ევროპარლამენტის რეზოლუცია სამართლიან ინფორმაციაზე დაფუძნებული არ არის, ინფორმაციას მათივე შექმნილი წყაროდან იღებენ – არასამთავრობო ორგანიზაციებიდან და ზოგიერთი პოლიტიკური პარტიიდან, რომელებიც ჩართული არიან პროცესების რადიკალიზაციის გეგმაში, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ განაცხადა.

მისი თქმით, კორუფციასთან ან არჩევნების გაყალბებასთან დაკავშირებით სამართლიანი დასკვნა ეუთო/ოდირ-ის დოკუმენტში უნდა ვეძებოთ, სადაც ამგვარი არაფერი წერია.

„რეზოლუცია სამართლიან ინფორმაციაზე დაფუძნებული არ არის. ინფორმაციას მათივე შექმნილი წყაროდან იღებენ – არასამთავრობო ორგანიზაციებიდან და ზოგიერთი პოლიტიკური პარტიიდან, რომელებიც ჩართული არიან პროცესების რადიკალიზაციის გეგმაში. არაერთი ასეთი რეზოლუციაა მიღებული. კორუფციასთან ან არჩევნების გაყალბებასთან დაკავშირებით სამართლიანი დასკვნა ყველაზე კომპეტენტური ორგანიზაციის დოკუმენტში უნდა ვეძებოთ – ეუთო/ოდირ-ის, სადაც ამგვარი არაფერი წერია“, – განაცხადა გია ვოლსკიმ.

მისი თქმით, მთავარია ისიც, რომ ვერ გაყალბდება არჩევნები, რომლებიც ელექტრონულად ტარდება.

„გადავხედეთ იმ განცხადებებს, რომლებიც ცალკეული რადიკალური ოპოზიციის მხარდამჭერებს ჰქონდათ. პოლონეთის საგარეო საქმეთა მინისტრის მოადგილედ დანიშნეს ადამიანი, რომელიც თავის დროზე ჩასაფრებული, ანტიქართული პოზიციიდან წერდა, რომ თურმე აქ გაყალბება შეუძლებელია, „ქართულმა ოცნებამ“ რეალურად გაიმარჯვა, მაგრამ მოხდა ძალადობა, ზეწოლა და ადამიანების ბულინგი, რომლებსაც ახდენდნენ ე.წ. ბირჟებზე კონცენტრირებული, ვიღაც საეჭვო გარეგნობის ახალგაზრდები. ამის მეტი არაფერი თქმულა. მზია ამაღლობელს რაც შეეხება, კონკრეტული დანაშაულია ჩადენილი, რომლისთვისაც ნებისმიერ დემოკრატიულ საზოგადოებაში საკმაოდ მკაცრი სასჯელია გათვალისწინებული“, – განაცხადა გია ვოლსკიმ.

თბილისის მერი კახა კალაძე აცხადებს, რომ დედაქალაქის გაზრდილი ბიუჯეტის თანხები ინფრასტრუქტურულ პროექტებსა და სოციალურ პროგრამებზე იქნება მიმართული.

როგორც კახა კალაძემ ჟურნალისტებს დედაქალაქის ბიუჯეტის დაახლოებით 62 მილიონი ლარით გაზრდასთან დაკავშირებით დასმული კითხვის პასუხად განუცხადა, მიუხედავად იმისა, რომ თბილისში ბევრი მნიშვნელოვანი პროექტი ხორციელდება, არსებობს სერიოზული გამოწვევები, რომელთაც ღირსეული პასუხი სჭირდება.

„გაზრდილი ბიუჯეტის თანხები მიმართული იქნება ინფრასტრუქტურულ პროექტებზე, სოციალურ პროგრამებზე. მიუხედავად იმისა, რომ ბევრი კარგი და მნიშვნელოვანი პროექტი ხორციელდება დედაქალაქში, არსებობს სერიოზული გამოწვევები, პრობლემები და ამ ყველაფერს სჭირდება ღირსეული პასუხი. ჩვენ მზად ვართ, გავაგრძელოთ მუშაობა ქალაქის განვითარებისთვის. მინდა, დედაქალაქის მოსახლეობას მადლობა გადავუხადო მხარდაჭერისთვის, რადგან 2017 წლიდან მოყოლებული დღემდე მოსახლეობა მხარს გვიჭერს და გვერდით გვიდგას ყველა მნიშვნელოვან წამოწყებაში, რაც მთავარია, გვენდობა და ჩვენთან ერთად გადის ქალაქის განვითარების ყველა ეტაპს. მომდევნო ოთხი წელი კიდევ უფრო მნიშვნელოვანი იქნება ქალაქისთვის, ბევრი კარგი პროექტი გვაქვს დაგეგმილი, რომლებზეც ინფორმაციას საზოგადოებას ეტაპობრივად მივაწვდით“, – განაცხადა თბილისის მერმა.

“რადიკალურ ოპოზიციონერებს უნდათ, რომ ყველაფრის გაკეთება შეძლონ, სხვა დააზიანონ, რაღაც დააზიანონ, კანონი დაარღვიონ”, – ამის შესახებ დედაქალაქის მერმა მედიასთან ისაუბრა.

კახა კალაძე გამოეხმაურა ოპოზიციის ბრალდებას, რომელიც ხელისუფლებას რეპრესიებში ადანაშაულებს. მისი თქმით, პოლიტიკოსი ვალდებულია კანონი დაიცვას.

“რეპრესიებზე საუბარი ჩვეულებრივი პოლიტიკური სპეკულაციაა. მათ აქვთ სურვილი, რომ თავიანთი დანაშაული რეპრესიად შეფუთონ. ანუ რა გამოდის, რომ თუ გაქვს პოლიტიკოსის სტატუსი, ყველაფრის გაკეთება შეგიძლია, რომ სხვა დააზიანო, რაღაც დააზიანო, კანონი დაარღვიო? მათი განცხადებებიდან ასე ჩანს, რომ უნდათ ამ ყველაფრის უფლება ჰქონდეთ. ეს სწორი დამოკიდებულება არ არის. ჩვენ, პოლიტიკოსებს გვაქვს ძალიან დიდი პასუხისმგებლობა საზოგადოების, ხალხის წინაშე და პირველები უნდა ვიყოთ, ვინც კანონს დაიცავს. ამ შემთხვევაში პირიქით ხდება. თუკი რაიმე სიბინძურე არსებობს, აკეთებს ეს რადიკალური დაჯგუფება“, – განაცხადა კახა კალაძემ.

რაც შეეხება ოპოზიციის არჩევნებში მონაწილეობის საკითხს, თბილისის მერის თქმით, მათი გადაწყვეტილება საინტერესო არაა.

“საერთოდ არაა საინტერესო, რას გადაწყვეტს რადიკალური დაჯგუფება. ვიცით მათი დღის წესრიგი – რასაც ეტყვიან, დაავალებენ, იმას გააკეთებენ. რამდენიმე თვის წინ გახსოვთ რა პოზიცია ჰქონდათ. პირდაპირ აცხადებდნენ, რომ არჩევნებში მონაწილეობის მიღებას არ აპირებდნენ. დღეს უკვე პოზიცია შეცვლილი აქვთ“, – აღნიშნა დედაქალაქის მერმა.

324 ხმით ხმით 25-ის წინააღმდეგ, ევროპარლამენტმა მიიღო რეზოლუცია სახელწოდებით, „მედიის თავისუფლება საქართველოში, განსაკუთრებით მზია ამაღლობელის საქმე“.  კენჭისყრაში მონაწილეობისგან თავი შეიკავა 87-მა წევრმა.

რეზოლუციაში ნათქვამია, რომ მისი ხელმომწერები მოითხოვენ მზია ამაღლობელის დაუყოვნებლივ და უპირობოდ გათავისუფლებას და მის წინააღმდეგ წაყენებული ყველა ბრალდების მოხსნას.

ამასთან, რეზოლუციაში საუბარია, რომ დაუყოვნებლივ უნდა გაუქმდეს ყველა რეპრესიული კანონმდებლობა.

„საქართველოს შესახებ  წინა რეზოლუციების გათვალისწინებით, რეგლამენტის 150(5) და 136(4) წესების გათვალისწინებით, ვინაიდან  მზია ამაღლობელი, ჟურნალისტი,  „ბათუმელებისა“ და „ნეტგაზეთის“ თანადამფუძნებელი, პროევროპული საპროტესტო აქციების დროს 2025 წლის 12 იანვარს დააკავეს და პოლიციელთან დაკავშირებული პროვოცირებული ინციდენტისთვის ოთხიდან შვიდ წლამდე თავისუფლების აღკვეთა ემუქრება; ვინაიდან დრაკონული კანონმდებლობის მიღება, როგორიცაა უცხოელი აგენტების რეგისტრაციის აქტი (FARA) და ცვლილებები მაუწყებლობის, ადმინისტრაციულ სამართალდარღვევათა კოდექსსა და გრანტების შესახებ კანონებში, წარმოადგენს დემოკრატიული უკუსვლის სახიფათო დაჩქარებას და მიზანმიმართულ ავტორიტარულ სტრატეგიას „ქართული ოცნების“ მიერ,  კრიტიკული ოპოზიციისა და დამოუკიდებელი პოლიტიკური ხმების ჩასახშობად; იმის გათვალისწინებით, რომ ხელისუფლებამ პრაქტიკულად გაანადგურა ქვეყანაში დარჩენილი დამოუკიდებელი მედია საშუალებები; იმის გათვალისწინებით, რომ საზოგადოებრივი საინფორმაციის სივრცე სრულად არის დაპყრობილი პროსამთავრობო მედიის მიერ, რომელიც ავრცელებს რუსული სტილის პროპაგანდას და ანტიევროპულ დეზინფორმაციას; იმის გათვალისწინებით, რომ მზია ამაღლობელის საქმეში ხელისუფლებამ უგულებელყო პროცედურული დაცვის მექანიზმები, მკაფიო სამართლებრივი საფუძვლის გარეშე დააკისრა წინასწარი პატიმრობა, რაც  გაპროტესტებულია სახალხო დამცველის მიერ და დანიშნა მოსამართლე, რომელსაც არ გააჩნია სისხლის სამართლის კვალიფიკაცია; იმის გათვალისწინებით, რომ იგი ისჯება კორუფციის გამოვლენისა და 2024 წლის არჩევნების დროს არჩევნების გაყალბების შესახებ ინფორმაციის მიწოდებისთვის; ვინაიდან, გავრცელებული ინფორმაციით, მან განიცადა არაადამიანური მოპყრობა და 38-დღიანი შიმშილობას მიმართა; ვინაიდან ესტონეთმა და ლიეტუვამ დააწესეს პერსონალური სანქციები ქართველ მოსამართლეებსა და პოლიციელებზე, რომლებიც დაკავშირებული არიან მზია ამაღლობელის საქმესთან.

მოითხოვს მზია ამაღლობელის დაუყოვნებლივ და უპირობოდ გათავისუფლებას და მის წინააღმდეგ წაყენებული ყველა ბრალდების მოხსნას, გმობს მის პოლიტიკურად მოტივირებულ დაკავებასა და სისხლისსამართლებრივ დევნას; მკაცრად გმობს „ქართული ოცნების“ რეჟიმის სისტემურ თავდასხმას დემოკრატიულ ინსტიტუტებზე, პოლიტიკურ ოპოზიციაზე, დამოუკიდებელ მედიაზე, სამოქალაქო საზოგადოებასა და სასამართლო დამოუკიდებლობაზე; გამოხატავს ღრმა შეშფოთებას საქართველოში ჟურნალისტების თვითნებური დაკავებების, შევიწროებისა და მათ მიმართ ძალადობის გამო, მათ შორის ცილისწამების კამპანიების, სამართლებრივი დევნის, ძალადობისა და გენდერული ძალადობის გამო; მოუწოდებს დამოუკიდებელი გამოძიების ჩატარებისკენ და მოუწოდებს ხელისუფლებას დაუყოვნებლივ შეწყვიტოს დაშინება და უზრუნველყოს ჟურნალისტების უსაფრთხოება და თავისუფლება; მოუწოდებს საქართველოს ხელისუფლებას, დაუყოვნებლივ გაათავისუფლოს ყველა პოლიტიკური პატიმარი და სხვა უკანონოდ დაკავებული პირი, მათ შორის აქტივისტი მათე დევიძე, ოპოზიციის ლიდერები ზურაბ ჯაფარიძე, ნიკა მელია და ნიკა გვარამია, ასევე ყოფილი პრეზიდენტი მიხეილ სააკაშვილი და გმობს „ერთიანი ნაციონალური მოძრაობის“ თავმჯდომარის, თინა ბოკუჩავას ქმრის ძალადობრივ გატაცებას და მისი შვილების უსაფრთხოებასთან დაკავშირებული მუქარების შესახებ შეტყობინებებს; მოუწოდებს ყველა რეპრესიული კანონმდებლობის დაუყოვნებლივ გაუქმებისკენ, დემოკრატიის აღდგენისა და მედიის თავისუფლებისა და სამოქალაქო თავისუფლებების სრული დაცვისკენ; მოუწოდებს ევროკავშირს, გააძლიეროს მხარდაჭერა საქართველოს დამოუკიდებელი მედიისა და სამოქალაქო საზოგადოებისთვის FARA-ს ძალაში შესვლის შემდეგ და აკონტროლოს მიმდინარე სასამართლო პროცესები; სინანულს გამოთქვამს, ევროკავშირის საბჭოს, წევრი ქვეყნებისა და ევროკომისიის მუდმივი უმოქმედობის გამო და იმეორებს წევრი ქვეყნებისადმი  თავის მრავალგზის მოწოდებას, დააწესონ ორმხრივი სანქციები „ქართული ოცნების“ ლიდერებისა და მაღალჩინოსნების მიმართ, რომლებიც პასუხისმგებელი არიან დემოკრატიულ უკუსვლაზე; გამოთქვამს შეშფოთებას არასამთავრობო ორგანიზაციებზე თავდასხმის ბოლოდროინდელი ტალღის გამო, რომელიც გამოწვეულია ზოგიერთი სახელმწიფო დაწესებულების მოთხოვნით, ისეთი როგორიცაა, ანტიკორუფციული ბიურო, რომელიც ითხოვს ბოლო წელიწადნახევრის დეტალური ფინანსური, სამართლებრივი და ოპერატიული ინფორმაციის მიწოდებას სამ სამუშაო დღეში. ხაზს უსვამს, რომ ეს მოთხოვნა თავისი განზრახვით შეუსრულებელია და შესაბამისად, საფრთხეს უქმნის სამიზნე ორგანიზაციების მუშაობას და მათი საქმიანობის შეჩერებას; ავალებს თავის პრეზიდენტს, გადაუგზავნოს ეს რეზოლუცია ევროკავშირის საბჭოს, ევროკომისიას, წევრი სახელმწიფოების მთავრობებსა და პარლამენტებს, ევროპის საბჭოს, ეუთო-ს, პრეზიდენტ ზურაბიშვილს და საქართველოს თვითგამოცხადებულ ხელისუფლებას“, – ნათქვამია რეზოლუციაში.

პარლამენტის დროებით საგამოძიებო კომისიის სხდომაზე, სადაც 2019 წლის 20 ივნისს თბილისში განვითარებული მოვლენები განიხილება, გიორგი ჭოლაძემ გაიხსენა მაშინდელი პრემიერის, მამუკა ბახტაძის განცხადება, რომელიც შინაგან საქმეთა მინისტრთან, გიორგი გახარიასთან იყო შეთანხმებული, რომ აქციაზე სპეციალური საშუალებები და ძალისმიერი მეთოდები არ იქნებოდა გამოყენებული.

გიორგი ჭოლაძე იხსენებს, რომ ამ განცხადებიდან მალევე, რამდენიმე წუთში შეიტყო, რომ სროლა იყო დაწყებული.

„შევთანხმდით, რომ პრემიერი უნდა გამოსულიყო, მისულიყო შეკრებილ მედიასაშუალებებთან და განცხადებით მიემართა საზოგადოებისთვის, დაეწყნარებინა საზოგადოება. პრემიერის გამოსვლა, განცხადება იყო 23:42 საათზე. მანამდე რამდენიმე წუთით, ალბათ ხუთი წუთით ადრე ვიდექით ერთად და ბახტაძის დაჟინებული მოთხოვნა იყო, არანაირი სპეცსაშუალება არ ყოფილიყო გამოყენებული, რადგან იმ რაოდენობის ხალხი არ იყო, რომ სხვა მეთოდებით ვერ გამკლავებოდი. შეიძლებოდა მოლაპარაკება. გაჟღერდა კიდეც, რომ ოპოზიციის ლიდერები უნდა შემოსულიყვნენ. შემდეგ ეს რატომღაც გაუქმდა, რადგან წავიდა მთელი ამბავი და ბახაბუხი. შევთანხმდით მესიჯზე, საზოგადოებისთვის უნდა მიემართა პრემიერ-მინისტრს, ასე ვთქვათ, დამაწყნარებელი მესიჯით, უნდა ეთქვა, რომ ჩვენ არ ვაპირებთ არანაირი სპეცსაშუალებების გამოყენებას. მაგალითად, გარემოს დაცვის მინისტრი როცა ღონისძიებას ატარებს გარეულ თახვებთან დაკავშირებით, რატომ უნდა იცოდეს პრემიერ-მინისტრმა გარეული თახვების რაოდენობა შირაქის ველზე? ამას უყვება, რადგან საზოგადოებას როცა მიმართავს, მედიასთან დადგება, შინაარსი უნდა იცოდეს. რაც შეეხება ამ კონკრეტულ მომენტს, მესიჯის ფორმირება მოხდა გახარიას მიერ. პრემიერ-მინისტრს უთხრა, მამუკა, ჩვენ არ ვაპირებთ არანაირი სპეცსაშუალების გამოყენებას. ამ დროს ერთად ვიდექით მე, გახარია, პრემიერი, მისი პრესცენტრის წარმომადგენელი და გარშემო დეპუტატები ყველანი იყვნენ. პრესცენტრის წარმომადგენელი იყო სოფო მდინარაძე. ვიარეთ დერეფნებში, ცოტა არ გვივლია. მე წავყევი მამუკა ბახტაძეს. ჩემი თანამშრომელი არცერთი არ იყო იქ, რადგან არავინ გადმომიყვანია. თავიდანვე შეცდომად მიმაჩნდა, რომ პარლამენტის შენობაში შტაბი შედგა. ეს ჩემი პირადი აზრია. არ ვიცი, ბოლო პროცესების დროს რა ხდებოდა, მაგრამ ამ შენობაში რა უნდოდა შტაბს და რატომ მოხდა ასე, რომ ეძახდა დეპუტატებს, როცა გვერდით შენობაში, ინგოროყვას შვიდ ნომერში არის აბსოლუტურად უმაღლეს დონეზე აღჭურვილი სიტუაციური ოთახი, სადაც იმართებოდა კოვიდის სხდომები, უმაღლეს დონეზე გამართულია ტექნიკურად და ათჯერ უკეთესად შეგიძლია მართო იქიდან სიტუაცია. ეს ჩემი აზრია. შეიძლება, გახარია მოვიდეს და თქვას, რომ ისეთი მაგარი მინისტრი ვიყავი, მივედი და მგლის ხახაში ჩავყავი თავიო, მაგრამ ეს ასე არ იყო. ამას მივაწერდი მის არაკომპეტენტურობას. ჩემი ღრმა რწმენით, ეს არ უნდა გაეკეთებინა. აქ რომ ეპატიჟებოდა დეპუტატებს და ელჩი ჰყავდა, ჩემი აზრით, ფარად ასაფარებლად, რამე რომ მომხდარიყო და გერმანიის ელჩს ერთი ღერი თმა ჩამოვარდნოდა, ხალხი რომ შემოვარდნილიყო, გააზრებული ჰქონდა, რა მოხდებოდა? არა. რატომ არ ჰქონდა გააზრებული? რადგან ვენის კონვენცია წაკითხული არ ჰქონდა. აქ რასაც ვუყურებდით, მგონი, პოლიციის შესახებ კანონიც არ ჰქონდა წაკითხული.

დაახლოებით ათი წუთის განმავლობაში პრემიერმა თხრობით რეჟიმში გააკეთა განცხადება, თქვა, რომ თვითონაც აღშფოთებული იყო, ყველა ნორმალური ქართველი აღშფოთებული იყო იმით, რაც მოხდა. გვახსოვს, მათ შორის ვეტერანების განცხადებები, ყველა იყო აღშფოთებული, მათ შორის ჩვენ, ამ დარბაზში მყოფი ადამიანები. საუბარია გავრილოვზე. პრემიერმა მოუწოდა ახალგაზრდებს, ნუ წამოეგებოდნენ პროვოკაციებს, ნუ გახდებოდნენ რაღაც ჯგუფების გამოსაყენებელი და ნუ იძალადებდნენ. მათ მოუწოდა სიმშვიდისკენ. ბოლოს ყველაზე მთავარი, რაც თქვა, იყო ის, რომ მე, როგორც პრემიერ-მინისტრი, გეუბნებით, არ ვართ ის ხელისუფლება, რომელიც ძალისმიერ მეთოდებს გამოიყენებს ჩვენივე მშვიდობიანი მოქალაქეების მიმართო. ეს არ მოხდება, ჩვენ არ ვართ ის ხელისუფლება, რომელიც ამას გააკეთებსო. დამთავრდა ეს ამბავი, მოვტრიალდით უკან, რამდენიმე დეპუტატი იდგა, ქვემოდან ისმოდა ოპოზიციური დეპუტატების შეძახილები, სკანდირებდნენ რაღაცებს. შევყოვნდი დერეფანში და როცა ზვიად ძიძიგურის ოთახში შევედი, სადაც იყო შეკრებილი ხალხი, მთავრობა, უკვე სროლა დაწყებული იყო. კიდევ რომ დავაზუსტო, მამუკა ბახტაძის განცხადების შემდეგ რამდენიმე წუთში, ვიდრე მივედი იმ ოთახამდე, სროლა იყო დაწყებული. მე ასე მახსოვს და ზუსტად მახსოვს, ეს ამბავი იყო რამდენიმე წუთში. გახარია ისევ იქ იყო, შემდეგ მძიმე საუბარი შედგა“, – განაცხადა გიორგი ჭოლაძემ.

კომისიის თავმჯდომარე თეა წულუკიანმა გიორგი ჭოლაძეს მიმართა, ვის და ვის შორის შედგა მძიმე საუბარი, რაზეც ჭოლაძემ აღნიშნა:

„მამუკა ბახტაძესა და შინაგან საქმეთა მინისტრს შორის და არა მარტო მათ შორის. რბილად ვიტყვი, ის საყვედურობდა, რა ხდებოდა და რატომ გააკეთა ეს. კითხვა იმაზე კი არ იყო მარტო, რატომ მოხდა სპეცსაშუალებების გამოყენება. ქრონოლოგიურად რაც მოვყევი, 23:49 საათზე მთავრდება პრემიერ-მინისტრის გამოსვლა, განცხადება, რამდენიმე წუთში შევდივართ ოთახში და სროლა დაწყებულია. ჩემი ძმა რომ ყოფილიყო შინაგან საქმეთა მინისტრი, თეორიულად დავუშვებდი ეჭვს, რომ ეს იყო სპეციალურად გაკეთებული“.

დავით ცინდელიანი და პაატა ქარდავა გაიყვანეს, მოკლეს, მოაბეს ფეხზე ბეტონის ნაჭრები და ჩაძირეს ზღვაში, დადგენილია დამნაშავეც, რომელიც სასჯელს იხდის, ეს არის აფხაზეთის კუდ-ის უფროსი, რომან შამათავა, რომელმაც ეს ყველაფერი გააკეთა,- ამის შესახებ დროებითი საგამოძიებო კომისიის სხდომაზე, კომისიის წევრმა სოზარ საუბარმა განაცხადა, სადაც დავით ცინდელიანის სიცოცხლის უფლების ხელყოფის საქმე განიხილება.

ამასთან, კომისიის დღევანდელ სხდომაზე იკითხება დავით ცინდელიანის დედა, თამარ არღვლიანი. მისი თქმით, სასამართლო სხდომაზე არაერთხელ დაუსვა შეკითხვა მისი შვილის მკვლელობაში ბრალდებულს, რომან შამათავას, „თუ რატომ მოუკლა შვილი“. სოზარ სუბარის თქმით კი, „ნაციონალური მოძრაობა“ აწარმოებდა კამპანიას, რომ „რომან შამათავა არის გმირი და მათი სახე“.

„რატომ მივიდნენ [ცინდელიანები] პაატა ქარდავას ოჯახში და სად დაინახეს მსგავსება? ორივე საქმეზე დადგენილია სასამართლოს განაჩენი, ორივე საქმეს ჰყავს დამნაშავე და ორივე საქმე იდენტურია. ორივე საქმეზე მოხდა ამ ორი ადამიანის გატაცება, წამება, დახვრეტა პირდაპირ.

ორივე გაიყვანეს, მოკლეს, მოაბეს ფეხზე ბეტონის ნაჭრები და ჩაძირეს ზღვაში – დადგენილია. დადგენილია დამნაშავეც, რომელიც სასჯელს იხდის, ეს არის აფხაზეთის კუდ-ის უფროსი, რომან შამათავა, რომელმაც ეს ყველაფერი გააკეთა. გამოძიება მოხდა 2012 წლის 1-ელი ოქტომბრის შემდეგ, 2013 წელს. პაატა ქარდავაც ზუსტად ასე, ზუგდიდის ცენტრში დღისით, ბაზართან ახლოს 27 აგვისტოს ჩასვეს მანქანაში, მოიტაცეს უამრავი ხალხის წინაშე, არავის იქაც სახე არ დაუმალავს, ყველამ იცოდა იქაც, რომ სამართალდამცავებზე იყო ლაპარაკი. ძალიან ხშირად მოდიოდნენ ჩემთან როგორც ქალბატონი თამარ არღვლიანი, ისე პაატა ქარდავას შვილები, ბექა და ქრისტინე ქარდავები. ხშირად ვსაუბრობდით ამ თემაზე, ბევრი წერილი გვაქვს გაგზავნილი ამ თემაზე, პასუხი ყველა მხრიდან იყო ნული. ორივე შემთხვევაზე მაშინ საქმე აღძრული იყო თავისუფლების უკანონო აღკვეთით“, – განაცხადა სოზარ სუბარმა.