ირანის წინააღმდეგ აშშ-ის სამხედრო ოპერაციაში, კოდური სახელწოდებით „ოპერაცია შუაღამის ურო“, 125-ზე მეტი თვითმფრინავი იყო ჩართული, – ამის შესახებ აშშ-ის გაერთიანებული შტაბების თავმჯდომარემ, გენერალმა დენ კეინმა ჟურნალისტებს განუცხადა.

მისი თქმით, ოპერაციის ფარგლებში შეერთებულმა შტატებმა მოწინააღმდეგის შეცდომაში შეყვანის ოპერაციაც განახორციელა, რომლის დროსაც წყნარი ოკეანის თავზე „სატყუარას“ სახით ბომბდამშენები განალაგა.

დენ კეინის განმარტებით, უპრეცედენტო ოპერაციაში B2 ტიპის შვიდი ბომბდამშენი მონაწილეობდა, რომლებმაც ირანის ორ ბირთვულ ობიექტზე, ფორდოუსა და ნატანზზე, ათზე მეტი მასიური საბრძოლო მასალის შეღწევადი ბომბი ჩამოაგდეს. ისპაჰანში კი Tomahawk-ის რაკეტები გაუშვეს.

ოპერაციაში, საერთო ჯამში, 125-ზე მეტი თვითმფრინავი იყო ჩართული, მათ შორის B2-ები, საწვავის შევსების ტანკერები, სადაზვერვო თვითმფრინავები და გამანადგურებლები.

კეინის თქმით, ეს მისია მისურის ბაზიდან განხორციელდა და 11 სექტემბრის თავდასხმების შემდეგ B2-ის ყველაზე ხანგრძლივი მისია იყო.

ამასთან, დენ კეინის განმარტებით, ირანისთვის მიყენებული ზიანის სრულად შეფასებას გარკვეული დრო დასჭირდება.

„ბრძოლით მიყენებული საბოლოო ზარალის დადგენას გარკვეული დრო დასჭირდება, თუმცა ბრძოლის ზარალის საწყისი შეფასება მიუთითებს, რომ სამივე ობიექტმა უკიდურესად მძიმე დაზიანება და ნგრევა განიცადა“, – აღნიშნა ამერიკელმა გენერალმა.

მისი თქმით, აშშ-ის ძალები მაღალ მზადყოფნაში რჩებიან და „ირანის ნებისმიერ საპასუხო ქმედებაზე რეაგირებისთვის“ სრულ მზადყოფნაში არიან.

აშშ-ის თავდაცვის მინისტრის, პიტ ჰეგსეთის განცხადებით, ირანის ბირთვულ ობიექტებზე დარტყმები წარმოუდგენელი და უდიდესი წარმატება იყო, რომელმაც ქვეყნის ბირთვული პროგრამა გაანადგურა.

ჰეგსეთმა პენტაგონში გამართულ პრესკონფერენციაზე განაცხადა, რომ ზუსტი დარტყმები კონცენტრირებული, ძლიერი და მკაფიო იყო.

„გუშინ ღამით, პრეზიდენტ ტრამპის ბრძანებით, აშშ-ის ცენტრალურმა სარდლობამ ირანში სამ ბირთვულ ობიექტზე ზუსტი დარტყმა განახორციელა ირანის ბირთვული პროგრამის განადგურების ან მისი სერიოზული დეგრადაციის მიზნით. ეს წარმოუდგენელი და უდიდესი წარმატება იყო. ჩვენი მთავარსარდლისგან მიღებული ბრძანება იყო მიზანმიმართული, ძლიერი და ნათელი. ჩვენ ირანის ბირთვული პროგრამა გავანადგურეთ. პრეზიდენტ ტრამპის გაბედული ლიდერობისა და ძალის მეშვეობით მშვიდობისადმი მისი ერთგულების წყალობით, ირანის ბირთვული ამბიციები განადგურებულია“, – აღნიშნა ჰეგსეთმა.

მისივე მტკიცებით, ოპერაციის სამიზნე მხოლოდ ირანის ბირთვული ობიექტები იყო და არა ირანელი ჯარისკაცები, ან მშვიდობიანი მოსახლეობა.

„აღსანიშნავია, რომ ოპერაცია არ იყო მიმართული ირანელი ჯარების ან ირანელი ხალხის წინააღმდეგ“, – აღნიშნა აშშ-ის თავდაცვის მინისტრმა.

ირანში ბირთვულ ობიექტებზე აშშ-ის მიერ განხორციელებული დარტყმები საერთაშორისო სამართლის უხეშ დარღვევას წარმოადგენს, – ამის შესახებ რუსეთის საგარეო საქმეთა სამინისტროს განცხადებაშია აღნიშნული, რომელიც უწყებამ აშშ-ის მიერ ირანის ბირთვულ ობიექტებზე დარტყმების განხორციელების შემდეგ გაავრცელა.

„სუვერენული სახელმწიფოს ტერიტორიაზე რაკეტებით და ბომბებით დარტყმების განხორციელების შესახებ უპასუხისმგებლო გადაწყვეტილება, რა არგუმენტებიც არ უნდა იყოს წარმოდგენილი, უხეშად არღვევს საერთაშორისო სამართალს, გაერო-ს ქარტიას და გაერო-ს უშიშროების საბჭოს რეზოლუციებს. განსაკუთრებით საგანგაშოა, რომ დარტყმები განახორციელა ქვეყანამ, რომელიც გაერო-ს უშიშროების საბჭოს მუდმივი წევრია“, – აცხადებენ რუსეთის საგარეო საქმეთა სამინისტროში.

უწყების მტკიცებით, მოსკოვი მხარეებს ახლო აღმოსავლეთში აგრესიის დასრულებისა და სიტუაციის პოლიტიკურ და დიპლომატიურ კალაპოტში დასაბრუნებლად ძალისხმევის გაზრდისკენ მოუწოდებს.

„მოვუწოდებთ აგრესიის შეწყვეტისა და სიტუაციის პოლიტიკურ და დიპლომატიურ კალაპოტში დაბრუნების პირობების შესაქმნელად ძალისხმევის გაზრდისკენ“, – ნათქვამია უწყების განცხადებაში.

ჩინეთის საგარეო საქმეთა სამინისტროს განცხადებით, ამერიკის შეერთებულმა შტატებმა, ირანის ბირთვულ ობიექტებზე დარტყმების განხორციელებით, საერთაშორისო სამართალი და გაერო-ს ქარტია დაარღვია.

„ჩინეთი მკაცრად გმობს ირანზე აშშ-ის თავდასხმებს და ბირთვული ობიექტების დაბომბვას, რომლებიც ატომური ენერგიის სააგენტოს გარანტიების ქვეშ იმყოფებიან. აშშ-ის ქმედებები სერიოზულად არღვევს გაეროს ქარტიისა და საერთაშორისო სამართლის მიზნებსა და პრინციპებს და ახლო აღმოსავლეთში დაძაბულობას ამწვავებს. ჩინეთი მოუწოდებს კონფლიქტის მხარეებს, კერძოდ, ისრაელს, რაც შეიძლება მალე მიაღწიონ ცეცხლის შეწყვეტას, უზრუნველყონ მშვიდობიანი მოსახლეობის უსაფრთხოება და დაიწყონ დიალოგი და მოლაპარაკებები“, – აღნიშნულია ჩინეთის საგარეო საქმეთა სამინისტროს განცხადებაში.

უწყების მტკიცებით, ჩინეთი მზადაა ითანამშრომლოს საერთაშორისო საზოგადოებასთან იმისთვის, რომ გააერთიანონ ძალისხმევა, დაიცვან სამართლიანობა და იმუშაონ ახლო აღმოსავლეთში მშვიდობისა და სტაბილურობის აღსადგენად.

ირანის საგარეო საქმეთა მინისტრმა მსოფლიო ლიდერების განცხადებებს უპასუხა, რომლებმაც თეირანს აშშ-სთან და ისრაელთან მოლაპარაკებების დაწყებისკენ მოუწოდეს.

სოციალურ ქსელში X აბას არაღჩიმ დაწერა, რომ ისრაელმა და აშშ-მა დიპლომატიის „აფეთქება გადაწყვიტეს.

„ბრიტანეთისა და ევროკავშირის წარმომადგენლებს ვეკითხები. როგორ შეუძლია ირანს იქ დაბრუნება, საიდანაც არასოდეს წასულა?“, – წერს არაღჩი.

მანამდე, მოლაპარაკებების განახლებისკენ ირანს დიდი ბრიტანეთის, გერმანიისა და ევროკავშირის ლიდერებმა მოუწოდეს.

აშშ-მა ირანის ბირთვული ობიექტები დაბომბა. გაეროს ატომური ენერგიის საერთაშორისო სააგენტოში (IAEA) განაცხადეს, რომ აშშ-ის მიერ ირანის ბირთვული ობიექტების დაბომბვის შემდეგ, ადგილზე რადიაციის დონე არ გაზრდილა.

აშშ-მა, ბირთვულ ობიექტებზე დარტყმით, ირანის წინააღმდეგ სახიფათო ომი დაიწყო, – მედიის ინფორმაციით, ამის შესახებ ირანის საგარეო საქმეთა სამინისტრომ განაცხადა.

„მსოფლიომ არ უნდა დაივიწყოს, რომ დიპლომატიური პროცესის შუაგულში სწორედ შეერთებულმა შტატებმა უღალატა დიპლომატიას. აშშ-მა ირანის წინააღმდეგ სახიფათო ომი დაიწყო“, – ნათქვამია საგარეო საქმეთა სამინისტროს განცხადებაში.

უწყების მტკიცებით, აშშ-ის თავდასხმები გაერო-ს ქარტიისა და საერთაშორისო სამართლის დარღვევაა და რომ „ამ საზარელი დანაშაულის მძიმე და სავალალო შედეგებზე სრული პასუხისმგებლობა“ აშშ-ის მთავრობას ეკისრება.

„ირანის ლეგიტიმური უფლებაა, სრულად და მტკიცედ დაუპირისპირდეს აშშ-ის სამხედრო აგრესიას და ამ არაკეთილსინდისიერი რეჟიმის მიერ ჩადენილ დანაშაულებს და დაიცვას ირანის ეროვნული უსაფრთხოება და ინტერესები ყველა საჭირო საშუალებით“, – აღნიშნულია განცხადებაში.

ირანის საგარეო უწყება მოუწოდებს გაერო-ს და მის სხვადასხვა ორგანოებს, მათ შორის ატომური ენერგიის საერთაშორისო სააგენტოს, რომ ,„სასწრაფოდ უპასუხონ უკანონობის ამ აშკარა და დანაშაულებრივ ქმედებას“.

უწყება გაერო-ს უშიშროების საბჭოს მიმართავს, რომ ირანის ბირთვულ ობიექტებზე განხორციელებული დარტყმების დაგმობის მიზნით საგანგებო სხდომა ჩაატაროს.

აშშ-ის პრეზიდენტის დონალდ ტრამპის განცხადებით, ირანის ბირთვულ ობიექტებზე თავდასხმების დროს აშშ-ის საჰაერო ძალების B-2 ტიპის ბომბდამშენები გამოიყენეს.

CNN-ი წერს, რომ B-2 Spirit აშშ-ის საჰაერო ძალების უმაღლესი დონის ბომბდამშენია.

ტელეკომპანია განმარტავს, რომ ოთხძრავიან B-2-ს შეუძლია იყოს აღჭურვილი ბირთვული ან ჩვეულებრივი იარაღით, მას ორკაციანი ეკიპაჟი მართავს, აქვს 40 000 ფუნტი [20 ტონა] ტვირთამწეობა და შეუზღუდავი დიაპაზონი საჰაერო საწვავის შევსებით.

აშშ-ის საჰაერო ძალების ინვენტარში მხოლოდ 20 B-2 ტიპის თვითმფრინავია, რომლებიც მისურის შტატში, უაითმენის საჰაერო ძალების ბაზაზეა განლაგებული.

თითოეული ბომბდამშენის ღირებულება, დაახლოებით, 2 მილიარდი დოლარია.

ამასთან, CNN-ს ოპერაციასთან დაკავშირებულმა ორმა წყარომ განუცხადა, რომ აშშ-მა ირანის ბირთვულ ობიექტებზე თავდასხმების დროს მასიური საბრძოლო მასალის შეღწევადობის (MOP) ბომბი – GBU-57A/B – გამოიყენა, რომელიც „ბუნკერის ამფეთქებლის“ სახელითაა ცნობილი.

B-2 აშშ-ის ინვენტარში ერთადერთი თვითმფრინავია, რომელსაც GBU-57A/B-ის გადატანა შეუძლია.