როგორ შეიძლება, რომ 300 ათასი ადამიანის მონაცემი აიღო ისე, რომ ეს ვერავინ გაიგოს. ეს არა მარტო ტყუილია, არამედ ეს არის უნამუსო ტყუილი, რაც გახარიამ თავადაც კარგად იცის, რომ ვერ განხორციელდება, – განაცხადა პარლამენტის თავმჯდომარის პირველმა მოადგილემ, გიორგი ვოლსკიმ.

იგი არჩევნების თემაზე გიორგი გახარიას განცხადებას გამოეხმაურა.

„არ ვიცი, რას დავაბრალო – გახარიას ფანტაზიას დავაბრალო, თუ გამოუვალ მდგომარეობას, რომელშიც ოპოზიცია ჩავარდა და გახარია ყველაზე მეტ ეფექტურ მექანიზმად მოგვევლინა „ნაცმოძრაობის“ ინტერესის განხორციელების საქმეში.

როგორ შეიძლება, რომ 300 ათასი ადამიანის მონაცემი აიღო ისე, რომ ეს ვერავინ გაიგოს. ეს არა მარტო ტყუილია, არამედ ეს არის უნამუსო ტყუილი, რაც თავად კარგად იცის, რომ ვერანაირად განხორციელდება, ხავსიც აღარ არის უკვე, ხავსს რას ვერჩი, გახარიასა და მისი გუნდის, „კოლექტიური ნაცმოძრაობის“ ხელში ეს არგუმენტი“, – განაცხადა ვოლსკიმ.

გიორგი გახარიამ სოციალურ ქსელში თავის ინტერვიუ გამოაქვეყნა, სათაურით: „ასე მოიპარა ოცნებამ ადამიანის არჩევანი“, ქმნის აღქმას, თითქოს მტკიცებულებებს წარადგენს, თუმცა დაახლოებით, ექვსწუთიან ვიდეოში მხოლოდ ვარაუდებზეა საუბარი. „ქართული ოცნებაში“ მტკიცებულებებზე საუბრობენ და ამბობენ, რომ პარტია „საქართველოსთვის“ ლიდერს კითხვებზე აქვს პასუხი გასაცემი. საუბარია, არჩევნებამდე საჯარო მოხელეებისთვის გაგზავნილ ელექტრონულ შეტყობინებებზე, რაც ადასტურებს, რომ გიორგი გახარიას პერსონალურ მონაცემებზე წვდომა აქვს.

არჩევნების გაყალბების არანაირი მტკიცებულება არ არსებობს, რაც შეეხება ამომრჩევლების მობილიზებას, ამისთვის გვყავს პარტიის წევრები, რომლებიც ყოველდღიურად მუშაობენ მათთან, – აღნიშნული განცხადებით დედაქალაქის მერმა კახა კალაძემ ამომრჩევლის მობილიზებასთან დაკავშირებით გამოთქმულ ვარაუდებს უპასუხა.

მისივე თქმით, ამ საკითხზე პარტიები NDI-ის და IRI-ის ტრენინგებს გადიოდნენ.

„სრული პასუხისმგებლობით გეუბნებით და აბსოლუტურად გულწრფელი ვარ: არანაირი მტკიცებულება, ფაქტი არ არსებობს ბუნებაში, რომ არჩევნები გაყალბდა. ნახეთ, რამხელა სხვაობაა „ქართულ ოცნებასა“ და მეორე ადგილზე გასულ პოლიტიკურ პარტიას შორის, გინდ ხმების რაოდენობით, გინდ პროცენტულად. ლაპარაკობენ, რომ ეს იყო, ის იყო, მაგრამ არანაირი ფაქტი, არანაირი მტკიცებულება არ არსებობს. უკვე ყველანაირი რესურსი ამოწურეს, თენგოსაც აღარაფერი აღარ დარჩა სათქმელი და ნოდარ მელაძის რაღაც გაუგებარი სიუჟეტით სპეკულირებენ. რა თქმა უნდა, ამომრჩევლის მობილიზებაში პარტია ჩართულია და ამაზე NDI-ის და IRI-ის ტრენინგებს გავდიოდით პარტიები მათივე დაფინანსებით, თუ როგორ უნდა მოახდინო ამომრჩევლის მობილიზება, ამომარჩეველთან კომუნიკაცია, არჩევნების დღეს როგორ უნდა იმოქმედო, რა უნდა გააკეთო, როგორ უნდა გააკეთო, როგორ უნდა შექმნა ჯგუფები, რომლებიც უზრუნველყოფენ მხარდამჭერების მოყვანას და ა.შ. ეს ჩვეულებრივი პროცესია, რასაც იყენებს ყველა პოლიტიკური პარტია. ეს სპეკულაციები მეტყველებს იმაზე, რომ ამ ადამიანებს არანაირი რესურსი არ გააჩნიათ. ერთადერთი ხავსი ჰქონდათ და ის ხავსიც აღარ დარჩათ. „ქართულ ოცნებას“ პარტიის 50 000-ზე მეტი წევრი ჰყავს, გარდა ამისა, გვყავს ზონის უფროსები კონკრეტულ უბნებში და რაიონებში, გვყავს უბნის უფროსები, გვყავს ე.წ. აგიტატორები – ადამიანები, რომლებიც მუშაობენ ამომრჩეველთან, ყოველდღიური შეხება აქვთ, ვსაუბრობთ იმაზე, თუ რა პროექტები ხორციელდება. გყოფნით ეს? საკმარისია? გვყავს ადამიანები, რომლებიც უზრუნველყოფენ ადამიანების მობილიზებას, რათა მოვიდნენ და ხმა მისცენ მათ მიერ მხარდაჭერილ პარტიას“, – განაცხადა კახა კალაძემ.

კითხვაზე, თუ საიდან გადაუხადეს ანაზღაურება არჩევნებში ჩართულ პირებს, კახა კალაძე პასუხობს, რომ აღნიშნული ფინანსები დეკლარირდება.

„რაც შეეხება პარტიის წევრების ხელფასებს, ეს ყველაფერი დეკლარირდება და შესაბამის უწყებებს, ისევე, როგორც ყველა პოლიტიკური პარტია, წარუდგენს „ქართული ოცნებაც“, – აღნიშნა დედაქალაქის მერმა.

„ასეთი წვრილმანი და საფუძველს მოკლებული განცხადებები არჩევნებს ზიანს ვერ მიაყენებს“, – განუცხადა ჟურნალისტებს დედაქალაქის მერმა, კახა კალაძემ პარტია „გახარია საქართველოსთვის“ ლიდერის, გიორგი გახარიას ბრალდებების საპასუხოდ.

მისი თქმით, საპარლამენტო არჩევნები მშვიდ გარემოში ჩატარდა და ამის შესაბამისი დასკვნებიც არსებობს.

„ეს არის ჩვეულებრივი სიცრუის კამპანია. აქვთ მცდელობა, რომ ქვეყანას ზიანი მიაყენონ. რეალურად არჩევნები მშვიდ, თავისუფალ გარემოში ჩატარდა. ეუთო/ოდირმა შესაბამისი განცხადებები გააკეთა, გამოაქვეყნეს შუალედური დასკვნებიც და საბოლოო შეფასებაც. ასეთი წვრილმანი და საფუძველს მოკლებული განცხადებები არჩევნებს ზიანს ვერ მიაყენებს. გაიმარჯვა „ქართულმა ოცნებამ“ იმიტომ, რომ ქვეყნის მოსახლეობის უმრავლესობას უნდა მშვიდობის შენარჩუნება, ეკონომიკური განვითარება“, – განაცხადა თბილისის მერმა.

რაც შეეხება არჩევნების სავარაუდო გაყალბების საქმეზე დაწყებული გამოძიების ფარგლებში პროკურატურაში პარტია „გახარია საქართველოსთვის“ თავმჯდომარის მოადგილის, ნათია მეზვრიშვილის დაბარებას, რომელიც აცხადებს, რომ საგამოძიებო უწყებაში მისვლას არ აპირებს, კახა კალაძის თქმით, ეს არის სპეკულაციების ნაწილი.

„ჩვეულებრივ სპეკულაციებს და სიცრუეს აქვს ადგილი. ხომ ამბობენ არჩევნები გაყალბდაო, ბრიფინგებს უძღვნიდნენ ამ თემას. ცესკო-მ ხომ მიმართა პროკურატურას და გამოძიება იწყება, რათა ყველაფერს შესაბამისი პასუხი გაეცეს. ახლა კეთილი ინებონ და წარმოადგინონ მტკიცებულებები. მაგრამ რა უნდა წარმოადგინონ, რაც ბუნებაში არ არსებობს?“, – აღნიშნა კახა კალაძემ.

ოკუპირებული აფხაზეთის დე ფაქტო ხელისუფლების პოლიტიკით უკმაყოფილება ადამიანებმა საპროტესტო წარწერებით გამოხატეს. წარწერები გამოჩნდა სოხუმის სანაპიროზე, ე.წ პრეზიდენტის ადმინისტრაციის შენობის ცენტრალურ შესასვლელთან.

წარწერებს შორისაა „ხალხის მოღალატეები“.

წითელი საღებავი შეასხეს სანაპიროზე მუჰაჯირების ძეგლსაც.

აქცია, სავარაუდოდ, უკავშირდება ოკუპირებულ აფხაზეთში რუსული კომპანიებისთვის საინვესტიციო პროექტების განხორციელების შესახებ ხელშეკრულების გაფორმებას. ოპოზიციისა და საზოგადოების ზოგი წარმომადგენელი შეთანხმებას ეწინააღმდეგება.

მოსკოვში ხელმოწერილ დოკუმენტს დე ფაქტო პარლამენტის რატიფიცირება ესაჭიროება. ოპოზიცია შეთანხმების წინააღმდეგობისკენ მოწოდებებით გამოდის.

ოპოზიციამ არჩევნების გაყალბების ერთი არგუმენტიც ვერ წარმოადგინა. მთელი მათი პროპაგანდა არის ჭორაობა, სიცრუე და საკუთარ ამომრჩეველთან თავის მართლება, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, რატი იონათამიშვილმა განაცხადა.

იონათამიშვილის თქმით, „როგორც ჩანს, სიცრუისა და ტყუილისკენ არის მიმართული დავალება, რაც მათ მიიღეს“.

„მათთვისაც უკეთესი იქნებოდა, ამომრჩეველს სიმართლეს ეუბნებოდნენ, მაგრამ ამის არც უნარი აქვთ, არც რესურსი. როგორც ჩანს, სიცრუისა და ტყუილისკენ არის მიმართული დავალება, რაც მათ მიიღეს. მოვისმინეთ ობიექტური დამკვირვებლების, მათ შორის, საერთაშორისო შემფასებლების არაეთი განცხადება, რომ საქართველოში არჩევნები ბევრად მაღალ დონეზე იყო ორგანიზებული, ვიდრე ევროპის ცალკეულ ქვეყნებში. ფაქტი როდესაც არ გაქვს, ჭორაობას მიმართავ. ჭორიკანა ოპოზიცია საზოგადოების ნდობას არ იმსახურებს“, – განაცხადა რატი იონათამიშვილმა.

პროკურატურიდან დამირეკეს, ივანიშვილის დაკვეთით არჩევნების გაყალბების ჩასაფარცხად გამოძიება რომ დავიწყეთ, მაგაზე გიბარებთ, რადგან თქვენ გაყალბების მტკიცებულებებზე და სქემებზე საუბრობთო. კარგია, რომ გაყლბების მტკიცებულებებმა და სქემებმა შეგაშინათ; ჩვენ დაკვეთილ, მტკიცებულებების ფალსიფიკაციის და არჩევნების მოპარვის გაფორმების მიზნით წარმოებულ გამოძიებებში არ დავდივართ, – ამის შესახებ პარტია „გახარია საქართველოსთვის“ წევრი ნათია მეზვრიშვილი სოციალურ ქსელში წერს.

„უკვე არაერთხელ ვთქვი და კიდევ ერთხელ გავიმეორებ: ათობით განცხადება გვაქვს ოფიციალურად შემოტანილი (მტკიცებულებებით დადასტურებული), რომლებიც არჩევნების გაყალბების მიზნით ძალადობაზე, მუქარაზე, კორუფციაზე მიუთითებს. არცერთზე არათუ გამოძიება არ დაგიწყიათ, არც კი დაგირეკავთ. შესაბამისად, როგორც კი ჩვენ მიერ იდენტიფიცირებულ ამ ნამდვილ დანაშაულებზე ნამდვილ გამოძიებას (ცალკე და არა მაგავე საქმეში) დაიწყებთ, რა თქმა უნდა, მოვალთ და ყველაფერს მოვიტანთ (მიუხედავად იმისა, რომ არ გენდობით);

რაც შეეხება ამ ყალბ გამოძიებას, თუ ჩემ გარეშე გამოძიებას ვერ ატარებთ (რაც ცოტა სასაცილოა, როცა მტკიცებულებები სოციალურ მედიაში, რასაც ჰქვია, ყრია), იცით მაგისტრატი მოსამართლის გზა.

აქვე, ტყუილად გგონიათ, რომ გამაჩერებთ. არჩევნების გაყალბების საქმის ბოლომდე მისაყვანად გავაკეთებ ყველაფერს. პირადად ჩამოვივლი ყველა პარტნიორს, რომ თქვენი საბოლოო დელეგიტიმაცია მოხდეს. შემდეგ კი საქართველოს მოქალაქეებთან ერთად გავატარებთ პროკურატურის, სასამართლოს, სამართალდამცავების და მთლიანად მართლმსაჯულების სისტემის რეფორმას“, – წერს ნათია მეზვრიშვილი.

მე დეზინფორმაციის მხილებას ვცდილობ და რა დეზინფორმაცია, ამათ სხვა ფერები ელანდებათ უკვე. ფსევდორელიგიური თვითჰიპნოზირების გარდა, სხვა ეს არაფრით აიხსნება, – ასე ეხმიანება პარლამენტის თავმჯდომარე, შალვა პაპუაშვილი ოპოზიციის სპეკულაციებს, მის მიერ ბრიფინგზე წარმოდგენილ პრეზენტაციაში, ერთ-ერთ სლაიდზე გამოყენებულ საქართველოს რუკასთან დაკავშირებით, სადაც საქართველოს ის ნაწილები, რომლებიც ოკუპირებულია, რუხი ფერით არის გამოსახული.

მისივე თქმით, როგორც ჩანს, საბოლოოდ იმაზე შეთანხმდებიან, რომ უბრალოდ ვიღაცებს ტელევიზორი არ უვარგა და არჩევნების გაყალბებაც ამის გამო მოელანდათ.

„მე დეზინფორმაციის მხილებას ვცდილობ და რა დეზინფორმაცია, ამათ სხვა ფერები ელანდებათ უკვე. ფსევდორელიგიური თვითჰიპნოზირების გარდა, სხვა ეს არაფრით აიხსნება.
როგორც ჩანს, საბოლოოდ იმაზე შევთანხმდებით, რომ უბრალოდ ვიღაცებს ტელევიზორი არ უვარგა და არჩევნების გაყალბებაც ამის გამო მოელანდათ“, – წერს შალვა პაპუაშვილი.

რუსეთზე ტერიტორიების ჩამბარებლების მსახურებმა საარჩევნო რუკაზე ღია ფერით სარგებლობა გადაწყვიტეს, – წერს „ქართული ოცნების“ აღმასრულებელი მდივანი მამუკა მდინარაძე, რითაც პარლამენტის თავმჯდომარის, შალვა პაპუაშვილის ბრიფინგზე გამოყენებული საქართველოს რუკის ირგვლივ გავრცელებულ განცხადებებს გამოეხმაურა.

როგორც მდინარაძემ განმარტა, საპრეზენტაციო ეკრანზე ღია ფერი კამერებში კარგად არ გამოჩნდა.

მისივე თქმით, პრეზენტაცია ბრიფინგზე დამსწრე ყველა ჟურნალისტს გადაეცა.

„რუსეთზე ტერიტორიების ჩამბარებლების მსახურებმა საარჩევნო რუკაზე ღია ფერით სარგებლობა გადაწყვიტეს. ამას ვამბობთ სულ, რამდენად მდაბიოები არიან!

ვინც ჯერ არ იცის. საპრეზენტაციო ეკრანზე ღია ფერი კამერებში კარგად არ გამოჩნდა და ეს არის ამათი რუკაო – უსამშობლოებმა წამების განსხვავებით დაიწყეს პოსტების წერა, რითაც იმისი გადაფარვა სცადეს, რაც შალვა პაპუაშვილმა მათ ამ ბრიფინგზე დამართა ამავე დროს, პრეზენტაცია ბრიფინგზე დამსწრე ყველა ჟურნალისტს გადაეცა“, – წერს მამუკა მდინარაძე სოციალურ ქსელში.