უკრაინის პრეზიდენტი ვოლოდიმირ ზელენსკი აცხადებს, რომ რუსეთისგან 9 მაისს პროვოკაციებია მოსალოდნელი. ზელენსკის თქმით, უცხოელმა ლიდერებმა, რომლებიც მოსკოვს ეწვევიან, შესაძლოა, ეს საკუთარ თავზე გამოსცადონ.

აღნიშნულის შესახებ ვოლოდიმირ ზელენსკიმ ჩეხეთში, ქვეყნის პრეზიდენტთან, პეტრ პაველთან ერთად გამართულ პრესკონფერენციაზე ისაუბრა.

„სამწუხაროდ, ჩვენ გვესმის, ვინ არიან ეს მეზობლები – რუსეთი. და რაზე არიან მზად რადიკალური პოლიტიკური დივიდენდების მისაღებად, პირველ რიგში თავიანთ ქვეყანაში“, – განაცხადა ზელენსკიმ.

უკრაინის პრეზიდენტის განმარტებით, რუსეთის მიერ გამოცხადებული აღდგომის „ცეცხლის შეწყვეტის“ დროსაც კი, მათ 100-ზე მეტი შეტევა განახორციელეს.

„ნდობა არ არსებობს, პროვოკაციები შეიძლება, იყოს. მაგრამ ეს რუსებზეა დამოკიდებული. თუ ვინმე მათ კიდევ ენდობა, დაე, საკუთარ თავზე გამოსცადონ“, – განაცხადა ზელენსკიმ.

უკრაინას რუსეთთან ხანგრძლივი ომი არ სურს. უფრო მეტიც, დღეს უკვე გვაქვს ყველა ინსტრუმენტი, რომ ეს სწრაფად დავასრულოთ. ამის შესახებ უკრაინის პრეზიდენტმა ვოლოდიმირ ზელენსკიმ ჩეხეთის პრეზიდენტ პეტრ პაველთან ერთობლივ პრესკონფერენციაზე განაცხადა.

კერძოდ, ზელენსკიმ უპასუხა ჟურნალისტების კითხვას, თუ როგორ ეხმაურება კრემლის ლიდერის ვლადიმერ პუტინის განცხადებას იმის თაობაზე, რომ „უკრაინასთან შერიგება გარდაუვალია“. მან ხაზგასმით აღნიშნა, რომ უკრაინა მოკავშირეების მხარდაჭერის გარეშე არ დარჩება.

„ჩემი აზრით, თუ უკრაინა ძლიერი იქნება, ომი რაც შეიძლება სწრაფად დასრულდება. ყველა ინსტრუმენტი, უპირველეს ყოვლისა, შეერთებული შტატებისა და ჩვენი ევროპელი კოლეგების ხელშია. ამერიკასა და ევროპას შორის ალიანსის შენარჩუნება ნომერ პირველი ამოცანაა. აიძულონ რუსეთი, დათანხმდეს სრულ, უპირობო ცეცხლის შეწყვეტას. უფრო მეტიც, ეს წინადადება შეერთებულმა შტატებმა წამოაყენა და ჩვენ მას მხარი დავუჭირეთ. ესეც პრიორიტეტული ამოცანაა“, – განაცხადა უკრაინის პრეზიდენტმა.

ზელენსკიმ დასძინა, რომ უკრაინა 2025 წლის ბოლომდე 3 მილიონ ჭურვს მიიღებს. მისი თქმით, რუსებმა ეს უნდა იცოდნენ.

„ეს არ ნიშნავს, რომ ვინმეს ხანგრძლივი ომი სურს, ჩვენ მისი დასრულება გვინდა. ყველა ომი მთავრდება, ნებისმიერ შემთხვევაში, რაშიც დარწმუნებული ვარ, ომი დასრულდება, ისევე, როგორც  ხანგრძლივი დიქტატორული რეჟიმები მთავრდებიან ყოველთვის, როგორც მთავრდება ნებისმიერი იმპერიის სიცოცხლე, რომელიც უბრალოდ ომის პრინციპებზეა აგებული, ადამიანების, მათი უფლებების უპატივცემულობის პრინციპებზე“, – ხაზგასმით აღნიშნა უკრაინის პრეზიდენტმა.

ცნობისთვის, რუსეთის პრეზიდენტმა ვლადიმერ პუტინმა განაცხადა, რომ უკრაინის წინააღმდეგ ომის დროს მას ბირთვული იარაღის გამოყენების საჭიროება არ ჰქონდა. მისივე თქმით, „უკრაინასთან შერიგება გარდაუვალია, ეს დროის საკითხია“.

პუტინმა აღნიშნა, რომ, სავარაუდოდ, „სურდათ რუსეთის პროვოცირება“, რათა უკრაინაში ბირთვული იარაღი გამოეყენებინა. კრემლის ლიდერის თქმით, „იმედი აქვს“, რომ ამის საჭიროება არ იქნება.

აშშ-ის პრეზიდენტმა დონალდ ტრამპმა NBC News-თან ინტერვიუში მკაფიოდ მიანიშნა, რომ მეორე ვადის ამოწურვის შემდეგ თეთრ სახლს დატოვებს.

ტრამპმა ასევე ხაზი გაუსვა რესპუბლიკური პარტიიდან რამდენიმე კანდიდატს, რომლებიც, მისი თქმით, შეძლებენ კენჭისყრას, მას შემდეგ, რაც ის რესპუბლიკური პარტიის არჩეული ლიდერის თანამდებობას დაასრულებს.

მან ახსენა არა მხოლოდ ვიცე-პრეზიდენტი ჯეი დი ვენსი, არამედ სახელმწიფო მდივანი მარკო რუბიო, რომელიც მისი მეორე ადმინისტრაციის ცენტრალურ ფიგურად იქცა.

„მე რვა წლით პრეზიდენტი ვიქნები, მე ვიქნები პრეზიდენტი ორი ვადით. ყოველთვის ვფიქრობდი, რომ ეს ძალიან მნიშვნელოვანი იყო“, – განაცხადა ტრამპმა.

უკრაინასა და რუსეთს შორის სამშვიდობო შეთანხმების მიღწევა შეიძლება, შეუძლებელი აღმოჩნდეს მხარეებს შორის არსებული დიდი სიძულვილის გამო, – ამის შესახებ აშშ-ის პრეზიდენტმა, დონალდ ტრამპმა NBC News-თან ინტერვიუში განაცხადა.

ჟურნალისტმა ტრამპს უკრაინაში მიმდინარე ომსა და ამ ომის დასასრულებლად მისი ადმინისტრაციის ძალისხმევის შესახებ ჰკითხა, რაზეც პრეზიდენტმა უპასუხა, რომ იყო მომენტები, როდესაც ის ახლოს იყო შუამავლის როლზე უარის თქმასთან.

„ზოგჯერ მე მივდივარ ამასთან ახლოს, მაგრამ დადებითი მოვლენები ხდება“, – თქვა ტრამპმა. ამავე დროს, მან დაადასტურა, რომ ჯერ კიდევ შეუძლია ამის გაკეთება.

„დადგება დრო, როდესაც ვიტყვი: კარგი, გააგრძელეთ. გააგრძელეთ სისულელე და გააგრძელეთ ომი“, – განაცხადა ტრამპმა. მან აღიარა, რომ ორ მებრძოლ ქვეყანას შორის შეთანხმების მიღწევა შეიძლება არარეალისტური იყოს, თუმცა ასევე თქვა, რომ მისი აზრით, შეთანხმება შეიძლება, საკმაოდ ახლოს იყოს.

„შესაძლოა, ეს შეუძლებელი იყოს… რომ იცოდეთ, ამ ორ კაცს შორის (ზელენსკი და პუტინი), აგრეთვე, გულწრფელად რომ ვთქვა, ზოგიერთ ჯარისკაცს შორის, არსებობს უზარმაზარი სიძულვილი. გენერლებს შორის. ისინი სამი წელია სასტიკად ომობენ“, – განაცხადა აშშ-ის პრეზიდენტმა.

ტრამპმა ასევე აღნიშნა, რომ სამშვიდობო შეთანხმებასთან ახლოს იყო ერთ მხარესთან, მაგრამ მეორესთან არა. თუმცა, რომელ მხარესთან ვერ მიაღწია შეთაბხმებას, რუსეთთან თუ უკრაინასთან, ეს არ დაუკონკრეტებია.

ისრაელის პრემიერ-მინისტრმა ბენიამინ ნეთანიაჰუმ პირობა დადო, რომ „ჰუსიტებზე“ შურს იძიებს მას შემდეგ, რაც დაჯგუფების მიერ გაშვებული რაკეტა ისრაელის მთავარი აეროპორტის ტერიტორიაზე ჩამოვარდა. ამის შესახებ BBC იუწყება. 

სოციალურ მედიაში გამოქვეყნებულ ვიდეოში ნეთანიაჰუ დაჯგუფებას დარტყმებით დაემუქრა და განაცხადა: „ჩვენ წარსულში თავს დავესხით, მომავალშიც შევუტევთ“.

ისრაელის ხელისუფლების განცხადებით, ირანის მხარდაჭერილი დაჯგუფების მიერ იემენიდან გაშვებული რაკეტა 4 მაისის დილას თელ-ავივის გარეუბანში მდებარე ბენ გურიონის აეროპორტის მთავარ ტერმინალთან დაეცა.

აფეთქების შედეგად ოთხი ადამიანი დაშავდა, კიდევ ორმა გაქცევის დროს მიიღო დაზიანება.

„ჰუსიტების“ სამხედრო წარმომადგენელმა იაჰია სარიმ ტელევიზიით გავრცელებულ მიმართვაში განაცხადა, რომ ისრაელის აეროპორტი „საჰაერო მიმოსვლისთვის უსაფრთხო აღარ არის“.

ისრაელის თავდაცვის მინისტრმა ისრაელ კაცმა განაცხადა: „ნებისმიერს, ვინც ჩვენ დაგვარტყამს, ჩვენ შვიდჯერ უფრო ძლიერად დავარტყამთ“.

ებრაული მედიის ცნობით, ბენ გურიონის აეროპორტის ტერიტორიაზე „ჰუსიტების“ მიერ განხორციელებული სარაკეტო იერიშის შემდეგ დღეს 20-ზე მეტი რეისი გაუქმდა.

ზოგიერთი ავიაკომპანია ასევე აუქმებს ფრენებს მომდევნო ორი-სამი დღის განმავლობაში. მათ შორის, British Airways-ი აცხადებს, რომ 7 მაისამდე აჩერებს ყველა რეისს თელ-ავივის მიმართულებით და თელ-ავივიდან. Air India აცხადებს, რომ 6 მაისამდე შეაჩერა ფრენები. Lufthansa Group-მა, რომელიც მოიცავს Austrian Airlines-ს, Swiss-ს, Brussels Airlines-ს და Eurowings-ს, ასევე შეაჩერა ფრენები 6 მაისამდე.