Home Blog Page 5

 პროკურატურამ მამუკა ხაზარაძეს ბრალდება წარუდგინა

საქართველოს პროკურატურამ საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობის ფაქტზე მამუკა ხაზარაძეს ბრალდება წარუდგინა. აღნიშნულის შესახებ ნათქვამია საქართველოს პროკურატურის განცხადებაში.

საქართველოს პროკურატურის ცნობით, გამოძიებით დადგინდა, რომ ბრალდებული საქართველოს პარლამენტში შექმნილ 2003–2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის 25 მარტის სხდომაზე დაბარებული იყო ახსნა-განმარტების მიცემის მიზნით.

„მიუხედავად იმისა, რომ მამუკა ხაზარაძეს კომისიის თავმჯდომარის ხელმოწერით შესაბამისი დოკუმენტი 22 მარტს გადაეცა და მისთვის ცნობილი იყო საქართველოს პარლამენტის დროებითი საგამოძიებო კომისიის სხდომაზე გამოცხადების ვალდებულების თაობაზე, ასევე გაფრთხილებული იყო გამოუცხადებლობის შემთხვევაში კანონმდებლობით გათვალისწინებული პასუხისმგებლობის შესახებ, იგი დროებითი საგამოძიებო კომისიის სხდომაზე არასაპატიო მიზეზით არ გამოცხადდა, რამაც საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობა გამოიწვია. მამუკა ხაზარაძეს ბრალდება საქართველოს სისხლის სამართლის კოდექსის 349-ე მუხლით წარედგინა. პროკურატურა ბრალდებულისთვის აღკვეთის ღონისძიების შეფარდების მოთხოვნით სასამართლოს კანონით დადგენილ ვადაში მიმართავს“, – ნათქვამია საქართველოს პროკურატურის განცხადებაში.

“ნაცმოძრაობამ”გუშინ რაც ჩაიდინა, სამარცხვინოა, მაგრამ ესეც არ არის ახალი, რადგან 13 წელია, თავს ესხმის ყველანაირ პროცესს, სადაც ცენტრში არ არის მიშა სააკაშვილი -თამარ ჩერგოლეიშვილი

„ნაციონალურმა მოძრაობამ“ გუშინ რაც ჩაიდინა, არის სამარცხვინო, მაგრამ ესეც არ არის ახალი, რადგან 13 წელია, „ნაციონალური მოძრაობა“ თავს ესხმის ყველანაირ პროცესს, სადაც ცენტრში არ არის მიშა სააკაშვილი, – ამის შესახებ „ფედერალისტების“ ლიდერმა, თამარ ჩერგოლეიშვილმა განაცხადა.

ჩერგოლეიშვილის თქმით, სალომე ზურაბიშვილის ინიციატივაში ახალი არის ის, რომ ცდილობს მოჯადოებული წრის გარღვევას და შეთანხმებების მიღწევას.

„არსებობს ასეთი ძალიან კარგი ლეგენდა კიბოს, ქარიყლაპიასა და გედის შესახებ, რომლის სიბრძნე, მორალი იმაშია, რომ შენ ტვირთი შეგიძლია წინ წაიღო მხოლოდ მაშინ, თუ ერთი მიმართულებით მიგაქვს. აქამდე პოლიტიკური სპექტრი დადიოდა მოჯადოებულ წრეზე და ცდილობდა შეთანხმების მიღწევას იქ, სადაც ვერ თანხმდება. არა „ქართულ ოცნებასთან“, არამედ პირველ რიგში საკუთარ თავთან მარცხდებოდა. შეიძლება, ეს ვიღაცას ნაკლებად ამბიციურად მოეჩვენოს, რადგან მიჩვეულები არიან ამ პოლიტიკური სპექტრისგან ტყუილ, გაბუქებულ დაპირებებს, მაგრამ სალომე ზურაბიშვილის ინიციატივა არის ერთადერთი ოპტიმალური, სწორი გზა. ეს გზა არ უზღუდავს არავის, თუ რაღაც ჯადოსნური გეგმები აქვთ და სხვა გზები, ამ გზებით იარონ. უბრალოდ, ჩვენი კოორდინაციის ნაწილი ეს ვერ იქნება და თავისთვის იყვნენ. ის, რაც გუშინ „ნაციონალურმა მოძრაობამ“ ჩაიდინა, არის სამარცხვინო, მაგრამ ესეც არ არის ახალი, რადგან 13 წელია, „ნაციონალური მოძრაობა“ თავს ესხმის ყველანაირ პროცესს, სადაც ცენტრში არ არის მიშა სააკაშვილი. შესაბამისად, იმის გამო, რომ აქ ცენტრში არის პროტესტი, ხალხი და ხალხის ინტერესი, აქედან გამომდინარე, სააკაშვილი ცდილობს, რომ ამ პროცესის დისკრედიტაცია მოახდინოს. სალომე ზურაბიშვილმა გამოაცხადა ის, რაზეც ვიყავით შეთანხმებულები. არაადეკვატური მოლოდინები გააჩინა „ნაციონალური მოძრაობის“ უსაქციელობამ და მათი პოლიტიკოსების არასწორმა განცხადებებმა, ამიტომ სალომე ზურაბიშვილს გუშინ ვერაფერს ვუსაყვედურებდი“, – განაცხადა ჩერგოლეიშვილმა.

პარლამენტმა „უცხოეთის აგენტების რეგისტრაციის აქტი“, FARA-ს კანონპროექტი მესამე მოსმენით დაამტკიცა

პარლამენტმა „უცხოეთის აგენტების რეგისტრაციის აქტი“, FARA-ს კანონპროექტი მესამე მოსმენით დაამტკიცა. დღევანდელ პლენარულ სხდომაზე ცვლილებებს მხარი 86-მა დეპუტატმა დაუჭირა.

კენჭისყრისას საქართველოს პარლამენტის თავმჯდომარემ, შალვა პაპუაშვილმა აღნიშნა, რომ მიღებულია ამერიკული სტანდარტისა და კანონის ზუსტი ასლი.

FARA-სთან ერთად, მიღებულია „სისხლის სამართლის კოდექსში“ დაგეგმილი ცვლილებები.

მიღებული კანონპროექტის მიხედვით, მოწესრიგდება უცხოური პრინციპალის აგენტად რეგისტრაციის საკითხები,  კერძოდ  – უცხოური პრინციპალის აგენტად რეგისტრაციის განაცხადი, სხვა სათანადო დოკუმენტების საჯაროობის უზრუნველყოფა; უცხოური პრინციპალის აგენტად რეგისტრირებული სუბიექტის მიერ ყოველწლიური საფინანსო დეკლარაციის წარდგენა; უცხოური პრინციპალის აგენტად რეგისტრირებული სუბიექტის რეგისტრაციის გაუქმება; უცხოური პრინციპალის აგენტის გამოსავლენად ან კანონპროექტით განსაზღვრულ მოთხოვნათა შესრულების შესამოწმებლად მონიტორინგის განხორციელება.

უცხოური პრინციპალის აგენტად რეგისტრაციისთვის თავის არიდება და კანონით განსაზღვრულ მოთხოვნათა შეუსრულებლობა სისხლის სამართლებრივი პასუხისმგებლობას გამოიწვევს. კანონის აღსრულება ანტიკორუფციულ ბიუროს დაევალება.

ზურაბიშვილი არც ლიდერია, არც ლიდერული თვისებები აქვს, ის ვერ იქნება ამ რადიკალური დაჯგუფების გამაერთიანებელი – კახა კალაძე

თბილისის მერის, კახა კალაძის განცხადებით, სალომე ზურაბიშვილი არც ლიდერია, არც ლიდერული თვისებები გააჩნია და შესაბამისად, ის ოპოზიციის გამაერთიანებელი ვერ იქნება.

როგორც მერმა ჟურნალისტებს შესაბამისი კითხვის პასუხად განუცხადა, ზურაბიშვილი არც ხელისუფლებისთვისაა საინტერესო და არც ოპოზიციისთვის.

„სალომე ზურაბიშვილი როგორც ჩვენთვის არ არის საინტერესო, ისე იმ რადიკალური დაჯგუფებისთვის. ის მათთვის საინტერესო იყო მაშინ, როდესაც პრეზიდენტის სტატუსი ჰქონდა. ზურაბიშვილი არც ლიდერია, არ ლიდერული თვისებები აქვს, შესაბამისად, ის ვერ იქნება ამ რადიკალური დაჯგუფების გამაერთიანებელი ან წარმომადგენელი. პირდაპირ რომ ვთქვათ, არსებითი მნიშვნელობა არ აქვს, ისინი გაერთიანებულები იქნებიან თუ დაშლილები. როდესაც შენ ქვეყნის წინააღმდეგ დგამ ნაბიჯებს, ხარ აგენტი, ემსახურები სხვა ქვეყნის ინტერესებს, ამ ქვეყანაში არანაირი მომავალი არ გაგაჩნია“, – განაცხადა კახა კალაძემ.

ამასთან, კითხვაზე, მოახერხებს თუ არა ოპოზიცია გაერთიანებას საერთო პლატფორმის ირგვლივ, თბილისის მერი პასუხობს, რომ ამას არანაირი მნიშვნელობა არ აქვს.

„ბევრჯერ გვინახავს გაერთიანებული ეს რადიკალური დაჯგუფება, რომელიც სხვადასხვა წარმომადგენლისგან შედგებოდა, თუმცა საბოლოო ჯამში, ეს არის ერთი ხელით მართული აგენტურა. შეიძლება დღეს სხვადასხვა სახელები დაირქვან, მაგრამ საბოლოო ჯამში, ერთ რამეს ემსახურებიან – გარე ძალებს. ყველაფერს აკეთებენ ქვეყნის წინააღმდეგ და, რა თქმა უნდა, ასეთ ადამიანებს, როგორც გაერთიანებულებს, ისე დაშლილებს, არანაირი პერსპექტივა და მომავალი არ გააჩნიათ“, – განაცხადა კახა კალაძემ.

ზელენსკი, ტრამპი და პუტინი: როგორც ჩანს, უკრაინის საპრეზიდენტო არჩევნებში ყველას თავისი ინტერესი აქვს – The Economist

ბრიტანულ ჟურნალ „ეკონომისტში“ (The Economist) გამოქვეყნებულია სტატია სათაურით „ზელენსკი, ტრამპი და პუტინი: როგორც ჩანს, უკრაინის საპრეზიდენტო არჩევნებში ყველას თავისი ინტერესი აქვს“, რომელშიც განხილულია საკითხი უკრაინაში საპრეზიდენტო არჩევნების ჩატარების თაობაზე. „პრეზიდენტი ვოლოდიმირ ზელენსკი პრეზიდენტის პოსტზე დარჩენას მეორე ვადითაც გეგმავს. არჩევნები შეიძლება უკვე ივლისში გაიმართოს, ანუ სავარაუდოდ, სამხედრო მდგომარეობის გაუქმების შემდეგ, რომლის მიღწევასაც თეთრი სახლი 20 აპრილისთვის გეგმავს“, – ნათქვამია პუბლიკაციაში.

გთავაზობთ სტატიის შინაარსს:

„უილიამ შექსპირის „მაკბეტის“ ახალი დადგმა, რომელიც 28 თებერვალს კიევის ცნობილ ივან ფრანკოს თეატრში გაიმართა, მნიშვნელოვანი მოვლენა იყო უკრაინის თეატრალურ ცხოვრებაში, მაგრამ სპექტაკლი სწორედ იმ დღეს თეთრ სახლში მომხდარმა დიპლომატიურმა კატასტროფამ დაჩრდილა… და მაინც მაყურებლები, რომლებსაც დიდი  შთაბეჭდილება დარჩათ „მაკბეტის“ ნახვის შემდეგ, გარკვეულ პარალელს ავლებდნენ შექსპირის პერსონაჟებსა და დღევანდელი დროის „გმირებს“ შორის. ვიღაცეები „მაკბეტს“ სისხლისმსმელ მოსკოველ დიქტატორს ამსგავსებდნენ. სხვებისთვის კი შექსპირის ტრაგედია  წარმოადგენს ისტორიას ამბიციებზე, ხელისუფლებაზე და ღალატზე“, – ნათქვამია პუბლიკაციის დასწყისში, შემდეგ კი სტატიაში უშუალოდ მოქმედი „ვადაგასული“ პრეზიდენტის შანსებია განხილული:

„კიევში ვოლოდიმირ ზელენსკიზე „ხანჯლებს ლესავენ“ – მის წინააღმდეგ ინტრიგები იხლართება. რამდენიმე თვის განმავლობაში უკრაინის პრეზიდენტი საზღვარგარეთიდან ძლიერ ზეწოლას განიცდიდა: ვლადიმერ პუტინისაგან, რომელიც მის ლეგიტიმურობას ეჭვქვეს აყენებს  და დონალდ ტრამპისაგან, რომელიც კრემლის მეთაურის თეზისებს იმეორებდა. როგორც ჩანდა, ორივეს ვოლოდიმირ ზელენსკის ჯიუტობა აღიზიანებდათ. თეთრი სახლი და კრემლი – ორივე ითხოვდა არჩევნების ჩატარებას ომის დროს და, ალბათ, ვარაუდობდნენ, რომ უკრაინელი ამომრჩეველი ამერიკელ და რუს ლიდერს სურვილს შეუსრულებდა – „ხალხის მსახურის“ წარმომადგენელ პრეზიდენტის ხელისუფლებას დაამხობდა. ორი თვის წინათ ვოლოდიმირ ზელენსკი კატეგორიულად იყო არჩევნების ჩატარების წინააღმდეგი, მაგრამ თეთრ სახლში მომხდარი ინციდენტის შემდეგ, როცა მისმა რეიტინგმა, ჟურნალ „ეკონომისტის“ ეგიდით ჩატარებული გამოკითხვის მიხედვით, მნიშვნელოვნად მოიმატა, პრეზიდენტის განწყობა შეიცვალა, მან თავისი გათვლები შეცვალა. ამჟამად მიმდინარეობს სერიოზული მზადება, რომ ვოლოდიმირ ზელენსკი ამომრჩევლებს სიტყვით მიმართავს და საკმაოდ მალე. გასულ კვირას პრეზიდენტმა თათბირი ჩაატარა და თავის გუნდს დაავალა – მოემზადნონ არჩევნებში ხმის მიცემისათვის საომარი მოქმედებების სრული შეწყვეტის შემდეგ“, – წერს „ეკონომისტი“.

პუბლიკაციაში აღნიშნულია, რომ არჩევნებისათვის მზადების პირველი ნიშანი შეიძლება გახდეს უკრაინის ვერხოვნა რადაში (საკანონმდებლო ორგანოში) ხმის მიცემა სამხედრო მდგომარეობის გაგრძელებისათვის (ან არგაგრძელებისთვის), რომელიც არა უგვიანეს 5 მაისამდე უნდა  განხორციელდეს.

როგორც „ეკონომისტი“ წერს, სხვადასხვა წყაროები არჩევნების სხვადასხვა თარიღს ასახელებენ, თუ როდის შეიძლება პრეზიდენტის არჩევნები ჩატარდეს, თუმცა წყაროთა უმრავლესობა იხრება იმ ვერსიისაკენ, რომ ამომრჩევლები საარჩევნო ყუთებთან უკვე მიმდინარე წლის ივლისში მივლენ. კანონის თანახმად, ხმის მიცემა შეიძლება ჩატარდეს არა უადრეს 60 დღის (ორი თვის) განმავლობაში სამხედრო მდგომარეობის გაუქმებიდან. „ეკონომისტის“ ზოგიერთმა მოსაუბრემ არ გამორიცხა არჩევნების ორგანიზება სამი თვის შემდეგაც: მათი თქმით, საარჩევნო ორგანოებს წინ უამრავი რთული საკითხის მოგვარება ელოდებათ, რომლებიც ძალზე ბევრია დაგროვილი – სიების შემოწმება, უცხოეთში მყოფი ლტოლვილების მონაწილეობა არჩევნებში და ა.შ.

ერთ-ერთმა უკრაინელმა ჩინოვნიკმა ივარაუდა, რომ „ვოლოდიმირ ზელენსკი შეეცდება თავისი მეტოქეები ანაზდეული მოქმედებით საგონებელში ჩააგდოს და არჩევნები ივლისში დანიშნოს – იმ იმედით, რომ შეკვეცილი ვადები მას შესაძლებლობას მისცემს ბრძოლა მოუმზადებელ  მოწინააღმდეგეებთან ჰქონდეს“. მისი თქმით, „ხანგრძლივი საარჩევნო კამპანია ქვეყანას ნაწილ-ნაწილად დაგლეჯს“.

ამასთან, უკრაინის ოპოზიცია უფრო ხანგრძლივი (სამთვიანი) საპრეზიდენტო კამპანიის მომხრედ გამოდის.

ვოლოდიმირ ზელენსკის ერთ-ერთი სავარაუდო მთავარი ოპონენტის, ექს-პრეზიდენტ პეტრო პოროშენკოს აზრით, არჩევნები შეიძლება ჩატარდეს „აგვისტოდან ოქტომბრის ჩათვლით“ პერიოდში, ნებისმიერ დროს. მისი თქმით, ვოლოდმირ ზელენსკის საარჩევნო კამპანიის სტარტი იმ დროიდან დაიწყო, როცა მოქმედმა პრეზიდენტმა ყოფილი პრეზიდენტის პეტრო პოროშენკოს წინააღმდეგ პერსონალური სანქციები დააწესა.

თავის მხრივ, პარტია „ბატკივშჩინის“ დეპუტატი სერგეი ვლასენკო თვლის, რომ 8 მაისისათვის, როცა უკრაინაში სამხედრო მდგომარეობის ვადა ამოიწურება, ცეცხლის შეწყვეტაზე საიმედო შეთანხმების მიღწევა რთული საქმე იქნება. „კიდევ უფრო რთული იქნება იმ უკრაინელების საარჩევნო უფლების რეალიზება, რომლებიც ან საზღვარგარეთ იმყოფებიან, ან ფრონტის ხაზზე და ან რუსების მიერ ოკუპირებულ ტერიტორიებზე.

შენიშვნა: უკრაინის მმართველი პარტია „ხალხის მსახური“ საპრეზიდენტო არჩევნებისათვის მზადებას კატეგორიულად უარყოფს. როგორც დავით არახამიამ – „ხალხის მსახურის“ ფრაქციის ხელმძღვანელმა ვერხოვნა რადაში – განაცხადა უკრაინის საზოგადოებრივ მაუწყებლის («Суспiльне») ტელეეთერში, „არავითარი თათბირი არ გამართულა და საერთოდ, ამჟამად არავინ არ ფიქრობს არჩევნების მომზადებასა და მის ჩატარებაზე. ყველა საპარლამენტო ფრაქცია შეთანხმდა, რომ საპრეზიდენტო არჩევნები გაიმართება სამხედრო მდგომარეობის გაუქმებიდან ექვსი თვის შემდეგ“.

წყარო

თიბისი კაპიტალმა საქართველოს საცხოვრებელი და კომერციული უძრავი ქონების ბაზრის კვლევა გამოაქვეყნა

თიბისი კაპიტალმა გამომწერებს ვებინარზე საქართველოს საცხოვრებელი და კომერციული უძრავი ქონების ბაზრის მიმოხილვა – 2024 წლის შედეგები და 2025 წლის მოლოდინები გააცნო.

ბოლო წლებში, გაზრდილმა ეკონომიკურმა აქტივობამ და საცალო სექტორის ზრდამ პოზიტიური გავლენა მოახდინა კომერციული უძრავი ქონების სექტორზე, მათ შორის სავაჭრო ცენტრებზე, ქუჩის სავაჭრო ობიექტებსა და ბიზნეს ცენტრებზე.

ხელფასების ზრდამ მოსახლეობის მსყიდველობითი უნარი გაზარდა, რაც სამომხმარებლო პროდუქტებზე დანახარჯების ზრდაზე აისახა. ასევე, მზარდი ურბანიზაცია ქალაქებში საცალო და სამომხმარებლო სექტორზე მოთხოვნას ზრდის.

სავაჭრო ცენტრები

საქართველოში ეკონომიკური აქტივობა და შესაბამისად, კომერციული უძრავი ქონებაც, ძირითადად, თბილისშია კონცენტრირებული. თბილისში 10 თანამედროვე, მრავალფუნქციური სავაჭრო ცენტრია, რომელთა ჯამური გასაქირავებელი ფართი 291 728 კვ.მ-ს შეადგენს. ბათუმში წარმოდგენილია 5 სავაჭრო ცენტრი, რომელთა ჯამური გასაქირავებელი ფართი 53 901 კვ.მ-ს შეადგენს. ქუთაისში, ზუგდიდსა და თელავში წარმოდგენილი სავაჭრო ცენტრები ძირითადად სავაჭრო ცენტრებისა და ღია ბაზრობების კომბინაციას წარმოადგენენ. ზუგდიდს თანამედროვე სავაჭრო ცენტრი 2023 წელს შეემატა, სადაც წარმოდგენილია ქსელური მაღაზიები, საერთაშორისო და ადგილობრივი ბრენდები.

2024 წელს თბილისის სავაჭრო ცენტრებში საშუალო იჯარამ კვ.მ-ზე $24.1 შეადგინა, რაც წინა წელთან შედარებით, 7.4%-ით მაღალია. იმავე პერიოდში, ბათუმის სავაჭრო ცენტრებში საშუალო იჯარა კვ.მ-ზე $23.1 იყო, 5%-ით მაღალი ვიდრე 2023 წელს. დადებითი დინამიკა ახალი სავაჭრო ცენტრების გახსნითა და აჭარაში არსებული დადებითი ეკონომიკური ტენდენციებით იყო განპირობებული.

მომდევნო წლებში ახალი სავაჭრო ცენტრები თბილისს, ბათუმსა და თელავს შეემატება. თბილისის სამომავლო მიწოდებიდან აღსანიშნავია სავაჭრო ცენტრებიდან აღსანიშნავია თბილისი აუთლეტ ვილიჯი, რომელიც მიმდინარე წლის მაისში გაიხსნება და ასევე, სავაჭრო სახლი – ბავშვთა სამყარო, რომელზეც სამშენებლო ნებართვა 2024 წელს გაიცა. მომდევნო წლებში ბათუმს ორი სავაჭრო ცენტრი შეემატება: ორბი სითი და მსოფლიო სავაჭრო ცენტრი. თელავში კი, ახალი სავაჭრო ცენტრი მიმდინარე წლის შემოდგომაზე გაიხსნება.

ქუჩის სავაჭრო ობიექტები

2024 წელს საშუალო იჯარა თბილისის ცენტრალურ ქუჩაზე მდებარე სავაჭრო ობიექტებში ყველაზე მაღალი იყო და კვ.მ.-ზე $31-ს შეადგენდა, მეორე ადგილზე კი ბათუმი იყო  – კვ.მ.-ზე $25.5 -ით.

თბილისში ყველაზე მაღალი საშუალო იჯარა რუსთაველის (კვ.მ. – $33.3) და ჭავჭავაძის (კვ.მ. – $33.2) გამზირებზეა. ბათუმში გორგილაძის ქუჩა ლიდერობს, სადაც საშუალო იჯარა კვ.მ.-ზე $29.4-ს შეადგენს.  

თბილისში 2024 წელს 29 სავაჭრო ობიექტზე გაიცა სამშენებლო ნებართვა, რაც ნიშნავს, რომ მომავალი 3-4 წლის განმავლობაში, სავარაუდოდ თბილისის ბაზარზე კომერციული ფართების მიწოდება გაიზრდება.

ბიზნესცენტრები და ოფისები

2024 წელს თბილისის ბიზნესცენტრებში საშუალო იჯარა წლიურად 6%-ით გაიზარდა და კვ.მ.-ზე $23.4-ს გაუტოლდა. საშუალო იჯარა მნიშვნელოვნად განსხვავდება ბიზნესცენტრების ტიპების მიხედვით:  A კლასის ბიზნესცენტრში საშუალო იჯარა კვ.მ-ზე $28-ს შეადგენს, B კლასის ბიზნეცენტრში კი – $15.1-ს. C კლასის საოფისე სივრცეებზე, რომლებიც ძირითადად საცხოვრებელი შენობების პირველ სართულზეა განთავსებული საშუალო იჯარა კვ.მ-ზე $13-ს შეადგენს.

2024 წელს თბილისის ბიზნეს ცენტრებში ვაკანტურობის კოეფიციენტის საშუალო მაჩვენებელი 12%-ს შეადგენდა, რაც წინა წელთან შედარებით, 2 პროცენტული პუნქტით დაბალია. დატვირთულობის გაუმჯობესება განსაკუთრებით შესამჩნევია A კლასის ბიზნეს ცენტრებში, სადაც ვაკანტურობის კოეფიციენტი 10%-მდე შემცირდა.

2024 წელს თბილისში 18 ახალი ბიზნესცენტრის მშენებლობის ნებართვა გაიცა, რაც ნიშნავს, რომ  მომავალი 3-4 წლის განმავლობაში, სავარაუდოდ, თბილისში ახალი მსხვილი ბიზნესცენტრები გამოჩნდება. ახალი ბიზნესცენტრების მშენებლობის ნებართვები ძირითადად ვაკეში და საბურთალოზეა კონცენტრირებული.

ბათუმში საოფისე უძრავი ქონების იჯარა მიახლოებულია თბილისის საშუალო მაჩვენებელთან და კვ. მ-ზე $16.2 აშშ დოლარს შეადგენს.

ბათუმის, ქუთაისის, ზუგდიდისა და თელავის საოფისე უძრავი ქონების ბაზარზე ორგანიზებული საოფისე ფართების ნაკლებობაა, ვინაიდან ქალაქებში ოფისების უმეტესობა საცხოვრებელი შენობების პირველ სართულებზეა განთავსებული. რაც შეეხება სამომავლო მიწოდებას, ბათუმში, ზუგდიდსა და თელავში,  საოფისე ფართები სამომავლოდ, ძირითადად, მრავალფუნქციურ შენობებსა და სავაჭრო ცენტრებში იქნება განთავსებული.

საცხოვრებელი უძრავი ქონება

საქართველოს საცხოვრებელი უძრავი ქონების ბაზარი, ბოლო წლებში, მნიშვნელოვნად გაიზარდა. საცხოვრებელი უძრავი ქონების ბაზრის 72% თბილისს უჭირავს, 20% – ბათუმს, 8% კი სხვა ქალაქებს.

უძრავი ქონების პირველად ბაზარზე 2022-2023 წლებში აქტივობა ძალიან გაიზარდა, 2024-ში კი ზრდის ტემპი დასტაბილურდა.

თბილისის საცხოვრებელი უძრავი ქონების ბაზრისთვის 2025 წელი შედარებით სუსტად დაიწყო. გაყიდვები პირველ 2 თვეში წლიურად 5%-ით შემცირდა, რაც ძველი ბინების გაყიდვების კლებითაა გამოწვეული. თბილისში ახალი ბინების გაყიდვები 2025 წლის იანვარში საგრძნობლად გაიზარდა წლიურად, თუმცა თებერვალში ტრანზაქციები შენელდა.

თბილისის უბნებში გაყიდვების კუთხით აღსანიშნავია კრწანისის გააქტიურება, სადაც 2025 წლის პირველ 2 თვეში ტრანზაქციების რაოდენობა, წინა წლის იმავე პერიოდთან შედარებით, თითქმის გაორმაგდა. ეს უმეტესწილად, მეორადი ბაზრის გააქტიურებასთანაა დაკავშირებული.

მთაწმინდასა და ვაკეში, სადაც ფასების დონე ყველაზე მაღალია, თებერვალში დაახლოებით 6%-იანი წლიური კლება დაფიქსირდა.

2024 წელს ქირა დასტაბილურდა და ეს ტენდენცია 2025 წელსაც გრძელდება. როგორც მოსალოდნელი იყო, ქირის შემცირების და ფასის მაღალ დონეზე შენარჩუნების ფონზე, დასტაბილურდა უძრავი ქონების ამონაგებიც და მის გრძელვადიან საშუალო დონეს მიუახლოვდა.

2023-2024 წლებში, თბილისში ჯამურად დაახლოებით 2.7 მილიონ კვ.მ. საცხოვრებელ ფართობზე გაიცა სამშენებლო ნებართვა. ნებართვების მსგავსი ზრდა ძირითადად გამოწვეულია გაყიდვებსა და გასაყიდ ფასში არსებული გასული წლების პოზიტიური ტრენდებით. თუმცა, 2025 წლის იანვარსა და თებერვალში ნებართვებში კლება შეინიშნება. აღსანიშნავია, რომ თბილისში მშენებლობის ნებართვების 23% დიღომზე მოდის.

2025 წელი ბათუმისთვის შედარებით პოზიტიურად დაიწყო. ტრანზაქციების რაოდენობა პირველ 2 თვეში, გასული წლის იმავე პერიოდთან შედარებით, 4%-ით გაიზარდა, გასაყიდი ფასი კი – 20%-ით.

უკრაინაში არანაირი არჩევნები არ მზადდება – დავით არახამია

უკრაინის რადას ფრაქცია „ხალხის მსახურის“ თავმჯდომარე, დავით არახამია უარყოფს გავრცელებულ ინფორმაციას, რომ უკრაინის პრეზიდენტის ადმინისტრაციაში არჩევნებისთვის მზადებასთან დაკავშირებით შეხვედრა გაიმართა.

არახამიამ უკრაინულ მედიასთან საუბარში განმარტა, რომ მსგავს შეხვედრაში მონაწილეობა არ მიუღია და ასეთი შეხვედრა საერთოდ არ შემდგარა.

„არანაირი არჩევნები არ მზადდება, არანაირი მზადება არ მიმდინარეობს. საპარლამენტო პარტიები და ჯგუფები შეთანხმდნენ, რომ არჩევნები უნდა ჩატარდეს საომარი მდგომარეობის გაუქმებიდან ექვსი თვის შემდეგ. პრინციპში, ჩვენი პოზიცია არ შეცვლილა”, – აღნიშნა არახამიამ.

ცნობისთვის, გამოცემა The Economist-მა 30 მარტს გაავრცელა ინფორმაცია, რომ არჩევნები უკრაინაში, შესაძლოა, ივლისში ჩატარდეს და რომ პრეზიდენტმა ვოლოდიმირ ზელენსკიმ ამ საკითხთან დაკავშირებით შეხვედრა მოიწვია.

შესაძლოა, დღესვე დამაკავონ, მზად ვარ, სახლში არ დავბრუნდე – ალეკო ელისაშვილი 

პოლიტიკურ დევნას მედავებიან კაცის, რომელიც რანაირი პოლიტიკოსია თვითონაც რომ არ იცის – პერსონალურ მონაცემთა დაცვის სამსახურმა კლინიკა „ვივამედი“ და ნადირაძე დამნაშავედ ცნეს და თავისი სოციალური ქსელიდან ჩემი რენტგენის ფოტოს აღება დაავალეს, – ამის შესახებ კოალიცია „ძლიერი საქართველოს“ ერთ-ერთმა ლიდერმა, ალეკო ელისაშვილმა, თბილისის საქალაქო სასამართლოში განაცხადა.

მისი თქმით, დღევანდელ სასამართლო პროცესზე, სადაც საქმის არსებითი განხილვა მოხდება, შესაძლოა ის დააკავონ, მაგრამ მიიჩნევს, რომ ყველაფერი მოსამართლისა და „ქართულ ოცნებაში“ მიღებულ გადაწყვეტილებაზეა დამოკიდებული.

„დღეს იქნება ჩემი საქმის არსებითი განხილვა, არ ვიცი, სასამართლო კი ჰქვია ამ უმსგავსობას, მაგრამ არანაირი სამართალი არ არის. არ ვიცი, შესაძლოა, დღესვე დამაკავონ, ან არ დამაკავონ, შესაძლოა მოწმედ დიდი სახელოვანი პოლიტიკური მოღვაწე ალი ბაბაევი მოიყვანონ.

მოვედი, მზად ვარ იმისთვის, რომ სახლში არ დავბრუნდე. ყველაფერი მოსამართლის ხასიათსა და განწყობაზე იქნება დამოკიდებული და იმაზე თუ რა გადაწყვიტეს „ქართულ ოცნებაში“ და მოსამართლეს რა დაავალეს.

მიუხედავად იმისა, რომ პროკურატურის შუამდგომლობის საფუძველზე შემეცვალა აღკვეთის ღონისძიება, რაც ციხეში ჩემი ყოფნის მე-12 დღეს მოხდა და პოლიტიკურ პროცესს უკავშირდება, საქართველოში ევროსაბჭოს დელეგაციის ჩამოსვლას.

პოლიტიკურ დევნას მედავებიან კაცის, რომელიც რანაირი პოლიტიკოსია, თვითონაც რომ არ იცის, გიორგი გახარია რომ სცემეს ბათუმში საქმე აღიძრა ცემის მუხლით. ანუ ალი ბაბაევი პოლიტიკოსია და გიორგი გახარია არა“, – განაცხადა ელისაშვილმა.

მან ასევე ისაუბრა „ვივამედში“ მისი გადაყვანის შესახებ და აღნიშნა, რომ პერსონალური მონაცემების დაცვის სამსახურმა კლინიკა „ვივამედი“ და ნინო ნადირაძე დამნაშავედ ცნო და სოციალური ქსელიდან რენტგენის ფოტოს აღება დაავალა.

„ვივამედს“ რაც შეეხება, დაკავების შემდეგ ნეკნი მქონდა მოტეხილი. დაკავებული დუშეთის იზოლატორიდან „ვივამედში“ მიმიყვანეს, გადამიღეს რენტგენი და არაფერი არ გჭირსო. თვენახევრის შემდეგ, მივედი ჰოსპიტალში და მითხრეს, რომ დაბეჟილობა კი არ მქონდა, არამედ ნეკნი მქონია მოტეხილი. „ვივამედმა“ ეს მონაცემი დამალაა და როდესაც ეს ხმამაღლა ვთქვი გამოხტა „ვივამედის“ ის უცნაური ქალი, დირექტორი და ჩემი რენტგენის ფოტო გამოაფრიალა, ჩემი პერსონალური ინფორმაცია, ამით კი მეორედ დაარღვია ჩემი უფლებები. შემდეგ მივმართე პერსონალური მონაცემების დაცვის სამსახურს და კლინიკა „ვივამედი“ და ნადირაძე დამნაშავედ ცნეს და თავისი სოციალური ქსელიდან ჩემი რენტგენის ფოტოს აღება დაავალეს“, – ალეკო ელისაშვილმა.

ცნობისთვის, ალეკო ელისაშვილს ბრალდება საქართველოს სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით (ადამიანის დევნა პოლიტიკურ მოღვაწეობასთან დაკავშირებით, ჩადენილი ძალადობით) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.

ის 4000-ლარიანი გირაოს სანაცვლოდაა გათავისუფლებული.

შემთხვევა 2 დეკემბერს მოხდა. პროკურატურის ინფორმაციით, ალეკო ელისაშვილმა თბილისში, კოსტავას ქუჩის მიმდებარე ტერიტორიაზე, აზერბაიჯანელთა ეროვნული კონგრესის თავმჯდომარეს და პარტია „ქართული ოცნება დემოკრატიული საქართველოს“ ერთ-ერთ დამფუძნებელს, ალი ბაბაევს პოლიტიკური ნიშნით სიტყვიერი და ფიზიკური შეურაცხყოფა მიაყენა.

GEC Consulting – მეწარმეების და მენეჯმენტ საკონსულტაციო სივრცე, რომელიც თიბისი ბიზნესის მხარდაჭერით განვითარდა

თანამედროვე ბიზნესგარემო მუდმივ ცვლილებებს განიცდის, რომელიც კომპანიებს უბიძგებს, მიიღონ სწრაფი და ეფექტიანი გადაწყვეტილებები. სწორედ ამ გამოწვევების საპასუხოდ დაარსდა 2010 წელს GEC Consulting — საერთაშორისო მენეჯმენტ- საკონსულტაციო სივრცე, რომელიც თანამშრომლობითი მიდგომით მხარს უჭერს პარტნიორების სტრატეგიული განვითარების დაგეგმვას, ბიზნესპროცესების სტანდარტიზაციასა და გაციფრულებას.

კომპანიები GEC Consulting-ს მაშინ აკითხავენ, როცა სწრაფი ზრდის მართვა სჭირდებათ, ეფექტიანობის გაზრდას ცდილობენ ან პროცესების სტრუქტურირებას და სტანდარტიზაციის შესაძლებლობებს ეძებენ, რათა კიდევ უფრო გააძლიერონ საკუთარი პოზიციები ბაზარზე.

წლების განმავლობაში, GEC Consulting-ს უკვე 200-მდე პროექტი აქვს განხორციელებილი, მათ შორისაა პარტნიორი ორგანიზაციების სტრატეგიის განვითარება, ბიზნესანალიტიკა და პროცესების ოპტიმიზაცია.

„ჩვენი პროექტები ყოველთვის პარტნიორი კომპანიის საჭიროებებზეა მორგებული. ინდივიდუალური და თანაშექმნითი (co-creation) მიდგომით, მენეჯმენტთან ერთად ვქმნით სტრატეგიებს, ვაანალიზებთ შესაძლებლობებს და ვგეგმავთ ნაბიჯებს პარტნიორი კომპანიის წინსვლისთვის“ — ამბობს გიორგი სიმონგულაშვილი, GEC Consulting-ის დამფუძნებელი.

საკუთარი საქმიანობის განვითარება და ინოვაციური მიდგომების დანერგვა GEC Consulting-ისთვის ისეთივე მნიშვნელოვანია, როგორც პარტნიორების მხარდაჭერა. კომპანიის წარმატების ერთ-ერთი გადამწყვეტი ფაქტორი სათანადო გარემოს შექმნა იყო, რომელიც ოფისის შეძენით განხორციელდა. ამ პროცესში მათ ფინანსური მხარდაჭერა თიბისიმ გაუწია.

GEC Consulting-ი და თიბისი ბიზნესს შორის თანამშრომლობა სხვადასხვა მიმართულებით გრძელდება. გიორგი სიმონგულაშვილი უკვე რამდენიმე წელია TBC Awards-ის ჟიურის წევრია, ასევე, ბიზნეს მოდელებისა და სტრატეგიების ქოუჩ-მენტორი. ეს ურთიერთობა ორივე მხარისთვის ღირებული აღმოჩნდა და როგორც გიორგი ამბობს,  სამომავლოდ კიდევ უფრო გაღრმავდება.

გუშინ პარლამენტის სასახლეს კვლავ გაუხსნეს ცეცხლი პიროტექნიკით – მოველი, საელაჩოების მხრიდან, შენობაზე თავდასხმის დაგმობას – შალვა პაპუაშვილი

გუშინ საქართველოს პარლამენტის სასახლეს კვლავ გაუხსნეს ცეცხლი პიროტექნიკით – მოველი, საელაჩოების მხრიდან, შენობაზე თავდასხმის დაგმობას, მით უმეტეს, რომ ეს თავდასხმა მათ მიერ დაფინანსებული „ენჯეოების“ ორგანიზებულ აქციაზე მოხდა, – წერს საქართველოს პარლამენტის თავმჯდომარე შალვა პაპუაშვილი.

როგორც ის აცხადებს, ენჯეო „ადამიანის უფლებათა სახლი“, პარლამენტთან ძალადობასა და პოლიციის დაუმორჩილებლობაში ჩართულ აქციების მონაწილეებს, დაკისრებული კანონიერი ჯარიმებისთვის თავის არიდებაში ეხმარება.

,,ორი დღის წინ, ჩეხეთის, გერმანიის, ნორვეგიის ელჩები და ბრიტანეთის და ჰოლანდიის საელჩოების წარმომადგენლები ესტუმრნენ და სოლიდარობა გამოუცხადეს ენჯეოთა გაერთიანებას „ადამიანის უფლებათა სახლს“, რომელიც, პროკურატურის გამოძიების თანახმად, ეხმარებოდა პარლამენტთან ძალადობაში ჩართულ აქციის მონაწილეებს, დაკისრებული კანონიერი ჯარიმებისთვის თავის არიდებაში, რაც, ამავე დროს, შემდგომი ძალადობისთვის კარტ-ბლანშის მიცემა და მისი წახალისებაა.

გუშინ საქართველოს პარლამენტის სასახლეს კვლავ გაუხსნეს ცეცხლი პიროტექნიკით.

მოველი, ამ საელჩოების მხრიდან, პარლამენტის შენობაზე თავდასხმის დაგმობას. მით უმეტეს, რომ ეს თავდასხმა მათ მიერ დაფინანსებული ენჯეოების ორგანიზებულ აქციაზე მოხდა“, – წერს პაპუაშვილი.

რუსეთმა ზაპოროჟიე ავიაბომბებით დაბომბა – დაიღუპა ერთი ქალი

რუსეთის შეიარაღებულმა ძალებმა გვიან ღამით უკრაინის ზაპოროჟიეს ოლქი ავიაბომბებით დაბომბა, რის შედეგადაც ერთი ქალი დაიღუპა. ინფორმაციას ზაპოროჟიეს საოლქო სამხედრო ადმინისტრაციის უფროსი, ივან ფიოდოროვი „ტელეგრამის“ საკუთარ არხზე ავრცელებს.

დაღუპულის ასაკი 66 წელს შეადგენდა. მაშველებმა მისი ცხედარი ნანგრევებიდან ამოიყვანეს. ფიოდოროვის ინფორმაციით, დაბომბვის შედეგად ხუთი ადამიანი დაშავდა. დაშავებულთა შორის ორი მამაკაცია, ხოლო სამი – ქალი. სამ ადამიანს სამედიცინო დახმარება გაუწიეს.

როგორც ზაპოროჟიეს საოლქო სამხედრო ადმინისტრაციის უფროსი აცხადებს, რუსების სამიზნეს წარმოადგენდა სამოქალაქო ინფრასტრუქტურა, კერძოდ, საცხოვრებელი სახლები და სოციალური სფერო.

როგორი ამინდია მოსალოდნელი დღეს საქართველოში

პირველ აპრილს, ქუთაისში დღისით +25 და ღამით 16 გრადუსია მოსალოდნელი, სინოპტიკოსები მზიან ამინდს ვარაუდობენ.

მზიან ამინდს ელოდებიან ოზურგეთშიც, დღისით +25 გრადუსი დაფიქსირდება, ღამით კი +16. ბათუმშიც მზიანი ამინდი იქნება, დღისით ჰაერი +25 გრადუსამდე გათბება, ხოლო ღამით +15გრადუსი დაფიქსირდება.

მზიანი ამინდია ფოთშიც. დღისით +27 გრადუსი დაფიქსირდება, ღამით კი +16 გრადუსია მოსალოდნელი. მზეა ზუგდიდშიც, დღისით ტემპერატურა +25, ღამით კი 14 გრადუსია ნავარაუდევი.

მზიანი დღეა სოხუმშიც. +24 გრადუსია მოსალოდნელი დღისით, ღამით 15 გრადუსი დაფიქსირდება.

მესტიაში მზიანია ამინდია, დღისით +15 გრადუსი იქნება, ღამით კი 2 გრადუსი დაფიქსირდება. ამბროლაურში ჰაერი +20 გრადუსამდე გათბება, ღამით კი 9 გრადუსი დაფიქსირდება.

მზიანი ამინდია ჭიათურაშიც, დღისით +23 გრადუსი, ღამით კი 12 გრადუსი დაფიქსირდება. ახალციხეში დღისით ჰაერი +21 გრადუსამდე გათბება, ღამით კი ტემპერატურა 7 გრადუსი იქნება.

მზიანი დღეა ბორჯომში, +21 იქნება დღისით, ღამით კი 8 გრადუსი დაფიქსირდება. მზიანი ამინდია მოსალოდნელი ბაკურიანშიც, დღისით +15 გრადუსია მოსალოდნელი, ღამით 2 გრადუსი დაფიქსირდება.

გორში დღისით +22 გრადუსი, ღამის განმავლობაში კი 8 გრადუსი დაფიქსირდება. მზიანი დღე იქნება ცხინვალშიც, ჰაერის ტემპერატურა 21 გრადუსი იქნება, ღამით კი 7 გრადუსი დაფიქსირდება.

გუდაურში დღის განმავლობაში +10 გრადუსი დაფიქსირდება, ღამით კი ჰაერის ტემპერატურა -1 გრადუსი იქნება. ომალოში მზიანი ამინდი იქნება, დღისით +15, ღამით კი 0 გრადუსი დაფიქსირდება.

ლაგოდეხშიც მზიანი ამინდია. ჰაერის ტემპერატურა დღის განმავლობაში +23 გრადუსი იქნება, ღამით კი +12 გრადუსი დაფიქსირდება. მზიანი დღე იქნება თელავშიც, +20 გრადუსი დაფიქსირდება, ღამით კი +10 გრადუსია ნავარაუდევი.

გურჯაანში მზეა. დღისით +21 გრადუსი, ღამით კი +11 გრადუსი დაფიქსირდება. სიღნაღში დღისით +24 გრადუსია მოსალოდნელი, ღამით +11 გრადუსი დაფიქსირდება.

რუსთავშიც მზიანი დღეა, დღისით +24 გრადუსია მოსალოდნელი, ღამით კი +11 გრადუსი დაფიქსირდება.
თბილისშიც მზიან ამინდის ვარაუდობენ. ჰაერის ტემპერატურა დღისით +24 გრადუსს მიაღწევს, ღამით კი +11 გრადუსი იქნება.

1...456...2,654Page 5 of 2,654
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი