ხომ გვიმტკიცებენ, 300 ათასი ხმა გაყალბდაო, 300 ხმის გაყალბების რაიმე ელემენტარული მტკიცებულება დადონ, მივიდნენ და უთხრან პროკურატურას, რატომ უმალავენ, – ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ ჟურნალისტებს განუცხადა.

მდინარაძის თქმით, ვინც ამტკიცებს, რომ არჩევნები გაყალბდა, პროკურატურას წარუდგინოს რაიმე მტკიცებულება.

„მოვისმინე პროკურატურის დღევანდელი ბრიფინგი. მეც ვუერთდები ბრალდების მხარეს, პროკურატურას, რომ ვინმეს თუკი რაიმე ერთი ფაქტი აქვს გაყალბებასთან დაკავშირებით, 300 ათასზე კი არ არის საუბარი, 300 ხმის გაყალბება როგორ მოხდა, მივიდნენ და უთხრან პროკურატურას, რატომ უმალავენ. 300 ათასი ხმა გაყალბდაო, ხომ გვიმტკიცებენ, 300 ათასის კი არა, 300 ხმის გაყალბების რაიმე ელემენტარული მტკიცებულება დადონ. ეს რატომ არის იცით მნიშვნელოვანი. ხალხი გამოდის და იძახის, რომ ვითხოვთ ახალ არჩევნებს. გავიგეთ, რომ თავისი აზრი აქვთ მათ და „ნაცმა“ დაარწმუნა ამაში, თუ სხვა გარემოებამ, რატომ ითხოვ ახალ არჩევნებს, 300 ხმის გაყალბების მტკიცებულება დადე და მერე მოითხოვე, კი ბატონო, მაგრამ ამას რომ ვერ აკეთებ, რას ითხოვ. თქვენც მოითხოვეთ სხვა რაღაც და არგუმენტების გარეშე რაღაცების მოთხოვნას ექნება საფუძველი და უნდა დააკმაყოფილოს რომელიმე ქვეყნის რომელიმე ხელისუფლებამ? 300 ხმის გაყალბების მტკიცებულება დაიდოს და მერე ვილაპარაკოთ ახალ არჩევნებზე“, – განაცხადა მამუკა მდინარაძემ.

ჟურნალისტის კითხვაზე, „რა მიზანი შეიძლება, იყოს მუდმივად ამაზე აპელირება, პარალელურად მაშინ, როცა არ თანამშრომლობენ“, რაზეც მდინარაძემ განაცხადა:

„სიყალბე და დავალებები გარედან. ვიღაც შეიძლება, გულწრფელია, ვიღაც დავალებით მოქმედებს. მაგალითად, მსახიობების ნაწილი აქტიურად ჩაერთო იმ კამპანიაში, რა მავნებლური კამპანიაც ახლა ქვეყანაში მიდის მათი მხრიდან. ამ ამ კამპანიის ლიდერები რომ ტრენინგდებოდნენ, დანარჩენმა მსახიობებმა ჰკითხონ, რატომ ხდება ისე, რომ თქვენ რაღაც ტრენინგებზე იყავით და ჩვენ არ ვიცით. ერთი წელი რაში გატრენინგებენ, კითხვა დაუსვან, ხომ შეიძლება. კონკრეტული ლიდერები ჰყავს მათი მხრიდან ამ ამბავს, რაში გატრენინგებდნენ და რატომ მალავდით ამ ამბავს, რატომ არავინ არავის ეკითხება. ჰკითხონ და ყველაფერი ნათელი გახდება“, – განაცხადა მამუკა მდინარაძემ.

საქართველოს გენერალურმა პროკურატურამ არჩევნების შესაძლო გაყალბების ფაქტთან დაკავშირებით მიმდინარე გამოძიების შუალედური შედეგების შესახებ ინფორმაცია გაავრცელა. პროკურატურის ინფორმაციით, მოწმეთა უმეტესობამ გამოძიებას ვერ მიაწოდა ვერანაირი მტკიცებულება, ცალკეულმა მოწმეებმა კი განაცხადეს, რომ არჩევნების გაყალბებაზე მათი განცხადებები ემსახურებოდა პრევენციულ ღონისძიებას.

კადრებში რაც ვნახე იყო ის, რომ ფიზიკური ძალადობა დიმიტრი სამხარაძეზე ბატონმა გიორგი გახარიამ დაიწყო და შემდეგ რეაგირებაც ბატონი დიმიტრისგან მოულოდნელი არ იყო, – ამის შესახებ ჟურნალისტებს “ქართული ოცნების” დეპუტატმა ლევან მაჭავარიანმა განუცხადა.

მაჭავარიანის შეფასებით, “კადრებში ყველაფერი ცალსახად ჩანს”.

“ნებისმიერი ასეთი ფაქტი ძალიან სამწუხაროა – ჩვენ ყოველთვის ვგმობთ ძალადობას. არა აქვს მნიშვნელობა რომელი მხრიდან მოხდება და საბოლოო ჯამში, ვინ იქნება ამით დაზარალებული.

ის ფსიქოლოგიური ძალადობა და ბულინგი, რაც პოლიტიკოსებზე მიმდინარეობს, ჩვენ ამასაც ძალადობაში ვთვლით. ძალიან სამწუხაროა, რომ ამას არც დიპლომატიური კორპუსი ეხმიანება და პირიქით, ახალისებენ. “ჩავუფურთხოთ საჭმელში”, მანამდე იყო “3 ტყვია კეფაში” და ა.შ ამაზე არავის რეაგირება არ აქვს. სწორედ ეს ყველაფერი იწვევს ამის ირიბად წახალისებას”, – განაცხადა მაჭავარიანმა.

შეერთებული შტატები გმობს პარტია „ქართული ოცნების” მიმდინარე ძალადობას საქართველოს მოქალაქეების წინააღმდეგ, მათ შორის, ოპოზიციის ლიდერების, ჟურნალისტების, სამოქალაქო საზოგადოების წევრებისა და აქციის მონაწილეების მიმართ , – ამის შესახებ საქართველოში აშშ-ის საელჩოს განცხადებაშია ნათქვამი.

საელჩოს განცხადების თანახმად, „მსგავსი ქმედებები, რომელიც ჩანს, ქართველების ძირითადი თავისუფლებების გამოყენების შეზღუდვას ისახავს მიზნად, არაფერს აკეთებს საქართველოს ევროატლანტიკურ გზაზე დასაბრუნებლად – რაც ქართველების უმრავლესობის ნებაა“.

„საქართველო უკეთესს იმსახურებს”, – წერია განცხადებში, რომელსაც საეჩლჩო „ფეისბუქზე“ ავრცელებს.

დიდი ბრიტანეთის ელჩი გარეტ უორდი საქართველოში ბოლო დროინდელ მოვლენებთან დაკავშირებით განცხადებას ავრცელებს.

როგორც განცხადებაშია ნათქვამი, ძალადობის განახლება ოპოზიციონერი პოლიტიკოსების მიმართ და ჟურნალისტებისა და მომიტინგეების თვითნებური დაკავება მიუღებელია. ბრიტანეთის ელჩი მოუწოდებს „ქართული ოცნების“ ხელისუფლებას უზრუნველყოს ძალადობაზე პასუხისმგებელი პირების პასუხისგებაში მიცემა.

“საქართველოში მიმდინარე პოლიტიკური კრიზისის ფონზე უკანასკნელ დღებში, უფრო მეტი ღრმად შემაშფოთებელი ფაქტების მომსწრენი გავხდით.

ძალადობის განახლება ოპოზიციონერი პოლიტიკოსების მიმართ და ჟურნალისტებისა და მომიტინგეების თვითნებური დაკავება მიუღებელია.

მოვუწოდებთ „ქართული ოცნების“ ხელისუფლებას უზრუნველყოს ძალადობაზე პასუხისმგებელი პირების პასუხისგებაში მიცემა.

საქართველომ, როგორც ევროპის საბჭოს წევრმა, უნდა დაიცვას საკუთარი მოსახლეობის ფუნდამენტური უფლებები და თავისუფლებები.

სწორედ ამიტომ, დღეს, ევროპის საბჭოში, დიდი ბრიტანეთი შეუერთდა ევროპელ პარტნიორებს და მკაცრად დაგმეს ძალადობა მშვიდობიანი მომიტინგეების, მედიის წარმომადგენლებისა და პოლიტიკოსების მიმართ“,- აღნიშნულია განცხადებაში.

საქართველოს მოქალაქეებს კვლავ ემუქრება დაკავება ფუნდამენტური უფლებებით სარგებლობის გამო, – ამის შესახებ საქართველოში ევროკავშირის წარმომადგენლობის განცხადებაშია ნათქვამი.

განცხადების თანახმად, მზია ამაღლობელისა და გურამ მურვანიძის „დაპატიმრება გამოხატვის თავისუფლებას უფრო მეტად აკნინებს“.

„ყველა უსამართლოდ დაკავებული უნდა გათავისუფლდეს. ევროკავშირი სამართლიანი სასამართლოს უფლების დაცვისკენ მოუწოდებს. დაუსჯელობა ვერ გაიმარჯვებს”, – წერია განცხადებაში.

პარლამენტის თავმჯდომარე შალვა პაპუაშვილი ევროპის საბჭოს საპარლამენტო ასამბლეის მონიტორინგის კომიტეტის წევრებს, თანამომხსენებლებს საქართველოს საკითხებში, ედიტ ესტრელასა და კლოდ კერნს შეხვდა.

როგორც შალვა პაპუაშვილი სოციალურ ქსელში წერს, შეხვედრისას საქართველოში მიმდინარე პოლიტიკური და სოციალური პროცესები განვიხილეს.

„საუბარი შეეხო პარლამენტის საქმიანობას, ადამიანის უფლებების დაცვასა და საქართველოს ევროკავშირში გაწევრიანების ძალისხმევას.

მიმოვიხილე ოქტომბრის საპარლამენტო არჩევნების შედეგები და ეუთო/ოდირის რეკომენდაციები.

ევროპის საბჭოს დელეგაციის წევრებს ოპოზიციის ტაქტიკა გავაცანი, რომელიც პარლამენტის ბოიკოტს ითვალისწინებს და ყოველი არჩევნების შემდეგ ოპოზიციისათვის პოლიტიკური ბრძოლის იარაღს წარმოადგენს.

საუბარი, ასევე, შეეხო ბოლო რამდენიმე კვირის განმავლობაში მიმდინარე პროტესტს.

ევროპის საბჭოს მონიტორინგის მისიის დაინტერესების საფუძველზე, აღვნიშნე, რომ საქართველოს ხელისუფლება დიდ სამუშაოს ატარებს, რათა ევროკავშირში ინტეგრაციის რეალური, არსებითი ნაბიჯები დროულად იქნეს გადადგმული და საქართველომ უახლოეს წლებში შეძლოს ევროკავშირში გაწევრიანების პროცესის წარმატებით დასრულება“, – წერს შალვა პაპუაშვილი.

საქართველოს პარლამენტის ცნობით, შეხვედრაში საქართველოს პარლამენტის ევროპის საბჭოში მუდმივმოქმედი დელეგაციის ხელმძღვანელი, ვიცე-სპიკერი თეა წულუკიანი და დელეგაციის წევრი, პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძეც მონაწილეობდნენ.

სიტყვებიც კი არ მყოფნის, გიორგი გახარიაზე რომ ვისაუბრო, არც ღირს, რომ სიტყვები დახარჯო, – ამის შესახებ პარტია „ხალის ძალის“ აღმასრულებელმა მდივანმა, გურამ მაჭარაშვილმა განაცხადა.

მისი თქმით, გიორგი გახარია პოლიტიკურად „ქართულ ოცნებაში“ დაიბადა, „ქართულმა ოცნებამ“ ფრთები შეასხა, მოუტრიალდა და უღალატა, არა მხოლოდ ხელისუფლებას, არამედ ქვეყანას და სახელმწიფოს.

„მას შემდეგ, რაც გუშინ ვიხილეთ გიორგი გახარიას პასუხი ჟურნალისტის კითხვაზე, რომ თურმე პოლიციელს, რომ დაარტყა ხელი – ეს არაფერია, გამოხატვის თავისუფლებაა და მანამდეც რაღაცები იყო, ამის შემდეგ კომენტარიც კი ზედმეტია თუ ვისთან გვაქვს საქმე. ეს ადამიანი, რომელიც იყო აბსოლუტური არარაობა დაახლოებით, 6-7 წლის წინ და პოლიტიკურად „ქართულ ოცნებაში“ დაიბადა. „ქართულმა ოცნებამ“ ფრთები შეასხა და მერე მოუტრიალდა და უღალატა, არა მხოლოდ ხელისუფლებას, არამედ ქვეყანას და სახელმწიფოს. რაც ყველაზე მთავარია ამას აგრძელებს. კოლექტიურ „ნაცმოძრაობაზე“ უარესია. კოლექტიური „ნაცნმოძრაობა“ თავიდანვე იყო ქვეყნის მოღალატე, ზნე არ შეუცვლია და დღესაც კოლექტიური „ნაცმოძრაიბაა“. ეს ადამიანი, რომ გადავიდა აგენტურაში და აბსოლუტურად ამაზრზენად საუბრობს. ადამიანი თავად იყო შინაგან საქმეთა მინისტრი და იმას ამბობს, რომ თურმე აქციის მონაწილემ სილა რომ გაარტყას პოლიციის უფროსს, ეს ჩვეულებრივი მოვლენა ყოფილა. ნაწილობრივ აღიარებს, თითქოს ეს დანაშაულია, კეკლუცობს და ა.შ. ეს მიუღებელია“, – განაცხადა გურამ მაჭარაშვილმა.

მისი თქმით, საზოგადოებამ კიდევ ერთხელ დაინახა, რომ გიორგი გახარია უფრო მეტად მოღალატეა, ვიდრე კოლექტიური „ნაცმოძრაობა“.

„სიტყვებიც კი არ მყოფნის, რომ გიორგი გახარიაზე ვისაუბრო. არც ღირს, რომ სიტყვები დახარჯო. აუცილებლად აგებს პასუხს თავის საქციელზე. ეს ფაქტი რაც მოხდა, აჩვენებს მის ზნეობას, თუ გააჩნია საერთოდ, რა თქმა უნდა, არ გააჩნია. საზოგადოებამ კიდევ ერთხელ დაინახა, რომ გახარია უფრო მეტად მოღალატეა, ვიდრე კოლექტიური „ნაცმოძრაობა“, – განაცხადა გურამ მაჭარაშვილმა.

მინდა, ვუთხრა ბატონ ივანიშვილს, რომ კიდევ უფრო მძაფრი დაპირისპირების პროვოცირების მცდელობა, ან დაშინების მცდელობა, რომ ეს გადაიზრდება სამოქალაქო დაპირისპირებაში, არის წარმოუდგენელი, – ამის შესახებ საქართველოს ყოფილმა პრეზიდენტმა, სალომე ზურაბიშვილმა განაცხადა.

მისი თქმით, ერთ მხარეს არის რეჟიმი და მეორე მხარეს საზოგადოება, ამ შემთხვევაში კი საზოგადოება ყოველთვის იმარჯვებს.

„მივმართავ, პირველ რიგში, ჩვენს საზოგადოებას, რომელიც დღეს ალბათ, არის ძალიან აღელვებული იმის გამო, თუ რა ხდება ქვეყანაში. ფაქტია, ახალი წლების მერე დაწყებულია რეპრესიების, დაჭერების, დაშინების ახალი ტალღა, რომელსაც აქვს ერთადერთი მიზანი, რომ გააჩეროს ის პროტესტი, რომელიც არ გაჩერდება. რუსული რეჟიმის ახალ ეტაპზე გადავედით, რომელიც აშკარად იყენებს ყველა იმ საშუალებებს, რაც ახასიათებდა თავის დროზე და ახასიათებს დღესაც პუტინის რუსულ რეჟიმს. ამის ერთ-ერთი მაგალითია, რაც მოხდა აბუ-დაბიში, დეპუტატების მიერ ჩვეულებრივი მოქალაქის მიმართ, რომლებსაც სხვა თუ არაფერი, უნდა გააჩნდეთ მოთმინების ვალდებულება, მაგრამ არსად ჩანს ეს ვალდებულება. პირიქით, როგორც ჩანს, დეპუტატები პირდაპირ არიან, არ ვიცი ინსტრუქცია აქვთ მიღებული, თუ მათი ნებით ხდება, მაგრამ ამ ძალადობაში არიან პირდაპირ გამოყენებული, რაც ჩვეულებრივი ქვეყნისთვის, სახელმწიფოსთვის არის გაუგებარი, მხოლოდ და მხოლოდ ავტორიტარულ, ტოტალიტარულ, დიქტატორულ რეჟიმებს ახასიათებს.

ასევე, ის რაც ამ ღამით ერთ-ერთი პოლიტიკოსის, გიორგი გახარიას მიმართ მოხდა, არის ასევე სრულიად წარმოუდგენელი. არ მინდა გამოვარჩიო პოლიტიკოსები და სხვები, ეს ყველა მოქალაქეს ეხება. ძალადობა არავის მიმართ არ შეიძლება, არავის მიმართ იმის მცდელობა, რომ საზოგადოება დააშინო, კერძო მოქალაქეები დააშინო – ეს არის მიუღებელი. ამის შესახებ ჩვენი პარტნიორების და საერთაშორისო თანადგომა იქნება შეტყობინებული, იმიტომ რომ არ შეიძლება ეს დავუშვათ.

ისე დაემთხვა, რომ დღეს არის საზოგადოების დიდი ნაწილის გაფიცვა. სწორედ ეს გაფიცვა უნდა იყოს იმის მანიშნებელი, რომ საზოგადოება არ დაშინდება, არის შემართებული და იცის რა უნდა, და იცის, რა არ უნდა, რომ არ დათანხმდება საქართველო იმაზე, რომ გადაიქცეს რუსულ რეჟიმად ბოლომდე. ამისთვის საქართველო იბრძვის, იბრძვის მშვიდობიანად.

მინდა, ვუთხრა ბატონ ივანიშვილს, რომ ის მცდელობა, რომელიც აშკარად არის, პროვოცირება რაღაც კიდევ უფრო მძაფრი დაპირისპირების, რომ ეს გადაიზარდოს, ან ყოველ შემთხვევაში ამით დაგვაშინოს, რომ ეს გადაიზრდება სამოქალაქო დაპირისპირებაში, არის წარმოუდგენელი. იმიტომ, რომ კიდევ ერთხელ, არ არსებობს ორი მხარე საქართველოში. არსებობს საზოგადოება და არსებობს ისინი, ვინც არიან ძალადობის მატარებლები, იქნებიან ესენი დეპუტატები თუ ის კერძო ადამიანები, რომლებიც თავის თავს ნებას აძლევენ, სოციალურ ქსელში გააჟღერონ ძალადობის გზავნილები. ესენიც არიან მონაწილე იმ ძალადობრივი რეჟიმის. ასე რომ, ერთ მხარეს არის რეჟიმი, მეორე მხარეს – საზოგადოება. ამ შემთხვევაში ბატონო ივანიშვილო, საზოგადოება ყოველთვის იმარჯვებს,“ – განაცხადა სალომე ზურაბიშვილმა.

„საერთაშორისო გამჭვირვალობა – საქართველოს” განცხადებით, რეგიონული ოფისების ხელმძღვანელზე, ზვიად ქორიძეზე ბათუმში განხორციელებული თავდასხმა არის მათ ორგანიზაციაზე ივანიშვილის რეჟიმის მიზანმიმართული თავდასხმა.

მათი განცხადებით, ეს ძალადობრივი შემთხვევა მათი ორგანიზაციის წინააღმდეგ წლების მანძილზე მიმდინარე სახელისუფლებო კამპანიის გაგრძელებაა.

„საერთაშორისო გამჭვირვალობა – საქართველო” შინაგან საქმეთა სამინისტროსა და პროკურატურისგან მოითხოვს, დაუყოვნებლივ მიიღონ ზომები თავდამსხმელების წინააღმდეგ და უმოკლეს ვადებში დააკავონ დიმიტრი სამხარაძე, გიორგი მანველიძე და თავდასხმაში მონაწილე სხვა პირები.

„ვეხმიანებით „საერთაშორისო გამჭვირვალობა – საქართველოს” რეგიონული ოფისების ხელმძღვანელზე, ზვიად ქორიძეზე ბათუმში განხორციელებულ თავდასხმას და ვაფასებთ მას, როგორც ივანიშვილის პარტიის მიზანმიმართულ ძალადობას და ანგარიშსწორებას ქართული სამოქალაქო სექტორისა და „საერთაშორისო გამჭვირვალობა – საქართველოს” წარმომადგენლის წინააღმდეგ. ეს ძალადობრივი შემთხვევა ჩვენი ორგანიზაციის წინააღმდეგ წლების მანძილზე მიმდინარე სახელისუფლებო კამპანიის გაგრძელებაა.

როგორც საზოგადოებისთვის ცნობილია, 2024 წლის 14-15 იანვარს ღამით ბათუმში, სასტუმრო „შერატონის“ ლობიში თავს დაესხნენ „საერთაშორისო გამჭვირვალობა – საქართველოს“ რეგიონული ოფისების მენეჯერს, ცნობილ ჟურნალისტსა და სამოქალაქო აქტივისტს, ზვიად ქორიძეს. ის ბათუმში სამსახურებრივი მივლინების ფარგლებში იმყოფებოდა და პოლიტიკური პატიმრის, „ბათუმელების” და „ნეტგაზეთის” დამფუძნებლის, მზია ამაღლობელის სასამართლო პროცესს ადევნებდა თვალს, ამასთანავე აპროტესტებდა მის უკანონო პატიმრობას.

ჯგუფურ თავდასხმაში მონაწილეობდნენ პარტია „ქართული ოცნების“ რეგიონული მდივანი დიმიტრი სამხარაძე და აჭარის ავტონომიური რესპუბლიკის უმაღლესი საბჭოს ფრაქცია „ქართული ოცნება – დემოკრატიული საქართველოს“ ყოფილი თავმჯდომარე და ამჟამად აჭარის ფინანსთა და ეკონომიკის მინისტრის მოადგილე გიორგი მანველიძე. არსებობს ვარაუდი, რომ თავდასხმაში ასევე მონაწილეობდა ძიუდოისტი და არალეგიტიმური პარლამენტის წევრი ვარლამ ლიპარტელიანი. თავდასხმაში მონაწილე პირების ვინაობა კიდევ ერთხელ მიუთითებს იმაზე, რომ „ქართული ოცნების” მხრიდან სამოქალაქო საზოგადოებაზე და კრიტიკული აზრის მქონე პირებზე თავდასხმაში პარტიის ლიდერები არიან ჩართულები, რომლებიც პირადად მონაწილეობენ ადამიანების მიმართ ფიზიკურ ანგარიშსწორებაში. მოგვიანებით, იგივე პირები თავს დაესხნენ ასევე ყოფილ პრემიერ-მინისტრს და ამჟამად პოლიტიკური პარტიის „საქართველოსთვის“ ლიდერს, გიორგი გახარიას.

ეს ძალადობრივი ფაქტები მიუთითებს იმაზე, რომ კრიტიკული მოსაზრების მქონე პირებისა და ჩვენი ორგანიზაციის წარმომადგენლების წინააღმდეგ ანგარიშსწორება „ქართული ოცნების“ პოლიტიკური გადაწყვეტილებაა და მის განხორციელებაში ჩართულნი არიან არა ფარულად ორგანიზებული ჯგუფები, არამედ უშუალოდ ივანიშვილის პარტიის ზონდერებად ღიად მოქმედი ლიდერები. მათ ევალებათ აქტივისტებისა და სამოქალაქო საზოგადოების ორგანიზაციების დევნა და მათზე თავდასხმა.

მოვითხოვთ „ქართული ოცნების“ შინაგან საქმეთა სამინისტროსა და პროკურატურისგან, დაუყოვნებლივ მიიღონ ზომები თავდამსხმელების წინააღმდეგ და უმოკლეს ვადებში დააკავონ დიმიტრი სამხარაძე, გიორგი მანველიძე და თავდასხმაში მონაწილე სხვა პირები. მათ ქმედებაში იკვეთება სისხლის სამართლის კოდექსის 156-ე (დევნა სიტყვის, აზრის ან პროფესიულ მოღვაწეობასთან დაკავშირებით ჩადენილი ძალადობით ან ძალადობის მუქარით), და 225-ე მუხლით (ჯგუფური ძალადობის ორგანიზება, ხელმძღვანელობა ან მასში მონაწილეობა) გათვალისწინებული დანაშაულის ნიშნები.

„საერთაშორისო გამჭვირვალობა – საქართველო” მიმართავს სასტუმრო შერატონის ხელმძღვანელობას საქმის მაღალი საჯარო ინტერესიდან გამომდინარე გაასაჯაროონ ვიდეო ჩანაწერები.

ჩვენ დაუყოვნებლივ მივაწვდით ინფორმაციას საერთაშორისო პარტნიორებს, რათა ადეკვატური პასუხი გაეცეს როგორც უშუალოდ ივანიშვილს, ასევე მისი ზონდერ ჯგუფების ამ ქმედებას,“ – აღნიშნულია განცხადებაში.