აშშ-ის არჩეული პრეზიდენტი, დონალდ ტრამპი ახალ ორლეანში მომხდარ ტერორისტულ აქტს გამოეხმაურა და აღნიშნა, რომ აშშ „მთელ მსოფლიოში დაცინვის ობიექტი“ გახდა.

„ჩვენი ქვეყანა კატასტროფაა, მთელ მსოფლიოში დაცინვის ობიექტი გახდა. ეს არის ის, რაც ხდება, როდესაც თქვენ გაქვთ ღია საზღვრები, სუსტი, არაეფექტური და პრაქტიკულად არარსებული ხელმძღვანელობით“, – აღნიშნა დონალკდ ტრამპმა.

მისი თქმით, იუსტიციის დეპარტამენტმა, გამოძიების ფედერალურმა ბიურომ და „დემოკრატმა“ პროკურორებმა არ შეასრულეს თავიანთი სამუშაო.

„ისინი არაკომპეტენტურები და კორუმპირებულები არიან, რადგან მთელი თავიანთი დრო პოლიტიკურ ოპონენტზე უკანონო თავდასხმებზე დახარჯეს და არა ამერიკელების დაცვაზე გარედან და შიგნიდან. „დემოკრატებს“ საკუთარი თავის უნდა რცხვენოდეთ, რომ ეს ჩვენს ქვეყანაში დაუშვეს. ცენტრალური სადაზვერვო სააგენტო უნდა ჩაერთოს ახლავე, სანამ გვიანი არ არის. აშშ ინგრევა – უსაფრთხოების, ეროვნული უსაფრთხოებისა და დემოკრატიის ძალადობრივი ეროზია ხდება ჩვენს ქვეყანაში. მხოლოდ ძალა და ძლიერი ლიდერობა შეაჩერებს ამას. შევხვდებით 20 იანვარს“, – განაცხადა აშშ-ის არჩეულმა პრეზიდენტმა.

ახალი წლის ღამეს ბრიუსელში არეულობის დროს უცნობმა პირებმა ათობით ავტომობილი დაწვეს, მეხანძრეებს კი, „მოლოტოვის კოქტეილები“ ესროლეს.

ინფორმაციას „პოლიტიკო“ ავრცელებს.

ოფიციალური ინფორმაციით, პოლიციამ ბელგიის დედაქალაქში 159 პირი დააკავა. ამასთან, ამავე პერიოდში ქალაქის მასშტაბით 1 700-ზე მეტი ინციდენტი დაფიქსირდა.

სახანძრო სამსახურის ცნობით, სულ მცირე 60 ავტომობილი დაიწვა. მეხანძრეებს, რომლებიც ცეცხლის ჩაქრობას ცდილობდნენ, თავდამსხმელები ქვებითა და „მოლოტოვის კოქტეილებით“ ესხმოდნენ თავს, რის გამოც, მათ რიგ შემთხვევებში უკან დახევა მოუწიათ.

„ეს ნამდვილი სიგიჟე იყო. ჩვენ იქ დასახმარებლად ვიყავით და „მოლოტოვის კოქტეილებით გვესხმოდნენ თავს“, – განუცხადა „პოლიტიკოს“ ბრიუსელის სახანძრო სამსახურის წარმომადგენელმა, ვალტერ დერიუმ.

ამასთან, არეულობა იყო ქალაქ ანტვერპენშიც. ადგილობრივმა პოლიციამ 49 პირი დააკავა. მედიის ცნობით, ეს არ არის პირველი შემთხვევა, როდესაც ბელგიაში მსგავსი არეულობა ხდება ახალი წლის ღამეს. 2023 წელს დედაქალაქში 200-ზე მეტი ადამიანი დააკავეს, ხოლო 2022 წელს – 160.

„სამწუხაროდ, ეს უკვე ჩვეულებრივ მოვლენად იქცა“, – აღნიშნა სახანძრო სამსახურის წარმომადგენელმა, ვალტერ დერიუმ.

როგორც მედია წერს, ამ წელს პოლიციას დანაშაულის პრევენციისთვის რიგი ზომები ჰქონდა მიღებული. ანდერლეხტში მოქმედებდა კომენდანტის საათი 16 წლამდე პირებისთვის, მობილიზებული იყო პოლიციელთა ჯგუფები, თუმცა ინციდენტები მაინც მოხდა.

ლას-ვეგასში, Trump Hotel-ის წინ საწვავით და ფეიერვერკით სავსე Tesla-ს Cybertruck-ი აფეთქდა, რის შედეგადაც ერთი ადამიანი დაიღუპა და შვიდი დაშავდა, – ინფორმაციას BBC-ი ავრცელებს.

პოლიციის განცხადებით, Cybertruck-ი კოლორადოში დაიქირავეს და ქალაქში აფეთქებამდე ორი საათით ადრე ჩაიყვანეს. ის სასტუმროს წინ, შუშის შესასვლელთან იყო გაჩერებული.

აშშ-ის პრეზიდენტმა ჯო ბაიდენმა განაცხადა, რომ თეთრი სახლი თვალყურს ადევნებდა ინციდენტს და სამართალდამცავი ორგანოები იძიებენ არსებობს თუ არა რაიმე შესაძლო კავშირი Cybertruck-ის აფეთქებასა და ნიუ ორლეანში მომხდარ თავდასხმას შორის.

ლას-ვეგასის პოლიციის დეპარტამენტის შერიფმა, კევინ მაკმეჰილმა ასევე განაცხადა, რომ მიმდინარეობს გამოძიება, იყო თუ არა ეს ინციდენტი დაკავშირებული ნიუ ორლეანში მომხდართან. მისი თქმით, ისინი ასევე იძიებენ, შეიძლება თუ არა ეს დაკავშირებული იყოს არჩეულ პრეზიდენტ დონალდ ტრამპთან, რომელიც სასტუმროს ფლობს, ან Tesla-ს მფლობელ ილონ მასკთან.

ამასთან, გამოძიების ფედერალურ ბიუროში აცხადებენ, რომ მუშაობენ იმის გასარკვევად, იყო თუ არა მომხდარი ტერორისტული აქტი.

მონტენეგროს სამხრეთ ნაწილში შეიარაღებულმა პირმა 10 ადამიანი, მათ შორის ორი ბავშვი, მოკლა, – ინფორმაციას გამოცემა BBC-ი ადგილობრივ პოლიციაზე დაყრდნობით ავრცელებს.

გამოცემის ცნობით, სროლა რესტორანში სტუმრებს შორის სიტყვიერი კამათის შემდეგ მოხდა. დაღუპულია თავდამსხმელიც – 45 წლის მამაკაცი, ალექსანდრე მარტინოვიჩი.

შინაგან საქმეთა მინისტრის, დანილო სარანოვიჩის თქმით, შეიარაღებულმა მამაკაცმა საკუთარი ოჯახის წევრები, რესტორნის მფლობელი და მისი ორი შვილი მოკლა.

მონტენეგროს მთავრობამ ქვეყანაში სამდღიანი გლოვა გამოაცხადა.

უკრაინის პრეზიდენტის, ვოლოდიმირ ზელენსკის განცხადებით, უკრაინის გაზის ტრანსპორტირების სისტემით ევროპაში რუსული გაზის ტრანზიტის შეწყვეტა მოსკოვის ერთ-ერთი ყველაზე დიდი მარცხია, – ამის შესახებ ვოლოდიმირ ზელენსკი „ტელეგრამზე“ წერს.

„როდესაც 25 წელზე მეტი ხნის წინ რუსეთში ძალაუფლება პუტინს უბოძეს, უკრაინის ტერიტორიით ევროპაში გაზის წლიური გადატუმბვა შეადგენდა 130+ მილიარდ კუბურ მეტრს. დღეს რუსული გაზის ტრანზიტი 0-ს შეადგენს. ეს მოსკოვის ერთ-ერთი ყველაზე დიდი მარცხია“ , – აღნიშნა ზელენსკიმ.

მისი თქმით, ენერგორესურსების იარაღად გადაქცევა და პარტნიორების ცინიკური ენერგეტიკული შანტაჟი არის ის, რამაც რუსეთს ჩამოართვა მისთვის ყველაზე მიმზიდველი და გეოგრაფიულად ხელმისაწვდომი ბაზარი.

„გარემოებების გათვალისწინებით, ევროპის ქვეყნების აბსოლუტური უმრავლესობა წარმატებით შეეგუა მსგავს ცვლილებებს. დღეს ჩვენი საერთო ამოცანაა მოლდოვას მხარდაჭერა ენერგეტიკული ტრანსფორმაციის პერიოდში. ჩვენ ასევე უნდა გავუძლოთ ზოგიერთი ევროპელი პოლიტიკოსის ისტერიას, რომლებიც გამჭვირვალე ენერგეტიკული პოლიტიკის ნაცვლად მოსკოვთან მაფიოზურ სქემებს ამჯობინებენ“, – აღნიშნა ზელენსკიმ.

შეგახსენებთ, 1-ელი იანვრიდან უკრაინამ საკუთარი ტერიტორიის გავლით რუსული გაზის ევროპაში ტრანზიტი შეწყვიტა.