ოკუპირებული აფხაზეთის თვითგამოცხადებული რეჟიმი ადასტურებს აფხაზეთის რეგიონის საჰაერო სივრცეში უკრაინული უპილოტო აპარატების შეღწევას.

საოკუპაციო რეჟიმის მედიასაშუალებების თანახმად, მარიონეტული რეჟიმის ხელმძღვანელი ბადრა გუნბა ე.წ. მთავრობის წევრებს შეხვდა და მსგავსი შემთხვევების თავიდან ასაცილებლად რუსეთის სასაზღვრო სამსახურთან და რუსეთის მე-7 სამხედრო ბაზასთან ურთიერთქმედების გაძლიერება დაავალა.

შეხვედრაზე განიხილეს რუსეთის წარმომადგენლებთან ურთიერთქმედებით ოკუპირებული აფხაზეთის კრიტიკული ინფრასტრუქტურის საიმედო დაცვის უზრუნველყოფის საკითხი.

მონიტორინგი გაიარა ყველამ: გრიგოლ ლილუაშვილმაც, ვახტანგ გომელაურმაც, ირაკლი ღარიბაშვილმაც და არანაირი დარღვევა არ არის გამოვლენილი – მონიტორინგში არ მოხვედრილა ბიძინა ივანიშვილი, – ამის შესახებ ანტიკორუფციული ბიუროს ხელმძღვანელმა, რაჟდენ კუპრაშვილმა ჟურნალისტებთან განაცხადა.

ამასთან, ის ამბობს, რომ არ ახსოვს, თორნიკე რიჟვაძის დეკლარაცია მოხვდა თუ არა ანტიკორუფციული ბიუროს მონიტორინგში.

რაჟდენ კუპრაშვილი აცხადებს, რომ რომეო მიქაუტაძის შემთხვევაში ანტიკორუფციულმა ბიურომ დარღვევები გამოავლინა.

„მონიტორინგი გაიარა ყველამ: გრიგოლ ლილუაშვილმაც, ვახტანგ გომელაურმაც, ირაკლი ღარიბაშვილმაც. ყოველწლიურად გადის ეს ხალხი მონიტორინგს. არანაირი დარღვევები გამოვლენილი არ არის. მათ დეკლარაცია სრულიად მოდის თანხვედრაში…

ბატონი ბიძინა ივანიშვილის მხრიდან კანონის შესაბამისად იყო წარმოდგენილი ქონებრივი დეკლარაცია, როცა საპარლამენტო არჩევნები დაიწყო და ეს ვალდებულება მისი მხრიდან შესრულდა. რაც შეეხება მონიტორინგს – არ მოხვედრილა მონიტორინგში.

რაც შეეხება თორნიკე რიჟვაძეს – თუ მოხვდებოდა ბატონი თორნიკეს დეკლარაცია ანტიკორუფციული ბიუროს მონიტორინგში, შესწავლილი იქნება. ასე ზეპირად არ მახსოვს ყველას დეკლარაცია“, – განაცხადა კუპრაშვილმა.

ამასთან, მან „ქართულ ოცნებაში” კორუფციასთან დაკავშირებით, პრემიერ-მინისტრის განცხადებებთან დაკავშირებით დასმულ კითხვებს უპასუხა და განაცხადა, რომ არ იცის, ვინ იგულისხმა ირაკლი კობახიძემ.

„ბატონმა პრემიერ-მინისტრმა აღნიშნა ის, რაზეც მას აქვს კომპეტენტური უწყებებისგან შესაბამისი ინფორმაცია. მე მეტის თქმის საშუალება არ მაქვს. ჩვენი ანგარიშები ყველასათვის ხელმისაწვდომია, მათ შორის, სახელმწიფო თანამდებობის პირებისთვის და სახელმწიფო უწყებებისთვის. ანტიკორუფციული ბიუროს საქმიანობის შესახებ ანგარიშები ყოველწლიურად ქვეყნდება და ჩვენი მიგნებები, გამოვლენები, მათ შორის, პოლიტიკური კორუფცია, ხვდება იქ,” – განაცხადა კუპრაშვილმა.

საგუშაგოს გახსნასთან დაკავშირებით ინფორმაცია არ გამაჩნდა – საგუშაგოს გახსნით მოსახლეობა რთულ სიტუაციაში ჩავარდა, რუსეთის ფედერაციამ დამატებითი საგუშაგოები გახსნა და სამეთვალყურეო საშუალებები დაამონტაჟა, ეს ჩემთვის ძალიან დიდი პრობლემაა,- ამის შესახებ საქართველოს დაზვერვის სამსახურის ყოფილმა უფროსმა, დავით სუჯაშვილმა, ჩორჩანას ეპიზოდთან დაკავშირებით, საქართველოს პროკურატურაში გამოკითხვის შემდეგ ჟურნალისტებთან განაცხადა.

მისი თქმით, მიუხედავად იმისა, რომ საგუშაგოს გახსნასთან დაკავშირებით მას ინფორმაცია არ ქონია, ეს პრობლემას არ წარმოადგენდა, რადგან ამ ინფორმაციის დაზვერვის სამსახურისთვის მიწოდება სავალდებულო არ იყო.

„ჩატარდა რეფორმა, რითაც შეიქმნა ახალი ეროვნული უსაფრთხოების საბჭო, რამაც თავისი პერიოდი წაიღო. ამ საბჭოს პირველი შეხვედრა, რომელიც მაისში გაიმართა, საორგანიზაციო ხასიათის იყო.

საგუშაგოს გახსნასთან დაკავშირებით ინფორმაცია არ გამაჩნდა, მედიის საშუალებით გავიგე. დაზვერვის სამსახური, ისევე როგორც სხვა სპეციფიკური სამსახურები, მუშაობენ თავიანთ ჩარჩოებში, დაზვერვის სამსახური სადაზვერვო ინფორმაციას მოიპოვებს საზღვრებს მიღმა, დაზვერვის სამსახური აქტიურად არის ჩართული არაღიარების მიმართულებით, ამიტომ ეს ინფორმაცია რომ არ მქონდა, პრობლემას ვერ ვხედავ. საგუშაგოს აღმართვასთან დაკავშირებით ინფორმაცია ღია წყაროებიდან გავიგე, კარგი იქნებოდა, რომ მანამდე მცოდნოდა.

კანონია, საქართველოს ეროვნული უსაფრთხოების პოლიტიკის დაგეგმვისა და კოორდინაციის წესის შესახებ, ეს კანონი არეგულირებს ეროვნული უსაფრთხოების საბჭოს საქმიანობას, დაზვერვის სამსახურის უფროსი მუდმივი წევრია ამ საბჭოსი, აქედან გამომდინარე დამიბარეს პროკურატურაში.

ყველა სპეცსამსახური მუშაობს თავის ჩარჩოებში, არასწორად მიმაჩნია, როდესაც ერთი სამსახური, მეორე სამსახურის საქმიანობაში ერევა, საოკუპაციო ხაზზე მუშაობს სახელმწიფო უსაფრთხოების სამსახური, ანალიტიკური დეპარტამენტი. ეს პროცესი საზღვრებს შიგნით ხდება, საზღვრებს იქით მუშაობს საგარეო საქმეთა სამინისტრო, ჟენევის ფორმატი ხომ გაგიგიათ? აი ამ კუთხით.

მე ამ საკითხს გლობალურად განვიხილავ, საქართველოს ტერიტორია ოკუპირებულია მეზობელი ქვეყნის მხრიდან და ბორდერიზაცია ხორციელდება. კანონში წერია, რომ საბჭომ მსგავსი საკითხი უნდა განიხილოს, ანუ არა მარტო უსაფრთხოების კუთხით არის მნიშვნელოვანი საკითხი. ჩემთვის, თქვენთვის და ყველასთვის ბორდერიზაცია მტკივნეული საკითხია.

მუდმივმოქმედი საბჭოს წევრს შეუძლია მიმართოს თავის კომპეტენციის ფარგლებში პრემიერ-მინისტრს, რათა მან უსაფრთხოების საბჭო მოიწვიოს. პასუხისმგებლობის საკითხს ნუ შემოიტანთ, ეს ჩემი კომპეტენცია არ არის, მოკვლევა მიმდინარეობს.

დიდი შეცდომაა, როდესაც საზღვრის გადაწევა-გადმოწევაზე საუბრობთ, საზღვარი გადის კავკასიის ქედზე, რაც შეეხება საოკუპაციო ხაზს, ეს პროცესი მიმდინარეობს და არ გაჩერებულა.

თქვენ ხომ გინდათ საქართველო ერთიანი და ძლიერი იყოს? ევროკავშირის წევრი? როგორ ფიქრობთ, გახლეჩილი საზოგადოებით ჩვენ ამას მივაღწევთ? თითოეულმა ჩვენგანმა უნდა გაითვალისწინოს, რომ ჩვენზეცაა პასუხისმგებლობა, თუ რამდენად ხელს ვუწყობთ საზოგადოების კონსოლიდაციას. თუ ისეთ კითხვებს დასვამთ, ნუ მოელოდებით, რომ მე ისეთ პასუხს გაგცემთ, რომ საზოგადოებაში განხეთქილება შევიტანო.

რაც მე მაქვს ინფორმაცია, საგუშაგოს გახსნით მოსახლეობა რთულ სიტუაციაში ჩავარდა, რუსეთის ფედერაციამ დამატებითი საგუშაგოები გახსნა და სამეთვალყურეო საშუალებები დაამონტაჟა, ეს ჩემთვის ძალიან დიდი პრობლემაა.

აქ პოლიტიკას შეიმუშავებს და ახორციელებს სუს-ი, როგორ შეიძლება იყოს პასუხისმგებელი ერთი უწყება, თუ მეორე უწყება რაღაც საქმიანობას ახორციელებს, ისე რომ არ აყენებდეს საქმის კურსში მას, ვინც საქმის კურსში უნდა იყოს. ვალდებულება არ იყო, რომ მათ დაზვერვის სამსახურისთვის ეთქვათ, ჩვენი სპეციფიკა სულ სხვაა, მაგრამ კარგი იქნებოდა, გვცოდნოდა”,- განაცხადა დავით სუჯაშვილმა.

ის, რაც რეჟიმს დაამარცხებს, არის ძლიერი, მწყობრი გაერთიანება, რომელიც აჩვენებს საზოგადოებას, რომ არსებობს რეალური ალტერნატივა – რეკომენდებულია, რომ ამ ერთობის ბირთვი იყოს ე.წ. არჩევნებში არ მონაწილე 8 პარტია და „წინააღმდეგობის პლატფორმა“, – ამის შესახებ „სტრატეგია აღმაშენებლის“ ლიდერის, საპატიმროში მყოფი გიორგი ვაშაძის წერილშია აღნიშნული, რომელიც მის „ფეისბუქ“ გვერდზე ვრცელდება.

მისი თქმით, საჭიროა „პროდასავლური პოლიტიკური და საზოგადოებრივი ჯგუფების სისტემური, პარიტეტული გაერთიანება, სადაც ყველა ინარჩუნებს იდენტობას, მაგრამ მოქმედებს ერთიანი სახელით, საერთო ბრენდის ქვეშ“.

„ქართული ოცნების“ ძალა ჩვენი დაქსაქსულობა და ურთიერთ თავდასხმებია. ის, რაც რეჟიმს დაამარცხებს, არის ძლიერი, მწყობრი გაერთიანება, რომელიც აჩვენებს საზოგადოებას, რომ არსებობს რეალური ალტერნატივა. როცა ეს გაერთიანება გამოჩნდება კვლევებში პირველ ადგილზე, ცვლილების პროცესი დაჩქარდება, მერყევ, გადაუწყვეტელ მოქალაქესაც უფრო მეტი მოტივაცია გაუჩნდება უარი უთხრას „ქართულ ოცნებას“ და დასავლელი პარტნიორებიც უფრო ქმედით ნაბიჯებს გადადგამენ.

გვჭირდება, პროდასავლური პოლიტიკური და საზოგადოებრივი ჯგუფების სისტემური, პარიტეტული გაერთიანება, სადაც ყველა ინარჩუნებს იდენტობას, მაგრამ მოქმედებს ერთიანი სახელით, საერთო ბრენდის ქვეშ.

გაერთიანება იღებს პასუხისმგებლობას ქვეყნის კრიზისიდან გამოყვანასა და ეფექტურ მართვაზე.

რეკომენდებულია, რომ ამ ერთობის ბირთვი იყოს ე.წ. არჩევნებში არ მონაწილე 8 პარტია და „წინააღმდეგობის პლატფორმა”.

გადაწყვეტილებები მიიღება კონსენსუსით, ხოლო კონსენსუსის არქონისას – ხმათა უმრავლესობით. გადაწყვეტილება სავალდებულოა ყველა წევრისთვის.

განსაკუთრებულ საკითხებზე შესაძლებელია სახალხო ჩართულობით – ბლოკჩეინის ტექნოლოგიაზე დაფუძნებული აპლიკაციით, სადაც საქართველოს მოქალაქეები პირდაპირ მონაწილეობენ.

აქტიური კამპანია, ერთიანი ბრენდი და შეთანხმებული მოქმედებები გააძლიერებს ჩვენს მხარდაჭერას.

გზა გამარჯვებამდე გადის ნამდვილ ერთიანობაზე. თუ ამას შევძლებთ, რეჟიმი დამარცხდება და ქვეყანა დაუბრუნდება განვითარებას, თავისუფლებას და ევროპულ მომავალს“, – აღნიშნა გიორგი ვაშაძემ.