საპარლამენტო უმრავლესობის წევრის გივი მიქანაძის განცხადებით, ბოლო დღეების განმავლობაში ოპოზიცია, მათთან დაკავშირებული სუბიექტები გადავიდნენ რადიკალურ ქმედებებზე, რაც გამოიხატება წინასაარჩევნო კამპანიაში პირდაპირ ხელის შეშლის კონტექსტში.

როგორც მიქანაძემ დღეს გამართულ ბრიფინგზე აღნიშნა, ეს განსაკუთრებით ეხება „ქართული ოცნების“ კუთვნილი წინასაარჩევნო ბანერების დაზიანებას და საარჩევნო რგოლების არგაშვებას.

გივი მიქანაძემ „ქართული ოცნების“ წინასაარჩევნო კამპანიისთვის ხელის შეშლის ფაქტებზე ისაუბრა და ამ კუთხით დარღვევებზე გაამახვილა ყურადღება.

„გუშინ, 16 ოქტომბერს ხელვაჩაურის მუნიციპალიტეტის სოფელ სარფში „ერთიანი ნაციონალური მოძრაობის“ ხელვაჩაურის საკრებულოს წევრმა, მამუკა ჯევაიშმა, თანმხლებ პირებთან ერთად, დააზიანა „ქართული ოცნების“ ორი საარჩევნო ბილბორდი. „ქართული ოცნების“ ხელვაჩაურის შტაბმა აღნიშნულის შესახებ შეტყობინება გადასცა 112-ს, რის საფუძველზეც დაიწყო გამოძიება სხვისი ნივთის დაზიანების ფაქტზე.

საზოგადოებისთვის ნათელია, რომ ეს არის „ქართული ოცნების“ წინასაარჩევნო კამპანიის ხელის შეშლა, რასაც სისტემატური ხასიათი აქვს წინასაარჩევნო პერიოდის დაწყებიდან. ამის დასადასტურებლად საზოგადოებას შევახსენებთ შემდეგ დარღვევებს:

15 ოქტომბერს ქალაქ ქუთაისში „ერთიანი ნაციონალური მოძრაობის“ ლიდერებმა, ხატია დეკანოიძემ და გიგი უგულავამ განახორციელეს „ქართული ოცნების“ წინასაარჩევნო ბილბორდების დაზიანება, რაც ცალსახად სხვისი ნივთის დაზიანებას წარმოადგენს.

5 ოქტომბერს ჩუღურეთის რაიონში, მამარდაშვილის ქუჩა ნომერ 12-ში „ლელოს“ აქტივისტმა, სალომე ტიმჩენკომ ცეცხლი წაუკიდა „ქართული ოცნების“ სიმბოლიკას, დაწვა „ქართული ოცნების“ დროშა.

8 სექტემბერს აეროპორტის დასახლებაში პარტია „ახლის“ აქტივისტებმა, პარტიის ლიდერების, მაია კოპალეიშვილისა და ანა გოგოლაძის ხელმძღვანელობით, დახიეს მმართველი გუნდის გაკრული პლაკატები.

სექტემბრის დასაწყისში ოპოზიციის აქტივისტებმა საბურთალოზე, ვარკეთილში, ნაძალადევსა და დიდუბეში არაერთგზის გადააკრეს, ჩამოხიეს და დააზიანეს „ქართული ოცნების“ პლაკატები.

საზოგადოებას ასევე შევახსენებთ, რომ ხაზარაძის, გვარამიასა და კეზერაშვილის კუთვნილმა ტელევიზიებმა: „მთავარმა არხმა“ „ტვ პირველმა“ და „ფორმულამ“, კომუნიკაციების კომისიისა და სასამართლო გადაწყვეტილების მიუხედავად, დღეის ჩათვლით არ გაუშვეს „ქართული ოცნების“ სარეკლამო რგოლების ნაწილი, რითიც, საერთო ჯამში, ხუთ საათზე მეტი დროით უფასო სარეკლამო ზიანი მოგვაყენეს.

მიუხედავად არაერთი მოწოდებისა, გრძელდება ადგილობრივი სადამკვირვებლო ორგანიზაციების მიერ „ქართული ოცნების“ წინააღმდეგ წარმოდგენილი დარღვევების იგნორირება. მოვითხოვთ, ადგილობრივი სადამკვირვებლო ორგანიზაციებისგან ასახონ თავის შუალედურ თუ შემაჯამებელ ანგარიშებში ის მრავლობითი წინასაარჩევნო დარღვევა, რომელიც ჩვენ მიერ გასაჯაროვდა და ასახულია „ქართული ოცნების“ ფეისბუქგვერდზე ატვირთულ ანგარიშებში.

ასევე, მივმართავთ საერთაშორისო სადამკვირვებლო ორგანიზაციებს, საკუთარ ანგარიშებში ასახონ და სათანადოდ შეაფასონ ადგილობრივი სადამკვირვებლო ორგანიზაციების მხრიდან ჩვენ წინააღმდეგ განხორციელებული საარჩევნო დარღვევების იგნორირება“, – განაცხადა გივი მიქანაძემ.

„გონიერება ქართველ კაცს არასოდეს აკლდა. ყოველთვის ქვეყნისთვის რთულ ტურბულენტურ პერიოდში იღებდა სწორ გადაწყვეტილებას“, – წერს სოციალურ ქსელში, საკანონმდებლო ორგანოს დეპუტატი ზაალ მიქელაძე და მოუწოდებს ამომრჩეველს 26 ოქტომბერს მხარი დაუჭიროს ქვეყნის მშვიდობიან და ღირსეულ მომავალს.

„ჩემო თანამოქალაქენო! მოგმართავთ საარჩევნო კამპანიის მიწურულს – თქვენ ქმნით ამ ქვეყნის ხვალინდელ დღეს. ,,გუშინდელი“ მოძალადეები ვერ შექმნიან ვერაფერ ღირებულს, ,,მევახშეებისაგან“ უსახლკაროებზე ზრუნვა ადამიანურობის დაცინვაა, ვითომ ,,გაახლებულების“ ყველაფერი ქართულის სიძულვილი ვერ გადაიფარება ,,როთების“ უღმერთოებით.

საქართველოში საუკუნეებია ღირსებით, თაობიდან თაობას გადაეცემა ჩვენი ტრადიციების პატივისცემა. ოჯახის სიწმინდე და სამშობლოს სიყვარული ეროვნული ღირებულებებია.

გონიერება ქართველ კაცს არასოდეს აკლდა. ყოველთვის ქვეყნისთვის რთულ ტურბულენტურ პერიოდში იღებდა სწორ გადაწყვეტილებას.

ჩვენ ყოველთვის გვესმოდა და გვჯეროდა ერთმანეთის, ვიზიარებდით საერთო ტკივილსა და სიხარულს. არასოდეს მიმიტოვებია მარტო, ჩემი ხალხი განსაცდელის ჟამს და თავს უფლებას ვაძლევ გთხოვოთ მხარდაჭერა ჩვენი ქვეყნის და ჩვენი შვილების მშვიდობიანი და ღირსეული მომავლისათვის…
გააფერადე 41! “ – წერს ზაალ მიქელაძემ.

მომავალი არჩევნები იქნება ჭეშმარიტების მომენტი, ქართველ ხალხს მოუწევს გადაწყვეტილების მიღება, რომელი გზით სურს სვლა, ევროპისკენ თუ ევროპისგან დაშორება – ამის შესახებ ევროკავშირის საგარეო პოლიტიკური უწყების ხელმძღვანელმა, ჯოზეფ ბორელმა განაცხადა.

მისივე თქმით, საქართველოში არის დემოკრატიული უკუსვლა.

„რაც შეეხება საქართველოს, სინამდვილეში არის დემოკრატიული უკუსვლა. მომავალი არჩევნები იქნება ჭეშმარიტების მომენტი და ქართველ ხალხს მოუწევს გადაწყვეტილების მიღება, თუ რომელი გზით სურთ სვლა – ევროპისკენ თუ ევროპისგან დაშორება. ეს არის მნიშვნელოვანი მომენტი ჩვენთვის და საქართველოსთვის კიდევ უფრო მეტად, რადგან სასწორზე ქვეყნის მომავალია“, – აღნიშნა ჯოზეფ ბორელმა.

გავაგრძელებთ ვეტერანების საქმეთა სახელმწიფო სამსახურის ხელშეწყობას და შესაბამისი სახელმწიფო პროგრამების გაფართოებას. მათ შორის, ამ საკითხებზე გვექნება მსჯელობა 2025 წლის ბიუჯეტის დაგეგმვის პროცესშიც, – ამის შესახებ საქართველოს პრემიერ-მინისტრმა ირაკლი კობახიძემ ვეტერანის დღისადმი მიძღვნილ ღონისძიებაზე სიტყვით გამოსვლისას განაცხადა.

მთავრობის მეთაურმა ვეტერანებს დღევანდელი დღე მიულოცა და იმ პროგრამებზე ისაუბრა, რომელიც სახელმწიფომ ვეტერანებისა და მათი ოჯახების ხელშეწყობისთვის აამოქმედა.

„საქართველოს ტერიტორიული მთლიანობისათვის, თავისუფლებისა და დამოუკიდებლობისათვის, აგრეთვე 1998 წლის მაისისა და 2004 წლის აგვისტოს მოვლენების დროს დაღუპულთა ან მიღებული ჭრილობების შედეგად გარდაცვლილთა ოჯახის წევრებისათვის დაწესდა ყოველთვიური სახელმწიფო კომპენსაცია, რომელიც მზარდია და თუ 2014 წელს 500 ლარი იყო, დღეისათვის უკვე 1200 ლარს შეადგენს. მოიხსნა შეზღუდვა, რომლის თანახმად საყოფაცხოვრებო სუბსიდიის მიღების უფლება ჰქონდათ მხოლოდ საპენსიო ასაკის ვეტერანებს; შედეგად, დახმარების მიღება შეძლო დაახლოებით 45 000-მა ვეტერანმა;დაწესდა შეღავათები, მათ შორის საგადასახადო კუთხით, მუნიციპალური ტრანსპორტით და მატარებლით მგზავრობაზე, სახელმწიფო სერვისების განვითარების სააგენტოს სერვისებით და სხვა მომსახურებებით სარგებლობაზე. საყოველთაო ჯანდაცვის სახელმწიფო პროგრამაში შეიქმნა ვეტერანთა პაკეტი, რომლის ფარგლებშიც ვეტერანებს სამედიცინო მომსახურება 15 000-ლარიანი წლიური ლიმიტის ფარგლებში 100%-ით უფინანსდებათ. ამოქმედდა ომის ვეტერანთა რეაბილიტაციის პროგრამა. განათლების მიმართულებით სოციალური პროგრამის ფარგლებში, ვეტერანთა შვილები, უმაღლეს საგანმანათლებლო დაწესებულებებში სახელმწიფო სასწავლო გრანტით ფინანსდებიან. პროფესიული მომზადება-გადამზადებისა და კვალიფიკაციის ამაღლების სახელმწიფო პროგრამით სარგებლობისას უპირატესი უფლება ვეტერანებს ენიჭებათ;სამეწარმეო საქმიანობის ხელშეწყობის პროგრამების ფარგლებში ჩამოყალიბდა ვეტერან ფერმერთა ასოციაციები, კოოპერატივები, მეურნეობები,”- განაცხადა პრემიერ-მინისტრმა.

ირაკლი კობახიძემ აღნიშნა, რომ სახელმწიფო გააგრძელებს ვეტერანთა ხელშეწყობას და შესაბამისი პროგრამების გაფართოებას, მათ შორის, აღნიშნული საკითხები გათვალისწინებული იქნება 2025 წლის ბიუჯეტის დაგეგმვის პროცესშიც.

„ეს ჩვენს მიერ გადადგმული ნაბიჯების მხოლოდ ნაწილია. მინდა ვისარგებლო შემთხვევით და მადლობა გადავუხადო ვეტერანების საქმეთა სახელმწიფო სამსახურის ხელმძღვანელობას, თითოეულ თანამშრომელს იმ ძალისხმევისათვის, რომლის შედეგადაც დღეს ვითარება არსებითად არის გაუმჯობესებული. თუმცა, მიღწეულით არ ვკმაყოფილდებით, ჩვენ გავაგრძელებთ ვეტერანების საქმეთა სახელმწიფო სამსახურის ხელშეწყობას და შესაბამისი სახელმწიფო პროგრამების გაფართოებას. მათ შორის, ამ საკითხებზე გვექნება მსჯელობა 2025 წლის ბიუჯეტის დაგეგმვის პროცესშიც.

ჩვენი გეგმების განსახორციელებლად და ქვეყნის შემდგომი წინსვლისთვის უმთავრესი პირობაა მშვიდობისა და სტაბილურობის განმტკიცება. თქვენ, ვეტერანებმა ყველაზე უკეთ იცით მშვიდობის ფასი. მადლობას გიხდით გმირობისთვის, სამშობლოსათვის თავდადებისთვის, იმ წვლილისათვის, რაც შეგაქვთ საქართველოს უკეთესი მომავლის შენებაში. კიდევ ერთხელ გილოცავთ და მშვიდობას და კეთილდღეობას გისურვებთ,”- განაცხადა მთავრობის მეთაურმა.