ეკონომიკური თვალსაზრისით 2025 წელი იქნება ძალიან კარგი, არანაკლებ კარგი, ვიდრე იყო წინა წლები ამ ოთხი წლის მანძილზე და ვფიქრობ, ეკონომიკური ტემპების, დამატებით გაზრდაც შეგვიძლია, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა “იმედი LIVE”-ში განაცხადა.

პრემიერის თქმით, ოპონენტების აზრი, რომ 2025-ში ვითარება უფრო გამძაფრდება და ეკონომიკა წავა უკან, მხოლოდ მათი ოცნებებია, რომლებსაც ახდენა არ უწერია.

„მე ვარ აბსოლუტურად დარწმუნებული, რომ ყველაფერი იქნება ძალიან კარგად ყველა კუთხით. ერთი, რომ ჩვენი სურვილია ურთიერთობების გადატვირთვა და ამის რესურსი არსებობს, განსაკუთრებით იმ ფონზე, თუ მალე დასრულდება უკრაინაში ომი. ვფიქრობ, წინ ვერაფერი დაუდგება ურთიერთობების გადატვირთვას და ჩვენ ამისთვის ვართ თავიდან ბოლომდე მზად. რაც შეეხება ეკონომიკას, ამ ბოლო ოთხი წლის განმავლობაში ჩვენ გამოვიარეთ რევოლუციის ოთხი მცდელობა და ამის მიუხედავად ჩვენ 40 მილიარდით გავზარდეთ საქართველოს ეკონომიკა. პირველ ადგილზე გავედით ეკონომიკური ზრდით, არა მარტო ფართო რეგიონში, არამედ ევროპის მასშტაბით. აქ ველოდებით ჩვენ მეტ სიმშვიდესაც 2025 წელს და რა თქმა უნდა, ეს დამატებით ხელს შეუწყობს კიდევ უფრო მეტ სტიმულირებას ეკონომიკისთვის.

შესაბამისად, მე ვფიქრობ, რომ ეკონომიკური თვალსაზრისით 2025 წელი იქნება ძალიან კარგი, არანაკლებ კარგი, ვიდრე იყო წინა წლები ამ ოთხი წლის მანძილზე. ვფიქრობ, რომ დამატებით გაზრდაც შეგვიძლია ეკონომიკური ტემპების. ძალიან ბევრი პროექტი გვაქვს, რომელიც არის უკვე დაწყებული, ან ძალიან მალე დაიწყება. ძალიან მასშტაბურ პროექტებზე ვმუშაობთ, ეს ეხება იგივე აეროპორტის პროექტს, საუნივერსიტეტო რეფორმას და ა.შ. ყველა მიმართულებით გვექნება ძალიან სერიოზული ძვრები. ოთხი წლის თავზე ჩვენი ქვეყანა განვითარების სრულიად სხვა დონეზე გადავა. ჩვენი პროგრამა ითვალისწინებს ამას, ოთხი წლის თავზე ქვეყანა იქნება განვითარების სრულიად სხვა ეტაპზე და დონეზე და მომავალი წელი იქნება ძალიან კარგი რესტარტი ამისთვის. ყველაფერი გაკეთდება იმისთვის, რომ მშვიდობა შევინარჩუნოთ. ბევრად უფრო რთული წლები გამოვიარეთ გასული ოთხი წლის მანძილზე. მშვიდობას აუცილებლად შევინარჩუნებთ, სიმშვიდეს შევინარჩუნებთ ჩვენს ქვეყანაში და ეკონომიკური ზრდა კიდევ უფრო მეტად დაჩქარდება. ეს არის ჩვენი პასუხისმგებლობა. ამისთვის კონკრეტული გეგმა გვაქვს გაწერილი ჩვენს სამთავრობო პროგრამაში და ყველაფერს გავაკეთებთ, რომ ამ პროგრამის თითოეული პუნქტი თავიდან ბოლომდე პირნათლად შესრულდეს”, – განაცხადა ირაკლი კობახიძემ.

ამ ძალიან მნიშვნელოვან და გამოწვევებით სავსე პერიოდში ამ თემაში შეყოლას არ ვაპირებ, მაგრამ უნდა ითქვას…პარტიის დაფინანსებაზე ატეხილი „ქოცური“ ნარატივის გამეორება ზოგიერთი ოპოზიციონერის მიერ, სხვა არაფერია თუ არა „ოცნების“ „მესიჯბოქსში“ და სცენარში მონაწილეობა, – ამის შესახებ კოალიცია „ძლიერი საქართველოს“ ლიდერმა, მამუკა ხაზარაძემ სოციალურ ქსელში დაწერა.

„ახლა გეტყვით ჩვენს პოზიციას – ჩვენგან არჩეული დეპუტატების ხელფასები ჩახსნილია. რაც შეეხება პარტიის დაფინანსებას, ეს არის ბიუჯეტის თანხა და მისი გაჩერება მოხდება მომენტალურად, როგორც კი მანდატების გაუქმებაზე ჩვენი განცხადებები დაკმაყოფილდება. მანამდე კი, ამ თანხას მოვახმართ საპროტესტო აქციის დროს დაზარალებულების და სხვათა მხარდაჭერას, რასაც ისედაც ვაკეთებთ.

პარლამენტის ლეგიტიმაციასთან ბიუჯეტის ფულს არანაირი კავშირი არ აქვს.

P.S. როცა სხვა ოპოზიციურ პარტიას ამუნათებ, ხმამაღლა უნდა თქვა საიდან ფინანსდები! ამის შესახებ უკვე აქ ვწერ, კერძო შეხვედრის დროს ამ კითხვაზე პასუხი ვერ მივიღე. არ მინდოდა ეს პოლემიკა, მაგრამ როცა „ოცნების“ „მესიჯბოქსით“ საუბრობ, დაე, ღიად გაირკვეს, ვინ ვინაა და ვის თამაშს თამაშობს.

ან, ვის აწყობს ახლა „ოცნების“ მიმართ ამერიკული შტურმის გადაფარვა და 29 დეკემბრის წინ ამომრჩევლის დაბნევა?!“,- წერს მამუკა ხაზარაძე სოციალურ ქსელში.

ცესკო-ს ინფორმაციით, საპარლამენტო არჩევნების შედეგების საფუძველზე, ახალარჩეული პარლამენტის უფლებამოსილების ცნობის მეორე დღიდან, 26 ნოემბრიდან, სახელმწიფო დაფინანსების მიღების უფლება მოიპოვა შემდეგმა შვიდმა პოლიტიკურმა გაერთიანებამ – „ქართული ოცნება – დემოკრატიული საქართველო“, „ერთიანი ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „გახარია საქართველოსთვის“, „ლელო საქართველოსთვის“, „საქართველოს პატრიოტთა ალიანსი“, „ახალი პოლიტიკური ცენტრი – გირჩი“. დაფინანსების მიღებაზე უარი განაცხადა პარტიამ „კოალიცია ცვლილებისთვის გვარამია მელია გირჩი დროა“. შესაბამისად, სახელმწიფო დაფინანსებას ექვსი პოლიტიკური გაერთიანება მიიღებს.

ლიბერალური ფაშიზმისგან საქართველოს გათავისუფლება არის ნომერ პირველი ეროვნული ამოცანა, –  ამის შესახებ საქართველოს პრემიერ-მინისტრმა ირაკლი კობახიძემ გადაცემა ,,იმედი LIVE”-ში განაცხადა.

პრემიერის თქმით, ლიბერალური ფაშიზმის და შესაბამისი პოლიტიკური რესურსის განეიტრალება არის პრინციპულად მნიშვნელოვანი.

„ლიბერალური ფაშიზმისგან საქართველოს გათავისუფლება არის ნომერ პირველი ეროვნული ამოცანა. გამოწვევა არის ნომერ პირველი და შესაბამისად, ამოცანაც არის ნომერ პირველი. ლიბერალურ ფაშიზმს აქვს კონკრეტული ინსტრუმენტები და ჩვენ უნდა დავუპირისპირდეთ ამ ინსტრუმენტებს. როგორც ამერიკას აქვს თავისი დიფ სთეითი, რომელიც ანგრევდა მთელი ამ ოთხი წლის განმავლობაში აშშ-ს, ეს დონალდ ტრამპის სიტყვებიც არის, მან თქვა პირდაპირ, რომ თუ ამერიკა არ დაანგრევს დიფ სთეითს, დიფ სთეითი დაანგრევს ამერიკის შეერთებულ შტატებს. ოთხი წლის განმავლობაში დიფ სთეითი და ეს არაფორმალური, ოლიგარქიული გავლენები ანგრევდა აშშ-ს და არა მარტო აშშ-ს. ნახეთ, რა დამართა მსოფლიოს დიფ სთეითის გავლენებმა. სრული დარღვევა სიმშვიდის და მშვიდობის, მსოფლიო მასშტაბით. ჩვენს გარშემო განსაკუთრებით – უკრაინა, ახლო აღმოსავლეთი, სირია. უბედურება ხდება ყველგან, ჩვენს გარშემო. არაერთი ომი გადახდა არაერთ ქვეყანას ამ წლების განმავლობაში. ეკონომიკური პრობლემები. ევროკავშირში არის უმძიმესი ტენდენციები ეკონომიკური თვალსაზრისით. ეს ყველაფერი მოიტანა არაფორმალურმა გავლენებმა და ე.წ დიფ სთეითმა. ჩვენ გვაქვს პატარა დიფ სთეითი საქართველოში და ჩვენთვისაც სწორედ ასეთივე პრინციპული ეროვნული ამოცანაა დიფ სთეითთან დაპირისპირება. ვგულისხმობ ლიბერალურ ფაშიზმს, რომელსაც აქვს თავისი ინსტრუმენტები ჩვენს ქვეყანაში. ანალიზი გვაქვს გაკეთებული. გამჭვირვალობის შესახებ კანონის ერთ-ერთი მიზანიც სწორედ ეს იყო, რომ ფინანსური წყაროები გაგვეხადა გამჭვირვალე ამ არაფორმალური გავლენებისთვის და რევოლუციების გამუდმებული მცდელობისთვის. არის კონკრეტული ინსტრუმენტები და ამას უნდა დავუპირისპირდეთ. არის რესურსი, რომ ოთხი წლის თავზე განვითარების სრულიად ახალ ეტაპზე გადავიდეთ. ჩვენ დიფ სთეითი უნდა მოვშალოთ, რასაც განასახიერებს ის ძალები, რომლებიც კოლექტიურ „ნაცმოძრაობაში” მოიაზრება, სხვადასხვა განშტოებებით, სხვადასხვა ინსტრუმენტებით. ჩვენ შეგვიძლია ძალიან ბევრი რამ გავაკეთოთ იმისათვის, რომ ერთხელ და სამუდამოდ დავამშვიდოთ ეს ქვეყანა. ამისათვის ლიბერალური ფაშიზმის განეიტრალება და შესაბამისი პოლიტიკური რესურსის განეიტრალება არის პრინციპულად მნიშვნელოვანი. ქვეყანა უნდა დამშვიდდეს, ეს არის ჩვენი ეროვნული გამოწვევა და ეროვნული ამოცანა. ამისთვის ყველაფერი გაკეთდება სხვა ამოცანების შესრულებასთან ერთად, როგორის არის დემოკრატიული სისტემის განმტკიცება, ეკონომიკური განვითარება და ა.შ.”, – განაცხადა პრემიერმა.

სალომე ზურაბიშვილის მიერ სასახლის არდატოვება ნიშნავს სისხლის სამართლის დანაშაულის ჩადენას, რაც ითვალისწინებს მრავალწლიან პატიმრობას არა მარტო თავად სალომე ზურაბიშვილისთვის, არამედ ნებისმიერი ადამიანისთვის, რომელიც ამაში იქნება ჩართული, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

როგორც მთავრობის მეთაურმა აღნიშნა, შეიძლება, პატრონებისთვის თავი გაწიროს სალომე ზურაბიშვილმა, მაგრამ მას მოუწევს გაწიროს პირობითად 100 კაცი, რომელიც მასთან ერთად გამაგრდება ათონელის რეზიდენციაში.

„მგონია, რომ გონივრულ, პრაგმატულ გადაწყვეტილებას მიიღებს. მთავარი მიზეზი, რატომაც ასე მგონია არის ის, რომ სასახლის არდატოვება ნიშნავს სისხლის სამართლის დანაშაულის ჩადენას, რაც ითვალისწინებს მრავალწლიან პატიმრობას არა მარტო თავად სალომე ზურაბიშვილისთვის, არამედ ნებისმიერი ადამიანისთვის, რომელიც ამაში იქნება ჩართული. შეიძლება, პატრონებისთვის თავი გაწიროს სალომე ზურაბიშვილმა და ხშირად მარტივად წირავენ ხოლმე საკუთარ აგენტებს ეს პატრონები, მაგრამ მას მოუწევს გაწიროს პირობითად 100 კაცი, რომელიც მასთან ერთად გამაგრდება ათონელის რეზიდენციაში. თუ დაავალეს, ყველაფერი შეიძლება, გააკეთოს. ერთადერთი ვერსია, როცა მე ვუშვებ ამის გაკეთებას სალომე ზურაბიშვილის მხრიდან, არის ის, რომ მას ძალიან ხისტად ავალებენ რეზიდენციაში დარჩენას, სხვა შემთხვევაში თავი გასწიროს ციხისთვის, თან მრავალწლიანი პატიმრობისთვის 72 წლის ქალმა, ან გაწიროს 100-150 ადამიანი მრავალწლიანი პატიმრობისთვის, ეს არ მგონია, მაინცდამაინც რეალური. დავალების პირობებშიც კი მგონია, რომ წინააღმდეგობის გაწევას შეეცდება“, – განაცხადა ირაკლი კობახიძემ.

სირცხვილია, რასაც ჩვენ ვისმენთ – ერთი, რომ სისტემური ძალადობა იყო, ეს არის სირცხვილი, სამარცხვინო ტყუილი და მეორე ის, რომ მშვიდობიანი პროტესტი იყო, ესეც არის სამარცხვინო ტყუილი, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

პრემიერის თქმით, გამოძიება წარიმართება ყველა ფაქტთან დაკავშორებით.

„თავიდანვე დაიწყო გამოძიება. იყო დაახლოებით 500-კაციანი ორგანიზებული ძალადობრივი დაჯგუფება, რომელიც ძალიან უხეში ფორმით მოქმედებდა და ყველანაირ მასალებს იყენებდა ამისთვის, უმძიმესი შეურაცხყოფა, ფიზიკური შეურაცხყოფა და ა.შ. ჩვენი მთავარი ამოცანა რა იყო, ერთი, რომ მძიმე განვითარება არ მოჰყოლოდა ამ ყველაფერს და მთავარი იყო, პირველ რიგში, მსხვერპლის თავიდან აცილება. მადლობა ღმერთს, ეს ძალიან ეწყინა „მაკკეინის ინსტიტუტს”, მაგრამ სწორედ ასე წარიმართა პროცესები. ჩვენ ასეთი მძიმე შედეგი ავიცილეთ თავიდან და ეს არის შინაგან საქმეთა სამინისტროს დამსახურება, თითოეული პოლიციელის და ხელმძღვანელობის დამსახურება.

მეორე იყო, თუნდაც ისეთი შედეგის თავიდან აცილება, რაც ცალკეული ადამიანის ჯანმრთელობას დაატყობდა კვალს. თქვენ გახსოვთ, როგორ დასრულდა, მაგალითად  საქართველოში 2011 წლის შეკრების დარბევა, ოთხი კაცი მოკლეს პირდაპირ მშვიდობიან შეკრებაზე. ასევე მინდა, შეგახსენოთ გახარიას გმირობა 2019 წელს, როდესაც 7 ადამიანს დარჩა მძიმე კვალი ჯანმრთელობაზე, მათ შორის, ორმა ადამიანმა დაკარგა თვალი. ასეთი იყო კონკრეტული ადამიანების, მერაბიშვილის, გახარიას პასუხი გარკვეულ აქციებზე, მიტინგებზე, მეორე შემთხვევაში იყო ძალადობრივი. ჩვენი მთავარი ამოცანა იყო, რომ მსხვერპლი აგვეცილებინა თავიდან და არა მარტო მსხვერპლი, არამედ ასეთი მძიმე კვალი ჯანმრთელობაზე აგვეცილებინა თავიდან. ეს მთავარი ამოცანა არის შესრულებული და ეს არის შინაგან საქმეთა სამინისტროს დამსახურება. რაც შეეხება ცალკეულ გადაცდომებს, მათ შორის, მძიმე ინცინდენტებს, რაც ძალიან უსიამოვნო იყო, ამაზე გამოძიება მიმდინარეობს და რა თქმა უნდა, ეს გამოძიება ბოლომდე უნდა მივიდეს, მაგრამ აქ კიდევ ერთხელ მინდა ხაზი გავუსვა ერთ რამეს, რომ როდესაც ერთ მხარეს გმობ, ასეთ ინცინდეტებს და ძალადობრივ ქმედებებს, ჯერ უნდა დაიწყო ინიციატორებით და უნდა დაგმო შესაბამისი ადამიანების ძალადობა. ორივე მიმართულებით ხომ სირცხვილია, რასაც ჩვენ ვისმენთ.

ერთი, რომ სისტემური ძალადობა იყო, ეს არის სირცხვილი, სამარცხვინო ტყუილი, რასაც ამბობენ და მეორე ის, რომ მშვიდობიანი პროტესტი იყო, ესეც არის სამარცხვინო ტყუილი. ასეთ სამარცხვინო ტყუილს რომ ისმენენ ჩვენი მოქალაქეები დასავლური სივრციდან, ეს, რა თქმა უნდა, ძალიან მძიმედ აისახება დასავლური ინსტიტუტების რეპუტაციაზე. კიდევ ერთხელ მინდა გაგახსენოთ, თვითონ ევროკავშირისვე კვლევით, ბოლო 6 თვეში, ამ აქციებამდე და ამ აქციების მერეც იქნებოდა ეს ტენდენცია, 6%-ით არის დაკლებული ნდობა ევროპული სტრუქტურების მიმართ, ევროპული ბიუროკრატიის მიმართ ქართულ საზოგადოებაში. ასეთ სამარცხვინო განცხადებებს რომ ისმენენ ჩვენი თანამოქალაქეები, ეს აკნინებს ევროპული ბიუროკრატიის რეპუტაციას საზოგადოების თვალში. რატომ აკეთებენ ამას მე არ ვიცი, უფრო სწორად, ვიცი რატომაც აკეთებენ, მათ აქვთ კონკრეტული პოლიტიკური ამოცანა, უნდოდათ ამ ქვეყნის უბედურებაში გახვევა, ამას ვერ მიაღწიეს, საუბარი მაქვს კონკრეტულ ბიუროკრატებზე, ჩინოვნიკებზე, პოლიტიკოსებზე, რომლებიც კონკრეტულ გავლენას მიყვებიან. ვერ მოახერხეს ეს და ახლა სამარცხვინო განცხადებებით ცდილობენ, რომ რაღაცნაირად ზიანი მიაყენონ ხელისუფლებას და ქვეყანას. წარუმატებელია მათი ეს მცდელობები”,- განაცხადა ირაკლი კობახიძემ.

როგორი ხელოვნურიც იყო ემოციები „მაიდნის“ დროს, ასეთივე ხელოვნური იყო საქართველოშიც. ეს არის კოორდინირებული მოქმედება, რისი მიზანიც არის ლიბერალური ფაშიზმის იდეოლოგიურად გავრცელება ქვეყანაში, ქვეყნის არევა, ხელისუფლების შეცვლა, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

მთავრობის მეთაურის შეფასებით, ლიბერალური ფაშიზმი ისეთივე ხელოვნურად დალაგებულია გარედან, როგორიც 100 წლის წინ იყო ბოლშევიზმი.

„რატომ იყო ქართველი ბოლშევიკი ზუსტად ისეთი, როგორიც იყო რუსი, ყაზახი ან ნებისმიერი რესპუბლიკის ბოლშევიკი. არ განსხვავდებოდა ქართველი ბოლშევიკი რუსი, ბელარუსი, ყაზახი, უკრაინელი თუ ნებისმიერი სხვა რესპუბლიკის წარმომადგენელი ბოლშევიკისგან. იდენტურები იყვნენ, იმიტომ, რომ ერთიანი დალაგებული იდეოლოგია იყო. როგორც შემოვიდა გარედან ქართული კულტურისთვის სრულიად უცხო მოვლენა ბოლშევიზმი და გაიდგა ფესვები, ასე ხდება დღესაც. გარე დაფინანსება გარე გავლენები, „დიფ სთეითის“ გავლენები და ასე ხდება ხელოვნურად ლიბერალური ფაშიზმის გავრცელება საქართველოში. ხშირად მომყავს ხოლმე სლოვაკეთის მაგალითი. ჩართეთ რობერტ ფიცოს 10-წუთიანი ვიდეო, რა მექანიზმებითაც მუშაობს სლოვაკეთში ლიბერალური ფაშიზმი, ზუსტად იგივე მექანიზმები მოქმედებს საქართველოშიც. ეს არის ქართლი კულტურისთვის სრულიად უცხო მოვლენა“, – განაცხადა პრემიერმა.

მთავრობის მეთაურმა უკრაინაში „ხელოვნური ემოციების გამოწვევის შედეგად“ განვითარებულ მოვლენებზე ისაუბრა.

„რა მოუტანა ამ ყველაფერმა უკრაინას? მაიდნამდე, 2013 წელს, უკრაინა იყო სახელმწიფო სუვერენიტეტით, ტერიტორიული მთლიანობით, ეკონომიკა ვითარდებოდა, თითქმის 200 მილიარდი იყო უკრაინის ეკონომიკა. სტანდარტული ტემპითაც რომ გაგრძელებულიყო განვითარება, მინიმუმ 400 მილიარდი დოლარი უნდა ყოფილიყო დღეს უკრაინის ეკონომიკა, შეიძლება ნახევარ ტრიოლიონსაც მიეღწია. დღეს უკრაინას დაკარგული აქვს ტერიტორიების 20%, ასეთ მძიმე ვითარებაში მთლიანობაში მორღვეულია სუვერენიტეტი, აქვს უმძიმესი ვითარება ეკონომიკის კუთხით, 400 მილიარდს ვინ ჩივის, 200-ზე ბევრად უფრო ნაკლებია დღეს ეკონომიკა. წარმოიდგინეთ, 2013 წლის შემდეგ ნომინალური ეკონომიკა არათუ ვერ გაიზარდა, პირიქით, მნიშვნელოვნად შემცირებულია. ინფრასტრუქტურა განადგურებულია, მათ შორის ენერგეტიკული თვალსაზრისით მთლიანად დაკარგა დამოუკიდებლობა, 20% არის ოკუპირებული და 100 ათასობით ადამიანი დაღუპულია, რაზეც პრეზიდენტი ტრამპიც საუბრობდა. ეს არის, რასაც იწვევს ხოლმე გარედან ხელოვნურად დალაგებული ემოციები. როგორი ხელოვნურიც იყო ემოციები მაიდნის დროს, ასეთივე ხელოვნური იყო საქართველოშიც. ეს არის კოორდინირებული მოქმედება, რისი მიზანიც არის ლიბერალური ფაშიზმის იდეოლოგიურად გავრცელება ქვეყანაში, მერე მიზანია ქვეყნის არევა, ხელისუფლების შეცვლა, აგენტურის დასმა და ამ აგენტურის დასმის შედეგები რაც არის სხვა ქვეყნებში, ვნახეთ. არ არის პრაქტიკულად შემთხვევა, რომ ასეთ მოვლენების შემდეგ მყისიერად ომში არ გახვეულიყო ქვეყანა“, – აღნიშნა პრემიერმა.

ხალხი და ბიზნესი გაიფიცოსო, გადასახადები არ გადაიხადოსო, სხვები ამუნათეს და ბოლოს ქოცების შეთხზულ ციფრებზე დამყნობილ დაფინანსებაზე უარი არ თქვეს, – ამის შესახებ „კოალიცია ცვლილებისთვის“ ერთ-ერთი ლიდერი ნიკა გვარამია სოციალურ ქსელში წერს.

„ხალხი გაიფიცოს და სამსახურში არ იაროსო, ბიზნესი გაიფიცოს და გადასახადები არ გადაიხადოსო, ქარხნები დაიხურონ და პროდუქცია არ გამოუშვანო – აი, ეს იძახეს, სხვები ამუნათეს და ბოლოს თვითონ ქოცების შეთხზულ-გაყალბებულ ციფრებზე დამყნობილ დაფინანსებაზე უარი არ თქვეს. აი, მესმის“,- წერს ნიკა გვარამია.

ცესკო-ს ინფორმაციით, საპარლამენტო არჩევნების შედეგების საფუძველზე, ახალარჩეული პარლამენტის უფლებამოსილების ცნობის მეორე დღიდან, 26 ნოემბრიდან, სახელმწიფო დაფინანსების მიღების უფლება მოიპოვა შემდეგმა შვიდმა პოლიტიკურმა გაერთიანებამ – „ქართული ოცნება – დემოკრატიული საქართველო“, „ერთიანი ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „გახარია საქართველოსთვის“, „ლელო საქართველოსთვის“, „საქართველოს პატრიოტთა ალიანსი“, „ახალი პოლიტიკური ცენტრი – გირჩი“. დაფინანსების მიღებაზე უარი განაცხადა პარტიამ „კოალიცია ცვლილებისთვის გვარამია მელია გირჩი დროა“. შესაბამისად, სახელმწიფო დაფინანსებას ექვსი პოლიტიკური გაერთიანება მიიღებს.

დისკუსიას გაურბიან, ამას შეიძლება, ჰქონდეს ერთადერთი ლოგიკური ახსნა, მათ იციან, სად არის სიმართლე და ამიტომ ეშინიათ ასეთი დისკუსიის, – ამის შესახებ საქართველოს პრემიერ-მინისტრმა, ირაკლი კობახიძემ გადაცემა „იმედი LIVE“-ში განაცხადა.

მთავრობის მეთაურმა აღნიშნა, რომ 28 ნოემბერს გაკეთებულ განცხადებასთან დაკავშირებით სხვადასხვა სუბიექტსა და ადამიანს დისკუსია არაერთხელ შესთავაზა და ეს შეთავაზება ძალაში რჩება.

„ახალგაზრდებზე გავაკეთე აქცენტი. შემდეგ გამოვიდა მაგალითად შოთა არველაძე, მან გამოთქვა სინანული იმის გამო, რომ ხელისუფლება არ ესაუბრებოდა საზოგადოებას. მას მივმართე, წამოეყვანა 10-12 კაცი, ვის კომპეტენციაშიც ან გულწრფელობაშიც იყო დარწმუნებული და აქაც ნახეთ გარიდება საჯარო დისკუსიისგან. ისევე ეშინიათ მათ დისკუსიის, როგორც ფილმებში ეშმაკს რომ ჯვარს აჩვენებენ და ისტერიკას უპირისპირებს, ასეთი რაღაც ემართებათ. რადიკალური ოპოზიცია და საჯარო დისკუსია ერთმანეთისგან აბსოლუტურად დაშორიშორებული ცნებებია. გულწრფელად ეშინიათ ნებისმიერი საჯარო დისკუსიის. ამას ერთადერთი მიზეზი აქვს. მათ ყველაფერი ძალიან კარგად იციან. ვინც არის რადიკალური ოპოზიციის თუნდაც რიგითი მხარდამჭერი, თითოეულმა მათგანმა ზუსტად იცის ის, რომ არ არის მართალი და რომ სიმართლე არის ჩვენს მხარეს. სხვა მიზეზი და ახსნა არ შეიძლება ჰქონდეს გაქცევას შეთავაზებიდან საჯარო დისკუსიასთან დაკავშირებით. ჩვენ ვითხოვთ საჯარო დისკუსიას, ისინი გაურბიან. 2012 წლამდე იყო პირიქით, ხალხი ითხოვდა დალაპარაკებას ხელისუფლებისგან და ხელისუფლება იყო ჩაკეტილი. ჩვენ ვითხოვთ, ახლაც ვიმეორებ იგივე შეთავაზებას. 10-12 კაცი შეიკრიბოს, ვისაც აქვს პრეტენზია გულწრფელობაზე და ვისაც აქვს ინტერესი, რომ მიიღოს კითხვებზე პასუხი, მოვიდნენ, პირდაპირი ეთერის ფორმატში და გავმართოთ დისკუსია. დარწმუნებული ვარ, იგივე გაგრძელდება, რაც აქამდე იყო. გაურბიან დისკუსიას. ამას შეიძლება, ჰქონდეს ერთადერთი ლოგიკური ახსნა, მათ იციან, სად არის სიმართლე და ამიტომ ეშინიათ ასეთი დისკუსიის“,- განაცხადა პრემიერმა.

საქართველო ენდობა თავის პარტნიორებს, მე თქვენი სოლიდარობის იმედი მაქვს 29 დეკემბერს და შემდგომშიც, ახალ არჩევნებამდე, – ამის შესახებ საქართველოს პრეზიდენტი, სალომე ზურაბიშვილი სოციალურ ქსლეში წერს.

„საქართველო ენდობა თავის პარტნიორებს და მათ მხარდაჭერას სამართლიანობის, თავისუფლებისა და დემოკრატიისთვის ბრძოლაში.

მე, როგორც საქართველოს პრეზიდენტს, თქვენი სოლიდარობის იმედი მაქვს! 29-ში და შემდგომშიც – ახალ არჩევნებამდე“,- წერს სალომე ზურაბიშვილი სოციალურ ქსელში.

https://x.com/Zourabichvili_S/status/1872339652667126220