აშშ – ის ახალი ადმინისტრაციის ხედვებს ის ხედვები ზედმიწევნით ემთხვევა, რაც საქართველოს ახალი ადმინისტრაციის მოსვლამდეც ჰქონდა. ეს ყველაფერი გაცილებით უფრო ინტენსიურ თანამშრომლობას ითხოვს, წერილში პრეზიდენტიც ყურადღებას სწორედ ამ საკითხებზე ამახვილებს, – ამის შესახებ პარლამენტის პირველმა ვიცე-სპიკერმა, გია ვოლსკიმ ჟურნალისტებთან მიხეილ ყაველაშვილის დონალდ ტრამპისადმი მიწერილ წერილზე საუბრისას განაცხადა.

ვოლსკი იმედოვნებს, რომ წერილი კიდევ ერთი სერიოზული საფუძველი გახდება იმისათვის, რომ ორმა ქვეყანამ ამ თემებზე იმსჯელოს.

„საკმაოდ სერიოზული გლობალური გამოწვევებია, ბევრი საფრთხეა რეგიონთან, მათ შორის საქართველოსთან მიმართებაში. საქართველოს მიმართ „დიფ სთეითის“ რესურსები საკმაოდ აგრესიულია. აშშ-ის ახალი ადმინისტრაციის ხედვებს ის ხედვები ზედმიწევნით ემთხვევა, რაც საქართველოს ახალი ადმინისტრაციის მოსვლამდეც ჰქონდა. ეს ყველაფერი გაცილებით უფრო ინტენსიურ თანამშრომლობას ითხოვს, წერილში პრეზიდენტიც ყურადღებას სწორედ ამ საკითხებზე ამახვილებს. იმედია, ეს კიდევ ერთი სერიოზული საფუძველი გახდება იმისათვის, რომ ამ თემებზე ვიმსჯელოთ. ამერიკის რესურსი შეუდარებლად დიდია საქართველოს რესურსთან შედარებით. ჩვენ მძლავრი, კეთილგანწყობილი მოკავშირე გვჭირდება – რესურსი არსებობს, რომ ამერიკასა და საქართველოს შორის ასეთი ურთიერთობა ჩამოყალიბდეს“, – აღნიშნა გია ვოლსკიმ.

კითხვაზე, რატომ ვერ დაიმსახურა აქამდე ამერიკის ყურადღება საქართველომ, ვოლსკიმ უპასუხა, რომ „მთელი რიგი ფაქტორები არსებობს, რაც შესაძლოა, ორმხრივ ურთიერთობაში პროგრესის განვითარებას აფერხებს“.

„ჯერ კიდევ ჩამოყალიბებული არ არის რუსეთსა და ამერიკას შორის ურთიერთობები, ასევე ამერიკასა და ჩინეთს შორის. ბევრი თემა და კითხვაა ამერიკასა და ევროკავშირს შორის ურთიერთობებში. შესაძლოა, ეს არის გარემოებები, მაგრამ მიგვაჩნია, რომ მთელი რიგი გარემოებების მიუხედავად, საფრთხეები, რომელიც საქართველოშია და სამხრეთ კავკასიას ახასიათებს, ვაშინგტონისგან გაცილებით უფრო მეტ და ინტენსიურ ყურადღებას ითხოვს“, – განაცხადა გია ვოლსკიმ.

ჟურნალისტის შეკითხვას, ვინ დაწერა წერილი, რომელიც მიხეილ ყაველაშვილმა დონალდ ტრამპს გაუგზავნა, ვოლსკიმ უპასუხა, რომ ოპოზიციური ლიდერებისგან განსხვავებით ყაველაშვილს არ აკლია არც ინტელექტი და არც ცოდნა.

„სერიოზული კითხვებიდან არასერიოზულზე გადადიხართ. თქვენი ლიდერებისგან განსხვავებით, ჩვენს პრეზიდენტს არ აკლია არც ინტელექტი, არც ცოდნა. დამოუკიდებლად ყაველაშვილს არაერთხელ დაუფიქსირებია თავისი პოზიცია იმ ვითარებასთან დაკავშირებით, რომელიც ხშირ შემთხვევაში ურთიერთობებში დამოკიდებულებას ახასიათებს. ყაველაშვილისგან ჩამოყალიბებული პოზიცია არ მოგისმენიათ გინდათ პარლამენტში და გინდა ინტერვიუების დროს?” – განაცხადა ვოლსკიმ.

საპროცედურო საკითხთა და წესების საპარლამენტო კომიტეტმა ანრი ოხანაშვილისთვის უფლებამოსილების ვადამდე შეწყვეტას მხარი დაუჭირა.

სახელმწიფო უსაფრთხოების სამსახურის ხელმძღვანელის თანამდებობაზე მას საპარლამენტო უმრავლესობის ლიდერი, ფრაქცია „ქართული ოცნების“ თავმჯდომარე და პარტიის აღმასრულებელი მდივანი მამუკა მდინარაძე შეცვლის.

როგორც კომიტეტის თავმჯდომარემ დავით მათიკაშვილმა განმარტა, სახელმწიფო უსაფრთხოების სამსახურის უფროსის გადადგომის თაობაზე განცხადებას პარლამენტი ცნობად იღებს, დასკვნის პროექტს კი საპროცედურო საკითხთა კომიტეტი ამზადებს.

„საპროცედურო საკითხთა კომიტეტმა პარლამენტის რეგლამენტის მე-9 მუხლის მე-3 პუნქტის და 212-ე მუხლის მე-4 პუნქტის შესაბამისად, დაადგინა სახელმწიფო უსაფრთხოების სამსახურის უფროსის ანრი ოხანაშვილის მიერ თანამდებობიდან ნებაყოფლობით გადადგომის შესახებ პარლამენტის თავმჯდომარის სახელზე 26 აგვისტოს წარდგენილი განცხადების ნამდვილობა. შესაბამისად, მოქმედი კანონმდებლობის საფუძველზე, კომიტეტს მიაჩნია, რომ ანრი ოხანაშვილს ვადამდე შეუწყდეს სახელმწიფო უსაფრთხოების სამსახურის უფროსის უფლებამოსილება“, – ნათქვამია დასკვნის პროექტში.

კომიტეტის დასკვნის პროექტი პარლამენტის ბიუროს და პლენარულ სხდომას წარედგინება.

„ბატონი ანრი, როგორც ვიცით პრემიერის განცხადებიდან, გადაინაცვლებს მისი მრჩევლის პოზიციაზე, სადაც არის ძალიან მნიშვნელოვანი ის გამოცდილება, ის მაღალი პროფესიონალიზმი, რომელიც ბატონ ანრი ოხანაშვილს აქვს უსაფრთხოების თვალსაზრისით, რაც აუცილებლად ძალიან წაადგება ჩვენს ქვეყანას, განსაკუთრებით ანალიტიკური თვალსაზრისით. ამიტომ, მას ახალ პოზიციაზე წარმატება მინდა ვუსურვოთ.

ასევე, როგორც ვიცით, სახელმწიფო უსაფრთხოების სამსახურის უფროსის პოზიციაზე გათვალისწინებულია ბატონი მამუკა მდინარაძის კანდიდატურა. იქნება შესაბამისი პროცედურები მისი მოსმენის თავდაცვის კომიტეტის ფარგლებში, ზოგადად, ამ საკითხის განხილვის კომიტეტის ფარგლებში და შემდგომ უკვე ეს საკითხი გადაინაცვლებს კენჭისყრაზე. ღრმად ვარ დარწმუნებული, რომ პარლამენტისგან მას სრული მხარდაჭერა ექნება. ამიტომ მას, როგორც მაღალი დონის პროფესიონალს, საკმაოდ დიდი გამოცდილების მქონეს სამართალდამცავ ორგანოებში მუშაობის, გამორჩეულ პატრიოტს და ლიდერული თვისებებით დაჯილდოებულ ადამიანს, მინდა მხოლოდ და მხოლოდ წარმატება ვუსურვო იმ პოზიციაზე, რომელსაც, დარწმუნებული ვარ, ის დაიკავებს“, – აღნიშნა კომიტეტის თავმჯდომარე დავით მათიკაშვილმა.

ჩვენი ხელისუფლების ყველა განცხადება თუ წერილი მიუთითებს, რომ ურთიერთობების ახალი ფურცლიდან დაწყება გვინდა, – ამის შესახებ დედაქალაქის მერმა, კახა კალაძემ მედიასთან განაცხადა.

კალაძე პრეზიდენტ მიხეილ ყაველაშვილის მიერ აშშ-ის პრეზიდენტისთვის, დონალდ ტრამპისთვის გაგზავნილ ღია წერილს გამოეხმაურა და აღნიშნა, რომ ის, რაც ძველი ადმინისტრაციის პირობებში ხდებოდა, სრული კატასტროფა იყო.

„პრეზიდენტს აბსოლუტურად ყველა წინანადებაში ვეთანხმები. ჩვენთვის აშშ-თან ურთიერთობების სუფთა ფურცლიდან დაწყება და კიდევ უფრო გაღრმავება პრინციპულად მნიშვნელოვანია. პარალელურად, ჩვენ დონალდ ტრამპს ვგულშემატკივრობთ ორი მთავარი დაპირების შესრულებაში – ე.წ. დიფ სთეითის დამარცხებასა და რუსეთ-უკრაინის ომის დასრულებაში. ჩვენი ქვეყნისთვის ორივე საკითხი მნიშვნელოვანია, თუმცა ჩვენ მაინც ჩვენი ქვეყნის ინტერესებიდან გამოვდივართ და, როგორც წერილშია აღნიშნული, სტრატეგიული პარტნიორობისთვის ხელისუფლება მზადყოფნას გამოთქვამს.

ის, რაც ძველი ადმინისტრაციის პირობებში ხდებოდა, სრული კატასტროფა იყო. ამხელა სახელმწიფოს წარმომადგენლები ურცხვად გვიმტკიცებდნენ თეთრზე, რომ შავია. გვაყენებდნენ შეურაცხყოფას. მათი ყველა განცხადება სიცრუით, მუქარითა და ბინძური პროპაგანდით იყო გაჯერებული რაც კატეგორიულად მიუღებელია. შესაბამისად, ჩვენ მიერ გაკეთებული ყველა განცხადება თუ წერილი მიუთითებდა იმაზე, რომ ჩვენ ახალი ფურცლიდან დაწყება გვინდა. ჩვენ მზად ვართ მეგობრობისთვის, თანამშრომლობისთვის, პარტნიორობისთვის და ეს უნდა იყოს ორმხრივი“, – აღნიშნა კახა კალაძემ.

მისივე თქმით, დონალდ ტრამპმა გაპრეზიდენტებისთანავე გააკეთა განცხადება იმაზე, რაზეც მანამდე „ქართული ოცნება – დემოკრატიული საქართველო“ საუბრობდა, კერძოდ, ე.წ. დიფ სთეითის საკითხის შესახებ.

„ზოგადად, ჩვენ ვხედავთ, რომ სომხეთ-აზერბაიჯანს შორის მშვიდობის დამყარების თვალსაზრისით ძალიან მნიშვნელოვანი ხელმოწერა მოხდა. რეგიონში საქართველო თავისი ადგილმდებარეობით, კულტურით, ტრადიციებით უმნიშვნელოვანესი ქვეყანაა. შესაბამისად, ჩვენ მზად ვართ ურთიერთობებისთვის.

ამდენი წელია, ამ თემაზე ვსაუბრობთ და გლობალურ ომის პარტიას ვახსენებთ. ჩვენი მისამართით ისმოდა ქილიკი. მაგრამ აშშ-ის ახალმა პრეზიდენტმა მეორე დღესვე გააკეთა განცხადება და მთელ მსოფლიოს დაანახა ის, რაზეც თუნდაც „ქართული ოცნება“ მანამდე საუბრობდა. დღეს ერთ-ერთი სერიოზული გამოწვევა სწორედ ე.წ. დიფ სთეითის დამარცხებაა. დონალდ ტრამპმა პირდაპირ ხელისგულზე დაგვიდო ყველაფერი, თუ რომელი ორგანიზაციები იყვნენ დაკავებული, რომ მსოფლიოს სხვადასხვა ქვეყანაში, და მათ შორის საქართველოში, რევოლუციები და სახელმწიფო გადატრიალებები დაეფინანსებინათ. ბინძური კამპანია ჩვენ წინააღმდეგ, რომელიც იფუთება ისე, თითქოს ხელისუფლება რუსულ საქმეს აკეთებს, ესეც კიდევ ერთი დასტურია იმის, რომ ჩვენ გვინდა, აშშ-თან მეგობრული ურთიერთობა გვქონდეს“, – განაცხადა კახა კალაძემ.

საქართველოს პრეზიდენტმა, მიხეილ ყაველაშვილმა ამერიკის შეერთებული შტატების პრეზიდენტს, დონალდ ტრამპს ღია წერილით მიმართა.

ევროკავშირზე უკეთესი გაერთიანება ჯერ არ ყოფილა, თუმცა დაცლილია იმ ღირებულებებისგან, საითაც ქართველი ხალხი და ჩვენი სახელმწიფო მიისწრაფოდა, – ამის შესახებ თბილისის მერმა, კახა კალაძემ „მემარცხენე ალიანსის“ მიერ ევროკავშირთან დაკავშირებით გაკეთებული განცხადების შეფასებისას აღნიშნა.

მისი თქმით, ევროპულმა ბიუროკრატიამ სერიოზული პრობლემები შექმნა როგორც თავად ევროპისთვის, ისე მეგობარი ქვეყნებისთვის.

„ევროპული გაერთიანება თავისი შინაარსით, რაზეც იყო დაფუძნებული, ძალიან კარგია და ამაზე უკეთესი გაერთიანება ჯერ არ ყოფილა, მაგრამ რასაც ბოლო დროს ვხედავთ, რა პროცესებიც ვითარდება, საკმაოდ მძიმე ვითარებაა. ევროკავშირი აბსოლუტურად დაცლილია იმ ღირებულებებისგან, საითაც ქართველი ხალხი და ჩვენი სახელმწიფო მიისწრაფოდა. ევროპულმა ბიუროკრატიამ სერიოზული პრობლემები შექმნა დღეს როგორც თავად ევროპისთვის, ისე მეგობარი ქვეყნებისთვის“, – განაცხადა კახა კალაძემ.

მისივე თქმით, ბოლო პერიოდში ევროკავშირის ზოგიერთი წარმომადგენლის მიერ საქართველოსთან მიმართებით გაკეთებული განცხადებები შეუთავსებელია ასოცირების ხელშეკრულებით ნაკისრ ვალდებულებებთან.

„ჩვენთვის ყველაზე მთავარი და მნიშვნელოვანია ჩვენი ქვეყნის ინტერესები. მოთხოვნები, რომლებსაც ვისმენთ, აბსოლუტურად შეუთავსებელია ასოცირების ხელშეკრულებით ნაკისრ ვალდებულებებთან, რასაც ქართული სახელმწიფო ზედმიწევნით ასრულებს. ვერ მოიყვანთ ვერცერთ მაგალითს, რომ რაიმე შეუსრულებელია. ადამიანის უფლებები ამ ქვეყანაში დაცულია ისე, როგორც არასდროს. ორმაგი სტანდარტია, რაზეც ისინი აპელირებენ. ყველას გვახსოვს, რა ხდებოდა 2012 წლამდე ქვეყანაში. ადამიანის უფლებები თუ ილახებოდა, ეს იყო სწორედ 2012 წლამდე პერიოდში. განსხვავებულ მოსაზრებას ვერ გამოხატავდი, მაშინვე ან შენ დაგიჭერდნენ, ან შენი ოჯახის წევრებს გააუბედურებდნენ, წაართმევდნენ და ამას უწოდებდნენ დემოკრატიის შუქურას. წარმოგიდგენიათ? ის, რაც ხდებოდა 2012 წლამდე, თურმე დემოკრატიის შუქურა ყოფილა და დღევანდელი მოცემულობა, ვითარება – პრობლემური. რა გგონიათ, ხალხს თვალები აქვს ახვეული და ვერ ხედავს იმ რეალურ ვითარებას, რა იყო და დღეს რა მდგომარეობაა? ხალხს აქვს საშუალება, გააკეთოს სწორი ანალიზი და იმიტომ იღებს ყოველთვის სწორ გადაწყვეტილებას, როგორც ოქტომბერში საპარლამენტო არჩევნებზე მიიღო“, – აღნიშნა დედაქალაქის მერმა.

როგორც კალაძემ აღნიშნა, ქართული სახელმწიფო აპირებს, კვლავ ზედმიწევნით შეასრულოს ის მოთხოვნები, რაც ქვეყანას ევროკავშირთან ასოცირების ხელშეკრულებით აქვს ნაკისრი.

„ასოცირების ხელშეკრულებით გათვალისწინებული რაც არის, ყველა ნაბიჯის ზედმიწევნით შესრულებას ვაპირებთ. პოლიტიკური მოტივებით არის გაკეთებული განცხადებები, რომ გამჭვირვალობა ცუდი ყოფილა. მთელი ამ ხნის განმავლობაში ვიღაცამ მაინც გვითხრას, რატომ არის გამჭვირვალობა ცუდი? ვიღებთ ერთადერთ პასუხს – იმიტომ. არ არის ეს სერიოზული. პრემიერ-მინისტრმა თქვა, მზად ვართ, დავსხდეთ დიპლომატიურ კორპუსთან და მომიყვანეთ მაგალითები, არგუმენტები, რატომ არის გამჭვირვალობა ცუდი ან რატომ ეწინააღმდეგება აღნიშნული კანონმდებლობა ევროპულ მომავალს, ევროპულ ღირებულებებსო. არანაირი პასუხი, რადგან ვიცით, რეალურად რაც ხდება“, – განაცხადა კახა კალაძემ.

ცხოვრებაში კანონდარღვევა არ ჩამიდენია და არ გადამიდგამს კანონსაწინააღმდეგო ნაბიჯი. ვერ წარმოადგენთ მსგავს ფაქტს, რადგან ასეთი რამ არ არსებობს, – განაცხადა დედაქალაქის მერმა მედიასთან ე.წ. ვაგონშემკეთებელი ქარხნის ტერიტორიაზე საცხოვრებელი კომპლექსის მშენებლობის საკითხზე საუბრისას.

ჟურნალისტის კითხვაზე, რატომ შენდება აღნიშნულ მისამართზე საცხოვრებელი კომპლექსი და არა რეკრეაციული სივრცე, კახა კალაძე პასუხობს, რომ ტერიტორია შეიძინა კერძო კომპანიამ და თბილისის საკრებულოსთან შეთანხმებულ პროექტს ახორციელებს, რაშიც კანონდარღვევა არაფერია.

„და რატომ უნდა გამოგვეყენებინა რეკრეაციულ სივრცედ? აღნიშნული ტერიტორია იყო საკუთრება ბადრი წილოსანის, რომელმაც კონკრეტული არეალის განვითარების მიზნით, განაშენიანების რეგულირების გეგმა შეათანხმა და ეს საკრებულოში დამტკიცდა. შემდეგ ილია წულაიას კომპანიამ შეიძინა და ის გეგმა და პროექტი, რომელიც დამტკიცებული იყო, ამას ახორციელებს. რა არის ამაში ცუდი და სად ნახეთ კორუფცია?

რაც შეეხება ჩემი და ილია წულაიას ნათესაურ კავშირს, მე ამას არ ვმალავ. სანამ მე ხელისუფლებაში მოვიდოდი, ეს ადამიანი მანამდეც ბიზნესსაქმიანობას ეწეოდა და დღესაც აგრძელებს. იმის გამო, რომ ჩვენ ბავშვობის მეგობრები ვართ და ჩემი შვილის ნათლიაა, ბიზნესს თავი დაანებოს? რამე უკანონოდ აქვს ამ ადამიანს გაკეთებული? კერძო საკუთრება იყიდა და რა შუაშია აქ ჩემი გავლენა? კერძო პირისგან კერძო პირმა ტერიტორია იყიდა და პროექტს ახორციელებს. ვინმემ ისარგებლა იმით, რომ ჩემი ოჯახის ახლობელია? მომიტანეთ ერთი ფაქტი“, – განაცხადა თბილისის მერმა.

ამასთან, კახა კალაძის თქმით, არაერთხელ გავრცელდა მის წინააღმდეგ ბრალდებები, თუმცა, ვერავინ მოიყვანს ფაქტებს, რომ კანონდარღვევა ჩაიდინა.

„მთელი ამ წლების განმავლობაში, ჩემს წინააღმდეგ სიბინძურის გავრცელებით, ტყუილების შეთითხნით ხართ დაკავებული. ამდენი ხანია პოლიტიკაში ვარ და ხომ შეიძლება ჩემს მიერ ერთი კანონდარღვევა ან არასწორი გადაწყვეტილება წარმოადგინოთ კონკრეტული ფაქტებით? მაგრამ ვერ წარმოადგენთ, რადგან ასეთი რამ არ არსებობს. ცხოვრებაში კანონდარღვევა არ ჩამიდენია და არ გადამიდგამს კანონსაწინააღმდეგო ნაბიჯი. პირველ რიგში, საკუთარ თავს ვცემ პატივს და ვუფრთხილდები იმ დამოკიდებულებას, რომელიც ქვეყნის მოსახლეობის უმრავლესობას ჩემს მიმართ აქვს. ამას ძალიან ვაფასებ და ვუფრთხილდები“, – აღნიშნა დედაქალაქის მერმა.

ოპოზიციაში არსებული დაპირისპირება არ მაინტერესებს, თავად გაერკვნენ, ვინ სად და როგორ იქნება, – ასე გამოეხმაურა თბილისის მერი კახა კალაძე „ნაციონალურ მოძრაობასა“ და თამარ ჩერგოლეიშვილს შორის არსებულ დაპირისპირებას.

„ოპოზიციაში არსებული დაპირისპირება არ მაინტერესებს. იმდენი საქმე გვაქვს, იმდენი გამოწვევებია დედაქალაქში, არ მაინტერესებს „ნაციონალური მოძრაობა“ ჩერგოლეიშვილს დაუპირისპირდება, თუ – პირიქით. ვინ სად იქნება და როგორ, ეს მათი გადასაწყვეტია, თვითონ გაერკვნენ ყველაფერში“, – განაცხადა კახა კალაძემ.

მისივე შეფასებით, ოპოზიცია ხშირად საუბრობს სახელმწიფოს გადატრიალებაზე, რაც არსებული ხელისუფლების პირობებში გამორიცხულია.

„ამ ტიპის განცხადებებს ოპოზიციის მხრიდან ბევრჯერ ვისმენთ. ქვეყანაში არც რევოლუცია იქნება, არც სახელმწიფო გადატრიალება. ფრთხილად იყვნენ, ვინც რამეს გაბედავს, კანონის ფარგლებში, ყველას შესაბამისი პასუხი გაეცემა“, – აღნიშნა კახა კალაძემ.