ხელისუფლებამ შეინარჩუნა მშვიდობა და არანაირ პროვოკაციას არ წამოეგო, თავიდან ავიცილეთ ესკალაციები, გადატრიალების მცდელობები, რაც სუს-ის დამსახურებაა, – ამის შესახებ პარლამენტის თავდაცვისა და უშიშროების კომიტეტის თავმჯდომარემ, ალექსანდრე ტაბატაძემ განაცხადა და სახელმწიფო უსაფრთხოების სამსახურის 2024 წლის ანგარიშს გამოეხმაურა.

ალექსანდრე ტაბატაძის თქმით, საქართველოსთვის სახელმწიფო უსაფრთხოების სამსახურების სიძლიერე, მდგრადობა მნიშვნელოვანია.

„სახელმწიფო უსაფრთხოების სამსახურის ანგარიშის პირველი ნაწილი სწორედ ოკუპაციის საკითხით იწყება. რა თქმა უნდა, ეს ჩვენი სახელმწიფოსთვის უპირველესი გამოწვევაა – საქართველოს 20% ოკუპირებულია. აქედან გამომდინარე, რა თქმა უნდა, თვალხილულია, რასაც საზოგადოება ხედავს – აგრესიას და იმ მოვლენებს, რომლებიც საოკუპაციო ხაზზე ხდება. გარდა ამისა, სახელმწიფოს ჰიბრიდული ომის ნაწილში ყოველთვის აქვს გამოწვევა. ამ წლების განმავლობაში ხელისუფლებამ შეინარჩუნა მშვიდობა და არანაირ პროვოკაციას არ წამოეგო. პროვოკაციის მცდელობები იყო და სწორედ ამიტომ ვახსენებ სუს-ის გამართულ მუშაობას. ჩვენ შევძელით და თავიდან ავიცილეთ ესკალაციები, სახელმწიფოში გადატრიალების მცდელობები. სწორედ მათი დამსახურებაა, სახელმწიფო უსაფრთხოების ამოცანაც ამაში მდგომარეობს, რომ სახელმწიფოსთვის მძიმე, არასასურველი შედეგი ვიდრე დადგება, იქამდე პრევენციული ღონისძიებები გაატაროს და სახელმწიფოს საშიშროება არ დაემუქროს. ბევრჯერ ისმის კითხვა, რა არის გამოძიების შედეგი? გამოძიების მიზანი ხომ არ არის, ვინმეს მიმართ რეპრესიული ღონისძიებები გამოიჩინოს? გამოძიებისა და სახელმწიფო უსაფრთხოების სამსახურის მიზანია, თავიდან აიცილოს ესა თუ ის დანაშაული. სწორედ ამგვარ ქმედებებზეა საუბარი, როცა ვამბობთ, რომ სუს-ი ერთ-ერთი ძლიერი სამსახურია. ჩვენთვის, ქვეყნისთვის, რომლის ტერიტორიების ნაწილი ოკუპირებულია, სწორედ ამ სამსახურების სიძლიერე, მდგრადობაა მნიშვნელოვანი. ამას ძალიან კარგად ართმევენ თავს, რადგან ბევრი პროფესიონალი მუშაობს. მინდა, თითოეულ მათგანს დიდი მადლობა ვუთხრა გაწეული საქმიანობისა და მოღვაწეობისთვის“, – განაცხადა ალექსანდრე ტაბატაძემ.

პროკურორ ნათია თათიაშვილის განცხადებით, პროკურატურამ წარმოადგინა მტკიცებულებები, რომლებიც ადასტურებს, რომ ნიკა მელიამ ნამდვილად ჩაიდინა კანონსაწინააღმდეგო მოქმედება, რაც გამოიხატა მელიას მიერ საქართველოს პარლამენტის დროებით საგამოძიებო კომისიაში გამოუცხადებლობაში.

შესაბამისი განცხადება პროკურორმა სასამართლო სხდომის დასრულების შემდეგ გააკეთა.

“დღევანდელ სასამართლო სხდომაზე განიხილებოდა ნიკანორ მელიას მიმართ აღკვეთის ღონისძიების განსაზღვრის საკითხი. არსებობდა, როგორც ფაქტობრივი, ასევე ფორმალური საფუძვლები, აღნიშნულის დასასაბუთებლად ჩვენ სასამართლოს წარვუდგინეთ დოკუმენტაცია, რატომ უნდა ყოფილიყო ნიკანორ მელიას მიმართ გამოყენებული გირაო 50 000 ლარის ოდენობით.

ფაქტობრივ საფუძვლებთან მიმართებით საქმეში წარმოდგენილია მტკიცებულებები, რომლებიც ადასტურებს, რომ ბრალდებულმა ნამდვილად ჩაიდინა კანონსაწინააღმდეგო მოქმედება, რაც გამოიხატა მის მიერ საქართველოს პარლამენტის დროებით საგამოძიებო კომისიაში გამოუცხადებლობაში.

რაც შეეხება ფორმალურ საფუძვლებს, ამ შემთხვევაში ორ საფრთხეზე გვქონდა საუბარი, ეს იყო მიმალვის და ახალი დანაშაულის ჩადენის საფრთხე. ორივე საქმესთან დაკავშირებით შუამდგომლობა მოსამართლემ გაიზიარა, შესაბამისად დააკმაყოფილა ჩვენი მოთხოვნა”,- განაცხადა პროკურორმა.

კითხვაზე, თუ რას უპასუხებდა ნიკა მელიას კითხვას, საგამოძიებო კომისიის ლეგიტიმურობასთან დაკავშირებით, რა კითხვითაც მელიამ მოსამართლეს და პროკურორს სხდომის მიმდინარეობისას მიმართა, პროკურორმა განაცხადა, რომ “ეს კითხვა ისმოდა მათი მხრიდან, თუმცა ეს არის მათი სუბიექტური შეფასება, რაც მიმართული იყო პასუხისმგებლობისგან თავის არიდებისკენ”.

“დღეს ნამდვილად არ ფასდებოდა საკითხი კომისიის ლეგიტიმაციაზე და კომისიის ჩამოყალიბების კანონიერებაზე. დღეს ფასდებოდა ბრალდებულის ქცევა, რომელიც გამოიხატა კომისიაში არ გამოცხადებით.

ის ფაქტი, რომ კომისია შექმნილია ლეგიტიმურად თუ არა ეს დღევანდელი სხდომის განხილვის საკითხი არ არის. აქვე დავძენ, რომ კომისია შესაბამისი წესების საფუძველზეა შექმნილი. განსაზღვრულია წევრთა რაოდენობაც და ტარდება საგამოძიებო სხდომებიც”,- განაცხადა პროკურორმა.

ინფორმაციისთვის, კოალიცია ცვლილებისთვის“ ერთ-ერთ ლიდერს, ნიკა მელიას, რომელსაც საქართველოს პარლამენტის დროებითი საგამოძიებო კომისიის მოთხოვნის შეუსრულებლობას ედავებიან, აღკვეთის ღონისძიების სახით 50 000-ლარიანი გირაო შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლემ, ლელა მარიდაშვილმა მიიღო. მან ბრალდებულს გირაოს გადახდის ვადად 30 დღე განუსაზღვრა.

შეგახსენებთ, რომ ნიკა მელია საქართველოს პარლამენტის დროებითი საგამოძიებო კომისიის სხდომაზე ახსნა-განმარტებისთვის დაიბარეს, სადაც ის არ მივიდა. აღნიშნული ქმედება სისხლის სამართლის კოდექსის 349-ე მუხლით გათვალისწინებულ დანაშაულად ითვლება, რაც “საქართველოს პარლამენტის დროებითი საგამოძიებო კომისიის მოთხოვნის შეუსრულებლობას” გულისხმობს. ეს ქმედება ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების, ან საქმიანობის უფლების ჩამორთმევით ვადით სამ წლამდე.

“კოალიცია ცვლილებისთვის“ ერთ-ერთ ლიდერს, ნიკა მელიას, რომელსაც საქართველოს პარლამენტის დროებითი საგამოძიებო კომისიის მოთხოვნის შეუსრულებლობას ედავებიან, აღკვეთის ღონისძიების სახით 50 000-ლარიანი გირაო შეეფარდა.

აღნიშნული გადაწყვეტილება თბილისის საქალაქო სასამართლოს მოსამართლემ, ლელა მარიდაშვილმა მიიღო. მან ბრალდებულს გირაოს გადახდის ვადად 30 დღე განუსაზღვრა.

როგორც პროკურორი ნათია თათიაშვილი საკუთარ შუამდგომლობაში აღნიშნავდა, მელიას მხრიდან მიმალვისა და ახალი დანაშაულის ჩადენის საფრთხე არსებობს. პროკურორის განმარტებით, ბრალდებული წარსულში აღნიშნული ქმედებებიდან გამომდინარე, გულგრილია კანონით გათვალისწინებულ ვალდებულებებზე.

ამასთან, პროკურორის განმარტებით, მათ ბრალდებულის ქონებრივი მდგომარეობის შესწავლით დაასკვნეს, რომ 50 000-ლარიანი გირაო არის თანხა, რომლის გადახდასაც ნიკა მელია შეძლებს. ბრალდების მხარე მიიჩნევს, რომ გირაოს თანხის ოდენობას უნდა ჰქონდეს შემაკავებელი ფაქტორი, ამ შემთხვევაში 50 000-ლარის ოდენობით. გადახდის ვადად კი განესაზღვროს – 30 დღე.

შუამდგომლობას არ დაეთანხმა დაცვის მხარე. ნიკა მელიას ადვოკატის გიორგი კონდახიშვილის თქმით, საგამოძიებო კომისია გადაქცეულია “პროპაგანდის ინსტრუმენტად”. ადვოკატის თქმით, ნიკა მელიას საჯაროდ დანაშაულიც არ ჩაუდენია, რადგან “არაკონსტიტუციური ორგანოს მოთხოვნა” ვერ ჩაითვლება სისხლის სამართლის დანაშაულად. ამასთან, როგორც გიორგი კონდახიშვილმა განაცხადა, მიმალვის საფრთხე ჰიპოთეზურია. ადვოკატის თქმით, ნიკა მელიას წარსულში არანაირი კანონი არ დაურღვევია. მას წარსულში დაკისრებული გირაო ევროკავშირმა გადაუხადა, ამიტომ გირაოს დარღვევა არასდროს ყოფილა ნიკა მელიას მხრიდან. ამასთან, კონდახიშვილის თქმით, საქმეზე აღკვეთის ღონისძიების გამოყენების არც ფორმალური და არც ფაქტობრივი საფუძვლები არ არსებობს. ადვოკატის მოთხოვნა იყო, რომ სასამართლოს ნიკა მელია აღკვეთის ღონისძიების გარეშე დაეტოვებინა.

სასამართლო სხდომაზე ისაუბრა ნიკა მელიამაც, როგორც თავად მელიამ განაცხადა, ბრალდების მხარე, არც სიმართლეს არც მართლმსაჯულებას არ ემსახურება.

“ის რომ დღეს აქ ვარ, არ ნიშნავს, რომ გეთანხმებით. 50 000 გირაო უსამართლოა. ამას მე და არც ჩემი მეგობრები არ ვიღებთ. წულუკიანის კომისია თავიდან ბოლომდე არის უკანონო. როგორც მურუსიძის თანამშრომელმა, რა თქმა უნდა, ეს არ იცით. თქვენ არ ემსახურებით სიმართლეს, არც ღირსებას. მე საკუთარი თვალით დაგინახეთ, როგორ შედიოდით რესტორან “ბაბილოში”. კონსტიტუციის თანახმად, სავალდებულო მოთხოვნაა ე.წ. პარლამენტის დროებით საგამოძიებო კომისიაში წევრების ნახევარი მაინც უნდა იყოს ოპოზიციიდან, ხომ შეიძლება თქვენ მითხრათ ან პროკურორმა, 50 000 ლარის გადახდას მთხოვთ და ვერ მეუბნებით სახელს და გვარებს” , – მიმართა მელიამ მოსამართლეს.

ამასთან დაკავშირებით მოსამართლემ მელიას მიმართა, რომ დღევანდელ სხდომაზე არ განიხილება საგამოძიებო კომისიის საკითხი და არც ის ლეგიტიმურია თუ არა კომისია.

არსებობს მზაობა იმისა, რომ სამხრეთ კავკასიის ქვეყნები ვიყოთ მობილიზებულები და მოტივირებულები იმისთვის, რათა ამ რეგიონში იყოს გრძელვადიანი მშვიდობა და სტაბილური განვითარება, – განუცხადა საქართველოს პრეზიდენტმა მიხეილ ყაველაშვილმა სომხეთში ქართველ ჟურნალისტებს.

მიხეილ ყაველაშვილის თქმით, ურთიერთობები, რა თქმა უნდა, კიდევ უფრო მეტად გამყარდება და გაგრძელდება.

„დავასრულე შეხვედრები. ჩემთვის, პრეზიდენტის რანგში, პირველი სტუმრობა იყო სომხეთის რესპუბლიკაში. მქონდა ჩემს კოლეგასთან, პრეზიდენტთან შეხვედრა, შემდეგ პრემიერ-მინისტრთან, მთავრობის წევრებთან. შევხვდი მის უწმინდესობას. დავათვალიერე სერგეი ფარაჯანოვის სახლ-მუზეუმიც.

ძალიან მნიშვნელოვანი შეხვედრა იყო პრეზიდენტთან, ჩვენ გვქონდა საუბარი სხვადასხვა დეტალზე და მინდა საზოგადოებას, ყველას მივმართო, რომ არსებობს მზაობა იმისა, რომ სამხრეთ კავკასიის ქვეყნები ვიყოთ მობილიზებული და მოტივირებული იმისთვის, რათა ამ რეგიონში იყოს გრძელვადიანი მშვიდობა და სტაბილური განვითარება.

როგორც მოგეხსენებათ, მანამდე აზერბაიჯანში ვიმყოფებოდი და იქაც ანალოგიური განწყობაა. როგორც მოგეხსენებათ, არსებობს სამმხრივი ფორმატი, სადაც ვმონაწილეობთ საქართველო, აზერბაიჯანი და სომხეთი, სადაც მიმდინარეობს საუბრები. ყველაზე გამოკვეთილი თემა, რა თქმა უნდა, არის სამშვიდობო პოლიტიკა. იცით ალბათ, რომ აზერბაიჯანსა და სომხეთს შორის დასრულებულია მოლაპარაკება, ყველასთვის ნათელია, რომ ყველა ელოდება ხელმოწერას, რომ ჩვენს რეგიონში გრძელვადიანი მშვიდობა დაისადგურებს. ჩვენი ურთიერთობები, ჩვენი ხალხების ურთიერთობები, ხაზგასასმელი იყო ის, რომ თითქმის ერთ აზრზე ვართ ყველა ამ ქვეყნის ლიდერები, რომ ჩვენ გვჭირდება სტაბილურობა, მშვიდობა და ეკონომიკური განვითარება. შემდეგ ენერგეტიკული თემა, ტურიზმი, კულტურული თემები, ეს ყველაფერი მოსდევს პოლიტიკურ სიმყარეს და მიმაჩნია, რომ ეს პროცესი არის პოზიტიური.

მიმაჩნია, რომ იქნება წარმატებული იმიტომ, რომ ვხედავ მზაობას ამ ქვეყნის ლიდერების. რა თქმა უნდა, ჩვენი განწყობა, როგორც ქვეყნის შიგნით, ისე რეგიონში არის ცნობილი, რომ ეს არის მშვიდობის გრძელვადიანი პროცესი, მას ალტერნატივა არ აქვს. რატომ გვინდა მშვიდობა? იმიტომ, რომ ჩვენი საზოგადოებები იყვნენ უფრო წარმატებულები. იყოს უფრო მეტი კეთილდღეობა და მეტი გარანტიები თითოეული მოქალაქისთვის.

ეს ჩვენი ურთიერთობები, რა თქმა უნდა, კიდევ უფრო მეტად გამყარდება და გაგრძელდება“, – აღნიშნა მიხეილ ყაველაშვილმა.

ამ ქვეყანაში კანონები არსებობს, რომელებიც დემოკრატიულია, ამიტომ როცა გინდა, კანონის დარღვევა იმით გაამართლო, რომ რაღაც გეკუთვნის, რადგან ოპოზიციაში ხარ და რაღაცას აპროტესტებ, ეს ასე არ გამოვა, – ამის შესახებ პარლამენტის თვითმმართველობის კომიტეტის თავმჯდომარემ, ირაკლი ქადაგიშვილმა განაცხადა.

მისი თქმით, ყველამ კეთილი ინებოს და კანონის მიხედვით იმოქმედოს.

„„ქართულმა ოცნებამ“ 2012 წლის გამარჯვება მხოლოდ და მხოლოდ კანონიერი ნაბიჯების გადადგმით და არჩევნების გზით მიიღო და არა სხვა სახის ქმედებებით. ამიტომ ოპოზიციამ კეთილი ინებოს და გაითვალისწინოს, რომ კანონის დარღვევა და საბოტაჟის შენიღბვა რაღაც ლოზუნგებით გამართლებული არ არის და მიზანს ვერ მიაღწევენ. პროკურატურა კანონის მიხედვით მოქმედებს“, – განაცხადა ქადაგიშვილმა.