საქართველოს პრეზიდენტის, სალომე ზურაბიშვილის განცხადებით, პრემიერ-მინისტრობის კანდიდატი შერჩეული ჰყავს, რომელსაც პოლიტიკური წარსული არ აქვს.

აღნიშნულის შესახებ ზურაბიშვილმა ტვ „პირველთან“ ინტერვიუში განაცხადა.

პრეზიდენტს პრემიერობის კანდიდატის ვინაობა არ დაუკონკრეტებია, თუმცა აღნიშნა, რომ მის მიერ შერჩეულ კანდიდატთან დაკავშირებით განხილვებს ოპოზიციურ პარტიებთან აპირებს, რომელთა წარმომადგენლებთანაც შეხვედრებს ორშაბათიდან იწყებს.

კითხვაზე – მზად ხართ იყოთ ქვეყნის პრემიერი? გაქვთ ამაზე ნაფიქრი? -ზურაბიშვილი პასუხობს: „რაზე მაქვს ნაფიქრი, აქ ამაზე არ გიპასუხებთ. მყავს ძალიან კარგი კანდიდატი. ჯერ ვნახოთ! ცხოვრებაში რომ არაფერია გამორიცხული, ეს არის ის ძნელი გაკვეთილი, რაც ვისწავლე წლების მანძილზე. მგონი,დღეს ყველაზე სწორ გზაზე ვდგავართ და გავყვეთ ამ გზას“, – განაცხადა ზურაბიშვილმა.

ამასთან, პრეზიდენტმა მთავრობის დაკომპლექტებაზეც ისაუბრა და აღნიშნა, რომ პარტიების წარმომადგენლებთან შეხვედრებისას თემას აქტიურად განიხილავს.

„ქარტიაში წერია, რომ პრემიერი ჩემთან კონსულტაციაში უნდა იყოს შერჩეული, მე უკვე მყავს კანდიდატი, ახლა არ გეტყვით, ჯერ პარტიებთან უნდა შედგეს კონსულტაციები და შევჯერდეთ… მე ერთ რამეში ვარ დარწმუნებული, დღეს უნდა გამოვაცხადოთ მთავრობა, ამომრჩეველმა წინასწარ უნდა იცოდეს, ვინ იქნებიან და ესენი იყვნენ მაღალი დონის პროფესიონალები, სანდოობით აღჭურვილები და არაპოლიტიკოსები. რატომ? – იმიტომ, რომ ეს არის პირველი ნაბიჯი დეპოლარიზაციისკენ, თუ მთავრობა სხვადასხვა პოლიტიკური ძალებისგან შედგება. ვხედავთ თუნდაც ამ კონსოლიდირებულ 4 პარტიას, რამდენი შიდა წყენა, სხვადასხვა მოსაზრება, მსოფლმხედველობა არსებობს, ამ ეტაპზე, როცა ერთი მიზანი გვაქვს, ის ყველაფერი გავაკეთოთ, რაც მომავალი წლის ივნისამდე მიგვიყვანს იმ ადგილზე, სადაც გვინდა ვიყოთ…

ორშაბათს პარტიებთან შეხვედრები უნდა დავიწყო, დღეს ვაცხადებ, რომ ველოდები მათ ორშაბათს იმისთვის, რომ დავიწყოთ მოლაპარაკებები, კონსულტაციები კონკრეტულ კანდიდატურებთან დაკავშირებით, ძალიან ცოტა დრო გვაქვს არჩევნებამდე. მე ხომ არ ვიცნობ ყველას – ვინ რომელი მინისტრი უნდა იყოს, ყველას ექნება საშუალება, კანდიდატურები წარადგინოს, ერთადერთი – პოლიტიკოსები ჯერჯერობით, ამ ეტაპზე, არა“, – განაცხადა ზურაბიშვილმა.

კითხვაზე, თუ რა ნიშნით შეარჩია მან პრემიერ-მინისტრობის კანდიდატი, პრეზიდენტმა უპასუხა, რომ ის „სანდოობით აღჭურვილია“.

„ამ ნიშნით – პროფესიონალი, სანდოობით აღჭურვილი, მე მგონი, ყველასთვის მისაღები. მგონი, საჭირო არის, ეს შემადგენლობა, არ ვიცი სრულყოფილი იქნება თუ არა, მთლად იდეალური რთული იქნება, იმედი მაქვს, რომ ამ მთავრობის დიდ ნაწილს ამომრჩევლებს არჩევნებამდე წარვუდგენთ, რადგან ეს იქნება კიდევ ერთი ნდობის მომენტი. პირველი, ერთპარტიულობას ვემშვიდობები, მაგრამ ამ ოთხივე პარტიას ვენდობი, რომ მიმიყვანოს ევროპამდე. მეორე, ეს მთავრობა არ იქნება იმისთვის, რომ ვიღაცამ თავისი პოლიტიკური მადა დაიკმაყოფილოს, იქნება იმისთვის, რომ ქვეყანას ემსახუროს ამ მოკლე პერიოდით. შემდეგ, როგორც ქარტიაში წერია, არჩევნები უნდა გაიმართოს – მომავალი წლის ოქტომბერში, ადგილობრივ არჩევნებთან ერთად, რაც ძალიან ბევრ ქვეყანაში ხდება. ეს იქნება პირველი არჩევნები უკვე განთავისუფლებულ გარემოში. ამ ერთი წლის მანძილზე ეს 4 პარტია იქნება იმ მდგომარეობაში პარლამენტში, რომ მთავრობაზე კონტროლი დააწესოს, ქარტია შეასრულოს და ნამდვილი პროგრამა მოამზადოს – ყველამ ცალ-ცალკე, ვინ რას გვთავაზობს, მაგრამ არა ისე, რომ არჩევნებისთვის იყოს დაწერილი, რეალური პროგრამა უნდა იყოს, ერთი წელი ძალიან კარგი დროა“, – განაცხადა ზურაბიშვილმა.

“ქართული ოცნების” წევრმა, ლადო ბოჟაძემ “დღის კურიერის” ეთერში საქართველოში აშშ-ის საელჩოს მიერ ბოლო პერიოდში გავრცელებული Facebook ბანერების თემა შეაფასა და აღნიშნა, რომ არ გაუკვირდება, “ნაციონალური მოძრაობის” შტაბს პირადად ამერიკის ელჩმა უხელმძღვანელოს.”

მისივე თქმით, მსგავსი ღია ჩარევა და გავლენის მოხდენის მცდელობა შედეგებზე, არცერთ წინა არჩევნებზე არ ყოფილა.

“მე არ გამიკვირდება, რომ ბოლო ორი კვირის განმავლობაში “ნაციონალური მოძრაობის” შტაბს პირადად ამერიკის ელჩმა უხელმძღვანელოს, ან “ახალის” შტაბს ევროკავშირის ელჩმა, რადგან ასეთი ღია ჩარევა, ასეთი ღია მცდელობა, გავლენა მოახდინოს არჩევნების შედეგებზე, ამომრჩევლის განწყობაზე, არცერთ არჩევნებზე არ ყოფილა, დამეთანხმებით. იგივე, უვიზო მიმოსვლასთან დაკავშირებით – იცით, რომ ჩვენ ძალიან დიდი შრომის შედეგად, 2017 წელს მოვიპოვეთ ეს პრივილეგია, – არც 2018-ში, არც 2020-ში არავის უხსენებია, რომ “თუ გააყალბებთ ამას ვიზამთ”. რატომ დადგა ეს საკითხი დღეს?

როდესაც ცოცხლად ტარდებოდა არჩევნების პროცესი და გვაბრალებდნენ არჩევნების გაყალბებას, აღმოჩნდა, რომ USAID-ის დაფინანსებულმა “სამართლიანმა არჩევნებმა” გააყალბა პარალელური დათვლა და ოპოზიციას სალაპარაკო მისცა, თითქოს რატომ არ უნდოდათ პარლამენტში შემოსვლა იმდენი თვის განმავლობაში. ახლა, როცა ამომრჩევლების 90% ელექტრონული ტექნოლოგიების გამოყენებით მიიღებს მონაწილეობას, როცა თავად ამერიკული კომპანიაა პასუხისმგებელი ამ ტექნოლოგიების მართვაზე, საერთაშორისო აუდიტი და სრულიად გამორიცხულია, რომ ერთი ხმაც კი გაყალბდეს და ერთი ამომრჩევლის ხმაც კი არ იყოს ასახული. ახლა რატომ დგას ეს თითქოსდა არჩევნების გაყალბების საფრთხე, რას ემსახურება ეს განცხადებები?!

გასაგებია, რომ დემოკრატიაში ოპოზიციურ პარტიებს არ აუქმებენ, მაგრამ რატომ არის გერმანიაში გაუქმებული ოპოზიციური პარტიები? ევროკავშირის სხვადასხვა სახელმწიფოებში? დემოკრატიაში პრეზიდენტობის კანდიდატსაც არ ესვრიან ორჯერ, დემოკრატიაში არ არის სიკვდილით დასჯა, მაგრამ ამერიკაში დღემდე არის.

ასეთი განცხადებები რომ ჩვენმა საელჩომ გაავრცელოს, ან ჩვენმა საელჩომ მოუწოდოს საქართველოს მოქალაქეებს, რომლებიც ათეულობით ათასნი არიან ამერიკის ტერიტორიაზე, რომ 5 ნოემბრის მერე მოსალოდნელია დიდი მასების დაძვრა ვაშინგტონში ან ნიუ-იორკში და ყურადღებით იყავითო, ამას როგორ მიიღებს ან ამერიკის სახელმწიფო, ან ამერიკის მოქალაქეები?!” – განაცხადა ლადო ბოჟაძემ.

დარწმუნებული ვარ, გულის სიღრმეში პრეზიდენტის ქარტიაზე ხელმომწერი არცერთი პარტია არ აპირებს მის შესრულებას, მით უმეტეს პრეზიდენტის პრემიერობის კანდიდატზე დათანხმებას, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

როგორც რაქვიაშვილმა აღნიშნა, სიამოვნებით დააკვირდება მორიგ „სანტა ბარბარას“.

„სჯობს გვიან, ვიდრე არასდროს, როგორც იქნა პრეზიდენტს გაახსენდა საკუთარი ქარტია და დაიწყო აქტიურობა, რაც იქ წერია რეალობას დაემსგავსოს. მე ყველაზე ნაკლებად მაღელვებდა პრემიერობის კანდიდატის ნაწილი, მაგრამ მგონია, რომ ყველაზე სახალისო ნაწილი იქნება, რადგან დარწმუნებული ვარ, არცერთი პარტია, რომელმაც ქარტიას ხელი მოაწერა გულის სიღრმეში არ აპირებს ამ ქარტიის შესრულებას, მით უმეტეს პრეზიდენტის პრემიერობის კანდიდატზე დათანხმებას. სიამოვნებით დავაკვირდები ამ მორიგ „სანტა ბარბარას“, რომელიც, სავარაუდოდ, დაიწყება, როცა პრემიერობის კანდიდატზე დაიწყებენ ვაჭრობას. დაველოდოთ, საინტერესოა, ვინ ეყოლება პრეზიდენტს პრემიერობის კანდიდატად არჩეული“, – განაცხადა რაქვიაშვილმა.

პრეზიდენტის სასახლეში საქართველოს პრეზიდენტი სალომე ზურაბიშვილი ოპოზიციის წარმომადგენლებთან პოლიტიკურ კონსულტაციებს მართავს.

“მთავარი არხი”, “ტვ-პირველი” და “ფორმულა” ერთობლივ განცხადებას ავრცელებენ.

განცხადებაში აღნიშნულია, რომ ტელეკომპანიები უარს ამბობენ “ქართული ოცნების” საარჩევნო ვიდეორგოლების ეთერში განთავსებაზე.

“ქართული ოცნება” აგრძელებს საკუთარი პოლიტიკური კამპანიისთვის უკრაინელი ხალხის ტრაგედიით სპეკულირებას და ახლა უკვე ტელევიზიებისგან მოითხოვს იმ ამორალური ბანერების ეთერში გაშვებას, რომლებიც ქუჩებში, ბილბორდებზე აქვს გამოფენილი.

ივანიშვილის კუთვნილი ხელისუფლება გვაყენებს დილემის წინაშე – ან დავუთმოთ ეთერი ზემოაღნიშნულ ვიდეორგოლებს, ან დაგვეკისრება დიდძალი ჯარიმები, რაც, შესაძლოა, არხების საქმიანობის შეჩერების საფრთხემდეც მივიდეს.

მიუხედავად იმისა, რომ ხელისუფლებისგან დაკისრებული დაუსრულებელი ჯარიმები კრიტიკული არხებისთვის მძიმე ტვირთია, ჩვენ მაინც არ ვაპირებთ, თუნდაც ირიბად, ხელი შევუწყოთ “ქართული ოცნების” რუსულ პროპაგანდას და უკრაინელი ხალხის დაცინვას.

ჩვენ სრულად ვიზიარებთ ევროკავშირის ელჩის შეფასებას, რომ ეს არის “აღმაშფოთებელი, სამარცხვინო და შემზარავი” კამპანია და, შესაბამისად, უარს ვამბობთ ამ ვიდეორგოლების ეთერში განთავსებაზე.

მივმართავთ საერთაშორისო საზოგადოებას, დასავლეთის დიპლომატიურ წარმომადგენლობებს, სამოქალაქო ორგანიზაციებსა და სახალხო დამცველს, დააფიქსირონ სათანადო რეაქცია “ქართული ოცნების” ქმედებაზე და მხარში დაგვიდგნენ კრიტიკულ არხებს ამ პრინციპულ საკითხში, რომელიც ცდება პოლიტიკური გემოვნების ჩარჩოებს და სახელმწიფოებრივი თავმოყვარეობის თემას წარმოადგენს.” – წერია განცხადებაში.

საზღვარგარეთ მყოფი ამომრჩევლები, რომელთა რეგისტრაციის მისამართი სახელმწიფო სერვისების განვითარების სააგენტოს მონაცემთა ბაზის მიხედვით ოკუპირებულ ტერიტორიაზეა ან გაურკვეველია, არჩევნებში მონაწილეობას შეძლებენ, – ამის შესახებ ცეკო-ს თავმჯდომარემ, გიორგი კალანდარიშვილმა კომისიის სხდომის შემდეგ ბრიფინგზე განაცხადა.

როგორც მან აღნიშნა, ცესკო-მ გადაწყვეტილება დღევანდელ სხდომაზე ერთხმად მიიღო და წერტილი დაუსვა ამ თემაზე ყოველგვარ სპეკულაციას.

„დადგენილების თანახმად, 26 ოქტომბრის პარლამენტის არჩევნებისთვის სხვა სახელმწიფოში შექმნილ საარჩევნო უბნის ამომრჩეველთა სპეციალურ სიაში დამატებით შევლენ ზემოაღნიშნული კატეგორიის ამომრჩევლები, რომლებიც 7 ოქტომბრის ჩათვლით დგანან საკონსულო აღრიცხვაზე. ასევე ამომრჩევლები, რომლებიც არ დგანან საკონსულო აღრიცხვაზე, მაგრამ 7 ოქტომბრის ჩათვლით რეგისტრაციას გაივლიან სხვა სახელმწიფოში შექმნილ საუბნო საარჩევნო კომისიაში, საზღვარგარეთ საქართველოს დიპლომატიურ წარმომადგენლობაში ან საკონსულო დაწესებულებაში. ამასთან, მათ უნდა ჰქონდეთ, იურიდიული ძალის მქონე, საქართველოს მოქალაქის პირადობის მოწმობა ან საქართველოს მოქალაქის პასპორტი. კიდევ ერთხელ აღვნიშნავ, რომ გადაწყვეტილება ცესკო-მ ერთხმად მიიღო და წერტილი დაუსვა ამ თემაზე ყოველგვარ სპეკულაციას.

ინიცირებული დადგენილების შინაარსმა და მისმა ინიციატორმა წევრმა „ნაციონალური მოძრაობიდან“, ასევე ცესკო-ს სხვა პარტიულმა წევრებმა, თავიანთ განცხადებებში დაადასტურეს, რომ კანონის თანახმად ცესკო პროცედურების სრული დაცვით მიყვებოდა კანონმდებლობის მოთხოვნებს და ამ მოცემულობით აღნიშნული კატეგორიის ამომრჩეველთა არჩევნებში მონაწილეობა იყო შეუძლებელი. სწორედ ამიტომ გახდა საჭირო დადგენილების მიღება, რომ მათ ეს უფლება მიეღოთ. აღსანიშნავია, რომ ინიცირებულ დადგენილების პროექტში იყო ტექნიკური უზუსტობები, ასევე საკანონმდებლო ვადებთან დაკავშირებული შეუსაბამობები. აღნიშნულთან დაკავშირებით კონსენსუსი შესაძლებელი გახადა კომისიის წევრის „ქართული ოცნებიდან“ ინიცირებულმა დაზუსტებებმა და ცვლილებებმა, რის შედეგადაც აღმოიფხვრა საკანონმდებლო წინააღმდეგობები და გაფართოვდა პირთა წრე, რომლებიც ამ დადგენილების საფუძველზე არჩევნებში მონაწილეობას შეძლებენ. საარჩევნო ადმინისტრაციისთვის მნიშვნელოვანია, ყველა ამომრჩეველმა შეძლოს მისი კონსტიტუციური უფლების განხორციელება. შესაბამისად, მოვუწოდებთ საზღვარგარეთ მყოფ აღნიშნული კატეგორიის ამომრჩევლებს, გაიარონ რეგისტრაცია უკვე შექმნილ საარჩევნო უბნებზე“, – აღნიშნა კალანდარიშვილმა.

მისივე თქმით, დღესვე, სხდომაზე ცესკო-მ კიდევ ერთი მნიშვნელოვანი განკარგულება მიიღო და არჩევნებისთვის კენჭისყრის ელექტრონული საშუალებების გამოყენებით ჩატარების უზრუნველსაყოფად საარჩევნო ბიულეტენის შევსების წესი დაადგინა.

„გადაწყვეტილების თანახმად, დეტალურად განიმარტა ბიულეტენის შევსების წესი და ბიულეტენის ბათილობის საფუძვლები. წესის თანახმად, ამომრჩეველმა სპეციალური მარკერით უნდა გააფერადოს ან მონიშნოს მისთვის სასურველი მხოლოდ ერთი პარტიის სახელწოდების წინ არსებული წრის შიდა სივრცე, ხოლო ბათილია ბიულეტენი თუ: გაფერადებულია/მონიშნულია ნებისმიერი ფორმით ერთზე მეტი პარტიის სახელწოდების წინ არსებული წრის შიდა სივრცე; არ არის გაფერადებული/მონიშნული არცერთი პარტიის სახელწოდების წინ არსებული წრის შიდა სივრცე. ამ წესის დარღვევით შევსებული და ყუთში მოთავსებული საარჩევნო ბიულეტენი კანონმდებლობის თანახმად ჩაითვლება ბათილად. ჩვენ ვაგრძელებთ ინტენსიურ მუშაობას და ამომრჩევლების ინფორმირებას, იმისათვის რომ 26 ოქტომბერს არჩევნები მაღალ პროფესიულ დონეზე, საერთაშორისო სტანდარტების შესაბამისად ჩატარდეს“, – განაცხადა კალანდარიშვილმა.

არჩევნებზე დამკვირვებლები უმჯობესია, საკუთარ დამფინანსებლებს დააკვირდნენ, როგორ იქცევიან თავად და როგორ ერევიან საარჩევნო პროცესში ყველა დაუშვებელი მეთოდით. ოპოზიციური ტელევიზიებიც სიცრუეს სიცრუეზე ავრცელებენ, რომ ამომრჩეველი გააღიზიანონ და შეცდომა დააშვებინონ,- ამის შესახებ „ხალხის ძალის“ გენერალური მდივანი დიმიტრი ხუნდაძე სოციალურ ქსელში წერს.

მისი თქმით, ოპოზიციას ჩალის ფასი აქვს, რაც არის მიზეზი გარე ძალების გააქტიურების.

„ღირსებასთან და მშვიდობასთან ბრძოლას, ქვეყნის შიგნითაც და ქვეყნის გარეთაც, ყველა წააგებს. 2024 წლის 26 ოქტომბრის არჩევნებს ქვეყნის გარეთ უფრო დიდი ფასი აქვს ვიდრე შიგნით, რადგან უდიდესი საფრთხე სწორედ გარედანაა მოსალოდნელი. ოპოზიციას რომ ჩალის ფასი აქვს, სწორედ ამიტომ გარე ძალები უკიდურესად გააქტიურდნენ და აღარაფერს ერიდებიან. არჩევნებზე დამკვირვებლები უმჯობესია საკუთარ დამფინანსებლებს დააკვირდნენ, თუ როგორ იქცევიან თავად და ყველა დაუშვებელი მეთოდით როგორ ერევიან საარჩევნო პროცესში. ოპოზიციური ტელევიზიებიც სიცრუეს სიცრუეზე ავრცელებენ, რომ ამომრჩეველი გააღიზიანონ და შეცდომა დააშვებინონ. მაგრამ საზოგადოება ყველაფერს ხედავს, ყველას ერთად აკვირდება და სულ უფრო მეტს უადვილდება გადაწყვეტილების მიღება. აქამდე მმართველი გუნდის მოწინააღმდეგეებიც კი დღეს „ქართულ ოცნებას“ უჭერენ მხარს, რადგან ნებისმიერი სხვა არჩევანი სასიცოცხლოდ სახიფათო იქნება“, – წერს დიმიტრი ხუნდაძე.