ჩვენი გამარჯვება არის ხელის ერთი გაწვდენაზე, „ოცნებას“ რესურსი არ ეყოფა, ყველგან ბეჭებზე დავცემთ და დავამარცხებთ, – ამის შესახებ „ერთიანობა – ნაციონალური მოძრაობის“ აღმასრულებელმა მდივანმა, დავით კირკიტაძემ გარდაბნის მუნიციპალიტეტის სოფელ გამარჯვებაში მოსახლეობასთან შეხვედრის დროს განაცხადა.

„ეს შეხვედრა მნიშვნელოვანია და ნიშანდობლივია, რომ გამარჯვებაში ტარდება, რადგან ჩვენ ვართ გამარჯვებასთან ძალიან ახლოს. დღეებია დარჩენილი ჩვენს გამარჯვებამდე, დღეებია დარჩენილი ჩვენი ქვეყნის გათავისუფლებამდე ამ წარმოუდგენლად ცუდი ხალხისგან. პრორუსული მთავრობა კი არა გვყავს, პირდაპირ რუსული მთავრობა გვყავს, პირდაპირ მოღალატეობრივი. ასეთი ცუდი მთავრობა საქართველოს არ ჰყოლია არასდროს, ამიტომ ამათ საკადრისი პასუხი უნდა გავცეთ.

არჩევნების დღეს რას გასწვდებიან? ყველა ოჯახში ჩაჯდებიან და ყველა გამოსასვლელში სუს-ის მანქანას დააყენებენ? ბეჭებზე დავცემთ და ისე მოვუგებთ, გადმოვატრიალებთ და ბეჭებზე დავცემთ. არ ეყოფათ მათ რესურსი, რადგან ძალიან კარგად ვიცით, ვინ, რანი და რამდენი არიან.
ჩვენი გამარჯვება არის ხელის გაწვდენაზე და თქვენ ეს უნდა გჯეროდეთ“, – განაცხადა დავით კირკიტაძემ.

ტელეკომპანია „ფორმულა“ Edison Research-ის პოლიტიკური პარტიების რეიტინგთან დაკავშირებით საზოგადოებრივი აზრის გამოკითხვის შედეგებს აქვეყნებს.

Edison Research-ის საზოგადოებრივი აზრის გამოკითხვის შედეგებით, კითხვაზე, ხვალ რომ საპარლამენტო არჩევნები ტარდებოდეს, რომელ პარტიას მისცემდით ხმას, შედეგები ასე ნაწილდება ალოკაციით, შეწონვის მეთოდით:

„ქართული ოცნება – დემოკრატიული საქართველო“ – 33%

„ერთიანობა: ენმ, სტრატეგია აღმაშენებელი, ევროპული საქართველო“ – 19%

„კოალიცია ცვლილებისთვის: გვარამია, მელია, გირჩი, დროა“ – 13%

„ძლიერი საქართველო: ლელო, ხალხისთვის, თავისუფლების მოედანი, მოქალაქეები“ – 12%

„გახარია – საქართველოსთვის“ – 11%

„ლეიბორისტული პარტია“ – 4%

„გირჩი“ (იაგო ხვიჩია) – 4%

„პატრიოტთა ალიანსი/ალტ ინფო“ – 3%

სხვა პარტიები – 1%

ტელეკომპანიის ინფორმაციით, „ფორმულას“ დაკვეთითა და დაფინანსებით, ავტორიტეტულმა ამერიკულმა ორგანიზაციამ “ედისონ რისერჩმა” ჩაატარა საზოგადოებრივი აზრის გამოკითხვა.

გამოკითხვა ჩატარდა 17.09-29.09 პერიოდში მთელი საქართველოს მასშტაბით, ოკუპირებული ტერიტორიების გარდა.

პირისპირ კვლევის მეთოდით გამოიკითხა 1200 არჩევნებში მონაწილეობის უფლების მქონე საქართველოს მოქალაქე. ცდომილების ზღვარი +/- 2.8%, 95%-იანი ნდობის ინტერვალისთვის.

თბილისის მერის, კახა კალაძის განცხადებით, ევროპის საბჭოს საპარლამენტო ასამბლეის (PACE) წევრების დეკლარაციას „არანაირი ფასი არ აქვს“.

დედაქალაქის მერის თქმით, ადრეც ხდებოდა რეზოლუციების მიღება, შემდეგ კი ირკვეოდა, რომ “ამაში ფულს იღებდნენ”.

“არანაირი ფასი არ აქვს. იცით ვინ არის კონკრეტული დეპუტატი, მისი წარსული? მოიძიეთ, საინტერესო წარსული აქვს. იცით რატომ არ აქვს ამას ფასი? რამდენიმე თვის წინ, როდესაც რეზოლუციების მიღება ხდებოდა, შემდეგ ირკვეოდა, რომ ამაში ფულს იღებდნენ. წარმოგიდგენიათ, რაზეა საუბარი? – თეთრზე შავს გეუბნებიან, ამაში ფულს იღებენ, ამაზე უფრო დიდი სიბინძურე რა უნდა იყოს? იგივე ანტი-დემოკრატიულობის თვალსაზრისით, რა გააკეთა საქართველომ ანტი-დემოკრატიული? – მსგავსი ფაქტი არ არსებობს. გვაქვს თავისუფლება, მედია და პოლიტიკური პლურალიზმი, სიტყვის თავისუფლება, ბიზნესის თავისუფლება. ყველა მიმართულებით გვაქვს წინსვლა. ერთადერთი არის ის, რომ ვიღაცებს არ ვემონებით და ვატარებთ ამ ქვეყნის ინტერესს”,- განაცხადა კალაძემ.

ინფორმაციისთვის, ევროპის საბჭოს საპარლამენტო ასამბლეის (PACE) ვებგვერდზე გამოქვეყნებულ დეკლარაციაში – “არჩევნები საქართველოში – საგანგაშო მოვლენები”, რომელსაც 24 დეპუტატი აწერს ხელს, ნათქვამია, რომ “საგანგაშო ცნობები მოდის საქართველოდან, რომლებიც აჩვენებს თუ როგორ ემზადება მმართველი პარტია მომავალი საპარლამენტო არჩევნების მოპარვისთვის. დეკლარაციის თანახმად, არჩევნების შედეგების საერთაშორისო აღიარების მისაღწევად საქართველოს ოფიციალურმა პირებმა უნდა შეწყვიტონ ანტიდემოკრატიული ქმედებები და შეცვალონ კურსი.

ძალიან მძიმეა ის ფაქტი, რომ ვხედავთ საელჩოებს, უცხო ქვეყნის წარმომადგენლებს, რომლებიც პირდაპირ საარჩევნო კამპანიაში არიან ჩართულნი, – განაცხადა დედაქალაქის მერმა, კახა კალაძემ მედიასთან ბოლო დღეებში აშშ-ის საელჩოს ფეისბუქ გვერდზე განთავსებული ბანერების შესახებ საუბრისას.

მისი თქმით, მათი ბანერები სიცრუეს შეიცავს, მათ შორის, არჩევნების შედეგების პარალელურ დათვლებთან დაკავშირებით.

„ვფიქრობ, რომ ამერიკის საელჩოს დიდი პრობლემა აქვს – მგონი ფეისბუქის ადმინად ლევან ხაბეიშვილი „ჩაუდეს“. ეს ჩანს მათ მიერ გამოქვეყნებულ ბანერებზე. ყველა ბანერზე იყო სიცრუე, თუნდაც პარალელური დათვლების გაყალბებასთან დაკავშირებით. საუბარი იყო 1.8%-ზე, სინამდვილეში 2.5% იყო გაყალბებული, რომელიც ჩვენი მხრიდან იქნა აღმოჩენილი. ეს დაახლოებით 50 000 ხმა არის. ანუ ისინი 50 000-მდე ხმის მოპარვას გვაბრალებდნენ. ამას კამპანიის ხასიათი ჰქონდა და გამოყენებული იყო იმისთვის, რომ ქვეყანაში დაპირისპირება, რევოლუცია და ხელისუფლების ამ გზით შეცვლა მომხდარიყო.

ძალიან მძიმეა ეს ყველაფერი, რომ ვხედავთ საელჩოებს, უცხო ქვეყნის წარმომადგენლებს, რომლებიც პირდაპირ საარჩევნო კამპანიაში არიან ჩართულნი. თუმცა, რაც არ უნდა კამპანიაში ჩაერთონ და რაც არ უნდა გააკეთონ, 26 ოქტომბერს გაიმარჯვებს ჩვენი ქვეყანა, მშვიდობა, ქვეყნის განვითარება. არავის მიეცემა შესაძლებლობა, რომ რაიმე ზიანი მიაყენოს საქართველოს სახელმწიფოებრიობას, სუვერენიტეტს, თავისუფლებას, რაც პრინციპულად მნიშვნელოვანია. ჩვენ ვიბრძოლეთ იმისთვის, რომ დამოუკიდებლები ვყოფილიყავით და არა – რომელიმე ქვეყნის ვასალი. ჩვენ მეგობრობაც გვინდა, პარტნიორობაც, მაგრამ ეს უნდა იყოს ისე, როგორც ნორმალურ, განვითარებულ ქვეყნებს შეეფერება და არა ისე, რომ ვიღაცა დიდმა ქვეყანამ ჩვენ მიგვიჩნიოს პატარა ქვეყნად“, – აღნიშნა კახა კალაძემ.

ასევე, თბილისის მერი გამოეხმაურა ბოლო ბანერს „დემოკრატიები ოპოზიციას არ კრძალავენ“ და აღნიშნა, რომ ბოლო პერიოდში დასავლეთისგან წამოსული ორმაგი სტანდარტი შეურაცხყოფს საქართველოსა და ქართველს ხალხს.

„ესეც გაუგებარია და ტყუილია. ბოლო 50 წლის განმავლობაში 50-მდე პარტია არის აკრძალული სხვადასხვა ქვეყანაში. მაგალითად, უკრაინასა და მოლდოვაში. თუმცა, მოქმედებს ორმაგი სტანდარტი. ის დამოკიდებულება, ფარისევლობა, ორმაგი სტანდარტი, რაც ბოლო პერიოდში დასავლეთისგან მოდის, ძალიან შეურაცხმყოფელია, პირველ რიგში, ჩვენი ქვეყნისთვის, ხალხისთვის. სულელი არავინ არის. ყველაფერს კარგად ვხედავთ. ქართველები განათლებული ერი ვართ და ძალიან კარგად შეგვიძლია ანალიზის გაკეთება“, – განაცხადა კახა კალაძემ.

თბილისის საკრებულოს სხდომაზე უმრავლესობის წევრმა ლადო ბოჟაძემ განცხადება გააკეთა და ოპოზიციის მიერ ბოიკოტის გამოცხადებას გამოეხმაურა.

„მინდა ჩვენს ოპოზიციონერებს, უფრო სწორად, ცარიელ ადგილებს, რომლებსაც ხედავს ჩვენი დედაქალაქის მოსახლეობა, გადავცე გლდანელების, ნაძალადეველების, საბურთალოელების და დედაქალაქის სხვა მაცხოვრებლების დანაბარები: იქნება სადმე დაენახოთ დედაქალაქის მოსახლეობას. საკრებულოში თქვენ არ დადიხართ, არ დადიხართ არც კომისიის სხდომებზე. საქმე თქვენ არ გაგიკეთებიათ და საარჩევნო კამპანიის პერიოდში მაინც დაენახეთ საზოგადოებას.

მესმის, რომ მისასვლელი პირი არ გაქვთ და მხოლოდ საზღვარგარეთის გულის მოგება და სხვისი დავალებების შესრულება გაინტერესებთ. რატომ მოატყუეთ ჩვენი მოსახლეობა 2020 წელს, საკრებულოში არჩევის შემთხვევაში რომ რაიმე სასიკეთოს გააკეთებდით?! აღარ აპირებს საქართველოს მოსახლეობა მოტყუვდეს 2024 წლის 26 ოქტომბერს და ისევ ასეთი ცარიელი ადგილები, არაფრის გამკეთებლები აირჩიოს საქართველოს პარლამენტში“, – განაცხადა ლადო ბოჟაძემ.

როგორც უმრავლესობის წევრმა ლადო ბოჟაძემ აღნიშნა, არჩევანი ძალიან მარტივი გასაკეთებელია, ყველა ძალიან კარგად ხედავს იმ საფრთხეებს, რომელთა წინაშეც ქვეყანა დგას.

„ყველამ ერთად უნდა გადავლახოთ ის გამოწვევები და საფრთხეები, რომელთა წინაშეც ჩვენი ქვეყანა დგას. მე პირადად ის დავალება, რომელსაც ვისმენ დედაქალაქში და ჩემი კოლეგები ისმენენ მთელი ქვეყნის მასშტაბით, პირნათლად უნდა შევასრულო. აუცილებლად უნდა გავიმარჯვოთ ამ არჩევნებში. შევინარჩუნოთ მშვიდობა და სტაბილურობა. გავაგრძელოთ ქვეყნის წინსვლა და განვითარება. არავის მივცეთ საშუალება არც ქვეყნის შიგნით და არც ქვეყნის გარეთ, რომ კითხვის ნიშნის ქვეშ დააყენოს საპარლამენტო არჩევნების ლეგიტიმაციის საკითხი. ჩვენ ვემზადებით ქართველ ხალხთან ერთად არჩევნებისთვის, გამარჯვებისთვის, თქვენ კი ემზადებით 27 ოქტომბრისთვის, არეულობისთვის, დესტაბილიზაციისთვის, სისხლიანი რევოლუციისთვის. თუმცა იცოდეთ, რომ არც ქართული სახელმწიფო და არც ქართველი ხალხი ამის საშუალებას არ მოგცემთ. ყველას მოვუწოდებ მოვიდნენ არჩევნებზე, გააკეთონ ის არჩევანი, რომელიც იქნება ერთადერთი ღირსეული, რადგან ღირსეულად გააგრძელოს ჩვენმა ქვეყანამ მშვიდობითა და კეთილდღეობით წინსვლა ევროკავშირისა და ნატოსკენ“, – განაცხადა ლადო ბოჟაძემ.