ევროპა თუ მოახერხებს არსებითად „დიფ სთეითის“ გავლენის დაძლევას, ამ შემთხვევაში, ურთიერთობები გაჯანსაღდება, მოთმინებით ველოდებით ამ ყველაფერს, – ამის შესახებ პრემიერ-მინისტრმა, ირაკლი კობახიძემ ჟურნალისტებს განუცხადა.

კითხვაზე, რომელიც ბალტიისპირეთის ქვეყნების მხრიდან სანქციებს შეეხებოდა, მთავრობის მეთაურმა აღნიშნა, რომ ბალტიისპირეთის ქვეყნებს ყველაზე მეტად აქვთ დაკარგული სუვერენიტეტი, მოქმედებენ „დიფ სთეითის“ კარნახით და ეს ყველაფერი სწორედ ამას უკავშირდება.

„ბალტიისპირეთის ქვეყნებს ყველაზე მეტად აქვთ დაკარგული სუვერენიტეტი და ამ ყველაფერს უკავშირდება ის, რომ ისინი მთლიანად მოქმედებენ „დიფ სთეითის“ კარნახით. შესაბამისად, სამწუხაროდ, ყველაზე აქტიურად სწორედ ეს პოსტსაბჭოთა ქვეყნები უპირისპირდებიან ქართველ ხალხს და ქართველი ხალხის მიერ არჩეულ ხელისუფლებას. ეს არის ძალიან სამწუხარო მოვლენა ჩვენთვის, იმიტომ, რომ განსაკუთრებული სენტიმენტები გვაქვს, როგორც ესტონელი, ასევე ლატვიელი და ლიეტუველი ხალხის მიმართ. ჩვენთვის დასანანია, სამწუხაროა და სწორედ ამიტომ ვრჩებით ცალმხრივი მეგობრობის რეჟიმში სამივე პოსტსაბჭოთა რესპუბლიკასთან. რაც შეეხება ევროკავშირთან ურთიერთობებს, ჩვენ ვართ მოლოდინის რეჟიმში, ველოდებით ურთიერთობების გადატვირთვისკენ მათი მხრიდან ნაბიჯის გადადგმას, ჩვენი მხრიდან ნაბიჯი გადადგმულია, ვართ მოლოდინის რეჟიმში. ევროპელი ჩინოვნიკების მხრიდან პრაგმატული ნაბიჯების იმედი გვაქვს. დღეს, ევროპული ბიუროკრატია არის, სამწუხაროდ, „დიფ სთეითის“ გავლენის ქვეშ, ეს გავლენა არის არსებითი. თუ ევროპაც მოახერხებს არსებითად „დიფ სთეითის“ გავლენის დაძლევას, ამ შემთხვევაში, ურთიერთობები გაჯანსაღდება. მოთმინებით ველოდებით ამ ყველაფერს,“- განაცხადა პრემიერმა.

იმდენად ნაჭორავები აქტია, რომ ხავსის ფუნქციასაც ვერ შეითავსებს – თუ „დიფ სთეითის“ დამარცხების ნიშანწყალი ოდნავ მაინც გაჩნდა, ამ ე.წ. „მეგობრულ აქტს“, სინამდვილეში „მტრულ აქტს“, გაგრძელება აღარ უნდა ჰქონდეს, – ამის შესახებ საპარლამენტო უმრავლესობის ლიდერმა, მამუკა მდინარაძემ „MEGOBARI აქტზე“ საუბრისას განაცხადა.

მისი თქმით, აღნიშნული დოკუმენტი ამერიკის შეერთებული შტატების დღევანდელი ხელისუფლებისთვის ლაკმუსის ტესტია.

„ქართული ე.წ. ოპოზიციის, სინამდვილეში, აგენტურის საქმე იცით როგორ არის ამ ე.წ. “MEGOBARI აქტთან”, სინამდვილეში “მტრულ აქტთან” დაკავშირებით?! – წყალწაღებული ხავსს ეჭიდება. თუ ვინმეს განმარტება სჭირდება, ხავსია ეს აქტი, სინამდვილეში მტრული, წყალწაღებულები არიან აგენტურული ოპოზიციის წარმომადგენლები. არასერიოზულია ეს ყველაფერი. ჯერ ერთი რამდენი თვეა წინ, როგორ უნდა მიიღონ, რა უნდა მიიღონ. ერთგვარი ლაკმუსის ტესტია, მათ შორის, ამერიკის შეერთებული შტატების დღევანდელი ხელისუფლებისათვის. შალვა თადუმაძე ჩაწერილია მოსამართლეების სიაში, ანუ, იმდენად ჭორაობის დონეზე შედგენილი დოკუმენტია… ჯერ ხომ გამოშიგნეს და რაღაცები ვერ ჩაწერეს, ამის შემდეგ იმდენად არაზუსტია, ყველაფერს რომ თავი დავანებოთ, მოსამართლეების სიაში შინაგან საქმეთა სამინისტროს წარმომადგენლები ჩაწერეს. იმდენად ნაჭორავები აქტია, რომ ხავსის ფუნქციასაც ვერ შეითავსებს. აქედან გამომდინარე, უკიდურესად არასერიოზულია ამაზე საუბარი. ლაკმუსის ტესტია ერთგვარი, იმიტომ რომ ოლიგარქიული მმართველობის, არაფორმალური გავლენების, „დიფ სთეითის“ დამარცხებაზე თუ რეალურად არის საუბარი, ეს აქტი ბუნებრივად ვერ აისახება რეალურ ცხოვრებაში, არ მოაწერენ ხელს, აღარ მიიღებს სენატი და ა.შ. თუ ოლიგარქიული გავლენების, „დიფ სთეითის“, „გლობალური ომის პარტიის“ დამარცხების ნიშანწყალი ოდნავ მაინც გაჩნდა, ამ ე.წ. „მეგობრულ აქვს“, სინამდვილეში „მტრულ აქტს“, გაგრძელება აღარ უნდა ჰქონდეს. ეს არის სუფთა ტესტი, მათ შორის, აშშ-ის ხელისუფლებისათვის,“ – განაცხადა მდინარაძემ.

ერთადერთი სუბიექტი არსებობს, ვინც საქართველოს ხელისუფლებას ანიჭებს ლეგიტიმაციას, ეს არის ქართველი ხალხი, – განაცხადა საქართველოს პრემიერ-მინისტრმა ირაკლი კობახიძემ ჟურნალისტებთან.

პრემიერის თქმით, სამწუხაროა, რომ ქართველი ხალხის ნებას არ სცემენ სათანადო პატივს.

„ერთადერთი სუბიექტი არსებობს, ვინც საქართველოს ხელისუფლებას ანიჭებს ლეგიტიმაციას, ეს არის ქართველი ხალხი. ქართველმა ხალხმა, 54%-იანი მხარდაჭერით გამოგვიცხადა ნდობა შარშან, ოქტომბერში, როცა შედგა საპარლამენტო არჩევნები. სხვას არავის აქვს უფლება, ისაუბროს ჩვენს ლეგიტიმაციაზე. ერთადერთი სუბიექტი არის ქართველი ხალხი, რომელიც ხელისუფლებას ანიჭებს ლეგიტიმაციას. მადლობა ღმერთს, ჩვენ აღარ ვართ 80-იან წლებში. მაშინ ყველაფერი იგზავნებოდა მოსკოვში. დისერტაციას რომ იცავდნენ, იმასაც კი მოსკოვში აგზავნიდნენ დასამტკიცებლად. დღეს საქართველოს ხელისუფლებას არ სჭირდება გარედან არავის დამტკიცება. ერთადერთი, ვინც ამტკიცებს საქართველოში, დამოუკიდებელ ქვეყანაში ხელისუფლებას, ეს არის ქართველი ხალხი და ამას ყველამ უნდა სცეს პატივი. სამწუხაროდ, არ სცემენ ამ ყველაფერს სათანადო პატივს, თუმცა ქართველ ხალხს, მის ნებას და არჩევანს ყველამ უნდა სცეს პატივი“, – განაცხადა პრემიერმა.

ლგბტ პროპაგანდა არასდროს იქნება საქართველოში, არც ეკლესიის წინააღმდეგ დაფინანსდება არცერთი მოძრაობა და უსამშობლოებსაც დედა ეტირებათ, ეს იცოდეთ, – ამის შესახებ „ქართული ოცნების“ დეპუტატმა, ირაკლი ზარქუამ „ქართული ოცნების“ ყრილობის დასრულების შემდეგ ჟურნალისტებს განუცხადა.

„ეს უსამშობლოები რომ ფინანსდებოდა აქ, ვინც ლგბტ პროპაგანდას მხარს უჭერდა, ვინც ეკლესიის წინააღმდეგ იბრძოდა… ვიცი დაკვეთა გაქვს, არ მალაპარაკო სიმართლე, მაგრამ მაინც მოგიწევს“, – მიმართა ზარქუამ ჟურნალისტს.

რაც შეეხება სანქციების შესახებ დასმულ კითხვას, ირაკლი ზარქუამ უპასუხა: „ვლაგდებით, მშვენიერი ურთიერთობა გვაქვს“.

„შენი ქვეყანა უნდა გიყვარდეს გესმის? ახლა რომ პროვოკატორობ აქ. კითხვა დასვი, გპასუხობ და გადახვედი. ლგბტ პროპაგანდა არასდროს იქნება საქართველოში, არც ეკლესიის წინააღმდეგ დაფინანსდება არცერთი მოძრაობა და უსამშობლოებსაც დედა ეტირებათ, ეს იცოდეთ. ყველაფერი კარგად იქნება“, – განუცხადა ზარქუამ ჟურნალისტებს.