ცხადია, „ქართული ოცნების“ წრეში დიდი ნერვიულობაა და ეს წერილიც ამისი გამომჟღავნებაა, არ ვიცი, ოდესმე წაიკითხავს თუ არა აშშ-ის პრეზიდენტი, ალბათ, დღეს ნაკლებად სცალია, – ამის შესახებ საქართველოს ყოფილმა პრეზიდენტმა, სალომე ზურაბიშვილმა ბრიფინგზე განაცხადა.

მისივე თქმით, დონალდ ტრამპისა და ჯეი დი ვენსისადმი ირაკლი კობახიძის გაგზავნილ ღია წერილში ხელისუფლების სრული სასოწარკვეთილება ჩანს.

„მოვუწოდებ საზოგადოებას, წაიკითხოს ე.წ. პრემიერის წერილი აშშ-ის პრეზიდენტთან გაგზავნილი. ეს არის, პირველ რიგში, სამარცხვინო, რადგან აქ დაცული არ არის არცერთი, არც პროტოკოლური, არც მეგობრული ურთიერთობების არანაირი ნიშანი არ გააჩნია ამ წერილს. არ ვიცი, ვინ დაუწერა, არ ვიცი, რა განწყობით დაიწერა ეს წერილი, მაგრამ აქ ჩანს სრული სასოწარკვეთილება ხელისუფლებისა, რომ ბიძინა ივანიშვილმა ვერც ვერაფერი დაალაგა, ვერც ვერაფერს დაალაგებს, ვერც „მეგობარი აქტის“ შედეგებს ვერ დაალაგებს. ცხადია, რომ „ქართული ოცნების“ წრეში ძალიან დიდი ნერვიულობაა და ეს წერილი ამისი გამომჟღავნებაა. ძალიან მაინტერესებს, ოდესმე წაიკითხავს თუ არა აშშ-ის პრეზიდენტი, ალბათ, დღეს ნაკლებად სცალია, თუმცა ვინც წაიკითხავს, ძალიან სამწუხარო არის. სამწუხარო იმიტომ, რომ ეს იქნება ძალიან გამაოგნებელი, იმ ქვეყნიდან წამოსული წერილი, რომელსაც 30 წელზე მეტია, ამერიკა ყველა კუთხით და ფორმით ეხმარება.

ამერიკა, რომელმაც ჩვენ პრაქტიკულად ჯარი მოგვცა, ყოველ შემთხვევაში, მოამზადა, რომ ჰქონოდა დღევანდელი თანამედროვე სტანდარტები; ამერიკა, რომელიც მოგვეხმარა, რათა ქართული ეკონომიკა იყოს თავის ადგილას. 30 წელი ჩვენ ვიყავით ამერიკული დახმარების ერთ-ერთი პირველი ბენეფიციარი მსოფლიოში მოქალაქის მიხედვით. ეს არის ჩვენი პასუხი, ეს არის ქართული ტრადიციული მადლიერება. ჩვენი ტრადიციები სად იკარგება არ ვიცი, მაგრამ ეს არის მაჩვენებელი ხელისუფლების მორალურად და პოლიტიკურად ჩამოშლის. ეს არის ის, რაც ჩვენ დღეს უნდა დავინახოთ“, – განაცხადა ზურაბიშვილმა.

ცნობისთვის, პრემიერ-მინისტრმა, ირაკლი კობახიძემ, აშშ-ის პრეზიდენტს, დონალდ ტრამპსა და ვიცე-პრეზიდენტს, ჯეი დი ვენსს ღია წერილით მიმართა.

იმედია, საბოლოო ჯამში, ევროპა კრიზისიდან გამარჯვებული, უფრო ძლიერი გამოვა და საქართველო გახდება ნაწილი სწორედ იმ ევროპის, რომელიც დემოკრატიულ საფუძვლებს დაუბრუნდება, პატივს სცემს განსხვავებულ აზრს და არ გაიბუტება პატარა ბავშვივით, იმ ევროპის, რომლისთვისაც რთული მდგომარეობიდან გამოსავალი შეიძლება იყოს დიალოგი და არა კარის მიჯახუნება, – ამის შესახებ ევროინტეგრაციის საპარლამენტო კომიტეტის თავმჯდომარემ, ლევან მახაშვილმა პარლამენტის სესიაზე განაცხადა.

მახაშვილის თქმით, ბუდაპეშტში გამართული შეხვედრებიდან გამომდინარე შეიძლება ითქვას, რომ ევროკავშირში ჩანს კონტურები, რომ დამოკიდებულება შეიცვლება, მათ შორის საქართველოსთან მიმართებაში.

მახაშვილის განცხადებით, დღეს ევროპის მთავარი გამოწვევაა, რომ ეკონომიკურად, სამხედრო და პოლიტიკური გავლენების თვალსაზრისით საკმაოდ რთულ მდგომარეობაშია.

„ჩვენ გასული ორი დღის განმავლობაში საკმაოდ მნიშვნელოვანი შეხვედრები გვქონდა ბუდაპეშტში, ევროკავშირის წევრი ქვეყნების და კანდიდატი სახელმწიფოების პარლამენტების თავმჯდომარეების სამიტის ფარგლებში. მთავარი თემა საუბრების იყო ევროპის მომავალი. მინდა, გაგიზიაროთ ჩვენი დაკვირვებები აღნიშნული კონფერენციიდან. დღეს ევროპის მთავარი გამოწვევა არის, რომ ის ეკონომიკურად, სამხედრო და პოლიტიკური გავლენების თვალსაზრისით საკმაოდ რთულ მდგომარეობაშია, განსაკუთრებით მსოფლიოს სხვა ძალებთან შედარებით. მსოფლიოში ყველაზე დიდი ომი სწორედ მის ტერიტორიაზე მიმდინარეობს და გამოსავალიც ჯერჯერობით არ ჩანს. მთავარი ღირებულებითი კავშირი ევროკავშირის წევრი ქვეყნების აშკარად დასუსტებულია, რაც მას კიდევ უფრო მოწყვლად მდგომარეობაში აყენებს და ჩვენ ეს ნათლად დავინახეთ, მათ შორის ამ კონფერენციის მიმდინარეობისას. მსოფლიოს სხვადასხვა წერტილში მიმდინარე ცვლილებებს ევროკავშირი ან თავად მართავდა, ან შორიდან ადევნებდა თვალს. ახლა კი თავად ევროკავშირი მოიცვა ცვლილებებმა. კერძოდ, წევრ  ქვეყნებში გეომეტრიული პროგრესიით იზრდება ძალები, რომლებიც ანგრევენ ათწლეულების განმავლობაში მოქმედ პოლიტიკურ ისტებლიშმენტს. აქამდე კონსერვატიულ იდეოლოგიას უარყოფდნენ და პოლიტიკური სცენიდან რიყავდნენ. ახლა კი ამ ადამიანების რაოდენობამ და გავლენამ ისეთ მასშტაბს მიაღწია, რომ ევროპაში ახლადაღორძინებული კონსერვატიზმის იგნორირება და კრიტიკის მიუღებლობა აღარ იძლევა შედეგებს. როგორც ევროკავშირის წევრი ქვეყნის ერთ-ერთი პარლამენტის თავმჯდომარემ აღნიშნა, დემოკრატიისთვის ბრძოლის სახელით მათი ხმების ჩახშობის მცდელობა გადაიზარდა დემოკრატიისთვის ძირის გამოთხრასა და დაზიანებაში“, – განაცხადა მახაშვილმა.

ლევან მახაშვილი აცხადებს, რომ საქართველოში, დიდი ხანია, რადიკალური ოპოზიცია და მათი უცხოელი მფარველები ცდილობენ, უგულებელყონ, ჩაახშონ და შეურაცხყოფა მიაყენონ ეროვნულ, ხალხის ხმას.

„მათ ეს არ გამოუვიდათ და არც გამოუვათ. დღეს რომ ამ დარბაზის ნაწილი ცარიელია, ამის ძალიან კარგი დამადასტურებელი ფაქტია. საქართველოში მათ წააგეს ეს ბრძოლა საკუთარ ხალხთან და საკუთარ ქვეყანასთან. იმედია, საბოლოო ჯამში, ევროპა ამ კრიზისიდან უფრო გამარჯვებული, ძლიერი გამოვა და საქართველო გახდება ნაწილი სწორედ იმ ევროპის, რომელიც დემოკრატიულ საფუძვლებს დაუბრუნდება, იმ ევროპის, რომელიც  პატივს სცემს განსხვავებულ აზრს და არ გაიბუტება პატარა ბავშვივით, იმ ევროპის, რომლისთვისაც რთული მდგომარეობიდან გამოსავალი შეიძლება იყოს დიალოგი და არა კარის მიჯახუნება. ჩვენი ორმხრივი შეხვედრებიდანაც მკაფიოდ გამოჩნდა, რომ ევროკავშირში ნელ-ნელა ამის კონტურები იკვეთება. დარწმუნებულები ვართ, რომ საღი აზრი აქაც გაიმარჯვებს, მათ შორის საქართველოსთან მიმართებაში“, – აღნიშნა მახაშვილმა.

საქართველოს პარლამენტი აშშ-ს წარმომადგენლობითი პალატის მიერ მხარდაჭერილი „MEGOBARI აქტის“ საპასუხოდ სპეციალურ განცხადებას მიიღებს.

განცხადების პროექტი პარლამენტში უკვე ინიცირებულია. ინიციატორია პარლამენტის თავმჯდომარე, ფრაქციის “ქართული ოცნებისა“ და ასევე, პარლამენტში არსებული პოლიტიკური ჯგუფების ხელმძღვანელები.

განცხადების პროექტი განსახილველად საგარეო ურთიერთობათა კომიტეტს გადაეცა. მისი განხილვა კი სესიაზე ხვალ შედგება.

პარლამენტის განცხადებაზე მომხსენებელი შალვა პაპუაშვილი იქნება, რომლის თქმით, საქართველოს პარლამენტი აშშ-ს წარმომადგენლობითი პალატის მიერ მიღებულ „MEGOBARI აქტზე“ საკუთარ პოზიციას აუცილებლად დააფიქსირებს.

„დღეს საზოგადოებამ აშშ-ს პრეზიდენტის მიმართ პრემიერ-მინისტრის წერილი ნახა, რომელიც მათ შორის „MEGOBARI აქტს“ ეხება. ამავე დროს პარლამენტში ფრაქციის და პოლიტიკური ჯგუფების მონაწილეობით პარლამენტის განცხადება მომზადდა, რომელიც ამ ე,წ. მეგობარ აქტს ეხება. განცხადებაში მოცემულია ჩვენი შეფასებები და პასუხი ამ აქტთან დაკავშირებით.

ე.წ. მეგობარ აქტს სახელი თავადაც შეუცვალეს. რაც ჩვენ იქ ამოვიკითხეთ ყველაფერი იყო, გარდა მეგობრობისა. ის დაფუძნებულია არა მხოლოდ მცდარ ფაქტებზე, არამედ თავისი არსით არის იმ რეალობის ამოყირავება, რაც საქართველოში არის.

ჩვენი მიზანია არგუმენტებზე და მყარ ფაქტებზე დაყრდნობით ყველას ვაჩვენოთ თუ რა არის რეალობა და ჩვენი შეფასება გავაკეთოთ. რაც ჩვენ აშშ-ს წარმომადგენლობით პალატაში მიღებული “მეგობარი აქტის“ სახით ვნახეთ, ეს მეგობრობის ყოველგვარ გაგებას ეწინააღმდეგება“, – განაცხადა შალვა პაპუაშვილმა.

საქართველოს მომავალი არის პროდასავლური, წარმატებაზე ორიენტირებული, რომელიც ივანიშვილის ინტერესებში არ შედის, რადგან მისთვის მთავარი საკუთარი ძალაუფლების შენარჩუნებაა, – ამის შესახებ „ერთიანობა ნაციონალური მოძრაობის“ გენერალურმა მდივანმა, პეტრე ცისკარიშვილმა ვაშინგტონში განაცხადა, სადაც „ერთიანობა ნაციონალური მოძრაობის“ დელეგაცია ვიზიტით იმყოფება.

ცისკარიშვილის განცხადებით, ვაშინგტონში კონგრესმენებმა და სენატორებმა უნდა იცოდნენ, რომ ამერიკაზე ორიენტირებული საქართველო არსად გამქრალა, ჯერ კიდევ არსებობს.

„ჩვენ დღეს დავიწყეთ შეხვედრები კონგრესში ჩვენს მეგობრებთან, პარტნიორებთან, რა თქმა უნდა, ამას გავაგრძელებთ სხვა ინსტიტუციებში, რადგან მნიშვნელოვანია, რომ აქ, ამ ქალაქში ხალხმა იცოდეს, რომ რუსულ-ქოცური საქართველოს გარდა პროდასავლური, ამერიკაზე ორიენტირებული საქართველო არსად გამქრალა, ჯერ კიდევ არსებობს და საქართველოს მომავალი სინამდვილეში არის პროდასავლური, პროგრესული, წარმატებაზე ორიენტირებული, რომელიც ივანიშვილის ინტერესებში არ შედის, რადგან მისთვის მთავარი საკუთარი ძალაუფლების შენარჩუნებაა და აქვე მნიშვნელოვანია, ხაზი გავუსვათ მიხეილ სააკაშვილის ფაქტორს, მისი შვილი ნიკუშა ჩვენთან ერთად იმყოფება. მიხეილ სააკაშვილი იყო ცხრა წლის განმავლობაში მთავარი პროდასავლელი, პროამერიკელი ლიდერი რეგიონში და ის, რომ მეოთხე წელია, იზოლაციაშია და საკანში ჰყავს გამოკეტილი ამ რეჟიმს, ამას ხედავს ყველა, რადგან სწორედ იმიტომ ისჯება ის, რომ ორიენტირებული იყო მხოლოდ დასავლეთზე, არ თამაშობდა რამდენიმე ფრონტზე, როგორც ამას თავიდან ივანიშვილი და მისი რეჟიმი ცდილობდა, რომლებმაც ბოლოს ბოლომდე ჩამოიხსნეს ნიღაბი და გამოაჩინეს თავისი პრორუსული, პროირანული დამოკიდებულება. წინა წლებში გვახსოვს, რომ ისინი ცდილობდნენ რამდენიმე ვექტორზე ერთდროულად ემუშავათ, მაშინ როდესაც მიხეილ სააკაშვილი იყო მხოლოდ დასავლეთზე ორიენტირებული და ჩვენმა მეგობრებმა აუცილებლად უნდა გაითვალისწინონ, როდესაც ივანიშვილის რეჟიმთან, პუტინთან, თუ სხვა მათ მეგობრებთან და აქტორებთან უწევთ ურთიერთობა“, – განაცხადა პეტრე ცისკარიშვილმა.

„ნაციონალური მოძრაობის“ პრესსამსახურის ცნობით, აშშ-ში „ნაციონალური მოძრაობის” დელეგაციაში, პარტიის ლიდერებთან ერთად, ნიკოლოზ სააკაშვილიც იმყოფება.

ბუნებრივია, კითხვის ნიშნები ჩნდება, თუ რატომ არ ხდება შეერთებული შტატების ახალი ადმინისტრაციის მხრიდან სათანადო ყურადღების მიქცევა იმ ქვეყნის მიმართ, რომელიც ბაიდენის ადმინისტრაციის მიერ აშკარად უსამართლოდ იყო დაჩაგრული – დიპლომატიური ურთიერთობებისთვის ძალიან კარგი და სასარგებლო იქნება, თუკი ამ ყველაფერს სათანადო პასუხი გაეცემა, – ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა განაცხადა, რითაც გამოეხმაურა საქართველოს პრემიერ-მინისტრის, ირაკლი კობახიძის ღია წერილს, რომლის ადრესატიც ამერიკის შეერთებული შტატების პრეზიდენტი დონალდ ტრამპი და აშშ-ის ვიცე-პრეზიდენტი ჯეი დი ვენსი არიან.

მისი თქმით, ქართული მხარე ამერიკის შეერთებული შტატებისგან პარტნიორული ურთიერთობის ჭრილში რეალურ ნაბიჯებს მოელის. მათიკაშვილი ამბობს, რომ ეს ნაბიჯები აგვიანებს და სწორედ ეს იწვევს კითხვის ნიშნებს.

„ბუნებრივია, კითხვის ნიშნები ჩნდება, თუ რატომ არ ხდება შეერთებული შტატების ახალი ადმინისტრაციის მხრიდან სათანადო ყურადღების მიქცევა იმ ქვეყნის მიმართ, რომელიც ბაიდენის ადმინისტრაციის მიერ აშკარად უსამართლოდ იყო დაჩაგრული. ჩვენი ქვეყნის წინააღმდეგ გამოყენებული იყო ის რესურსები, რაც ცხადია, არ ესადაგება არანაირ პარტნიორულ ურთიერთობას და დღეს, ამ ყველაფრის წიაღში, შეერთებული შტატების საკანონმდებლო ორგანოს ქვედა პალატა იღებს რაღაც დოკუმენტს, რომელსაც სრულიად ცინიკურად არქმევს „MEGOBARI აქტს”. პირდაპირ შეგვიძლია ვთქვათ, რომ [დოკუმენტში] საქართველოს, ქართველი ხალხის და მის მიერ არჩეული ხელისუფლების წინააღმდეგ მტრული შინაარსი წერია. არაფერს ვიტყვი იმაზე, რომ ეს აქტი სრულიად დაცლილია რეალური ფაქტებისგან. იქ არსებული თითქოსდა, ხაზგასმით და აპელირებადი გარემოებები ელემენტარულად არის არასწორი და ტყუილი. ამ ყველაფრის ჭრილში, ჩვენ, ჩვენი ქვეყანა, ცხადია, მოელის შეერთებული შტატებისგან, მისი ახალი ხელისუფლებისგან მკაფიო პოზიციას და მკაფიო ნაბიჯებს საქართველოსთან მიმართებით. იმ ქვეყანასთან მიმართებით, რომელსაც ათწლეულების განმავლობაში, უზარმაზარი კონტრიბუცია შეიტანა შეერთებული შტატების და ნატოს ეგიდით წარმოებულ საომარ მისიებში. ქართველმა სამხედროებმა თავისი სიცოცხლე და ჯანმრთელობა შესწირეს ამ მისიებს და ჩვენი ქვეყანა, ნატოს წევრ ქვეყნებთან ერთად, ერთ-ერთი ყველაზე დიდი კონტრიბუტორი იყო სამხედროების რაოდენობის კუთხით. ცხადია, ჩვენ ამ პარტნიორული ურთიერთობის ჭრილში მოველით რეალურ ნაბიჯებს შეერთებული შტატებიდან და ეს ნაბიჯები რომ აგვიანებს, ცხადია, ეს ყველაფერი კითხვის ნიშნებს იწვევს. წერილი არის მკაფიოდ ჩამოყალიბებული და ბუნებრივია, დიპლომატიური ურთიერთობებისთვის ძალიან კარგი და სასარგებლო იქნება, თუკი ამ ყველაფერს სათანადო პასუხი გაეცემა“, – განაცხადა მათიკაშვილმა.

აშშ-ის ადმინისტრაციას „მეგობარი აქტზე“ არავითარი კრიტიკული განცხადება არ გაუვრცელებია. ამ ყველაფრის გამო, ეს კანონი ამცირებს ქართველი ხალხის ნდობას არა მხოლოდ კონგრესის, არამედ, სამწუხაროდ, თქვენი ადმინისტრაციის მიმართაც, – ამის შესახებ ნათქვამია საქართველოს პრემიერ-მინისტრ ირაკლი კობახიძის ღია წერილში, რომლითაც ამერიკის შეერთებული შტატების პრეზიდენტს, დონალდ ტრამპს და ვიცე-პრეზიდენტს, ჯეი დი ვენსს ღია წერილით მიმართავს.

ამასთან, ირაკლი კობახიძის თქმით, „ძალაშია გაუგებარი სანქციები საქართველოს ვიცე-პრემიერის და ხელისუფლების სხვა წარმომადგენლების მიმართ“.

„კვლავაც ძალაშია სრულიად გაუგებარი სანქციები საქართველოს ვიცე-პრემიერის და ხელისუფლების სხვა წარმომადგენლების მიმართ, რომლებმაც ბაიდენის ადმინისტრაციის მიერ დაგეგმილი და USAID-ის ხაზით დაფინანსებული რევოლუციის მცდელობა და ძალადობა ეფექტურად აღკვეთეს. გარდა ამისა, რამდენიმე დღის წინ ამერიკის კონგრესმა მიიღო აბსურდული კანონი – ე.წ. „მეგობარი აქტი“, რომელიც არის მტრულად გამსჭვალული ქართველი ხალხის და მის მიერ არჩეული ხელისუფლების მიმართ. სიტყვა „მეგობარის“ მნიშვნელობიდან გამომდინარე, ეს კანონი გვახსენებს ჯორჯ ორუელის მოდელს, რომლის მიხედვითაც ომი არის მშვიდობა, მტერი კი – მეგობარი. სხვადასხვა პარლამენტისგან აბსურდული აქტების მიღებას ჩვენ ბოლო პერიოდში მიჩვეული ვართ და ამდენად, „მეგობარი აქტზე“ საერთოდ არ გავამახვილებდით ყურადღებას, რომ არა ის გარემოება, რომ ამ აქტს არაერთი სუბიექტი თქვენს ადმინისტრაციას მიაწერს. ამ აღქმას ამყარებს ის გარემოებაც, რომ თქვენს ადმინისტრაციას „მეგობარი აქტზე“ არავითარი კრიტიკული განცხადება არ გაუვრცელებია. ამ ყველაფრის გამო, ეს კანონი ამცირებს ქართველი ხალხის ნდობას არა მხოლოდ კონგრესის, არამედ, სამწუხაროდ, თქვენი ადმინისტრაციის მიმართაც, რომელსაც ქართული საზოგადოება სხვაგვარი იმედით შეჰყურებდა“, –  აღნიშნულია ღია წერილში.