ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „დონალდ ტრამპმა შეიძლება ამალ კლუნს აშშ-ში შესვლა და ყოფნა აუკრძალოს“ (ავტორი – ბედიქტ სმიტი). პუბლიკაცია ეხება ცნობილი მსახიობის ჯორჯ კლუნის მეუღლეს – ადვოკატს, რომელმაც თავის დროზე მხარი დაუჭირა ისრაელის პრემიერ-მინისტრს ბენიამინ ნეთანიაჰუს დაპატიმრებას.

გთავაზობთ სტატიას შემოკლებით:

ამალ კლუნი, ლიბანური წარმომავლობის ბრიტანეთის მოქალაქე, ადვოკატი ადამიანის უფლებების დაცვის საკითხებში, რომელიც ცნობილი ამერიკელი მსახიობის ჯორჯ კლუნის ცოლი გახლავთ, შესაძლოა აშშ-ის პრეზიდენტის მხრიდან სანქციის მსხვერპლი გახდეს – მას შემდეგ, რაც კომისიამ, რომლის სხდომაშიც ამალ კლუნი მონაწილეობდა, რეკომენდაცია გასცა ისრაელის პრემიერ-მინისტრის ბენიამინ ნეთანიაჰუს დაპატიმრების თაობაზე, ღაზას სექტორში ჩადენილი სამხედრო დანაშაულებების გამო.

ადვოკატები, რომლებიც სისხლის სამართლის საერთაშორისო სასამართლოს მიერ  გადაწყვეტილების მიღებაში მონაწილეობდნენ, მათ შორის ბარონესა კენედი და ლორდი ადრიან ფულფორდი, ბრიტანეთის საგარეო საქმეთა სამინისტრომ გააფრთხილა, რომ შესაძლოა მათ აშშ-ში შესვლა აეკრძალოთ, – წერს გაზეთი „ფაინენშელ თაიმსი“.

ამჟამად ზუსტად ცნობილი არ არის, რომ აკრძალვა გავრცელდება თუ არა ადვოკატ ამალ კლუნზეც, მაგრამ ფაქტია, რომ იგი იყო იმ კომისიის წევრი, რომელმაც რეკომენდაცია მისცა პროკურორ ქარიმ ხანს ბენიამინ ნეთანიაჰუსა და ისრაელის თავდაცვის მაშინდელი მინისტრის იოავა გალანტის დასაპატიმრებლად.

როგორც ცნობილია, დონალდ ტრამპმა გამოიყენა თავისი უფლებამოსილება და აშშ-ში შესვლა აუკრძალა თვითონ პროკურორ ქარიმ ხანს და მის ოჯახის წევრებს, ყარადაღა დაადო მის ამერიკულ აქტივებს და გააფრთხილა, რომ კიდევ უფრო მეტ მკაცრ ზომებს მიიღებდა სასამართლოს თანამშრომლების მიმართ, რომელთა უკანონო და უსაფუძვლო მოქმედება მიმართულია აშშ-სა და მისი ახლო მეგობრის ისრაელის პრემიერ-მინისტრის წინააღმდეგ“.

დონალდ ტრამპის განკარგულება მოიცავს აღნიშნული გადაწყვეტილების მიმღები და რეკომენდაციის მიმცემი პირებისათვის აშშ-ში არსებული ქონების გაყინვას და ქვეყნის ტერიტორიაზე შესვლის აკრძალვას.

ამბობენ, რომ კლუნების ოჯახი ძირითადად საფრანგეთში ცხოვრობს, მათ აქვთ სახლები დიდ ბრიტანეთსა და იტალიაში, თუმცა ამჟამად ისინი ნიუ-იორკში იმყოფებიან, სადაც მისტერ კლუნი მთავარ როლს ასრულებს ბროდვეის შოუში „ღამე მშვიდობისა და წარმატებები“.

დონალდ ტრამპის განკარგულების აღსასრულებლად 60-დღიანი ვადაა განსაზღვრული, რომელიც მალე დასრულდება, ანუ სანქციის გადაწყვეტილების მიღების დრო ახლოვდება. 

როგორც ამალ კლუნმა დაწერა „კლუნის სამართლიანობის ფონდის“ ვებ-საიტზე, იგი მართლაც მონაწილეობდა კომისიის სხდომაში და მართლაც მოაწერა ხელი რეკომენდაციას იმ პირების დაპატიმრების თაობაზე, რომლებმაც ღაზას სექტორში ადამიანის სიცოცხლის წინააღმდეგ მიმართული ქმედებები და სხვა დანაშაულობები ჩაიდინეს. „ომის დროს სამოქალაქო მოსახლეობის დაცვის კანონი (კონვენცია) 100 წლის წინათ იქნა მიღებული და მსოფლიოს ყველა ქვეყანაში მოქმედებს, კონფლიქტის მიზეზების მიუხედავად. მე მჯერა, რომ კანონის უზენაესობა და მისი მოთხოვნები უნდა აღსრულდეს“.

სისხლის სამართლის საერთაშორისო სასამართლომ ასევე მიიღო ტერორისტული ორგანიზაციის „ჰამასის“ სამი ლიდერის დაპატიმრების ორდერიც, თუმცა ისინი მოკლულები იქნენ ისრაელის არმიის ჯარისკაცების მიერ.

ჯორჯ კლუნი აშშ-ის დემოკრატიული პარტიის დიდი ხნის მხარდამჭერია. მან მნიშვნელოვანი როლი შეასრულა შარშან საპრეზიდენტო კამპანიის დროს, აქტიურად ეხმარებოდა იმდროინდელ პრეზიდენტს ჯო ბაიდენს ფულის შეგროვებაში, თუმცა საბოლოოდ, როცა დარწმუნდა, რომ ჯო ბაიდენს პრეზიდენტად არჩევის შანსები აღარ ჰქონდა, ჯორჯ კლუნმა მას კამპანიის შეწყვეტისაკენ მოუწოდა.

მარტში პროგრამა „60 წუთისათვის“ მიცემულ ინტერვიუში ჯორჯ კლუნმა დონალდ ტრამპი გააკრიტიკა – რესპუბლიკელი პრეზიდენტი მასმედიას ავიწროვებსო, რის გამოც თეთრი სახლის ბინადარის რისხვა დაიმსახურა: „ვინ არის ჯორჯ კლუნი? მეორეხარისხოვანი მსახიობი და არშემდგარი პოლიტოლოგი. მისი ინტერვიუ ყალბია. ჯორჯ კლუნი მძინარე ჯოს ასარჩევად ყველაფერზე მიდიოდა, შემდეგ კი, ჩემთან დებატებში მარცხის გამო, უპატრონო ძაღლივით მოექცა და მიატოვა. შემდეგ, როგორც ვიცი, ბარაკ ობამას რჩევით, კამალა ჰარისის დახმარება გადაწყვიტა, მაგრამ იქაც არაფერი გამოუვიდა“, – დაწერა დონალდ ტრამპმა Truth-ის სოციალურ ქსელში.

წყარო

ბრიტანული გაზეთი „დეილი ტელეგრაფი“ (The Daily Telegraph) აქვეყნებს სტატიას სათაურით „პუტინი – მატყუარა და მკვლელია, მასთან მოლაპარაკება შეუძლებელია“ (ავტორი – ლიამ ფოქსი, დიდი ბრიტანეთის თავდაცვის მინისტრი 2010-2011 წლებში). „ჯორჯ ბუშ-უმცროსი, დევიდ კემერონი და ემანუელ მაკრონი – ყველა დარწმუნდა, რომ კრემლის ტირანთან ნორმალური ურთიერთობა არ შეიძლება. ვლადიმერ პუტინი თავისი მიზნების შესასრულებლად ყველას გზიდან ჩამოიშორებს“, – ნათქვამია პუბლიკაციაში.

გთავაზობთ სტატიას მცირე შემოკლებით:

დონალდ ტრამპისა და ვოლოდიმირ ზელენსკის ფოტოები, წმინდა პეტრეს ტაძარში გადაღებული, შეიძლება ითქვას, არამარტო გულში ჩამწვდომი და ამაღელვებელია, არამედ მათ საკულტო მნიშვნელობაც კი აქვთ. ტაძარში, რომელიც ვატიკანის გულს წარმოადგენს, ხშირად გაისმოდა პაპის მოწოდებები მშვიდობის დაცვაზე და ომების შეწყვეტაზე. ასე რომ, დონალდ ტრამპის განცხადება შეხვედრის შემდეგ, რომ „ვლადიმერ პუტინი შეიძლება მას ეთამაშება“, უსაფუძვლო და უპრეცედენტო სულაც არ არის.

ბოლო წლებში შექმნილია ქცევის ისეთი მოდელი, რომლის დროსაც თავისუფალი სამყაროს იმედები და მოლოდინები დაუნდობელი ტირანიების ამორალურ მოქმედებას აწყდება. ოდესღაც პრეზიდენტმა ჯორჯ ბუშ-უმცროსმა თქვა, რომ პუტინს თვალებში ჩახედა და მისი სული დაინახა“. სამწუხაროდ, რუსი პრეზიდენტის სულში მხოლოდ „კაგებეს“ ფაილების ნომრები მოჩანს. თუ სული ერთხელ მაინც „კაგებეს“ მიჰყიდე, ეს ნიშნავს, რომ სიცოცხლის დასასრულამდე „კაგებე-ლი“ ხარ.

2008 წელს საქართველოში რუსეთის უკანონო შეჭრის შემდეგ პრეზიდენტმა ბარაკ ობამამ გადაწყვიტა „გადატვირთვის“ პოლიტიკა დაეწყო და კრემლთან საქმიანი ურთიერთობა განევითარებინა. ვლადიმერ პუტინმა მადლობით მიიღო ეს წინადადება და 2014 წელს მან ყირიმის ოკუპირება განახორციელა, რომლის უკრაინის სუვერენულ ტერიტორიას წარმოადგენს.. როცა კრემლის ბინადარმა დასავლეთის სულმოკლე რეაქცია დაინახა, გადაწყვიტა, რომ მას შეეძლო უკრაინის სხვა რეგიონებიც ხელში ჩაეგდო და 2022 წლის თებერვლის ბოლოს მეზობელ ქვეყანას თავს დაესხა. დაიწყო ომი, რომელიც დღემდე გრძელდება და რომელმაც უკრაინის 13 ათასი მშვიდობიანი მოქალაქე შეიწირა, დაიღუპა აგრეთვე 70 ათასი სამხედრო მოსამსახურე, დასახიჩრდა 120 ათასი. უარესი ზარალი განიცადა თვითონ თავდამსხმელმა რუსეთმაც.

ამჟამად მარადიული ოპტიმისტი პრეზიდენტი დონალდ ტრამპი, როგორც ჩანს, მკაცრ რეალობას აცნობიერებს. იგი ბოლო ლიდერია დასავლელ ლიდერებს შორის, რომელსაც ჯერ კიდევ სჯერა, რომ ვლადიმერ პუტინთან შეიძლება ურთიერთობა ჰქონდეს. დიახ, დონალდ ტრამპის მსგავსად, დევიდ კემერონსაც სჯეროდა და ემანუელ მაკრონსაც თავის დროზე, მაგრამ, საბოლოო ჯამში, ისინი შეურიგდნენ იმას, რომ სიტუაციას ვერ შეცვლიდნენ: ვლადიმერ პუტინი როგორც იყო და არის ცრუ ადამიანი, მკვლელი და საერთაშორისო დამნაშავე, მომავალშიც იგივე პიროვნებად დარჩება.

უკრაინელები, სხვებთან შედარებით, ამ ჭეშმარიტებას უკეთესად აცნობიერებენ. თავის დროზე, 1994 წელს, უკრაინის ხელისუფლებამ, ქვეყნის უახლეს ისტორიაში ყველაზე მოღალატური აქტი ჩაიდინა და დათანხმდა უარი ეთქვა ბირთვულ იარაღზე, რომელიც მან საბჭოთა კავშირის შემდეგ მემკვიდრეობით მიიღო, სანაცვლოდ კი კიევს უსაფრთხოების გარანტიები აღუთქვეს. ბუდაპეშტის 1994 წლის მემორანდუმით უკრაინა შეუერთდა ბირთვული იარაღის გაუვრცელებლობის გლობალურ ხელშეკრულებას – რუსეთთან, აშშ-სთან და დიდ ბრიტანეთთან ერთად – და დამატებით გააფორმა შესაბამისი შეთანხმებები საფრანგეთთან და ჩინეთთან.

მემორანდუმის თანახმად, უკრაინამ თავისი დამოუკიდებლობისა და სუვერენიტეტის, ტერიტორიული ხელშეუხებლობისა და საზღვრების ურღვევობის გარანტიები მიიღო. მასზე ხელმომწერები – რუსეთი, აშშ და დიდი ბრიტანეთი – ვალდებულობდნენ, რომ არასოდეს არ გამოიყენებდნენ ძალას უკრაინის ტერიტორიის მიმართ და არ დაარღვევდნენ საერთაშორისოდ აღიარებულ საზღვრებს და თუ უკრაინა რომელიმე სხვა ქვეყნის მხრიდან აგრესიის წინაშე დადგებოდა, მხარეები დაუყოვნებლივ მოიწვევდნენ გაეროს უშიშროების საბჭოს სხდომას უკრაინის დასახმარებლად. სამწუხაროდ, მემორანდუმის პირობები არ შესრულდა, დოკუმენტზე ერთ-ერთმა ხელმომწერმა კი უკრაინა კი არ დაიცვა, არამედ პირიქით – მას თავს დაესხა.

ამიტომაც გასაკვირი არ არის, რომ ვოლოდიმირ ზელენსკი ესოდენ დაბეჯითებით და ჯიუტად მოითხოვს უსაფრთხოების გარანტიებს სამშვიდობო მოლაპარაკების დაწყებამდე, რომლებიც ხელშეკრულებაში უნდა ჩაიწეროს. უკრაინის პრეზიდენტი კარგად ხვდება, რომ ვლადიმერ პუტინის ნებისმიერი დაპირება პროფანაციას წარმოადგენს და მეტს არაფერს. ვლადიმერ პუტინისათვის ნებისმიერ ხელმოწერას, საბოლოო ჯამში, არავითარი მნიშვნელობა არ აქვს. კრემლის აზრით, ყოველგვარი შეთანხმების იგნორირება შეიძლება, როცა დაინახავს, რომ მომავალი ექსპანსიისათვის შესაფერისი დრო დადგა.

თავისუფალ, დემოკრატიულ სამყაროში საზოგადოება დაპროგრამირებულია იმაზე, რომ ყველაფერი კანონის უზენაესობისა და ადამიანის უფლებების პრინციპების დაცვით ხორციელდებოდეს (საერთაშორისო სამართლის ჩათვლით).

ჩვენ დროა ვაღიაროთ, რომ მათ, რომლებიც აღნიშნულ პრინციპებს უარყოფენ, სრულიად სხვა მსოფლმხედველობა აქვთ.

ვლადიმერ პუტინი – მთავარი დამნაშავე და წარმომადგენელია იმისა, რასაც შეიძლება ბანდიტოკრატია ეწოდოს. იგი თავის სამშობლოში კლავს პოლიტიკურ ოპონენტებს, ან ისინი უკვალოდ ქრებიან. იგი ნადირობს საზღვარგარეთ მყოფ რუს დისიდენტებზე. კრემლის სპეცსამსახურები დევნიან უცხოელ მოქალაქეებსაც. პუტინის ავი ხელის მოქმედების შედეგები იგრძნობა ჩვენთანაც, დიდ ბრიტანეთში.

ბევრი დასავლელი ლიდერი საკუთარ მწარე გამოცდილებით დარწმუნდნენ, რომ ვლადიმერ პუტინთან გრძელვადიანი შეთანხმება შეუძლებელია იმდენად, რამდენადაც იგი უსირცხვილოდ უარს იტყვის ნებისმიერ დაპირებაზე, გაწყვეტს ნებისმიერ ხელშეკრულებას და ფეხზე დაიკიდებს ნებისმიერ მეგობარს, თუ ისინი მისი მიზნების შესრულებას ხელს უშლიან ან არ ეთანხმებიან.

რა თქმა უნდა, მშვიდობის მიღწევის მცდელობა და სურვილი, დაზავებისაკენ სწრაფვა სირცხვილი არ არის, მაგრამ როცა საქმე ვლადიმერ პუტინს ეხება, წესიერი ადამიანები ადრე თუ გვიან, ერთნაირ – წამგებიან – მდგომარეობაში აღმოჩნდებიან.

მოამზადა სიმონ კილაძემ

წყარო: