ყოველდღე იკრიბებიან, ერთმანეთს ხვდებიან, ესაუბრებიან, ერთმანეთს აგინებენ და ალბათ, ხვალაც შეიკრიბებიან, – ამის შესახებ დედაქალაქის მერმა, კახა კალაძემ ოპოზიციის მიერ 13 სექტემბერს დაგეგმილ აქციაზე საუბრისას განაცხადა.

კახა კალაძის თქმით, ჩხუბი, გინება და ბანერების დაზიანება ევროპასთან და დემოკრატიასთან კავშირში არ არის.

„ყველას, გინდ იქ მდგომს, გინდ განსხვავებული მოსაზრების მქონე ადამიანებს, მინდა ვუსურვო ის, რომ რეალობას შეხედონ. შეიძლება არ მოვწონდე, შეიძლება ვიღაცას სხვა არ მოსწონდეს, სხვა პოლიტიკური შეხედულება ჰქონდეს, მაგრამ მივიდეთ და ერთმანეთს ცხვირ-პირი დავალეწოთ, ან ვაგინოთ, ან ბანერები დავუხიოთ, საარჩევნო კამპანიაში ხელი შევუშალოთ, ეს დემოკრატიასთან და ევროპასთან არანაირ კავშირში არ არის, ეს არის სიბნელე“, – განაცხადა კახა კალაძემ.

ხაბეიშვილს აძლევდნენ ჯერ 3000, შემდეგ 5000 ლარს თვეში და დაავალეს დანაშაულის ჩადენა, ჩაადენინეს დანაშაული და გაწირეს ციხისთვის – ასეთია აგენტის ხვედრი, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

მთავრობის მეთაურის თქმით,  როდესაც ადამიანი ხდება აგენტი, ის იძულებულია, გადადგას ისეთი ნაბიჯი, რომელიც მასვე აზიანებს.

„კიდევ ერთხელ გავიმეორებ ყველას გასაგონად, რომ არავის ვურჩევ აგენტობას. როდესაც ხდები აგენტი, შენ იძულებული ხარ, გადადგა ისეთი ნაბიჯი, რომელიც შენვე გაზიანებს. მას აძლევდნენ ჯერ 3000, შემდეგ 5000 ლარს თვეში და დაავალეს დანაშაულის ჩადენა. ჩაადენინეს დანაშაული და გაწირეს ციხისთვის. ასეთია აგენტის ხვედრი. დანარჩენი არის გამოძიების საქმე”, – განაცხადა პრემიერმა.

როგორც კი აშშ-ის საელჩო ჩამოყალიბდება, თუ ვის ემსახურება, ემსახურება ტრამპის ადმინისტრაციას, თუ „დიფ სთეითს”, მაშინვე ექნება რეაგირება ასეთ ფაქტებზე, – ამის შესახებ პრემიერ-მინისტრმა ირაკლი კობახიძემ ჟურნალისტის კითხვის პასუხად განაცხადა, რომელიც აქციის მონაწილეების მხრიდან კირკის მკვლელობასთან დაკავშირებით ცინიკურ განცხადებებსა და აღნიშნულ საქმეზე ამერიკის სახელმწიფო დეპარტამენტის გამოხმაურებას შეეხებოდა.

მისივე თქმით, დღეის მდგომარეობით, საქართველოში აშშ-ის ელჩი დანიშნული არ არის და გარკვეული კუთხით ბუნდოვანებაა საელჩოში.

„ვნახოთ, როგორ ჩამოყალიბდება საბოლოო ჯამში საელჩო. დღეს, ელჩი დანიშნული არ არის, ამიტომ არის გარკვეული კუთხით ბუნდოვანება საელჩოში. იმედი მაქვს, როცა ელჩი დაინიშნება, საბოლოო ჯამში, საელჩო ჩადგება ტრამპის ადმინისტრაციის სამსახურში და არა „დიფ სთეითს” სამსახურში, როგორც ამას აკეთებდნენ ყოფილი ელჩები გასული წლების განმავლობაში,”- განაცხადა პრემიერმა.

გედევან ფოფხაძე ეძგვერაძე ბარნაბასავით არის, ვერავინ გაიგო, რომელ პარტიას ეკუთვნის. გასათვალისწინებელია მისი ფსიქოლოგიური გარემოებაც, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკი გამოეხმაურა კოალიცია ცვლილებისთვის“ წევრის, გედევან ფოფხაძის განცხადებას, სადაც მან აღნიშნა: „გულწრფელად გეტყვით, მაგათი არავის ფიზიკური განადგურება არ მეწყინება, ივანიშვილს ბენზინს თუ გადაასხამენ და ცეცხლს წაუკიდებენ, არ მეწყინება“.

„მგონი, გედევან ფოფხაძემ თავის მიზანს მიაღწია – გამოჩნდა. ისე, ეძგვერაძე ბარნაბასავით არის, რომელ პარტიას ეკუთვნის, ვერავინ გაიგო. მისი ფსიქოლოგიური გარემოებაც უნდა გავითვალისწინოთ. მგონი, სტაბილური არ არის. არ მგონია, მას მხოლოდ სხვისი სიკვდილი უხაროდეს. იმისათვის, რომ ისტორიაში ჩაეწეროს, თვითონაც რადიკალურ ნაბიჯებზეა წამსვლელი. მის მიერ მიზანი მიღწეულია – როგორღაც საინფორმაციო სივრცეში გამოჩნდა. ვიცი, რომ გარკვეული ვალდებულებები აქვს ნიკა გვარამიასთან, ეს მამამისთან არის დაკავშირებული. ხან ხოშტარიას მიუჯდა შიმშილობისას, ხან რა, მაგრამ დაბნეულ-დაკარგულია. არ ვიცი, გედი ფოფხაძემ რას მიაღწია, მაგრამ ტრენდი ზუსტად დაიჭირა – პოპულარობა აგრესიის კულტივირებით მოდის. მისი იდეა შეიძლება ეს იყოს. შეიძლება, დანაშაულზეც არის წამსვლელი, მაგრამ დანაშაულის წინაპირობის გაუბრალოებას ცდილობს. გედიმ დაინახა, რომ ამ მიმართულებას პოპულარობა აქვს და ამ თემაზე საუბარი დაიწყო. მას შემდეგ, რაც ხაბეიშვილი „ნაცმოძრაობის“ ლიდერშიპიდან გასწიეს, მანაც ამ ნიშით დაიწყო. რასაკვირველია, ეს ყველაფერი ახალგაზრდებში გარკვეულ მიზანს ჰპოვებს. ეს იყო მიზანი ხელის გარტყმის, ბანერის დაზიანების, განუკითხაობის და იდეალად წარმოაჩენენ „მოლოტოვის კოქტეილის“ სროლას, ადამიანის მოკვლას. მთავარი მიზანია, ამ ყველაფერმა ახალგაზრდების ფსიქიკაზე დამანგრევლად იმოქმედოს. დანაშაულზე წამსვლელები არიან. უკვე ჩადენილიც აქვთ დანაშაული, რასაც ახალგაზრდების გარყვნა ჰქვია“, – განაცხადა გია ვოლსკიმ.