Home Blog Page 4

კუბილიუსმა ის თავისი ღვარძლი შეინახოს თავისთვის – ირაკლი ქადაგიშვილი

მმართველი გუნდი ანდრიუს კუბილიუსის განცხადებას სპეკულაციურს უწოდებს და ევროპარლამენტარს მოუწოდებს, საქართველოზე საუბარს თავი დაანებოს.

“ქართულ ოცნებაში”, კუბილიუსსა და “ნაციონალური მოძრაობის” კავშირზე საუბრობენ, რომლის მიზანი, მათივე თქმით, საქართველოს ევროინტეგრაციის პროცესის შეფერხება და ქვეყანაში არეულობის მოწყობაა.

სახელისუფლებო გუნდში ამბობენ, რომ ევროპულ ოჯახში სრული ინტეგრაციისთვის პროგრესია მნიშვნელოვანი, რომელსაც “ქართული ოცნების” ხელისუფლება უზრუნველყოფს.

“ეს კუბილიუსი და მათი მოკავშირე “ნაციონალები”, ამათთვის ევროკავშირი არ არის შინაარსობრივად მნიშვნელოვანი. მათთვის ეს არის რევოლუციის მოსახდენად გამოგორებული ქვა. ევროკავშირის წევრობისთვის საქართველო, რომ არ არის მზად, ამას არ სჭირდება არც ერთი ნორმალური ადამიანისათვის ორჯერ გამეორება. რატომ არის პროცესი და რატომ ამბობენ, რომ ეს რამდენიმე წელი გაგრძელდება” ეს იმიტომ, რომ არაერთი რეფორმაა გასატარებელი და მარტო მიტინგზე დაძახებული “ჯოს” არ ჰყოფნის ამას. აქედან გამომდინარე თქვა ღარიბაშვილმა ეს აზრი და თვითონ ევროკავშირი ამბობს, რომ მას აქვს დიდი რეფორმები ჩასატარებელი, რათა მისი განვითარება – გაფართოება უზრუნველყოს. ამიტომ, აქ ორმხრივი მზაობისკენ მოძრაობაა საჭირო. კუბილიუსმა ის თავისი ღვარძლი შეინახოს თავისთვის”, – განაცხადა ირაკლი ქადაგიშვილმა.

ცნობისთვის, კუბილიუსი სოციალურ ქსელში წერს, რომ ირაკლი ღარიბაშვილმა კანდიდატის სტატუსი იზეიმა და მას გამარჯვება უწოდა. ოთხი თვის შემდეგ კი ამბობს, რომ საქართველო ევროკავშირში გასაწევრიანებლად მზად არ არის.

,,გარკვეული ჯგუფები სწორედ იმ მემკვიდრეობას ებრძვიან, რაც ილია ჭავჭავაძისგან გვაქვს”- რატი იონათამიშვილი

ცხადია, ეს შემთხვევითი არ არის და ფაქტობრივად ამით მოხდა აღიარება, რომ გარკვეული ჯგუფები სწორედ იმ მემკვიდრეობას ებრძვიან რაც ილია ჭავჭავაძისგან გვაქვს ჩვენ და ამას შორს მიმავალი გეგმები აქვს, – ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, რატი იონათამიშვილმა გამჭვირვალობის კანონის წინააღმდეგ გამართულ აქციაზე გაჟღერებულ სლოგანთან დაკავშირებით განაცხადა.

„როდესაც ჩვენ ვხედავთ, რომ ისინი პარალელურად თავს ესხმიან ეკლესიას, მტრობენ ქართულ სახელმწიფოს და საზოგადოებას, ცხადი ხდება საიდან მოდის მათი ეს ანტიქართული, ანტისახელმწიფოებრივი და ანტიეროვნული კამპანია. მათი მხრიდან ამას უფრო შორს მიმავალი მიზნები აქვს, ვიდრე ამ ყველაფერს ერთი კონკრეტული აქციის ფარგლებში რომ შევხედოთ“, – განაცხადა იონათამიშვილმა.

მამული, ენა და სარწმუნოების ნაცვლად ერთობა – „ჯიუტისა“ და „დაფიონის“ ორგანიზებით გამართული აქციის მონაწილეებს გმირთა მემორიალთან ფიცის დადების დროს სიტყვა სარწმუნოება არც უხსენებიათ.

ბოდბელი ეპისკოპოსი ქვეყანაში მიმდინარე პროცესებს ეხმაურება

ბოდბელი ეპისკოპოსი ქვეყანაში მიმდინარე პროცესებს ეხმაურება. საკვირაო წირვის დასრულების შემდეგ, მღვდელმთავარმა გამჭვირვალობის კანონზე ისაუბრა, ასევე ყურადღება გაამახვილა საპროტესტო აქციებზე. მეუფე იაკობისთვის მიუღებელია ილია ჭავჭავაძის სიტყვების დამახინჯება. ბოდბელი ეპისკოპოსი მშვიდობისა და სტაბილურობის აუცილებლობაზე საუბრობს.

„არა რუსეთსო რომ იძახი, კანონი თუ რუსეთია ამ რუსების გვერდით რა გინდა? „ნაციონალურ მოძრაობაზე“ და მის სატელიტებზე ვლაპარაკობ. აბა გადადეთ, რა გააკეთეს ქართული. საპროტესტო მუხტი რომ არ გაჩერდეს, სანამ შემდეგი რამე იქნება, მე ერთს ვიტყვი, რომ მშვიდობა და სიწყნარე მინდა ქვეყანაში. სიმშვიდე და სიწყნარე იმის ფასად, რომ ერთმანეთთან ურთიერთობა ქართველებს საუკეთესო გვქონდეს. ბევრს ეს არ უნდა და ხდება რა, მიდიან, მოგზაურობენ, ჩადიან გმირთა მოედანზე და ფიცს დებენ, რომ იბრძოლებენ საქართველოსთვის. ნახეთ რა ლოზუნგი შემოაქვთ „ენა, მამული და ერთობა“-ო, ფიცს დებენ. ერთობის მოწინააღმდეგე ვინ არის, მაგრამ რა გაგიკეთებია საქართველოსთვის, რა გაგიკეთებია, რომ ილია ჭავჭავაძეს დევიზს უცვლი“, – აღნიშნა მეუფემ.

აშშ- ში შესაძლოა TikTok-ი აიკრძალოს

აშშ-ის კონგრესის წარმომადგენელთა პალატამ ახალ კანონ პროექტს დაუჭირა მხარი, რომელიც ქვეყნის მასშტაბით TikTok-ის აკრძალვის შესაძლებლობას იძლევა.

TikTok-ის მფლობელ ჩინურ კომპანიას პლატფორმის გასაყიდად ცხრა თვიანი ვადა მიეცემა. წინააღმდეგ შემთხვევაში, ის ამერიკულ აპლიკაციებში აიკრძალება. კანონ პროექტის თანახმად, პრეზიდენტ ჯო ბაიდენს უფლება ეძლევა, გაახანგრძლივოს ვადა კიდევ 90 დღით, თუ დადგინდება, რომ გაყიდვის მიმართულებით პროგრესი მიღწეულია.

„შუბი ხალთაში არ დაიმალება“. ირაკლი ღარიბაშვილმა პირდაპირ თქვა: ევროკავშირის წევრობისთვის მზად არ ვართ, შევეშვათო” -იაგო კაჭკაჭიშვილი

როგორც იტყვიან, „შუბი ხალთაში არ დაიმალება“. ირაკლი ღარიბაშვილმა პირდაპირ თქვა: ევროკავშირის წევრობისთვის მზად არ ვართ, შევეშვათო , – ამის შესახებ სოციოლოგი იაგო კაჭკაჭიშვილი სოციალურ ქსელში წერს და ეხმაურება „ქართული ოცნების“ თავმჯდომარის განცხადებას, რომლის თანახმად, საქართველო მზად არ არის, გახდეს ევროკავშირის წევრი ქვეყანა.

მისი თქმით, „ქართულ ოცნებას“ ევროკავშირში გაწევრიანება არ სურს, ხოლო კანდიდატის სტატუსი პროევროპელი ამომრჩევლისთვის „გადაგდებული ძვალია“.

„არ უნდათ ევროკავშირში ქვეყნის გაწევრიანება. კანდიდატის სტატუსს კი ასე უყურებს ეს ხელისუფლება: „ეგდოს“, არაფერს აფუჭებს, ჩვენი პროევროპელი (და შეცდენილი) ამომრჩევლებისთვის გადაგდებული ძვალია, რათა არც ერთი ხმა არ დავკარგოთ არჩევნებში.

უკვე წლებია, ხელისუფლების მხრიდან მიდის ევროკავშირის „გაშავება“, ამ ფერხულში ჩართულია სახელისუფლო მედია, მოსყიდული „ექსპერტები“, სასამართლო, ბობოლა სასულიერო პირები, ტროლ-ბოტები…

თუმცა, ფაქტია: ხელისუფლების ანტიევროპულმა ისტერიამ ვერ შექმნა დომინანტური საზოგადოებრივი აზრი, ვერ ჩამოაყალიბა პარადიგმა, ვერ წარმოშვა ბუნებრივი აქტივიზმი… რაც მთავარია, ანტიევროპული ისტერიის გავლენიდან არსებითად ამოვარდნილი აღმოჩნდა ახალგაზრდა თაობა. სწორედ ამას ვუყურებთ ახლა ჩვენ”, – წერს კაჭკაჭიშვილი.

შეგახსენებთ, „ქართული ოცნების“ თავმჯდომარემ, ირაკლი ღარიბაშვილმა განაცხადა, რომ საქართველო ევროკავშირში გაწევრიანებისთვის მზად არაა.

“ჯერ საერთოდ ვთქვათ ის, რომ ქვეყანამ მიაღწია მაქსიმუმს, პიკი იყო შარშანდელი დეკემბერი , ჩვენ გავხდით კანდიდატი ქვეყანა. შემდეგ ეტაპი უკვე არის გაწევრიანება. დღეს ქვეყანა ვერ გახდება, დღეს არ ვართ მზად, რომ წევრი ქვეყანა, ხომ ასეა, ხომ მეთანხმებით? არ არის კონსენსუსი იმაზე, რომ დღესვე შეიძლება გახდეს ქვეყანა ევროკავშირის წევრი, მითუმეტეს ახლა, ამდენი პრობლემებია და იცით, რომ მთელი დრო დასჭირდება ამას. დღეს არ არის ევროკავშირი მზად გაფართოებისთვის და ამას დრო დასჭირდება და ბევრ რამეზე, ბევრ ფაქტორზეა დამოკიდებული ეს შემდეგი ნაბიჯები. ძალიან მარტივად მინდა გითხრათ, თუ იმ დროისთვის, როდესაც ქვეყანა იქნება მზად და გვეტყვიან,რომ აი, ხვალვე გახდებით ევროკავშირის წევრი ქვეყანა ძალიან მარტივად შეიძლება ამ კანონის გაუქმებაც, გადახედვა, შეცვლა, ახლის მიღება, ასე რომ ნუ ნერვიულობთ, ყველაფერი არის ძალიან კარგად“, – აცხადებს ღარიბაშვილი.

ეკონომიკურმა საბჭომ 500 მეგავატამდე სიმძლავრის ენერგეტიკული პროექტების განხორციელებაზე დადებითი გადაწყვეტილებები მიიღო

სადაზღვევო სექტორსა და საპენსიო დაზღვევის სფეროში განსახორციელებელი რეფორმები, ენერგეტიკულ პროექტებში დაგეგმილი ინვესტიციები და საპრივატიზაციო გეგმები განიხილეს ეკონომიკური საბჭოს სხდომაზე, რომელიც მთავრობის ადმინისტრაციაში გაიმართა. სხდომაზე ყურადღება დაეთმო ენერგეტიკულ პროექტებში ინვესტიციების განხორციელებას. პრემიერ-მინისტრმა ირაკლი კობახიძემ ხაზი გაუსვა ქვეყანაში ამ კუთხით არსებული პოტენციალის მაქსიმალურად ათვისების მნიშვნელობას. საბჭომ ჯამურად 500 მეგავატამდე სიმძლავრის ენერგეტიკულ პროექტებთან დაკავშირებით დადებითი გადაწყვეტილებები მიიღო.

ეკონომიკური საბჭოს წევრებმა ასევე იმსჯელეს სამგზავრო და სატვირთო გადაზიდვების რეფორმის კონკრეტულ დეტალებზე და კანონმდებლობით გათვალისწინებული შესაბამისი ნორმატიული აქტების დამტკიცებაზე, რომელიც მთავრობას უახლოეს პერიოდში წარედგინება.

ისრაელში ვადამდელი არჩევნების მოთხოვნით მრავალათასიანი საპროტესტო აქცია გაიმართა

ისრაელში ვადამდელი არჩევნების მოთხოვნით მრავალათასიანი საპროტესტო აქცია გაიმართა.

„როიტერის“ ინფორმაციით, მოქალაქეები პრემიერ-მინისტრ ბენიამინ ნეთანიაჰუს გადადგომას და 133 მძევალის გათავისუფლებას მოითხოვენ, რომლებიც 7 ოქტომბრის თავდასხმის შემდეგ „ჰამასის“ ტყვეობაში არიან.

საპროტესტო აქციები გაიმართა როგორც თელ ავივში, ასევე იერუსალიმში, ნეთანიაჰუს საცხოვრებელ სახლთან.

წარმომადგენელთა პალატამ რუსული გაყინული აქტივების უკრაინის სასარგებლოდ კონფისკაციასაც დაუჭირა მხარი

წარმომადგენელთა პალატამ რუსული გაყინული აქტივების უკრაინის სასარგებლოდ კონფისკაციასაც დაუჭირა მხარი. კანონ პროექტს ხმა 360-მა კონგრესმენმა მისცა 58-ის წინააღმდეგ.

კონგრესის ამ გადაწყვეტილებით შეერთებული შტატების პრეზიდენტს უფლებამოსილება ეძლევა, გამოიყენოს რუსეთის სუვერენული აქტივების კონფისკაციის პროცედურა შესაბამისი სახსრების შემდგომი გადაცემით სპეციალურ ფონდებში, რომელიც უკრაინის მხარდაჭერას მოხმარდება.

ისრაელმა ლიბანში „ჰეზბოლას“ ობიექტებზე ავიაიერიშები განახორციელა

ისრაელის გამანადგურებელმა თვითმფრინავებმა გუშინ ღამით, ლიბანის სამხრეთ ნაწილში, სამ რაიონში დაჯგუფება „ჰეზბოლას“ რამდენიმე ობიექტს დაარტყა, – ამის შესახებ ისრაელის თავდაცვის ძალები იუწყება.

თავდაცვის ძალების ცნობით, ერთ-ერთი თავდასხმის სამიზნე ტაირ ჰარფაში, ტერორისტული ჯგუფის ერთ-ერთ ობიექტზე, „ჰეზბოლას“ წევრი იყო.

ცალკეული დარტყმები განხორციელდა „ჰეზბოლას“ სადამკვირვებლო პუნქტზე ოდაისეში და შენობებზე ხიამში.

საქართველოში 35 გრადუსამდე დათბება – გაიგეთ, სად იქნება ყველაზე მაღალი ტემპერატურა

20-22 აპრილს საქართველოს ზოგიერთ რაიონში სითბოს ფონზე მოსალოდნელია ხანმოკლე წვიმა ელჭექით. 20 აპრილს დასავლეთ საქართველოში ჰაერის ტემპერატურა ისევ +30, +35 გრადუსამდე მოიმატებს, შემდეგ დღეებში კი შედარებით დაიკლებს.

თბილისში სითბოს ფონზე შესაძლოა ხანმოკლე წვიმა ელჭექით აღინიშნოს. ჰაერის ტემპერატურა დღისით +26, +28 გრადუსი დაფიქსირდება.

სანაპირო რაიონებში (ბათუმი, ქობულეთი, ანაკლია, ფოთი): მოსალოდნელია თბილი და უმეტესად უნალექო ამინდი. 20 აპრილს ჰაერის ტემპერატურა დღისით +31, +33 გრადუსამდე მოიმატებს, ხოლო შემდეგ დღეებში შედარებით დაიკლებს.

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი): 20 და 22 აპრილს მოსალოდნელია თბილი და უნალექო ამინდი. 21 აპრილს ზოგან იწვიმებს. 20 აპრილს ჰაერის ტემპერატურა დღისით +33, +35 გრადუსამდე მოიმატებს, ხოლო შემდეგ დღეებში შედარებით დაიკლებს.

დასავლეთ საქართველოს მთიან რეგიონებში (ამბროლაური, ონი, ცაგერი. შოვი, ჭიათურა, საჩხერე, ხულო): 20 და 22 აპრილს მოსალოდნელია თბილი და უნალექო ამინდი. 21 აპრილს ზოგან იწვიმებს. 20 აპრილს ჰაერის ტემპერატურა დღისით +30, +32 გრადუსამდე მოიმატებს, ხოლო შემდეგ დღეებში შედარებით დაიკლებს.

დასავლეთ საქართველოს მაღალმთიან რეგიონებში (მესტია, ბახმარო): 20 და 22 აპრილს მოსალოდნელია თბილი და უნალექო ამინდი. 21 აპრილს ზოგან იწვიმებს. ჰაერის ტემპერატურა დღისით +21, +23 გრადუსი იქნება.

ქართლში (რუსთავი, ბოლნისი, მარნეული, გარდაბანი, გორი, ცხინვალი): თბილი და უნალექო ამინდია მოსალოდნელი. სითბოს ფონზე ზოგან გაწვიმდება, შესაძლებელია ელჭექიც. ჰაერის ტემპერატურა დღისით +27, +29 გრადუსი დაფიქსირდება.

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): ზოგან გაწვიმდება, შესაძლებელია ელჭექი და სეტყვა. ჰაერის ტემპერატურა დღისით +27, +29 გრადუსი დაფიქსირდება.

აღმოსავლეთ საქართველოს მთიან რეგიონებში (ახალციხე, ბორჯომი, დუშეთი, თიანეთი, ფასანაური, დედოფლისწყარო,): ზოგან გაწვიმდება, შესაძლებელია ელჭექი და სეტყვა. ჰაერის ტემპერატურა დღისით +24, +26 გრადუსი დაფიქსირდება.

აღმოსავლეთ საქართველოს მაღალმთიან რეგიონებში (ახალქალაქი, წალკა, ბაკურიანი, გუდაური, ომალო): ზოგან გაწვიმდება, შესაძლებელია ელჭექი და სეტყვა. ჰაერის ტემპერატურა დღისით +19, +21 გრადუსი დაფიქსირდება.

რა ეღირება დოლარი და ევრო 21 აპრილს – ვალუტის კურსი

ეროვნული ბანკის მიერ გამოქვეყნებული მონაცემების თანახმად, 1 აშშ დოლარის ღირებულება 2.6728 ლარი გახდა. კურსი, რომელიც მანამდე მოქმედებდა, 2.6753 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0025 ლარი შეადგინა.

რაც შეეხება ევროს, მისი კურსი 2.8532 ლარია. მაშინ, როცა მანამდე მოქმედი კურსი 2.8473 ლარს შეადგენდა. შესაბამისად, ევროს ცვლილებამ 0.0059 29/03/24 დან – 18/04/24 მდე ლარი შეადგინა.

ავიაკომპანია Transavia-მ ამსტერდამი-თბილისი-ამსტერდამის მიმართულებაზე ოპერირება დაიწყო

თბილისის საერთაშორისო აეროპორტში დაბალბიუჯეტურმა ნიდერლანდურმა ავიაკომპანია Transavia-მ დაიწყო ოპერირება. ნიდერლანდების სამეფოს ავიახაზებმა ამსტერდამი-თბილისის მიმართულებით პირველი ფრენა შეასრულა, თბილისში 187 მგზავრი ჩამოფრინდა, ხოლო ამსტერდამში 185 გაემგზავრა.

„ტავ ჯორჯიას“ ინფორმაციით, ზაფხულის სანავიგაციო სეზონზე ავიაკომპანია ამსტერდამი-თბილისის მიმართულებით რეისებს კვირაში ორჯერ, ყოველ ოთხშაბათსა და შაბათს, Boeing 737-8 ტიპის საჰაერო ხომალდით შეასრულებს.

თბილისის საერთაშორისო აეროპორტში ოფიციალური ღონისძიება გაიმართა, რომელსაც თბილისისა და ბათუმის საერთაშორისო აეროპორტების გენერალური მენეჯერი თეა ზაქარაძე, ნიდერლანდების სამეფოს ელჩი საქართველოში მელინე არაკელიანი, Transavia-ს აღმასრულებელი დირექტორი მარსელ დე ნოიერი და საქართველოს საავიაციო ხელისუფლების წარმომადგენლები ესწრებოდნენ.

Transavia ნიდერლანდების სამეფოს ნომერ პირველი ბიუჯეტური და სიდიდით მეორე ავიაგადამზიდავია. Air France – KLM ჯგუფის წევრი ავიაკომპანია, 50 წელია, ნიდერლანდებიდან 20-ზე მეტი ქვეყნის 100-ზე მეტი მიმართულებით დაფრინავს და ყოველწლიურად ცხრა მილიონი მგზავრი გადაჰყავს. Transavia-ს შვიდი ბაზა აქვს. ავიაკომპანიის ხომალდები ბაზირებულია ნიდერლანდების სამეფოს, საფრანგეთისა და გერმანიის აეროპორტებში.