ისრაელში საქართველოს საელჩო ისრაელში მყოფი საქართველოს მოქალაქეების საყურადღებოდ ინფორმაციას აქვეყნებს.

როგორც საელჩოს მიერ გავრცელებულ ინფორმაციაშია ნათქვამი, უსაფრთხოების ვითარებიდან გამომდინარე, ისრაელის მოსახლეობისა და იმიგრაციის სამსახური უზრუნველყოფს ვიზების გაგრძელებას ქვეყანაში ლეგალურად მცხოვრები უცხოელებისთვის, რომელთა ვიზა ძალაში იყო 2025 წლის 12 ივნისის მდგომარეობით.

მომსახურება ავტომატურია და ვიზები გაგრძელდება  2025 წლის 30  სექტემბრამდე.

„მოსახლეობისა და იმიგრაციის სამსახურის – PIBA-ს – მიერ გაკეთებული განცხადების საფუძველზე, გაწვდით შემდეგ ინფორმაციას:

უსაფრთხოების ვითარებიდან გამომდინარე, მოსახლეობისა და იმიგრაციის სამსახური უზრუნველყოფს ვიზების გაგრძელებას ქვეყანაში ლეგალურად მცხოვრები უცხოელებისთვის, რომელთა ვიზა ძალაში იყო 2025 წლის 12 ივნისის მდგომარეობით.

მომსახურება ავტომატურია, 30.09.25-მდე.

გაგრძელდება შემდეგი სახის ვიზები:

სამუშაო ვიზა, ტიპი B/1, ზოგადი;

ტურისტული ვიზა, ტიპი B/2;

მოხალისეობრივი ვიზა, ტიპი B/4;

დროებითი რეზიდენტის ვიზა, ტიპი A/1;

სტუდენტური ვიზა, ტიპი A/2 (გარდა სოფლის მეურნეობაში ანაზღაურებადი პირებისა);

სასულიერო პირების ვიზა, ტიპი A/3;

თანმხლები ვიზა, ტიპი A/4;

დროებითი რეზიდენტის ვიზა, ტიპი A/5;

ვიზა DCO ოჯახის გაერთიანებისა და ჰუმანიტარული დახმარების საკითხებში.

გთხოვთ გაითვალისწინოთ, რომ მოსახლეობისა და იმიგრაციის სამსახურში ფიზიკურად მისვლა საჭირო არ არის“, – ნათქვამია ისრაელში საქართველოს საელჩოს მიერ გავრცელებულ ინფორმაციაში.

https://www.facebook.com/GeorgiainIsrael/posts/1136936215133528?ref=embed_post

ირაკლი ხვადაგიანი არის მაგალითი წარსულის ვერ გააზრების. გერმანიის საელჩომ ზუსტად იცოდა ვის მოკიდა ხელი და ვინ ჰყავდა იქ ექსპერტად, მაგრამ ასე უტიფრად, უხეშად იქცევა გერმანიის საელჩო, რაც სამწუხაროა, – ამის შესახებ პარლამენტის თავმჯდომარემ, შალვა პაპუაშვილმა განაცხადა, რითაც გერმანიის საელჩოს მიერ ჩატარებულ ღონისძიებაზე ირაკლი ხვადაგიანის გამოსვლას ეხმაურება.

შალვა პაპუაშვილის განცხადებით, ცოტა თავმდაბლობა უნდა აჩვენებს გერმანიის საელჩომ და არ ჰქონდეს იმის პრეტენზია, რომ გერმანიის საელჩოს დახმარება სჭირდება ქართველ ხალხს საკუთარი ისტორია გასააზრებლად.

„მე არაფერს არ ვედავები არც ხვადაგიანს და არც ბექა კობახიძეს, მე ვედავები გერმანიის საელჩოს, რომელიც შეხვედრაზე სააკაშვილის რეჟიმის პროპაგანდისტს წარადგენს, როგორც წარსულის გამააზრებელ ადამიანს. ეს ხომ თვალში ნაცრის შეყრაა, ხომ ფაქტია, რომ იქ არა წარსულის გააზრებასთან გვექნებოდა საქმე, არამედ ტვინების გამორეცხვასთან. წარმოიდგინეთ, წარსულის გააზრების სახელით უნდა ისაუბროს ადამიანმა, რომელიც იმდენად ვერ იაზრებს წარსულს, რომ 2024 წელს „ნაციონალური მოძრაობის“ პარტიულ სიაში ჩაეწერა. ირაკლი ხვადაგიანი არის მაგალითი წარსულის ვერ გააზრების. გერმანიის საელჩომ ზუსტად იცის საზოგადოების დამოკიდებულება ამ ადამიანისა და ამ ორგანიზაციის მიმართ. ბოლო სკანდალებიდან გამომდინარე, როდესაც საფრანგეთის საელჩოს კანონის მიღებამდე რამდენიმე საათით ადრე ფული მისცა, ზუსტადაც იცოდა ვის მოკიდა ხელი და ვინ ჰყავდა იქ ექსპერტად, მაგრამ ასე უტიფრად, უხეშად იქცევა გერმანიის საელჩო, რაც სამწუხაროა.

როდესაც საუბარია გერმანიის დემოკრატიული რესპუბლიკის შემდეგ ისტორიის გააზრებაზე და თითქოს ამ მხრივ საქართველოს სჭირდება გერმანიის საელჩოს დახმარება, დახედონ გერმანიაში ბოლო არჩევნების შედეგებს. ფედერალური მიწების მიხედვით ნახონ რომელ რეგიონში ვინ გაიმარჯვა და პირდაპირ დაინახავენ საზღვარს აღმოსავლეთ და დასავლეთ გერმანიას შორის. აი, ასე ვერ გაიაზრა თავად გერმანულმა საზოგადოებამ საკუთარი წარსული და გერმანიის გაერთიანებიდან 35 წლის თავზეც კი გაყოფილია წარმოსახვითი საზღვრით. როდესაც თავად, საკუთარ ქვეყანაში ვერ შეძლეს ისტორიის გააზრება და გადახარშვა და ეს შედეგები, რაც ამ არჩევნებზე იყო, ზუსტად ამაზე მეტყველებს, მე მგონი ცოტა თავმდაბლობა უნდა აჩვენოს გერმანიის საელჩომ და არ ჰქონდეს იმის პრეტენზია, რომ გერმანიის საელჩოს დახმარება სჭირდება ქართველ ხალხს, რომ საკუთარი ისტორია გაიაზროს, რომელიც სხვათა შორის არ არის რამდენიმე ათწლეულის. ათასწლეულების ისტორია გაგვიაზრებია აქამდეც და როგორმე ჩვენს ისტორიას ჩვენ თვითონ თავად კარგად გავიაზრებთ დახმარებების გარეშე და მით უმეტეს ასეთი მავნე დახმარებების გარეშე“, – განაცხადა შალვა პაპუაშვილმა.

შალვა პაპუაშვილის განცხადებით, ოპოზიციის მიზანი ქვეყანაში მეტი კრიზისის შექმნაა. შესაბამისი განცხადება პარლამენტის თავმჯდომარემ მაშინ გააკეთა, როდესაც ოპოზიციის ადგილობრივი თვითმმართველობის არჩევნებში მონაწილეობა/არმონაწილეობის შესახებ საუბრობდა.

„ეს არის დღეს რადიკალური ოპოზიციის იმ ნაწილის ამოცანა, რომელიც საჯაროდ აცხადებს, რომ ფიქრობს, მიიღოს თუ არა მონაწილეობა ადგილობრივი თვითმმართველობის არჩევნებში. ანუ, იმ შემთხვევაში თუ მონაწილეობას არ მიიღებენ, მიზანი არის, რომ რამენაირად კრიზისული სიტუაცია შექმნან, თუ მიიღებენ მონაწილეობას, აქაც გაცხადებული მიზანი აქვთ, რომ იქნებ სადმე წარმატებას მიაღწიონ, რომ მერე ამით კრიზის შექმნან ქვეყანაში. როდესაც ასე მავნებლობენ და საბოტაჟს უცხადებენ საკუთარ ქვეყანას, რომელშიც ცხოვრებენ მათი ნათესავები, ახლობლები, ის ხალხი და საზოგადოება, სადაც ისინი გაიზარდნენ, რა თქმა უნდა აქ სხვა ახსნა, გარდა იმისა, რომ არიან გარედან მიღებული მითითებების შემსრულებლები, არ არსებობს. ჩვენ ერთადერთ რამეს უნდა დავაკვირდეთ – რა დაკვეთები მოდის და ამის მიხედვით გავშიფროთ მათი ნასაუბრები, იმიტომ რომ ეს არ არის მათი გონის და ტოპ-ტვინის ნახარში და შედეგი. ეს არის გარე დავალების შედეგი“, – განაცხადა პაპუაშვილმა.

სასამართლო პროცესები იმიტომაა საჭირო და იმიტომ ესწრებიან, რომ გაარკვიონ, ვიღაცამ ჩაიდინა დანაშაული თუ არა, არ მგონია, ჩემთან მიმართებით რამე იყოს გასარკვევი – არ მივალ არც 23-ში, – ამის შესახებ „კოალიცია ცვლილებისთვის” ერთ-ერთი ლიდერის, ზურაბ ჯაფარიძის მიერ პენიტენციური დაწესებულებიდან გამოგზავნილ წერილშია აღნიშნული.

როგორც ჯაფარიძე განმარტავს, მისი პასუხი გასაგებია და საინტერესოა, რა იქნება მოსამართლე ჯვებე ნაჭყებიას პასუხი 23 ივნისს.

„სასამართლო პროცესები იმიტომ არის საჭირო და მას იმიტომ ესწრებიან, რომ გაარკვიონ, ვიღაცამ ჩაიდინა დანაშაული თუ არა.

მე არ მგონია, რომ ჩემთან მიმართებით რამე იყოს გასარკვევი. იმ დარბაზში თუ დერეფანში არავინაა ისეთი, ვისაც რაიმე კითხვის ნიშანი გააჩნია ჩემთან მიმართებით. სამყაროში არ არსებობს ადამიანი, რომელიც გამოვა და იტყვის, რომ მე მას ზიანი მივაყენე. ამიტომ ეს სასამართლო ჩემზე არაა.

ეს სასამართლო ე.წ მოსამართლე ჯვებეზეა. მიუხედავად იმისა, რომ თვითონ ამას ვერც ხვდება. ამ პროცესებზე ხალხი იმის სანახავად დადის, რომ ლაივში ნახოს – რას იზამს ჯვებე.

ჯვებემ კი სულ რაღაც 4-5 დღის წინ ჩემგან 3 საკნით დაშორებით ციხეში ჩასვა სრულიად უდანაშაულო ადამიანი. სადმე გარბოდა ნიკა გვარამია? თუ დანაშაული ჩაიდინა განმეორებით?

იმავე ჯვებემ, პოლიტიკური მოტივით დაჭერილ ანტონ ჩეჩინს, რომელსაც თავში გაურკვეველი სიმსივნური წარმონაქმნი აქვს და რომელსაც ტანზე დადასტურებულად ეტყობა ფიზიკური ზემოქმედების კვალი, არ შეუცვალა აღკვეთი ღონისძიება და ჩატოვა ციხეში.

ამიტომ არ მოვედი დღეს პროცესზე, ამიტომ არ მივალ არც 23-ში.

ვიღაც შიმპანზის მორალის მქონე ხალხმა, რომელთაც რუსეთის დღევანდელმა მეფისნაცვალმა ხელში ჩაუგდო პატარა ძალაუფლება, გადაწყვიტა, რომ თუ ციხით დამემუქრებოდნენ, კლოუნის წითელ ცხვირს დავიმაგრებდი და ვეახლებოდი.

ჩემი პასუხი გასაგებია. 23-ში საინტერესო იქნება ჯვებეს პასუხი.

მიუხედავად მისი ქმედებებისა, მისივე პროფესიიდან გამომდინარე, მას ყოველ ჯერზე აქვს შანსი – ისევ იქცეს ადამიანად. ამიტომ, 23-ში რაც გაირკვევა, ესაა – მზადაა თუ არა ჯვებე დათმოს დღევანდელი პატივი, წესდება, კეთილდღეობა და უარი თქვას კლოუნის წითელი ცხვირის ტარებაზე.

ოღონდ ეს ვერ იქნება ციხის ნაცვლად ჯარიმა ან სხვა რამე.

მხოლოდ სრულად გამამართლებელი განაჩენი იქნება იმის ინდიკატორი, რომ ჯვებე ცირკში აღარ მუშაობს.

P.S საუბედუროდ, კაცობრიობის ისტორია სავსეა ჯვებეებით. ჯვებეების მმართველობა (თუ ჯვებეებით მმართველობა) უნდა დასრულდეს!”,- ნათქვამია ჯაფარიძის წერილში.

„კოალიცია ცვლილებისთვის“ ერთ-ერთი ლიდერის, ზურაბ გირჩი ჯაფარიძის საქმეზე განაჩენი 23 ივნისს გამოცხადდება.

როგორც მოსამართლე ჯვებე ნაჭყებიამ განაცხადა, სასამართლო ჯაფარიძეს კიდევ ერთხელ მისცემს შანსს, საბოლოო სიტყვით ისარგებლოს.