ბაიდენთან ხელის ჩამორთმევას თუ ვახშამს, ესწრებოდა რამდენიმე ათეული ავტორიტარული სახელმწიფოს ლიდერი, ეს უნდა იცოდეს საზოგადოებამ და თავად გამოიტანოს დასკვნები, – ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებს განუცხადა.

მისივე თქმით, ამერიკის შეერთებული შტატები არის დიდი სახელმწიფო და გაბუტვა არ არის ის, რაც შეშვენის ამხელა სახელმწიფოს.

„რაც შეეხება გაუქმებულ მიწვევას, ვახშამზე, ხელის ჩამორთმევაზე, რომელიც იყო დაგეგმილი, ეს იყო ერთგვარი ბავშვური ნაბიჯი. ამერიკის შეერთებული შტატები არის დიდი სახელმწიფო და გაბუტვა არ არის ის, რაც შეშვენის ამხელა სახელმწიფოს. გაბუტვა ბავშვური საქციელია. რაც შეეხება ხელის ჩამორთმევას, ერთი რამე უნდა იცოდეს საზოგადოებამ და გამოიტანოს დასკვნები – ამ ხელის ჩამორთმევას თუ ვახშამს, თუ რაც იყო, ბაიდენის მიწვევით ესწრებოდა რამდენიმე ათეული ავტორიტარული სახელმწიფოს ლიდერი. იქ მიწვეული იყო 150-ზე მეტი სახელმწიფო ლიდერი, საიდანაც დაახლოებით ნახევარი არის ავტორიტარული, მათ შორის გაფორმებულად, კონსტიტუციურად არის ავტორიტარული. ავტორიტარულ ქვეყნებს იწვევენ და შენ გიუქმებენ მოწვევას, ამაზე გამოიტანოს საზოგადოებამ დასკვნები. მას შემდეგ, რაც გაუქმდა ბაიდენის ვახშამი, მათ შორის დავით ზალკალიანთან ერთად წავედით და ვივახშმეთ ქართულად“, – განაცხადა პრემიერმა.

ომისა და მშვიდობის შედარება არის პრინციპული, რათა საზოგადოებამ გააკეთოს სწორი არჩევანი, რადგან რაც არის გამოსახული სურათებზე, არის ის, რაც თავიდან ავირიდეთ ძალიან დიდი ბრძოლის ფასად, – ამის შესახებ საქართველოს პრემიერ-მინისტრმა ირაკლი კობახიძემ განაცხადა.

როგორც მთავრობის მეთაურმა აღნიშნა, საზოგადოებამ კარგად უნდა გაიაზროს, რა არის ომის ფასი.

„მახსოვს, უკრაინელები აქტიურად იყენებდნენ ამ კადრებს სხვადასხვა მიზნებისთვის, მათ შორის იუმორისტული მიზნებისთვის, მაგრამ ეს სხვა საკითხია. დღეს ჩვენ საზოგადოებას ვახსენებთ იმას, თუ რა შედეგები მოჰყვება ომს და ზოგადად რა ავიცილეთ თავიდან ჩვენი ქვეყნისთვის 2022, 2023 წელს და რა უნდა ავიცილოთ თავიდან, ეს არის ყველაზე მნიშვნელოვანი ამ საპარლამენტო არჩევნების საფუძველზე და საპარლამენტო არჩევნების შემდეგ.

მიუღებელი არის ის, რაც ხდება უკრაინაში. რაც შეეხება უკრაინის საგარეო საქმეთა სამინისტროს განცხადებას, ამაზე კომენტარს არ გავაკეთებ. რაც შეეხება ომისა და მშვიდობის შედარებას, ეს არის პრინციპული, რათა საზოგადოებამ გააკეთოს სწორი არჩევანი, რადგან რაც არის გამოსახული სურათებზე, არის ის, რაც თავიდან ავირიდეთ, სხვათა შორის ძალიან დიდი ბრძოლის ფასად. 2022-23 წლებში ჩვენს ქვეყანას ელოდებოდა იგივე ბედის გაზიარება ჩვენ რომ სწორი ნაბიჯები არ გადაგვედგა  და იმავეს აპირებენ ვიღაც ვიღაცები ამ საპარლამენტო არჩევნების შემდეგაც, თუ ღმერთმა არ ქნას და საზოგადოებამ მიიღო არასწორი გადაწყვეტილება.

საზოგადოებამ კარგად უნდა გაიაზროს, რა არის ომის ფასი. ძალიან ხშირად მათ შორის თქვენი ტელევიზიები, თქვენი პოლიტიკური პარტიები, თქვენი ენჯეოები იმას, რაც ხდება უკრაინაში წარმოაჩენენ რომანტიულად, ეს არის კატეგორიულად მიუღებელი და ამასაც აკეთებთ იმისათვის, რომ საქართველო და ქართველი ხალხი შეაგუოთ ომის იდეას, მაგრამ საქართველოში ომს და საქართველოში უკრაინული სცენარის განხორციელებას ვერ ეღირსებით, ვერც თქვენი მედია საშუალებები, ვერც თქვენი პარტიები და ვერც თქვენი ენჯეოები”, – განაცხადა ირაკლი კობახიძემ.

არჩევნები საერთო საქმეა და ამ საერთო საქმეში ყველა ჩართულ მხარეს, მონაწილე პირს აქვს თავისი პირდაპირი თუ ირიბი პასუხისმგებლობა, – ამის შესახებ ცესკო-ს თავმჯდომარემ, გიორგი კალანდარიშვილმა საქართველოს პირველი არხის გადაცემაში „ყველა შეკითხვა ცესკო-ს“ განაცხადა.

„ეს პასუხისმგებლობა მდგომარეობს იმაში, რომ თვითონ ამომრჩევლის ინფორმირებულობა და ამ ინფორმირებულობის შედეგად შესაბამისი ქმედებების განხორციელება, აქტიურობა და ჩართულობა განაპირობებს იმას, რომ სიაში იქნება იქ, სადაც საკუთარი ქმედებით განახორციელებს გარკვეულ მოქმედებას. ზოგადად, უბნის ფორმირება ხორციელდება პირის რეგისტრაციის ადგილის მიხედვით. საარჩევნო უბანი იქმნება იმ კონკრეტულ საზღვრებში და ლოკაციის ფარგლებში რეგისტრირებულ პირთა მონაცემების საფუძველზე. შესაბამისად, მნიშვნელოვანია ის, რომ თუ ამომრჩეველმა, ან მისმა ოჯახის წევრებმა შეიცვალა რეგისტრაციის ადგილი, ადგილი ჰქონდა უძრავი ქონების გასხვისებას და სხვა ლოკაციაზე ხელახალი რეგისტრაციის განოხორციელებას, ან ოჯახის წევრების არგადაწერას, მათ მოახდინონ რეგისტრაცია შესაბამის ლოკაციაზე“, – განაცხადა კალანდარიშვილმა.

მისი თქმით, ხშირად არის ხოლმე ამომრჩეველთა ერთიან სიასთან დაკავშირებით საკითხების მიზანმიმართულად, მანიპულაციურად წარმოჩენა.

„რა თქმა უნდა, უპირატესი, ფუნდამენტური და კონსტიტუციური გახლავთ ის საკითხი, რომ ამომრჩეველმა უნდა მიიღოს არჩევნებში მონაწილეობა და მას უნდა ჰქონდეს ამის შესაძლებლობა. თუ ამომრჩეველი არის უმისამართო, მას არ აქვს რეგისტრაციის მისამართი, ცხადია, ეს არ უნდა გახდეს ხელის შემშლელი გარემოება იმისთვის, რომ ამომრჩეველმა ვერ მიიღოს მონაწილეობა არჩევნებში. ამიტომ, კანონმდებელმა, საგამონაკლისო წესით, 2026 წლის 1-ელ იანვრამდე განსაზღვრა წესი იმის თაობაზე, თუ როგორ უნდა მოხდეს მათი არჩევნებში მონაწილეობა. რაც მდგომარეობს იმაში, რომ თუ პირს შესაბამის დამადასტურებელ დოკუმენტში აქვს მითითებული – უმისამართო, 5 ოქტომბრის ჩათვლით თუ არ მიმართა სერვისების სააგენტოს, არ მოითხოვა სხვა მისამართზე რეგისტრაცია და ახალი მისამართის დაფიქსირება, სერვისების სააგენტო ბოლო რეგისტრაციის მიხედვით, რომელიც დაფიქსირებული იყო სააგენტოში, ამ ადგილზე მიაკუთვნებს და განსაზღვრავს მის არჩევნებში მონაწილეობის მიზნებისთვის რეგისტრაციის ადგილს, რაც არცერთ შემთხვევაში არ ნიშნავს შესაბამის ჩაწერას იმ კონკრეტულ ლოკაციაზე სხვა მესაკუთრესთან. სამწუხაროდ, ჩვენ გვინახავს პრაქტიკაში შემთხვევები, როცა მესაკუთრე წუხს, რომ მან თითქოს აღმოაჩინა მის ოჯახში ჩაწერილი რამდენიმე უცხო პირი. რა თქმა უნდა, ამას შეიძლება, ჰქონდეს რამდენიმე ობიექტური მიზეზი, მათ შორის ერთ-ერთი – ჩემ მიერ დასახელებული. მესმის, რომ ამან შეიძლება, ბუნებრივი წუხილი გამოიწვიოს, როდესაც ამოწმებთ სიას და უცებ ნახულობთ, რომ რამდენიმე უცხო ადამიანია რეგისტრირებული თქვენ მისამართზე, თუმცა ეს ასე დავარქვათ მიწერა, არის საარჩევნო რეგისტრაცია არჩევნების მიზნებისთვის და ეს არცერთ შემთხვევაში არ ნიშნავს საკუთრებაში ჩაწერას“, – განაცხადა კალანდარიშვილმა.

გიორგი კალანდარიშვილმა მოქალაქეებს კიდევ ერთხელ მიმართა, 8 ოქტომბრის ჩათვლით გადაამოწმონ საკუთარი და ოჯახის წევრთა მონაცემები ამომრჩეველთა ერთიან სიაში და უზუსტობის აღმოჩენის, ან დაზუსტების საჭიროების შემთხვევაში მიმართონ, როგორც ცესკო-ს ცხელ ხაზს და სხვა საკომუნიკაციო არხებს, ასევე სერვისების განვითარების სააგენტოს.

მისივე თქმით, მნიშვნელოვანია, როგორც ერთიან საარჩევნო სიაში მონაცემების გადამოწმება, ასევე, შესაბამისი დოკუმენტის ვალიდურობის შემოწმება, პირადობის მოწმობის, ან პასპორტის უფლებამოსილების ვადებში არსებობა.

ექიმების რეკომენდაცია როდესაც იქნება, მიხეილ სააკაშვილი აუცილებლად დაბრუნდება შესაბამის პენიტენციურ დაწესებულებაში, – ამის შესახებ საქართველოს იუსტიციის მინისტრმა, რატი ბრეგაძემ ჟურნალისტებს განუცხადა.

ბრეგაძის თქმით, სააკაშვილის ჯანმრთელობის მდგომარეობა გაუმჯობესებულია.

„დანარჩენზე უნდა ისაუბრონ ექიმებმა. მე სიხარულით შემიძლია გამცნოთ, რომ მისი ჯანმრთელობის მდგომარეობა ნამდვილად გაუმჯობესებულია. ადრეც გიკითხავთ და ახლაც გავიმეორებ, რომ ექიმების რეკომენდაცია როდესაც იქნება, აუცილებლად დაბრუნდება შესაბამის პენიტენციურ დაწესებულებაში“, – განაცხადა რატი ბრეგაძემ.