ცესკოს თავმჯდომარე მოადგილესთან და უწყების სტრუქტურული ერთეულების ხელმძღვანელ პირებთან ერთად ეუთო/ოდირის სადამკვირვებლო მისიის ხელმძღვანელებს და წარმომადგენლებს შეხვდა. ინფორმაციას ცესკო ავრცელებს.

ცესკოს ინფორმაციითვე, ეუთო/ოდირის წარმომადგენლებს გიორგი კალანდარიშვილმა დეტალური ინფორმაცია მიაწოდა არჩევნების დღიდან ამ დრომდე განვითარებულ მოვლენებთან და ყველა იმ საკითხთან დაკავშირებით, რომელიც ბოლო დღეების განმავლობაში ვრცელდებოდა საარჩევნო პროცესთან მიმართებაში.

„ამასთან, საარჩევნო ადმინისტრაციამ კიდევ ერთხელ დაადასტურა მზაობა დელეგაციის წევრებისთვის ყველა საინტერესო ინფორმაციის დროულად და სრულყოფილად მიწოდების შესახებ.

გიორგი კალანდარიშვილმა მისიის წარმომადგენლებს მადლობა გადაუხადა საარჩევნო ადმინისტრაციის საქმიანობის ობიექტურად, მიუკერძოებლად და დადებითად შეფასებისთვის. როგორც მან აღნიშნა საარჩევნო ადმინისტრაცია გაეცნო ეუთო/ოდირის სადამკვირვებლო მისიის ანგარიშს და ყველა იმ მიგნებასა თუ წუხილს, რომელიც დოკუმენტში არის აღნიშნული. კალანდარიშვილმა დაადასტურა მზაობა, რომ მოხდება ამ ინფორმაციის გაანალიზება და კომპეტენციისა და შესაძლებლობის ფარგლებში გათვალისწინება.

გიორგი კალანდარიშვილის განცხადებით, ეს იყო პირველი არჩევნები, რომელზეც საარჩევნო ელექტრონული ტექნოლოგიები ფართო მასშტაბით იქნა გამოყენებული და მნიშვნელოვანია ამ პროცესის კიდევ უფრო გაუმჯობესებისთვის სადამკვირვებლო ორგანიზაციების მხრიდან ობიექტური მოსაზრებების და რეკომენდაციების მოსმენა.

ეუთო/ოდირის მისიას ოუენ მერფი ხელმძღვანელობს. მასთან ერთად დღევანდელ შეხვედრას ესწრებოდნენ მისიის უფროსის მოადგილე მარსელ ნაჯი, საარჩევნო საკითხების ანალიტიკოსი მარცელა მაშკოვა, ანალიტიკოსი ანა მელიქიანი.
საარჩევნო ადმინისტრაციის მხრიდან შეხვედრას ესწრებოდნენ იურიდიული დეპარტამენტის უფროსი გიორგი სანტურიანი და საარჩევნო პროცესების მართვის დეპარტამენტის უფროსი ეკა ცაბაშვილი.

შეხვედრა ცესკოში 31 ოქტომბერს გაიმართა“, – ნათქვამია ინფორმაციაში.

ბაიდენის ადმინისტრაცია და სხვა დასავლური მთავრობები თავიანთი სადამკვირვებლო მისიების დეტალურ ანგარიშებს არ დაელოდნენ და არჩევნების შედეგები კითხვის ნიშნის ქვეშ დააყენეს, – ამის შესახებ ნათქვამია ვაშინგტონში განთავსებული კვლევითი ორგანიზაციის, „ქუინსი ინსტიტუტის“ მიერ საქართველოს შესახებ გამოქვეყნებულ სტატიაში.

როგორც სტატიის ავტორი, ევრაზიის პროგრამის დირექტორი ანატოლ ლივენი წერს, ბაიდენის შეფასება, რომ, საერთაშორისო და ადგილობრივი დამკვირვებლების თანახმად, არჩევნები თავისუფალი და სამართლიანი არ ყოფილა, აბსურდულია.

ანატოლი ლივენი აღნიშნავს, რომ დასავლური მედია წინასწარ შემუშავებული ნარატივით ხელმძღვანელობს, რომლის მიხედვითაც, მთავრობის მიერ არჩევნების მოგების ერთადერთი გზა მის გაყალბებაზე გადის.

სტატიაში აღნიშნულია, რომ საქართველოში გამართული საპარლამენტო არჩევნების შესაძლო შედეგებისა და მოსალოდნელი განვითარების სცენარის შესახებ „ქუინსი ინსტიტუტი“ დიდი ხნით ადრე საუბრობდა. კვლევითი ორგანიზაციის პროგნოზით, არჩევნების წაგების შემთხვევაში ოპოზიციასა და პროდასავლურ „ენჯეოებს“ უნდა ეთქვათ, რომ არჩევნები გაყალბდა და ამის გასაპროტესტებლად ქუჩაში გადიან. ამასთან, დასავლური ქვეყნების უმრავლესობაში ქართული ოპოზიციის მოწოდებები უნდა გაეზიარებინათ და მხარი დაეჭირათ. ლივენის თქმით, საქართველოში ეს სცენარი უკვე ამოქმედებულია.

ავტორის თქმით, საქართველოს პრეზიდენტმა არჩევნებს რუსული სპეცოპერაცია უწოდა; თუმცა დასავლელი ჟურნალისტის შეკითხვაზე, შეეძლო თუ არა პრეზიდენტს ამის დასაბუთება, მან მხოლოდ ის უპასუხა, რომ საქართველოს მთავრობამ რუსული მეთოდოლოგია გამოიყენა.

სტატია დასავლური ხელისუფლებებისა და მედიის მიერ გაკეთებულ შეფასებებსაც ეხმაურება. პუბლიკაციაში აღნიშნულია, რომ არც ბაიდენის ადმინისტრაცია და არც სხვა დასავლური მთავრობები თავიანთი სადამკვირვებლო მისიების დეტალურ ანგარიშებს არ დაელოდნენ და არჩევნების შედეგები კითხვის ნიშნის ქვეშ დააყენეს.

პრეზიდენტ ბაიდენის შეფასებას, რომ, საერთაშორისო და ადგილობრივი დამკვირვებლების თანახმად, არჩევნები თავისუფალი და სამართლიანი არ ყოფილა, ანატოლ ლივენი აბსურდულს უწოდებს.

„აბსურდულია იმიტომ, რომ ადგილობრივი დამკვირვებლები იმ „ენჯეოებს“ წარმოადგენენ, რომლებიც პირდაპირ არიან დაკავშირებული ქართულ ოპოზიციასთან. იმაზე აღარ ვსაუბრობთ, რომ ამ დამკვირვებელთა დიდ ნაწილს, ძნელია, ობიექტური უწოდო“, – ამბობს ლივენი.

ისტორიულად ყველაზე სანდო მონიტორინგის მისიის, ეუთო/ოდირის შეფასებით არჩევნების გაყალბება არ მტკიცდება, ეჭვგარეშეა, რომ საქართველოს მოსახლეობის ძალიან დიდმა ნაწილმა ხმა „ქართულ ოცნებას“ მისცა, – ამის შესახებ ნათქვამია ვაშინგტონში განთავსებული კვლევითი ორგანიზაციის, „ქუინსი ინსტიტუტის“ მიერ საქართველოს შესახებ გამოქვეყნებულ მორიგ სტატიაში.

სტატიის ავტორის, ევრაზიის პროგრამის დირექტორის, ანატოლ ლივენის მოსაზრებით, საქართველოში ჩატარებული არჩევნებისთვის ნაჩქარევი განაჩენის გამოტანა სამწუხაროა.

სტატიაში ვკითხულობთ, რომ დასავლური მედიის დიდი ნაწილი საქართველოში მიმდინარე მოვლენებს ისე წარმოაჩენს, თითქოს მთავრობას მხარდაჭერა საერთოდ არ ჰქონდეს.

ავტორის თქმით, ყველა დასავლური ინსტიტუტი, დასკვნების გაკეთებამდე ეუთო/ოდირის საბოლოო შეფასებას უნდა დაელოდოს. „არჩევნებზე ორი რამ შეიძლება ითქვას – შესაძლოა, ადგილი ჰქონდა  საარჩევნო მანიპულაციებს, თუმცა იმისთვის, რომ ლეგიტიმურად შეცვალო ხმების რაოდენობის 53 პროცენტი და 38 პროცენტამდე დაიყვანო, მასობრივი გაყალბების მტკიცებულება გჭირდება“, – ამბობს ლივენი.

სტატიაში ნათქვამია, რომ დასავლეთის მხრიდან გაკეთებულ კომენტარებს, შესაძლოა, მძიმე შედეგები მოჰყვეს არამარტო საქართველოსთვის, არამედ მის ფარგლებს გარეთაც.

„დასავლურ მედიაში საქართველოს შესახებ მოვლენების გაშუქება ძირითადად ქართული ოპოზიციის წევრებთან ჩაწერილ ინტერვიუებზე დაყრდნობით ხდება. ძალიან იშვიათია, მოისმინო იმ მოქალაქეების აზრი და ახსნა-განმარტება, რომლებმაც ხმა მთავრობას მისცეს. ასევე, დასავლეთში ბევრი ჟურნალისტი ფიქრობს (შესაძლოა გაუცნობიერებლადაც), რომ მათ ყურადღებას მხოლოდ პროდასავლურად განწყობილი ქართველები იმსახურებენ“, – წერს სტატიის ავტორი.

მისივე თქმით, შესაძლოა, მთავრობა აზვიადებდეს, როდესაც ამბობს, რომ დასავლეთი და ქართული ოპოზიცია მათ რუსეთთან ახალი ომის დაწყებისკენ უბიძგებენ, თუმცა გაზვიადებული შესაძლოა, არ იყოს მოწოდებები რუსეთთან ეკონომიკური ურთიერთობის შეწყვეტის თაობაზე, რაც ქართულ ეკონომიკას დააზიანებს.

„ამასთან, ძალიან უხერხულია, როდესაც ვაშინგტონში, ლონდონსა და ბერლინში უსაფრთხოდ მოკალათებული მაღალანაზღაურებადი დასავლელი კომენტატორები იმთავითვე არალეგიტიმურს და სულელურს უწოდებენ პატარა და ღარიბი ქვეყნის მოქალაქეების შიშებს, რომელიც მათ დიდ და საშიშ მეზობელთან ურთიერთობებს უკავშირდება“, – აღნიშნავს სტატიის ავტორი.

დასკვნით ნაწილში ავტორი ამბობს, რომ საქართველოს მოსახლეობის დიდი ნაწილი მმართველ პარტიას მხარს ორი ფაქტორიდან გამომდინარე უჭერს: სტაბილურობის შენარჩუნება, რუსეთთან კონფრონტაციის თავის არიდება და დასავლეთის ქედმაღლური დირექტივებით გამოწვეული გულისწყრომა, რომელიც ხშირად, ქართულ ეროვნულ ინტერესებსა და ტრადიციებს საერთოდ არ ითვალისწინებს.

„ცუდი იდეაა ადამიანებთან საუბრის დაწყება იმის თქმით, რომ მათ შეხედულებებს შედეგზე გავლენა ვერ ექნება, რადგან ისინი უცოდინარი და გაუნათლებელი რუსული მარიონეტები არიან, რომლებიც წესით იმასაც არ იმსახურებენ, რომ ხმის უფლება ჰქონდეთ“, – ვკითხულობთ სტატიაში.

თუკი ვინმე თენგოსა და ბატონი გეგელიას ტოპტვინების იმედად არის ამ თუ სხვა ქვეყანაში, მათი დიდი შეცდომაა. ეს შეცდომა არაერთხელ დაუშვიათ ზუსტად ევროპელ პოლიტიკოსებს, ჩინოსნებს თუ დიპლომატებს. გავიგე, ერთხელ შეგეშალა, ორჯერ, სამჯერ, მაგრამ შვიდჯერ?! სადღაც ხომ უნდა გაჩერდნენ, – განაცხადა საქართველოს პარლამენტის თავმჯდომარემ, „ქართული ოცნების“ პოლიტსაბჭოს წევრმა, შალვა პაპუაშვილმა მედიასთან.

მისივე თქმით, ვიღაცას არ მოეწონა, ქართველი ხალხის არჩევანი და „ან უნდა გადაგვასახლონ ქართველი ხალხი აქედან და დანიშნონ ის, ვინც უნდათ, ან უნდა შეეგუონ ამ არჩევანს“.

„მაგრამ ქართველმა ხალხმა არჩევანი გააკეთა და ამ არჩევანს უნდა მიყვნენ. ბოლო პერიოდში ვნახეთ უკვე კომიკურ დონეზე დასული ბატონი თენგო და გუშინ ბატონი გრიგოლიც ვნახეთ, რომელიც ტოპტვინებთან, ტოპ აიტისპეციალისტებთან ერთად ტოპანალიზს აკეთებს. ეს ხომ სირცხვილია უკვე და ამ ხალხის იმედად არიან მათ შორის ის უცხოელი აქტორები, რომლებიც ახლა აკეთებენ განცხადებებს, რომელიც ადრეც გაუკეთებიათ“, – აღნიშნა პაპუაშვილმა.

პარლამენტის თავმჯდომარემ გაიხსენა მიხეილ სააკაშვილის ჯანმრთელობასთან დაკავშირებული ბრალდებებიც და აღნიშნა, რომ იმ ტყუილისთვის ბოდიშიც არავის მოუხდია.

„გვახსოვს უცხოელი მინისტრების, პრეზიდენტების განცხადებები, ხომ აღმოჩნდა ტყუილი დაბრალება, როგორც დღეს ხან სამი მინისტრი, ხან 13, ხან პრეზიდენტი და ხან ვინ რომ აკეთებს განცხადებას და აბრალებს საქართველოს, ქართველ ხალხს, თითქოს რაღაც წესების დარღვევა იყო. ზუსტად იგივე ხალხი, იგივე ევროპელები, იგივე ჩინოსნები და დიპლომატები გვაბრალებდნენ სააკაშვილის ტანჯვა-წამებას, რაც აღმოჩნდა ტყუილი და შემდეგ ბოდიშიც არ მოიხადეს, გვაბრალებდნენ სანქციების გვერდის ავლას, რაც აღმოჩნდა ტყუილი და შემდეგ ბოდიშიც არ მოიხადეს. ახლა გვაბრალებენ იმას, რასაც გვაბრალებენ, რაც ასევე დადასტურდება, რომ ტყუილია. შემდეგ ბოდიშსაც არ მოიხდიან. ამასობაში ჩვენ ნერვებს დაგვაწყვეტენ, ერთმანეთს გადაგვკიდებენ, დაგვაპირისპირებენ საზოგადოებას ერთმანეთთან. რა როგორ მოხდება, კაციშვილმა არ იცის. მერე ხელებს დაიბანენ, შემოგვხედავენ და წუხილს გამოთქვამენ, რომ საქართველოში არეულობაა. ამ დონემდე მიიყვანენ ამ ქვეყანას და ბოდიშსაც არ მოიხდიან იმის გამო, რაც მათი ქმედებით არის. ასე რომ, თუკი ვინმე თენგოს და ბატონი გეგელიას ტოპტვინების იმედად არის ამ თუ სხვა ქვეყანაში, ეს მათი დიდი შეცდომაა. ეს შეცდომა არაერთხელ დაუშვიათ ზუსტად ევროპელ პოლიტიკოსებს, ჩინოსნებს თუ დიპლომატებს. გავიგე, ერთხელ შეგეშალა, ორჯერ, სამჯერ, მაგრამ შვიდჯერ?! სადღაც ხომ უნდა გაჩერდნენ. კიდევ ერთხელ მოვუწოდებ ყველას, აღიარონ ეუთო/ოდირის დასკვნა, ვერ გაექცევიან ვერც ამ დასკვნას და ვერც იმ მილიონ 120 ათასამდე ამომრჩეველს, რომელმაც ხმამაღლა, მკაფიოდ დაუჭირა მხარი არა უბრალოდ „ქართულ ოცნებას“, არამედ „ქართული ოცნების“ მიერ გატარებულ პოლიტიკას და მომავალ გეგმებს, ეს არის დემოკრატია და ყველა შეეგუოს და აღიაროს დემოკრატია“, – განაცხადა შალვა პაპუაშვილმა.

ზოგიერთმა უცხოელმა კოლეგამაც კი გვითხრა, რომ თვალშისაცემია საგარეო დონეზე სალომე ზურაბიშვილის დესტრუქციული ქმედება – ნახევარი სამყარო ტელეფონით შეწუხებული ჰყავს, ურეკავს, რომ ჩამოიქცა ქვეყანა, ხან რას ამბობს და ხან რას, – ამის შესახებ საქართველოს პარლამენტის თავმჯდომარემ, შალვა პაპუაშვილმა დღეს პარტიის ოფისში გამართულ პრესკონფერენციაზე განაცხადა.

მისი თქმით, პრეზიდენტმა ან თქვას, რომ ჭორაობდა, ან წარმოადგინოს მტკიცებულებები.

„სალომე ზურაბიშვილი უკვე საერთაშორისო დონეზე გახდა ცნობილი, რომ ბრალს დებს და შემდეგ მტკიცებულებებს არ წარადგენს. აშშ-ის საგარეო საქმეთა სამინისტროს პრესმდივანსაც მოუწია იმის ხაზგასმა, რომ თუ ბრალს დებთ, მტკიცებულებებიც უნდა წარადგინოო.

იცით, რომ სალომე ზურაბიშვილი უცხოურ პრესას დღეში რამდენიმე ინტერვიუს აძლევს და ცილს წამებს ქართველ ხალხს, სხვადასხვა ეთნიკურ ჯგუფებს საქართველოში, რომ თითქოს, მათი გაყალბებისთვის გამოყენება ხდება. ჩვეულებრივად, ეს დღეები დაკავებულია დეზინფორმაციით. სხვათა შორის, ზოგიერთმა უცხოელმა კოლეგამაც კი გვითხრა ჩვენ, რომ უკვე თვალშისაცემია საგარეო დონეზე სალომე ზურაბიშვილის დესტრუქციული ქმედება, ერთის მხრივ ამ ინტერვიუების სახით… ტელეფონით შეწუხებული ჰყავს ნახევარი სამყარო და ურეკავს, რომ ჩამოიქცა ქვეყანა, ხან რას ამბობს და ხან რას.

გუშინ ნახეთ, რომ ის არ აპირებს მისცეს ჩვენება. სისხლის სამართლის სისტემის ახალი განმარტება მოგვცა. ამბობს, რომ მე დავაბრალე და ეს მათი ამოცანაა, რომ გამოიძინონო. მე ვთქვი, რომ ვიღაცაა სპილო და ახლა მათ მოიძიონ მტკიცებულებები, რომ ოთახშია სპილოო. რატომ უნდა მოვიტანო რაიმე მტკიცებულებაო. ეს თქვა გუშინ სალომე ზურაბიშვილმა, რომელიც წლები იყო პარლამენტის წევრი და წლებია არის საქართველოს პრეზიდენტი. ელემენტარულ სამართლებრივ საკითხშიც ვერ ერკვევა. მან ერთ-ერთ ინტერვიუში თქვა, რომ არჩევნების გასაყალბებლად გამოიყენებოდა „კარუსელიო“, ერთი პირადობის მოწმობით ხმის მიცემა დაახლოებით 17-ჯერ იყო შესაძლებელიო. ეს არის პირდაპირი ბრალდება. მან თქვა 17-ჯერო, არ თქვა 16, არ თქვა 18, არც 19 უთქვამს. 17 თქვა იმიტომ, რომ რაღაც დაზუსტებული ინფორმაცია აქვს მეთოდოლოგიასთან დაკავშირებით. ამიტომ გამოვიდეს და თქვას, რატომ 17? ეს ხომ არ არის ზოგადი განცხადება, ფიქრობ, რომ იყო დარღვევები არჩევნების დროს? თქვა პირდაპირ კონკრეტული ბრალდება. ან თქვას, რომ ის ჭორაობდა და ამ ჭორაობით იყო დაკავებული საერთაშორისო პრესასთან და ძირს უთხრიდა ქართველების რეპუტაციას, ან წარმოადგინოს მტკიცებულებები. მეორე ბრალდება იყო, რომ „ოცნებამ“, სავარაუდოდ, რუსული სპეცსამსახურებისგან მიიღო დახმარებაო. ხომ არ შეიძლება ასეთი ჭორაობით იყოს დაკავებული ადამიანი?!

გუშინ ვნახეთ ვიდეოპერფორმანსი პრეზიდენტის ადმინისტრაციაში. ძნელი იყო გარჩევა რაზე იყო საუბარი, მაგრამ, თითქოს ხდება რეგისტრატორის მიერ არაუფლებამოსილი პირის გატარება სიაში. სინამდვილეში, ვიდეოშიც ჩანს რა ხდება. ადამიანი არის მისული პასპორტით და არა პირადობის მოწმობით. ადამიანმა დასწამა ცილი ცესკო-ს, კომისიის წევრებს, თქვა რომ ეს უნდა გამოიძიონ, პროკურატურამ დაიწყო გამოძიება და უარი თქვა მტკიცებულებების მიცემაზე, გამოვიდა პრესკონფერენციაზე ვითომ რაღაც მტკიცებულებები წარმოადგინა და იქაც ცილი დასწამა ყველას“, – განაცხადა პაპუაშვილმა.

გუშინ გამოქვეყნდა ევროკომისიის გაფართოების ანგარიში, სადაც საუბარია საქართველოს მიერ გადადგმულ ნაბიჯებზე. საერთო შეფასებით, საქართველო პროგრესირებს ევროკავშირში წევრობის გზაზე. ჩვენ დადებითად ვაფასებთ ევროკომისიის ანგარიშს, – ამის შესახებ „ქართული ოცნების“ პოლიტსაბჭოს წევრმა, პარლამენტის თავმჯდომარემ, შალვა პაპუაშვილმა პარტიის ცენტრალურ ოფისში გამართულ ბრიფინგზე განაცხადა.

პარლამენტის თავმჯდომარე საქართველოს პროგრესზე ამახვილებს ყურადღებას, რაც მისივე თქმით, ევროკომისიის ანგარიშიც აღნიშნულია.

„ევროკომისიის შეფასებით ოცდათხუთმეტი თავიდან გასული ერთი წლის მანძილზე საქართველომ კარგი პროგრესი დააფიქსირა თორმეტ თავზე, ხოლო გარკვეული პროგრესი ცამეტ თავზე. ეს არის იმის ძალიან მკაფიო დასტური, რომ მიუხედავად იმისა, რომ არჩევნების გამო საქართველოს ჰქონდა შეზღუდული დრო საპარლამენტო საქმიანობისთვის და მიუხედავად ოპოზიციის და „ენჯეოს“ სექტორის მუდმივი ობსტრუქციისა, საქართველო დგამდა მნიშვნელოვან ნაბიჯებს ევროკავშირში ინტეგრაციის გზაზე. ხაზგასასმელია, რომ ანგარიშში ოცდათხუთმეტი თავიდან მხოლოდ ერთი თავის შემთხვევაში, რომელიც მართლმსაჯულებას და ფუნდამენტურ უფლებებს შეეხება, ევროკომისიის შეფასებით არის უკუსვლა. ამასთან, ამგვარი შეფასების ძირითად მიზეზად ანგარიშში ევროკომისია ასახელებს შემდეგ საკითხებს: გენდერული კვოტირების გაუქმება, „გამჭვირვალობის კანონის“ მიღება, „ოჯახური ღირებულებების და არასრულწლოვანთა დაცვის შესახებ“ კანონის მიღება და ლგბტ პრაიდის ვერ ჩატარება. ამასთან აღსანიშნავია, რომ ამ თავში ჩვენი შეფასება თანაბარია უკრაინას და მოლდოვას შეფასებისა, ხოლო ფუნდამენტურ საკითხთა ჯგუფში, რომელშიც ეს თავი შედის საქართველო უსწრებს მოლდოვასაც და უკრაინასაც“, – განაცხადა შალვა პაპუაშვილმა.