აშშ-ის პრეზიდენტ დონალდ ტრამპს უკრაინის პრეზიდენტ ვოლოდიმირ ზელენსკისთან ვატიკანში, პაპ ფრანცისკეს დაკრძალვამდე ძალიან პროდუქტიული საუბარი ჰქონდა, – ამის შესახებ თეთრი სახლის კომუნიკაციების დირექტორმა სტივენ ჩუნგმა განაცხადა.

„პრეზიდენტი ტრამპი და პრეზიდენტი ზელენსკი დღეს პირადად შეხვდნენ ერთმანეთს და ძალიან პროდუქტიული დისკუსია გამართეს. შეხვედრის შესახებ დამატებითი დეტალები მოგვიანებით გახდება ცნობილი“, – აღნიშნა სტივენ ჩუნგმა.

ორივე ლიდერი იტალიის დედაქალაქში რომის პაპ ფრანცისკეს დაკრძალვაზე დასასწრებად ჩავიდა. ახლა ისინი წმინდა პეტრეს მოედანზე იმყოფებიან, სადაც პაპის დაკრძალვის ცერემონია მიმდინარეობს.

უკრაინაში ომის დასრულების საკითხზე მოლაპარაკებები გრძელდება. ამერიკის შეერთებული შტატების სპეციალური წარმომადგენელი რუსეთის პრეზიდენტს კიდევ ერთხელ ამჯერად მოსკოვში შეხვდა. ჯერჯერობით უცნობია, მიაღწიეს თუ არა მხარეებმა რაიმე სახის შეთანხმებას.

მოლაპარაკებების პარალელურად, ვოლოდიმირ ზელენსკი და დონალდ ტრამპი ვატიკანში პაპის დაკრძალვის ცერემონიაზე იმყოფებიან. ომში მყოფი ქვეყნის პრეზიდენტმა ამერიკელ კოლეგასთან შეხვედრის სურვილი უკვე გამოთქვა, თუმცა ტრამპს ზელენსკის ინიციატივისთვის პასუხი ჯერ არ გაუცია.

როგორც ზელენსკიმ აღნიშნა, მნიშვნელოვანია მსოფლიომ რუსეთზე სანქციები გააძლიეროს.

“მე ვიზიარებ პრეზიდენტ ტრამპის მოსაზრებას, რომ უკრაინას არ აქვს საკმარისი შეიარაღება, რათა დაიბრუნოს კონტროლი ყირის ნახევარკუნძულზე სამხედრო გზით. თუმცა მსოფლიოს შეუძლია გამოიყენოს სანქციები და გამოიყენოს ეკონომიკური და დიპლომატიური ზეწოლის სხვა საშუალებები, რათა ისაუბროს ამაზე და განიხილოს ტერიტორიული საკითხები, მხოლოდ ცეცხლის სრული და უპირობო შეწყვეტის შემდეგ. ცეცხლის უპირობო შეწყვეტა იძლევა შესაძლებლობას ვისაუბროთ ყველაფერზე და ჩვენ მზად ვართ დიალოგისთვის ნებისმიერი ფორმატით. კიდევ ერთხელ ხაზს ვუსვამ ამას, ნებისმიერ პირთან, ნებისმიერ დროს, თუმცა მას შემდეგ , როცა მივიღებთ რეალურს სიგნალს, რომ რუსეთი მზადაა დაასრულოს ომი. ეს სიგნალი უნდა იყოს ცეცხლის სრული და უპირობო შეწყვეტა,” – განაცხადა ზელენსკიმ.

ევროკავშირი მხარს უჭერს აზერბაიჯანისა და სომხეთის ძალისხმევას, რომელიც მიმართულია მდგრადი და მყარი მშვიდობის მიღწევისკენ, – აზერბაიჯანულ მედიის ცნობით, ამის შესახებ საგარეო საქმეთა და უსაფრთხოების პოლიტიკის საკითხებში ევროკავშირის წარმომადგენელმა, კაია კალასმა ბაქოში ვიზიტისას გამართულ პრესკონფერენციაზე განაცხადა.

მისივე თქმით, აზერბაჯანი ევროკავშირისთვის ღირებული ენერგეტიკული პარტნიორია.

„ევროკავშირი მხარს უჭერს ორივე მხარის ძალისხმევას, რომელიც მიმართულია მდგრადი და მყარი მშვიდობის მიღწევისკენ. სომხეთსა და აზერბაიჯანს ახლა აქვთ ასეთი შესაძლებლობა. მე მივესალმები მიღწეულ შეთანხმებას სამშვიდობო ხელშეკრულების ტექსტზე და მოუთმენლად ველოდები შემდეგ ნაბიჯებს”, – განაცხადა კალასმა.

ამასთან კალასმა აღნიშნა, რომ ევროკავშირი მიესალმება აზერბაიჯანის მიერ უკრაინისთვის გაწეულ ჰუმანიტარულ მხარდაჭერას.

„აზერბაიჯანი მნიშვნელოვანი პარტნიორია რეგიონში. ეს არის ფასეული ენერგეტიკული პარტნიორი ევროკავშირისთვის და ერთად ჩვენ მივაღწიეთ მნიშვნელოვან პროგრესს ჩვენი კავშირების გაძლიერებაში. თქვენ დაეხმარეთ ევროკავშირს ენერგომომარაგების წყაროების დივერსიფიკაციასა და ჩვენი ენერგეტიკული უსაფრთხოების გაძლიერებაში იმ დროს, როდესაც მსოფლიო უპრეცედენტო გამოწვევებს აწყდება. ჩვენ ასევე მადლიერები ვართ აზერბაიჯანის მიერ უკრაინისთვის გაწეული ჰუმანიტარული დახმარებისთვის და თქვენი ლიდერობისთვის გასულ წელს კლიმატის სამიტის COP29-ის ჩატარებაში. მსგავსი მრავალმხრივი ძალისხმევა აჩვენებს, რომ ერთობლივი მოქმედებით ქვეყნებს შეუძლიათ ნამდვილად გავლენა მოახდინონ გლობალურ პროცესებზე“, – განაცხადა კალასმა.

აშშ-ის პრეზიდენტი დონალდ ტრამპი და უკრაინის პრეზიდენტი ვოლოდიმირ ზელენსკი იტალიაში იმყოფებიან რომის პაპის დაკრძალვის ცერემონიაზე დასასწრებად.

დონალდ ტრამპი იტალიის ლეონარდო და ვინჩის საერთაშორისო აეროპორტში პირველ ლედისთან, მელანია ტრამპთან ერთად ჩავიდა. რაც შეეხება უკრაინის ლიდერს, მას ასევე თან ახლავს პირველი ლედი ოლენა ზელენსკა და დელეგაციის წევრები.

უკრაინის პრეზიდენტის პრესმდივნის, სერგეი ნიკიფოროვის თქმით, ისინი მონაწილეობას მიიღებენ რომის პაპ ფრანცისკესთან გამოსამშვიდობებელ ცერემონიაში.

რომის პაპის დაკრძალვის ცერემონიის ფარგლებში შესაძლოა, დონალდ ტრამპისა და ვოლოდიმირ ზელენსკის მოლაპარაკებები გაიმართოს. აშშ-ის პრეზიდენტმა ვატიკანში უკრაინელ კოლეგასთან შეხვედრა არ გამორიცხა. შეხვედრის სურვილი მანამდე ვოლოდიმირ ზელენსკიმაც გამოხატა.

დღეს რომის პაპის დაკრძალვის ცერემონიას ასევე დაესწრებიან იტალიის პრემიერ-მინისტრი ჯორჯია მელონი, საფრანგეთის პრეზიდენტი ემანუელ მაკრონი, ბრაზილიის პრეზიდენტი ლუის ინასიო ლულა და სილვა, გაერთიანებული სამეფოს პრემიერ-მინისტრი კირ სტარმერი და პრინცი უილიამი, ესპანეთის მეფე ფელიპე.

ვატიკანის წმინდა პეტრეს მოედანზე რომის პაპთან გამოსამშვიდობებელ ღონისძიებაზე ასევე ელოდებიან ევროკომისიის პრეზიდენტს, ურსულა ფონ დერ ლაიენს, გაერო-ს გენერალურ მდივანს, ანტონიუ გუტიერეშს, არგენტინის პრეზიდენტს, ხავიერ მილეის, ფილიპინების პრეზიდენტს, ფერდინანდ მარკოსს და სახელმწიფოებისა და მთავრობების სხვა მეთაურებს.