მეც მაქვს კითხვა, სად იყო გიორგი გახარია, სად არის და სად არიან მისი პარტიის ხალხი? – ამის შესახებ  „ძლიერი საქართველოსთვის“ წევრმა, ალეკო ელისაშვილმა ერთ-ერთი მედიის ეთერში განაცხადა.

ელისაშვილს კითხვა დაუსვეს, რატომ არ ესწრებოდა სამი ოპოზიციური გაერთიანების წარმომადგენელთა შეხვედრას გიორგი გახარია?

„ძალიან დამავალებთ, თუ ამ კითხვას დაუსვამთ გიორგი გახარიას. ჩვენი კოალიცია ვდგავართ ეპიცენტრში დანარჩენ ოპოზიციურ პარტიებთან, ბრძოლაში შევედით და ვსწავლობთ კოალიციურ ურთიერთობებს. ამისთვის მადლობა „ოცნებას“. სად არის გახარია, მას ჰკითხეთ, მე არ ვიცი“, – განაცხადა ალეკო ელისაშვილმა.

ელისაშვილს ჟურნალისტმა ასევე კითხვა დაუსვა გიორგი გახარიას განცხადებასთან დაკავშირებით, სადაც ის ამბობს: „საერთაშორისო იურისდიქციის ქვეშ არჩევნების მოთხოვნა არის საჩუქარი „ოცნებისთვის“, ვინც ამას აკეთებს, ან ადეკვატურობა აკლიათ, ან სასარგებლო იდიოტები არიან“.

ელისაშვილის შეფასებით, გახარიას მხრიდან ამ კრიტიკას ვერ მიიღებს.

„ჩვენ ერთმანეთის გვერდით დავდექით, რადგან ყველას მოგვპარეს არჩევანი. ჯამში, ოპოზიციამ გაიმარჯვა და უნდათ, რომ ეს გამარჯვება აგვწაპნონ. ამიტომ შევქმენით შტაბი და გავაერთიანეთ ძალისხმევა. ამ ძალისხმევაში გახარია რატომ არ არის, არ ვიცი. ღიად არის მისთვის შეთავაზება. უფრო მეტიც, ჩვენ რაღაცაზე ვიკრიბებით, ვმსჯელობთ, ყოველ ჯერზე ვპატიჟებთ გახარიას ან მის წარმომადგენლებს. მოვიდეს და გვითხრას უკეთესი აზრი. ყოველ ჯერზე ვეძახით, ვურეკავთ მასაც და მის წარმომადგენლებსაც, ვეუბნებით, რომ აქა და აქ ვიკრიბებით. ახლა უკვე გასაგებია ჩვენი შეკრების ადგილი – ჩვენი კოალიციის ოფისი, რომელიც ერთობლივ შტაბად გადაკეთდა. მოდი, შე დალოცვილო და გვითხარი, რასაც ფიქრობ. ვიკამათოთ, ვიმსჯელოთ და დაგვარწმუნე. ჩვენ რაღაც გადაწყვეტილებას ვიღებთ და შემდეგ გამოდგება და გვლანძღავს. ეს რა წესია? მოვიდეს და გვითხრას, რა მოთხოვნები უნდა იყოს, არავინ კარს არ უჭედავს. ყველას უნდა, ვიღაცას ხელი შეაწმინდოს და არავის არ უნდა მოქმედება. ჩვენ ვმოქმედებთ, ვფიქრობთ და რაღაცებს ვაკეთებთ. თუ არ მოგწონს, შე დალოცვილო, მოდი და დახურულ კარს მიღმა გვითხარი შენი აზრი. რა არის ეს, რა პრანჭვაა? რაღაცას ვიტყვით, არ მოდის, შემდეგ დგას და იქიდან გაბუტული გენიოსივით რაღაცებს გეუბნება. არ გამოდის ეს ამბავი, მოდი, დაჯექი კაცურად, სახელმწიფოებრივად, განსაცდელშია ქვეყანა“ , – განაცხადა ალეკო ელისაშვილმა.

დღეს სამი ოპოზიციური გაერთიანების შეხვედრა გაიმართა, რომელსაც „კოალიცია ცვლილებისთვის“, „ძლიერი საქართველოსა“ და „ერთიანობა – ნაციონალური მოძრაობის“ წარმომადგენლები ესწრებოდნენ. როგორც შეხვედრის დასრულების შემდეგ ოპოზიციური გაერთიანების წარმომადგენლებმა განაცხადეს, ორშაბათს შეიკრიბებიან რუსთაველზე და სამოქმედო გეგმას იქ წარადგენენ.  შეხვედრაზე არ იმყოფებოდნენ „გახარია საქართველოსთვის“ წარმომადგენლები.

გამოქვეყნდა ევროკომისიის გაფართოების ანგარიში, სადაც საუბარია საქართველოს მიერ გადადგმულ ნაბიჯებზე. საერთო შეფასებით, საქართველო პროგრესირებს ევროკავშირში წევრობის გზაზე, – ამის შესახებ საქართველოს პარლამენტის თავმჯდომარე შალვა პაპუაშვილი სოციალურ ქსელში წერს.

როგორც პაპუაშვილი აღნიშნავს, ევროკომისიის შეფასებით, 35 თავიდან გასული ერთი წლის მანძილზე საქართველომ კარგი პროგრესი დააფიქსირა 12 თავზე, ხოლო გარკვეული პროგრესი – 13 თავზე.

მისივე თქმით, ისინი ყურადღებით შეისწავლიან გაფართოების დოკუმენტს და დაგეგმავენ სამომავლო ნაბიჯებს.

„ჩვენ დადებითად ვაფასებთ ევროკომისიის ანგარიშს. ევროკომისიის შეფასებით, 35 თავიდან გასული ერთი წლის მანძილზე საქართველომ კარგი პროგრესი დააფიქსირა 12 თავზე, ხოლო გარკვეული პროგრესი – 13 თავზე. ეს არის იმის ძალიან მკაფიო დასტური, რომ, მიუხედავად იმისა, რომ არჩევნების გამო საქართველოს ჰქონდა შეზღუდული დრო საპარლამენტო საქმიანობისთვის და მიუხედავად ოპოზიციის და ენჯეოსექტორის მუდმივი ობსტრუქციისა, საქართველო დგამდა მნიშვნელოვან ნაბიჯებს ევროკავშირში ინტეგრაციის გზაზე.

ხაზგასასმელია, რომ ანგარიშში, 35 თავიდან მხოლოდ ერთი თავის შემთხვევაში, რომელიც მართლმსაჯულებას და ფუნდამენტურ უფლებებს შეეხება, ევროკომისიის შეფასებით არის უკუსვლა. ამასთან, ამგვარი შეფასების ძირითად მიზეზად ანგარიშში ევროკომისია ასახელებს გენდერული კვოტირების გაუქმებას, გამჭვირვალობის კანონისა და ოჯახური ღირებულებების და არასრულწლოვანის დაცვის შესახებ კანონის მიღებას და ლგბტ პრაიდის ვერჩატარებას.

ამასთან, აღსანიშნავია, რომ ამ თავში ჩვენი შეფასება თანაბარია უკრაინას და მოლდოვას შეფასებისა, ხოლო „ფუნდამენტურ საკითხთა ჯგუფში“, რომელშიც ეს თავი შედის, საქართველო უკრაინასაც ასწრებს და მოლდოვასაც.

ის, რომ გამჭვირვალობის და ლგბტ პროპაგანდის წინააღმდეგ მიმართულ კანონებზე ამ ეტაპზე საქართველოს ევროკავშირთან ურთიერთთანხმობა არ აქვს, ეს ჩვენი საზოგადოებისთვის სიახლე არ არის. ეს კანონები არჩევნებზეც ერთ-ერთი ცენტრალური საკითხი იყო, რაზეც ჩვენმა საზოგადოებამ თავისი პოზიცია მკაფიოდ დააფიქსირა. ჩვენ გავაგრძელებთ ამ საკითხებზე ევროკავშირთან საუბარს საქართველოს მოქალაქეების ამ პოზიციის გათვალისწინებით.

გარდა ფუნდამენტური მიმართულებისა, საქართველო უკრაინასა და მოლდოვას ასწრებს შიდა ბაზრისა და კონკურენტუნარიანობის ჯგუფების საერთო შეფასებაშიც, რაც არის ევროკავშირის, როგორც ორგანიზაციის, მთავარი არსი. სწორედ ამ საკითხების ირგვლივ შეიქმნა თავის დროზე ევროკავშირი და სწორედ ამიტომ არის ევროკავშირი ბევრისთვის მიმზიდველი.

ამრიგად, საერთო შეფასების გათვალისწინებით, საქართველო კვლავ სოლიდურად ასწრებს მოლდოვას, ხოლო უკრაინას მხოლოდ სამ ჯგუფში – საგარეო ურთიერთობები, მწვანე დღის წესრიგი და რესურსები – ჩამორჩება. აქვე უნდა აღინიშნოს, რომ ჩვენ კიდევ უფრო დიდი უპირატესობით ვასწრებთ ბოსნია-ჰერცეგოვინას, რომელთანაც ასევე დაწყებულია გაწევრიანების მოლაპარაკებები.

სწორედ ეს 35 თავია ევროკავშირში საქართველოს გაწევრიანების, ანუ საქართველოს ევროპული გზა. ეს არის დინამიკური, საქმიანი, ექსპერტული პროცესი, რომელშიც საქართველო 2014 წლიდან ერთგულად, გეგმაზომიერად, ნაბიჯ-ნაბიჯ მიიწევს წინ.

ამავე დროს, ევროკავშირის ზოგიერთი წარმომადგენლის მხრიდან ვხედავთ ამ პროცესის უკიდურესად პოლიტიზების მცდელობას. ყველამ უნდა გააცნობიეროს, რომ ამგვარი წინდაუხედავი მიდგომა ევროინტეგრაციას თანამშრომლობის ინსტრუმენტიდან პოლიტიკურ იარაღად აქცევს, რაც, სამწუხაროდ, საბოლოო ჯამში, თავად ევროინტეგრაციის პროცესსა და ევროკავშირის რეპუტაციას აზიანებს.

აქვე, მინდა, შევეხო ბოლო პერიოდში ხშირად გამოყენებულ ტერმინს – „ევროინტეგრაციის შეჩერებას“. თავად ის ფაქტი, რომ ევროკომისიამ გაფართოების დოკუმენტზე იმუშავა, საქართველოს პროგრესი შეაფასა და რეკომენდაციები მოგვცა, მეტყველებს იმაზე, რომ ეს ტერმინი უფრო პოლიტიკური განცხადებაა, ვიდრე ინსტიტუციური მდგომარეობა. როგორც ევროკავშირი აგრძელებს საქართველოს შეფასებას, ისევე ვაგრძელებთ ჩვენც ასოცირების შეთანხმებით გათვალისწინებულ საკითხებზე მუშაობას. სწორედ ეს არის ევროინტეგრაცია. ის არც შეჩერებულა და ვერც შეჩერდება. თუკი რამე გვასწავლა ჩვენმა მიღწევებმა ამ პროცესში, არის ის, რომ ევროინტეგრაცია გრძელვადიან შედეგზე ორიენტირებული სამუშაოა და არა იმწუთიერი პოლიტიკური კონიუნქტურის აყოლა.

საპარლამენტო არჩევნებში მოსახლეობამ ძალიან გასაგებად გააკეთა არჩევანი, ევროინტეგრაციის პროცესზე, ოპოზიციის ისტერიულ პოლიტიკასა და ქართული ოცნების საქმიან, კონსტრუქციულ, ქართველი ხალხის ინტერესების გათვალისწინებით წარმოებულ პოლიტიკას შორის. ჩვენ უკვე შესრულებული გვაქვს ასოცირების შეთანხმების დიდი ნაწილი და 2028 წლისთვის მის 90%-ს შევასრულებთ, რითიც არსებითად მივუახლოვდებით ევროკავშირის წევრობას.

ჩვენ ყურადღებით შევისწავლით გაფართოების დოკუმენტს და დავგეგმავთ სამომავლო ნაბიჯებს, ქართველი ფერმერების, მეწარმეების, ჩვენი მოქალაქეების საუკეთესო ინტერესების გათვალისწინებით. საქართველო ბოლო წლების განმავლობაში მჭიდროდ თანამშრომლობდა ევროკომისიასთან თითოეული სფეროს ანალიზის პროცესში და მომავალშიც მზად ვართ, ამავე მიზნით აქტიურად ვითანამშრომლოთ ევროკავშირის შესაბამის ინსტიტუტებთან“, – წერს პარლამენტის თავმჯდომარე.

„ლელოს“ ყოფილი წევრის, თამარ შიოლაშვილის მიერ გასაჯაროებულ გზავნილებს, რომლებიც „ლელოს“ პარტიულ დირექტივებს ეხება, მმართველ გუნდში აფასებენ. როგორც პარლამენტის თავმჯდომარის პირველმა მოადგილემ განაცხადა, აშკარაა იმ საბოტაჟის განხორციელების მცდელობა, რომელიც ხელისუფლების ოპონენტებმა თვეების წინ მოამზადეს. გიორგი ვოლსკის თქმით, ტრაგედიაა, როდესაც პოლიტიკური სუბიექტი საარჩევნო პროცესებისთვის ზიანის მიყენებას ცდილობს.

„ვისზეც არის საუბარი, ის ადამიანი, მოითხოვს ოპოზიციონერი კომისიის წევრებისგან საბოტაჟის განვითარებას იმ გეგმით, რომელიც მათ თვეების წინ მოიფიქრეს. ტრაგედიაა, როდესაც საქართველოში არსებობენ პოლიტიკური სუბიექტები, რომლებიც ცდილობენ საკუთარი ქვეყანა დააზიანონ. ერთ-ერთი ამის აშკარა მაგალითია ის ისტერიკა, ბრძოლა, რომელიც აწარმოეს“, – განაცხადა ვოლსკიმ.

კოალიცია „ძლიერი საქართველოს“ ყოფილმა წევრმა, თამარ შიოლაშვილმა სოციალურ ქსელში პარტიიდან მიღებული დირექტივების სქრინები გამოაქვეყნა. კოალიციის საერთო ჩატის მიმოწერიდან ჩანს, რომ პარტია საოლქო კომისიის წევრებს კონკრეტულ დავალებებს აძლევს. მაგალითად, სასწრაფო დირექტივა ეხება იმას, რომ საოლქო კომისიის წევრებმა ხელი არ უნდა მოაწერონ ოქმებს.

თამარ შიოლაშვილმა ხაზარაძის კოალიცია „ძლიერი საქართველო“ და პარტიისგან კომისიის წევრის სტატუსიც დატოვა. მიზეზად მითითებები და დირექტივები დაასახელა, რაც მისი თქმით, არ შეესაბამება კანონის მოთხოვნებს და მორალს.

ადამიანის უფლებები არის უმაღლეს დონეზე დაცული ჩვენს ქვეყანაში, არავინ არავის პირად ცხოვრებაში არ იჭრება და ჩვენ ხმამაღლა ვაცხადებთ იმას, რომ არავის განსასჯელი არ არის არავის პირადი ცხოვრება, არც ცხოვრების წესი და ა.შ. არასდროს არ ყოფილა ადამიანის უფლებები დაცული ისე, როგორც არის დღეს ჩვენს ქვეყანაში, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

პრემიერის თქმით, „ოჯახური ღირებულებების შესახებ კანონი“ ეხება მხოლოდ და მხოლოდ პროპაგანდის შეზღუდვას.

„ამ კანონში, ერთადერთი, საუბარია პროპაგანდის აკრძალვაზე, მეტი არაფერზე. როცა ვიღაც ამბობს, რომ ეს კანონი არ არის კარგი, მაშინ უნდა დაასაბუთოს, რა არ მოსწონთ ამ კანონში. ერთადერთ რამეზეა საუბარი, პირდაპირ წერია ეს, რაც ასე აღარ არის, სხვათა შორის, ბევრ ქვეყანაში. ხშირად საუბრობენ ხოლმე დაცინვით და ირონიით ამ საკითხზე, დედა დედაა, მამა მამაა და თითქოს ეს ისევ ჩვეულებრივი მოვლენაა. სტრასბურგის პრაქტიკა არსებობს საკმაოდ პრობლემური ამასთან დაკავშირებით, ევროპაში არის ის ტენდენცია, რომ დედას დედა შეიძლება აღარ ერქვას და მამას მამა შეიძლება აღარ ერქვას. კონკრეტულ სახელმწიფოებში შესაბამისი საკანონმდებლო ცვლილებებია განხორციელებული ამასთან დაკავშირებით. ამ კანონში წერია ერთადერთი რამ, რომ არ გვინდა ეს პროპაგანდა, დედას უნდა ერქვას დედა, მამას ერქვას მამა და თურმე ეს კანონი არ ვარგა. დაგვისაბუთონ მაშინ, რატომ არ ვარგა ეს კანონი“, –  აღნიშნა პრემიერ-მინისტრმა.

ქუდზე კაცი გამოვიდა და ჩვენ მივიღეთ 1 120 000 ხმა, დაახლოებით 200 000-ით მეტი წინა არჩევნებთან შედარებით, რისთვისაც კიდევ ერთხელ მადლობა ქართველ ხალხს, ამიტომ არის ეს დღეები უფრო მშვიდი, ვიდრე იყო ოთხი წლის წინ, – ამის შესახებ საქართველოს პრემიერ-მინისტრმა ირაკლი კობახიძემ გადაცემა „იმედი LIVE”-ში განაცხადა.

მთავრობის მეთაურის შეფასებით, პროცესები მშვიდად წარიმართება და ოპოზიცია ძალიან მალე შევა პარლამენტში.

„მგონია, რომ უფრო სხვანაირად წარიმართება პროცესები ამ ერთი თვის განმავლობაში, თვითონვე დაინახავენ, რომ რეალურად არაფრის რესურსი არ აქვთ. ეს მალე გამოჩნდება, ძალიან მალე, აქედან გამომდინარე, ვფიქრობ, რომ მშვიდად წავა პროცესები. სხვათაშორის, ამის გარანტია შექმნა ქართველმა ხალხმა. 1 120 000 ადამიანის მხარდაჭერა არის მთავარი, რაც ქმნის გარანტიას. ამაზე ბატონ ბიძინა ივანიშვილს ჰქონდა თავის სიტყვაში, ასე ვთქვათ, მინიშნებები, რომ რაც უფრო მაღალი იქნებოდა ქართველი ხალხის მხარდაჭერა, მით უფრო მშვიდი იქნებოდა ნოემბერი და დეკემბერი, ეს იყო წინასწარმეტყველება და ასეც ხდება. სწორედ, იმის გამო, რომ ქუდზე კაცი გამოვიდა და ჩვენ მივიღეთ 1 120 000 ხმა, დაახლოებით 200 000-ით მეტი წინა არჩევნებთან შედარებით, კიდევ ერთხელ მადლობა საზოგადოებას, ქართველ ხალხს ამისათვის, ამიტომ არის ეს დღეები უფრო მშვიდი, ვიდრე იყო ოთხი წლის წინ. ვფიქრობ, რომ ასეთივე, ბევრად უფრო მშვიდი იქნება ნოემბერ-დეკემბრი ოთხი წლის წინანდელ ნოემბერ-დეკემბერთან შედარებით. არავითარი რესურსი არ აქვთ ამ ადამიანებს, მშვიდად წარიმართება პროცესები და მე ვფიქრობ, რომ ძალიან მალე შემოვლენ ისინი პარლამენტში,“- განაცხადა პრემიერმა.

ყველა პარამეტრით ათი თავით მაღლა ვართ ყველა კანდიდატ ქვეყანაზე, მაგრამ ფორმალურად ვართ ნახევარი ნაბიჯით უკან – უსამართლობაა, თუმცა მომავალი წლიდან ურთიერთობები გადაიტვირთება და სამართლიანობაც სრულად აღდგება, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

მთავრობის მეთაურის თქმით, ეს პროცესი ინტენსიურად მომავალი წლის პირველი კვარტლიდან დაიწყება.

„ჩვენ სულ უფრო მეტად ვუახლოვდებით ურთიერთობების გადატვირთვას ჩვენი არჩევნები უკვე ჩატარდა, მალე შეიკრიბება პარლამენტი, ჩამოყალიბდება მთავრობა, ასევე მალე დასრულდება ამერიკის შეერთებულ შტატებში საპრეზიდენტო არჩევნები ასევე, ვფიქრობთ, რომ უკრაინაში ომი იმაზე ადრე დასრულდება, ვიდრე შეიძლებოდა ყოფილიყო ნაკლებად ოპტიმისტური პროგნოზი. სავსებით რეალურია იანვარ-თებერვალში ამ ომის დასრულება. როგორც კი ეს ყველაფერი მორჩება, ძალიან სწრაფად გადაიტვირთება ურთიერთობები. შეიცვლება ინტერესები და გადაიტვირთება ურთიერთობები. აქედან გამომდინარე, არის 2-3 თვე მოსაცდელი, თუმცა გადატვირთვის ნიშნები უფრო ადრეც გამოჩნდება, რაც შეეხება თვისობრივ გადატვირთვას, მგონია, რომ ეს ყველაფერი ინტენსიურად დაიწყება მომავალი წლის პირველი კვარტლიდან.

ჩვენ ვუსწრებთ კანდიდატ ქვეყნებს. თვითონვე აღიარეს, გამოაქვეყნეს შეფასება. მოლდოვას, ბოსნიას მნიშვნელოვნად ვუსწრებთ. რა შეეხება უკრაინას, უკრაინა რაღაცეებში, მაგალითად, ენერგეტიკის სფეროში გვისწრებს, გაუგებარია, რა იგულისხმება ამაში. ამ ომმა უკრაინას გაუნადგურა გენერაციის ზუსტად ნახევარი. რასაც გამოიმუშავებდა უკრაინის ელექტროენერგიის სისტემა, ზუსტად იმის ნახევარი გაუნადგურა ომმა. შეიძლება ტექნიკური მახასიათებლებით არის უფრო მეტად ახლოს ევროკავშირთან უკრაინა, მაგრამ რაც შეეხება ამ სფეროს, ზოგადად, სხვა სფეროებს, ცა და დედამიწაა ის მონაცემები, რაც ჩვენ გვაქვს და რაც აქვს სხვა კანდიდატ ქვეყნებს. რეალურად ყველამ ყველაფერი იცის, იქნება ეს დემოკრატია, ადამიანის უფლებები, არჩევნები. თქვენ ნახეთ, უმძიმესი არჩევნები ჩატარდა მოლდოვაში. უკრაინაში საერთოდ აღარ ტარდება არჩევნები, პარტიებს კრძალავენ ერთმანეთის მიყოლებით. დამოუკიდებელი ტელევიზიები საერთოდ არ დატოვეს. მოლდოვაში არის საზოგადოებრივი მაუწყებლის პირველი და მეორე არხი. პირდაპირ უწერია ოდირს ანგარიშში, რომ მთლიანად ხელისუფლების სასარგებლო პროპაგანდით იყო, მათ შორის საარჩევნოდ დაკავებული ეს ორი არხი. ანუ, აღარ არსებობს დამოუკიდებელი ტელევიზიები. დემოკრატიის კუთხით, მედიაპლურალიზმის კუთხით რა მდგომარეობაც გვქონდა ჩვენ 2012 წლამდე, დაახლოებით, იგივე ვითარებაა. დამოუკიდებელი ტელევიზია არ არის, მაგრამ იქ უკეთესი მედიაპლურალიზმია, პარტიებს კრძალავენ, მაგრამ იქ უკეთესი პოლიტიკური პლურალიზმია. ოპოზიციონერი არ დატოვეს პრაქტიკულად პარლამენტში, ისე წაიყვანეს პროცესები, მაგრამ იქ მეტია პოლიტიკური პლურალიზმი. არჩევნებზეც, იქ ნახეთ რა მოხდა, ათასი უბედურება და იქ კარგი არჩევნები ჩატარდა და ჩვენთან არ ვიცით, კარგი არჩევნები ჩატარდა თუ არა. ეს არის უსამართლო მიდგომა. იგივე ეხება ევროინტეგრაციის საკითხების შეფასებასაც. ყველა პარამეტრით ვართ ათი თავით მაღლა ყველა კანდიდატ ქვეყანაზე, მაგრამ ფორმალურად ნახევარი ნაბიჯით უკან ვართ ჩვენ მოლდოვაზე, უკრაინაზე, ბოსნიაზე და ა.შ. ეს არის უსამართლობაა თუმცა მომავალი წლიდან ურთიერთობები გადაიტვირთება და ვფიქრობ, რომ სამართლიანობაც სრულად აღდგება“, – განაცხადა პრემიერმა.

ჩვენ ვამტკიცებთ ერთ რამეს, უცხოური დაფინანსება საქართველოში გამოიყენება პოლიტიკური მიზნებისთვის, მათ შორის, ამ არჩევნებზე დაფიქსირდა უპრეცენდენტო გარე ჩარევა და მათ შორის, უცხოური ფულით გარე ჩარევა, – ამის შესახებ საქართველოს პრემიერ-მინისტრმა ირაკლი კობახიძემ გადაცემა იმედი LIVE”-ში განაცხადა.

ირაკლი კობახიძის თქმით, ერთადერთი სახალხო აქცია, რაც არ გამოუვიდათ, მაგრამ სცადეს ოპოზიციის ეგიდით, იყო დაფინანსებული NGO-ების მიერ.

„რაც შეეხება გამჭვირვალობას, აქაც გვჭირდება ჩვენ გარკვეული დასაბუთება. ახლა ემოციური ფონი აღარ არის, მაშინ ემოციურ ფონზე ადვილად მოატყუეს ადამიანები, განსაკუთრებით ახალგაზრდების ნაწილი. ახლა აღარ არის ეს ემოციური ფონი და კიდევ ერთხელ ვთავაზობ ყველას, ვიმსჯელოთ ამ საკითხთან დაკავშირებით. ჩვენ ვამტკიცებთ ერთ რამეს, უცხოური დაფინანსება საქართველოში გამოიყენება პოლიტიკური მიზნებისთვის, მათ შორის, ამ არჩევნებზე დაფიქსირდა უპრეცენდენტო გარე ჩარევა და მათ შორის, უცხოური ფულით გარე ჩარევა. ერთადერთი სახალხო აქცია, რაც არ გამოუვიდათ, მაგრამ სცადეს ოპოზიციის ეგიდით, იყო დაფინანსებული NGO-ების მიერ, მათი მიტანილი იყო სცენა, მათი ორგანიზებული იყო ყველაფერი. წარმოიდგინეთ, რომ უცხოური დაფინანსებით საქართველოში ჩატარდა ოპოზიციის წინასაარჩევნო აქცია არჩევნებამდე ექვსი დღით ადრე. ამაზე გვაქვს საუბარი, უნდა იყოს თუ არა ეს გამჭვირვალე, როდესაც პოლიტიკას აფინანსებენ გარედან, თან როდესაც რადიკალურ ოპოზიციურ ძალებს. სხვა საკითხებიც იყო, იყო უცხოური ფული, რომლის საშუალებითაც სტრატეგიული ეკონომიკური პროექტების დაბლოკვის მცდელობა იყო და არა მარტო მცდელობა, ზოგიერთ შემთხვევაში წარმატებითაც დაბლოკეს სტრატეგიული ეკონომიკური პროექტები. ეკლესიის წინააღმდეგ თავდასხმები, რაც ფინანსდება უცხოური ფულით და ა.შ. აღარ ჩამოვყვები ყველაფერს და ერთი მნიშვნელოვანი საკითხია კიდევ, ლიბერალური ფაშიზმი. თქვენ ხედავთ რა ხდება საზოგადოებაში, როგორ ცდილობენ ერთმანეთს დაუპირისპირონ საზოგადოების წარმომადგენლები, ქართველი დაუპირისპირონ ქართველს, ამ ქვეყნის მოქალაქე დაუპირისპირონ ამ ქვეყნის მოქალაქეს. არიან ადამიანები, რომლებიც არაფერს არ ერიდებიან, მათ შორის, არიან ადამიანები, რომლებსაც განსაკუთრებული დამსახურება აქვთ ამ ქვეყნის წინაშე და მათ მიმართაც შეიძლება, რომ აღვირახსნილი ბულინგის კამპანია დაიწყოს, ფეხბურთელი იქნება ეს, ოლიმპიური ჩემპიონი, მუსიკოსი, თუ სხვა კულტურის სფეროს წარმომადგენელი და ა.შ. პოლიტიკოსებზე აღარაფერია სასაუბრო.

კიდევ ერთხელ გავიხსენებ რობერტ ფიცოს 10-წუთიანი ვიდეოა, მას შემდეგ, რაც ის გადარჩა ტერორისტული აქტის შემდეგ, მან ჩაწერა 10-წუთიანი ვიდეო, სადაც აღწერს ამ ლიბერალური ფაშიზმის გამოვლინებებს სლოვაკეთში. ერთადერთი, რაც უნდა გააკეთო ამ 10-წუთიან ვიდეოში,  უნდა აიღო სიტყვა სლოვაკეთი და ჩასვა სიტყვა საქართველო, განსხვავებას ვერ იპოვით და რატომ, იქაც უცხოური დაფინანსებით ხდება ლიბერალური ფაშიზმის წახალისება, მხარდაჭერა და ზუსტად იგივე ხდება, სიძულვილის დათესვა საზოგადოებაში, რადიკალიზმის დათესვა საზოგადოებაში, პოლიტიკაში. არ შეიძლება ამაზე უცხოური ფული იხარჯებოდეს და თან ეს ყველაფერი იყოს ბუნდოვანი, გაუმჭვირვალე. ამაზე გვაქვს საუბარი. თუ გვთხოვენ ამ კანონის გაუქმებას, მაშინ შეეშვან სიძულვილის დათესვას ამ ქვეყანაში უცხოური დაფინანსებით, შეეშვან რადიკალიზმის დათესვას, ბულინგის წახალისებას ამ ფულით და რადიკალური ოპოზიციის პოლიტიკურ დაფინანსებას“, – განაცხადა პრემიერ-მინისტრმა.

ISFED-ს თავისივე ანგარიშით აქვს დადგენილი, რომ არავითარი სისტემური პრობლემა ამ არჩევნებს არ ჰქონია, თუმცა მათი განცხადებები არის განსხვავებული, იგივე ხდებოდა 2020 წელს და ეს არავის უკვირს, –  ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE”-ში განაცხადა.

როგორც მთავრობის მეთაურმა აღნიშნა, ISFED მთლიანობაში 1000 უბანს აკვირდებოდა და ანგარიშში უწერიათ, რომ მხოლოდ 100 უბანზე დაიწერა საჩივარი, რაოდენობა არის მიზერული, რაც მეტყველებს იმაზე, რომ მთლიანობაში არჩევნები გამართულად ჩატარდა.

„700 000-დან რაღაცა დაადგინეს 25, რაღაცა დაადგინეს 16, რაღაცა დაადგინეს ოთხი. ყველა ეს შემთხვევა აღიკვეთა, ყველაფერზე რეაგირება იყო. რაოდენობა არის მიზერული, რაც მეტყველებს იმაზე, რომ მთლიანობაში არჩევნები გამართულად ჩატარდა, რაც დადგინდა, ისიც აღკვეთილი იქნა. მთლიანობაში 1000 უბანზე აკვირდებოდნენ არჩევნებს და მხოლოდ 100 უბანზე უწერიათ დაიწერა საჩივარი ანუ 1000-დან 900 უბანზე საჩივარიც კი ვერ დაწერეს. საერთოდ საჩივარი არ დაწერილა ისეთი სახით წარიმართებოდა ეს ყველაფერი.

დანარჩენი რაც უწერიათ, ეს არის პირთა საეჭვო შეკრება. გარეთ მობილიზაციაზე იყო საუბარი. ამომრჩევლის მობილიზება, სავარაუდო კონტროლი. ამაზე ერთი რამ მინდა, გითხრათ – საინტერესო დეტალია. ჩვენ ტრენინგი ჩაგვიტარა IRI-მ, მაშინ ISFED-ის დღევანდელი ხელმძღვანელი IRI-ში მუშაობდა, სადაც ასწავლეს ჩვენებს ასეთი რაღაც – ყველა პარტიას უტარებდნენ ტრენინგებს საარჩევნო პროცესებთან დაკავშირებით და ასწავლიდნენ, როგორ უნდა მომხდარიყო ამომრჩევლის მობილიზება. ჩვენ სამი კარდაკარი ჩავატარეთ ამ საარჩევნო პროცესში, მათ ასწავლეს ჩვენებს, რომ უნდა ჩაეტარებინათ შვიდი კარდაკარი, ამ კარდაკარის დროს უნდა აეკრიფათ მონაცემები თითოეულ ამომრჩეველთან დაკავშირებით. 7-ჯერ უნდა მისულიყვნენ მათთან და არჩევნების დღეს უნდა ეზრუნათ ამომრჩევლის მობილიზება დილიდან. რომ არ გამოცხადდებოდნენ ერთხელ, მეორედ, მესამედ უნდა დაერეკათ, თუ არ მოვიდოდა, სახლში უნდა მიეკითხათ. ამას ასწავლიდა IRI ჩვენი პარტიის წევრებს, ისე, როგორც სხვა პარტიის წევრებს. რასაც ასწავლიდნენ ჩვენი პარტიის წევრებს, ეს ჩვეულებრივი ამბავია ყველა დემოკრატიულ ქვეყანაში, ასე ხდება ამომრჩევლის მობილიზება“, – განაცხადა ირაკლი კობახიძემ.

მისივე თქმით, სახელმძღვანელოებში წერია, რომ ამომრჩევლის მობილიზება არის პოლიტიკური პარტიის ერთ-ერთი საკვანძო ფუნქცია, ამას წერენ ახლა ხარვეზად.

„როცა ვერაფერს ვერ წერენ, საბოლოო ჯამში ამომრჩევლის მობილიზება არის ხარვეზი, რასაც ისინი ადგენენ, რაც არის აბსოლუტური გაუგებრობა. ბოლო თემა, რასაც შევეხებოდი ამ ანგარიშთან დაკავშირებით, ეს არის ამომრჩევლის მოსყიდვა. ასეთი რაღაც უწერიათ, რომ ამომრჩევლის უპრეცედენტო მასშტაბით მოსყიდვა მოხდა – ეს არის ციტატა დასაწყისში. ახლა რა არის ეს უპრეცედენტო მასშტაბის მოსყიდვა, როცა ჩავდივართ უკვე დეტალებში, რა დაადგინა ISFED-მა და როგორ ახდენს ამის განზოგადებას – სულ არის 10 შემთხვევა, რაც უწერია ანგარიშში. დაახლოებით რა შემთხვევებზეა საუბარი – გურჯაანის ოლქი, ერთ-ერთი უბანი – „სამართლიანი არჩევნების“ დამკვირვებლის მიერ გამოვლენილ იქნა ერთ-ერთი ამომრჩევლისთვის 50 ლარის ოდენობის თანხის გადაცემის შემთხვევა, ვინ გადასცა, ვის გადასცა და გადასცა თუ არა, კაცმა არ იცის. არის აბსტრაქტული რაღაც, თანაც წარმოიდგინეთ, სოფელია, ქალაქია, უბანია. ამოვარდა ასეთი შემთხვევები, როცა ეწერა და გადავამოწმეთ, რომ ცოლმა ქმარს მისცა ფული, ძმამ ძმას მისცა ფული, მეგობარმა მეგობარს, წარმოიდგინეთ რამხელა მასშტაბზეა საუბარი 700 000 ამომრჩეველი მონაწილეობს არჩევნებში და სადღაც გურჯაანში დაადგინეს, რომ ვიღაცამ ვიღაცას ფული მისცა, ვინ არიან ისიც არ იციან. ზუსტად იგივე შემთხვევა – სავარაუდოდ „ქართული ოცნების“ კოორდინატორმა, იყო თუ არა ჩვენი კოორდინატორი, ესეც არ იციან, კენჭისყრის ოთახიდან გამოსულ ამომრჩეველს 100 ლარის ოდენობის თანხა გადასცა. აქაც, ვინ გადასცა, ვის გადასცა, არაფერი უწერიათ. ყველგან არის ასეთი აბსტრაქცია. ვიღაცამ, ვიღაცას გადასცა ბენზინის ტალონი, რაღაც უბანზე ალვანში, სავარაუდოდ, ადგილი ჰქონდა ახმეტის მუნიციპალიტეტის მერის წარმომადგენლის მიერ ამომრჩევლისთვის თანხის გადაცემას. სულ არის 10 შემთხვევა. ისინი აკვირდებოდნენ 700 000 ამომრჩეველს და დაადგინეს 10 შემთხვევა, ოღონდ იქ რა ხდებოდა, თავად არ იციან. აქ ამომრჩევლის მოსყიდვა მოხდა თუ სხვა რამე მოხდა, არ იციან. თავში ამას აქვს სათაური ამომრჩევლის უპრეცედენტო მასშტაბის მოსყიდვა, მერე არის 10 შემთხვევაზე საუბარი  და ათივე არის სავარაუდო შემთხვევა, სადაც არავითარი მტკიცებულება არ არსებობს იმის, რომ სინამდვილეში რაიმე მოსყიდვა ხდებოდა.

საბოლოო ჯამში ISFED-ს თავისივე ანგარიშით აქვს დადგენილი ის, რომ არავითარი სისტემური პრობლემა ამ არჩევნებს არ ჰქონია, თუმცა მათი განცხადებები არის განსხვავებული, იგივე ხდებოდა 2020 წელს და ეს არავის უკვირს“, – განაცხადა პრემიერ-მინისტრმა.