გიორგი გახარიამ დაადასტურა, რომ ბათუმში, სასტუმროში კონფლიქტი მისი დაწყებულია; დაადასტურა, რომ თავს დაესხა სასტუმროში კონკრეტულ პირს, რასაც, შესაბამისად, პასუხი მოჰყვა, – ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.

მათიკაშვილის თქმით, ის ცრუ ნარატივი, რომელსაც ავრცელებდნენ რადიკალი ოპოზიციონერები, თითქოს გიორგი გახარიას თავს დაესხნენ, ტყუილია.

„ცხადია, რომ ძალადობა მიუღებელია, თუმცა მაშინ, როდესაც ძალადობის ავტორი შენ ხარ, ბუნებრივია, ის მოლოდინი, რომ ამ ძალადობას პასუხი მოჰყვება, უნდა გქონდეს. შესაბამისად, ის ნარატივი, რომელსაც დღემდე ავრცელებდნენ რადიკალი ოპოზიციონერები, თითქოს გიორგი გახარიას თავს დაესხნენ და მის მიმართ განახორციელდა ძალადობა ყოველგვარი პროვოცირების გარეშე, ტყუილია. ეს თავად გახარიამაც პირდაპირ დაადასტურა“, – განაცხადა დავით მათიკაშვილმა.

პარტიის „გახარია საქართველოსთვის“ ლიდერმა, გიორგი გახარიამ დღეს ბრიფინგზე განაცხადა: „მე მქონდა რეაქცია ორგანიზებულ თავდასხმაზე, რომელიც მიმდინარეობდა სხვადასხვა ფორმით, სიტყვიერად და ასე შემდეგ, რეაქცია იყო ქაღალდის ჭიქით ყავის შესხმა, დიახ, მე ეს გავაკეთე“.

ამერიკის პრეზიდენტი, დონალდ ტრამპი ამბობს, რომ ევროკავშირი უსამართლოდ ექცევა ამერიკას. ჩვენ რაღა უნდა ვთქვათ მაშინ – ჩვენ, საქართველომ, ქართველებმა რაღა უნდა ვთქვათ?! – ამის შესახებ „ქართული ოცნების“ გენერალურმა მდივანმა, კახა კალაძემ ჟურნალისტებს განუცხადა.

მისივე თქმით, ევროკავშირი საქართველოს, ქართველებს უსამართლოდ ექცევა.

„ამერიკის პრეზიდენტი ამბობს, რომ ევროკავშირი უსამართლოდ ექცევა ამერიკას. ჩვენ რაღა უნდა ვთქვათ მაშინ – ჩვენ საქართველომ, ქართველებმა რაღა უნდა ვთქვათ?! ამერიკის პრეზიდენტი, დონალდ ტრამპი გამოდის და ევროპას ეუბნება, რომ ისინი უსამართლოდ ექცევიან ამერიკას და ამერიკელებს. რა თქმა უნდა, ჩვენც უსამართლოდ გვექცევიან. ეს ჩანს მათ გადაწყვეტილებებში და განცხადებებში. დარწმუნებული ვარ, რომ ბევრი რამე შეიცვლება ევროკავშირშიც და იმ ბიუროკრატიაშიც, რომელიც დღეს ევროკავშირის ხელმძღვანელობის სახით არის წარმოდგენილი“, – განაცხადა კალაძემ.

გარდა ამისა, კალაძემ ჟურნალისტებთან აშშ-ს ახალი ადმინისტრაციის პირობებში საქართველო-აშშ-ს ურთიერთობებზეც ისაუბრა. როგორც კალაძემ განმარტა, მას ძალიან დიდი იმედი აქვს, რომ „ახალი ადმინისტრაცია, რომელიც რამდენიმე დღეა შეუდგა მუშაობას, საქართველოსთან მიმართებით სამართლიანები იქნებიან“.

„რა თქმა უნდა, არავის სიამოვნებს ის ვითარება, ურთიერთობები, რაც წინა ადმინისტრაციასთან იყო. ესეც რა თქმა უნდა, დაფუძნებული სიცრუეზე, ტყუილზე. გვინდა, რომ გადაიტვირთოს აღნიშნული ურთიერთობები და გავაგრძელოთ მეგობრული, პარტნიორული ურთიერთობა, ეს არის ჩვენი დამოკიდებულება“, – აღნიშნა კალაძემ.

მე მქონდა რეაქცია ორგანიზებულ თავდასხმაზე, რომელიც მიმდინარეობდა სხვადასხვა ფორმით, სიტყვიერად და ასე შემდეგ, რეაქცია იყო ქაღალდის ჭიქით ყავის შესხმა, დიახ, მე ეს გავაკეთე, – ამის შესახებ „გახარია საქართველოსთვის“ ლიდერმა, გიორგი გახარიამ ბრიფინგზე განაცხადა.

გახარიას თქმით, „მისი დაშინების ან განეიტრალების ეს სასაცილო მცდელობა პასუხს მიიღებს“.

„ბათუმში ვიყავი ჩვენი პარტიის წევრების სასამართლო პროცესზე. სასტუმრო „შერატონში“ რომ დავბრუნდი, შესასვლელშივე დამხვდა ადამიანთა რამდენიმე ჯგუფი. შესული არ ვიყავი, უკვე ილანძღებოდნენ, იგინებოდნენ და, ფაქტობრივად, ახორციელებდნენ თავდასხმას. ეს იყო ჯგუფურად ორგანიზებული, რასაც მოჰყვა ჩემი შესაბამისი რეაგირება. ამავე დროს, იქვე ჩანდა, რომ ერთი ადამიანი ამ ყველაფერს ტელეფონით იღებდა. სასტუმროს ლობი დაცლილი იყო საერთოდ ადამიანებისგან, მათ შორის სასტუმროს სტაფისგან. მას შემდეგ, რაც სასტუმროში შევედი და რეაქცია მოვახდინე, უკვე აშკარა იყო, რომ ეს ადამიანები რაღაც უხერხულად მოძრაობდნენ და ყველანაირად ცდილობდნენ, შემემჩნია, რომ ისინი იყვნენ შეიარაღებული. მას შემდეგ, რაც მოვახდინე რეაქცია და, მე ამას არ უარვყოფ, ქაღალდის ჭიქით, დარჩენილი ყავით გავუმასპინძლდი, ისინი ჯგუფურად თავს დამესხნენ.

როგორც ექიმებმა მითხრეს, მე გონება დავკარგე. ამ ყველაფრის მოყოლა იმიტომ მიწევს, რომ დღეს როგორც მიდის გამოძიება, როგორც იქცევა ზოგიერთი პროპაგანდისტული ტელევიზია, ფაქტია, ისინი არ აპირებენ სამართლიანად გამოძიებას. ამაზე მიგვითითებს ის, რომ ეს ყველაფერი იყო წინასწარ ორგანიზებული. რასაც იღებდნენ ტელეფონით, აღმოჩნდა ერთი კონკრეტული ტელევიზიის განკარგულებაში. ამასთან, ფაქტია, რომ გაქრა კამერები, კამერის ანაბეჭდები, რა იყო ამ კამერებზე ასახული. უზარმაზარი ზეწოლა ხორციელდებოდა „შერატონსა“ და მის მენეჯმენტზე, რომ ეს კამერები გამქრალიყო. მიუხედავად ამ ყველაფრისა, ჩვენ გვაქვს შექმნილი სპეციალური ჯგუფი, რომელიც დეტალურად დაადგენს ყველაფერს – ვინ მონაწილეობდა, როგორ იყო ეს ორგანიზებული, ვის მიერ იყო დაგეგმილი.

მიუხედავად ამ ყველაფრისა, ჩემი დაშინების ან განეიტრალების ეს სასაცილო მცდელობა მიიღებს შემდეგ პასუხს, რომ მე საქართველოს თითოეულ მოქალაქეს ვპირდები – ძალადობისა და ბოროტების წინააღმდეგ ბრძოლაში ვიქნები წინა ხაზზე და ყველაფერს გავაკეთებ, რომ გავიმარჯვოთ. იმის შემდგომ, რაც ბიძინა ივანიშვილმა დაკარგა როგორც რეპუტაცია, ასევე ქართველი ხალხის ის მცირე ნდობა, რომელიც დარჩენილი ჰქონდა, ყველაფერს გავაკეთებ, რათა მან დაკარგოს მისთვის ყველაზე ძვირფასი – ფული და ძალაუფლება. ეს არის ჩემი დაპირება საქართველოს თითოეული მოქალაქის მიმართ და გჯეროდეთ, რომ ამ დაპირებას აუცილებლად შევასრულებ“, – განაცხადა გახარიამ.

ამასთან, კითხვაზე, – „უშუალოდ ფიზიკური დაპირისპირება თქვენ დაიწყეთ პირველად თუ დიტო სამხარაძემ“, – გიორგი გახარიამ აღნიშნა:

„მე მქონდა რეაქცია იმ ორგანიზებულ თავდასხმაზე, რომელიც სხვადასხვა ფორმით მიმდინარეობდა – სიტყვიერად და ასე შემდეგ. ეს რეაქცია გამოიხატებოდა ქაღალდის ჭიქით ყავის შესხმით. დიახ, ეს მე გავაკეთე, რასაც ჰქვია ყავის შესხმა და ქაღალდის ჭიქის ტყორცნა“, – განაცხადა გახარიამ.

ცნობისთვის, პარტია „გახარია საქართველოსთვის“ ლიდერი გიორგი გახარია 22 იანვარს თბილისის პროკურატურაში გამოკითხვაზე იმყოფებოდა.

15 იანვარს ბათუმში, „შერატონ ბათუმში“ მომხდარ ფაქტზე შინაგან საქმეთა სამინისტრომ გამოძიება სისხლის სამართლის კოდექსის 126-ე მუხლით 15 იანვარს დაიწყო, რაც ძალადობას გულისხმობს.

ჩვენ ვრჩებით იმ ვალდებულებების ერთგული, რომლებიც დაკავშირებულია საქართველოს ევროინტეგრაციასთან, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

როგორც მთავრობის მეთაურმა აღნიშნა, მიუხედავად იმისა, რომ ურთიერთობებში არის სირთულეები, საქართველო განაგრძობს თანამშრომლობას ევროკავშირთან.

„მიუხედავად იმისა, რომ არის სირთულეები ურთიერთობებში, ჩვენ განვაგრძობთ თანამშრომლობას ევროკავშირთან და ამის მორიგი გამოხატულებაა ის, რომ ჩვენ ყველა ვალდებულებას ვასრულებთ და, მათ შორის, ჩვენი ერთ-ერთი ვალდებულება გახლდათ შესაბამისი დოკუმენტის წარდგენა ევროკომისიისთვის. ეს არის ეკონომიკური რეფორმების გეგმა, ეს მოიცავს სამ წელიწადს – 2025-2026-2027 წლებისთვის არის გაწერილი ეს გეგმა, აქ საუბარია მაკროეკონომიკურ, ფისკალურ საკითხებზე. ყველაფერთან დაკავშირებით ჩვენი მკაფიო ხედვა წარვუდგინეთ ევროკომისიას. ჩვენ, ბუნებრივია, ვრჩებით იმ ვალდებულებების ერთგული, რომლებიც დაკავშირებულია საქართველოს ევროინტეგრაციასთან“, – განაცხადა ირაკლი კობახიძემ.

არჩევნები ჩატარდება საქართველოში 2028 წლის ოქტომბერში. ყველას ვურჩევ, მოემზადოს 2028 წლის ოქტომბრის არჩევნებისთვის, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს ზესტაფონში განუცხადა.

პრემიერის თქმით, მანამდე მიმდინარე წლის ოქტომბერში ჩატარდება თვითმმართველობის არჩევნები და რადიკალურ ოპოზიციას შეუძლია, აქაც სცადოს ბედი.

„თქვენ იცით, რაც არის ოპოზიციის მოთხოვნები, პირველ რიგში, ეს არის რიგგარეშე არჩევნები. მე მინდა, ყველას  შევახსენო, რომ არჩევნები ჩატარდება საქართველოში 2028 წლის ოქტომბერში. ყველას ვურჩევ, მოემზადოს 2028 წლის ოქტომბრის არჩევნებისთვის. მანამდე, ამ წლის ოქტომბერში ჩატარდება თვითმმართველობის არჩევნები, შეუძლიათ, იქაც სცადონ ბედი. ეს არის ჩემი რჩევა რადიკალური ოპოზიციის მიმართ“, – განაცხადა პრემიერმა.

ეს იყო დამანგრეველი ომი, რომლის თავიდან აცილება შეიძლებოდა უკრაინაში, თუმცა, არაერთმა სუბიექტმა ყველაფერი გააკეთა იმისათვის, რომ განხორციელებულიყო რუსეთის სამხედრო აგრესია უკრაინაში, – განუცხადა საქართველოს პრემიერ-მინისტრმა ირაკლი კობახიძემ ჟურნალისტებს ზესტაფონში.

პრემიერის თქმით, თავისუფლად შეიძლებოდა 2008 წლის და ასევე უკრაინის ომის თავიდან აცილება, თუმცა, კონკრეტულმა ძალებმა ყველაფერი გააკეთეს იმისათვის, რომ უკრაინაში ომი მომხდარიყო.

„იმაზე, რომ უკრაინაში ომის თავიდან აცილება შეიძლებოდა, ჩვენ ვსაუბრობთ უკვე ძალიან დიდი ხანია. თუმცა, სამწუხაროდ, მოხდა ის, რაც მოხდა და ამან მოუტანა დამანგრეველი შედეგები ჩვენს მეგობარ ქვეყანას, უკრაინას. რა თქმა უნდა, ნებისმიერი ომის თავიდან აცილება შეიძლება. შეიძლებოდა თავისუფლად 2008 წლის ომის თავიდან აცილება, შეიძლებოდა უკრაინაში ომის თავიდან აცილება, თუმცა, კონკრეტულმა ძალებმა ე.წ Deep State-მა, გლობალური ომის პარტიამ, ყველაფერი გააკეთა იმისათვის, რომ უკრაინაში მომხდარიყო ომი. ეს იყო დამანგრეველი ომი, რომლის თავიდან აცილება შეიძლებოდა უკრაინაში, თუმცა, არაერთმა სუბიექტმა ყველაფერი გააკეთა იმისათვის, რომ განხორციელებულიყო რუსეთის სამხედრო აგრესია უკრაინაში“, – განაცხადა პრემიერმა.