რეალურად, მე ვფიქრობ, რომ საბოლოო ჯამში, მხოლოდ ერთი ოპოზიციური ძალა გადალახავს ბარიერს, სამწუხაროდ, ეს არის ისევ და ისევ “ნაცმოძრაობის” ბრენდის ქვეშ წარმოდგენილი 5 ნომერი, – ამის შესახებ საქართველოს პრემიერ-მინისტრმა ირაკლი კობახიძემ გადაცემა “იმედი LIVE”-ში განაცხადა.

პრემიერის თქმით, რაც შეეხება სხვა პარტიებს, 2 პოლიტიკური სუბიექტია დღეს ახლოს ბარიერთან, ეს არის გვარამიას და ხაზარაძის პარტია, თუმცა საბოლოო ჯამში, ეს ორი პარტიაც ვერ გადალახავს ბარიერს.

“დღეს ახლოს არიან, მაგრამ ვფიქრობ, მათაც გაუჭირდებათ ბარიერის გადალახვა. რა თქმა უნდა, ჩვენ უნდა დავეხმაროთ შესაბამისი გადაწყვეტილების მიღებაში საზოგადოებას, უნდა გავახსენოთ ის განცხადებები და ქცევები, რაც გამოარჩევდა ამ ადამიანებს. შეგვიძლია მარტივად ამოვიღოთ, 4 ლიდერია გვარამიას პარტიაში – გვარამია, მელია, ჯაფარიძე და ხოშტარია, უბრალოდ შეიძლება 2-2 განცხადება ამოვიღოთ ამ ადამიანების და კითხვა უნდა დაისვას, როგორ შეიძლება ამ ადამიანებს 1 ადამიანი მაინც უჭერდეს მხარს. ასეთი განცხადებები აქვთ ნაკეთები, ქმედებებს რომ თავი დავანებოთ. 2-2 განცხადებას ამოვიღებ გვარამიას, ჯაფარიძის, მელიას და ხოშტარიასი და უბრალოდ, კითხვა უნდა დაისვას, რომ როგორ შეიძლება ამ პოლიტიკურ სუბიექტს 1 ხმა მაინც ჰქონდეს არჩევნებზე. რა თქმა უნდა, ეს არის პრობლემა, რომ რაღაც ხმებს იღებენ, მაგრამ ვფიქრობ, რომ ბარიერის გადალახვა არის აბსოლუტურად წარმოუდგენელი. რაც შეეხება ხაზარაძეს, რომელიც იცით, რა საქმეებში იყო გახვეული “ნაცმოძრაობის” ხელისუფლებაში ყოფნის დროს. შეგახსენებთ, რა პრეტენზიები არსებობდა, რბილად რომ ვთქვათ, მაგნატის საქმე, „ელიტ ელექტრონიქსის” საქმეზე, „კონსტანტას” საქმეზე და ა.შ. ყველას გვახსოვს, შუაღამისას რა ხდებოდა უშიშროების შენობაში, როგორ ხდებოდა გრეიდების გაფორმება, თანხის წართმევა ბიზნესმენებისთვის და ა.შ. პარტიაში ჰყავთ ადამიანი, რომელიც საქართველოს უჩიოდა ცხინვალის დაბომბვასთან დაკავშირებით, ანა ნაცვლიშვილიც და ანა დოლიძეც, ორი ადამიანი, რომელიც საქართველოს უჩიოდა, ანუ მხარს უჭერდა რუსეთის, რეალურად, სარჩელს საქართველოს წინააღმდეგ. ასეთი ადამიანები ჰყავთ და აქვთ რაღაც პრეტენზია, რომ ბარიერი უნდა გადალახონ. ელისაშვილი ჰყავს საკუთარ პარტიაში ხაზარაძეს, რომელსაც კაცობის ნატამალი არ აქვს, თქვენ იცით მისი ქმედებები და ა.შ. დანარჩენი კომიკური სახეები, აღარ მინდა გვარების ჩამოთვლა, როგორ შეიძლება, აქაც იგივე კითხვა უნდა დაისვას, როგორ შეიძლება ასეთმა ადამიანებმა თუნდაც ერთი ხმა მიიღონ. რა თქმა უნდა, ყველა საზოგადოებაში, ასე არის, როგორც არის, მაგრამ ყოველ შემთხვევაში, მე არ მგონია, რომ ქართულ საზოგადოებაში ასეთმა პოლიტიკურმა ძალამ შეძლოს ბარიერის გადალახვა. “ნაცმოძრაობა” რომ ლახავს ბარიერს, ეს ცალკე უბედურებაა, მაგრამ ერთი რამეც შეიძლება ითქვას, იგივე გერმანია, იცით, რამხელა კულტურის ქვეყანაა, გერმანიაში რომ დარჩენილიყო პოლიტიკაში ჰიტლერის პარტია 1945 წლის შემდეგ, ისინიც აიღებდნენ დაახლოებით 15-20%-ს. ეს ყველა საზოგადოებაში ხდება და არ არის ქართული საზოგადოების განსაკუთრებული პრობლემა, მაგრამ ეს უბედურება საბოლოოდ უნდა მოვაშოროთ ჩვენ, როგორც გერმანელებმა მოაშორეს თავის დროზე უბედურება, ძალიან მარტივად და მკაცრად, საკუთარ ქვეყანას, ასევე უნდა მოვაშოროთ ჩვენ ეს უბედურება, “კოლექტიური ნაცმოძრაობა” ჩვენს ქვეყანას. თქვენ წარმოიდგინეთ, გერმანელებს რომ დაეტოვებინათ და არ აეკრძალათ „ნაციონალ-სოციალისტები” 40-იანი წლების შემდეგ, მუდმივ უბედურებაში იქნებოდა ეს ქვეყანა. ამაზე ვსაუბრობთ ზუსტად ჩვენ, არ შეიძლება ქვეყანა დავტოვოთ მუდმივ უბედურებაში. არ შეიძლება ასეთი ოდიოზური ადამიანები, რომლებიც ასეთი განცხადებებით გამოდიან, საკუთარ ქვეყანას უჩივიან და ა.შ. იყვნენ პოლიტიკური სისტემის ნაწილი. უბრალოდ არ შეიძლება”,- განაცხადა ირაკლი კობახიძემ.

სასტუმრო Rooms-ში შედგა, Second hand რევოლუციონერთა, ყოველწლიური, ტრადიციული „სხადნიაკი”, – წერს კინორეჟისორი გოგა ხაინდრავა სოციალურ ქსელში, რითაც მაკკეინის ორდღიან კონფერენციას ეხმაურება.

კინორეჟისორი აღნიშნავს, რომ „თუ ვინმე ქართლის დედამ დაწყევლა, გინდა შინ და გინდა გარეთ, ყველა იქ იყო თავ მოყრილი, ფერფლით!“

„სასტუმრო Rooms-ში შედგა, Second hand რევოლუციონერთა, ყოველწლიური, ტრადიციული „სხადნიაკი”. თუ ვინმე ქართლის დედამ დაწყევლა, გინდა შინ და გინდა გარეთ, ყველა იქ იყო თავ მოყრილი, ფერფლით! შეშფოთება, წუხილი და განცდა, არც ერთს არ ასცდა! ბო მონდის სასახლეში ესტუმრნენ ქართულ კოშმარს!“, – წერს გოგა ხაინდრავა.

https://x.com/KhaindravaGoga/status/1831298023206408361

სალომე ზურაბიშვილი არის კოლექტიური „ნაცმოძრაობის“ და მათი პატრონების ერთი პატარა ჭანჭიკი, მარიონეტი, მეტი ფუნქცია და დატვირთვა ამ ადამიანს არ აქვს, – ამის შესახებ საქართველოს პრემიერ-მინისტრმა, ირაკლი კობახიძემ გადაცემაში „იმედი LIVE“ განაცხადა.

კობახიძის თქმით, მას შემდეგ, რაც სალომე ზურაბიშვილი პრეზიდენტის თანამდებობაზე დარჩა „ნაცმოძრაობის“ ხმების წყალობით, მისი ლეგიტიმაცია ნულოვანია.

სავარაუდო სცენარის შესახებ კითხვაზე, რომლის თანახმად, სალომე ზურაბიშვილმა შესაძლოა, არჩევნები არალეგიტიმურად ცნოს, პრემიერ-მინისტრმა აღნიშნა, რომ ეს გარანტირებული სცენარია.

„სალომე ზურაბიშვილს დიდი ვადა აღარ აქვს დარჩენილი პრეზიდენტის თანამდებობაზე. ერთი თვე რჩება არჩევნებიდან და ეს იქნება მისი ბოლო დავალება, რომელსაც რეალურად წარმატებით ვერ შეასრულებს, რადგან არავითარი ფასი არ აქვს მის არცერთ სიტყვას. მას შემდეგ, რაც ის თანამდებობაზე დარჩა „ნაცმოძრაობის“ ხმების წყალობით, მისი ლეგიტიმაცია უკვე არის ნულოვანი. თქვენ იცით, 2018 წელს როგორ იქნა არჩეული სალომე ზურაბიშვილი პრეზიდენტის თანამდებობაზე – პირველ ტურში ხმების 40 პროცენტიც ვერ აიღო, იმდენად მიუღებელი იყო მისი პერსონა საზოგადოებისთვის და მეორე ტურში ის არჩეული იქნა სწორედ „ნაცების“ არდაბრუნების ლოზუნგით. ასეთ დროს, როცა შენი ერთადერთი ლეგიტიმაციის წყარო ხდება „ნაცები“, აქედან ჩანს, რომ ლეგიტიმაცია არის ნულოვანი, ანუ როცა სრულიად სხვა ლოზუნგით მოხვედი პრეზიდენტის თანამდებობაზე და ლეგიტიმაციის ერთადერთ წყაროს ეძებ სწორედ შესაბამის ძალაში, აქედან ჩანს, რომ მას აქვს ნულოვანი ლეგიტიმაცია. არც პიროვნული ავტორიტეტი, არც პოლიტიკური, არც საარჩევნო ლეგიტიმაცია აღარ დარჩა, არაფერი აღარ დარჩა, მეექვსე წელი იწურება, აქედან გამომდინარე, მის არცერთ ნაბიჯს ფასი აღარ ექნება“, – განაცხადა ირაკლი კობახიძემ.

„ნაციონალური მოძრაობის” თეორიული დაბრუნება ნიშნავს ქვეყნის ევროპული პერსპექტივის დასრულებას, ეს არის ყველაზე ანტიევროპული პოლიტიკური ძალა, – ამის შესახებ საქართველოს პრემიერ-მინისტრმა ირაკლი კობახიძემ გადაცემა “იმედი LIVE”-ში განაცხადა.

მთავრობის მეთაურის თქმით,  სწორედ იქ დამთავრდება ევროპული პერსპექტივა, სადაც დაბრუნდება „ნაციონალური მოძრაობა” და ამას ქართული საზოგადოება არ დაუშვებს.

„ისინი ამბობენ, რომ არსებობს „ნაციონალური მოძრაობის” ოთხი განშტოება, სულ ერთია, რომელს მისცემთ ხმას, მაგრამ ამ „ნცმოძრაობის” ოთხი განშტოებიდან ერთ-ერთს უნდა მისცეთ ხმა. ეს მესიჯი რომ გავაგრძელოთ, „ნაცმოძრაობა” თუ არ დაბრუნდება ხელისუფლებაში, ისე ქვეყანას ევროპული პერსპექტივა არ აქვს. საბოლოოდ, ამ მესიჯამდე მიდიან. ანუ, უნდა დაბრუნდეს „ნაციონალური მოძრაობა”, რომ ქვეყანას ჰქონდეს ევროპული პერსპექტივა. ამით როგორ შეიძლება საზოგადოება მოატყუო? საზოგადოებამ ხომ იცის, რომ სწორედ „ნაციონალური მოძრაობის” თეორიული დაბრუნება ნიშნავს ქვეყნის ევროპული პერსპექტივის დასრულებას. ეს არის ყველაზე ანტიევროპული პოლიტიკური ძალა. როცა ცდილობენ, ასეთი სიცრუე მიჰყიდონ ქართულ საზოგადოებას, რომელიც ძალიან გამოცდილია ამ 35 წლის განმავლობაში, რომელმაც ძალიან დიდი გამოცდილება დააგროვა, ახლა სურთ, ასეთი სიცრუე მიჰყიდონ, რომ თუ არ დაბრუნდება „ნაციონალური მოძრაობა” ქვეყანას არ ექნება ევროპული პერსპექტივა. სწორედ იქ დამთავრდება ევროპული პერსპექტივა, სადაც დაბრუნდება „ნაციონალური მოძრაობა” და ამას ქართული საზოგადოება არ დაუშვებს და ჩვენ დავეხმარებით ქართულ საზოგადოებას სწორი არჩევანის გაკეთებაში”, – განაცხადა პრემიერმა.

დღეს ჩვენი რეიტინგი არის, დაახლოებით, 60%-ი, რაც ყველამ ძალიან კარგად იცის; ეს რეალურად არის ბოლო გაბრძოლება და ყველაფერს გააკეთებენ, რათა რაღაცნაირად ხალხის ნების წინააღმდეგ სცადონ ხელისუფლების შეცვლა, მაგრამ ამის არავითარი რესურსი არ აქვთ, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

კითხვაზე, რომელიც დასავლეთის ყოფილი მაღალჩინოსნებისა, თუ მოქმედი თანამდებობის პირების მხრიდან, არჩევნების ლეგიტიმაციის საკითხთან დაკავშირებით სცენარს შეეხებოდა, ირაკლი კობახიძემ აღნიშნა, რომ წინასწარ არის დაწერილი ზუსტად იგივე სცენარი, რაც ქვეყანამ 2020 წელს გაიარა და ეს სცენარიც ჩავარდნისთვის არის განწირული.

„ისინი საუბრობენ არა იმაზე, რომ „ოცნება“ თუ გაიმარჯვებს არჩევნებში, არამედ იმაზე, რომ „ოცნება“ როცა გააყალბებს არჩევნებს, ეს არის მათი მესიჯი. რეალურად აქედან ჩანს, რომ წინასწარ არის დაწერილი ზუსტად იგივე სცენარი, რაც გამოვიარეთ 2020 წელს. გახსოვთ, მაშინ რა ხდებოდა, ISFED-მა როგორ გააყალბა „პივიტი“, როგორ გააყალბეს „ენჯეოებმა“ ერთად სხვა მონაცემები, მაგრამ ჩაუვარდათ ეს სცენარი და ის, რაც ჩაგივარდა ოთხი წლით ადრე, ბუნებრივია, ასევე ჩავარდნისთვის არის განწირული ოთხი წლის შემდეგ. ეს სცენარი შეიძლება არსებობდეს. ეს რეალურად არის ბოლო გაბრძოლება და ყველაფერს ჩადებენ, რათა რაღაცნაირად ხალხის ნების წინააღმდეგ სცადონ ხელისუფლების შეცვლა, მაგრამ ამის არავითარი რესურსი არ აქვთ, ვინაიდან ხალხი არის „ქართული ოცნების“ მხარეს. ხელისუფლება, სამართალდამცავი სტრუქტურები არის ძლიერი და მყარი, როგორც არასდროს. არც ხალხი გიჭერს მხარს, სახელმწიფო ძლიერია, სამართალდამცავი ორგანოები ძლიერია, ცხადია, რომ ასეთ პირობებში ვერც ხალხის მხარდაჭერა გექნება და ვერც ხალხის მხარდაჭერის გარეშე მოახდენ რევოლუციას. საბოლოო ჯამში, არჩევნების მოგებასაც და რევოლუციის მოწყობასაც სჭირდება ერთი და იგივე რამ – ეს არის ხალხის თანადგომა. როცა ხალხის თანადგომა არ გაქვს და როგორ შეიძლება, ხალხის თანადგომა ჰქონდეთ ამ პოლიტიკურ ძალებს. „ნაცმოძრაობა“, მისი განშტოებები – გვარამიას პარტია, ხაზარაძის პარტია, გახარიას პარტია, როგორ შეიძლება ამ ადამიანებს, აღარ მინდა გავყვე, მათ წარსულს, მათ განცხადებებს, მათ დამოკიდებულებას ხალხის მიმართ, როგორ შეიძლება მათ ჰქონდეთ ხალხის თანადგომა,“- აღნიშნა ირაკლი კობახიძემ.

რაც უფრო მეტი ხმა იქნება მობილიზებული „ქართული ოცნების“ გარშემო, მით უფრო მყარი იქნება მშვიდობის გარანტიები ჩვენი ქვეყნისთვის მოკლევადიან და გრძელვადიან პერსპექტივაშიც, – ამის შესახებ საქართველოს პრემიერ-მინისტრმა, ირაკლი კობახიძემ გადაცემაში „იმედი LIVE“ განაცხადა.

ირაკლი კობახიძის თქმით, რადიკალურ ოპოზიციას ამოძრავებს მხოლოდ ვიწრო პოლიტიკური დღის წესრიგი და მოქმედებს არა ეროვნული ინტერესებით, არამედ გარედან მიღებული დაკვეთით.

„ეს დაკვეთა არის ის, რომ რაღაცნაირად უნდა მოახერხონ მათ ხელისუფლების შეცვლა. არჩევნებით ვერ ახერხებენ, ამიტომ გათვლა აქვთ არჩევნების შემდგომ პერიოდზე. დაკვეთა არის ეს, რადგან ამდენი ხნის განმავლობაში მათ ჰქონდათ კონკრეტული დავალება, მეორე ფრონტამდე უნდა მიეყვანათ ეს ქვეყანა, ამიტომ ითხოვდნენ სანქციებთან მიერთებას, მებრძოლი მოხალისეების გაგზავნას უკრაინაში, სხვა რაღაცებზე აღარ მინდა საუბარი. ყველაფერს რომ თავი დავანებოთ, პირდაპირ საუბრობდნენ მეორე ფრონტზე არა მარტო პოლიტიკოსები, NGO-ების წარმომადგენლებიც კი და უამრავი ფაქტი არსებობს, რომლებიც ამას ადასტურებს, არქივი არ იშლება. აქედან გამომდინარე, მათ ჰქონდათ დაკვეთა, დავალება, ამას ვერ მიაღწიეს და ეს არის ბოლო გაბრძოლება. შესაბამისად, ჩვენ ვსაუბრობთ ძალიან ცალსახად, რომ ეს არის გადამწყვეტი რეფერენდუმი. ეს არის ბოლო გაბრძოლება მათი მხრიდან, რაღაცნაირად ჩართონ ქვეყანა იმ ომში, რომელიც დაიწყო, სამწუხაროდ, უკრაინაში. ჩვენთვისაც, სახელმწიფოსთვის, ქვეყნისთვის ეს არის გადამწყვეტი რეფერენდუმი, სადაც, საბოლოო ჯამში, განმტკიცდება მშვიდობა. ამიტომ არის საჭირო ქუდზე კაცის მობილიზაცია, რაც უფრო მეტი ხმა იქნება მობილიზებული „ქართული ოცნების“ გარშემო, მით უფრო მყარი იქნება მშვიდობის გარანტიები ჩვენი ქვეყნისთვის მოკლევადიან და გრძელვადიან პერსპექტივაშიც“, – განაცხადა პრემიერმა.

ბატონი ბიძინა ივანიშვილი არის ამ ქვეყანაში მშვიდობის მთავარი გარანტი და შესაბამისად, პროვოკაციული გეგმების მთავარი ადრესატიც შეიძლება იყოს ბუნებრივია ის, შესაბამისად, ჩვენ გვმართებს მაქსიმალური სიფრთხილე – – ამის შესახებ საქართველოს პრემიერ-მინისტრმა ირაკლი კობახიძემ გადაცემა “იმედი LIVE”-ში განაცხადა.

 როგორც მთავრობის მეთაურმა აღნიშნა, ასევე აღნიშნულ საკითხთან დაკავშირებით სახელმწიფო უსაფრთხოების სამსახურში არსებობს მიმდინარე გამოძიება.

 „ამას უკავშირდება ის ზომები, რომელიც მიიღება ბიძინა ივანიშვილის დასაცავად. ოპონენტებს ეს განსაკუთრებულად აღიზიანებთ, ვინაიდან ეს უსაფრთხოების ზომები უპირისპირდება მათ მიზნებსა და სურვილებს. არამარტო ღიზიანდებიან, ხედავთ, რომ მათი ტელევიზიები აგორებენ რაღაც კამპანიებს ამ თემასთან დაკავშირებით. ესეც არის ერთგვარი ბულინგი, რომლის მიზანია, რომ გაიძულონ, ეს უსაფრთხოების ზომები აღარ მიიღო. მათ აქვთ ინტერესი, უნდათ, რომ მაქსიმალურად შექმნან არა უსაფრთხო გარემო,თუმცა ჩვენ ამას ვერ დავუშვებთ. ვერც მათი ბულინგი, ვერც მათი შანტაჟი და ვერც პროვოკაციული სიუჟეტები ბუნებრივია ვერ გაჭრის,”- განაცხადა პრემიერმა.

 კითხვაზე, რომელიც ოპოზიციონერების წინაშე მდგარ საფრთხეს შეეხებოდა, პრემიერმა აღნიშნა, რომ ოპოზიციონერების ოფისებში განიხილება ასეთი საკითხები, თუმცა ამ ეტაპზე გვარები არ დაკონკრეტებულა.

 „ჯერჯერობით, ჩვენ რა ინფორმაციაც გვაქვს, გვარების გარეშე იყო ასეთ თემაზე საუბარი, როდესაც მათ ოფისებში განიხილება ასეთი საკითხები. ამ ეტაპამდე გვარები არ დაკონკრეტებულა, რომ ყოფილიყო მეტი კონკრეტიკა, ჩვენ მივმართავდით სამართალდამცავ უწყებებსაც. თუ იქნება კონკრეტიკა, ჩვენ არ მოვერიდებით, პირიქით, ჩვენი პასუხისმგებლობაა, რომ ამასთან დაკავშირებით სამართალდამცავ სტრუქტურებს მივმართოთ, როგორც პარტიამ. ჯერჯერობით გვარების დაკონკრეტების გარეშეა საუბარი, მაგრამ მუდმივ რეჟიმში განიხილება ასეთი გეგმები, ამიტომ მაქსიმალურად ფხიზლად უნდა ვიყოთ ყველა – სახელმწიფო, ხელისუფლება, სამართალდამცავი სტრუქტურები და ასევე საზოგადოებაც. ჩვენი სიფხიზლე, საზოგადოების თითოეული წევრის, მოქალაქის სიფრთხილე და სიფხიზლე არის მნიშვნელოვანი იმისთვის, რომ არავის მიეცეს პროვოკაციული გეგმების აღსრულების საშუალება,”- განაცხადა ირაკლი კობახიძემ.

ვინმეს თუ უნდა ამ ქვეყანაში მუდმივად არაჯანსაღი ფონის შენარჩუნება, ე.წ. პოლარიზაციის, ჩაკეტილი წრის შენარჩუნება, მათთვის ბუნებრივია „ნაცმოძრაობის” შენარჩუნება პოლიტიკურ სისტემაში, მაგრამ ეს არ არის ჩვენი ქვეყნის ინტერესებში, – ამის შესახებ საქართველოს პრემიერ-მინისტრმა ირაკლი კობახიძემ გადაცემა “იმედი LIVE”-ში განაცხადა.

როგორც მთავრობის მეთაურმა აღნიშნა, არაკეთილმოსურნეებს სურთ, რომ „ნაცმოძრაობა” დარჩეს პოლიტიკურ სისტემაში იმისათვის, რომ არასოდეს შედგეს ქვეყანაში ჯანსაღი პოლიტიკური სისტემა.

„ჩვენ გვაქვს განსხვავებული ინტერესი, რომ ერთხელ და სამუდამოდ ჩამოყალიბდეს ჯანსაღი პოლიტიკური სისტემა, ჯანსაღი დემოკრატიული სისტემა. ჩვენ ვერ ვიმოქმედებთ იმ ადამიანების მოწოდებებიდან გამომდინარე, რომლებსაც არ სურთ კარგი ამ ქვეყნისთვის. ჩვენ უნდა ვიმოქმედოთ ჩვენი ინტერესების შესაბამისად. დღეს გვაქვს ჩვენ განსხვავებული მოცემულობა, ვიდრე გვქონდა გასული 12 წლის განმავლობაში. ერთ-ერთი მთავარი ფაქტორი არის ის, რომ დასრულებულია პროცესები ჰააგისა და სტრასბურგში. ეს არის ძალიან მნიშვნელოვანი ფაქტორი, რაც პირდაპირ დაკავშირებულია 2008 წლის ომის დანაშაულის გამოძიებასთან. ჩვენ რომ დაგვეწყო ეს პროცესი მანამდე, შეიძლება, ჩვენი სახელმწიფოს ინტერესებს შექმნოდა პრობლემები ჰააგასა და სტრასბურგში, ახლა ეს პროცესები დასრულებულია, აქედან გამომდინარე, ეს პრობლემა მოხსნილია. ეს არის მთავარი ფაქტორი. გარდა ამისა, სხვადასხვა სირთულე გვქონდა თავის დროზე, მიუხედავად იმისა, რომ ჩვენ გვქონდა 4 წლის განმავლობაში საკონსტიტუციო უმრავლესობა, ეს იყო 2016 წლიდან 2020 წლამდე, იყო სხვადასხვა ტიპის სირთულე, რაც არ გვაძლევდა შესაბამისი ნაბიჯების გადადგმის საშუალებას. დღეს განსხვავებული ვითარებაა, დღეს გუნდი არის კონსოლიდირებული, სახელმწიფო არის ძლიერი, სუვერენული, დასრულებულია სასამართლო პროცესები ჰააგაში, სტრასბურგში. ამ ვითარებაში ჩვენ გვაქვს სწორედ იმ ნაბიჯის გადადგმის საშუალება, რისი საშუალებაც არ გვქონდა წინა 12 წლის განმავლობაში”, – განაცხადა ირაკლი კობახიძემ.

არჩევნების მოახლოებასთან ერთად განსაკუთრებული აქტუალიზაცია შეიძინა ჩვენი ქვეყნის ევროპეიზაციამ. ზოგი თვლის რომ ამისათვის აუცილებელია ევროკავშირში გაწევრიანება (ღირსებით ან მის გარეშე). ამგვარი მსჯელობით გამომდინარეობს, რომ დიდი ბრიტანეთი და ნორვეგია არ არიან ევროპელები. თანაც, ყურადღების მიღმა ტოვებენ იმ უცილობელ ფაქტს, რომ ახალი წევრების ევროკავშირში მიღებისათვის უპირატესად შესაბამისი გეოპოლიტიკური ვითარებაა საჭირო. ზოგი თვლის, რომ გეოგრაფიულად ჩვენ ევროპას არ წარმოვადგენთ და ამიტომ არ ღირს ევროკავშირში ძალად შეტენვა, მით უმეტეს, როცა არ გვიღებენ. არის აზრი, რომ ჩვენ ევროპისა და აზიის გზისგასაყარზე ვმდებარეობთ და ამიტომ დასავლეთ-აღმოსავლეთს შორის ხიდი ჩვენი ბუნებრივი ფუნქციაა.

გეოგრაფიულად საქართველო ახლო აღმოსავლეთში მდებარეობს (ე.წ. დიდი ახლო აღმოსავლეთი), მაგრამ ცივილიზაციურად ევროპას წარმოადგენს. და ეს არა მარტო თავისი კულტურის ისტორიით დასტურდება, არამედ ისტორიული საგარეო პოლიტიკური პრეფერენციებითაც. ქართველები ყოველთვის დასავლეთისკენ იხრებოდნენ: ელინისტური სამყარო და არა სპარსეთი, რომი და არა პართია, ბიზანტია და არა არაბები, ჯვაროსნები და არა თურქ-სელჯუკები, მეტიც, ჯვაროსნები და არა ბიზანტია. სამწუხაროდ, კონსტანტინოპოლის დაცემის შემდეგ არჩევანი აღარ დაგვრჩა.

ქრისტიანობამ უდიდესი როლი შეასრულა ჩვენს ცივილიზაციურ არჩევანში. დასავლეთი, რომელიც ადრეულ შუა საუკუნეებში წარმოადგენდა გაქრისტიანებულ ბერძნულ-რომაულ კულტურას, მთლიანად შეესაბამებოდა ქართულ არჩევანს. მოგვიანებით დასავლეთის ამ ბაზისურ პლასტს დაემატა გერმანული (ალბათ სჯობია გერმანიკული – გერმანული, ფრანკული, ანგლო-საქსონური, სკანდინავიური, ლანგობარდული, ფლამანდური, ბურგუნდული) პლასტი, რომელმაც უდიდესი როლი შეასრულა დასავლეთის განვითარებაში და რომელიც, სამწუხაროდ, ჩვენ არ შეგვხებია. ასეთია: ფრანკების სალიკური სამართალი, გერმანიის მეფის ჰაინრიხ ფოგელერის (ჩიტიჭერია) მიერ ქალაქებისათვის თვითმმართველობის სიგელების მინიჭება, რითაც საფუძველი გამოაცალა მსხვილ ფეოდალებს (მეთოდი სასწრაფოდ გადაიღეს ჰენრი მეორემ ინგლისში და ლუი მეექვსემ საფრანგეთში, თუმცა ქალაქები ისე არ გაუჯეჯილებიათ, როგორც ეს გერმანიაში მოხდა), საქსონური სარკე, ოტონ I დიდის მიერ მაგდებურგის სამართალის მიღება, და ბოლოს, დაგვირგვინდა ბრიტანეთში თავისუფლების დიდი ქარტიის შექმნით.

სწორედ გერმანიკული პლასტის დამსახურებაა ევროპაში (მათ შორის პოლონეთსა და ბალტიისპირეთში) თავისუფალი და დამოუკიდებელი, თვითმმართველი ქალაქების გაჩენა (სადაც გერმანიკული კულტურა ვერ მიწვდა, იქ თვითმმართველი ქალაქი არ აღმოცენდა, მაგ. ბალკანეთში, სამხრეთ იტალიასა და ესპანეთში). თვითმმართველი ქალაქების დამსახურებაა: მოქალაქეთა თავისუფლება (ქალაქების დევიზი იყო Stadtluft macht frei  – ქალაქის ჰაერი ანიჭებს თავისუფლებას), დამოუკიდებელი სასამართლოები და უნივერსიტეტები, რამაც უზრუნველყო ინოვაციური განვითარება. უცნაურია, მაგრამ ევროპული სახელმწიფოების ცენტრალიზაცია თვითმმართველი ქალაქების დამსახურებით მოხდა. ცენტრალიზებულმა სახელმწიფოებმა ქალაქებს კომპეტენცია შეუკვეცეს, თორემ თვითმმართველობა არ გაუუქმებიათ (თვითმმართველობა ნაცისტების დროსაც ფუნქციონირებდა). სამწუხაროდ, საქართველოს ისტორიამ მხოლოდ ერთი თვითმმართველი ქალაქი იცის – XI საუკუნის თბილისი. მანაც, სატახტო ქალაქად გადაქცევის შემდგომ თვითმმართველობა დაკარგა.

ასევე, მხოლოდ გერმანიკულ სამყაროში გაჩნდა ძალმოსილ ფეოდალურ სუბიექტთა მუდმივმოქმედი სათათბირო ორგანო (რაიხსტაგი, პარლამენტი, სკანდინავიური ტინგები, სეიმი, ქალაქის საბჭო, თვითმმართველ ქალაქთა გაერთიანება – ჰანზა), რომლის ლეგიტიმაციას მონარქთან ერთად მოსახლეობის სხვადასხვა ფენები ახდენდნენ. მართალია საუკუნეების განმავლობაში თათბირი ხშირად იცვლებოდა შუღლითა და შინაომებით, მაგრამ ამ სტრუქტურებმა დღევანდელ დღემდე მოაღწიეს, რითაც ჩვენ ნამდვილად ვერ დავიკვეხნით. პირიქით, დღესაც სამაგალითო ვაჟკაცობად მიიჩნევა გიორგი ბრწყინვალის მიერ ცივ-გომბორზე ფეოდალთა შეტყუება და გაჟლეტა. რა გასაკვირია და, შემდგომი მოვლენებიც შესაბამისად განვითარდა: უაღრესად დაქუცმაცებული და ამორფული პირველი რაიხი არ დაშლილა (ყოველ შემთხვევაში, რეფორმაციამდე), ხოლო საქართველო კი დაიშალა სწორედ მაშინ, როცა არც ერთ მეზობელ სახელმწიფოს ჯერ კიდევ არ შეეძლო საქართველოს დაპყრობა (თეთრ- და  შავბატკნიანი თათრების ეპიზოდური შემოსევები დაპყრობად არ განიხილება). და ეს მოხდა მხოლოდ იმიტომ, რომ ვერ შევძელით ურთიერთმოთათბირებით გადაგვეჭრა ქვეყნის წინაშე მდგარი პრობლემები.

სწორედ სათათბირო ორგანოს არარსებობამ დაამკვიდრა ჩვენში მავნე ტრადიცია, როცა  ხელის-უფლებაზე განაწყენებული ძალები, დასაბეზღებლად და ჯავრის ამოსაყრელად გარბიან ყარაყორუმში (ისპაჰანში, სტამბოლში, მოსკოვში, ვაშინგტონში), და ეს სამარცხვინო და უღირს საქმედ არ მიაჩნიათ. არად დაგიდევენ ქვეყნის ავტორიტეტს. როცა ამა თუ იმ კანონის მიღება/არ მიღებაზე მისი ავკარგიანობის მიუხედავად ჩვენს პარლამენტს თითს დაუქნევენ უცხოეთიდან (ახლო წარსულში მოსკოვიდან, ეხლა ვაშინგტონიდან) და ამისთანა უბოდიშო მოქმედებაზე ჩვენს საზოგადოებას (განსაკუთრებით ახალგაზრდობას) არ ექნება შეურაცხყოფის რეაქცია, ამას სახელად ღირსების არქონა ჰქვია.

ჩვენ ჭეშმარიტად ევროპის დაბადებისთანავე ევროპაში აღმოვჩნდით და მასთან ერთად გავაგრძელეთ განვითარება. ოღონდ, დროთა განმავლობაში ჩამოვრჩით და ეხლა უნდა ვეცადოთ გავიაროთ გამოტოვებული ეტაპები. ჩამორჩენის აღიარება აუცილებელია, რათა სწორად გავაანალიზოთ არსებული მდგომარეობა და დავსახოთ ჩამორჩენის დაძლევის გზები.

პირველ რიგში უნდა შევიგნოთ, რომ არ არსებობს ხელისუფლების მოწყობის განსაკუთრებული გზა (რუსული, ქართული, ტიბეტური და ა.შ). ხელისუფლება ან დემოკრატიულია, რაც შესაბამისი პოლიტიკური ინსტიტუტებით არის განმტკიცებული და დაცული (სწორედ ეს არის დასავლეთი), ან ხელისუფლება ავტოკრატულია (მისი მრავალი სახესხვაობით). მართალია დღეს დემოკრატიული სახელმწიფოების უმეტესობა კრიზისის ფაზაში იმყოფება, მაგრამ ჩერჩილის სიტყვები რომ გავიხსენოთ: „მრავალი ნაკლი აქვს დემოკრატიულ მმართველობას, მაგრამ უკეთესი კაცობრიობას არ შეუქმნია“. ასე რომ ხელისუფლება ან დემოკრატიულია ან ავტოკრატული. ვიმეორებთ, სხვა, მესამე სახის ხელისუფლება ბუნებაში არ არსებობს. ამიტომ, ფართო არჩევანი ნამდვილად არა გვაქვს:

• ან ევროპულ გზას უნდა დავადგეთ, რაც უპირველეს ყოვლისა გულისხმობს დემოკრატიულ პოლიტიკურ ინსტიტუტებს (ხელისუფლებათა დანაწილება, სასამართლო დამოუკიდებლობა, თვითმმართველობა, ხელისუფლებათა მონაცვლეობა თავისუფალი არჩევნებით, თავისუფალი და მიუკერძოებელი პრესა), რომელთა დამკვიდრებაც ამ ოცდაათი წლის განმავლობაში არც ერთ პოლიტიკურ ძალას არ უცდია (როგორც ხელისუფლებაში მყოფს, ისე მაძიებლებს) და არც რაიმე ნიშანწყალი ჩანს, რომ ვინმე ამას ეცდება. ხელისუფლების დანაწილება არავის სურს. ერთკაციანი პარტიაც კი აბსოლუტურ ძალაუფლებაზეა ორიენტირებული;
• ან სახელმწიფო მშენებლობა განწირული იქნება წარუმატებლობისთვის. სამწუხაროდ დღეს ჩვენს ქვეყანაში ჯერ კიდევ ფუნქციონირებს საბჭოური სახელისუფლო ვერტიკალი, რომლის თავში მყოფი სუბიექტი აკონტროლებს ქვეყნის ყველა შესაძლო რესურსს (მატერიალურს, ფინანსურს, ადამიანურს). ამ ვერტიკალის დემონტაჟის გარეშე კი, შეუძლებელია ევროპას ვეკუთვნოდეთ, იმის მიუხედავათ გავხდებით თუ არა ევროკავშირის წევრი. საქმე ევროკავშირის წევრობაში არაა. წყალსაც წაუღია ევროკავშირი. ქართული სახელმწიფო ვერ შედგება, ესაა მთავარი. ვინც საქართველოს ისტორია ასე თუ ისე მაინც იცის, და ასევე იცის ქართველი კაცის ურჩი ხასიათი, მას უნდა ესმოდეს, რომ ავტორიტარიზმის დამყარება საქართველოში შ ე უ ძ ლ ე ბ ე ლ ი ა. ნებისმიერი ამგვარი მცდელობა გამოიწვევს გაათმაგებულ უკურეაქციას. ქვეყანა ვერ გაუძლებს სეპარატიზმისა და გადატრიალებების მუდმივ რყევებს (მოუთმენელი სიბეცეა იმის ფიქრი, რომ მხოლოდ რუსეთს სწადია ჩვენი დეზინტეგრაცია). შველა დემოკრატიულ მოწყობაშია. განსაკუთრებული ყურადღება უნდა მივაქციოთ რეგიონების განვითარებას და მათ ადეკვატურ წარმომადგენლობას პარლამენტში (სამ მილიონიან ქვეყანაში მილიონნახევარი დედაქალაქში ცხოვრობს, რაც პირდაპირ მიუთითებს რეგიონების სავალალო მდგომარეობაზე). ერთიანი და განუყოფელი საქართველოს ტრფიალთ უნდა შევახსენო, რომ სწორედ უნიტარული და სუპერუნიტარული სახელმწიფო წარმოადგენს სეპარატიზმის ნოყიერ ნიადაგს.

ასე, რომ დემოკრატიული პოლიტიკური ინსტიტუტების გარეშე ჩვენი სახელმწიფო ვერ იარსებებს. ხელისუფლებათა დანაწილება, სასამართლო დამოუკიდებლობა, ორპალატიანი პარლამენტი, ქვეყნის არსებული რეგიონების ლეგიტიმაცია, თვითმმართველობის (რეგიონული და მუნიციპალური) დამკვიდრება, დამოუკიდებელი საარჩევნო ადმინისტრაცია და მიუკერძოებელი პრესა არის ჩვენი სახელმწიფოს ფუნქციონირების აუცილებელი პირობები. დემოკრატიული პოლიტიკური ინსტიტუტების პარალელურად უნდა გატარდეს განათლების ძირეული რეფორმა, რომლის განხორციელებაშიც ყველა რგოლმა უნდა მიიღოს მონაწილეობა (არა მარტო განათლების სამინისტრომ).

გურამ სანადირაძე