პარლამენტის ფრაქცია „ქართული ოცნების“ თავმჯდომარის პირველი მოადგილე ირაკლი კირცხალია ჩორჩანას საგუშაგოს დადგმის საკითხთან დაკავშირებით საგამოძიებო კომისიაზე გიორგი გახარიას ხელმეორედ დაბარების საკითხს გამოეხმაურა.

„ჩორჩანას საგუშაგოს გარდა, ჩვენი ხელისუფლების პერიოდში, კიდევ ორი საგუშაგო გაკეთდა, მაგრამ ამას არ გამოუწვევია 1 მილიონი კვ.მ ტერიტორიის დაკარგვა და იმხელა სკანდალი – გორსა და საჩხერეში. არ გამოუწვევია არც ის სკანდალი და არც ესკალაციის უდიდესი საფრთხე. ეს არის ყველაზე მთავარი. ახლა სამართლებრივ შეფასებას, მოდით, გენპროკურატურისგან დაველოდოთ“, – განაცხადა კირცხალიამ.

პარლამენტის დროებითი საგამოძიებო კომისიის სხდომაზე გიორგი გახარიას კიდევ ერთხელ იბარებენ.

საქართველოში აშშ-ის საელჩო უფროსი მრჩევლის უაით ტოლკესა და საქართველოს საგარეო საქმეთა მინისტრ მაკა ბოჭორიშვილისშეხვედრასთან დაკავშირებით განცხადებას ავრცელებს.

აშშ-ის საელჩო აღნიშნავს, რომ შეხვედრა აშშ-საქართველოს ურთიერთობების განხილვის მიზნით შედგა.

ამასთან, განცხადებაში აღინიშნება, რომ ამერიკის შეერთებული შტატები ამერიკის ინტერესების განვითარების მიზნით, საქართველოსთან მისი მიდგომის გადახედვას აგრძელებს.

„დღეს, ელჩი დანიგანი და უფროსი მრჩეველი ტოლკე აშშ-საქართველოს ურთიერთობების განხილვის მიზნით საგარეო საქმეთა მინისტრ ბოჭორიშვილს შეხვდნენ. ამერიკის შეერთებული შტატები ამერიკის ინტერესების განვითარების მიზნით, საქართველოსთან მისი მიდგომის გადახედვას აგრძელებს. ამერიკის შეერთებულმა შტატებმა ნათლად განაცხადა, თუ რა ნაბიჯების გადადგმა შეუძლია საქართველოს მთავრობას იმის საჩვენებლად, რომ ის ამერიკის შეერთებულ შტატებთან ურთიერთობების გაუმჯობესების მიმართ სერიოზულად არის განწყობილი“, – ნათქვამია განცხადებაში.

კეთილი უნდა ინებოს ამ ადამიანმა და საზოგადოებას აუხსნას, რისგან იყო ეს ყველაფერი [ჩორჩანას საგუშაგოს ჩადგმა] ინსპირირებული. ისე კი არა, როგორც საგამოძიებო კომისიის წინა სხდომაზე ვიხილეთ, როდესაც ყველანაირად ცდილობდა, კითხვებს გაქცეოდა, – განაცხადა გადაცემაში „დღის ქრონიკა“ იურიდიულ საკითხთა საპარლამენტო კომიტეტის თავმჯდომარემ არჩილ გორდულაძემ გიორგი გახარიას პარლამენტის საგამოძიებო კომისიაზე ხელმეორედ დაბარებასთან დაკავშირებით.

გორდულაძის თქმით, 2008 წლის შემდეგ მილიონი კვადრატული მეტრის ტერიტორიების დაკარგვა პირდაპირ გიორგი გახარიას პასუხისმგებლობაა, რადგან მან საგუშაგოს ჩადგმა არავისთან შეათანხმა, ეს საკითხი სახელმწიფო დონეზე არ გადაწყვეტილა. 

„გახარიამ საგამოძიებო კომისიაზე წარდგენის დროს ილაპარაკა ყველაფერი და არაფერი. რამდენიმე წუთის განმავლობაში ერთმანეთის აბსოლუტურად საპირისპირო განცხადებებს აკეთებდა, მათ შორის ჩორჩანასთან დაკავშირებით. თქვა, რომ ჩორჩანაში საგუშაგო პირადად მისი ინიციატივით დაიდგა და არ იყო შეთანხმებული არცერთ რელევანტურ სამსახურთან, არც პარტნიორ ორგანიზაციებთან და ამას არ მოჰყოლია თურმე ტერიტორიების დაკარგვა. 2008 წლის შემდეგ ტერიტორიების დაკარგვის პირველი ფაქტი იყო და საუბარია მილიონ კვადრატულ მეტრზე. გახარია ამბობს, რომ მსგავსი რამ არ მომხდარა მაშინ, როდესაც მოვისმინეთ ჩორჩანას მცხოვრების განცხადებები, რომელმაც გახარია ტყუილში ამხილა.

ბატონი ალექსანდრე ტაბატაძის განცხადებაც გავრცელდა დღეს, სადაც ის ამბობს, რომ ჩორჩანას გარდა, კიდევ ორი საგუშაგოა დადგმული 2008 წლის შემდეგ, რომელთან დაკავშირებითაც არავითარი კითხვის ნიშანი არ არსებობს, რადგან შეთანხმებული იყო პარტნიორ ქვეყნებსა და ორგანიზაციებთან და ამას არ მოჰყოლია ტერიტორიების დაკარგვა. მილიონი კვადრატული მეტრის ტერიტორიების დაკარგვა პირდაპირ გიორგი გახარიას პასუხისმგებლობაა, რადგან არავისთან იკითხა, არავისთან შეათანხმა, სახელმწიფო დონეზე არ გადამწყდარა საკითხი და პირადი ინიციატივით მოხდა. კეთილი უნდა ინებოს ამ ადამიანმა და საზოგადოებას აუხსნას, რისგან იყო ეს ყველაფერი [ჩორჩანას საგუშაგოს ჩადგმა] ინსპირირებული. ისე კი არა, როგორც საგამოძიებო კომისიის წინა სხდომაზე ვიხილეთ, როდესაც ყველანაირად ცდილობდა, როგორმე კითხვებს გაქცეოდა და პასუხისგან თავი აერიდებინა. იმავდროულად, როდესაც ნებისმიერი კითხვის დროს იმ კონკრეტული კითხვისგან გამოძრომას და პასუხისგან თავის არიდებას ცდილობდა, მაგრამ არაფრად არ დაგიდევდათ, თუ მანამდე, რამდენიმე წუთის წინ ამ ყველაფრის აბსოლუტურად საწინააღმდეგო განცხადება ჰქონდა გაკეთებული. თავისივე მონაყოლში, თავისივე ტყუილებში არის აბნეული ეს ადამიანი“, – აღნიშნა გორდულაძემ.

პარლამენტის დროებითი საგამოძიებო კომისიის სხდომაზე, სადაც 2009 წლის 15 ივნისის მშვიდობიანი აქციის დარბევისას ადამიანის უფლებების შელახვის ფაქტები განიხილება, ყოფილმა პოლიტპატიმარმა მერაბ ჭიქაშვილმა ისაუბრა და იმჟამინდელი თბილისის საპატრულო პოლიციის ყოფილი უფროსის, გიორგი გეგეჭკორის მიერ მისი დაკავებისა და ცემის ფაქტი გაიხსენა.

როგორც მან აღნიშნა, მის თვალწინ სცემეს ჟურნალისტი გოგონა და შემდეგ ის პოლიციელი, რომელმაც ეს ჟურნალისტი დაიცვა.

„მე ვუთხარი, თავში არ დამარტყა, ტრავმა მაქვს თავში. მოდიან ადამიანები ნიღბებით და ჩემ თავს აძლევს და ეუბნება, შეათრიეთ სააპელაციოს ეზოში და თავში არ დაარტყათ ბიჭო. რომ შემიყვანეს სააპელაციოს ეზოში, ბორდიურზე უკვე რამდენიმე ადამიანი იყო, სცემდნენ და იქით წაიყვანეო და ამ წაყვანა-წაყვანაში რიგითობით პირველი დამსვეს, ამათ მომაშორეს და ამ ნიღბიანებმა, რომ მეგონა, რომ თავში არ დამარტყამენ, ხუთივემ წიხლებით დამიწყო ცემა და პირიქით თავში უფრო მირტყამდნენ.

მირტყამენ, ვითიშები, აზრზე მოვდივარ, გვერდზე ჩემ მეგობრებს ვხედავ და ვცდილობ, რომ ესენი არ ჩაერთონ, იმიტომ, რომ წამოდგა ერთი ბიჭი დასახმარებლად, სასულიერო პირია დღეს და ისიც სცემეს და მინდოდა ეს არ მომხდარიყო, იმიტომ, რომ მქონდა და მაქვს ეს პასუხისმგებლობა, იმიტომ, რომ პატარები იყვნენ, ახალგაზრდა ბავშვები იყვნენ იქ როგორია რომ უყურებ როგორ სცემენ შენ თვალწინ გამეტებით ჟურნალისტ გოგონას, რომელიც იციან რომ ჟურნალისტია და შემდეგ ამ ჟურნალისტ გოგონას ვინც გადაეფარა პოლიციელი, რომ შეიყვანა ე.წ. ჯიხურში, როგორც სცემეს ის პოლიციელი, რომ ბიჭო რას აკეთებ შენ?! რას აკეთებ შენ, დაიცავი გოგო ?! და ეს გოგონა არის ანა გოჩაშვილი, რომელსაც მადლობა მინდა ვუთხრა, რომ მაშინ იყო ჩვენთან ერთად და მაშინ აშუქებდა“, – განაცხადა მერაბ ჭიქაშვილმა.