აზერბაიჯანი-საქართველო-თურქეთის სამმხრივი ფორმატი არის ძალიან კარგი მაგალითი იმისა, თუ როგორ შეიძლება, ეფექტურად და წარმატებით ითანამშრომლონ ქვეყნებმა, რომლებიც პატივს სცემენ ერთმანეთის სუვერენიტეტსა და ერთმანეთის ეროვნულ ინტერესებს, – ამის შესახებ საქართველოს პრემიერ-მინისტრმა, ირაკლი კობახიძემ თურქეთის რესპუბლიკის პრეზიდენტთან, რეჯეფ თაიფ ერდოღანთან ერთობლივი ბრიფინგის დროს განაცხადა.

მთავრობის მეთაურის თქმით, მნიშვნელოვანია საქართველოსა და თურქეთს შორის სტრატეგიული თანამშრომლობის შემდგომი განვითარება ყველა მიმართულებით.

„ვთვლით, რომ რეგიონული თანამშრომლობა მნიშვნელოვანია და ის მიზნად უნდა ისახავდეს მშვიდობისა და სტაბილურობის ხელშეწყობას, ისევე როგორც ჩვენი ქვეყნების განვითარებას. ამ მხრივ, აზერბაიჯანი-საქართველო-თურქეთის სამმხრივი ფორმატი არის ძალიან კარგი მაგალითი იმისა, თუ როგორ შეიძლება ეფექტურად და წარმატებით ითანამშრომლონ ქვეყნებმა, რომლებიც პატივს სცემენ ერთმანეთის სუვერენიტეტსა და ერთმანეთის ეროვნულ ინტერესებს და როგორ შეიძლება, ასეთი თანამშრომლობით განხორციელდეს რეგიონისთვის უმნიშვნელოვანესი პროექტები. ასევე ჩვენ გვქონდა საუბარი სხვადასხვა სტრატეგიულ პროექტებზე, რომლებიც აკავშირებს ჩვენს ქვეყნებს. რა თქმა უნდა, ძალიან მნიშვნელოვანია ყველა მიმართულებით ჩვენი სტრატეგიული თანამშრომლობის შემდგომი განვითარება. ასევე გვქონდა საუბარი თანამშრომლობის სხვა განზომილებებზე, როგორიც არის  თანამშრომლობა განათლების, თავდაცვისა და უსაფრთხოების სფეროში. რა თქმა უნდა, თანამშრომლობის თითოეულ ასპექტს ვანიჭებთ განსაკუთრებულ მნიშვნელობას.  ბატონო პრეზიდენტო, ამ შეხვედრამ  კიდევ ერთხელ ცხადყო საერთო ინტერესი, რომ მაქსიმალურად ვიზრუნოთ ჩვენი თანამშრომლობისა და სტრატეგიული პარტნიორობის კიდევ უფრო მეტად გაღრმავებაზე, რაც არის მნიშვნელოვანი ჩვენი ხალხების ინტერესების რეალიზებისთვის. კიდევ ერთხელ მინდა გითხრათ უღრმესი მადლობა გულთბილი მასპინძლობისთვის“, – განაცხადა პრემიერმა.

განვიხილეთ საქართველოსა და თურქეთს შორის ორმხრივი და მრავალმხრივი ურთიერთობების აქტიური დღის წესრიგი, გავცვალეთ მოსაზრებები მნიშვნელოვან რეგიონულ საკითხებზე, დავსახეთ სამომავლო თანამშრომლობის პერსპექტივები, – ამის შესახებ საქართველოს პრემიერ-მინისტრმა, ირაკლი კობახიძემ თურქეთის რესპუბლიკის პრეზიდენტთან, რეჯეფ თაიფ ერდოღანთან ერთად გამართული ერთობლივი ბრიფინგის დროს განაცხადა.

როგორც მთავრობის მეთაურმა აღნიშნა, საუბარი ასევე შეეხო უმაღლესი და მაღალი დონის შეხვედრების დინამიკის შენარჩუნებას.

„ჩემთვის ძალიან დიდი პატივია, პრემიერ-მინისტრის რანგში ოფიციალური ვიზიტით პირველად ვსტუმრობდე მეგობარ ქვეყანას, თურქეთის რესპუბლიკას, რომელთანაც საქართველოს აკავშირებს ძალიან მჭიდრო თანამშრომლობა, სტრატეგიული პარტნიორობა და რა თქმა უნდა, ამ პარტნიორობას ყველა ძალიან ვუფრთხილდებით. ჩემთვის განსაკუთრებული პატივია, ვსტუმრობდე პრეზიდენტ ერდოღანს, რომელიც არის, არა მხოლოდ პრეზიდენტი, არამედ რესპუბლიკის ნამდვილი ლიდერი, რომელიც მტკიცედ იცავს თურქეთის და თურქი ხალხის  ეროვნულ ინტერესებს. თქვენი ლიდერობა არის სამაგალითო თითოეული ჩვენგანისთვის.

რა თქმა უნდა, ვგმობთ თავდასხმას პრემიერ-მინისტრ ფიცოზე და სლოვაკეთის პრემიერს ვუსურვებ მალე გამოჯანმრთელებას. თქვენო აღმატებულებავ, მსურს, მადლობა გადაგიხადოთ გამორჩეული მასპინძლობისთვის. დღეს, როგორც პირისპირ, ისე გაფართოებული შემადგენლობით შეხვედრისას, განვიხილეთ საქართველოსა და თურქეთს შორის ორმხრივი და მრავალმხრივი ურთიერთობების აქტიური დღის წესრიგი, გავცვალეთ მოსაზრებები მნიშვნელოვან რეგიონულ საკითხებზე, დავსახეთ სამომავლო თანამშრომლობის პერსპექტივები.

ჩვენ გვქონდა საუბარი უმაღლესი და მაღალი დონის შეხვედრების დინამიკის შენარჩუნებაზე. პირადად ვთხოვე  პრეზიდენტ ერდოღანს საქართველოში ჩამობრძანება. იმედი მაქვს, რომ ეს ოფიციალური ვიზიტი საქართველოში მალე შედგება“, – განაცხადა ირაკლი კობახიძემ.

პრემიერის თქმით, საქართველო ემხრობა სამხრეთ კავკასიაში მშვიდობიანი თანაცხოვრების ფორმულას და ყოველთვის გამოთქვამს მზადყოფნას, თავისი წვლილი შეიტანოს რეგიონში მშვიდობისა და კონსტრუქციული თანამშრომლობის ხელშეწყობის პროცესში.

„საქართველოსთვის მნიშვნელოვანი და ფასეულია თურქეთის მხარდაჭერა საქართველოს სუვერენიტეტისა და ტერიტორიული მთლიანობის მიმართ. ხაზგასმით მინდა, აქაც განსაკუთრებული მადლობა გადავუხადო პირადად პრეზიდენტს, მისი მხარდაჭერისათვის საქართველოსა და მისი ეროვნული ინტერესების მიმართ. მის აღმატებულებას გავუზიარე ინფორმაცია საქართველოს მიერ ევროკავშირის წევრობის კანდიდატი ქვეყნის სტატუსის მიღებასთან და შესაბამის სამომავლო გეგმებთან დაკავშირებით.

ჩვენ ასევე საუბარი გვქონდა რეგიონში არსებულ ვითარებაზე და ჩვენს ერთობლივ ძალისხმევაზე ამ გამოწვევებთან გამკლავების კუთხით. არაერთხელ გვითქვამს და კიდევ ერთხელ მინდა, აღვნიშნო, რომ საქართველო ემხრობა სამხრეთ კავკასიაში მშვიდობიანი თანაცხოვრების ფორმულას და ყოველთვის გამოთქვამს მზადყოფნას, თავისი წვლილი შეიტანოს რეგიონში მშვიდობისა და კონსტრუქციული თანამშრომლობის ხელშეწყობის პროცესში.

ჩვენ მივესალმეთ, რომ სომხეთსა და აზერბაიჯანს შორის მიღწეული შეთანხმების საფუძველზე, დაწყებულია სახელმწიფო საზღვრის დელიმიტაციის პროცესი, რაც იძლევა იმის საფუძველს, რომ ორ სახელმწიფოს შორის საბოლოოდ გაფორმდეს სამშვიდობო შეთანხმება. თავის მხრივ, საქართველო მზად არის, გააგრძელოს წვლილის შეტანა რეგიონში მშვიდობასა და სტაბილურობაში.

უსაფრთხოების გამოწვევების კონტექსტში, გვქონდა საუბარი უკრაინაში მიმდინარე პროცესებზე, ომზე, რომელიც წარიმართება უკრაინაში, რაც საფრთხეს უქმნის ევროპისა და შავი ზღვის ფუნდამენტური უსაფრთხოების არქიტექტურას. აქვე, ჩვენ აღვნიშნეთ თურქეთის დაუღალავი ძალისხმევა, წვლილი შეიტანოს დაპირისპირებულ მხარეებს შორის დიალოგის შესაძლებლობის პოვნაში, – განაცხადა პრემიერ-მინისტრმა.

თურქეთში მიგვაჩნია, რომ საქართველოში მიმდინარე მოვლენები ქართველი ხალხის საუკეთესო ინტერესებით გადაწყდება, – ამის შესახებ თურქეთის რესპუბლიკის პრეზიდენტმა, რეჯეფ თაიფ ერდოღანმა ირაკლი კობახიძესთან ერთობლივ ბრიფინგზე განაცხადა.

„ძალიან მახარებს, რომ საქართველოს პრემიერ-მინისტრს, ბატონ ირაკლი კობახიძეს და მის დელეგაციას ვმასპინძლობ ანკარაში. კიდევ ერთხელ მინდა, მივულოცო ქართველ მეგობარ ერს დამოუკიდებლობის დღე წინასწარ. დღეს ორი მეგობარი, ორი სტრატეგიული პარტნიორი ქვეყნის ლიდერი შევიკრიბეთ და ძალიან ნაყოფიერი საუბარი შედგა. კიდევ ერთხელ დავუჭირე მხარი საქართველოს ტერიტორიულ მთლიანობას, სუვერენიტეტსა და კეთილდღეობას. ასევე, გამოვთქვი ჩემი უწყვეტი მხარდაჭერა ევროატლანტიკურ ინსტიტუტებში ინტეგრაციის გზაზე“, – აღნიშნა ერდოღანმა.

“მესმის აზიელების ინტერესი – ნიშანი ჩათვლის წიგნაკში და მესმის ჩემი სიხარულიც, რომ ესენი ჩემი შვილიშვილების მკურნალი ექიმები არ იქნებიან, მაგრამ მათ სტუდენტურ ვიზებზეც “დიპლომატიური მიუკარებლობა” ვრცელდება, თუ სადა ვართ?” – ასე ეხმაურება სოციალურ ქსელში “ხალხის” ძალის” წევრი, დავით ქართველიშვილი “უცხოური გავლენის გამჭვირვალობის შესახებ” კანონის საწინააღმდეგო აქციებს და აღნიშნავს, რომ აქციის ორგანიზატორები სკოლის მოსწავლეებს რევოლუციური პროცესებისთვის იყენებენ.

“ვაჟა ზაზაევიჩის არ იყოს, ცხენბურთში რომ ერკვეოდა, მოტობურთისა ესმოდა და “დაჟე” – ფეხბურთზეც გაეგებოდა რა… სკოლის მოსწავლეთა რევოლუციურ პროცესებში გამოყენება, გავიგე. მათ წამქეზებელ მასწავლებლებზე მსმენია. ამ დროს მშობლების თავშიც რა ხდება, ერთი ჩამახედა, მაგრამ სამედიცინო უნივერსიტეტის პაკისტანელი და ინდოელი სტუდენტების საკმაო რაოდენობა აქციებზე, ეს ინჩა? რაოდენობრივი ეფექტის დეფიციტს ავსებთ მაგით? მესმის აზიელების ინტერესი – ნიშანი ჩათვლის წიგნაკში და მესმის ჩემი სიხარულიც, რომ ესენი ჩემი შვილიშვილების მკურნალი ექიმები არ იქნებიან, მაგრამ მათ სტუდენტურ ვიზებზეც „დიპლომატიური მიუკარებლობა” ვრცელდება, თუ სადა ვართ?“, – წერს დავით ქართველიშვილი.

მიუღებელია, როდესაც მეგობარ ქვეყანაში ჩასული მეგობარი სახელმწიფოს საგარეო საქმეთა მინისტრი ოპოზიციის მიერ ორგანიზებულ ღონისძიებაში იღებს მონაწილეობას, – ამის შესახებ საგარეო საქმეთა მინისტრმა ილია დარჩიაშვილმა განაცხადა.

მისი თქმით, დიპლომატებს მეტი პასუხისმგებლობა მართებთ, როდესაც მსგავსი ტიპის აქტივობებში იღებენ მონაწილეობას.

„ფაქტი არის მიუღებელი და გაუგონარი. ჩვენ, დიპლომატებს გვმართებს მეტი პასუხისმგებლობა, როდესაც მსგავსი ტიპის აქტივობებში ვიღებთ მონაწილეობას. მიუღებელია, როდესაც მეგობარ ქვეყანაში ჩასული მეგობარი სახელმწიფოს საგარეო საქმეთა მინისტრი ოპოზიციის მიერ ორგანიზებულ ღონისძიებაში იღებს მონაწილეობას. ეს ძალიან სამწუხარო ფაქტია და ჩვენ, დიპლომატებს ნამდვილად მეტი პასუხისმგებლობა გვაქვს, როდესაც მსგავსი ტიპის ღონისძიებებში ვიღებთ მონაწილეობას“, – განაცხადა ილია დარჩიაშვილმა.

ადრე მოსკოვში დარბოდნენ და ცენტრისგან ითხოვდნენ თავისი კონკურენტების დასჯას, დღეს იმავე ხალხის შთამომავლები ბრიუსელსა და ვაშინგტონში დარბიან, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.

პაპუაშვილი გამჭვირვალობის კანონის მიღებასთან დაკავშირებით აშშ-ის, ევროკავშირისა და ევროპის 14 ქვეყნის პარლამენტების საგარეო ურთიერთობების კომიტეტების თავმჯდომარეების ერთობლივ განცხადებას გამოეხმაურა.

„ქართული და ევროპული ღირებულება გვკადრულობს, რომ ყოველთვის ვიყოთ სიმართლის მხარეს და არა განცხადებების, აღქმების, ვეძიოთ ჭეშმარიტება. გადამწყვეტი მნიშვნელობა რომ ჰქონდეს განცხადებებს და არა სიმართლეს, ანტისამთავრობო მიტინგზე ევროპელი მინისტრებისგან ისეთი განცხადებები მოვისმინეთ, რომ მაშინ ამას უნდა ავყვეთ. ჩვენ ხომ ჭეშმარიტება, სიმართლე გვაინტერესებს.

თუკი ვიღაცას აქვს შიში, რომ რეგულირების შემთხვევაში, საზოგადოებისთვის აშკარა გახდება, რომ ფული იხარჯება არაკეთილსინდისიერ საკითხებში, ამ შიშის საფუძველზე არ უნდა მოხდეს ქართველ ხალხზე თავდასხმა, სანქცირების მუქარა, რაც ზოგიერთი პოლიტიკოსისგან გვესმის. რაც შეეხება შანტაჟს, მუქარას, რომელსაც ცდილობს ზოგიერთი პოლიტიკოსი ქვეყნის შიგნით თუ გარეთ, საქართველოს ხელისუფლება მოქმედებს არა სანქციების იმედით თუ შიშით, არამედ ქართველი ხალხის მანდატით. ეს არის ჩვენი განმაპირობებელი, თორემ სანქციებით ხან რუსეთი გვემუქრება და ხან ვინ.

საქართველოს სანქციები დაწესებული ჰქონდა რუსეთისგან და სხვათა შორის, დასავლეთის მხრიდანაც, 2008 წლის ომის შემდეგ საქართველოზე ვრცელდებოდა არაფორმალური სანქცია იარაღის მიყიდვასთან დაკავშირებით. არავინ გვაძლევდა ომგამოვლილ ქვეყანას იარაღს, 2013 წლამდე ვიყავით ფაქტობრივი სანქციის ქვეშ დასავლეთის მხრიდან. წელს რას ვხედავთ, თურმე არსებობენ ქართველები, რომლებიც ისტორიულად ვიცით, რომ ადრე სხვა დედაქალებში დარბოდნენ, სპარსეთში თუ სხვა იმპერიებში, რომელსაც გავლენა ჰქონდა. დარბოდნენ და აბეზღებდნენ კონკურენტებს, ითხოვდნენ, წამოდი, ლაშქარი წამოასხი და დასაჯე ჩემი კონკურენტი, შემდეგ იმავე ხალხის შთამომავლები დარბოდნენ მოსკოვში და იქ ითხოვდნენ ცენტრისგან, რომ დაესაჯათ თავისი კონკურენტი, რათა გზა გათავისუფლდებოდა თანამდებობისკენ. დღეს იმავე ხალხის შთამომავლები დარბიან ბრიუსელსა და ვაშინგტონში, რათა დააბეზღონ კონკურენტები, სთხოვონ, მოდი, დასაჯე, რომ მე გზა გამეხსნას ხელისუფლებისკენ. ასეთ ქართველებთან გვაქვს საქმე.

ჩვენ გვყოლია ასეთი „ენჯეოები“, პოლიტიკოსები, რომლებიც უცხო ქვეყანაში დადიან და საკუთარი ქვეყნის წინააღმდეგ ჩარევას ითხოვენ, იქნება ეს სანქცია თუ შემდეგ, შეიძლება, ჯარიც მოითხოვონ, რათა რამენაირად ჩარიონ სხვები. თუკი რამე არის ღალატი, თითოეული ეს ადამიანი სჩადის ღალატს, ასეთმა ხალხმა მოიყვანა გუშინ უცხო ქვეყნის მინისტრები, დააყენა სცენაზე და დაუორგანიზა. ტაშს უკრავდნენ და აზიარებენ, რა კარგია, უცხო ქვეყნის მინისტრი ჩამოდის და ხალხის არჩეული ხელისუფლების საწინააღმდეგო მიტინგში იღებს მონაწილეობასო. თუ რამე არის ქვეყნის ღალატი, ეს არის ღალატის მთელი ანატომია, რომელსაც ჩვენ ვხედავთ“, – განაცხადა შალვა პაპუაშვილმა.