პირველ დღეებში მალავდნენ ტერორიზმის მუხლს, შემდეგ საგულდაგულოდ მალავდნენ, რომ ბიძინა ივანიშვილის სახელი და გვარი ფიგურირებდა, რატომ უნდა დამალო ეს ყველაფერი, თუ რაღაცაში არ არის საქმე? – ამის შესახებ საპარლამენტო უმრავლესობის ლიდერმა, მამუკა მდინარაძემ ტერორიზმისა და შეთქმულების მომზადების საქმესთან დაკავშირებით ჟურნალისტებს განუცხადა.

მდინარაძის თქმით, იმ ფონზე, როდესაც მსოფლიოში ბევრი მსგავსი მოვლენა „ემთხვევა“ ერთმანეთს, განსაკუთრებული ყურადღების მიქცევაა საჭირო და ზუსტად ამას აკეთებს სახელმწიფო უსაფრთხოების სამსახური.

„პირველ დღეებში, როდესაც გახმიანდა ეს ამბავი, საერთოდ მალავდნენ ტერორიზმის მუხლს. ერთი წამით დაუშვით, რომ არავინ არაფერი იცოდა მათი მხრიდან. რატომ უნდა მოგაფიქრდეს ამ შემთხვევაში, ორი მუხლია შენთვის ცნობილი, მოწმე ხარ, ადვოკატი, „ნაცი“ თუ მისი ტელევიზია, რატომ უნდა მოგაფიქრდეს, გაამხილო შეთქმულების მუხლი და დამალო ტერორიზმის მუხლი? შემდეგ, როდესაც ინფორმაცია გახმოვანდება და სამი დღის თავზე ყველა გაიგებს, რომ ტერორიზმის მუხლიც არის, საგულდაგულოდ მალავდნენ იმას, რომ ბიძინა ივანოშვილის სახელი და გვარი ფიგურირებდა, როგორც სავარაუდო მსხვერპლი ამ სავარაუდო დანაშაულისა. რატომ უნდა დამალო ეს ყველაფერი, თუ რაღაცაში არ არის საქმე? ამის იქით ალბათ მსჯელობითაც ვერ წავალთ და თუ ისინი ახლა უბრალოდ ღლიცინებენ, რომ ადამიანების მოკვლას აპირებდა ვიღაც, საღლიცინო ამბავი არ არის“, – განაცხადა მამუკა მდინარაძემ.

საქართველო არასდროს შეცვლის კურსს, რადგან ჩვენი საზოგადოების განწყობა არის ის, რასაც ჩვენ ვახორციელებთ და ეს გვიწერია კონსტიტუციაში. ეს არის ევროპული გზა და საქართველოს ხელისუფლება არასდროს შეცვლის ამ კურსს, – ამის შესახებ საპარლამენტო უმრავლესობის ლიდერმა, მამუკა მდინარაძემ ჟურნალისტებთან საუბრისას განაცხადა.

მამუკა მდინარაძის თქმით, თუ ვინმეს უნდა, კურსის ცვლილებაში იგულისხმოს თავდახრილი, ცალ ფეხზე დგომა, „ქართული ოცნება“ ამაზე ვერ წაჰყვება.

„ჩვენს საარჩევნო სლოგანშიც შემთხვევით არ ჩაგვიწერია ეს სიტყვა – მშვიდობით, ღირსებით, კეთილდღეობით მხოლოდ ევროპისკენ. ეს არის ჩვენი პოლიტიკური მრწამსიც და ეს არის ჩვენი მიმართულებაც. თუ ფიქრობთ, რომ ევროპული გზა ომით, უბედურებით, საკუთარი ჯარისკაცების და მოსახლეობის დახოცვის ხარჯზე უნდა იყოს, ეს არ იქნება და ვერც იქნება. სულ რომ თავი შესწირო ამ იდეას, ეს ევროპასთან არ დაგაახლოებთ, არ გაგიჩნდეთ ამის ილუზია. ეს თან დაგაშორებთ და თან ფიზიკურად განადგურდებით. ამით გავნადგურდებით და ვერც ევროპას დავუახლოვდებით ეკონომიკურად, ფიზიკურად. ვიღაც თუ გატყუებთ და გაჯერებთ, რომ ეს ევროპასთან დაგვაახლოებს, ესეც ცალკე ტყუილია. ამიტომ, თავის გაწირვა ტყუილისთვის არ ღირს“, – განაცხადა მამუკა მდინარაძემ.

„ხალხის ძალის“ პოლიტიკური მდივანი მიხეილ ყაველაშვილი ქვეყნის ხელისუფლების ძალადობრივად შეცვლის საფრთხეზე საუბრობს და მოსახლეობას სიფხიზლისკენ მოუწოდებს.

როგორც მან ჟურნალისტებთან „ხალხის ძალის“ წერილის კომენტირებისას განაცხადა, უცხოური ძალების მხრიდან ამ მიმართულებით ძალისხმევა შენელებული არ არის.

მიხეილ ყაველაშვილმა ასევე აღნიშნა, რომ არჩევნების თემა, კერძოდ, მისი წინასწარ გაყალბებულად გამოცხადება, იქნება ერთ-ერთი შესაძლებლობა, ქვეყანაში მოხდეს მოქმედი ხელისუფლების შეცვლა.

„ომი უკრაინაში ჯერ კიდევ მიმდინარეობს და, რა თქმა უნდა, არის ინტერესი, საქართველოში შეიცვალოს ხელისუფლება, რადგან ეს ხელისუფლება იცავს მშვიდობას. საკუთარი ქვეყნის ინტერესებიდან გამომდინარე საქართველო არ ასრულებს მითითებას, „შეეხიდოს“ უკრაინას და აქ მეორე ფრონტი გახსნას. საქართველოს მოქალაქეები კიდევ უფრო მეტად უნდა იყვნენ მზად იმისთვის, რომ ეს ძალისხმევა არ შენელებულა და გამოიჩინონ სიფრთხილე. ეს ყველაფერი ეხება არჩევნების თემას, რადგან გადაწყვიტეს, რომ, წინასწარ გაყალბებებზე საუბრით, ძალადობრივი გზებით შეცვალონ არჩევნების შედეგები, რათა როგორმე მოხდეს მოქმედი ხელისუფლების ცვლილება“, – განაცხადა მიხეილ ყაველაშვილმა.

საპარლამენტო უმრავლესობის ლიდერის, მამუკა მდინარაძის განცხადებით, საქართველოში მეორე ფრონტის ინტერესის უკან დგანან კონკრეტული ძალები, რომლებსაც „გლობალურ ომის პარტიად“ მოიხსენიებენ.

მამუკა მდინარაძის განმარტებით, საქართველოს ხელისუფლების წარმომადგენლებს არასდროს უთქვამთ, რომ „გლობალურ ომის პარტიაში“ აშშ-ს და ევროკავშირს გულისხმობენ.

მამუკა მდინარაძის განცხადებით, დარწმუნებული არიან თავიანთ ვერსიაში, რომ გარკვეული ძალების მხრიდან არის საქართველოს ომში ჩართვის ინტერესი და კულისებში არსებობს საკითხები, რომლებზეც დღეს ხმამაღლა არ საუბრობენ.

„გამახსენეთ ერთი შემთხვევა, როცა ჩვენ ვამბობდით, რომ ამერიკას ომი უნდა. როგორც ბრძანებთ, ადამიანი გვამხელს სიცრუეში და გვეუბნება, ტყუილია, რომ ამერიკას ომი უნდა. ჩვენ არცერთხელ არ გვითქვამს, რომ „გლობალურ ომის პარტიაში“ ვგულისხმობთ, როგორც ასეთი, აშშ-ს და, როგორც ასეთი, ევროკავშირს. გვაძალებენ, რომ თქვენ მაინცდამაინც ამას გულისხმობთო და არ ვგულისხმობთ. ადამიანებმა ტყუილში ტყუილით მხილება გადაწყვიტეს. პირიქით, მე ვამხელ ნებისმიერ ადამიანს, რომელიც ამას იტყვის. ტყუილია, რომ ამერიკას ომი უნდა. არ გვითქვამს ასეთი და იქით უნდა ვამხილოთ ტყუილში ნებისმიერი, ვინც არ უნდა იყოს. უნდა გავბედოთ ეს და ამას ვბედავთ, ამისთვის ცდილობენ ჩვენს დასჯას ვიღაც-ვიღაცები. რაც შეეხება „გლობალური ომის პარტიას“, ესენი არიან ძალები, რომლებიც დგანან მეორე ფრონტის ინტერესის უკან. ჩვენ არასდროს გვითქვამს, რომ, როგორც ასეთი, ეს არის აშშ, როგორც ასეთი, ეს არის ევროკავშირი, ჩვენ ასეთი არ გვითქვამს. ყოველთვის ხაზს ვუსვამთ კონკრეტულ ძალებს და ვაკავშირებით ამ კონკრეტულ ძალებთან, მათ შორის, მაგალითად, ბატონი ტრამპის მოკვლის ინტერესს, ვაკავშირებთ ბატონი ფიცოს მკვლელობის მცდელობის და მკვლელობის ინტერესს, ვაკავშირებთ ირაკლი კობახიძეზე ირიბი მუქარის ინტერესს და მინიშნების ინტერესს, ვაკავშირებთ, მათ შორის, ბიძინა ივანიშვილზე თავდასხმის და მის მიმართ ტერორისტული აქტის მოწყობის ინტერესს. და როდესაც უსამართლო კრიტიკას ვიღებთ ჩვენ სხვადასხვა ქვეყნის, სხვადასხვა კონკრეტული პოლიტიკოსისგან, ისმება კითხვა, თუ ეს ვერსია, რასაც ჩვენ ვავითარებთ, არასწორია, მაშინ რა არის სწორი ვერსია? და ამაში დარწმუნებული კი არ ვართ, ვიცით, არსებობს კულისებში საკითხები, რომლებზეც ვერ და არ ვლაპარაკობთ, რათა არ გადავლახოთ წითელი ხაზები. ღმერთმა არ ქნას, საქართველოს გადასარჩენად ესეც მოგვიწიოს. ხაზგასმით ვამბობ, ღმერთმა არ ქნას, რომ მოგვიწიოს ყველაფრის თქმა, ე.წ. წითელი ხაზების გადალახვა ჩვენი ქვეყნის გადასარჩენად, სხვა მიზანი ამას არ ექნება, მათ შორის, რაღაც მტკიცებულებებზე საუბარი და ა.შ. ამას შემთხვევით არ ვლაპარაკობ“, – განაცხადა მამუკა მდინარაძემ.

ჩვენი ამომრჩეველი ახლა არის დაახლოებით 60 პროცენტი და დავმალოთ? გვიჩნდება შანსი, ეროვნული პოლიტიკის გასატარებლად მივიღოთ საკონსტიტუციო უმრავლესობა, – ამის შესახებ საპარლამენტო უმრავლესობის ლიდერმა, მამუკა მდინარაძემ განაცხადა.

მდინარაძემ აღნიშნული კომენტარით უპასუხა კითხვას, რის საფუძველზე ელოდება „ქართული ოცნება“ არჩევნებზე ხმების 60 პროცენტს და როგორ უპასუხებდა ოპოზიციის მოსაზრებას, რომ მმართველ გუნდს აღნიშნული ციფრი მხარდამჭერების გასამხნევებლად სჭირდება?

„დავუშვათ, 54 პროცენტი ვერ გაამხნევებდა მხარდამჭერს? რა სისულელე არგუმენტია, საიდან მოიტანეს? აქამდე ერთხელ გაგიგიათ ჩვენგან 60 პროცენტი? საიდან მოგვეჩვენა 60 პროცენტი? ყოველი მეორე ამომრჩეველი როდესაც იყო ჩვენი ამომრჩეველი და ამ ფარგლებში ვიღებდით 47, 48 და 49 პროცენტებს, ამას ვამბობდით, ხომ? ახლა არის დაახლოებით 60 პროცენტი, დავმალოთ? ამას დამშვიდება კი არ სჭირდება, არამედ ჩვენი ამომრჩევლის, მხარდამჭერის მხრიდან გამყარება, რადგან გვიჩნდება შანსი, ეროვნული პოლიტიკის გასატარებლად მივიღოთ საკონსტიტუციო უმრავლესობა. მათ შორის, ბევრი საკითხია, თუნდაც ლგბტ პროპაგანდის აკრძალვა და სხვები.

ოპოზიცია ცდილობს, საკონსტიტუციო უმრავლესობას არ გაგვაკაროს. მათ ილუზიაშიც, ყველაზე კარგ ოცნებაშიც კი არ აქვთ წარმოდგენილი, რომ უმრავლესობას მოიპოვებენ, გამორიცხული ამბავია. ცდილობენ, ბარიერი გადალახონ, რათა შიგნიდანაც საბოტაჟი მოაწყონ. აუცილებლად დაიწყებენ ქვეყნის საბოტაჟს 26 ოქტომბრის ღამიდან, ეს ხომ წინასწარ ვიცით, მაგრამ ამის გარდა, ცდილობენ, საკონსტიტუციო და მყარი უმრავლესობა არ ჰქონდეს „ქართულ ოცნებას“. სხვა მიზანი მათ ფიზიკურად არ აქვთ, ეს არის მათი გარედან მიღებული დავალება“, – განაცხადა მამუკა მდინარაძემ.

ალეკო ელისაშვილსა და ხაზარაძეს შორის კომიკური ერთობა შედგა, ეს უპრინციპო ადამიანების კავშირია, – ამის შესახებ საპარლამენტო უმრავლესობის წევრმა, მაია ბითაძემ განაცხადა.

როგორც ბითაძემ ოპოზიციის გაერთიანების საკითხზე საუბრისას აღნიშნა, მათი საერთო მიზანია, ზიანი მიაყენონ სახელმწიფოს.

„მინდა, პირველ რიგში, გამოვეხმაურო კომიკურ ერთობას, რომელიც ალეკო ელისაშვილსა და ხაზარაძეს შორის შედგა. ჩემთვის აბსოლუტურად გაუგებარი იყო მათი როგორც ერთობა, ასევე გამონათქვამი, რომ გვერდზე გადადეს ყველა პირადი გაუგებრობა და პოლიტიკურად გაერთიანდნენ. ჩემთვის გაუგებარია, პირად სივრცეში რას ვერ იყოფდნენ, რის სიყვარულს ვერ იყოფდნენ და რა ძალამ გააერთიანათ. ეს არის უპრინცოპო ადამიანების კავშირი, რომელთაც აერთიანებთ მხოლოდ ერთი რამ – როგორმე ზიანი მიაყენონ სახელმწიფოს. ისინი კიდევ ვინმეს თუ მიიერთებენ იმ ფლანგიდან, რომელიც ამ ქვეყნის ძირგამომთხრელ საქმიანობას ეწევა, პასუხი გაეცემათ მიმდინარე წლის ბოლოს. ყველაზე დიდი აბსურდი არის ის, რომ რადიკალური ოპოზიცია ახლა გვესაუბრება, თითქოს ახლები და უმწიკვლოები არიან. ეს არის დემაგოგია და შეურაცხყოფა საქართველოს მოსახლეობის, რომელსაც კარგად ახსოვს თითოეული პოლიტიკოსის წარსული. ასევე, აბსოლუტურად უტოპიურია მათი გამონათქვამები იმასთან დაკავშირებით, რომ რაიმე ევროპულს აკეთებენ ამ ქვეყანაში. ევროკავშირის დროშის ფრიალი არ არის საქმიანობა, რომელიც საქართველოს ევროკავშირთან და რაიმე ევროპულთან აკავშირებს. ბოლო პერიოდში ნათლად ვხედავთ ამ ადამიანების გაერთიანებას მხოლოდ ერთი საკითხის მიმართ, რასაც ჰქვია ზიზღის, სიძულვილის და პოლარიზაციის გამწვავება. შესაბამისად, არანაირი მნიშვნელობა არ აქვს, არჩევნებზე რა ფორმით მოგვევლინებიან. რამდენადაც არ უნდა დაიყონ და გაერთიანდნენ, იმ ადამიანების კავშირი იქნება,  რომლებსაც თავისუფლად შეუძლიათ, ქვეყანა დიდ შარში გახვიონ“, – განაცხადა მაია ბითაძემ.

მაია ბითაძეს სალომე ზურაბიშვილის მეორე ვადით პრეზიდენტობის საკითხზეც დაუსვეს კითხვა, რაზეც ბითაძემ აღნიშნა:

„სალომე ზურაბიშვილი, ეს ქალბატონი დღეს შემთხვევით არის საქართველოს პრეზიდენტი. საქართველოს პრეზიდენტი არის მხოლოდ იმიტომ, რომ მას ჰქონდა „ქართული ოცნების“ მხარდაჭერა. მას თუ სურს, მეორე ვადით იყოს საქართველოს პრეზიდენტი, კარგად უნდა დაინახოს, რომ მისი მხარდამჭერები საფუძველს მოკლებული და ქვეყნის ძირგამომთხრელი საქმიანობით დაკავებული რადიკალები თუ იქნებიან, მას პრეზიდენტობის არანაირი გარანტია არ აქვს. მინდა, ჩემს სახელმწიფოს ვუსურვო, რომ დაცული ოყოს სალომე ზურაბიშვილის მეორე ვადით პრეზიდენტად ყოლისგან“.

უნდა დავაფასოთ ის თანამშრომლობა და პარტნიორობა, რომელიც სხვადასხვა ქვეყანასთან, მათ შორის ევროკავშირის ქვეყნებთან გვაქვს, უნდა ვიყოთ მადლიერები, როდესაც საუბარია დახმარებებზე, მაგრამ საკრედიტო დახმარებები არ არის საჩუქარი, –  ამის შესახებ საქართველოს ეკონომიკისა და მდგრადი განვითარების მინისტრმა, ლევან დავითაშვილმა განაცხადა.

მინისტრს დაუსვეს კითხვა საფრანგეთის საელჩოს ინფორმაციაზე, რომლის მიხედვითაც, „2012 წლიდან, საბიუჯეტო და ფინანსური მხარდაჭერით, საქართველოს ენერგეტიკამ – 415 მლნ ევრო, სოციალურმა დაცვამ კი 201 მლნ ევრო მიიღო, ეს იმ ფონზე, როდესაც შალვა პაპუაშვილმა გააკეთა განცხადება, რომ არანაირი პირდაპირი საბიუჯეტო დაფინანსება არ არსებობს საფრანგეთიდან“.

როგორც კითხვაზე პასუხისას დავითაშვილმა აღნიშნა, საქართველო პირდაპირ ფინანსურ ტრანსფერებსა და დახმარებებს საჩუქრის სახით არ იღებს.

„პირველ რიგში, უნდა აღინიშნოს, რომ ბატონი შალვას განცხადება იყო მართალი. ჩვენ პირდაპირ ფინანსურ ტრანსფერებს, დახმარებებს საჩუქრის სახით არ ვიღებთ, თუმცა უნდა დავაფასოთ ის თანამშრომლობა და პარტნიორობა, რომელიც გვაქვს სხვადასხვა ქვეყანასთან, მათ შორის ევროკავშირის ქვეყნებთან. რა თქმა უნდა, ჩვენთვის ღირებულია პარტნიორობა და თანამშრომლობა საფრანგეთთან, ვფიქრობ, უნდა ვიყოთ მადლიერები, როდესაც საუბარია დახმარებებზე, თუმცა ამ შემთხვევაში საუბარია საკრედიტო დახმარებებზე, ეს არ არის საჩუქარი, ეს არის სესხი. აქ არის რაციონალური ურთიერთობები ქვეყნებს შორის. ეს სხვადასხვა სექტორს, მათ შორის ენერგეტიკასაც ხმარდება, მაგრამ ჩვენ გვესმის, რომ ამის უკან პასუხისმგებლობები გვაქვს და ჩვენ ამ სესხებს უნდა მოვემსახუროთ“, – განაცხადა ლევან დავითაშვილმა.