში უწევთ მუშაობა და ღამის თევა ეგრეთ წოდებულ რკინის ვაგონში. მათ არაფერი მოეკითხებათ, მოსაკითხი მენეჯმენტშია და პარტნიორებში.
საუკუნეების შემდეგ აღდგენილი და გაბრწყინებული ისტორიული მნიშვნელობის ტერასების ასეთ დღეში ჩაგდება ძალიან დიდი და მიზანმიმართული დანაშაულია და აუცილებლად დაისჯება ყველა ვისაც ამაში წვლილი მიუძღვის“, – წერს გიორგი ნათენაძე.

ინფორმაციისთვის, 2014 წლის ბოლოდან შპს “ვარძიის ტერასებში“ გიორგი ნათენაძის პარტნიორები გახდნენ მამუკა ხაზარაძე და ბადრი ჯაფარიძე. საჯარო რეესტრის მონაცემებით შპს “ვარძიის ტერასების“ 7%-იანი წილის მფლობელი გიორგი ნათენაძეა, 93% თანაბრადაა გადანაწილებული – მამუკა ხაზარაძესა (46.5%) და ბადრი ჯაფარიძეს (46.5%) შორის.

არჩევნები საქართველოს მოსახლეობის საქმეა, ვფიქრობ, თქვენ, ყველამ უნდა მიიღოთ გადაწყვეტილება, როგორი მმართველობა გსურთ საქართველოში სამომავლოდ, – ამის შესახებ გერმანიის ელჩმა, პეტერ ფიშერმა განაცხადა.

გერმანიის ელჩს კითხვა დაუსვეს ევროკავშირის ელჩის, პაველ ჰერჩინსკის მიერ არჩევნებთან დაკავშირებით დღევანდელი განცხადების იმ ნაწილზე, სადაც ის ამბობს: „დაველოდებით ეუთო/ოდირის შეფასებას. შემდეგ მზად ვიქნებით, ვუპასუხოთ ნებისმიერ მოვლენას, მათ შორის საარჩევნო ძალადობის ყველაზე ცუდ სცენარს და არჩევნების გაყალბების შესაძლებლობას. ეს ჩვენ გამოვცადეთ ბელარუსის შემთხვევაში და გულწრფელად იმედი მაქვს, რომ არასდროს გამოვცდით საქართველოს შემთხვევაში“.

„არ მინდა სპეკულირება. არჩევნები საქართველოს მოსახლეობის საქმეა. ვფიქრობ, თქვენ ყველამ უნდა მიიღოთ გადაწყვეტილება, როგორი მმართველობა გსურთ საქართველოში სამომავლოდ და რომელი მიმართულება გსურთ, რომ თქვენს ქვეყანას ჰქონდეს. თქვენზეა დამოკიდებული გადაწყვიტოთ, არ ვიცი, როგორი შედეგები იქნება“, – განაცხადა ფიშერმა.

არ მინდა სპეკულირება, რა იქნება არჩევნების შემდეგ, – ამის შესახებ გერმანიის ელჩმა, პეტერ ფიშერმა საქართველოს პრეზიდენტის, სალომე ზურაბიშვილის განცხადებასთან დაკავშირებით დასმული კითხვის საპასუხოდ განაცხადა.

საქართველოს პრეზიდენტმა, სალომე ზურაბიშვილმა „ევრონიუსთან“ ინტერვიუში განაცხადა: „ევროპამ უნდა დაადასტუროს, რომ არჩევნებში თუ პროევროპული პარტიები გაიმარჯვებენ, ევროკავშირი განაახლებს გაფართოების მოლაპარაკებებს იქიდან, სადაც შეჩერდა“.

„ჩვენ ახლა წინასაარჩევნო პერიოდში ვართ, მიმდინარეობს საარჩევნო კამპანია და ყველა თქვენგანს შეუძლია, გადაწყვეტილების მიღება, არჩევნებზე წასვლა. ვიმედოვნებ, ყველაფერი იქნება თავისუფალი, სამართლიანი, გამჭვირვალე, კარგად ინფორმირებული და ჩამოაყალიბებთ მთავრობას მშვიდობიანად და გააგრძელებთ ამ მშვენიერი ქვეყნის კარგ განვითარებას. ევროკავშირის ლიბერალურ დემოკრატიებში, ჩვენ ვცდილობთ, თავიდან ავირიდოთ ზედმეტი პოლარიზაცია, ზედმეტი გამარტივება. საქართველოს მოსახლეობის წინაშე არსებული საკითხები არის რთული. ეს არ არის მხოლოდ ომი და მშვიდობა, მართალი და ტყუილი. დემოკრატიაში ჩვენ დეტალურად უნდა ვისაუბროთ და გვქონდეს კონკურენცია რთულ საკითხებზე, ყოველთვის უნდა ვცდილობდეთ კონსენსუსის მიღწევას, ისეთი პოლიტიკების შექმნას, რომელიც საჭიროა ხალხისთვის.

ჩვენ საჯაროდ განვაცხადეთ და შემიძლია, გავიმეორო, რომ „უცხოური გავლენის გამჭვირვალობის შესახებ“ კანონი არ არის ევროკავშირის კანონმდებლობასთან თავსებადი. მაშასადამე, ეს არის ხელის შემშლელი საქართველოსთვის შეუერთდეს ევროკავშირს. ასეთი კანონით თქვენ არ შეგიძლიათ, შეუერთდეთ ევროკავშირს. ეს ფუნდამენტურად ეწინააღმდეგება კანონებს, რომელთაც ჩვენ ვქმნით ევროკავშირში. ევროკავშირში გაწევრიანება ნიშნავს, რომ თქვენ იღებთ ყველა ჩვენ კანონს. ეს ძალიან მარტივად გასაგებია“, – განაცხადა ფიშერმა.

რუსეთის საგარეო საქმეთა მინისტრმა, სერგეი ლავროვმა განაცხადა, რომ მოსკოვი გააგრძელებს რუსეთის მიერ ოკუპირებული ე.წ. სამხრეთ ოსეთის „დახმარებას უსაფრთხოების უზრუნველყოფაში“.

მისივე თქმით, „რუსეთის მიერ 2008 წელს მიღებული გადაწყვეტილებები გადახედვას არ ექვემდებარება.”

ამის შესახებ მან ე.წ.სამხრეთ ოსეთის ე.წ. საგარეო საქმეთა მინისტრ ახსარ ჯიოევთან მოსკოვში შეხვედრის დაწყების დროს განაცახადა.

„ჩვენ გავაგრძელებთ ჩვენი მეგობრების დახმარებას უსაფრთხოების უზრუნველყოფაში, სოციალურ-ეკონომიკური და კულტურული სფეროს განვითარებაში და სახელმწიფოს გაძლიერების სხვა მიმართულებებში, როგორც ეს ორმხრივი შეთანხმებებით არის გათვალისწინებული. 2008 წლის გადაწყვეტილებები გადახედვას არ ექვემდებარება“, – განაცხადა რუსეთის დიპლომატიის ხელმძღვანელმა.

სერგეი ლავროვმა აღნიშნა, რომ „რუსეთი და სამხრეთ ოსეთი აქტიურად თანამშრომლობენ, ხორციელდება მიმდინარე და მომავალი წლებისთვის საკონსულტაციო გეგმა.

„მჭიდროდ ვმუშაობთ ჩვენს აფხაზ მეგობრებთანაც“, – აღნიშნა სერგეი ლავროვმა.

რუსეთის საგარეო საქმეთა მინისტრმა ასევე თქვა, რომ „მთავრობათაშორისი კომისია, რომელიც სავაჭრო-ეკონომიკურ სფეროში გეგმებს ახორციელებს, ასევე ახორციელებს საინვესტიციო პროგრამას“.

„დღეს ჩვენ საკმაოდ ვრცელი დღის წესრიგი გვაქვს, ეს არის ჩვენი მოკავშირეობრივი ურთიერთქმედების შემდგომი წინსვლის საკითხები პრაქტიკული თანამშრომლობის სფეროებში, და, რა თქმა უნდა, ჰუმანიტარული საკითხებისა და საერთაშორისო დღის წესრიგის განხილვა“, – განაცხადა სერგეი ლავროვმა.

საქართველოში ევროკავშირის ელჩი პაველ ჰერჩინსკი იმედოვნებს, რომ 26 ოქტომბერს არჩევნები იქნება თავისუფალი, კონკურენტული და უმაღლესი საერთაშორისო სტანდარტებით ჩატარდება.

მისივე თქმით, დაელოდებიან ეუთო/ოდირის შეფასებას, იქნება თუ არა არჩევნები თავისუფალი და სამართლიანი.

„გულწრფელად იმედი გვაქვს, რომ მომავალი არჩევნები იქნება თავისუფალი, სამართლიანი, კონკურენტული, ინკლუზიური, გამჭვირვალე და ჩატარდება უმაღლესი საერთაშორისო და ევროპული სტანდარტების შესაბამისად. იმ შემთხვევაში, თუ არ ჩატარდება საუკეთესო საერთაშორისო სტანდარტების შესაბამისად, რაც იქნება საერთაშორისო და ადგილობრივი დამკვირვებლების აზრი, ჩვენ დაველოდებით ეუთო/ოდირის შეფასებას. შემდეგ, რა თქმა უნდა, მზად ვიქნებით, ვუპასუხოთ ნებისმიერ მოვლენას, მათ შორის საარჩევნო ძალადობის ყველაზე ცუდ სცენარს და არჩევნების გაყალბების შესაძლებლობას. ეს ჩვენ გამოვცადეთ ბელარუსის შემთხვევაში და გულწრფელად იმედი მაქვს, რომ არასდროს გამოვცდით საქართველოს შემთხვევაში.

26 ოქტომბერს ქართველებს ექნებათ შესაძლებლობა, გამოხატონ თავიანთი აზრი. გულწრფელად იმედი მაქვს, რომ აქტივობა იქნება მაღალი, ხალხი წავა არჩევნებზე და მისცემს ხმას. დიახ, ვფიქრობ, რომ ეს იქნება ისტორიული არჩევნები, რომელიც გადაწყვეტს საქართველოს მომავალს. საქართველოს მთავრობამ მოიწვია საერთაშორისო გრძელვადიანი სადამკვირვებლო მისია. ეს მისია უკვე ჩამოვიდა. მისია შედგება ეუთო-ს ყველა წევრი ქვეყნისგან, მათ შორის ევროკავშირის 27 წევრი ქვეყნიდან ჩამოსული დამკვირვებლებისგან. ეს არის საერთაშორისო სტანდარტის დამდგენი, როდესაც საქმე ეხება საარჩევნო დაკვირვებას. დაველოდებით ეუთო/ოდირის საარჩევნო მისიის შეფასებას და ისინი გვეტყვიან, რას უნდა ველოდოთ: იქნება თუ არა არჩევნები თავისუფალი და სამართლიანი. ჩვენ გულწრფელად იმედი გვაქვს, რომ ასეც იქნება“, – განაცხადა ჰერჩინსკიმ.

საარჩევნო კამპანიის დროს ბევრს საუბრობენ პოლიტიკურ პარტიებზე და პოლიტიკოს კანდიდატებზე, მაგრამ არჩევნებში ყველაზე მნიშვნელოვანი არის ამომრჩეველი, რომელსაც უფლება აქვს იცოდეს, თუ რას წარმოადგენენ ის პარტიები, რომლებსაც აძლევენ ხმას, – ამის შესახებ საქართველოში აშშ-ის ელჩმა, რობინ დანიგანმა განაცხადა.

„ჩვენ აქ ვართ იმისთვის, რომ ავამოქმედოთ ე.წ საარჩევნო კომპასი 24. მინდა ვთქვა, ცოტა რამ, თუ როგორ იმოქმედებს ეს ხელსაწყო. საარჩევნო კამპანიის სეზონის დროს ძალიან ბევრს საუბრობენ პოლიტიკურ პარტიებზე და პოლიტიკოს კანდიდატებზე, მაგრამ არჩევნებში ყველაზე მნიშვნელოვანი არის ამომრჩეველი. ქართველ ხალხს აქვს უფლება, იცოდეს, რას წარმოადგენენ ის პარტიები, რომლებსაც აძლევენ ხმას“, – განაცხადა ელჩმა.

რობინ დანიგანი იმედოვნებს, რომ „ამომრჩევლები კარგად დააკვირდებიან, ვის მისცემენ ხმას“.

„ეს არის მიზეზი იმისა, რომ ჩვენ ვთანამშრომლობთ გერმანიასთან და ევროკავშირთან ამ პროექტზე, რათა უზრუნველვყოთ, რომ ქართველი ამომრჩევლები გავიდნენ, ხმა მისცენ, იცოდნენ, რომ მათი ხმა საიდუმლოა; იციან, რომ არჩევნები სამართლიანია და პარტიები, რომლებსაც აძლევენ ხმას, წარმოადგენენ იმას, რაც მათ, ქართველ ამომრჩეველს სურს. იმედი მაქვს, ქართველები კარგად დააკვირდებიან, ვის მისცემენ ხმას და დარწმუნდებიან, რომ ხმის მიცემით, თანამდებობაზე იქნებიან ის ადამიანები, რომლებიც გამოხატავენ ქართველი ხალხის ნებას“, – განაცხადა რობინ დანიგანმა.