მივიღეთ სომხეთის დამოუკიდებლობის სტრატეგია, რომლის პირობებშიც შესაძლებელი იქნება მშვიდობა აზერბაიჯანთან, ურთიერთობების გაღრმავება საქართველოსთან და ირანთან, – ამის შესახებ ნათქვამია სომხეთის პრემიერ-მინისტრის, ნიკოლ ფაშინიანის განცხადებაში, რომელიც მან სომხეთის დამოუკიდებლობის დეკლარაციის მიღების 35 წლისთავთან დაკავშირებით სოციალურ ქსელში გამოაქვეყნა.

როგორც ფაშინიანმა აღნიშნა, 1990 წელს მიღებული დეკლარაცია ასახავდა სომხეთში აღნიშნული დოკუმენტის მიღებისას მოქმედი პოლიტიკური და ინტელექტუალური ელიტის კოლექტიურ განწყობებს და ატარებდა „ყარაბაღის მოძრაობის“ კვალს.

მისი თქმით, დეკლარაციის ძირითადი იდეოლოგიური დებულებები წინააღმდეგობრივი იყო და გამოხატავდა კოლექტიური პატრიოტიზმის იმ მოდელს, რომელსაც სომხეთში თანდათან, თანმიმდევრულად ნერგავდა საბჭოთა კავშირი „რკინის ფარდისა“ და „ცივი ომის“ პირობებში. ფაშინიანის განცხადებით, ამ იდეოლოგიის დანერგვის სიღრმისეული და ქვეცნობიერი მიზანი იყო, რომ შეუძლებელი ყოფილიყო სომხეთის დამოუკიდებელი სახელმწიფოს არსებობა, ვინაიდან ქვეყანა, რომელიც კონფლიქტის მდგომარეობაშია, ვერ ააშენებს ნამდვილ დამოუკიდებლობას.

„პრემიერ-მინისტრის რანგში ჩემთვის ხელმისაწვდომი ინფორმაციისა და რეალობის სრულმა და ყოვლისმომცველმა ანალიზმა მიმიყვანა ურყევ რწმენამდე: ჩვენ არ უნდა გავაგრძელოთ „ყარაბაღის მოძრაობა, რადგან ეს ნიშნავს სომხეთის რესპუბლიკის დამოუკიდებლობის გაუქმებას. დღეს ასევე მინდა ვუპასუხო კითხვას, რომელიც, ალბათ, ყველაზე მნიშვნელოვანია ბოლო 7 წლის ისტორიის გასაგებად. რატომ არ წავედით დათმობებზე სომხეთის რესპუბლიკა, ჩვენ მთავრობა და მე პირადად 2020 წლის სექტემბრამდე, როდესაც 44-დღიანი ომის თავიდან აცილების ერთადერთი თეორიული შესაძლებლობა არსებობდა? ამის მთავარი მიზეზი ის იყო, რომ ამ დათმობების შედეგად, ჩვენი ყველა საფრთხე და დამოკიდებულება არაპროპორციულად გაიზრდებოდა, რაც გამოიწვევდა სომხეთის დამოუკიდებლობისა და სახელმწიფოებრიობის დაკარგვას. ჩვენ მივიღეთ სომხეთის დამოუკიდებლობის შენარჩუნებისა და ამ დამოუკიდებლობის რეალობად ქცევის სტრატეგია და ამ სტრატეგიის გამოხატულებაა ნამდვილი სომხეთის იდეოლოგია, რომლის პირობებშიც შესაძლებელი იქნება მშვიდობა სომხეთსა და აზერბაიჯანს შორის, რეალური დიალოგი თურქეთთან, ჩვენი ურთიერთობების საქართველოსთან და ირანთან გაღრმავება და რომლის ფარგლებშიც ჩვენ ვხდებით რეალური და საინტერესო პარტნიორი მთელი მსოფლიოსთვის“, – წერს ფაშინიანი.

სომხეთის პრემიერი აცხადებს, რომ მშვიდობა დამყარდა და სომხეთი დღეს დამოუკიდებელია, როგორც არასდროს.

„სომხეთის რესპუბლიკა დღეს დამოუკიდებელია, როგორც არასდროს, სუვერენული, როგორც არასდროს, თვითკმარი, როგორც არასდროს, აყვავებული, როგორც არასდროს, პერსპექტიული, როგორც არასდროს, რადგან ის მშვიდობისმოყვარეა. მშვიდობა დამყარდა და ის ყოველდღიური ზრუნვისა და ყურადღების საგანი უნდა გახდეს, ის ინსტიტუციური უნდა გახდეს“, – წერს ნიკოლ ფაშინიანი.

ჩინეთი მზადყოფნას გამოთქვამს, მონაწილეობა მიიღოს უკრაინაში სამშვიდობო მისიაში. ინფორმაციას ამის შესახებ გერმანული გამოცემა WELT AM SONNTAG-ი ევროპელ დიპლომატებზე დაყრდნობით ავრცელებს.

ევროპელმა მაღალჩინოსნებმა მედიასაშუალებას ანონიმურად განუცხადეს, რომ ჩინეთის მთავრობა მზად იქნება, გაგზავნოს ძალები უკრაინაში მხოლოდ იმ შემთხვევაში, თუ სამშვიდობო კონტინგენტი გაერო-ს მანდატის ფარგლებში განთავსდება.

როგორც გამოცემა წერს, ბრიუსელში პეკინის ამ გეგმას არაერთგვაროვანი რეაქცია მოჰყვა. ერთ-ერთმა დიპლომატმა მედიასაშუალებას უთხრა, რომ, ერთი მხრივ, ევროპაში ფიქრობენ, რომ ჩინეთის მსგავსი ქვეყნების მონაწილეობამ, შესაძლოა, ხელი შეუწყოს უკრაინაში უცხოური ძალების განთავსების გადაწყვეტილების მიღებას; მეორე მხრივ, არსებობს რისკი, რომ ჩინეთი უკრაიანში ჯაშუშობით იქნება დაკავებული და კონფლიქტის შემთხვევაში, პრორუსულ პოზიციას დაიკავებს.

მიმდინარე კვირას უკრაინის უსაფრთხოების გარანტიებზე საუბრისას სერგეი ლავროვმა ერთ-ერთ ვარიანტად უსაფრთხოების გარანტიების გაერო-ს უშიშროების საბჭოს მუდმივი წევრების მიერ უზრუნველყოფა დაასახელა, მათ შორის, რუსეთისა და ჩინეთის.

„დარწმუნებული ვარ, დასავლეთში, უპირველესად, შეერთებულ შტატებში, კარგად ესმით, რომ უსაფრთხოების საკითხების სერიოზულად განხილვა რუსეთის ფედერაციის გარეშე უტოპიაა, ეს არსაითკენ მიმავალი გზაა“, – განაცხადა ლავროვმა.

ჩვენ ნებისმიერ მომენტში მზად უნდა ვიყოთ ომისთვის, რადგან მსოფლიოში პროცესების მსვლელობა ისეთია, რომ შეუძლებელია იმის პროგნოზირება, რა მოხდება ხვალ, – ამის შესახებ აზერბაიჯანის პრეზიდენტმა, ილჰამ ალიევმა ქალაქ ქალბაჯარში მოსახლეობასთან შეხვედრისას განაცხადა.

ალიევმა აზერბაიჯანის თავდაცვისუნარიაონობის გაძლიერების მნიშვნელობაზე ისაუბრა.

„ჩვენ არ გვინდა ომი. ჩვენ გვინდა მშვიდობა. თუმცა ეს სისხლიანი ისტორია არასდროს უნდა წაიშალოს ჩვენი მეხსიერებიდან, არ უნდა ვიხელმძღვანელოთ ტკბილი სიტყვებით, ჩვენ უნდა ვიყოთ ფხიზლად. რა თქმა უნდა, ჩვენი შეიარაღებული ძალები ყოველ წუთს, ყოველდღე დგანან ჩვენი სახელმწიფოს ინტერესებისა და უსაფრთხოების სადარაჯოზე. ჩვენ ვაკვირდებით, ვხედავთ და დავინახავთ საფრთხის შესაძლო წყაროებს. ჩვენ ვაძლიერებთ ჩვენს სამხედრო ძალას. ყარაბაღის მეორე ომის შემდეგ, ჩვენი ძალების განვითარებასთან დაკავშირებით, გავზარდეთ ჩვენი სპეცრაზმის რაოდენობა ათასობით მებრძოლით – არ მინდა, ზუსტი ციფრის დასახელება, მაგრამ ბევრით. ჩვენს ქვეყანას მიეწოდება ყველაზე თანამედროვე უპილოტო საფრენი აპარატები, ახალი საარტილერიო სისტემები. ხელი მოეწერა კონტრაქტებს ახალი საბრძოლო თვითმფრინავების შესაძენად, ხოლო არსებული მთლიანად მოდერნიზებულია. ჩვენ ნებისმიერ მომენტში მზად უნდა ვიყოთ ომისთვის, რადგან მსოფლიოში პროცესების მსვლელობა ისეთია, რომ შეუძლებელია იმის პროგნოზირება, თუ რა მოხდება ხვალ. ჩვენი უსაფრთხოების გარანტი ვართ ჩვენ თავად, ჩვენი სახელმწიფო, ხალხი და ჩვენი შეიარაღებული ძალები. ამიტომ, თუ ვინმეს ავადმყოფ თავში მოუვა აზრად, აზერბაიჯანის წინააღმდეგ რაიმე სახის პროვოკაცია მოაწყოს, ვფიქრობ, ის ისევ ინანებს ამას. ჩვენ კი ამიერიდან ვიცხოვრებთ როგორც გამარჯვებული ერი და გამარჯვებული სახელმწიფო“, – განაცხადა ალიევმა.