საგარეო საქმეთა მინისტრის რანგში მაკა ბოჭორიშვილი 16 იანვარს აზერბაიჯანის რესპუბლიკას პირველი ოფიციალური ვიზიტით ეწვევა. ინფორმაციას საქართველოს საგარეო საქმეთა სამინისტრო ავრცელებს.

უწყების ცნობით, ვიზიტის ფარგლებში მაკა ბოჭორიშვილი შეხვედრას გამართავს აზერბაიჯანის რესპუბლიკის საგარეო საქმეთა მინისტრთან, ჯეიჰუნ ბაირამოვთან როგორც პირისპირ, ასევე გაფართოებულ ფორმატში. შეხვედრის შემდეგ გაიმართება ორი ქვეყნის საგარეო საქმეთა მინისტრების ერთობლივი პრესკონფერენცია.

მინისტრი ასევე გვირგვინით შეამკობს მარადიული ცეცხლის მემორიალს „შეჰიდების ხეივანში“ და პატივს მიაგებს დაღუპულთა ხსოვნას.

ჩვენ კვლავ სერიოზულად ვართ შეშფოთებული საქართველოს მთავრობის მოქმედებების გამო, – ამის შესახებ აშშ-ის სახელმწიფო დეპარტამენტის სპიკერმა, მეთიუ მილერმა განაცხადა.

მისი თქმით, აშშ-მა სწორედ ამიტომ დააწესა სანქციები, შეაჩერა დახმარება და სტრატეგიული ურთიერთობები.

„ჩვენ კვლავ სერიოზულად ვართ შეშფოთებული საქართველოს მთავრობის მოქმედებების გამო, როგორებიცაა საკუთარი მოსახლეობაზე ზეწოლა და იმ დემოკრატიული, ევროატლანტიკური ინტეგრაციის გზიდან გადახვევა, რომელზეც ისინი იყვნენ. სწორედ ამიტომ დავაწესეთ ახალი სანქციები საქართველოს მთავრობის წევრების წინააღმდეგ, შევაჩერეთ დახმარება, რომელიც საქართველოს მთავრობისთვის უნდა გაგვეწია და შევაჩერეთ მათთან ჩვენი სტრატეგიული ურთიერთობები“, – განაცხადა მილერმა.

ევროსაბჭოს საპარლამენტო ასამბლეის წარმომადგენელთა ვიზიტი საქართველოში გრძელდება. თანამომხსენებლები შეხვედრას, დღეს დილიდან, ოპოზიციის წარმომადგენლებთან გეგმავენ.

მმართველი გუნდის ოპონენტების განმარტებით, ისინი კლოდ კერნსა და ედიტ ესტრელას იმ დარღვევებზე მიაწოდებენ ინფორმაციას, რომლის გამოც ახალი არჩევნების დანიშვნას ითხოვენ.

“ეს არის ფაქტების შემსწავლელი, ძალიან მნიშვნელოვანი ჯგუფი. მივესალმები, რომ მათ “ქართული ოცნების” მანიპულაციები წინასწარ დაასრულეს. უკვე ყველა მიეჩვია “ქართული ოცნების” მანიპულაციურ ბუნებას – რომ ეს ყველაფერი ლეგიტიმაციასთან კავშირში არ არის. პრინციპში, ისინი ჩამოსულები არიან იმ დანაშაულებრივი ქმედებების შესასწავლად, რომელიც საქართველოში ბოლო პერიოდში ხდება. დარწმუნებული ვარ, ეს ანგარიშში აუცილებლად აისახება და ევროსაბჭოს ამაზე ძალიან მკაფიო პოზიცია ექნება” , – აცხადებს პლატფორმის “ერთიანობა – ნაციონალური მოძრაობის” ერთ-ერთი ლიდერი გიორგი ვაშაძე.

ირაკლი ფავლენიშვილის თქმით, შეხვედრაზე განხილვის უმთავრესი თემა კრიზისის განმუხტვა იქნება.

“ამ შეხვედრაზე, ისევე, როგორც ყველა მნიშვნელოვან შეხვედრაზე, ჩვენს საერთაშორისო პარტნიორებთან არის ერთადერთი მნიშვნელოვანი საკითხი, რომელიც მერე იშლება სხვადასხვა საკითხად – კრიზისის განმუხტვა, რაც გადის ამ რეჟიმის დემონტაჟზე. ადამიანები, რომლებიც ქვეყანაში დიქტატურას ამყარებენ და ყოველდღიურად ჩადიან დანაშაულებს, შეუძლებელია, მათ პირობებში თავისუფალ არჩევნებს ველოდოთ. ამ სისტემის დემონტაჟი უნდა მოხდეს, შემდგომში – პოლიტიკური პატიმრების გათავისუფლება და თავისუფალი არჩევნების ჩატარება, რაც არის ჩვენი დღის წესრიგი და სწორედ ამ საკითხებს დავაყენებთ ჩვენს პარტნიორებთან”, – აღნიშნავს პარტია “ერთიანობა – ნაციონალური მოძრაობის” გენერალური მდივნის მოადგილე ირაკლი ფავლენიშვილი.

მონიტორინგის ჯგუფი საქართველოში ოფიციალურად იმ ვალდებულებების შესრულების შესამოწმებლად ჩამოვიდა, რომელიც ქვეყანას ევროსაბჭოს წინაშე აქვს აღებული, თუმცა, ქვეყანაში შექმნილი ვითარების გამო, შეხვედრებისას საუბარი სხვა მნიშვნელოვან თემებსაც ეხება.

მოკლედ, რისი თქმა მინდა დღეს საღამოს: საქართველო იყო, არის და რჩება მსოფლიო მნიშვნელობის სულიერების ცენტრად. დღეს დედოფლის-წყაროში (სოფ. სამრეკლოში) წმ. სერაფიმ საროველის დედათა მონასტერში ჩასვლა ამაში კიდევ ერთხელ დაგარწმუნებდათ, – წერს„ხალხის ძალის“ წევრი დავით ქართველიშვილი სოციალურ ქსელში.

მისი თქმით, შეცდომებს თუკი აღარ დავუშვებთ, გაისად პატრიარქის ანგელოზის დღეს (2 აგვისტოს) სოხუმის საკათედრო ტაძარში ჩავატარებთ.

„სოხუმელ მეუფე გრიგოლთან (კაცია) ერთად კიდევ ერთხელ დავრწმუნდით, რომ შეცდომებს თუკი აღარ დავუშვებთ, გაისად პატრიარქის ანგელოზის დღეს (2 აგვისტოს) სოხუმის საკათედრო ტაძარში ჩავატარებთ. არ (!) ვიზიარებ მათ მწუხარებას, ვისაც მოვლენათა ეს განვითარება აგენტოკრატების დავალებებს ეწინააღმდეგება.

საქართველოს სადღეგრძელოს ქიზიყური ფორმულა – „შავი მთიდან – შავ ზღვამდე” – ახალ შინაარსს იძენს. დადგება დრო, როდესაც სოხუმში იმავე სადღეგრძელოს მცირედი პერიფრაზირებით ვიტყვით: „საქართველოს გაუმარჯოს – შავი ზღვიდან შავ მთამდე”. მოთმინება! და არა სულსწრაფობა! ყველაფერი თავისი გეგმით მიმდინარეობს…“, – წერს დავით ქართველიშვილი.

ირაკლი კობახიძე – ევროპის საბჭოს მონიტორინგის ჯგუფის წევრებს მივაწვდით ინფორმაციას, თუ როგორ ცდილობს რადიკალური ოპოზიცია განახორციელოს სახელმწიფო სისტემის საბოტაჟი, ეს არის აბსოლუტურად უსუსური მცდელობა

ევროპის საბჭოს მონიტორინგის ჯგუფის წევრებს მივაწვდით ინფორმაციას იმასთან დაკავშირებით, თუ როგორ ცდილობს რადიკალური ოპოზიცია განახორციელოს სახელმწიფო სისტემის საბოტაჟი, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა. 

როგორც მთავრობის მეთაურმა აღნიშნა, შეხვედრაზე საუბარი შედგება ყველა თემაზე. 

„ევროპის საბჭოს მონიტორებთან ჩვენ ყველა თემაზე გვექნება საუბარი, შევეხებით აბსოლუტურად ყველა საკითხს, მათ შორის მივაწვდით ინფორმაციას იმასთან დაკავშირებით, თუ როგორ ცდილობს რადიკალური ოპოზიცია განახორციელოს სახელმწიფო სისტემის საბოტაჟი. ეს არის აბსოლუტურად უსუსური მცდელობა, თუმცა ყველა შემთხვევაში ეს ინფორმაცია უნდა ჰქონდეთ მონიტორინგის ჯგუფის წევრებს”, – განაცხადა ირაკლი კობახიძემ.