დარწმუნებული ვარ, რომ ილჰამ ალიევთან შეხვედრა გზას გაუხსნის ჩვენი თანამშრომლობის შემდგომ გაძლიერებას და საერთო მიზნების მიღწევას, – ამის შესახებ საქართველოს პრემიერ-მინისტრი ირაკლი კობახიძე სოციალურ ქსელ X-ზე წერს.

როგორც ირაკლი კობახიძე აღნიშნავს, შეხვედრაზე ხაზი გაესვა ქვეყნებს შორის არსებული სტრატეგიული პარტნიორობის მნიშვნელობას.

„საქართველო-აზერბაიჯანის ეკონომიკური თანამშრომლობის მთავრობათაშორისი კომისიის მე-10 სხდომის ფარგლებში მქონდა პატივი, შევხვედროდი პრეზიდენტ ილჰამ ალიევს. ჩვენ გვქონდა ნაყოფიერი დიალოგი ორმხრივი და რეგიონული მნიშვნელობის ძირითად საკითხებზე. ხაზი გაესვა ჩვენი სტრატეგიული პარტნიორობის მნიშვნელობას. დარწმუნებული ვარ, რომ ეს შეხვედრა გზას გაუხსნის ჩვენი თანამშრომლობის შემდგომ გაძლიერებას და საერთო მიზნების მიღწევას“, – აღნიშნავს პრემიერი.

ოპოზიციის წარმომადგენლები გაგიჟებულები არიან და ცდილობენ, ჩრდილი მიაყენონ ქვეყანას, ვითომ არჩევნები გაყალბდა, – ამის შესახებ თბილისის მერმა, კახა კალაძემ საპარლამენტო არჩევნების სავარაუდო გაყალბების ფაქტზე მიმდინარე გამოძიების შუალედური შედეგების შესახებ განაცხადა.

მისივე თქმით, ოპოზიციამ ის შედეგი ვერ მიიღო, რასაც ელოდა, რის შემდეგაც ცრუ ინფორმაციას ავრცელებს.

„ყველაფერი ძალიან მარტივია. სიყალბეა და გარედან მოწოდებული მესიჯები იყო, თითქოს არჩევნები გაყალბდა. უნდა ეაქტიურა „გაფარჩაკებულ“, გაუბედურებულ ოპოზიციას, რადგან დამარცხდნენ. გარე ძალებმა ვერ მიიღეს ის შედეგი, რასაც ელოდებოდნენ. გაგიჟებულები არიან და ცდილობენ, ჩრდილი მიაყენონ ქვეყანას, ვითომ არჩევნები გაყალბდა. 300 000 ხმაზეა საუბარი, წარმოგიდგენიათ?! ამ დროს მათ ვეუბნებით, რომ წარმოადგინონ ერთი, კონკრეტული მტკიცებულება, ფაქტი ამასთან დაკავშირებით, მაგრამ არ არსებობს ბუნებაში. არჩევნების არანაირი გაყალბება არ მომხდარა. „ქართულმა ოცნებამ“ ღირსეულად გაიმარჯვა. 1 120 000-მა ადამიანმა მხარი დაუჭირა ქვეყანაში მშვიდობას და წავიდა იმ ბოროტების წინააღმდეგ, რომელსაც მოღალატე, გამყიდველი აგენტურა წარმოადგენს. პროკურატურამაც ჩაატარა გამოძიება და გაყალბების არანაირი ფაქტი არ არსებობს“, – განაცხადა კახა კალაძემ.

მისივე თქმით, სახალხო დამცველმაც ისაუბრა იმასთან დაკავშირებით, რომ მთელი ამ ხნის განმავლობაში არჩევნების შესაძლო გაყალბების ვერანაირი მტკიცებულება ვერავინ წარმოადგინა.

თბილისის მერი კახა კალაძე აცხადებს, რომ საქართველოსთან დაკავშირებით ბოლო თვეების განმავლობაში ისეთ გადაწყვეტილებებს იღებენ, რომლებიც უსამართლობაზეა დაფუძნებული.

კახა კალაძე „ქართული ოცნების“ პოლიტსაბჭოს მიერ გავრცელებულ იმ განცხადებას გამოეხმაურა, სადაც ბრიტანული მხარის მიერ ყოფილი პრემიერ-მინისტრის, მმართველი პარტიის საპატიო თავმჯდომარის, ბიძინა ივანიშვილის შესაძლო დასანქცირებაზეა საუბარი.

„ბოლო თვეების განმავლობაში, ისეთ განცხადებებსა და იმ ტიპის გადაწყვეტილებებს ვისმენთ, რომლებიც უსამართლობაზეა დაფუძნებული. რა თქმა უნდა, ძალიან ცუდია, როდესაც გადაწყვეტილება დაფუძნებულია სიცრუეზე – პირდაპირ გვეუბნებიან თეთრზე, რომ შავია. ვხედავთ, თუ რა ვითარებაა მთელ მსოფლიოში. 20 იანვრის შემდეგ, ძალიან ბევრი რამ შეიცვლება, ამის იმედი აქვს ყველას. ამერიკის შეერთებული შტატების არჩეული პრეზიდენტი თავად საუბრობს ამ ყველაფერზე, რომ პირველი, რასაც გააკეთებს, ე.წ. დიფ სთეითის დამარცხებაა. ამაზე არაერთი განცხადება მოვისმინეთ, რადგან წარმოუდგენელია, ცხოვრების ამგვარი უსამართლობით გაგრძელება, როდესაც ძალით არის ყველაფერზე საუბარი და გადაწყვეტილებების მიღება. თუ იცავ შენს ქვეყანას და მის ინტერესს, მაშინვე ბევრ სისულელეს მოიგონებენ ხოლმე, შეურაცხმყოფელ განცხადებებს აკეთებენ და იღებენ არასამართლიან გადაწყვეტილებებს. არ მგონია, ამ ტიპის გადაწყვეტილება მიიღოს ბრიტანეთმა, თუმცა თუ მიიღებენ, ეს ძალიან ცუდი იქნება. ის, რომ ბრიტანეთი ყოველთვის სამართლიანობასთან ასოცირდებოდა, ყველაფერი წარსულს ჩაჰბარდება“, – განაცხადა კახა კალაძემ.

კითხვაზე – ხომ არ არის პოლიტსაბჭოს მძაფრი რეაქციის მიზეზი ის, რომ ბიძინა ივანიშვილი ვირჯინიის კუნძულებზე ოფშორულ კომპანიებს ფლობს, თბილისის მერი პასუხობს, რომ საქართველოს ინტერესები, სხვა რომელიმე ქვეყნის სასარგებლოდ, არ ითმობა.

„ოფშორული კომპანიები რა შუაშია?! ადამიანს აშანტაჟებდნენ მთელი ამ წლების განმავლობაში, რომ ქვეყნის ინტერესები დაეთმო. აშანტაჟებდნენ პირადი თანხებით. იცით, რომ დავა მიმდინარეობდა შვეიცარიის სასამართლოში. მან ეს დავა მოიგო, თუმცა, კიდევ ერთხელ ვიმეორებ, რომ თანხას არ უბრუნებდნენ – აშანტაჟებდნენ, რომ გადაედგა შესაბამისი ნაბიჯი, რომელსაც შემდეგ მისი დასანქცირება მოჰყვა. საბოლოო ჯამში, დაინახეს, რომ ქვეყნის ინტერესი არ ითმობა. ვერანაირი მუქარა, სანქციები და შანტაჟი ვერ შეგვაშინებს, როდესაც საუბარია ქვეყნის ინტერესებზე. ჩვენი ქვეყნის ინტერესების დაცვას გავაგრძელებთ და არავის მივცემთ შესაძლებლობას, საქართველო და ქართველი ხალხი გამოიყენონ რომელიმე სხვა, დიდი ქვეყნის ინტერესების გასატარებლად. უკრაინა საქართველოში ვერ განმეორდება და ვერ მოხდება. ჩვენ დავიცავთ ხალხს, ქვეყანას და მოვახდენთ მის ეკონომიკურ განვითარებას“, – განმარტა დედაქალაქის მერმა.

ირაკლი კობახიძესთან შეხვედრაზე ვისაუბრეთ „შუა დერეფნის“ პროექტზე, აზერბაიჯანი და საქართველო იქნებიან ის კავშირი, ხიდი, რომელიც დამყარდება ევროპასა და აზიას შორის, – ამის შესახებ აზერბაიჯანის პრეზიდენტმა, ილჰამ ალიევმა საქართველოს პრემიერ-მინისტრთან, ირაკლი კობახიძესთან შეხვედრის შემდეგ განაცხადა.

ალიევის თქმით, „ქართული ოცნების“ წარმატება უზრუნველყოფს იმ ფაქტს, რომ სამხრეთ კავკასიაში იქნება სტაბილურობა.

„პირისპირ შეხვედრაზე ვისაუბრეთ დაკავშირებადობაზე და „შუა დერეფნის“ პროექტზე. ჩვენი ქვეყნები მჭიდროდ თანამშრომლობენ და პარტნიორები არიან. ჩვენი ჩართულობა რეგულარულია და შესაბამისი უწყებები კოორდინირებულად მუშაობენ ამ მიმართულებით. დარწმუნებული ვარ, რომ ეს პროექტი წარმატებული იქნება. ბუნებრივია, ამ პროექტში მჭიდრო კავშირები უნდა შევინარჩუნოთ სხვა ქვეყნებთან სამეზობლოში, ეს მოიცავს ფართო გეოგრაფიას. ბუნებრივია, აზერბაიჯანი და საქართველო იქნებიან ის კავშირი, ხიდი, რომელიც დამყარდება ევროპასა და აზიას შორის.

ჩვენ წარმატებულად ვახორციელებთ ამას და ვიცი, რომ ტრანსპორტის ინფრასტრუქტურა ფართოვდება საქართველოშიც, ისევე როგორც აზერბაიჯანში. განსაკუთრებით ეს შეეხება გაციფროვნებას, სატრანსპორტო ინფრასტრუქტურის გაციფროვნებას. ამდენად, ეს ძალისხმევა პარალელურად მიმდინარეობს ორივე ქვეყანაში და იმ ერების საკეთილდღეოდ, რომელსაც წარმოვადგენთ. ჩვენ ვართ უცილობელი პარტნიორები და ძალიან ფასეული სერვისები შეგვიძლია, შევთავაზოთ სხვებსაც. ჩვენ ბევრი რამის მიღწევა მოვახერხეთ, დეტალებში არ შევალ, მაგრამ ამას გაფართოებულ ფორმატში განვიხილავთ. თქვენი პარტიის წარმატება უზრუნველყოფს იმ ფაქტს, რომ სამხრეთ კავკასიაში იქნება სტაბილურობა თქვენი ძმობის, მეგობრობის რანგში. გვახარებს თქვენი წარმატება“, – განაცხადა ილჰამ ალიევმა.

თქვენი პარტიის წარმატება უზრუნველყოფს იმ ფაქტს, რომ სამხრეთ კავკასიაში იქნება სტაბილურობა, თქვენი ძმების და მეგობრების რანგში გვახარებს ეს წარმატება, – ამის შესახებ აზერბაიჯანის პრეზიდენტმა, ილჰამ ალიევმა ირაკლი კობახიძესთან პირისპირ შეხვედრის შემდეგ, ერთობლივი განცხადებების დროს აღნიშნა.

მისივე თქმით, პრემიერ-მინისტრთან შეხვედრის ერთ-ერთი განსახილველი საკითხი იყო დაკავშირებადობა და შუა დერეფნის პროექტი.

„პირისპირ შეხვედრისას ვისაუბრეთ დაკავშირებადობასა და შუა დერეფნის პროექტზე. ჩვენი ქვეყნები მჭიდროდ თანამშრომლობენ და პარტნიორები არიან. ჩვენი ჩართულობა რეგულარულია და შესაბამისი უწყებები კოორდინირებულად მუშაობენ ამ მიმართულებებით. დარწმუნებული ვარ, ეს პროექტი წარმატებული იქნება. ბუნებრივია, ამ პროექტში ჩვენ მჭიდრო კავშირი უნდა შევინარჩუნოთ სხვა ქვეყნებთან სამეზობლოში და ეს მოიცავს ფართო გეოგრაფიას. აზერბაიჯანი და საქართველო იქნება ის კავშირი და ხიდი, რომელიც დამყარდება ევროპასა და აზიას შორის. ჩვენ წარმატებით ვახორციელებთ ამას და ვიცი, რომ სატრანსპორტო ინფრასტრუქტურა ფართოვდება საქართველოშიც, ისევე როგორც აზერბაიჯანში. განსაკუთრებით ეს შეეხება გაციფროვნებას, სატრანსპორტო ინფრასტრუქტურის გაციფროვნებას. ეს პარალელურად მიმდინარეობს ორივე ქვეყანაში, ჩვენი ერების საკეთილდღეოდ. ჩვენ ვართ ძლიერი პარტნიორები და ძალიან ფასეული სერვისები შეგვიძლია შევთავაზოთ სხვა ქვეყნებსაც.

ჩვენ ბევრი რამის მიღწევა მოვახერხეთ, რასაც გაფართოებულ ფორმატში განვიხილავთ. აქვე მინდა დავამატო, რომ თქვენი პარტიის წარმატება უზრუნველყოფს იმ ფაქტს, რომ სამხრეთ კავკასიაში იქნება სტაბილურობა, თქვენი ძმების და მეგობრების რანგში გვახარებს თქვენი წარმატება, გისურვებთ მომდევნო წარმატებებს მომავალშიც“, – აღნიშნა აზერბაიჯანის რესპუბლიკის პრეზიდენტმა.

გოგა ხაინდრავა ფოთისა და ხობის მიტროპოლიტ გრიგოლ ბერბიჭაშვილს ღია წერილით მიმართავს, რომელსაც უცვლელად გთავაზობთ.

„არა ცილი სწამო მოყვასსა შენსა წამებითა ცრუითა“

ათი მცნება

მედიასივრცეში შემთხვევით წავაწყდი საჯარო განცხადებას, შემდეგი წინათქმით:

„მიგვაჩნია, რომ მოქალაქეების მიმართ ძალადობა, მათი დარბევა და დასახიჩრება დაუშვებელია, მით უფრო, თუ ეს მოქალაქეები ქვეყნის კონსტიტუციის ფარგლებში იბრძვიან თავისი სამოქალაქო უფლებების და უკეთესი მომავლისთვის“.

ინფორმაციის წყარო − „მთავარი არხი“ (6 იანვარი 2025 წ. 22:44).

არ შევაჩერებდი ყურადღებას, რომ არა ერთი გარემოება. აღმოჩნდა, რომ ეს არის ამონარიდი, ფოთისა და ხობის მიტროპოლიტ გრიგოლ ბერბიჭაშვილის საშობაო მილოცვიდან. როდესაც ვკითხულობდი ამ მილოცვას, ჩემდა უნებურად გონებაში ამომიტივტივდა მეცხრე მცნება, რომელიც ამ წერილის სათაურში მაქვს გამოტანილი.

მიტროპოლიტო გრიგოლ!

თქვენს „საშობაო მილოცვაში“ ბრძანებთ:

„დღეს, საქართველოში, ჩვენ თვალწინ იბადება ახალი საზოგადოება“.

საინტერესოა, რომელი ახალი საზოგადოების დაბადებას გულისხმობთ, მღვდელმთავარო?
იმ საზოგადოების, რუსთაველის გამზირზე, მჩხიბავების მიერ ნემსებით დაჩხვლეტილი ცოცხალი ადამიანის ფიტულის, უფლის გამოსახულებით შემკულ კუბოში, საშობაო ნაძვის ხის ქვეშ დაწვას აღტაცებული ტაშით რომ ეგებება?! თუ იმ, ჩვენ თვალწინ დაბადებული ახალი საზოგადოების, შობის კვირაში, ქაშვეთის ეკლესიის წინ, ქალის ჭრელ ტანსაცმელში გამოწყობილი წვერებიანი მამაკაცის თავდავიწყებული როკვით რომ ერთობა?! თუ იმ ყმაწვილი ქალების გუნდს გულისხმობთ, ახალდაბადებულ საზოგადოებაში, უშვერი ბილწსიტყვაობით გაჯერებულ სიმღერას რომ გაჰკივიან სახალხოდ ქუჩებში, შობის მარხვაში, და ამით იწონებენ თავს?! ან იქნებ იმ ახალდაბადებულ საზოგადოებას, უწმინდესის და უნეტარესის, სრულიად საქართველოს კათოლიკოს-პატრიარქ ილია მეორისა და ქართული მართლმადიდებელი ეკლესიის ლანძღვა-გინებისას დუჟი რომ ადგათ პირზე?! თუ იმ, ლგბტ-ატრიბუტიკაში გახვეულ ახალდაბადებულ საზოგადოებას გულისხმობთ, ევროპელ მამათმავალ პოლიტიკოს-პროპაგანდისტებს, ანტისახელმწიფოებრივ მიტინგებზე ოვაციებს რომ უწყობენ?! იმათ ხომ არა, მღვდელმთავარო გრიგოლ, რესტორნებში და სასტუმროებში, სტუმრებს კერძების შარდით და ნერწყვით შეკაზმვას რომ უქადიან?!

სხვა, მშობიარობის ჭინთვები, ახალი საზოგადოების დაბადების პროცესის მანიშნებელი, ანდა მშობიარეთა გულშემატკივრების თავყრილობები, თბილისის ქუჩებში თუ სრულიად საქართველოში არ შეიმჩნევა! იქნებ თქვენს ეპარქიაში ხდება რაიმე განსხვავებული და ჩვენ ეს გამოგვრჩა?

„მიგვაჩნია, რომ მოქალაქეების მიმართ ძალადობა, მათი დარბევა და დასახიჩრება დაუშვებელია, მით უფრო, თუ ეს მოქალაქენი ქვეყნის კონსტიტუციის ფარგლებში იბრძვიან თავისი მოქალაქეობრივი უფლებების და უკეთესი მომავლისთვის…“ − ბრძანებთ თქვენს საშობაო მილოცვაში, მიტროპოლიტო გრიგოლ.

საინტერესოა, თქვენთან ერთად კიდევ ვის მიაჩნია (მილოცვაში მრავლობით პირში ბრძანებთ, იმიტომ ვკითხულობ), რომ „მოლოტოვის კოქტეილის“, პიროტექნიკის, ქვების, ნავთით, წყლით და ქვიშით სავსე ბოთლების პოლიციელებისთვის მიზანმიმართულად სროლა, მათ მიმართ ძალადობა, მათი ცოცხლად დაწვის მცდელობა და დასახიჩრება! პარლამენტის შენობის შტურმი! სახელმწიფო და კერძო ქონების განადგურება, ქუჩებში მანქანების დაწვა და თბილისის ცენტრალური გამზირის გავერანება! დაშვებულია კონსტიტუციის ფარგლებში და მოქალაქეობრივი უფლებებისთვის და უკეთესი მომავლისთვის ბრძოლას ნიშნავს! ქართველი პოლიციელები კი, ქვეყნის მოქალაქეების კატეგორიას არ განეკუთვნებიან?!

იქნებ თქვენ, მვღდელმთავარო, ან იმ ადამიანებმა, რომლებსაც ერთნაირად მიგაჩნიათ, მიგვითითოთ საქართველოს კონსტიტუციის ფარგლებში, კონკრეტულად რომელი მუხლები გულისხმობენ და განსაზღვრავენ, იმ ვანდალური აქტების განხორციელების უფლებას, რომლის მოწმენი გავხდით ჩვენ თბილისის ქუჩებში, ახალი საზოგადოების მშობიარობის პროცესში.

„ადამიანის ღვთივბოძებული თავისუფალი ნების ჩახშობისკენ მიმართული ნებისმიერი მცდელობა არის ძალადობა ადამიანის მიმართ. ადამიანის თავისუფალი ნების მიმართ ხელშეუხებლობა კი ერთ-ერთი მთავარი პრინციპია ქრისტიანული აზროვნების, ამასთანავე, წარმმართველი პრინციპი უძველესი ქართული კულტურის“, – აღნიშნავთ თქვენს საშობაო მილოცვაში, მიტროპოლიტო გრიგოლ.

შეუძლებელია არ დაეთანხმო, მღვდელმთავარო, თქვენს ამ მოსაზრებებს. თუმცა იმის გაფიქრებაც კი, რომ თქვენ, საქართველოს მართლმადიდებელი ეკლესიის მღვდელმთავარს, მიგაჩნიათ, რომ იმ ბარბაროსულ აქტებს, დაბადების პროცესში მყოფი ახალი საზოგადოების წარმომადგენლები – „ღვთივბოძებული თავისუფალი ნების და ქრისტიანული აზროვნების, ამასთანავე, უძველესი ქართული კულტურის წარმმართველი პრინციპებით“ შთაგონებულები სჩადიოდნენ?! წარმოუდგენელია!

„ქრისტიანული მრწამსი ჩვენ გვავალებს, რომ ამ პრინციპების უგულებელყოფის შემთხვევაში ხმა ავიმაღლოთ და ვამხილოთ კიდეც ძალადობა!“ – სრულ ჭეშმარიტებას ბრძანებთ, მიტროპოლიტო გრიგოლ!

მე, როგორც საქართველოს მართლმადიდებელი ეკლესიის მრევლის წევრი, მოკრძალებით მოგმართავთ თხოვნით, მიტროპოლიტო გრიგოლ, გაგვარკვიოთ, როგორ მიგაჩნიათ, ახალი საზოგადოების დაბადების პროცესში, ვის მიერ და რა შემთხვევაში იყო „უგულებელყოფილი ქრისტიანული მრწამსის პრინციპები“?

რათა ჩვენც, თქვენი კურთხევით, ხმა ავიმაღლოთ და ვამხილოთ ძალადობა!

ქრისტესმიერი მორჩილებით,
გიორგი ხაინდრავა“.

მე პრეზიდენტ ტრამპს ვუთხარი, რომ საქართველოში არჩევნები გაყალბდა, მივეცი ინფორმაცია და დარწმუნებული ვარ, ის ამას იკვლევს,- ამის შესახებ „რესპუბლიკელმა კონგრესმენმა“, ჰელსინკის კომისიის თავმჯდომარემ, ჯო უილსონმა განმა განაცხადა.

უილსონის თქმით, შთაგონება არის ქართველი ხალხი, რომელიც მშვიდობიან პროტესტს აგრძელებს და ითხოვს სამართლიან, თავისუფალ არჩევნებს.

„ნამდვილად დარწმუნებული ვარ, რომ „რესპუბლიკელები“ და „დემოკრატები“ მტკიცედ იდგებიან ქართველი ხალხის გვერდით. მე თვითონ ძალიან მოხარული ვარ, რომ ვავრცელებ ინფორმაციას საქართველოს ლეგიტიმური პრეზიდენტის სალომე ზურაბიშვილის შესახებ. ისევ და ისევ, ჩვენ გვსურს თავისუფალი და სამართლიანი არჩევნები საქართველოში. ნამდვილად არსებობს მსგავსება, სახელმწიფო მდივნობის კანდიდატ მარკო რუბიოს ოჯახი თავად გამოიქცა კომუნისტური ქვეყნიდან. მას კარგი აღქმა აქვს იმისა, თუ რამდენად მნიშვნელოვანია თავისუფალი და სამართლიანი არჩევნები და მასზე უკეთესი სახელმწიფო მდივანი საქართველოში თავისუფალი და სამართლიანი არჩევნების წასახალისებლად ვერ გვეყოლებოდა. იგივეს ვიტყვი, დონალდ ტრამპზე, რომელიც ის ადამიანია, ვისაც მთელ მსოფლიოში სურს თავისუფალი და სამართლიანი არჩევნები.

მე პრეზიდენტ ტრამპს ვუთხარი, რომ საქართველოში არჩევნები გაყალბდა, მივეცი ინფორმაცია და დარწმუნებული ვარ, რომ ის, ამას იკვლევს, მაგრამ გავიმეორებ, ჩვენ შთაგვაგონებს ქართველი ხალხი, რომელიც მშვიდობიან პროტესტს აგრძელებს და ითხოვს სამართლიან და თავისუფალ არჩევნებს. პრეზიდენტ ტრამპისთვის პრიორიტეტია, რომ მსოფლიოს ქვეყნები ატარებდნენ თავისუფალ და სამართლიან არჩევნებს საკუთარი მოქალაქეების საკეთილდღეოდ“, – განაცხადა ჯო უილსონმა, რომლის კომენტარსაც „ამერიკის ხმა“ ავრცელებს.